| Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi |
༢༠. ཝཱིསཏིམཝགྒོ
20. Vīsatimavaggo
(༡༩༨) ༥. མགྒཀཐཱ
(198) 5. Maggakathā
༨༧༢. པཉྩངྒིཀོ མགྒོཏི? ཨཱམནྟཱ། ནནུ ཨཊྛངྒིཀོ མགྒོ ཝུཏྟོ བྷགཝཏཱ, སེཡྻཐིདཾ – སམྨཱདིཊྛི…པེ॰… སམྨཱསམཱདྷཱིཏི? ཨཱམནྟཱ། ཧཉྩི ཨཊྛངྒིཀོ མགྒོ ཝུཏྟོ བྷགཝཏཱ , སེཡྻཐིདཾ – སམྨཱདིཊྛི …པེ॰… སམྨཱསམཱདྷི, ནོ ཙ ཝཏ རེ ཝཏྟབྦེ – ‘‘པཉྩངྒིཀོ མགྒོ’’ཏི།
872. Pañcaṅgiko maggoti? Āmantā. Nanu aṭṭhaṅgiko maggo vutto bhagavatā, seyyathidaṃ – sammādiṭṭhi…pe… sammāsamādhīti? Āmantā. Hañci aṭṭhaṅgiko maggo vutto bhagavatā , seyyathidaṃ – sammādiṭṭhi …pe… sammāsamādhi, no ca vata re vattabbe – ‘‘pañcaṅgiko maggo’’ti.
པཉྩངྒིཀོ མགྒོཏི? ཨཱམནྟཱ། ནནུ ཝུཏྟཾ བྷགཝཏཱ –
Pañcaṅgiko maggoti? Āmantā. Nanu vuttaṃ bhagavatā –
‘‘མགྒཱནཾ ཨཊྛངྒིཀོ སེཊྛོ, སཙྩཱནཾ ཙཏུརོ པདཱ།
‘‘Maggānaṃ aṭṭhaṅgiko seṭṭho, saccānaṃ caturo padā;
ཨཏྠེཝ སུཏྟནྟོཏི? ཨཱམནྟཱ། ཏེན ཧི ཨཊྛངྒིཀོ མགྒོཏི།
Attheva suttantoti? Āmantā. Tena hi aṭṭhaṅgiko maggoti.
༨༧༣. སམྨཱཝཱཙཱ མགྒངྒཾ, སཱ ཙ ན མགྒོཏི? ཨཱམནྟཱ། སམྨཱདིཊྛི མགྒངྒཾ, སཱ ཙ ན མགྒོཏི? ན ཧེཝཾ ཝཏྟབྦེ…པེ॰… སམྨཱཝཱཙཱ མགྒངྒཾ, སཱ ཙ ན མགྒོཏི? ཨཱམནྟཱ། སམྨཱསངྐཔྤོ…པེ॰… སམྨཱཝཱཡཱམོ…པེ॰… སམྨཱསཏི…པེ॰… སམྨཱསམཱདྷི མགྒངྒཾ, སོ ཙ ན མགྒོཏི? ན ཧེཝཾ ཝཏྟབྦེ…པེ॰…།
873. Sammāvācā maggaṅgaṃ, sā ca na maggoti? Āmantā. Sammādiṭṭhi maggaṅgaṃ, sā ca na maggoti? Na hevaṃ vattabbe…pe… sammāvācā maggaṅgaṃ, sā ca na maggoti? Āmantā. Sammāsaṅkappo…pe… sammāvāyāmo…pe… sammāsati…pe… sammāsamādhi maggaṅgaṃ, so ca na maggoti? Na hevaṃ vattabbe…pe….
སམྨཱཀམྨནྟོ…པེ॰… སམྨཱཨཱཛཱིཝོ མགྒངྒཾ, སོ ཙ ན མགྒོཏི? ཨཱམནྟཱ། སམྨཱདིཊྛི…པེ॰… སམྨཱསམཱདྷི མགྒངྒཾ, སོ ཙ ན མགྒོཏི? ན ཧེཝཾ ཝཏྟབྦེ…པེ॰…།
Sammākammanto…pe… sammāājīvo maggaṅgaṃ, so ca na maggoti? Āmantā. Sammādiṭṭhi…pe… sammāsamādhi maggaṅgaṃ, so ca na maggoti? Na hevaṃ vattabbe…pe….
སམྨཱདིཊྛི མགྒངྒཾ, སཱ ཙ མགྒོཏི? ཨཱམནྟཱ། སམྨཱཝཱཙཱ མགྒངྒཾ, སཱ ཙ མགྒོཏི? ན ཧེཝཾ ཝཏྟབྦེ…པེ॰… སམྨཱདིཊྛི མགྒངྒཾ, སཱ ཙ མགྒོཏི? ཨཱམནྟཱ། སམྨཱཀམྨནྟོ…པེ॰… སམྨཱཨཱཛཱིཝོ མགྒངྒཾ, སོ ཙ མགྒོཏི? ན ཧེཝཾ ཝཏྟབྦེ…པེ॰…།
Sammādiṭṭhi maggaṅgaṃ, sā ca maggoti? Āmantā. Sammāvācā maggaṅgaṃ, sā ca maggoti? Na hevaṃ vattabbe…pe… sammādiṭṭhi maggaṅgaṃ, sā ca maggoti? Āmantā. Sammākammanto…pe… sammāājīvo maggaṅgaṃ, so ca maggoti? Na hevaṃ vattabbe…pe….
སམྨཱསངྐཔྤོ…པེ॰… སམྨཱཝཱཡཱམོ…པེ॰… སམྨཱསཏི…པེ॰… སམྨཱསམཱདྷི མགྒངྒཾ, སོ ཙ མགྒོཏི? ཨཱམནྟཱ། སམྨཱཝཱཙཱ…པེ॰… སམྨཱཀམྨནྟོ…པེ॰… སམྨཱཨཱཛཱིཝོ མགྒངྒཾ, སོ ཙ མགྒོཏི? ན ཧེཝཾ ཝཏྟབྦེ…པེ॰…།
Sammāsaṅkappo…pe… sammāvāyāmo…pe… sammāsati…pe… sammāsamādhi maggaṅgaṃ, so ca maggoti? Āmantā. Sammāvācā…pe… sammākammanto…pe… sammāājīvo maggaṅgaṃ, so ca maggoti? Na hevaṃ vattabbe…pe….
༨༧༤. ཨརིཡོ ཨཊྛངྒིཀོ མགྒོཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘པུབྦེཝ ཁོ པནསྶ ཀཱཡཀམྨཾ ཝཙཱིཀམྨཾ ཨཱཛཱིཝོ སུཔརིསུདྡྷོ ཧོཏི; ཨེཝམསྶཱཡཾ ཨརིཡོ ཨཊྛངྒིཀོ མགྒོ བྷཱཝནཱཔཱརིཔཱུརིཾ གཙྪཏཱི’’ཏི 3! ཨཏྠེཝ སུཏྟནྟོཏི? ཨཱམནྟཱ། ཏེན ཧི པཉྩངྒིཀོ མགྒོཏི།
874. Ariyo aṭṭhaṅgiko maggoti? Āmantā. Nanu vuttaṃ bhagavatā – ‘‘pubbeva kho panassa kāyakammaṃ vacīkammaṃ ājīvo suparisuddho hoti; evamassāyaṃ ariyo aṭṭhaṅgiko maggo bhāvanāpāripūriṃ gacchatī’’ti 4! Attheva suttantoti? Āmantā. Tena hi pañcaṅgiko maggoti.
༨༧༥. པཉྩངྒིཀོ མགྒོཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘ཡསྨིཾ ཁོ, སུབྷདྡ, དྷམྨཝིནཡེ ཨརིཡོ ཨཊྛངྒིཀོ མགྒོ ན ཨུཔལབྦྷཏི, སམཎོཔི ཏཏྠ ན ཨུཔལབྦྷཏི, དུཏིཡོཔི ཏཏྠ སམཎོ ན ཨུཔལབྦྷཏི, ཏཏིཡོཔི ཏཏྠ སམཎོ ན ཨུཔལབྦྷཏི, ཙཏུཏྠོཔི ཏཏྠ སམཎོ ན ཨུཔལབྦྷཏི། ཡསྨིཉྩ ཁོ, སུབྷདྡ, དྷམྨཝིནཡེ ཨརིཡོ ཨཊྛངྒིཀོ མགྒོ ཨུཔལབྦྷཏི, སམཎོཔི ཏཏྠ ཨུཔལབྦྷཏི, དུཏིཡོཔི…པེ॰… ཏཏིཡོཔི…པེ॰… ཙཏུཏྠོཔི ཏཏྠ སམཎོ ཨུཔལབྦྷཏི། ཨིམསྨིཾ ཁོ, སུབྷདྡ, དྷམྨཝིནཡེ ཨརིཡོ ཨཊྛངྒིཀོ མགྒོ ཨུཔལབྦྷཏི། ཨིདྷེཝ, སུབྷདྡ , སམཎོ, ཨིདྷ དུཏིཡོ སམཎོ, ཨིདྷ ཏཏིཡོ སམཎོ, ཨིདྷ ཙཏུཏྠོ སམཎོ། སུཉྙཱ པརཔྤཝཱདཱ སམཎེབྷི ཨཉྙེཧཱི’’ཏི 5! ཨཏྠེཝ སུཏྟནྟོཏི? ཨཱམནྟཱ། ཏེན ཧི ཨཊྛངྒིཀོ མགྒོཏི།
875. Pañcaṅgiko maggoti? Āmantā. Nanu vuttaṃ bhagavatā – ‘‘yasmiṃ kho, subhadda, dhammavinaye ariyo aṭṭhaṅgiko maggo na upalabbhati, samaṇopi tattha na upalabbhati, dutiyopi tattha samaṇo na upalabbhati, tatiyopi tattha samaṇo na upalabbhati, catutthopi tattha samaṇo na upalabbhati. Yasmiñca kho, subhadda, dhammavinaye ariyo aṭṭhaṅgiko maggo upalabbhati, samaṇopi tattha upalabbhati, dutiyopi…pe… tatiyopi…pe… catutthopi tattha samaṇo upalabbhati. Imasmiṃ kho, subhadda, dhammavinaye ariyo aṭṭhaṅgiko maggo upalabbhati. Idheva, subhadda , samaṇo, idha dutiyo samaṇo, idha tatiyo samaṇo, idha catuttho samaṇo. Suññā parappavādā samaṇebhi aññehī’’ti 6! Attheva suttantoti? Āmantā. Tena hi aṭṭhaṅgiko maggoti.
མགྒཀཐཱ ནིཊྛིཏཱ།
Maggakathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༥. མགྒཀཐཱཝཎྞནཱ • 5. Maggakathāvaṇṇanā
