| Library / Tipiṭaka / д̇ибидага • Tipiṭaka / бадисамбхид̣̇аамаг̇г̇а-адтагат̇аа • Paṭisambhidāmagga-aṭṭhakathā |
11. маг̇г̇ан̃аан̣анид̣̇д̣̇зсаван̣н̣анаа
11. Maggañāṇaniddesavaṇṇanā
61. маг̇г̇ан̃аан̣анид̣̇д̣̇зсз мижчаад̣̇идтияаа вудтаад̇ийд̇и д̣̇идтаанусаяаббахаанзна самужчзд̣̇авасзна д̣̇ваасадтибхзд̣̇ад̇о мижчаад̣̇идтид̇о вудтаад̇и. д̇ад̣̇анувад̇д̇агагилзсзхийд̇и мижчаад̣̇идтисамбаяог̇авасзна жа мижчаад̣̇идтиубаниссаязна жа уббаж̇ж̇амаанзхи мижчаад̣̇идтианувад̇д̇амаанзхи наанаавид̇хзхи гилзсзхи. д̇зна д̇ад̣̇згадтагилзсаббахаанам̣ вуд̇д̇ам̣ ход̇и. д̣̇увид̇хан̃хи згадтам̣ сахаж̇згадтам̣ бахаанзгадтан̃жа. д̇ааяа д̣̇идтияаа саха згасмим̣ жид̇д̇з, згасмим̣ буг̇г̇алз ваа яаава бахаанаа тид̇аад̇и д̇ад̣̇згадтаа. д̣̇идтияаа хи бахийяамаанааяа д̣̇идтисамбаяуд̇д̇зсу д̣̇вийсу асан̇кааригажид̇д̇зсу д̇ааяа д̣̇идтияаа сахаж̇аад̇аа лобхо мохо уд̣̇д̇хажжам̣ ахиригам̣ анод̇д̇аббанд̇и имз гилзсаа, д̣̇вийсу сасан̇кааригажид̇д̇зсу д̇ааяа д̣̇идтияаа сахаж̇аад̇аа лобхо мохо т̇инам̣ уд̣̇д̇хажжам̣ ахиригам̣ анод̇д̇аббанд̇и имз гилзсаа сахаж̇згадтавасзна бахийяанд̇и. д̣̇идтигилзсзязва бахийяамаанз д̇зна саха згасмим̣ буг̇г̇алз тид̇аа абааяаг̇аманийяаа лобхо д̣̇осо мохо маано вижигижчаа т̇инам̣ уд̣̇д̇хажжам̣ ахиригам̣ анод̇д̇аббанд̇и имз гилзсаа бахаанзгадтавасзна бахийяанд̇и. канд̇хзхийд̇и д̇ад̣̇анувад̇д̇агзхзва канд̇хзхи, д̇ам̣ д̣̇идтим̣ анувад̇д̇амаанзхи сахаж̇згадтзхи жа бахаанзгадтзхи жа жад̇уухи аруубагканд̇хзхи, д̇ам̣самудтаанаруубзхи ваа саха бан̃жахи канд̇хзхи мижчаад̣̇идтиаад̣̇игилзсабажжаяаа анааг̇ад̇з уббаж̇ж̇ид̇аб̣б̣зхи вибаагагканд̇хзхи. б̣ахид̣̇д̇хаа жа саб̣б̣анимид̇д̇зхийд̇и яат̇аавуд̇д̇агилзсагканд̇хад̇о б̣ахибхууд̇зхи саб̣б̣асан̇кааранимид̇д̇зхи. мижчаасан̇габбаа вудтаад̇ийд̇и сод̇аабад̇д̇имаг̇г̇зна бахаад̇аб̣б̣зсу жад̇уусу д̣̇идтисамбаяуд̇д̇зсу, вижигижчаасахаг̇ад̇з жаад̇и бан̃жасу жид̇д̇зсу абааяаг̇аманийяасзсаагусалажид̇д̇зсу жа мижчаасан̇габбаа вудтаад̇и.
61. Maggañāṇaniddese micchādiṭṭhiyā vuṭṭhātīti diṭṭhānusayappahānena samucchedavasena dvāsaṭṭhibhedato micchādiṭṭhito vuṭṭhāti. Tadanuvattakakilesehīti micchādiṭṭhisampayogavasena ca micchādiṭṭhiupanissayena ca uppajjamānehi micchādiṭṭhianuvattamānehi nānāvidhehi kilesehi. Tena tadekaṭṭhakilesappahānaṃ vuttaṃ hoti. Duvidhañhi ekaṭṭhaṃ sahajekaṭṭhaṃ pahānekaṭṭhañca. Tāya diṭṭhiyā saha ekasmiṃ citte, ekasmiṃ puggale vā yāva pahānā ṭhitāti tadekaṭṭhā. Diṭṭhiyā hi pahīyamānāya diṭṭhisampayuttesu dvīsu asaṅkhārikacittesu tāya diṭṭhiyā sahajātā lobho moho uddhaccaṃ ahirikaṃ anottappanti ime kilesā, dvīsu sasaṅkhārikacittesu tāya diṭṭhiyā sahajātā lobho moho thinaṃ uddhaccaṃ ahirikaṃ anottappanti ime kilesā sahajekaṭṭhavasena pahīyanti. Diṭṭhikileseyeva pahīyamāne tena saha ekasmiṃ puggale ṭhitā apāyagamanīyā lobho doso moho māno vicikicchā thinaṃ uddhaccaṃ ahirikaṃ anottappanti ime kilesā pahānekaṭṭhavasena pahīyanti. Khandhehīti tadanuvattakeheva khandhehi, taṃ diṭṭhiṃ anuvattamānehi sahajekaṭṭhehi ca pahānekaṭṭhehi ca catūhi arūpakkhandhehi, taṃsamuṭṭhānarūpehi vā saha pañcahi khandhehi micchādiṭṭhiādikilesapaccayā anāgate uppajjitabbehi vipākakkhandhehi. Bahiddhā ca sabbanimittehīti yathāvuttakilesakkhandhato bahibhūtehi sabbasaṅkhāranimittehi. Micchāsaṅkappā vuṭṭhātīti sotāpattimaggena pahātabbesu catūsu diṭṭhisampayuttesu, vicikicchāsahagate cāti pañcasu cittesu apāyagamanīyasesākusalacittesu ca micchāsaṅkappā vuṭṭhāti.
мижчааваажааяа вудтаад̇ийд̇и мусааваад̣̇ад̇о жзва абааяаг̇аманийяабисун̣апарусасампаббалаабзхи жа вудтаад̇и . мижчаагамманд̇аа вудтаад̇ийд̇и баан̣аад̇ибаад̇аад̣̇иннаад̣̇аанамижчаажаарзхи вудтаад̇и. мижчааааж̇ийваа вудтаад̇ийд̇и гуханаа лабанаа нзмид̇д̇игад̇аа ниббзсигад̇аа лаабхзналаабхам̣ниж̇иг̇ийсанад̇аа, ааж̇ийвахзд̇угзхи ваа сад̇д̇ахиби гааяаважийгаммзхи вудтаад̇и. мижчаавааяаамамижчаасад̇имижчаасамаад̇хийхи вудтаанам̣ мижчаасан̇габбавудтаанз вуд̇д̇анаязнзва взд̣̇ид̇аб̣б̣ам̣. мижчаасад̇ийд̇и жа сад̇ияаа бадибагкаагаарзна уббаж̇ж̇амаанаа агусалажид̇д̇уббаад̣̇амад̇д̇амзва. убаримаг̇г̇ад̇д̇аяз ‘‘д̣̇ассанадтзна саммаад̣̇идтий’’д̇иаад̣̇ийни адта маг̇г̇ан̇г̇аани яат̇аа батамаж̇жхаанигз батамамаг̇г̇з лаб̣бханд̇и, д̇ат̇зва лаб̣бханд̇и. д̇ад̇т̇а батамамаг̇г̇з саммаад̣̇идти мижчаад̣̇идтим̣ баж̇ахад̇ийд̇и саммаад̣̇идти. саммаасан̇габбаад̣̇аяоби мижчаасан̇габбаад̣̇ийнам̣ баж̇аханадтзнзва взд̣̇ид̇аб̣б̣аа. звам̣ санд̇з батамамаг̇г̇знзва д̣̇ваасадтияаа д̣̇идтиг̇ад̇аанам̣ бахийнад̇д̇аа убаримаг̇г̇ад̇д̇аязна бахаад̇аб̣б̣аа д̣̇идти наама над̇т̇и.
Micchāvācāya vuṭṭhātīti musāvādato ceva apāyagamanīyapisuṇapharusasamphappalāpehi ca vuṭṭhāti . Micchākammantā vuṭṭhātīti pāṇātipātādinnādānamicchācārehi vuṭṭhāti. Micchāājīvāvuṭṭhātīti kuhanā lapanā nemittikatā nippesikatā lābhenalābhaṃnijigīsanatā, ājīvahetukehi vā sattahipi kāyavacīkammehi vuṭṭhāti. Micchāvāyāmamicchāsatimicchāsamādhīhi vuṭṭhānaṃ micchāsaṅkappavuṭṭhāne vuttanayeneva veditabbaṃ. Micchāsatīti ca satiyā paṭipakkhākārena uppajjamānā akusalacittuppādamattameva. Uparimaggattaye ‘‘dassanaṭṭhena sammādiṭṭhī’’tiādīni aṭṭha maggaṅgāni yathā paṭhamajjhānike paṭhamamagge labbhanti, tatheva labbhanti. Tattha paṭhamamagge sammādiṭṭhi micchādiṭṭhiṃ pajahatīti sammādiṭṭhi. Sammāsaṅkappādayopi micchāsaṅkappādīnaṃ pajahanaṭṭheneva veditabbā. Evaṃ sante paṭhamamaggeneva dvāsaṭṭhiyā diṭṭhigatānaṃ pahīnattā uparimaggattayena pahātabbā diṭṭhi nāma natthi.
д̇ад̇т̇а саммаад̣̇идтийд̇и наамам̣ гат̇ам̣ ход̇ийд̇и? яат̇аа висам̣ ад̇т̇и ваа ход̇у маа ваа, аг̇ад̣̇о аг̇ад̣̇од̇взва вужжад̇и, звам̣ мижчаад̣̇идти ад̇т̇и ваа ход̇у маа ваа, аяам̣ саммаад̣̇идти зва наама. яад̣̇и звам̣ наамамад̇д̇амзвзд̇ам̣ ход̇и, убаримаг̇г̇ад̇д̇аяз бана саммаад̣̇идтияаа гижжаабхааво аабаж̇ж̇ад̇и, маг̇г̇ан̇г̇аани на барибуурзнд̇и. д̇асмаа саммаад̣̇идти сагижжагаа гаад̇аб̣б̣аа, маг̇г̇ан̇г̇аани барибуурзд̇аб̣б̣аанийд̇и. сагижжагаа жзд̇т̇а саммаад̣̇идти яат̇аалаабханияамзна д̣̇ийбзд̇аб̣б̣аа. убаримаг̇г̇ад̇д̇аяаваж̇жхо хи зго маано ад̇т̇и, со д̣̇идтидтаанз д̇идтад̇и, саа д̇ам̣ маанам̣ баж̇ахад̇ийд̇и саммаад̣̇идти. сод̇аабад̇д̇имаг̇г̇асмин̃хи саммаад̣̇идти мижчаад̣̇идтим̣ баж̇ахад̇и. сод̇аабаннасса бана сагад̣̇ааг̇аамимаг̇г̇аваж̇жхо маано ад̇т̇и, д̇ам̣ маанам̣ баж̇ахад̇ийд̇и саммаад̣̇идти. д̇ассзва сад̇д̇аагусалажид̇д̇асахаж̇аад̇о сан̇габбо ад̇т̇и, д̇зхзва жид̇д̇зхи ваажан̇г̇ажобанам̣ ад̇т̇и, гааяан̇г̇ажобанам̣ ад̇т̇и, бажжаяабарибхог̇о ад̇т̇и, сахаж̇аад̇авааяаамо ад̇т̇и, ассад̇ияабхааво ад̇т̇и, сахаж̇аад̇ажид̇д̇згаг̇г̇ад̇аа ад̇т̇и, зд̇з мижчаасан̇габбаад̣̇аяо наама. сагад̣̇ааг̇аамимаг̇г̇з саммаасан̇габбаад̣̇аяо д̇зсам̣ бахаанзна саммаасан̇габбаад̣̇аяод̇и взд̣̇ид̇аб̣б̣аа. звам̣ сагад̣̇ааг̇аамимаг̇г̇з адтан̇г̇аани сагижжагаани хонд̇и. сагад̣̇ааг̇аамисса анааг̇аамимаг̇г̇аваж̇жхо маано ад̇т̇и, со д̣̇идтидтаанз д̇идтад̇и. д̇ассзва сад̇д̇ахи жид̇д̇зхи сахаж̇аад̇аа сан̇габбаад̣̇аяо ад̇т̇и. д̇зсам̣ бахаанзна анааг̇аамимаг̇г̇з адтаннам̣ ан̇г̇аанам̣ сагижжагад̇аа взд̣̇ид̇аб̣б̣аа. анааг̇аамисса арахад̇д̇амаг̇г̇аваж̇жхо маано ад̇т̇и, со д̣̇идтидтаанз д̇идтад̇и. яаани банасса бан̃жа агусалажид̇д̇аани, д̇зхи сахаж̇аад̇аа сан̇габбаад̣̇аяо ад̇т̇и. д̇зсам̣ бахаанзна арахад̇д̇амаг̇г̇з адтаннам̣ ан̇г̇аанам̣ сагижжагад̇аа взд̣̇ид̇аб̣б̣аа.
Tattha sammādiṭṭhīti nāmaṃ kathaṃ hotīti? Yathā visaṃ atthi vā hotu mā vā, agado agadotveva vuccati, evaṃ micchādiṭṭhi atthi vā hotu mā vā, ayaṃ sammādiṭṭhi eva nāma. Yadi evaṃ nāmamattamevetaṃ hoti, uparimaggattaye pana sammādiṭṭhiyā kiccābhāvo āpajjati, maggaṅgāni na paripūrenti. Tasmā sammādiṭṭhi sakiccakā kātabbā, maggaṅgāni paripūretabbānīti. Sakiccakā cettha sammādiṭṭhi yathālābhaniyamena dīpetabbā. Uparimaggattayavajjho hi eko māno atthi, so diṭṭhiṭṭhāne tiṭṭhati, sā taṃ mānaṃ pajahatīti sammādiṭṭhi. Sotāpattimaggasmiñhi sammādiṭṭhi micchādiṭṭhiṃ pajahati. Sotāpannassa pana sakadāgāmimaggavajjho māno atthi, taṃ mānaṃ pajahatīti sammādiṭṭhi. Tasseva sattaakusalacittasahajāto saṅkappo atthi, teheva cittehi vācaṅgacopanaṃ atthi, kāyaṅgacopanaṃ atthi, paccayaparibhogo atthi, sahajātavāyāmo atthi, assatiyabhāvo atthi, sahajātacittekaggatā atthi, ete micchāsaṅkappādayo nāma. Sakadāgāmimagge sammāsaṅkappādayo tesaṃ pahānena sammāsaṅkappādayoti veditabbā. Evaṃ sakadāgāmimagge aṭṭhaṅgāni sakiccakāni honti. Sakadāgāmissa anāgāmimaggavajjho māno atthi, so diṭṭhiṭṭhāne tiṭṭhati. Tasseva sattahi cittehi sahajātā saṅkappādayo atthi. Tesaṃ pahānena anāgāmimagge aṭṭhannaṃ aṅgānaṃ sakiccakatā veditabbā. Anāgāmissa arahattamaggavajjho māno atthi, so diṭṭhiṭṭhāne tiṭṭhati. Yāni panassa pañca akusalacittāni, tehi sahajātā saṅkappādayo atthi. Tesaṃ pahānena arahattamagge aṭṭhannaṃ aṅgānaṃ sakiccakatā veditabbā.
ол̣ааригаад̇и гааяаважийд̣̇ваарз вийд̇иггамасса бажжаяабхаавзна т̇уулабхууд̇амхаа. гаамарааг̇асан̃н̃ож̇анаад̇и мзт̇унарааг̇асан̇каад̇аа сан̃н̃ож̇анаа. со хи гаамабхавз сан̃н̃ож̇зд̇ийд̇и сан̃н̃ож̇ананд̇и вужжад̇и. бадигхасан̃н̃ож̇анаад̇и б̣яаабаад̣̇асан̃н̃ож̇анаа. со хи аарамман̣з бадихан̃н̃ад̇ийд̇и бадигханд̇и вужжад̇и. д̇з зва т̇аамаг̇ад̇адтзна санд̇аанз анусзнд̇ийд̇и анусаяаа. ан̣усахаг̇ад̇аад̇и ан̣убхууд̇аа, сукумабхууд̇аад̇и ад̇т̇о. д̇аб̣бхаавз хи зд̇т̇а сахаг̇ад̇асад̣̇д̣̇о. сагад̣̇ааг̇аамисса хи гаамарааг̇аб̣яаабаад̣̇аа д̣̇вийхи гааран̣зхи ан̣убхууд̇аа ад̇хижжуббад̇д̇ияаа жа барияудтаанаманд̣̇ад̇ааяа жа. д̇асса хи б̣аалабут̇уж̇ж̇анасса вияа гилзсаа абхин̣хам̣ на уббаж̇ж̇анд̇и, гад̣̇аажи гарахажи уббаж̇ж̇анд̇и. уббаж̇ж̇амаанаа жа б̣аалабут̇уж̇ж̇анасса вияа мад̣̇д̣̇анд̇аа паранд̇аа чаад̣̇знд̇аа анд̇хаанд̇хам̣ гаронд̇аа на уббаж̇ж̇анд̇и, д̣̇вийхи бана маг̇г̇зхи бахийнад̇д̇аа манд̣̇аманд̣̇аа д̇анугаагаараа худ̇ваа уббаж̇ж̇анд̇и, вийд̇иггамам̣ баабзд̇ум̣ самад̇т̇аа на хонд̇и. звам̣ д̇анубхууд̇аа анааг̇аамимаг̇г̇зна бахийяанд̇и руубарааг̇аад̇и руубабхавз чанд̣̇арааг̇аа. аруубарааг̇аад̇и аруубабхавз чанд̣̇арааг̇аа. маанаад̇и уннад̇илагкан̣аа. уд̣̇д̇хажжаад̇и авуубасамалагкан̣аа. авиж̇ж̇ааяаад̇и анд̇халагкан̣ааяа. бхаварааг̇аанусаяаад̇и руубарааг̇ааруубарааг̇авасзна бавад̇д̇абхаварааг̇аанусаяаа.
Oḷārikāti kāyavacīdvāre vītikkamassa paccayabhāvena thūlabhūtamhā. Kāmarāgasaññojanāti methunarāgasaṅkhātā saññojanā. So hi kāmabhave saññojetīti saññojananti vuccati. Paṭighasaññojanāti byāpādasaññojanā. So hi ārammaṇe paṭihaññatīti paṭighanti vuccati. Te eva thāmagataṭṭhena santāne anusentīti anusayā. Aṇusahagatāti aṇubhūtā, sukhumabhūtāti attho. Tabbhāve hi ettha sahagatasaddo. Sakadāgāmissa hi kāmarāgabyāpādā dvīhi kāraṇehi aṇubhūtā adhiccuppattiyā ca pariyuṭṭhānamandatāya ca. Tassa hi bālaputhujjanassa viya kilesā abhiṇhaṃ na uppajjanti, kadāci karahaci uppajjanti. Uppajjamānā ca bālaputhujjanassa viya maddantā pharantā chādentā andhaandhaṃ karontā na uppajjanti, dvīhi pana maggehi pahīnattā mandamandā tanukākārā hutvā uppajjanti, vītikkamaṃ pāpetuṃ samatthā na honti. Evaṃ tanubhūtā anāgāmimaggena pahīyanti rūparāgāti rūpabhave chandarāgā. Arūparāgāti arūpabhave chandarāgā. Mānāti unnatilakkhaṇā. Uddhaccāti avūpasamalakkhaṇā. Avijjāyāti andhalakkhaṇāya. Bhavarāgānusayāti rūparāgārūparāgavasena pavattabhavarāgānusayā.
62. ид̣̇аани маг̇г̇ан̃аан̣асам̣ван̣н̣анам̣ гаронд̇о аж̇аад̇ам̣ жхаабзд̇ийд̇иаад̣̇имааха. д̇ад̇т̇а жа аж̇аад̇ам̣ жхаабзд̇и ж̇аад̇зна, жхаанам̣ д̇зна бавужжад̇ийд̇и ад̇д̇ано санд̇аанз баад̇убхууд̇зна д̇зна д̇зна логуд̇д̇араж̇жхаанзна д̇ам̣саман̇г̇ийбуг̇г̇ало аж̇аад̇амзва д̇ам̣ д̇ам̣ гилзсам̣ жхаабзд̇и д̣̇ахад̇и самужчинд̣̇ад̇и, д̇зна гааран̣зна д̇ам̣ логуд̇д̇арам̣ жхаананд̇и бавужжад̇ийд̇и ад̇т̇о. жхаанавимогкз гусалад̇аад̇и д̇асмим̣ арияамаг̇г̇асамбаяуд̇д̇з вид̇аггаад̣̇игз жхаанз жа вимогкасан̇каад̇з арияамаг̇г̇з жа асаммохавасзна гусалад̇ааяа батамамаг̇г̇знзва бахийнаасу наанаад̣̇идтийсу на гамбад̇и. жхаанам̣ наама д̣̇увид̇хам̣ аарамман̣уубаниж̇жхаанан̃жа лагкан̣уубаниж̇жхаанан̃жа. логияабатамаж̇жхаанаад̣̇игам̣ гасин̣аад̣̇иаарамман̣уубаниж̇жхаанадтзна жхаанам̣, вибассанаасан̇каараанам̣ сабхаавасааман̃н̃алагкан̣уубаниж̇жхаанадтзна жхаанам̣, логуд̇д̇арам̣ ниб̣б̣аанз д̇ат̇алагкан̣уубаниж̇жхаанадтзна жхаанам̣. ид̇ха бана г̇од̇рабхунааби саад̇хааран̣ам̣ лагкан̣уубаниж̇жхаанадтам̣ анаамасид̇ваа асаад̇хааран̣зна гилзсажхаабанадтзна жхаанам̣ вуд̇д̇ам̣. вимогкадто банзд̇т̇а ниб̣б̣аанаарамман̣з судту ад̇химужжанадто гилзсзхи жа судту мужжанадто.
62. Idāni maggañāṇasaṃvaṇṇanaṃ karonto ajātaṃ jhāpetītiādimāha. Tattha ca ajātaṃ jhāpeti jātena, jhānaṃ tena pavuccatīti attano santāne pātubhūtena tena tena lokuttarajjhānena taṃsamaṅgīpuggalo ajātameva taṃ taṃ kilesaṃ jhāpeti dahati samucchindati, tena kāraṇena taṃ lokuttaraṃ jhānanti pavuccatīti attho. Jhānavimokkhe kusalatāti tasmiṃ ariyamaggasampayutte vitakkādike jhāne ca vimokkhasaṅkhāte ariyamagge ca asammohavasena kusalatāya paṭhamamaggeneva pahīnāsu nānādiṭṭhīsu na kampati. Jhānaṃ nāma duvidhaṃ ārammaṇūpanijjhānañca lakkhaṇūpanijjhānañca. Lokiyapaṭhamajjhānādikaṃ kasiṇādiārammaṇūpanijjhānaṭṭhena jhānaṃ, vipassanāsaṅkhārānaṃ sabhāvasāmaññalakkhaṇūpanijjhānaṭṭhena jhānaṃ, lokuttaraṃ nibbāne tathalakkhaṇūpanijjhānaṭṭhena jhānaṃ. Idha pana gotrabhunāpi sādhāraṇaṃ lakkhaṇūpanijjhānaṭṭhaṃ anāmasitvā asādhāraṇena kilesajhāpanaṭṭhena jhānaṃ vuttaṃ. Vimokkhaṭṭho panettha nibbānārammaṇe suṭṭhu adhimuccanaṭṭho kilesehi ca suṭṭhu muccanaṭṭho.
самаад̣̇ахид̇ваа яат̇аа жз вибассад̇ийд̇и аббануубажааракан̣игасамаад̇хийнам̣ ан̃н̃ад̇арзна самаад̇хинаа батамам̣ жид̇д̇асамаад̇хаанам̣ гад̇ваа бажчаа яат̇аа вибассад̇и жа. самужжаяад̇т̇о жз-сад̣̇д̣̇о вибассанам̣ самужжинод̇и. вибассамаано д̇ат̇аа жз самаад̣̇ахзд̇и вибассанаа наамзсаа луукабхууд̇аа нирассаад̣̇аа, самат̇о жа наама синид̣̇д̇хабхууд̇о саассаад̣̇о. д̇асмаа д̇ааяа луукабхууд̇ам̣ жид̇д̇ам̣ синзхзд̇ум̣ вибассамаано д̇ат̇аа жа самаад̣̇ахз. вибассамаано буна самаад̇хим̣ бависид̇ваа жид̇д̇асамаад̇хаанан̃жа д̇ат̇зва гарзяяа, яат̇зва вибассананд̇и ад̇т̇о. ид̇ха жз-сад̣̇д̣̇о самаад̣̇аханам̣ самужжинод̇и. убхаяад̇т̇ааби г̇аат̇ааб̣анд̇хаанувад̇д̇анзна жз-гааро гад̇о, ад̇т̇о бана жа-гаарад̇т̇о зва. вибассанаа жа самат̇о д̇ад̣̇аа ахууд̇и яасмаа самат̇авибассанаанам̣ яуг̇анад̣̇д̇хабхаавз сад̇и арияамаг̇г̇абаад̇убхааво ход̇и, д̇асмаа арияамаг̇г̇аж̇ананасамад̇т̇ад̇д̇аа яад̣̇аа д̇ад̣̇убхаяасамааяог̇о ход̇и, д̇ад̣̇аа вибассанаа жа самат̇о жа аху, самат̇авибассанаа бхууд̇аа наама ход̇ийд̇и ад̇т̇о. д̇аа жа самат̇авибассанаа арияамаг̇г̇аабхимукийгаалз жа маг̇г̇агкан̣з жа самаанабхааг̇аа яуг̇анад̣̇д̇хаа вад̇д̇арз самаано само бхааг̇о годтаасо зд̇зсанд̇и самаанабхааг̇аа, яуг̇з над̣̇д̇хаа вияаад̇и яуг̇анад̣̇д̇хаа, ан̃н̃аман̃н̃ам̣ анад̇ивад̇д̇анадтзна самад̇хураа самаб̣алаад̇и ад̇т̇о. вид̇т̇ааро банасса яуг̇анад̣̇д̇хагат̇ааяам̣ аавибхависсад̇и.
Samādahitvā yathā ce vipassatīti appanūpacārakhaṇikasamādhīnaṃ aññatarena samādhinā paṭhamaṃ cittasamādhānaṃ katvā pacchā yathā vipassati ca. Samuccayattho ce-saddo vipassanaṃ samuccinoti. Vipassamāno tathā ce samādaheti vipassanā nāmesā lūkhabhūtā nirassādā, samatho ca nāma siniddhabhūto saassādo. Tasmā tāya lūkhabhūtaṃ cittaṃ sinehetuṃ vipassamāno tathā ca samādahe. Vipassamāno puna samādhiṃ pavisitvā cittasamādhānañca tatheva kareyya, yatheva vipassananti attho. Idha ce-saddo samādahanaṃ samuccinoti. Ubhayatthāpi gāthābandhānuvattanena ce-kāro kato, attho pana ca-kārattho eva. Vipassanā ca samatho tadā ahūti yasmā samathavipassanānaṃ yuganaddhabhāve sati ariyamaggapātubhāvo hoti, tasmā ariyamaggajananasamatthattā yadā tadubhayasamāyogo hoti, tadā vipassanā ca samatho ca ahu, samathavipassanā bhūtā nāma hotīti attho. Tā ca samathavipassanā ariyamaggābhimukhīkāle ca maggakkhaṇe ca samānabhāgā yuganaddhā vattare samāno samo bhāgo koṭṭhāso etesanti samānabhāgā, yuge naddhā viyāti yuganaddhā, aññamaññaṃ anativattanaṭṭhena samadhurā samabalāti attho. Vitthāro panassa yuganaddhakathāyaṃ āvibhavissati.
д̣̇угкаа сан̇каараа суко, нирод̇хо ид̇и д̣̇ассанам̣. д̣̇убхад̇о вудтид̇аа бан̃н̃аа, пассзд̇и амад̇ам̣ бад̣̇анд̇и д̣̇угкаа сан̇каараа, суко нирод̇хо ниб̣б̣аананд̇и бадибаннасса д̇ад̇о ниб̣б̣аанад̣̇ассанам̣ арияамаг̇г̇ан̃аан̣ам̣ д̣̇убхад̇о вудтид̇аа бан̃н̃аа наама. саа зва жа бан̃н̃аа амад̇ам̣ бад̣̇ам̣ ниб̣б̣аанам̣ аарамман̣апусанзна пусад̇и, бадилабхад̇ийд̇и ад̇т̇о. ниб̣б̣аанан̃хи ад̇аббагадтзна амад̇асад̣̇исанд̇и амад̇ам̣, наасса мад̇ам̣ маран̣ам̣ ваяо ад̇т̇ийд̇иби амад̇ам̣, буб̣б̣абхааг̇ад̇о бадтааяа махад̇аа уссаахзна махад̇ияаа бадибад̣̇ааяа баж̇ж̇ад̇и бадибаж̇ж̇ийяад̇ийд̇и бад̣̇анд̇и вужжад̇и.
Dukkhā saṅkhārā sukho, nirodho iti dassanaṃ. Dubhato vuṭṭhitāpaññā, phasseti amataṃpadanti dukkhā saṅkhārā, sukho nirodho nibbānanti paṭipannassa tato nibbānadassanaṃ ariyamaggañāṇaṃ dubhato vuṭṭhitā paññā nāma. Sā eva ca paññā amataṃ padaṃ nibbānaṃ ārammaṇaphusanena phusati, paṭilabhatīti attho. Nibbānañhi atappakaṭṭhena amatasadisanti amataṃ, nāssa mataṃ maraṇaṃ vayo atthītipi amataṃ, pubbabhāgato paṭṭhāya mahatā ussāhena mahatiyā paṭipadāya pajjati paṭipajjīyatīti padanti vuccati.
вимогкажарияам̣ ж̇аанаад̇ийд̇и вимогкабавад̇д̇им̣ асаммохавасзна ж̇аанаад̇и, бажжавзгкан̣авасзна ж̇аанаад̇и. ‘‘д̣̇убхад̇о вудтаано вимогко, д̣̇убхад̇о вудтаанаа жад̇д̇ааро вимогкаа, д̣̇убхад̇о вудтаанаанам̣ ануломаа жад̇д̇ааро вимогкаа, д̣̇убхад̇о вудтаанабадиббассад̣̇д̇хи жад̇д̇ааро вимогкаа’’д̇и хи убари вимогкагат̇ааяам̣язва (бади. ма. 1.209 аад̣̇аяо) ааг̇ад̇аа вимогкажарияаа взд̣̇ид̇аб̣б̣аа. д̇зсам̣ вид̇т̇ааро д̇ад̇т̇зва ааг̇ад̇о. наанад̇д̇згад̇д̇аговид̣̇од̇и д̇зсам̣ вимогкаанам̣ наанаабхаавз згабхаавз жа гусало. д̣̇убхад̇о вудтаанавимогкавасзна хи д̇зсам̣ згад̇д̇ам̣, жад̇уарияамаг̇г̇авасзна наанад̇д̇ам̣, згзгассааби ваа арияамаг̇г̇асса анубассанаабхзд̣̇зна наанад̇д̇ам̣, арияамаг̇г̇абхаавзна згад̇д̇ам̣ взд̣̇ид̇аб̣б̣ам̣. д̣̇виннам̣ н̃аан̣аанам̣ гусалад̇аад̇и д̣̇ассанасан̇каад̇асса жа бхааванаасан̇каад̇асса жаад̇и имзсам̣ д̣̇виннам̣ н̃аан̣аанам̣ гусалад̇ааяа. д̣̇ассананд̇и хи сод̇аабад̇д̇имаг̇г̇о. со хи батамам̣ ниб̣б̣аанад̣̇ассанад̇о д̣̇ассананд̇и вуд̇д̇о. г̇од̇рабху бана гин̃жааби батамад̇арам̣ ниб̣б̣аанам̣ бассад̇и, яат̇аа бана ран̃н̃о санд̇игам̣ гзнажид̣̇зва гаран̣ийязна ааг̇ад̇о бурисо д̣̇уурад̇ова рат̇игааяа жаранд̇ам̣ хад̇т̇игканд̇хаг̇ад̇ам̣ рааж̇аанам̣ д̣̇исвааби ‘‘д̣̇идто д̇з рааж̇аа’’д̇и будто д̣̇исваа гад̇д̇аб̣б̣агижжасса агад̇ад̇д̇аа ‘‘на бассаамий’’д̇и ааха, звамзва ниб̣б̣аанам̣ д̣̇исваа гад̇д̇аб̣б̣асса гилзсаббахаанассаабхааваа на ‘‘д̣̇ассана’’нд̇и вужжад̇и. д̇ан̃хи н̃аан̣ам̣ маг̇г̇асса ааваж̇ж̇анадтаанз д̇идтад̇и. бхааванаад̇и сзсамаг̇г̇ад̇д̇аяам̣. д̇ан̃хи батамамаг̇г̇зна д̣̇идтасмим̣язва д̇хаммз бхааванаавасзна уббаж̇ж̇ад̇и, на ад̣̇идтабуб̣б̣ам̣ гин̃жи бассад̇и, д̇асмаа ‘‘бхааванаа’’д̇и вужжад̇и. хздтаа бана бхааванаамаг̇г̇асса абаринидтид̇ад̇д̇аа ‘‘д̣̇виннам̣ н̃аан̣аана’’нд̇и авад̇ваа сод̇аабад̇д̇исагад̣̇ааг̇аамианааг̇аамимаг̇г̇алаабхино санд̇хааяа ‘‘жхаанавимогкз гусалад̇аа’’д̇и вуд̇д̇ам̣, арахад̇д̇амаг̇г̇алаабхино бана бхааванаамаг̇г̇асса баринидтид̇ад̇д̇аа ‘‘д̣̇виннам̣ н̃аан̣аанам̣ гусалад̇аа’’д̇и вуд̇д̇анд̇и взд̣̇ид̇аб̣б̣ам̣.
Vimokkhacariyaṃ jānātīti vimokkhapavattiṃ asammohavasena jānāti, paccavekkhaṇavasena jānāti. ‘‘Dubhato vuṭṭhāno vimokkho, dubhato vuṭṭhānā cattāro vimokkhā, dubhato vuṭṭhānānaṃ anulomā cattāro vimokkhā, dubhato vuṭṭhānapaṭippassaddhi cattāro vimokkhā’’ti hi upari vimokkhakathāyaṃyeva (paṭi. ma. 1.209 ādayo) āgatā vimokkhacariyā veditabbā. Tesaṃ vitthāro tattheva āgato. Nānattekattakovidoti tesaṃ vimokkhānaṃ nānābhāve ekabhāve ca kusalo. Dubhato vuṭṭhānavimokkhavasena hi tesaṃ ekattaṃ, catuariyamaggavasena nānattaṃ, ekekassāpi vā ariyamaggassa anupassanābhedena nānattaṃ, ariyamaggabhāvena ekattaṃ veditabbaṃ. Dvinnaṃ ñāṇānaṃ kusalatāti dassanasaṅkhātassa ca bhāvanāsaṅkhātassa cāti imesaṃ dvinnaṃ ñāṇānaṃ kusalatāya. Dassananti hi sotāpattimaggo. So hi paṭhamaṃ nibbānadassanato dassananti vutto. Gotrabhu pana kiñcāpi paṭhamataraṃ nibbānaṃ passati, yathā pana rañño santikaṃ kenacideva karaṇīyena āgato puriso dūratova rathikāya carantaṃ hatthikkhandhagataṃ rājānaṃ disvāpi ‘‘diṭṭho te rājā’’ti puṭṭho disvā kattabbakiccassa akatattā ‘‘na passāmī’’ti āha, evameva nibbānaṃ disvā kattabbassa kilesappahānassābhāvā na ‘‘dassana’’nti vuccati. Tañhi ñāṇaṃ maggassa āvajjanaṭṭhāne tiṭṭhati. Bhāvanāti sesamaggattayaṃ. Tañhi paṭhamamaggena diṭṭhasmiṃyeva dhamme bhāvanāvasena uppajjati, na adiṭṭhapubbaṃ kiñci passati, tasmā ‘‘bhāvanā’’ti vuccati. Heṭṭhā pana bhāvanāmaggassa apariniṭṭhitattā ‘‘dvinnaṃ ñāṇāna’’nti avatvā sotāpattisakadāgāmianāgāmimaggalābhino sandhāya ‘‘jhānavimokkhe kusalatā’’ti vuttaṃ, arahattamaggalābhino pana bhāvanāmaggassa pariniṭṭhitattā ‘‘dvinnaṃ ñāṇānaṃ kusalatā’’ti vuttanti veditabbaṃ.
маг̇г̇ан̃аан̣анид̣̇д̣̇зсаван̣н̣анаа нидтид̇аа.
Maggañāṇaniddesavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бадисамбхид̣̇аамаг̇г̇абаал̣и • Paṭisambhidāmaggapāḷi / 11. маг̇г̇ан̃аан̣анид̣̇д̣̇зсо • 11. Maggañāṇaniddeso
