| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၁. မဂ္ဂင္ဂနိဒ္ဒေသော
1. Maggaṅganiddeso
၂၄. သမ္မာဒိဋ္ဌိယာ ပဉ္စ ဝိဝေကာ, ပဉ္စ ဝိရာဂာ, ပဉ္စ နိရောဓာ, ပဉ္စ ဝောသ္သဂ္ဂာ, ဒ္ဝာဒသ နိသ္သယာ။ သမ္မာသင္ကပ္ပသ္သ။ပေ.။ သမ္မာဝာစာယ။ သမ္မာကမ္မန္တသ္သ။ သမ္မာအာဇီဝသ္သ။ သမ္မာဝာယာမသ္သ။ သမ္မာသတိယာ။ သမ္မာသမာဓိသ္သ ပဉ္စ ဝိဝေကာ, ပဉ္စ ဝိရာဂာ, ပဉ္စ နိရောဓာ, ပဉ္စ ဝောသ္သဂ္ဂာ, ဒ္ဝာဒသ နိသ္သယာ။
24. Sammādiṭṭhiyā pañca vivekā, pañca virāgā, pañca nirodhā, pañca vossaggā, dvādasa nissayā. Sammāsaṅkappassa…pe… sammāvācāya… sammākammantassa… sammāājīvassa… sammāvāyāmassa… sammāsatiyā… sammāsamādhissa pañca vivekā, pañca virāgā, pañca nirodhā, pañca vossaggā, dvādasa nissayā.
သမ္မာဒိဋ္ဌိယာ ကတမေ ပဉ္စ ဝိဝေကာ? ဝိက္ခမ္ဘနဝိဝေကော, တဒင္ဂဝိဝေကော သမုစ္ဆေဒဝိဝေကော, ပဋိပ္ပသ္သဒ္ဓိဝိဝေကော, နိသ္သရဏဝိဝေကော။ ဝိက္ခမ္ဘနဝိဝေကော စ နီဝရဏာနံ ပဌမဇ္ဈာနံ ဘာဝယတော , တဒင္ဂဝိဝေကော စ ဒိဋ္ဌိဂတာနံ နိဗ္ဗေဓဘာဂိယံ သမာဓိံ ဘာဝယတော, သမုစ္ဆေဒဝိဝေကော စ လောကုတ္တရံ ခယဂာမိမဂ္ဂံ ဘာဝယတော, ပဋိပ္ပသ္သဒ္ဓိဝိဝေကော စ ဖလက္ခဏေ, နိသ္သရဏဝိဝေကော စ နိရောဓော နိဗ္ဗာနံ။ သမ္မာဒိဋ္ဌိယာ ဣမေ ပဉ္စ ဝိဝေကာ။ ဣမေသု ပဉ္စသု ဝိဝေကေသု ဆန္ဒဇာတော ဟောတိ သဒ္ဓာဓိမုတ္တော, စိတ္တဉ္စသ္သ သ္ဝာဓိဋ္ဌိတံ။
Sammādiṭṭhiyākatame pañca vivekā? Vikkhambhanaviveko, tadaṅgaviveko samucchedaviveko, paṭippassaddhiviveko, nissaraṇaviveko. Vikkhambhanaviveko ca nīvaraṇānaṃ paṭhamajjhānaṃ bhāvayato , tadaṅgaviveko ca diṭṭhigatānaṃ nibbedhabhāgiyaṃ samādhiṃ bhāvayato, samucchedaviveko ca lokuttaraṃ khayagāmimaggaṃ bhāvayato, paṭippassaddhiviveko ca phalakkhaṇe, nissaraṇaviveko ca nirodho nibbānaṃ. Sammādiṭṭhiyā ime pañca vivekā. Imesu pañcasu vivekesu chandajāto hoti saddhādhimutto, cittañcassa svādhiṭṭhitaṃ.
သမ္မာဒိဋ္ဌိယာ ကတမေ ပဉ္စ ဝိရာဂာ? ဝိက္ခမ္ဘနဝိရာဂော, တဒင္ဂဝိရာဂော, သမုစ္ဆေဒဝိရာဂော, ပဋိပ္ပသ္သဒ္ဓိဝိရာဂော, နိသ္သရဏဝိရာဂော။ ဝိက္ခမ္ဘနဝိရာဂော စ နီဝရဏာနံ ပဌမဇ္ဈာနံ ဘာဝယတော, တဒင္ဂဝိရာဂော စ ဒိဋ္ဌိဂတာနံ နိဗ္ဗေဓဘာဂိယံ သမာဓိံ ဘာဝယတော, သမုစ္ဆေဒဝိရာဂော စ လောကုတ္တရံ ခယဂာမိမဂ္ဂံ ဘာဝယတော, ပဋိပ္ပသ္သဒ္ဓိဝိရာဂော စ ဖလက္ခဏေ, နိသ္သရဏဝိရာဂော စ နိရောဓော နိဗ္ဗာနံ။ သမ္မာဒိဋ္ဌိယာ ဣမေ ပဉ္စ ဝိရာဂာ။ ဣမေသု ပဉ္စသု ဝိရာဂေသု ဆန္ဒဇာတော ဟောတိ သဒ္ဓာဓိမုတ္တော, စိတ္တဉ္စသ္သ သ္ဝာဓိဋ္ဌိတံ။
Sammādiṭṭhiyā katame pañca virāgā? Vikkhambhanavirāgo, tadaṅgavirāgo, samucchedavirāgo, paṭippassaddhivirāgo, nissaraṇavirāgo. Vikkhambhanavirāgo ca nīvaraṇānaṃ paṭhamajjhānaṃ bhāvayato, tadaṅgavirāgo ca diṭṭhigatānaṃ nibbedhabhāgiyaṃ samādhiṃ bhāvayato, samucchedavirāgo ca lokuttaraṃ khayagāmimaggaṃ bhāvayato, paṭippassaddhivirāgo ca phalakkhaṇe, nissaraṇavirāgo ca nirodho nibbānaṃ. Sammādiṭṭhiyā ime pañca virāgā. Imesu pañcasu virāgesu chandajāto hoti saddhādhimutto, cittañcassa svādhiṭṭhitaṃ.
သမ္မာဒိဋ္ဌိယာ ကတမေ ပဉ္စ နိရောဓာ? ဝိက္ခမ္ဘနနိရောဓော, တဒင္ဂနိရောဓော, သမုစ္ဆေဒနိရောဓော, ပဋိပ္ပသ္သဒ္ဓိနိရောဓော, နိသ္သရဏနိရောဓော။ ဝိက္ခမ္ဘနနိရောဓော စ နီဝရဏာနံ ပဌမဇ္ဈာနံ ဘာဝယတော, တဒင္ဂနိရောဓော စ ဒိဋ္ဌိဂတာနံ နိဗ္ဗေဓဘာဂိယံ သမာဓိံ ဘာဝယတော, သမုစ္ဆေဒနိရောဓော စ လောကုတ္တရံ ခယဂာမိမဂ္ဂံ ဘာဝယတော, ပဋိပ္ပသ္သဒ္ဓိနိရောဓော စ ဖလက္ခဏေ, နိသ္သရဏနိရောဓော စ အမတာ ဓာတု။ သမ္မာဒိဋ္ဌိယာ ဣမေ ပဉ္စ နိရောဓာ။ ဣမေသု ပဉ္စသု နိရောဓေသု ဆန္ဒဇာတော ဟောတိ သဒ္ဓာဓိမုတ္တော, စိတ္တဉ္စသ္သ သ္ဝာဓိဋ္ဌိတံ။
Sammādiṭṭhiyākatame pañca nirodhā? Vikkhambhananirodho, tadaṅganirodho, samucchedanirodho, paṭippassaddhinirodho, nissaraṇanirodho. Vikkhambhananirodho ca nīvaraṇānaṃ paṭhamajjhānaṃ bhāvayato, tadaṅganirodho ca diṭṭhigatānaṃ nibbedhabhāgiyaṃ samādhiṃ bhāvayato, samucchedanirodho ca lokuttaraṃ khayagāmimaggaṃ bhāvayato, paṭippassaddhinirodho ca phalakkhaṇe, nissaraṇanirodho ca amatā dhātu. Sammādiṭṭhiyā ime pañca nirodhā. Imesu pañcasu nirodhesu chandajāto hoti saddhādhimutto, cittañcassa svādhiṭṭhitaṃ.
သမ္မာဒိဋ္ဌိယာ ကတမေ ပဉ္စ ဝောသ္သဂ္ဂာ? ဝိက္ခမ္ဘနဝောသ္သဂ္ဂော, တဒင္ဂဝောသ္သဂ္ဂော, သမုစ္ဆေဒဝောသ္သဂ္ဂော, ပဋိပ္ပသ္သဒ္ဓိဝောသ္သဂ္ဂော, နိသ္သရဏဝောသ္သဂ္ဂော။ ဝိက္ခမ္ဘနဝောသ္သဂ္ဂော စ နီဝရဏာနံ ပဌမဇ္ဈာနံ ဘာဝယတော, တဒင္ဂဝောသ္သဂ္ဂော စ ဒိဋ္ဌိဂတာနံ နိဗ္ဗေဓဘာဂိယံ သမာဓိံ ဘာဝယတော, သမုစ္ဆေဒဝောသ္သဂ္ဂော စ လောကုတ္တရံ ခယဂာမိမဂ္ဂံ ဘာဝယတော, ပဋိပ္ပသ္သဒ္ဓိဝောသ္သဂ္ဂော စ ဖလက္ခဏေ, နိသ္သရဏဝောသ္သဂ္ဂော စ နိရောဓော နိဗ္ဗာနံ။ သမ္မာဒိဋ္ဌိယာ ဣမေ ပဉ္စ ဝောသ္သဂ္ဂာ။ ဣမေသု ပဉ္စသု ဝောသ္သဂ္ဂေသု ဆန္ဒဇာတော ဟောတိ သဒ္ဓာဓိမုတ္တော, စိတ္တဉ္စသ္သ သ္ဝာဓိဋ္ဌိတံ။ သမ္မာဒိဋ္ဌိယာ ဣမေ ပဉ္စ ဝိဝေကာ, ပဉ္စ ဝိရာဂာ, ပဉ္စ နိရောဓာ, ပဉ္စ ဝောသ္သဂ္ဂာ, ဒ္ဝာဒသ နိသ္သယာ။
Sammādiṭṭhiyā katame pañca vossaggā? Vikkhambhanavossaggo, tadaṅgavossaggo, samucchedavossaggo, paṭippassaddhivossaggo, nissaraṇavossaggo. Vikkhambhanavossaggo ca nīvaraṇānaṃ paṭhamajjhānaṃ bhāvayato, tadaṅgavossaggo ca diṭṭhigatānaṃ nibbedhabhāgiyaṃ samādhiṃ bhāvayato, samucchedavossaggo ca lokuttaraṃ khayagāmimaggaṃ bhāvayato, paṭippassaddhivossaggo ca phalakkhaṇe, nissaraṇavossaggo ca nirodho nibbānaṃ. Sammādiṭṭhiyā ime pañca vossaggā. Imesu pañcasu vossaggesu chandajāto hoti saddhādhimutto, cittañcassa svādhiṭṭhitaṃ. Sammādiṭṭhiyā ime pañca vivekā, pañca virāgā, pañca nirodhā, pañca vossaggā, dvādasa nissayā.
၂၅. သမ္မာသင္ကပ္ပသ္သ ။ပေ.။ သမ္မာဝာစာယ။ သမ္မာကမ္မန္တသ္သ။ သမ္မာအာဇီဝသ္သ။ သမ္မာဝာယာမသ္သ။ သမ္မာသတိယာ။ သမ္မာသမာဓိသ္သ ကတမေ ပဉ္စ ဝိဝေကာ? ဝိက္ခမ္ဘနဝိဝေကော, တဒင္ဂဝိဝေကော, သမုစ္ဆေဒဝိဝေကော, ပဋိပ္ပသ္သဒ္ဓိဝိဝေကော, နိသ္သရဏဝိဝေကော။ ဝိက္ခမ္ဘနဝိဝေကော စ နီဝရဏာနံ ပဌမဇ္ဈာနံ ဘာဝယတော, တဒင္ဂဝိဝေကော စ ဒိဋ္ဌိဂတာနံ နိဗ္ဗေဓဘာဂိယံ သမာဓိံ ဘာဝယတော, သမုစ္ဆေဒဝိဝေကော စ လောကုတ္တရံ ခယဂာမိမဂ္ဂံ ဘာဝယတော, ပဋိပ္ပသ္သဒ္ဓိဝိဝေကော စ ဖလက္ခဏေ နိသ္သရဏဝိဝေကော စ နိရောဓော နိဗ္ဗာနံ။ သမ္မာသမာဓိသ္သ ဣမေ ပဉ္စ ဝိဝေကာ။ ဣမေသု ပဉ္စသု ဝိဝေကေသု ဆန္ဒဇာတော ဟောတိ သဒ္ဓာဓိမုတ္တော, စိတ္တဉ္စသ္သ သ္ဝာဓိဋ္ဌိတံ။
25.Sammāsaṅkappassa…pe… sammāvācāya… sammākammantassa… sammāājīvassa… sammāvāyāmassa… sammāsatiyā… sammāsamādhissa katame pañca vivekā? Vikkhambhanaviveko, tadaṅgaviveko, samucchedaviveko, paṭippassaddhiviveko, nissaraṇaviveko. Vikkhambhanaviveko ca nīvaraṇānaṃ paṭhamajjhānaṃ bhāvayato, tadaṅgaviveko ca diṭṭhigatānaṃ nibbedhabhāgiyaṃ samādhiṃ bhāvayato, samucchedaviveko ca lokuttaraṃ khayagāmimaggaṃ bhāvayato, paṭippassaddhiviveko ca phalakkhaṇe nissaraṇaviveko ca nirodho nibbānaṃ. Sammāsamādhissa ime pañca vivekā. Imesu pañcasu vivekesu chandajāto hoti saddhādhimutto, cittañcassa svādhiṭṭhitaṃ.
သမ္မာသမာဓိသ္သ ကတမေ ပဉ္စ ဝိရာဂာ? ဝိက္ခမ္ဘနဝိရာဂော, တဒင္ဂဝိရာဂော, သမုစ္ဆေဒဝိရာဂော , ပဋိပ္ပသ္သဒ္ဓိဝိရာဂော, နိသ္သရဏဝိရာဂော။ ဝိက္ခမ္ဘနဝိရာဂော စ နီဝရဏာနံ ပဌမဇ္ဈာနံ ဘာဝယတော, တဒင္ဂဝိရာဂော စ ဒိဋ္ဌိဂတာနံ နိဗ္ဗေဓဘာဂိယံ သမာဓိံ ဘာဝယတော, သမုစ္ဆေဒဝိရာဂော စ လောကုတ္တရံ ခယဂာမိမဂ္ဂံ ဘာဝယတော, ပဋိပ္ပသ္သဒ္ဓိဝိရာဂော စ ဖလက္ခဏေ, နိသ္သရဏဝိရာဂော စ နိရောဓော နိဗ္ဗာနံ။ သမ္မာသမာဓိသ္သ ဣမေ ပဉ္စ ဝိရာဂာ။ ဣမေသု ပဉ္စသု ဝိရာဂေသု ဆန္ဒဇာတော ဟောတိ သဒ္ဓာဓိမုတ္တော, စိတ္တဉ္စသ္သ သ္ဝာဓိဋ္ဌိတံ။
Sammāsamādhissa katame pañca virāgā? Vikkhambhanavirāgo, tadaṅgavirāgo, samucchedavirāgo , paṭippassaddhivirāgo, nissaraṇavirāgo. Vikkhambhanavirāgo ca nīvaraṇānaṃ paṭhamajjhānaṃ bhāvayato, tadaṅgavirāgo ca diṭṭhigatānaṃ nibbedhabhāgiyaṃ samādhiṃ bhāvayato, samucchedavirāgo ca lokuttaraṃ khayagāmimaggaṃ bhāvayato, paṭippassaddhivirāgo ca phalakkhaṇe, nissaraṇavirāgo ca nirodho nibbānaṃ. Sammāsamādhissa ime pañca virāgā. Imesu pañcasu virāgesu chandajāto hoti saddhādhimutto, cittañcassa svādhiṭṭhitaṃ.
သမ္မာသမာဓိသ္သ ကတမေ ပဉ္စ နိရောဓာ? ဝိက္ခမ္ဘနနိရောဓော , တဒင္ဂနိရောဓော, သမုစ္ဆေဒနိရောဓော, ပဋိပ္ပသ္သဒ္ဓိနိရောဓော, နိသ္သရဏနိရောဓော။ ဝိက္ခမ္ဘနနိရောဓော စ နီဝရဏာနံ ပဌမဇ္ဈာနံ ဘာဝယတော, တဒင္ဂနိရောဓော စ ဒိဋ္ဌိဂတာနံ နိဗ္ဗေဓဘာဂိယံ သမာဓိံ ဘာဝယတော, သမုစ္ဆေဒနိရောဓော စ လောကုတ္တရံ ခယဂာမိမဂ္ဂံ ဘာဝယတော, ပဋိပ္ပသ္သဒ္ဓိနိရောဓော စ ဖလက္ခဏေ, နိသ္သရဏနိရောဓော စ အမတာ ဓာတု။ သမ္မာသမာဓိသ္သ ဣမေ ပဉ္စ နိရောဓာ။ ဣမေသု ပဉ္စသု နိရောဓေသု ဆန္ဒဇာတော ဟောတိ သဒ္ဓာဓိမုတ္တော, စိတ္တဉ္စသ္သ သ္ဝာဓိဋ္ဌိတံ။
Sammāsamādhissa katame pañca nirodhā? Vikkhambhananirodho , tadaṅganirodho, samucchedanirodho, paṭippassaddhinirodho, nissaraṇanirodho. Vikkhambhananirodho ca nīvaraṇānaṃ paṭhamajjhānaṃ bhāvayato, tadaṅganirodho ca diṭṭhigatānaṃ nibbedhabhāgiyaṃ samādhiṃ bhāvayato, samucchedanirodho ca lokuttaraṃ khayagāmimaggaṃ bhāvayato, paṭippassaddhinirodho ca phalakkhaṇe, nissaraṇanirodho ca amatā dhātu. Sammāsamādhissa ime pañca nirodhā. Imesu pañcasu nirodhesu chandajāto hoti saddhādhimutto, cittañcassa svādhiṭṭhitaṃ.
သမ္မာသမာဓိသ္သ ကတမေ ပဉ္စ ဝောသ္သဂ္ဂာ? ဝိက္ခမ္ဘနဝောသ္သဂ္ဂော, တဒင္ဂဝောသ္သဂ္ဂော, သမုစ္ဆေဒဝောသ္သဂ္ဂော, ပဋိပ္ပသ္သဒ္ဓိဝောသ္သဂ္ဂော, နိသ္သရဏဝောသ္သဂ္ဂော။ ဝိက္ခမ္ဘနဝောသ္သဂ္ဂော စ နီဝရဏာနံ ပဌမဇ္ဈာနံ ဘာဝယတော, တဒင္ဂဝောသ္သဂ္ဂော စ ဒိဋ္ဌိဂတာနံ နိဗ္ဗေဓဘာဂိယံ သမာဓိံ ဘာဝယတော, သမုစ္ဆေဒဝောသ္သဂ္ဂော စ လောကုတ္တရံ ခယဂာမိမဂ္ဂံ ဘာဝယတော, ပဋိပ္ပသ္သဒ္ဓိဝောသ္သဂ္ဂော စ ဖလက္ခဏေ, နိသ္သရဏဝောသ္သဂ္ဂော စ နိရောဓော နိဗ္ဗာနံ။ သမ္မာသမာဓိသ္သ ဣမေ ပဉ္စ ဝောသ္သဂ္ဂာ။ ဣမေသု ပဉ္စသု ဝောသ္သဂ္ဂေသု ဆန္ဒဇာတော ဟောတိ သဒ္ဓာဓိမုတ္တော, စိတ္တဉ္စသ္သ သ္ဝာဓိဋ္ဌိတံ။ သမ္မာသမာဓိသ္သ ဣမေ ပဉ္စ ဝိဝေကာ, ပဉ္စ ဝိရာဂာ, ပဉ္စ နိရောဓာ, ပဉ္စ ဝောသ္သဂ္ဂာ, ဒ္ဝာဒသ နိသ္သယာ။
Sammāsamādhissa katame pañca vossaggā? Vikkhambhanavossaggo, tadaṅgavossaggo, samucchedavossaggo, paṭippassaddhivossaggo, nissaraṇavossaggo. Vikkhambhanavossaggo ca nīvaraṇānaṃ paṭhamajjhānaṃ bhāvayato, tadaṅgavossaggo ca diṭṭhigatānaṃ nibbedhabhāgiyaṃ samādhiṃ bhāvayato, samucchedavossaggo ca lokuttaraṃ khayagāmimaggaṃ bhāvayato, paṭippassaddhivossaggo ca phalakkhaṇe, nissaraṇavossaggo ca nirodho nibbānaṃ. Sammāsamādhissa ime pañca vossaggā. Imesu pañcasu vossaggesu chandajāto hoti saddhādhimutto, cittañcassa svādhiṭṭhitaṃ. Sammāsamādhissa ime pañca vivekā, pañca virāgā, pañca nirodhā, pañca vossaggā, dvādasa nissayā.
၂၆. ‘‘သေယ္ယထာပိ, ဘိက္ခဝေ, ယေ ကေစိ ဗလကရဏီယာ ကမ္မန္တာ ကရီယန္တိ , သဗ္ဗေ တေ ပထဝိံ နိသ္သာယ ပထဝိယံ ပတိဋ္ဌာယ ဧဝမေတေ ဗလကရဏီယာ ကမ္မန္တာ ကရီယန္တိ; ဧဝမေဝံ ခော, ဘိက္ခဝေ, ဘိက္ခု သီလံ နိသ္သာယ သီလေ ပတိဋ္ဌာယ သတ္တ ဗောဇ္ဈင္ဂေ ဘာဝေတိ, သတ္တ ဗောဇ္ဈင္ဂေ ဗဟုလီကရောတိ။ပေ.။ သတ္တ ဗောဇ္ဈင္ဂေ ဘာဝေန္တော သတ္တ ဗောဇ္ဈင္ဂေ ဗဟုလီကရောန္တော ဝုဒ္ဓိံ ဝိရူဠ္ဟိံ ဝေပုလ္လံ ပာပုဏာတိ ဓမ္မေသု။ပေ.။ ပဉ္စ ဗလာနိ ဘာဝေတိ, ပဉ္စ ဗလာနိ ဗဟုလီကရောတိ။ပေ.။ ပဉ္စ ဗလာနိ ဘာဝေန္တော ပဉ္စ ဗလာနိ ဗဟုလီကရောန္တော ဝုဒ္ဓိံ ဝိရူဠ္ဟိံ ဝေပုလ္လံ ပာပုဏာတိ ဓမ္မေသု။ပေ.။ ပဉ္စိန္ဒ္ရိယာနိ ဘာဝေတိ, ပဉ္စိန္ဒ္ရိယာနိ ဗဟုလီကရောတိ။ပေ.။။
26. ‘‘Seyyathāpi, bhikkhave, ye keci balakaraṇīyā kammantā karīyanti , sabbe te pathaviṃ nissāya pathaviyaṃ patiṭṭhāya evamete balakaraṇīyā kammantā karīyanti; evamevaṃ kho, bhikkhave, bhikkhu sīlaṃ nissāya sīle patiṭṭhāya satta bojjhaṅge bhāveti, satta bojjhaṅge bahulīkaroti…pe… satta bojjhaṅge bhāvento satta bojjhaṅge bahulīkaronto vuddhiṃ virūḷhiṃ vepullaṃ pāpuṇāti dhammesu…pe… pañca balāni bhāveti, pañca balāni bahulīkaroti…pe… pañca balāni bhāvento pañca balāni bahulīkaronto vuddhiṃ virūḷhiṃ vepullaṃ pāpuṇāti dhammesu…pe… pañcindriyāni bhāveti, pañcindriyāni bahulīkaroti…pe….
‘‘သေယ္ယထာပိ, ဘိက္ခဝေ, ယေ ကေစိ ဗီဇဂာမဘူတဂာမာ ဝုဒ္ဓိံ ဝိရူဠ္ဟိံ ဝေပုလ္လံ အာပဇ္ဇန္တိ, သဗ္ဗေ တေ ပထဝိံ နိသ္သာယ ပထဝိယံ ပတိဋ္ဌာယ ဧဝမေတေ ဗီဇဂာမဘူတဂာမာ ဝုဒ္ဓိံ ဝိရူဠ္ဟိံ ဝေပုလ္လံ အာပဇ္ဇန္တိ, ဧဝမေဝံ ခော, ဘိက္ခဝေ, ဘိက္ခု သီလံ နိသ္သာယ သီလေ ပတိဋ္ဌာယ ပဉ္စိန္ဒ္ရိယာနိ ဘာဝေန္တော ပဉ္စိန္ဒ္ရိယာနိ ဗဟုလီကရောန္တော ဝုဒ္ဓိံ ဝိရူဠ္ဟိံ ဝေပုလ္လံ ပာပုဏာတိ ဓမ္မေသု။
‘‘Seyyathāpi, bhikkhave, ye keci bījagāmabhūtagāmā vuddhiṃ virūḷhiṃ vepullaṃ āpajjanti, sabbe te pathaviṃ nissāya pathaviyaṃ patiṭṭhāya evamete bījagāmabhūtagāmā vuddhiṃ virūḷhiṃ vepullaṃ āpajjanti, evamevaṃ kho, bhikkhave, bhikkhu sīlaṃ nissāya sīle patiṭṭhāya pañcindriyāni bhāvento pañcindriyāni bahulīkaronto vuddhiṃ virūḷhiṃ vepullaṃ pāpuṇāti dhammesu.
‘‘ကထဉ္စ , ဘိက္ခဝေ, ဘိက္ခု သီလံ နိသ္သာယ သီလေ ပတိဋ္ဌာယ ပဉ္စိန္ဒ္ရိယာနိ ဘာဝေန္တော ပဉ္စိန္ဒ္ရိယာနိ ဗဟုလီကရောန္တော ဝုဒ္ဓိံ ဝိရူဠ္ဟိံ ဝေပုလ္လံ ပာပုဏာတိ ဓမ္မေသု? ဣဓ, ဘိက္ခဝေ, ဘိက္ခု သဒ္ဓိန္ဒ္ရိယံ ဘာဝေတိ ဝိဝေကနိသ္သိတံ ဝိရာဂနိသ္သိတံ နိရောဓနိသ္သိတံ ဝောသ္သဂ္ဂပရိဏာမိံ။ ဝီရိယိန္ဒ္ရိယံ ဘာဝေတိ။ပေ.။ သတိန္ဒ္ရိယံ ဘာဝေတိ။ပေ.။ သမာဓိန္ဒ္ရိယံ ဘာဝေတိ။ပေ.။ ပညိန္ဒ္ရိယံ ဘာဝေတိ ဝိဝေကနိသ္သိတံ ဝိရာဂနိသ္သိတံ နိရောဓနိသ္သိတံ ဝောသ္သဂ္ဂပရိဏာမိံ။ ဧဝံ ခော, ဘိက္ခဝေ, ဘိက္ခု သီလံ နိသ္သာယ။ပေ.။ ပာပုဏာတိ ဓမ္မေသူ’’တိ။
‘‘Kathañca , bhikkhave, bhikkhu sīlaṃ nissāya sīle patiṭṭhāya pañcindriyāni bhāvento pañcindriyāni bahulīkaronto vuddhiṃ virūḷhiṃ vepullaṃ pāpuṇāti dhammesu? Idha, bhikkhave, bhikkhu saddhindriyaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Vīriyindriyaṃ bhāveti…pe… satindriyaṃ bhāveti…pe… samādhindriyaṃ bhāveti…pe… paññindriyaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Evaṃ kho, bhikkhave, bhikkhu sīlaṃ nissāya…pe… pāpuṇāti dhammesū’’ti.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / မဂ္ဂင္ဂနိဒ္ဒေသဝဏ္ဏနာ • Maggaṅganiddesavaṇṇanā
