| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৫. মগ্গকথাৰণ্ণনা
5. Maggakathāvaṇṇanā
৮৭২-৮৭৫. ইদানি মগ্গকথা নাম হোতি। তত্থ যেসং ‘‘পুব্বেৰ খো পনস্স কাযকম্মং ৰচীকম্মং আজীৰো সুপরিসুদ্ধো হোতী’’তি (অ॰ নি॰ ৩.৪৩১) ইদঞ্চেৰ সুত্তং সম্মাৰাচাকম্মন্তাজীৰানঞ্চ চিত্তৰিপ্পযুত্ততং নিস্সায ‘‘নিপ্পরিযাযেন পঞ্চঙ্গিকোৰ মগ্গো’’তি লদ্ধি, সেয্যথাপি মহিসাসকানং, তে সন্ধায পঞ্চঙ্গিকোতি পুচ্ছা সকৰাদিস্স, পটিঞ্ঞা ইতরস্স। সম্মাৰাচা মগ্গঙ্গং, সা চ ন মগ্গোতিআদি পরসমযৰসেন ৰুত্তং। পরসমযস্মিঞ্হি সম্মাৰাচাদযো মগ্গঙ্গন্তি আগতা। রূপত্তা পন মগ্গো ন হোতীতি ৰণ্ণিতা। সম্মাদিট্ঠি মগ্গঙ্গন্তিআদি মগ্গঙ্গস্স অমগ্গতা নাম নত্থীতি দস্সনত্থং ৰুত্তং। পুব্বেৰ খো পনস্সাতি সুত্তে পরিসুদ্ধসীলস্স মগ্গভাৰনা নাম হোতি, ন ইতরস্সাতি আগমনিযপটিপদায ৰিসুদ্ধিভাৰদস্সনত্থং ‘‘কাযকম্মং ৰচীকম্মং আজীৰো সুপরিসুদ্ধো হোতী’’তি ৰুত্তং, ন ইমেহি ৰিনা পঞ্চঙ্গিকভাৰদস্সনত্থং। তেনেৰাহ ‘‘এৰমস্সাযং অরিযো অট্ঠঙ্গিকো মগ্গো ভাৰনাপারিপূরিং গচ্ছতী’’তি। সকৰাদিনা আভতসুত্তং নীতত্থমেৰাতি।
872-875. Idāni maggakathā nāma hoti. Tattha yesaṃ ‘‘pubbeva kho panassa kāyakammaṃ vacīkammaṃ ājīvo suparisuddho hotī’’ti (a. ni. 3.431) idañceva suttaṃ sammāvācākammantājīvānañca cittavippayuttataṃ nissāya ‘‘nippariyāyena pañcaṅgikova maggo’’ti laddhi, seyyathāpi mahisāsakānaṃ, te sandhāya pañcaṅgikoti pucchā sakavādissa, paṭiññā itarassa. Sammāvācā maggaṅgaṃ, sā ca na maggotiādi parasamayavasena vuttaṃ. Parasamayasmiñhi sammāvācādayo maggaṅganti āgatā. Rūpattā pana maggo na hotīti vaṇṇitā. Sammādiṭṭhi maggaṅgantiādi maggaṅgassa amaggatā nāma natthīti dassanatthaṃ vuttaṃ. Pubbeva kho panassāti sutte parisuddhasīlassa maggabhāvanā nāma hoti, na itarassāti āgamaniyapaṭipadāya visuddhibhāvadassanatthaṃ ‘‘kāyakammaṃ vacīkammaṃ ājīvo suparisuddho hotī’’ti vuttaṃ, na imehi vinā pañcaṅgikabhāvadassanatthaṃ. Tenevāha ‘‘evamassāyaṃ ariyo aṭṭhaṅgiko maggo bhāvanāpāripūriṃ gacchatī’’ti. Sakavādinā ābhatasuttaṃ nītatthamevāti.
মগ্গকথাৰণ্ণনা।
Maggakathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (১৯৮) ৫. মগ্গকথা • (198) 5. Maggakathā
