| Library / Tipiṭaka / ཏིཔིཊཀ • Tipiṭaka / དྷམྨསངྒཎི-ཨཊྛཀཐཱ • Dhammasaṅgaṇi-aṭṭhakathā |
མགྒངྒརཱསིཝཎྞནཱ
Maggaṅgarāsivaṇṇanā
སམྨཱདིཊྛིཨཱདཱིསུ དསྶནཊྛེན སམྨཱདིཊྛི། ཨབྷིནིརོཔནཊྛེན སམྨཱསངྐཔྤོ, པགྒཧནཊྛེན སམྨཱཝཱཡཱམོ, ཨུཔཊྛཱནཊྛེན སམྨཱསཏི, ཨཝིཀྑེཔནཊྛེན སམྨཱསམཱདྷཱིཏི ཝེདིཏབྦོ། ཝཙནཏྠཏོ པན སམྨཱ པསྶཏི, སམྨཱ ཝཱ ཏཱཡ པསྶནྟཱིཏི སམྨཱདིཊྛི། སམྨཱ སངྐཔྤེཏི, སམྨཱ ཝཱ ཏེན སངྐཔྤེནྟཱིཏི སམྨཱསངྐཔྤོ། སམྨཱ ཝཱཡཱམེཏི, སམྨཱ ཝཱ ཏེན ཝཱཡམནྟཱིཏི སམྨཱཝཱཡཱམོ། སམྨཱ སརཏི, སམྨཱ ཝཱ ཏཱཡ སརནྟཱིཏི སམྨཱསཏི། སམྨཱ སམཱདྷིཡཏི, སམྨཱ ཝཱ ཏེན སམཱདྷིཡནྟཱིཏི སམྨཱསམཱདྷི། ཨཔིཙ, པསཏྠཱ སུནྡརཱ ཝཱ དིཊྛི སམྨཱདིཊྛཱིཏི། ཨིམིནཱཔི ནཡེན ཏེསཾ ཝཙནཏྠོ ཝེདིཏབྦོ། ལཀྑཎཱདཱིནི པན ཧེཊྛཱ ཝུཏྟཱནེཝ།
Sammādiṭṭhiādīsu dassanaṭṭhena sammādiṭṭhi. Abhiniropanaṭṭhena sammāsaṅkappo, paggahanaṭṭhena sammāvāyāmo, upaṭṭhānaṭṭhena sammāsati, avikkhepanaṭṭhena sammāsamādhīti veditabbo. Vacanatthato pana sammā passati, sammā vā tāya passantīti sammādiṭṭhi. Sammā saṅkappeti, sammā vā tena saṅkappentīti sammāsaṅkappo. Sammā vāyāmeti, sammā vā tena vāyamantīti sammāvāyāmo. Sammā sarati, sammā vā tāya sarantīti sammāsati. Sammā samādhiyati, sammā vā tena samādhiyantīti sammāsamādhi. Apica, pasatthā sundarā vā diṭṭhi sammādiṭṭhīti. Imināpi nayena tesaṃ vacanattho veditabbo. Lakkhaṇādīni pana heṭṭhā vuttāneva.
