| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
9. மக்³க³கதா²
9. Maggakathā
மக்³க³கதா²வண்ணனா
Maggakathāvaṇṇanā
237. இதா³னி தேஸங் திண்ணங் விபல்லாஸானங் பஹானகரங் அரியமக்³க³ங் த³ஸ்ஸெந்தேன கதி²தாய மக்³க³கதா²ய அபுப்³ப³த்தா²னுவண்ணனா. தத்த² மக்³கோ³தி கேனட்டே²ன மக்³கோ³தி யோ பு³த்³த⁴ஸாஸனே மக்³கோ³தி வுச்சதி, ஸோ கேனட்டே²ன மக்³கோ³ நாம ஹோதீதி அத்தோ². மிச்சா²தி³ட்டி²யா பஹானாயாதிஆதீ³ஸு த³ஸஸு பரியாயேஸு பட²மோ பட²மோ தஸ்ஸ தஸ்ஸ மக்³க³ங்க³ஸ்ஸ உஜுவிபச்சனீகவஸேன வுத்தோ. மக்³கோ³ சேவ ஹேது சாதி தஸ்ஸ தஸ்ஸ கிச்சஸ்ஸ கரணாய படிபத³ட்டே²ன மக்³கோ³, ஸம்பாபகட்டே²ன ஹேது. தேன மக்³க³ஸ்ஸ படிபத³ட்டோ² ஸம்பாபகட்டோ² ச வுத்தோ ஹோதி. ‘‘அயங் மக்³கோ³ அயங் படிபதா³’’திஆதீ³ஸு (ஸங்॰ நி॰ 5.5, 48) ஹி படிபதா³ மக்³கோ³, ‘‘மக்³க³ஸ்ஸ நிய்யானட்டோ² ஹேதுட்டோ²’’திஆதீ³ஸு (படி॰ ம॰ 2.8) ஸம்பாபகோ ஹேது. ஏவங் த்³வீஹி த்³வீஹி பதே³ஹி ‘‘மக்³கோ³தி கேனட்டே²ன மக்³கோ³’’தி புச்சா²ய விஸ்ஸஜ்ஜனங் கதங் ஹோதி. ஸஹஜாதானங் த⁴ம்மானங் உபத்த²ம்ப⁴னாயாதி அத்தனா ஸஹஜாதானங் அரூபத⁴ம்மானங் ஸஹஜாதஅஞ்ஞமஞ்ஞனிஸ்ஸயாதி³பா⁴வேன உபத்த²ம்ப⁴னபா⁴வாய. கிலேஸானங் பரியாதா³னாயாதி தங்தங்மக்³க³வஜ்ஜா²னங் வுத்தாவஸேஸகிலேஸானங் கே²பனாய. படிவேதா⁴தி³விஸோத⁴னாயாதி எத்த² யஸ்மா ‘‘கோ சாதி³ குஸலானங் த⁴ம்மானங், ஸீலஞ்ச ஸுவிஸுத்³த⁴ங் தி³ட்டி² ச உஜுகா’’தி (ஸங்॰ நி॰ 5.369, 381) வசனதோ ஸீலஞ்ச தி³ட்டி² ச ஸச்சபடிவேத⁴ஸ்ஸ ஆதி³. ஸோ ச ஆதி³மக்³க³க்க²ணே விஸுஜ்ஜ²தி. தஸ்மா ‘‘படிவேதா⁴தி³விஸோத⁴னாயா’’தி வுத்தங். சித்தஸ்ஸ அதி⁴ட்டா²னாயாதி ஸம்பயுத்தசித்தஸ்ஸ ஸககிச்சே பதிட்டா²னாய. சித்தஸ்ஸ வோதா³னாயாதி சித்தஸ்ஸ பரிஸுத்³த⁴பா⁴வாய. விஸேஸாதி⁴க³மாயாதி லோகியதோ விஸேஸபடிலாபா⁴ய. உத்தரி படிவேதா⁴யாதி லோகியதோ உத்தரி படிவிஜ்ஜ²னத்தா²ய. ஸச்சாபி⁴ஸமயாயாதி சதுன்னங் ஸச்சானங் ஏகாபி⁴ஸமயாய கிச்சனிப்ப²த்திவஸேன ஏகபடிவேதா⁴ய. நிரோதே⁴ பதிட்டா²பனாயாதி சித்தஸ்ஸ வா புக்³க³லஸ்ஸ வா நிப்³பா³னே பதிட்டா²பனத்தா²ய. ஸகதா³கா³மிமக்³க³க்க²ணாதீ³ஸு அட்ட² மக்³க³ங்கா³னி ஏகதோ கத்வா தங்தங்மக்³க³வஜ்ஜ²கிலேஸப்பஹானங் வுத்தங். ஏவங் வசனே காரணங் ஹெட்டா² வுத்தமேவ. யஸ்மா உபரூபரிமக்³கே³னாபி ஸுட்டு² ஆதி³விஸோத⁴னா ஸுட்டு² சித்தவோதா³னஞ்ச ஹோதி, தஸ்மா தானிபி பதா³னி வுத்தானி.
237. Idāni tesaṃ tiṇṇaṃ vipallāsānaṃ pahānakaraṃ ariyamaggaṃ dassentena kathitāya maggakathāya apubbatthānuvaṇṇanā. Tattha maggoti kenaṭṭhena maggoti yo buddhasāsane maggoti vuccati, so kenaṭṭhena maggo nāma hotīti attho. Micchādiṭṭhiyā pahānāyātiādīsu dasasu pariyāyesu paṭhamo paṭhamo tassa tassa maggaṅgassa ujuvipaccanīkavasena vutto. Maggo ceva hetu cāti tassa tassa kiccassa karaṇāya paṭipadaṭṭhena maggo, sampāpakaṭṭhena hetu. Tena maggassa paṭipadaṭṭho sampāpakaṭṭho ca vutto hoti. ‘‘Ayaṃ maggo ayaṃ paṭipadā’’tiādīsu (saṃ. ni. 5.5, 48) hi paṭipadā maggo, ‘‘maggassa niyyānaṭṭho hetuṭṭho’’tiādīsu (paṭi. ma. 2.8) sampāpako hetu. Evaṃ dvīhi dvīhi padehi ‘‘maggoti kenaṭṭhena maggo’’ti pucchāya vissajjanaṃ kataṃ hoti. Sahajātānaṃ dhammānaṃ upatthambhanāyāti attanā sahajātānaṃ arūpadhammānaṃ sahajātaaññamaññanissayādibhāvena upatthambhanabhāvāya. Kilesānaṃ pariyādānāyāti taṃtaṃmaggavajjhānaṃ vuttāvasesakilesānaṃ khepanāya. Paṭivedhādivisodhanāyāti ettha yasmā ‘‘ko cādi kusalānaṃ dhammānaṃ, sīlañca suvisuddhaṃ diṭṭhi ca ujukā’’ti (saṃ. ni. 5.369, 381) vacanato sīlañca diṭṭhi ca saccapaṭivedhassa ādi. So ca ādimaggakkhaṇe visujjhati. Tasmā ‘‘paṭivedhādivisodhanāyā’’ti vuttaṃ. Cittassa adhiṭṭhānāyāti sampayuttacittassa sakakicce patiṭṭhānāya. Cittassa vodānāyāti cittassa parisuddhabhāvāya. Visesādhigamāyāti lokiyato visesapaṭilābhāya. Uttari paṭivedhāyāti lokiyato uttari paṭivijjhanatthāya. Saccābhisamayāyāti catunnaṃ saccānaṃ ekābhisamayāya kiccanipphattivasena ekapaṭivedhāya. Nirodhe patiṭṭhāpanāyāti cittassa vā puggalassa vā nibbāne patiṭṭhāpanatthāya. Sakadāgāmimaggakkhaṇādīsu aṭṭha maggaṅgāni ekato katvā taṃtaṃmaggavajjhakilesappahānaṃ vuttaṃ. Evaṃ vacane kāraṇaṃ heṭṭhā vuttameva. Yasmā uparūparimaggenāpi suṭṭhu ādivisodhanā suṭṭhu cittavodānañca hoti, tasmā tānipi padāni vuttāni.
த³ஸ்ஸனமக்³கோ³திஆதீ³ஹி யாவ பரியோஸானா தஸ்ஸ த⁴ம்மஸ்ஸ லக்க²ணவஸேன மக்³க³ட்டோ² வுத்தோ. தானி ஸப்³பா³னிபி பதா³னி அபி⁴ஞ்ஞெய்யனித்³தே³ஸே வுத்தத்தா²னேவ. ஏவமெத்த² யதா²ஸம்ப⁴வங் லோகியலோகுத்தரோ மக்³கோ³ நித்³தி³ட்டோ². ஹேதுட்டே²ன மக்³கோ³தி ச அட்ட²ங்கி³கோ மக்³கோ³ நித்³தி³ட்டோ². நிப்பரியாயமக்³க³த்தா சஸ்ஸ புன ‘‘மக்³கோ³’’தி ந வுத்தங். ஆதி⁴பதெய்யட்டே²ன இந்த்³ரியாதி ஆதீ³னி ச இந்த்³ரியாதீ³னங் அத்த²வஸேன வுத்தானி, ந மக்³க³ட்ட²வஸேன. ஸச்சானீதி செத்த² ஸச்சஞாணானி. ஸப்³பே³பி தே த⁴ம்மா நிப்³பா³னஸ்ஸ படிபத³ட்டே²ன மக்³கோ³. அந்தே வுத்தங் நிப்³பா³னங் பன ஸங்ஸாரது³க்கா²பி⁴பூ⁴தேஹி து³க்க²னிஸ்ஸரணத்தி²கேஹி ஸப்புரிஸேஹி மக்³கீ³யதி க³வேஸீயதீதி மக்³கோ³தி வுத்தந்தி வேதி³தப்³ப³ந்தி.
Dassanamaggotiādīhi yāva pariyosānā tassa dhammassa lakkhaṇavasena maggaṭṭho vutto. Tāni sabbānipi padāni abhiññeyyaniddese vuttatthāneva. Evamettha yathāsambhavaṃ lokiyalokuttaro maggo niddiṭṭho. Hetuṭṭhena maggoti ca aṭṭhaṅgiko maggo niddiṭṭho. Nippariyāyamaggattā cassa puna ‘‘maggo’’ti na vuttaṃ. Ādhipateyyaṭṭhena indriyāti ādīni ca indriyādīnaṃ atthavasena vuttāni, na maggaṭṭhavasena. Saccānīti cettha saccañāṇāni. Sabbepi te dhammā nibbānassa paṭipadaṭṭhena maggo. Ante vuttaṃ nibbānaṃ pana saṃsāradukkhābhibhūtehi dukkhanissaraṇatthikehi sappurisehi maggīyati gavesīyatīti maggoti vuttanti veditabbanti.
மக்³க³கதா²வண்ணனா நிட்டி²தா.
Maggakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 9. மக்³க³கதா² • 9. Maggakathā
