| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၂၀. ဝီသတိမဝဂ္ဂော
20. Vīsatimavaggo
(၁၉၈) ၅. မဂ္ဂကထာ
(198) 5. Maggakathā
၈၇၂. ပဉ္စင္ဂိကော မဂ္ဂောတိ? အာမန္တာ။ နနု အဋ္ဌင္ဂိကော မဂ္ဂော ဝုတ္တော ဘဂဝတာ, သေယ္ယထိဒံ – သမ္မာဒိဋ္ဌိ။ပေ.။ သမ္မာသမာဓီတိ? အာမန္တာ။ ဟဉ္စိ အဋ္ဌင္ဂိကော မဂ္ဂော ဝုတ္တော ဘဂဝတာ , သေယ္ယထိဒံ – သမ္မာဒိဋ္ဌိ ။ပေ.။ သမ္မာသမာဓိ, နော စ ဝတ ရေ ဝတ္တဗ္ဗေ – ‘‘ပဉ္စင္ဂိကော မဂ္ဂော’’တိ။
872. Pañcaṅgiko maggoti? Āmantā. Nanu aṭṭhaṅgiko maggo vutto bhagavatā, seyyathidaṃ – sammādiṭṭhi…pe… sammāsamādhīti? Āmantā. Hañci aṭṭhaṅgiko maggo vutto bhagavatā , seyyathidaṃ – sammādiṭṭhi …pe… sammāsamādhi, no ca vata re vattabbe – ‘‘pañcaṅgiko maggo’’ti.
ပဉ္စင္ဂိကော မဂ္ဂောတိ? အာမန္တာ။ နနု ဝုတ္တံ ဘဂဝတာ –
Pañcaṅgiko maggoti? Āmantā. Nanu vuttaṃ bhagavatā –
‘‘မဂ္ဂာနံ အဋ္ဌင္ဂိကော သေဋ္ဌော၊ သစ္စာနံ စတုရော ပဒာ။
‘‘Maggānaṃ aṭṭhaṅgiko seṭṭho, saccānaṃ caturo padā;
ဝိရာဂော သေဋ္ဌော ဓမ္မာနံ၊ ဒ္ဝိပဒာနဉ္စ စက္ခုမာ’’တိ 1။
Virāgo seṭṭho dhammānaṃ, dvipadānañca cakkhumā’’ti 2.
အတ္ထေဝ သုတ္တန္တောတိ? အာမန္တာ။ တေန ဟိ အဋ္ဌင္ဂိကော မဂ္ဂောတိ။
Attheva suttantoti? Āmantā. Tena hi aṭṭhaṅgiko maggoti.
၈၇၃. သမ္မာဝာစာ မဂ္ဂင္ဂံ, သာ စ န မဂ္ဂောတိ? အာမန္တာ။ သမ္မာဒိဋ္ဌိ မဂ္ဂင္ဂံ, သာ စ န မဂ္ဂောတိ? န ဟေဝံ ဝတ္တဗ္ဗေ။ပေ.။ သမ္မာဝာစာ မဂ္ဂင္ဂံ, သာ စ န မဂ္ဂောတိ? အာမန္တာ။ သမ္မာသင္ကပ္ပော။ပေ.။ သမ္မာဝာယာမော။ပေ.။ သမ္မာသတိ။ပေ.။ သမ္မာသမာဓိ မဂ္ဂင္ဂံ, သော စ န မဂ္ဂောတိ? န ဟေဝံ ဝတ္တဗ္ဗေ။ပေ.။။
873. Sammāvācā maggaṅgaṃ, sā ca na maggoti? Āmantā. Sammādiṭṭhi maggaṅgaṃ, sā ca na maggoti? Na hevaṃ vattabbe…pe… sammāvācā maggaṅgaṃ, sā ca na maggoti? Āmantā. Sammāsaṅkappo…pe… sammāvāyāmo…pe… sammāsati…pe… sammāsamādhi maggaṅgaṃ, so ca na maggoti? Na hevaṃ vattabbe…pe….
သမ္မာကမ္မန္တော။ပေ.။ သမ္မာအာဇီဝော မဂ္ဂင္ဂံ, သော စ န မဂ္ဂောတိ? အာမန္တာ။ သမ္မာဒိဋ္ဌိ။ပေ.။ သမ္မာသမာဓိ မဂ္ဂင္ဂံ, သော စ န မဂ္ဂောတိ? န ဟေဝံ ဝတ္တဗ္ဗေ။ပေ.။။
Sammākammanto…pe… sammāājīvo maggaṅgaṃ, so ca na maggoti? Āmantā. Sammādiṭṭhi…pe… sammāsamādhi maggaṅgaṃ, so ca na maggoti? Na hevaṃ vattabbe…pe….
သမ္မာဒိဋ္ဌိ မဂ္ဂင္ဂံ, သာ စ မဂ္ဂောတိ? အာမန္တာ။ သမ္မာဝာစာ မဂ္ဂင္ဂံ, သာ စ မဂ္ဂောတိ? န ဟေဝံ ဝတ္တဗ္ဗေ။ပေ.။ သမ္မာဒိဋ္ဌိ မဂ္ဂင္ဂံ, သာ စ မဂ္ဂောတိ? အာမန္တာ။ သမ္မာကမ္မန္တော။ပေ.။ သမ္မာအာဇီဝော မဂ္ဂင္ဂံ, သော စ မဂ္ဂောတိ? န ဟေဝံ ဝတ္တဗ္ဗေ။ပေ.။။
Sammādiṭṭhi maggaṅgaṃ, sā ca maggoti? Āmantā. Sammāvācā maggaṅgaṃ, sā ca maggoti? Na hevaṃ vattabbe…pe… sammādiṭṭhi maggaṅgaṃ, sā ca maggoti? Āmantā. Sammākammanto…pe… sammāājīvo maggaṅgaṃ, so ca maggoti? Na hevaṃ vattabbe…pe….
သမ္မာသင္ကပ္ပော။ပေ.။ သမ္မာဝာယာမော။ပေ.။ သမ္မာသတိ။ပေ.။ သမ္မာသမာဓိ မဂ္ဂင္ဂံ, သော စ မဂ္ဂောတိ? အာမန္တာ။ သမ္မာဝာစာ။ပေ.။ သမ္မာကမ္မန္တော။ပေ.။ သမ္မာအာဇီဝော မဂ္ဂင္ဂံ, သော စ မဂ္ဂောတိ? န ဟေဝံ ဝတ္တဗ္ဗေ။ပေ.။။
Sammāsaṅkappo…pe… sammāvāyāmo…pe… sammāsati…pe… sammāsamādhi maggaṅgaṃ, so ca maggoti? Āmantā. Sammāvācā…pe… sammākammanto…pe… sammāājīvo maggaṅgaṃ, so ca maggoti? Na hevaṃ vattabbe…pe….
၈၇၄. အရိယော အဋ္ဌင္ဂိကော မဂ္ဂောတိ? အာမန္တာ။ နနု ဝုတ္တံ ဘဂဝတာ – ‘‘ပုဗ္ဗေဝ ခော ပနသ္သ ကာယကမ္မံ ဝစီကမ္မံ အာဇီဝော သုပရိသုဒ္ဓော ဟောတိ; ဧဝမသ္သာယံ အရိယော အဋ္ဌင္ဂိကော မဂ္ဂော ဘာဝနာပာရိပူရိံ ဂစ္ဆတီ’’တိ 3! အတ္ထေဝ သုတ္တန္တောတိ? အာမန္တာ။ တေန ဟိ ပဉ္စင္ဂိကော မဂ္ဂောတိ။
874. Ariyo aṭṭhaṅgiko maggoti? Āmantā. Nanu vuttaṃ bhagavatā – ‘‘pubbeva kho panassa kāyakammaṃ vacīkammaṃ ājīvo suparisuddho hoti; evamassāyaṃ ariyo aṭṭhaṅgiko maggo bhāvanāpāripūriṃ gacchatī’’ti 4! Attheva suttantoti? Āmantā. Tena hi pañcaṅgiko maggoti.
၈၇၅. ပဉ္စင္ဂိကော မဂ္ဂောတိ? အာမန္တာ။ နနု ဝုတ္တံ ဘဂဝတာ – ‘‘ယသ္မိံ ခော, သုဘဒ္ဒ, ဓမ္မဝိနယေ အရိယော အဋ္ဌင္ဂိကော မဂ္ဂော န ဥပလဗ္ဘတိ, သမဏောပိ တတ္ထ န ဥပလဗ္ဘတိ, ဒုတိယောပိ တတ္ထ သမဏော န ဥပလဗ္ဘတိ, တတိယောပိ တတ္ထ သမဏော န ဥပလဗ္ဘတိ, စတုတ္ထောပိ တတ္ထ သမဏော န ဥပလဗ္ဘတိ။ ယသ္မိဉ္စ ခော, သုဘဒ္ဒ, ဓမ္မဝိနယေ အရိယော အဋ္ဌင္ဂိကော မဂ္ဂော ဥပလဗ္ဘတိ, သမဏောပိ တတ္ထ ဥပလဗ္ဘတိ, ဒုတိယောပိ။ပေ.။ တတိယောပိ။ပေ.။ စတုတ္ထောပိ တတ္ထ သမဏော ဥပလဗ္ဘတိ။ ဣမသ္မိံ ခော, သုဘဒ္ဒ, ဓမ္မဝိနယေ အရိယော အဋ္ဌင္ဂိကော မဂ္ဂော ဥပလဗ္ဘတိ။ ဣဓေဝ, သုဘဒ္ဒ , သမဏော, ဣဓ ဒုတိယော သမဏော, ဣဓ တတိယော သမဏော, ဣဓ စတုတ္ထော သမဏော။ သုညာ ပရပ္ပဝာဒာ သမဏေဘိ အညေဟီ’’တိ 5! အတ္ထေဝ သုတ္တန္တောတိ? အာမန္တာ။ တေန ဟိ အဋ္ဌင္ဂိကော မဂ္ဂောတိ။
875. Pañcaṅgiko maggoti? Āmantā. Nanu vuttaṃ bhagavatā – ‘‘yasmiṃ kho, subhadda, dhammavinaye ariyo aṭṭhaṅgiko maggo na upalabbhati, samaṇopi tattha na upalabbhati, dutiyopi tattha samaṇo na upalabbhati, tatiyopi tattha samaṇo na upalabbhati, catutthopi tattha samaṇo na upalabbhati. Yasmiñca kho, subhadda, dhammavinaye ariyo aṭṭhaṅgiko maggo upalabbhati, samaṇopi tattha upalabbhati, dutiyopi…pe… tatiyopi…pe… catutthopi tattha samaṇo upalabbhati. Imasmiṃ kho, subhadda, dhammavinaye ariyo aṭṭhaṅgiko maggo upalabbhati. Idheva, subhadda , samaṇo, idha dutiyo samaṇo, idha tatiyo samaṇo, idha catuttho samaṇo. Suññā parappavādā samaṇebhi aññehī’’ti 6! Attheva suttantoti? Āmantā. Tena hi aṭṭhaṅgiko maggoti.
မဂ္ဂကထာ နိဋ္ဌိတာ။
Maggakathā niṭṭhitā.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၅. မဂ္ဂကထာဝဏ္ဏနာ • 5. Maggakathāvaṇṇanā
