| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
20. වීසතිමවග්‌ගො
20. Vīsatimavaggo
(198) 5. මග්‌ගකථා
(198) 5. Maggakathā
872. පඤ්‌චඞ්‌ගිකො මග්‌ගොති? ආමන්‌තා. නනු අට්‌ඨඞ්‌ගිකො මග්‌ගො වුත්‌තො භගවතා, සෙය්‍යථිදං – සම්‌මාදිට්‌ඨි…පෙ.… සම්‌මාසමාධීති? ආමන්‌තා. හඤ්‌චි අට්‌ඨඞ්‌ගිකො මග්‌ගො වුත්‌තො භගවතා , සෙය්‍යථිදං – සම්‌මාදිට්‌ඨි …පෙ.… සම්‌මාසමාධි, නො ච වත රෙ වත්‌තබ්‌බෙ – ‘‘පඤ්‌චඞ්‌ගිකො මග්‌ගො’’ති.
872. Pañcaṅgiko maggoti? Āmantā. Nanu aṭṭhaṅgiko maggo vutto bhagavatā, seyyathidaṃ – sammādiṭṭhi…pe… sammāsamādhīti? Āmantā. Hañci aṭṭhaṅgiko maggo vutto bhagavatā , seyyathidaṃ – sammādiṭṭhi …pe… sammāsamādhi, no ca vata re vattabbe – ‘‘pañcaṅgiko maggo’’ti.
පඤ්‌චඞ්‌ගිකො මග්‌ගොති? ආමන්‌තා. නනු වුත්‌තං භගවතා –
Pañcaṅgiko maggoti? Āmantā. Nanu vuttaṃ bhagavatā –
‘‘මග්‌ගානං අට්‌ඨඞ්‌ගිකො සෙට්‌ඨො, සච්‌චානං චතුරො පදා;
‘‘Maggānaṃ aṭṭhaṅgiko seṭṭho, saccānaṃ caturo padā;
විරාගො සෙට්‌ඨො ධම්‌මානං, ද්‌විපදානඤ්‌ච චක්‌ඛුමා’’ති 1.
Virāgo seṭṭho dhammānaṃ, dvipadānañca cakkhumā’’ti 2.
අත්‌ථෙව සුත්‌තන්‌තොති? ආමන්‌තා. තෙන හි අට්‌ඨඞ්‌ගිකො මග්‌ගොති.
Attheva suttantoti? Āmantā. Tena hi aṭṭhaṅgiko maggoti.
873. සම්‌මාවාචා මග්‌ගඞ්‌ගං, සා ච න මග්‌ගොති? ආමන්‌තා. සම්‌මාදිට්‌ඨි මග්‌ගඞ්‌ගං, සා ච න මග්‌ගොති? න හෙවං වත්‌තබ්‌බෙ…පෙ.… සම්‌මාවාචා මග්‌ගඞ්‌ගං, සා ච න මග්‌ගොති? ආමන්‌තා. සම්‌මාසඞ්‌කප්‌පො…පෙ.… සම්‌මාවායාමො…පෙ.… සම්‌මාසති…පෙ.… සම්‌මාසමාධි මග්‌ගඞ්‌ගං, සො ච න මග්‌ගොති? න හෙවං වත්‌තබ්‌බෙ…පෙ.….
873. Sammāvācā maggaṅgaṃ, sā ca na maggoti? Āmantā. Sammādiṭṭhi maggaṅgaṃ, sā ca na maggoti? Na hevaṃ vattabbe…pe… sammāvācā maggaṅgaṃ, sā ca na maggoti? Āmantā. Sammāsaṅkappo…pe… sammāvāyāmo…pe… sammāsati…pe… sammāsamādhi maggaṅgaṃ, so ca na maggoti? Na hevaṃ vattabbe…pe….
සම්‌මාකම්‌මන්‌තො…පෙ.… සම්‌මාආජීවො මග්‌ගඞ්‌ගං, සො ච න මග්‌ගොති? ආමන්‌තා. සම්‌මාදිට්‌ඨි…පෙ.… සම්‌මාසමාධි මග්‌ගඞ්‌ගං, සො ච න මග්‌ගොති? න හෙවං වත්‌තබ්‌බෙ…පෙ.….
Sammākammanto…pe… sammāājīvo maggaṅgaṃ, so ca na maggoti? Āmantā. Sammādiṭṭhi…pe… sammāsamādhi maggaṅgaṃ, so ca na maggoti? Na hevaṃ vattabbe…pe….
සම්‌මාදිට්‌ඨි මග්‌ගඞ්‌ගං, සා ච මග්‌ගොති? ආමන්‌තා. සම්‌මාවාචා මග්‌ගඞ්‌ගං, සා ච මග්‌ගොති? න හෙවං වත්‌තබ්‌බෙ…පෙ.… සම්‌මාදිට්‌ඨි මග්‌ගඞ්‌ගං, සා ච මග්‌ගොති? ආමන්‌තා. සම්‌මාකම්‌මන්‌තො…පෙ.… සම්‌මාආජීවො මග්‌ගඞ්‌ගං, සො ච මග්‌ගොති? න හෙවං වත්‌තබ්‌බෙ…පෙ.….
Sammādiṭṭhi maggaṅgaṃ, sā ca maggoti? Āmantā. Sammāvācā maggaṅgaṃ, sā ca maggoti? Na hevaṃ vattabbe…pe… sammādiṭṭhi maggaṅgaṃ, sā ca maggoti? Āmantā. Sammākammanto…pe… sammāājīvo maggaṅgaṃ, so ca maggoti? Na hevaṃ vattabbe…pe….
සම්‌මාසඞ්‌කප්‌පො…පෙ.… සම්‌මාවායාමො…පෙ.… සම්‌මාසති…පෙ.… සම්‌මාසමාධි මග්‌ගඞ්‌ගං, සො ච මග්‌ගොති? ආමන්‌තා. සම්‌මාවාචා…පෙ.… සම්‌මාකම්‌මන්‌තො…පෙ.… සම්‌මාආජීවො මග්‌ගඞ්‌ගං, සො ච මග්‌ගොති? න හෙවං වත්‌තබ්‌බෙ…පෙ.….
Sammāsaṅkappo…pe… sammāvāyāmo…pe… sammāsati…pe… sammāsamādhi maggaṅgaṃ, so ca maggoti? Āmantā. Sammāvācā…pe… sammākammanto…pe… sammāājīvo maggaṅgaṃ, so ca maggoti? Na hevaṃ vattabbe…pe….
874. අරියො අට්‌ඨඞ්‌ගිකො මග්‌ගොති? ආමන්‌තා. නනු වුත්‌තං භගවතා – ‘‘පුබ්‌බෙව ඛො පනස්‌ස කායකම්‌මං වචීකම්‌මං ආජීවො සුපරිසුද්‌ධො හොති; එවමස්‌සායං අරියො අට්‌ඨඞ්‌ගිකො මග්‌ගො භාවනාපාරිපූරිං ගච්‌ඡතී’’ති 3! අත්‌ථෙව සුත්‌තන්‌තොති? ආමන්‌තා. තෙන හි පඤ්‌චඞ්‌ගිකො මග්‌ගොති.
874. Ariyo aṭṭhaṅgiko maggoti? Āmantā. Nanu vuttaṃ bhagavatā – ‘‘pubbeva kho panassa kāyakammaṃ vacīkammaṃ ājīvo suparisuddho hoti; evamassāyaṃ ariyo aṭṭhaṅgiko maggo bhāvanāpāripūriṃ gacchatī’’ti 4! Attheva suttantoti? Āmantā. Tena hi pañcaṅgiko maggoti.
875. පඤ්‌චඞ්‌ගිකො මග්‌ගොති? ආමන්‌තා. නනු වුත්‌තං භගවතා – ‘‘යස්‌මිං ඛො, සුභද්‌ද, ධම්‌මවිනයෙ අරියො අට්‌ඨඞ්‌ගිකො මග්‌ගො න උපලබ්‌භති, සමණොපි තත්‌ථ න උපලබ්‌භති, දුතියොපි තත්‌ථ සමණො න උපලබ්‌භති, තතියොපි තත්‌ථ සමණො න උපලබ්‌භති, චතුත්‌ථොපි තත්‌ථ සමණො න උපලබ්‌භති. යස්‌මිඤ්‌ච ඛො, සුභද්‌ද, ධම්‌මවිනයෙ අරියො අට්‌ඨඞ්‌ගිකො මග්‌ගො උපලබ්‌භති, සමණොපි තත්‌ථ උපලබ්‌භති, දුතියොපි…පෙ.… තතියොපි…පෙ.… චතුත්‌ථොපි තත්‌ථ සමණො උපලබ්‌භති. ඉමස්‌මිං ඛො, සුභද්‌ද, ධම්‌මවිනයෙ අරියො අට්‌ඨඞ්‌ගිකො මග්‌ගො උපලබ්‌භති. ඉධෙව, සුභද්‌ද , සමණො, ඉධ දුතියො සමණො, ඉධ තතියො සමණො, ඉධ චතුත්‌ථො සමණො. සුඤ්‌ඤා පරප්‌පවාදා සමණෙභි අඤ්‌ඤෙහී’’ති 5! අත්‌ථෙව සුත්‌තන්‌තොති? ආමන්‌තා. තෙන හි අට්‌ඨඞ්‌ගිකො මග්‌ගොති.
875. Pañcaṅgiko maggoti? Āmantā. Nanu vuttaṃ bhagavatā – ‘‘yasmiṃ kho, subhadda, dhammavinaye ariyo aṭṭhaṅgiko maggo na upalabbhati, samaṇopi tattha na upalabbhati, dutiyopi tattha samaṇo na upalabbhati, tatiyopi tattha samaṇo na upalabbhati, catutthopi tattha samaṇo na upalabbhati. Yasmiñca kho, subhadda, dhammavinaye ariyo aṭṭhaṅgiko maggo upalabbhati, samaṇopi tattha upalabbhati, dutiyopi…pe… tatiyopi…pe… catutthopi tattha samaṇo upalabbhati. Imasmiṃ kho, subhadda, dhammavinaye ariyo aṭṭhaṅgiko maggo upalabbhati. Idheva, subhadda , samaṇo, idha dutiyo samaṇo, idha tatiyo samaṇo, idha catuttho samaṇo. Suññā parappavādā samaṇebhi aññehī’’ti 6! Attheva suttantoti? Āmantā. Tena hi aṭṭhaṅgiko maggoti.
මග්‌ගකථා නිට්‌ඨිතා.
Maggakathā niṭṭhitā.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 5. මග්‌ගකථාවණ්‌ණනා • 5. Maggakathāvaṇṇanā
