| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༩. མགྒཀཐཱ
9. Maggakathā
༢༣༧. མགྒོཏི ཀེནཊྛེན མགྒོ? སོཏཱཔཏྟིམགྒཀྑཎེ དསྶནཊྛེན སམྨཱདིཊྛི མིཙྪཱདིཊྛིཡཱ པཧཱནཱཡ མགྒོ ཙེཝ ཧེཏུ ཙ, སཧཛཱཏཱནཾ དྷམྨཱནཾ ཨུཔཏྠམྦྷནཱཡ མགྒོ ཙེཝ ཧེཏུ ཙ, ཀིལེསཱནཾ པརིཡཱདཱནཱཡ མགྒོ ཙེཝ ཧེཏུ ཙ, པཊིཝེདྷཱདིཝིསོདྷནཱཡ མགྒོ ཙེཝ ཧེཏུ ཙ, ཙིཏྟསྶ ཨདྷིཊྛཱནཱཡ མགྒོ ཙེཝ ཧེཏུ ཙ, ཙིཏྟསྶ ཝོདཱནཱཡ མགྒོ ཙེཝ ཧེཏུ ཙ, ཝིསེསཱདྷིགམཱཡ མགྒོ ཙེཝ ཧེཏུ ཙ, ཨུཏྟརི པཊིཝེདྷཱཡ 1 མགྒོ ཙེཝ ཧེཏུ ཙ, སཙྩཱབྷིསམཡཱཡ མགྒོ ཙེཝ ཧེཏུ ཙ, ནིརོདྷེ པཏིཊྛཱཔནཱཡ མགྒོ ཙེཝ ཧེཏུ ཙ།
237. Maggoti kenaṭṭhena maggo? Sotāpattimaggakkhaṇe dassanaṭṭhena sammādiṭṭhi micchādiṭṭhiyā pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya 2 maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
ཨབྷིནིརོཔནཊྛེན སམྨཱསངྐཔྤོ མིཙྪཱསངྐཔྤསྶ པཧཱནཱཡ མགྒོ ཙེཝ ཧེཏུ ཙ, སཧཛཱཏཱནཾ དྷམྨཱནཾ ཨུཔཏྠམྦྷནཱཡ མགྒོ ཙེཝ ཧེཏུ ཙ, ཀིལེསཱནཾ པརིཡཱདཱནཱཡ མགྒོ ཙེཝ ཧེཏུ ཙ, པཊིཝེདྷཱདིཝིསོདྷནཱཡ མགྒོ ཙེཝ ཧེཏུ ཙ, ཙིཏྟསྶ ཨདྷིཊྛཱནཱཡ མགྒོ ཙེཝ ཧེཏུ ཙ, ཙིཏྟསྶ ཝོདཱནཱཡ མགྒོ ཙེཝ ཧེཏུ ཙ, ཝིསེསཱདྷིགམཱཡ མགྒོ ཙེཝ ཧེཏུ ཙ, ཨུཏྟརི པཊིཝེདྷཱཡ མགྒོ ཙེཝ ཧེཏུ ཙ, སཙྩཱབྷིསམཡཱཡ མགྒོ ཙེཝ ཧེཏུ ཙ, ནིརོདྷེ པཏིཊྛཱཔནཱཡ མགྒོ ཙེཝ ཧེཏུ ཙ།
Abhiniropanaṭṭhena sammāsaṅkappo micchāsaṅkappassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
པརིགྒཧཊྛེན སམྨཱཝཱཙཱ མིཙྪཱཝཱཙཱཡ པཧཱནཱཡ མགྒོ ཙེཝ ཧེཏུ ཙ, སཧཛཱཏཱནཾ དྷམྨཱནཾ ཨུཔཏྠམྦྷནཱཡ མགྒོ ཙེཝ ཧེཏུ ཙ, ཀིལེསཱནཾ པརིཡཱདཱནཱཡ མགྒོ ཙེཝ ཧེཏུ ཙ, པཊིཝེདྷཱདིཝིསོདྷནཱཡ མགྒོ ཙེཝ ཧེཏུ ཙ, ཙིཏྟསྶ ཨདྷིཊྛཱནཱཡ མགྒོ ཙེཝ ཧེཏུ ཙ, ཙིཏྟསྶ ཝོདཱནཱཡ མགྒོ ཙེཝ ཧེཏུ ཙ, ཝིསེསཱདྷིགམཱཡ མགྒོ ཙེཝ ཧེཏུ ཙ, ཨུཏྟརི པཊིཝེདྷཱཡ མགྒོ ཙེཝ ཧེཏུ ཙ, སཙྩཱབྷིསམཡཱཡ མགྒོ ཙེཝ ཧེཏུ ཙ, ནིརོདྷེ པཏིཊྛཱཔནཱཡ མགྒོ ཙེཝ ཧེཏུ ཙ།
Pariggahaṭṭhena sammāvācā micchāvācāya pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
སམུཊྛཱནཊྛེན སམྨཱཀམྨནྟོ མིཙྪཱཀམྨནྟསྶ པཧཱནཱཡ མགྒོ ཙེཝ ཧེཏུ ཙ, སཧཛཱཏཱནཾ དྷམྨཱནཾ ཨུཔཏྠམྦྷནཱཡ མགྒོ ཙེཝ ཧེཏུ ཙ, ཀིལེསཱནཾ པརིཡཱདཱནཱཡ མགྒོ ཙེཝ ཧེཏུ ཙ པཊིཝེདྷཱདིཝིསོདྷནཱཡ མགྒོ ཙེཝ ཧེཏུ ཙ, ཙིཏྟསྶ ཨདྷིཊྛཱནཱཡ མགྒོ ཙེཝ ཧེཏུ ཙ, ཙིཏྟསྶ ཝོདཱནཱཡ མགྒོ ཙེཝ ཧེཏུ ཙ, ཝིསེསཱདྷིགམཱཡ མགྒོ ཙེཝ ཧེཏུ ཙ, ཨུཏྟརི པཊིཝེདྷཱཡ མགྒོ ཙེཝ ཧེཏུ ཙ, སཙྩཱབྷིསམཡཱཡ མགྒོ ཙེཝ ཧེཏུ ཙ, ནིརོདྷེ པཏིཊྛཱཔནཱཡ མགྒོ ཙེཝ ཧེཏུ ཙ།
Samuṭṭhānaṭṭhena sammākammanto micchākammantassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
ཝོདཱནཊྛེན སམྨཱཨཱཛཱིཝོ མིཙྪཱཨཱཛཱིཝསྶ པཧཱནཱཡ མགྒོ ཙེཝ ཧེཏུ ཙ…པེ॰… པགྒཧཊྛེན སམྨཱཝཱཡཱམོ མིཙྪཱཝཱཡཱམསྶ པཧཱནཱཡ མགྒོ ཙེཝ ཧེཏུ ཙ…པེ॰… ཨུཔཊྛཱནཊྛེན སམྨཱསཏི མིཙྪཱསཏིཡཱ པཧཱནཱཡ མགྒོ ཙེཝ ཧེཏུ ཙ…པེ॰… ཨཝིཀྑེཔཊྛེན སམྨཱསམཱདྷི མིཙྪཱསམཱདྷིསྶ པཧཱནཱཡ མགྒོ ཙེཝ ཧེཏུ ཙ, སཧཛཱཏཱནཾ དྷམྨཱནཾ ཨུཔཏྠམྦྷནཱཡ མགྒོ ཙེཝ ཧེཏུ ཙ, ཀིལེསཱནཾ པརིཡཱདཱནཱཡ མགྒོ ཙེཝ ཧེཏུ ཙ, པཊིཝེདྷཱདིཝིསོདྷནཱཡ མགྒོ ཙེཝ ཧེཏུ ཙ, ཙིཏྟསྶ ཨདྷིཊྛཱནཱཡ མགྒོ ཙེཝ ཧེཏུ ཙ, ཙིཏྟསྶ ཝོདཱནཱཡ མགྒོ ཙེཝ ཧེཏུ ཙ, ཝིསེསཱདྷིགམཱཡ མགྒོ ཙེཝ ཧེཏུ ཙ, ཨུཏྟརི པཊིཝེདྷཱཡ མགྒོ ཙེཝ ཧེཏུ ཙ, སཙྩཱབྷིསམཡཱཡ མགྒོ ཙེཝ ཧེཏུ ཙ, ནིརོདྷེ པཏིཊྛཱཔནཱཡ མགྒོ ཙེཝ ཧེཏུ ཙ།
Vodānaṭṭhena sammāājīvo micchāājīvassa pahānāya maggo ceva hetu ca…pe… paggahaṭṭhena sammāvāyāmo micchāvāyāmassa pahānāya maggo ceva hetu ca…pe… upaṭṭhānaṭṭhena sammāsati micchāsatiyā pahānāya maggo ceva hetu ca…pe… avikkhepaṭṭhena sammāsamādhi micchāsamādhissa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
སཀདཱགཱམིམགྒཀྑཎེ དསྶནཊྛེན སམྨཱདིཊྛི…པེ॰… ཨཝིཀྑེཔཊྛེན སམྨཱསམཱདྷི ཨོལཱ༹རིཀསྶ ཀཱམརཱགསཉྙོཛནསྶ པཊིགྷསཉྙོཛནསྶ ཨོལཱ༹རིཀསྶ ཀཱམརཱགཱནུསཡསྶ པཊིགྷཱནུསཡསྶ པཧཱནཱཡ མགྒོ ཙེཝ ཧེཏུ ཙ, སཧཛཱཏཱནཾ དྷམྨཱནཾ ཨུཔཏྠམྦྷནཱཡ མགྒོ ཙེཝ ཧེཏུ ཙ, ཀིལེསཱནཾ པརིཡཱདཱནཱཡ མགྒོ ཙེཝ ཧེཏུ ཙ, པཊིཝེདྷཱདིཝིསོདྷནཱཡ མགྒོ ཙེཝ ཧེཏུ ཙ, ཙིཏྟསྶ ཨདྷིཊྛཱནཱཡ མགྒོ ཙེཝ ཧེཏུ ཙ, ཙིཏྟསྶ ཝོདཱནཱཡ མགྒོ ཙེཝ ཧེཏུ ཙ, ཝིསེསཱདྷིགམཱཡ མགྒོ ཙེཝ ཧེཏུ ཙ, ཨུཏྟརི པཊིཝེདྷཱཡ མགྒོ ཙེཝ ཧེཏུ ཙ, སཙྩཱབྷིསམཡཱཡ མགྒོ ཙེཝ ཧེཏུ ཙ, ནིརོདྷེ པཏིཊྛཱཔནཱཡ མགྒོ ཙེཝ ཧེཏུ ཙ།
Sakadāgāmimaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi oḷārikassa kāmarāgasaññojanassa paṭighasaññojanassa oḷārikassa kāmarāgānusayassa paṭighānusayassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
ཨནཱགཱམིམགྒཀྑཎེ དསྶནཊྛེན སམྨཱདིཊྛི…པེ॰… ཨཝིཀྑེཔཊྛེན སམྨཱསམཱདྷི ཨནུསཧགཏསྶ ཀཱམརཱགསཉྙོཛནསྶ པཊིགྷསཉྙོཛནསྶ, ཨནུསཧགཏསྶ ཀཱམརཱགཱནུསཡསྶ པཊིགྷཱནུསཡསྶ པཧཱནཱཡ མགྒོ ཙེཝ ཧེཏུ ཙ, སཧཛཱཏཱནཾ དྷམྨཱནཾ ཨུཔཏྠམྦྷནཱཡ མགྒོ ཙེཝ ཧེཏུ ཙ, ཀིལེསཱནཾ པརིཡཱདཱནཱཡ མགྒོ ཙེཝ ཧེཏུ ཙ, པཊིཝེདྷཱདིཝིསོདྷནཱཡ མགྒོ ཙེཝ ཧེཏུ ཙ, ཙིཏྟསྶ ཨདྷིཊྛཱནཱཡ མགྒོ ཙེཝ ཧེཏུ ཙ, ཙིཏྟསྶ ཝོདཱནཱཡ མགྒོ ཙེཝ ཧེཏུ ཙ , ཝིསེསཱདྷིགམཱཡ མགྒོ ཙེཝ ཧེཏུ ཙ, ཨུཏྟརི པཊིཝེདྷཱཡ མགྒོ ཙེཝ ཧེཏུ ཙ, སཙྩཱབྷིསམཡཱཡ མགྒོ ཙེཝ ཧེཏུ ཙ, ནིརོདྷེ པཏིཊྛཱཔནཱཡ མགྒོ ཙེཝ ཧེཏུ ཙ།
Anāgāmimaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi anusahagatassa kāmarāgasaññojanassa paṭighasaññojanassa, anusahagatassa kāmarāgānusayassa paṭighānusayassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca , visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
ཨརཧཏྟམགྒཀྑཎེ དསྶནཊྛེན སམྨཱདིཊྛི…པེ॰… ཨཝིཀྑེཔཊྛེན སམྨཱསམཱདྷི རཱུཔརཱགསྶ ཨརཱུཔརཱགསྶ མཱནསྶ ཨུདྡྷཙྩསྶ ཨཝིཛྫཱཡ, མཱནཱནུསཡསྶ བྷཝརཱགཱནུསཡསྶ ཨཝིཛྫཱནུསཡསྶ པཧཱནཱཡ མགྒོ ཙེཝ ཧེཏུ ཙ, སཧཛཱཏཱནཾ དྷམྨཱནཾ ཨུཔཏྠམྦྷནཱཡ མགྒོ ཙེཝ ཧེཏུ ཙ, ཀིལེསཱནཾ པརིཡཱདཱནཱཡ མགྒོ ཙེཝ ཧེཏུ ཙ, པཊིཝེདྷཱདིཝིསོདྷནཱཡ མགྒོ ཙེཝ ཧེཏུ ཙ, ཙིཏྟསྶ ཨདྷིཊྛཱནཱཡ མགྒོ ཙེཝ ཧེཏུ ཙ, ཙིཏྟསྶ, ཝོདཱནཱཡ མགྒོ ཙེཝ ཧེཏུ ཙ, ཝིསེསཱདྷིགམཱཡ མགྒོ ཙེཝ ཧེཏུ ཙ, ཨུཏྟརི པཊིཝེདྷཱཡ མགྒོ ཙེཝ ཧེཏུ ཙ, སཙྩཱབྷིསམཡཱཡ མགྒོ ཙེཝ, ཧེཏུ ཙ, ནིརོདྷེ པཏིཊྛཱཔནཱཡ མགྒོ ཙེཝ ཧེཏུ ཙ།
Arahattamaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi rūparāgassa arūparāgassa mānassa uddhaccassa avijjāya, mānānusayassa bhavarāgānusayassa avijjānusayassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa, vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva, hetu ca, nirodhe patiṭṭhāpanāya maggo ceva hetu ca.
དསྶནམགྒོ སམྨཱདིཊྛི, ཨབྷིནིརོཔནམགྒོ སམྨཱསངྐཔྤོ , པརིགྒཧམགྒོ སམྨཱཝཱཙཱ, སམུཊྛཱནམགྒོ སམྨཱཀམྨནྟོ, ཝོདཱནམགྒོ སམྨཱཨཱཛཱིཝོ, པགྒཧམགྒོ སམྨཱཝཱཡཱམོ, ཨུཔཊྛཱནམགྒོ སམྨཱསཏི, ཨཝིཀྑེཔམགྒོ སམྨཱསམཱདྷི། ཨུཔཊྛཱནམགྒོ སཏིསམྦོཛ྄ཛྷངྒོ, པཝིཙཡམགྒོ དྷམྨཝིཙཡསམྦོཛ྄ཛྷངྒོ, པགྒཧམགྒོ ཝཱིརིཡསམྦོཛ྄ཛྷངྒོ, ཕརཎམགྒོ པཱིཏིསམྦོཛ྄ཛྷངྒོ, ཨུཔསམམགྒོ པསྶདྡྷིསམྦོཛ྄ཛྷངྒོ, ཨཝིཀྑེཔམགྒོ སམཱདྷིསམྦོཛ྄ཛྷངྒོ, པཊིསངྑཱནམགྒོ ཨུཔེཀྑཱསམྦོཛ྄ཛྷངྒོ།
Dassanamaggo sammādiṭṭhi, abhiniropanamaggo sammāsaṅkappo , pariggahamaggo sammāvācā, samuṭṭhānamaggo sammākammanto, vodānamaggo sammāājīvo, paggahamaggo sammāvāyāmo, upaṭṭhānamaggo sammāsati, avikkhepamaggo sammāsamādhi. Upaṭṭhānamaggo satisambojjhaṅgo, pavicayamaggo dhammavicayasambojjhaṅgo, paggahamaggo vīriyasambojjhaṅgo, pharaṇamaggo pītisambojjhaṅgo, upasamamaggo passaddhisambojjhaṅgo, avikkhepamaggo samādhisambojjhaṅgo, paṭisaṅkhānamaggo upekkhāsambojjhaṅgo.
ཨསྶདྡྷིཡེ ཨཀམྤིཡམགྒོ སདྡྷཱབལཾ, ཀོསཛྫེ ཨཀམྤིཡམགྒོ ཝཱིརིཡབལཾ, པམཱདེ ཨཀམྤིཡམགྒོ སཏིབལཾ, ཨུདྡྷཙྩེ ཨཀམྤིཡམགྒོ སམཱདྷིབལཾ, ཨཝིཛྫཱཡ ཨཀམྤིཡམགྒོ པཉྙཱབལཾ། ཨདྷིམོཀྑམགྒོ སདྡྷིནྡྲིཡཾ, པགྒཧམགྒོ ཝཱིརིཡིནྡྲིཡཾ, ཨུཔཊྛཱནམགྒོ སཏིནྡྲིཡཾ, ཨཝིཀྑེཔམགྒོ སམཱདྷིནྡྲིཡཾ, དསྶནམགྒོ པཉྙིནྡྲིཡཾ།
Assaddhiye akampiyamaggo saddhābalaṃ, kosajje akampiyamaggo vīriyabalaṃ, pamāde akampiyamaggo satibalaṃ, uddhacce akampiyamaggo samādhibalaṃ, avijjāya akampiyamaggo paññābalaṃ. Adhimokkhamaggo saddhindriyaṃ, paggahamaggo vīriyindriyaṃ, upaṭṭhānamaggo satindriyaṃ, avikkhepamaggo samādhindriyaṃ, dassanamaggo paññindriyaṃ.
ཨཱདྷིཔཏེཡྻཊྛེན ཨིནྡྲིཡཱ མགྒོ, ཨཀམྤིཡཊྛེན བལཱ མགྒོ, ནིཡྻཱནཊྛེན བོཛ྄ཛྷངྒཱ མགྒོ, ཧེཏུཊྛེན མགྒངྒཱ མགྒོ, ཨུཔཊྛཱནཊྛེན སཏིཔཊྛཱནཱ མགྒོ, པདཧནཊྛེན སམྨཔྤདྷཱནཱ མགྒོ, ཨིཛ྄ཛྷནཊྛེན ཨིདྡྷིཔཱདཱ མགྒོ, ཏཐཊྛེན སཙྩཱནི མགྒོ, ཨཝིཀྑེཔཊྛེན སམཐོ མགྒོ, ཨནུཔསྶནཊྛེན ཝིཔསྶནཱ མགྒོ, ཨེཀརསཊྛེན སམཐཝིཔསྶནཱ མགྒོ, ཨནཏིཝཏྟནཊྛེན ཡུགནདྡྷཱ མགྒོ, སཾཝརཊྛེན སཱིལཝིསུདྡྷི མགྒོ, ཨཝིཀྑེཔཊྛེན ཙིཏྟཝིསུདྡྷི མགྒོ, དསྶནཊྛེན དིཊྛིཝིསུདྡྷི མགྒོ, མུཏྟཊྛེན ཝིམོཀྑོ མགྒོ, པཊིཝེདྷཊྛེན ཝིཛྫཱ མགྒོ, པརིཙྩཱགཊྛེན ཝིམུཏྟི མགྒོ, སམུཙྪེདཊྛེན ཁཡེ ཉཱཎཾ མགྒོ, ཚནྡོ མཱུལཊྛེན མགྒོ, མནསིཀཱརོ སམུཊྛཱནཊྛེན མགྒོ, ཕསྶོ སམོདྷཱནཊྛེན མགྒོ, ཝེདནཱ སམོསརཎཊྛེན མགྒོ, སམཱདྷི པམུཁཊྛེན མགྒོ, སཏི ཨཱདྷིཔཏེཡྻཊྛེན མགྒོ, པཉྙཱ ཏཏུཏྟརཊྛེན མགྒོ, ཝིམུཏྟི སཱརཊྛེན མགྒོ, ཨམཏོགདྷཾ ནིབྦཱནཾ པརིཡོསཱནཊྛེན མགྒོཏི།
Ādhipateyyaṭṭhena indriyā maggo, akampiyaṭṭhena balā maggo, niyyānaṭṭhena bojjhaṅgā maggo, hetuṭṭhena maggaṅgā maggo, upaṭṭhānaṭṭhena satipaṭṭhānā maggo, padahanaṭṭhena sammappadhānā maggo, ijjhanaṭṭhena iddhipādā maggo, tathaṭṭhena saccāni maggo, avikkhepaṭṭhena samatho maggo, anupassanaṭṭhena vipassanā maggo, ekarasaṭṭhena samathavipassanā maggo, anativattanaṭṭhena yuganaddhā maggo, saṃvaraṭṭhena sīlavisuddhi maggo, avikkhepaṭṭhena cittavisuddhi maggo, dassanaṭṭhena diṭṭhivisuddhi maggo, muttaṭṭhena vimokkho maggo, paṭivedhaṭṭhena vijjā maggo, pariccāgaṭṭhena vimutti maggo, samucchedaṭṭhena khaye ñāṇaṃ maggo, chando mūlaṭṭhena maggo, manasikāro samuṭṭhānaṭṭhena maggo, phasso samodhānaṭṭhena maggo, vedanā samosaraṇaṭṭhena maggo, samādhi pamukhaṭṭhena maggo, sati ādhipateyyaṭṭhena maggo, paññā tatuttaraṭṭhena maggo, vimutti sāraṭṭhena maggo, amatogadhaṃ nibbānaṃ pariyosānaṭṭhena maggoti.
མགྒཀཐཱ ནིཊྛིཏཱ།
Maggakathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / མགྒཀཐཱཝཎྞནཱ • Maggakathāvaṇṇanā
