| Library / Tipiṭaka / তিপিটক • Tipiṭaka / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā |
৯. মগ্গকথা
9. Maggakathā
মগ্গকথাৰণ্ণনা
Maggakathāvaṇṇanā
২৩৭. ইদানি তেসং তিণ্ণং ৰিপল্লাসানং পহানকরং অরিযমগ্গং দস্সেন্তেন কথিতায মগ্গকথায অপুব্বত্থানুৰণ্ণনা। তত্থ মগ্গোতি কেনট্ঠেন মগ্গোতি যো বুদ্ধসাসনে মগ্গোতি ৰুচ্চতি, সো কেনট্ঠেন মগ্গো নাম হোতীতি অত্থো। মিচ্ছাদিট্ঠিযা পহানাযাতিআদীসু দসসু পরিযাযেসু পঠমো পঠমো তস্স তস্স মগ্গঙ্গস্স উজুৰিপচ্চনীকৰসেন ৰুত্তো। মগ্গো চেৰ হেতু চাতি তস্স তস্স কিচ্চস্স করণায পটিপদট্ঠেন মগ্গো, সম্পাপকট্ঠেন হেতু। তেন মগ্গস্স পটিপদট্ঠো সম্পাপকট্ঠো চ ৰুত্তো হোতি। ‘‘অযং মগ্গো অযং পটিপদা’’তিআদীসু (সং॰ নি॰ ৫.৫, ৪৮) হি পটিপদা মগ্গো, ‘‘মগ্গস্স নিয্যানট্ঠো হেতুট্ঠো’’তিআদীসু (পটি॰ ম॰ ২.৮) সম্পাপকো হেতু। এৰং দ্ৰীহি দ্ৰীহি পদেহি ‘‘মগ্গোতি কেনট্ঠেন মগ্গো’’তি পুচ্ছায ৰিস্সজ্জনং কতং হোতি। সহজাতানং ধম্মানং উপত্থম্ভনাযাতি অত্তনা সহজাতানং অরূপধম্মানং সহজাতঅঞ্ঞমঞ্ঞনিস্সযাদিভাৰেন উপত্থম্ভনভাৰায। কিলেসানং পরিযাদানাযাতি তংতংমগ্গৰজ্ঝানং ৰুত্তাৰসেসকিলেসানং খেপনায। পটিৰেধাদিৰিসোধনাযাতি এত্থ যস্মা ‘‘কো চাদি কুসলানং ধম্মানং, সীলঞ্চ সুৰিসুদ্ধং দিট্ঠি চ উজুকা’’তি (সং॰ নি॰ ৫.৩৬৯, ৩৮১) ৰচনতো সীলঞ্চ দিট্ঠি চ সচ্চপটিৰেধস্স আদি। সো চ আদিমগ্গক্খণে ৰিসুজ্ঝতি। তস্মা ‘‘পটিৰেধাদিৰিসোধনাযা’’তি ৰুত্তং। চিত্তস্স অধিট্ঠানাযাতি সম্পযুত্তচিত্তস্স সককিচ্চে পতিট্ঠানায। চিত্তস্স ৰোদানাযাতি চিত্তস্স পরিসুদ্ধভাৰায। ৰিসেসাধিগমাযাতি লোকিযতো ৰিসেসপটিলাভায। উত্তরি পটিৰেধাযাতি লোকিযতো উত্তরি পটিৰিজ্ঝনত্থায। সচ্চাভিসমযাযাতি চতুন্নং সচ্চানং একাভিসমযায কিচ্চনিপ্ফত্তিৰসেন একপটিৰেধায। নিরোধে পতিট্ঠাপনাযাতি চিত্তস্স ৰা পুগ্গলস্স ৰা নিব্বানে পতিট্ঠাপনত্থায। সকদাগামিমগ্গক্খণাদীসু অট্ঠ মগ্গঙ্গানি একতো কত্ৰা তংতংমগ্গৰজ্ঝকিলেসপ্পহানং ৰুত্তং। এৰং ৰচনে কারণং হেট্ঠা ৰুত্তমেৰ। যস্মা উপরূপরিমগ্গেনাপি সুট্ঠু আদিৰিসোধনা সুট্ঠু চিত্তৰোদানঞ্চ হোতি, তস্মা তানিপি পদানি ৰুত্তানি।
237. Idāni tesaṃ tiṇṇaṃ vipallāsānaṃ pahānakaraṃ ariyamaggaṃ dassentena kathitāya maggakathāya apubbatthānuvaṇṇanā. Tattha maggoti kenaṭṭhena maggoti yo buddhasāsane maggoti vuccati, so kenaṭṭhena maggo nāma hotīti attho. Micchādiṭṭhiyā pahānāyātiādīsu dasasu pariyāyesu paṭhamo paṭhamo tassa tassa maggaṅgassa ujuvipaccanīkavasena vutto. Maggo ceva hetu cāti tassa tassa kiccassa karaṇāya paṭipadaṭṭhena maggo, sampāpakaṭṭhena hetu. Tena maggassa paṭipadaṭṭho sampāpakaṭṭho ca vutto hoti. ‘‘Ayaṃ maggo ayaṃ paṭipadā’’tiādīsu (saṃ. ni. 5.5, 48) hi paṭipadā maggo, ‘‘maggassa niyyānaṭṭho hetuṭṭho’’tiādīsu (paṭi. ma. 2.8) sampāpako hetu. Evaṃ dvīhi dvīhi padehi ‘‘maggoti kenaṭṭhena maggo’’ti pucchāya vissajjanaṃ kataṃ hoti. Sahajātānaṃ dhammānaṃ upatthambhanāyāti attanā sahajātānaṃ arūpadhammānaṃ sahajātaaññamaññanissayādibhāvena upatthambhanabhāvāya. Kilesānaṃ pariyādānāyāti taṃtaṃmaggavajjhānaṃ vuttāvasesakilesānaṃ khepanāya. Paṭivedhādivisodhanāyāti ettha yasmā ‘‘ko cādi kusalānaṃ dhammānaṃ, sīlañca suvisuddhaṃ diṭṭhi ca ujukā’’ti (saṃ. ni. 5.369, 381) vacanato sīlañca diṭṭhi ca saccapaṭivedhassa ādi. So ca ādimaggakkhaṇe visujjhati. Tasmā ‘‘paṭivedhādivisodhanāyā’’ti vuttaṃ. Cittassa adhiṭṭhānāyāti sampayuttacittassa sakakicce patiṭṭhānāya. Cittassa vodānāyāti cittassa parisuddhabhāvāya. Visesādhigamāyāti lokiyato visesapaṭilābhāya. Uttari paṭivedhāyāti lokiyato uttari paṭivijjhanatthāya. Saccābhisamayāyāti catunnaṃ saccānaṃ ekābhisamayāya kiccanipphattivasena ekapaṭivedhāya. Nirodhe patiṭṭhāpanāyāti cittassa vā puggalassa vā nibbāne patiṭṭhāpanatthāya. Sakadāgāmimaggakkhaṇādīsu aṭṭha maggaṅgāni ekato katvā taṃtaṃmaggavajjhakilesappahānaṃ vuttaṃ. Evaṃ vacane kāraṇaṃ heṭṭhā vuttameva. Yasmā uparūparimaggenāpi suṭṭhu ādivisodhanā suṭṭhu cittavodānañca hoti, tasmā tānipi padāni vuttāni.
দস্সনমগ্গোতিআদীহি যাৰ পরিযোসানা তস্স ধম্মস্স লক্খণৰসেন মগ্গট্ঠো ৰুত্তো। তানি সব্বানিপি পদানি অভিঞ্ঞেয্যনিদ্দেসে ৰুত্তত্থানেৰ। এৰমেত্থ যথাসম্ভৰং লোকিযলোকুত্তরো মগ্গো নিদ্দিট্ঠো। হেতুট্ঠেন মগ্গোতি চ অট্ঠঙ্গিকো মগ্গো নিদ্দিট্ঠো। নিপ্পরিযাযমগ্গত্তা চস্স পুন ‘‘মগ্গো’’তি ন ৰুত্তং। আধিপতেয্যট্ঠেন ইন্দ্রিযাতি আদীনি চ ইন্দ্রিযাদীনং অত্থৰসেন ৰুত্তানি, ন মগ্গট্ঠৰসেন। সচ্চানীতি চেত্থ সচ্চঞাণানি। সব্বেপি তে ধম্মা নিব্বানস্স পটিপদট্ঠেন মগ্গো। অন্তে ৰুত্তং নিব্বানং পন সংসারদুক্খাভিভূতেহি দুক্খনিস্সরণত্থিকেহি সপ্পুরিসেহি মগ্গীযতি গৰেসীযতীতি মগ্গোতি ৰুত্তন্তি ৰেদিতব্বন্তি।
Dassanamaggotiādīhi yāva pariyosānā tassa dhammassa lakkhaṇavasena maggaṭṭho vutto. Tāni sabbānipi padāni abhiññeyyaniddese vuttatthāneva. Evamettha yathāsambhavaṃ lokiyalokuttaro maggo niddiṭṭho. Hetuṭṭhena maggoti ca aṭṭhaṅgiko maggo niddiṭṭho. Nippariyāyamaggattā cassa puna ‘‘maggo’’ti na vuttaṃ. Ādhipateyyaṭṭhena indriyāti ādīni ca indriyādīnaṃ atthavasena vuttāni, na maggaṭṭhavasena. Saccānīti cettha saccañāṇāni. Sabbepi te dhammā nibbānassa paṭipadaṭṭhena maggo. Ante vuttaṃ nibbānaṃ pana saṃsāradukkhābhibhūtehi dukkhanissaraṇatthikehi sappurisehi maggīyati gavesīyatīti maggoti vuttanti veditabbanti.
মগ্গকথাৰণ্ণনা নিট্ঠিতা।
Maggakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পটিসম্ভিদামগ্গপাল়ি • Paṭisambhidāmaggapāḷi / ৯. মগ্গকথা • 9. Maggakathā
