| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
5. மக்³க³கதா²வண்ணனா
5. Maggakathāvaṇṇanā
872-875. இதா³னி மக்³க³கதா² நாம ஹோதி. தத்த² யேஸங் ‘‘புப்³பே³வ கோ² பனஸ்ஸ காயகம்மங் வசீகம்மங் ஆஜீவோ ஸுபரிஸுத்³தோ⁴ ஹோதீ’’தி (அ॰ நி॰ 3.431) இத³ஞ்சேவ ஸுத்தங் ஸம்மாவாசாகம்மந்தாஜீவானஞ்ச சித்தவிப்பயுத்ததங் நிஸ்ஸாய ‘‘நிப்பரியாயேன பஞ்சங்கி³கோவ மக்³கோ³’’தி லத்³தி⁴, ஸெய்யதா²பி மஹிஸாஸகானங், தே ஸந்தா⁴ய பஞ்சங்கி³கோதி புச்சா² ஸகவாதி³ஸ்ஸ, படிஞ்ஞா இதரஸ்ஸ. ஸம்மாவாசா மக்³க³ங்க³ங், ஸா ச ந மக்³கோ³திஆதி³ பரஸமயவஸேன வுத்தங். பரஸமயஸ்மிஞ்ஹி ஸம்மாவாசாத³யோ மக்³க³ங்க³ந்தி ஆக³தா. ரூபத்தா பன மக்³கோ³ ந ஹோதீதி வண்ணிதா. ஸம்மாதி³ட்டி² மக்³க³ங்க³ந்திஆதி³ மக்³க³ங்க³ஸ்ஸ அமக்³க³தா நாம நத்தீ²தி த³ஸ்ஸனத்த²ங் வுத்தங். புப்³பே³வ கோ² பனஸ்ஸாதி ஸுத்தே பரிஸுத்³த⁴ஸீலஸ்ஸ மக்³க³பா⁴வனா நாம ஹோதி, ந இதரஸ்ஸாதி ஆக³மனியபடிபதா³ய விஸுத்³தி⁴பா⁴வத³ஸ்ஸனத்த²ங் ‘‘காயகம்மங் வசீகம்மங் ஆஜீவோ ஸுபரிஸுத்³தோ⁴ ஹோதீ’’தி வுத்தங், ந இமேஹி வினா பஞ்சங்கி³கபா⁴வத³ஸ்ஸனத்த²ங். தேனேவாஹ ‘‘ஏவமஸ்ஸாயங் அரியோ அட்ட²ங்கி³கோ மக்³கோ³ பா⁴வனாபாரிபூரிங் க³ச்ச²தீ’’தி. ஸகவாதி³னா ஆப⁴தஸுத்தங் நீதத்த²மேவாதி.
872-875. Idāni maggakathā nāma hoti. Tattha yesaṃ ‘‘pubbeva kho panassa kāyakammaṃ vacīkammaṃ ājīvo suparisuddho hotī’’ti (a. ni. 3.431) idañceva suttaṃ sammāvācākammantājīvānañca cittavippayuttataṃ nissāya ‘‘nippariyāyena pañcaṅgikova maggo’’ti laddhi, seyyathāpi mahisāsakānaṃ, te sandhāya pañcaṅgikoti pucchā sakavādissa, paṭiññā itarassa. Sammāvācā maggaṅgaṃ, sā ca na maggotiādi parasamayavasena vuttaṃ. Parasamayasmiñhi sammāvācādayo maggaṅganti āgatā. Rūpattā pana maggo na hotīti vaṇṇitā. Sammādiṭṭhi maggaṅgantiādi maggaṅgassa amaggatā nāma natthīti dassanatthaṃ vuttaṃ. Pubbeva kho panassāti sutte parisuddhasīlassa maggabhāvanā nāma hoti, na itarassāti āgamaniyapaṭipadāya visuddhibhāvadassanatthaṃ ‘‘kāyakammaṃ vacīkammaṃ ājīvo suparisuddho hotī’’ti vuttaṃ, na imehi vinā pañcaṅgikabhāvadassanatthaṃ. Tenevāha ‘‘evamassāyaṃ ariyo aṭṭhaṅgiko maggo bhāvanāpāripūriṃ gacchatī’’ti. Sakavādinā ābhatasuttaṃ nītatthamevāti.
மக்³க³கதா²வண்ணனா.
Maggakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (198) 5. மக்³க³கதா² • (198) 5. Maggakathā
