| Library / Tipiṭaka / တိပိဋက • Tipiṭaka / ဓမ္မသင္ဂဏိ-အဋ္ဌကထာ • Dhammasaṅgaṇi-aṭṭhakathā |
မဂ္ဂင္ဂရာသိဝဏ္ဏနာ
Maggaṅgarāsivaṇṇanā
သမ္မာဒိဋ္ဌိအာဒီသု ဒသ္သနဋ္ဌေန သမ္မာဒိဋ္ဌိ။ အဘိနိရောပနဋ္ဌေန သမ္မာသင္ကပ္ပော, ပဂ္ဂဟနဋ္ဌေန သမ္မာဝာယာမော, ဥပဋ္ဌာနဋ္ဌေန သမ္မာသတိ, အဝိက္ခေပနဋ္ဌေန သမ္မာသမာဓီတိ ဝေဒိတဗ္ဗော။ ဝစနတ္ထတော ပန သမ္မာ ပသ္သတိ, သမ္မာ ဝာ တာယ ပသ္သန္တီတိ သမ္မာဒိဋ္ဌိ။ သမ္မာ သင္ကပ္ပေတိ, သမ္မာ ဝာ တေန သင္ကပ္ပေန္တီတိ သမ္မာသင္ကပ္ပော။ သမ္မာ ဝာယာမေတိ, သမ္မာ ဝာ တေန ဝာယမန္တီတိ သမ္မာဝာယာမော။ သမ္မာ သရတိ, သမ္မာ ဝာ တာယ သရန္တီတိ သမ္မာသတိ။ သမ္မာ သမာဓိယတိ, သမ္မာ ဝာ တေန သမာဓိယန္တီတိ သမ္မာသမာဓိ။ အပိစ, ပသတ္ထာ သုန္ဒရာ ဝာ ဒိဋ္ဌိ သမ္မာဒိဋ္ဌီတိ။ ဣမိနာပိ နယေန တေသံ ဝစနတ္ထော ဝေဒိတဗ္ဗော။ လက္ခဏာဒီနိ ပန ဟေဋ္ဌာ ဝုတ္တာနေဝ။
Sammādiṭṭhiādīsu dassanaṭṭhena sammādiṭṭhi. Abhiniropanaṭṭhena sammāsaṅkappo, paggahanaṭṭhena sammāvāyāmo, upaṭṭhānaṭṭhena sammāsati, avikkhepanaṭṭhena sammāsamādhīti veditabbo. Vacanatthato pana sammā passati, sammā vā tāya passantīti sammādiṭṭhi. Sammā saṅkappeti, sammā vā tena saṅkappentīti sammāsaṅkappo. Sammā vāyāmeti, sammā vā tena vāyamantīti sammāvāyāmo. Sammā sarati, sammā vā tāya sarantīti sammāsati. Sammā samādhiyati, sammā vā tena samādhiyantīti sammāsamādhi. Apica, pasatthā sundarā vā diṭṭhi sammādiṭṭhīti. Imināpi nayena tesaṃ vacanattho veditabbo. Lakkhaṇādīni pana heṭṭhā vuttāneva.
