| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৪. মগ্গঙ্গৰারো
4. Maggaṅgavāro
২৬. সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – সম্মা পস্সতি। সম্মাদিট্ঠিপরিভাৰিতা হোতি মেত্তাচেতোৰিমুত্তি।
26. Sabbe sattā averino hontu, khemino hontu, sukhino hontūti – sammā passati. Sammādiṭṭhiparibhāvitā hoti mettācetovimutti.
সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – সম্মা অভিনিরোপেতি। সম্মাসঙ্কপ্পপরিভাৰিতা হোতি মেত্তাচেতোৰিমুত্তি।
Sabbe sattā averino hontu, khemino hontu, sukhino hontūti – sammā abhiniropeti. Sammāsaṅkappaparibhāvitā hoti mettācetovimutti.
সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – সম্মা পরিগ্গণ্হাতি। সম্মাৰাচাপরিভাৰিতা হোতি মেত্তাচেতোৰিমুত্তি।
Sabbe sattā averino hontu, khemino hontu, sukhino hontūti – sammā pariggaṇhāti. Sammāvācāparibhāvitā hoti mettācetovimutti.
সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – সম্মা সমুট্ঠাপেতি। সম্মাকম্মন্তপরিভাৰিতা হোতি মেত্তাচেতোৰিমুত্তি।
Sabbe sattā averino hontu, khemino hontu, sukhino hontūti – sammā samuṭṭhāpeti. Sammākammantaparibhāvitā hoti mettācetovimutti.
সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – সম্মা ৰোদাপেতি । সম্মাআজীৰপরিভাৰিতা হোতি মেত্তাচেতোৰিমুত্তি।
Sabbe sattā averino hontu, khemino hontu, sukhino hontūti – sammā vodāpeti . Sammāājīvaparibhāvitā hoti mettācetovimutti.
সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – সম্মা পগ্গণ্হাতি। সম্মাৰাযামপরিভাৰিতা হোতি মেত্তাচেতোৰিমুত্তি।
Sabbe sattā averino hontu, khemino hontu, sukhino hontūti – sammā paggaṇhāti. Sammāvāyāmaparibhāvitā hoti mettācetovimutti.
সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – সম্মা উপট্ঠাপেতি। সম্মাসতিপরিভাৰিতা হোতি মেত্তাচেতোৰিমুত্তি।
Sabbe sattā averino hontu, khemino hontu, sukhino hontūti – sammā upaṭṭhāpeti. Sammāsatiparibhāvitā hoti mettācetovimutti.
সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – সম্মা সমাদহতি। সম্মাসমাধিপরিভাৰিতা হোতি মেত্তাচেতোৰিমুত্তি।
Sabbe sattā averino hontu, khemino hontu, sukhino hontūti – sammā samādahati. Sammāsamādhiparibhāvitā hoti mettācetovimutti.
ইমে অট্ঠ মগ্গঙ্গা মেত্তায চেতোৰিমুত্তিযা আসেৰনা হোন্তি। ইমেহি অট্ঠহি মগ্গঙ্গেহি মেত্তাচেতোৰিমুত্তি আসেৰীযতি। ইমে অট্ঠ মগ্গঙ্গা মেত্তায চেতোৰিমুত্তিযা ভাৰনা হোন্তি। ইমেহি অট্ঠহি মগ্গঙ্গেহি মেত্তাচেতোৰিমুত্তি ভাৰীযতি। ইমে অট্ঠ মগ্গঙ্গা মেত্তায চেতোৰিমুত্তিযা বহুলীকতা হোন্তি। ইমেহি অট্ঠহি মগ্গঙ্গেহি মেত্তাচেতোৰিমুত্তি বহুলীকরীযতি। ইমে অট্ঠ মগ্গঙ্গা মেত্তায চেতোৰিমুত্তিযা অলঙ্কারা হোন্তি। ইমেহি অট্ঠহি মগ্গঙ্গেহি মেত্তাচেতোৰিমুত্তি স্ৰালঙ্কতা হোন্তি। ইমে অট্ঠ মগ্গঙ্গা মেত্তায চেতোৰিমুত্তিযা পরিক্খারা হোন্তি। ইমেহি অট্ঠহি মগ্গঙ্গেহি মেত্তাচেতোৰিমুত্তি সুপরিক্খতা হোতি। ইমে অট্ঠ মগ্গঙ্গা মেত্তায চেতোৰিমুত্তিযা পরিৰারা হোন্তি। ইমেহি অট্ঠহি মগ্গঙ্গেহি মেত্তাচেতোৰিমুত্তি সুপরিৰুতা হোতি। ইমে অট্ঠ মগ্গঙ্গা মেত্তায চেতোৰিমুত্তিযা আসেৰনা হোন্তি , ভাৰনা হোন্তি , বহুলীকতা হোন্তি, অলঙ্কারা হোন্তি, পরিক্খারা হোন্তি, পরিৰারা হোন্তি, পারিপূরী হোন্তি, সহগতা হোন্তি, সহজাতা হোন্তি, সংসট্ঠা হোন্তি, সম্পযুত্তা হোন্তি, পক্খন্দনা হোন্তি, পসীদনা হোন্তি, সন্তিট্ঠনা হোন্তি, ৰিমুচ্চনা হোন্তি, ‘‘এতং সন্ত’’ন্তি ফস্সনা হোন্তি, যানীকতা হোন্তি, ৰত্থুকতা হোন্তি, অনুট্ঠিতা হোন্তি, পরিচিতা হোন্তি, সুসমারদ্ধা হোন্তি, সুভাৰিতা হোন্তি, স্ৰাধিট্ঠিতা হোন্তি, সুসমুগ্গতা হোন্তি, সুৰিমুত্তা হোন্তি নিব্বত্তেন্তি জোতেন্তি পতাপেন্তি।
Ime aṭṭha maggaṅgā mettāya cetovimuttiyā āsevanā honti. Imehi aṭṭhahi maggaṅgehi mettācetovimutti āsevīyati. Ime aṭṭha maggaṅgā mettāya cetovimuttiyā bhāvanā honti. Imehi aṭṭhahi maggaṅgehi mettācetovimutti bhāvīyati. Ime aṭṭha maggaṅgā mettāya cetovimuttiyā bahulīkatā honti. Imehi aṭṭhahi maggaṅgehi mettācetovimutti bahulīkarīyati. Ime aṭṭha maggaṅgā mettāya cetovimuttiyā alaṅkārā honti. Imehi aṭṭhahi maggaṅgehi mettācetovimutti svālaṅkatā honti. Ime aṭṭha maggaṅgā mettāya cetovimuttiyā parikkhārā honti. Imehi aṭṭhahi maggaṅgehi mettācetovimutti suparikkhatā hoti. Ime aṭṭha maggaṅgā mettāya cetovimuttiyā parivārā honti. Imehi aṭṭhahi maggaṅgehi mettācetovimutti suparivutā hoti. Ime aṭṭha maggaṅgā mettāya cetovimuttiyā āsevanā honti , bhāvanā honti , bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti, saṃsaṭṭhā honti, sampayuttā honti, pakkhandanā honti, pasīdanā honti, santiṭṭhanā honti, vimuccanā honti, ‘‘etaṃ santa’’nti phassanā honti, yānīkatā honti, vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti, suvimuttā honti nibbattenti jotenti patāpenti.
২৭. সব্বেসং পাণানং…পে॰… সব্বেসং ভূতানং… সব্বেসং পুগ্গলানং… সব্বেসং অত্তভাৰপরিযাপন্নানং… সব্বাসং ইত্থীনং… সব্বেসং পুরিসানং… সব্বেসং অরিযানং… সব্বেসং অনরিযানং… সব্বেসং দেৰানং… সব্বেসং মনুস্সানং… সব্বেসং ৰিনিপাতিকানং পীল়নং ৰজ্জেত্ৰা অপীল়নায, উপঘাতং ৰজ্জেত্ৰা অনুপঘাতেন, সন্তাপং ৰজ্জেত্ৰা অসন্তাপেন, পরিযাদানং ৰজ্জেত্ৰা অপরিযাদানেন, ৰিহেসং ৰজ্জেত্ৰা অৰিহেসায, সব্বে ৰিনিপাতিকা অৰেরিনো হোন্তু মা ৰেরিনো, সুখিনো হোন্তু মা দুক্খিনো, সুখিতত্তা হোন্তু মা দুক্খিতত্তাতি – ইমেহি অট্ঠহাকারেহি সব্বে ৰিনিপাতিকে মেত্তাযতীতি – মেত্তা। তং ধম্মং চেতযতীতি – চেতো। সব্বব্যাপাদপরিযুট্ঠানেহি ৰিমুচ্চতীতি – ৰিমুত্তি। মেত্তা চ চেতো চ ৰিমুত্তি চাতি – মেত্তাচেতোৰিমুত্তি।
27. Sabbesaṃ pāṇānaṃ…pe… sabbesaṃ bhūtānaṃ… sabbesaṃ puggalānaṃ… sabbesaṃ attabhāvapariyāpannānaṃ… sabbāsaṃ itthīnaṃ… sabbesaṃ purisānaṃ… sabbesaṃ ariyānaṃ… sabbesaṃ anariyānaṃ… sabbesaṃ devānaṃ… sabbesaṃ manussānaṃ… sabbesaṃ vinipātikānaṃ pīḷanaṃ vajjetvā apīḷanāya, upaghātaṃ vajjetvā anupaghātena, santāpaṃ vajjetvā asantāpena, pariyādānaṃ vajjetvā apariyādānena, vihesaṃ vajjetvā avihesāya, sabbe vinipātikā averino hontu mā verino, sukhino hontu mā dukkhino, sukhitattā hontu mā dukkhitattāti – imehi aṭṭhahākārehi sabbe vinipātike mettāyatīti – mettā. Taṃ dhammaṃ cetayatīti – ceto. Sabbabyāpādapariyuṭṭhānehi vimuccatīti – vimutti. Mettā ca ceto ca vimutti cāti – mettācetovimutti.
সব্বে ৰিনিপাতিকা অৰেরিনো হোন্তু, খেমিনো হোন্তু, সুখিনো হোন্তূতি – সদ্ধায অধিমুচ্চতি। সদ্ধিন্দ্রিযপরিভাৰিতা হোতি মেত্তাচেতোৰিমুত্তি…পে॰… নিব্বত্তেন্তি জোতেন্তি পতাপেন্তি।
Sabbe vinipātikā averino hontu, khemino hontu, sukhino hontūti – saddhāya adhimuccati. Saddhindriyaparibhāvitā hoti mettācetovimutti…pe… nibbattenti jotenti patāpenti.
সব্বেসং পুরত্থিমায দিসায সত্তানং…পে॰… সব্বেসং পচ্ছিমায দিসায সত্তানং… সব্বেসং উত্তরায দিসায সত্তানং… সব্বেসং দক্খিণায দিসায সত্তানং… সব্বেসং পুরত্থিমায অনুদিসায সত্তানং… সব্বেসং পচ্ছিমায অনুদিসায সত্তানং… সব্বেসং উত্তরায অনুদিসায সত্তানং… সব্বেসং দক্খিণায অনুদিসায সত্তানং… সব্বেসং হেট্ঠিমায দিসায সত্তানং… সব্বেসং উপরিমায দিসায সত্তানং পীল়নং ৰজ্জেত্ৰা অপীল়নায, উপঘাতং ৰজ্জেত্ৰা অনুপঘাতেন, সন্তাপং ৰজ্জেত্ৰা অসন্তাপেন, পরিযাদানং ৰজ্জেত্ৰা অপরিযাদানেন, ৰিহেসং ৰজ্জেত্ৰা অৰিহেসায, সব্বে উপরিমায দিসায সত্তা অৰেরিনো হোন্তু মা ৰেরিনো, সুখিনো হোন্তু মা দুক্খিনো, সুখিতত্তা হোন্তু মা দুক্খিতত্তাতি – ইমেহি অট্ঠহাকারেহি সব্বে উপরিমায দিসায সত্তে মেত্তাযতীতি – মেত্তা। তং ধম্মং চেতযতীতি – চেতো। সব্বব্যাপাদপরিযুট্ঠানেহি ৰিমুচ্চতীতি – ৰিমুত্তি। মেত্তা চ চেতো চ ৰিমুত্তি চাতি – মেত্তাচেতোৰিমুত্তি।
Sabbesaṃ puratthimāya disāya sattānaṃ…pe… sabbesaṃ pacchimāya disāya sattānaṃ… sabbesaṃ uttarāya disāya sattānaṃ… sabbesaṃ dakkhiṇāya disāya sattānaṃ… sabbesaṃ puratthimāya anudisāya sattānaṃ… sabbesaṃ pacchimāya anudisāya sattānaṃ… sabbesaṃ uttarāya anudisāya sattānaṃ… sabbesaṃ dakkhiṇāya anudisāya sattānaṃ… sabbesaṃ heṭṭhimāya disāya sattānaṃ… sabbesaṃ uparimāya disāya sattānaṃ pīḷanaṃ vajjetvā apīḷanāya, upaghātaṃ vajjetvā anupaghātena, santāpaṃ vajjetvā asantāpena, pariyādānaṃ vajjetvā apariyādānena, vihesaṃ vajjetvā avihesāya, sabbe uparimāya disāya sattā averino hontu mā verino, sukhino hontu mā dukkhino, sukhitattā hontu mā dukkhitattāti – imehi aṭṭhahākārehi sabbe uparimāya disāya satte mettāyatīti – mettā. Taṃ dhammaṃ cetayatīti – ceto. Sabbabyāpādapariyuṭṭhānehi vimuccatīti – vimutti. Mettā ca ceto ca vimutti cāti – mettācetovimutti.
সব্বে উপরিমায দিসায সত্তা অৰেরিনো হোন্তু, খেমিনো হোন্তু, সুখিনো হোন্তূতি – সদ্ধায অধিমুচ্চতি। সদ্ধিন্দ্রিযপরিভাৰিতা হোতি মেত্তাচেতোৰিমুত্তি…পে॰… নিব্বত্তেন্তি জোতেন্তি পতাপেন্তি।
Sabbe uparimāya disāya sattā averino hontu, khemino hontu, sukhino hontūti – saddhāya adhimuccati. Saddhindriyaparibhāvitā hoti mettācetovimutti…pe… nibbattenti jotenti patāpenti.
সব্বেসং পুরত্থিমায দিসায পাণানং…পে॰… ভূতানং… পুগ্গলানং অত্তভাৰপরিযাপন্নানং… সব্বাসং ইত্থীনং… সব্বেসং পুরিসানং… সব্বেসং অরিযানং… সব্বেসং অনরিযানং… সব্বেসং দেৰানং… সব্বেসং মনুস্সানং… সব্বেসং ৰিনিপাতিকানং… সব্বেসং পচ্ছিমায দিসায ৰিনিপাতিকানং… সব্বেসং উত্তরায দিসায ৰিনিপাতিকানং… সব্বেসং দক্খিণায দিসায ৰিনিপাতিকানং… সব্বেসং পুরত্থিমায অনুদিসায ৰিনিপাতিকানং… সব্বেসং পচ্ছিমায অনুদিসায ৰিনিপাতিকানং… সব্বেসং উত্তরায অনুদিসায ৰিনিপাতিকানং… সব্বেসং দক্খিণায অনুদিসায ৰিনিপাতিকানং… সব্বেসং হেট্ঠিমায দিসায ৰিনিপাতিকানং… সব্বেসং উপরিমায দিসায ৰিনিপাতিকানং পীল়নং ৰজ্জেত্ৰা অপীল়নায, উপঘাতং ৰজ্জেত্ৰা অনুপঘাতেন, সন্তাপং ৰজ্জেত্ৰা অসন্তাপেন, পরিযাদানং ৰজ্জেত্ৰা অপরিযাদানেন, ৰিহেসং ৰজ্জেত্ৰা অৰিহেসায, সব্বে উপরিমায দিসায ৰিনিপাতিকা অৰেরিনো হোন্তু মা ৰেরিনো, সুখিনো হোন্তু মা দুক্খিনো, সুখিতত্তা হোন্তু মা দুক্খিতত্তাতি – ইমেহি অট্ঠহাকারেহি সব্বে উপরিমায দিসায ৰিনিপাতিকে মেত্তাযতীতি – মেত্তা। তং ধম্মং চেতযতীতি – চেতো। সব্বব্যাপাদপরিযুট্ঠানেহি ৰিমুচ্চতীতি – ৰিমুত্তি। মেত্তা চ চেতো চ ৰিমুত্তি চাতি – মেত্তাচেতোৰিমুত্তি।
Sabbesaṃ puratthimāya disāya pāṇānaṃ…pe… bhūtānaṃ… puggalānaṃ attabhāvapariyāpannānaṃ… sabbāsaṃ itthīnaṃ… sabbesaṃ purisānaṃ… sabbesaṃ ariyānaṃ… sabbesaṃ anariyānaṃ… sabbesaṃ devānaṃ… sabbesaṃ manussānaṃ… sabbesaṃ vinipātikānaṃ… sabbesaṃ pacchimāya disāya vinipātikānaṃ… sabbesaṃ uttarāya disāya vinipātikānaṃ… sabbesaṃ dakkhiṇāya disāya vinipātikānaṃ… sabbesaṃ puratthimāya anudisāya vinipātikānaṃ… sabbesaṃ pacchimāya anudisāya vinipātikānaṃ… sabbesaṃ uttarāya anudisāya vinipātikānaṃ… sabbesaṃ dakkhiṇāya anudisāya vinipātikānaṃ… sabbesaṃ heṭṭhimāya disāya vinipātikānaṃ… sabbesaṃ uparimāya disāya vinipātikānaṃ pīḷanaṃ vajjetvā apīḷanāya, upaghātaṃ vajjetvā anupaghātena, santāpaṃ vajjetvā asantāpena, pariyādānaṃ vajjetvā apariyādānena, vihesaṃ vajjetvā avihesāya, sabbe uparimāya disāya vinipātikā averino hontu mā verino, sukhino hontu mā dukkhino, sukhitattā hontu mā dukkhitattāti – imehi aṭṭhahākārehi sabbe uparimāya disāya vinipātike mettāyatīti – mettā. Taṃ dhammaṃ cetayatīti – ceto. Sabbabyāpādapariyuṭṭhānehi vimuccatīti – vimutti. Mettā ca ceto ca vimutti cāti – mettācetovimutti.
সব্বে উপরিমায দিসায ৰিনিপাতিকা অৰেরিনো হোন্তু, খেমিনো হোন্তু, সুখিনো হোন্তূতি – সদ্ধায অধিমুচ্চতি। সদ্ধিন্দ্রিযপরিভাৰিতা হোতি মেত্তাচেতোৰিমুত্তি।
Sabbe uparimāya disāya vinipātikā averino hontu, khemino hontu, sukhino hontūti – saddhāya adhimuccati. Saddhindriyaparibhāvitā hoti mettācetovimutti.
সব্বে উপরিমায দিসায ৰিনিপাতিকা অৰেরিনো হোন্তু, খেমিনো হোন্তু, সুখিনো হোন্তূতি – ৰীরিযং পগ্গণ্হাতি। ৰীরিযিন্দ্রিযপরিভাৰিতা হোতি মেত্তাচেতোৰিমুত্তি।
Sabbe uparimāya disāya vinipātikā averino hontu, khemino hontu, sukhino hontūti – vīriyaṃ paggaṇhāti. Vīriyindriyaparibhāvitā hoti mettācetovimutti.
সতিং উপট্ঠাপেতি। সতিন্দ্রিযপরিভাৰিতা হোতি মেত্তাচেতোৰিমুত্তি। চিত্তং সমাদহতি। সমাধিন্দ্রিযপরিভাৰিতা হোতি মেত্তাচেতোৰিমুত্তি। পঞ্ঞায পজানাতি। পঞ্ঞিন্দ্রিযপরিভাৰিতা হোতি মেত্তাচেতোৰিমুত্তি।
Satiṃ upaṭṭhāpeti. Satindriyaparibhāvitā hoti mettācetovimutti. Cittaṃ samādahati. Samādhindriyaparibhāvitā hoti mettācetovimutti. Paññāya pajānāti. Paññindriyaparibhāvitā hoti mettācetovimutti.
ইমানি পঞ্চিন্দ্রিযানি মেত্তায চেতোৰিমুত্তিযা আসেৰনা হোন্তি। ইমেহি পঞ্চহি ইন্দ্রিযেহি মেত্তাচেতোৰিমুত্তি আসেৰীযতি…পে॰… নিব্বত্তেন্তি জোতেন্তি পতাপেন্তি।
Imāni pañcindriyāni mettāya cetovimuttiyā āsevanā honti. Imehi pañcahi indriyehi mettācetovimutti āsevīyati…pe… nibbattenti jotenti patāpenti.
সব্বে উপরিমায দিসায ৰিনিপাতিকা অৰেরিনো হোন্তু, খেমিনো হোন্তু, সুখিনো হোন্তূতি – অস্সদ্ধিযে ন কম্পতি। সদ্ধাবলপরিভাৰিতা হোতি মেত্তাচেতোৰিমুত্তি। কোসজ্জে ন কম্পতি। ৰীরিযবলপরিভাৰিতা হোতি মেত্তাচেতোৰিমুত্তি। পমাদে ন কম্পতি। সতিবলপরিভাৰিতা হোতি মেত্তাচেতোৰিমুত্তি। উদ্ধচ্চে ন কম্পতি। সমাধিবলপরিভাৰিতা হোতি মেত্তাচেতোৰিমুত্তি। অৰিজ্জায ন কম্পতি। পঞ্ঞাবলপরিভাৰিতা হোতি মেত্তাচেতোৰিমুত্তি।
Sabbe uparimāya disāya vinipātikā averino hontu, khemino hontu, sukhino hontūti – assaddhiye na kampati. Saddhābalaparibhāvitā hoti mettācetovimutti. Kosajje na kampati. Vīriyabalaparibhāvitā hoti mettācetovimutti. Pamāde na kampati. Satibalaparibhāvitā hoti mettācetovimutti. Uddhacce na kampati. Samādhibalaparibhāvitā hoti mettācetovimutti. Avijjāya na kampati. Paññābalaparibhāvitā hoti mettācetovimutti.
ইমানি পঞ্চ বলানি মেত্তায চেতোৰিমুত্তিযা আসেৰনা হোন্তি। ইমেহি পঞ্চহি বলেহি মেত্তাচেতোৰিমুত্তি আসেৰীযতি…পে॰… নিব্বত্তেন্তি জোতেন্তি পতাপেন্তি।
Imāni pañca balāni mettāya cetovimuttiyā āsevanā honti. Imehi pañcahi balehi mettācetovimutti āsevīyati…pe… nibbattenti jotenti patāpenti.
সব্বে উপরিমায দিসায ৰিনিপাতিকা অৰেরিনো হোন্তু, খেমিনো হোন্তু, সুখিনো হোন্তূতি – সতিং উপট্ঠাপেতি। সতিসম্বোজ্ঝঙ্গপরিভাৰিতা হোতি মেত্তাচেতোৰিমুত্তি।
Sabbe uparimāya disāya vinipātikā averino hontu, khemino hontu, sukhino hontūti – satiṃ upaṭṭhāpeti. Satisambojjhaṅgaparibhāvitā hoti mettācetovimutti.
পঞ্ঞায পৰিচিনাতি। ধম্মৰিচযসম্বোজ্ঝঙ্গপরিভাৰিতা হোতি মেত্তাচেতোৰিমুত্তি। ৰীরিযং পগ্গণ্হাতি। ৰীরিযসম্বোজ্ঝঙ্গপরিভাৰিতা হোতি মেত্তাচেতোৰিমুত্তি। পরিল়াহং পটিপ্পস্সম্ভেতি। পীতিসম্বোজ্ঝঙ্গপরিভাৰিতা হোতি মেত্তাচেতোৰিমুত্তি। দুট্ঠুল্লং পটিপ্পস্সম্ভেতি। পস্সদ্ধিসম্বোজ্ঝঙ্গপরিভাৰিতা হোতি মেত্তাচেতোৰিমুত্তি। চিত্তং সমাদহতি। সমাধিসম্বোজ্ঝঙ্গপরিভাৰিতা হোতি মেত্তাচেতোৰিমুত্তি। ঞাণেন কিলেসে পটিসঙ্খাতি। উপেক্খাসম্বোজ্ঝঙ্গপরিভাৰিতা হোতি মেত্তাচেতোৰিমুত্তি।
Paññāya pavicināti. Dhammavicayasambojjhaṅgaparibhāvitā hoti mettācetovimutti. Vīriyaṃ paggaṇhāti. Vīriyasambojjhaṅgaparibhāvitā hoti mettācetovimutti. Pariḷāhaṃ paṭippassambheti. Pītisambojjhaṅgaparibhāvitā hoti mettācetovimutti. Duṭṭhullaṃ paṭippassambheti. Passaddhisambojjhaṅgaparibhāvitā hoti mettācetovimutti. Cittaṃ samādahati. Samādhisambojjhaṅgaparibhāvitā hoti mettācetovimutti. Ñāṇena kilese paṭisaṅkhāti. Upekkhāsambojjhaṅgaparibhāvitā hoti mettācetovimutti.
ইমে সত্ত বোজ্ঝঙ্গা মেত্তায চেতোৰিমুত্তিযা আসেৰনা হোন্তি। ইমেহি সত্তহি বোজ্ঝঙ্গেহি মেত্তাচেতোৰিমুত্তি আসেৰীযতি…পে॰… নিব্বত্তেন্তি জোতেন্তি পতাপেন্তি।
Ime satta bojjhaṅgā mettāya cetovimuttiyā āsevanā honti. Imehi sattahi bojjhaṅgehi mettācetovimutti āsevīyati…pe… nibbattenti jotenti patāpenti.
সব্বে উপরিমায দিসায ৰিনিপাতিকা অৰেরিনো হোন্তু, খেমিনো হোন্তু, সুখিনো হোন্তূতি – সম্মা পস্সতি। সম্মাদিট্ঠি পরিভাৰিতা হোতি মেত্তাচেতোৰিমুত্তি। সম্মা অভিনিরোপেতি। সম্মাসঙ্কপ্পপরিভাৰিতা হোতি মেত্তাচেতোৰিমুত্তি। সম্মা পরিগ্গণ্হাতি। সম্মাৰাচাপরিভাৰিতা হোতি মেত্তাচেতোৰিমুত্তি। সম্মা সমুট্ঠাপেতি। সম্মাকম্মন্তপরিভাৰিতা হোতি মেত্তাচেতোৰিমুত্তি। সম্মা ৰোদাপেতি। সম্মা আজীৰপরিভাৰিতা হোতি মেত্তাচেতোৰিমুত্তি। সম্মা পগ্গণ্হাতি। সম্মাৰাযামপরিভাৰিতা হোতি মেত্তাচেতোৰিমুত্তি। সম্মা উপট্ঠাতি। সম্মাসতিপরিভাৰিতা হোতি মেত্তাচেতোৰিমুত্তি। সম্মা সমাদহতি। সম্মাসমাধিপরিভাৰিতা হোতি মেত্তাচেতোৰিমুত্তি।
Sabbe uparimāya disāya vinipātikā averino hontu, khemino hontu, sukhino hontūti – sammā passati. Sammādiṭṭhi paribhāvitā hoti mettācetovimutti. Sammā abhiniropeti. Sammāsaṅkappaparibhāvitā hoti mettācetovimutti. Sammā pariggaṇhāti. Sammāvācāparibhāvitā hoti mettācetovimutti. Sammā samuṭṭhāpeti. Sammākammantaparibhāvitā hoti mettācetovimutti. Sammā vodāpeti. Sammā ājīvaparibhāvitā hoti mettācetovimutti. Sammā paggaṇhāti. Sammāvāyāmaparibhāvitā hoti mettācetovimutti. Sammā upaṭṭhāti. Sammāsatiparibhāvitā hoti mettācetovimutti. Sammā samādahati. Sammāsamādhiparibhāvitā hoti mettācetovimutti.
ইমে অট্ঠ মগ্গঙ্গা মেত্তায চেতোৰিমুত্তিযা আসেৰনা হোন্তি। ইমেহি অট্ঠহি মগ্গঙ্গেহি মেত্তাচেতোৰিমুত্তি আসেৰীযতি…পে॰… ইমে অট্ঠ মগ্গঙ্গা মেত্তায চেতোৰিমুত্তিযা পরিভাৰিতা হোন্তি। ইমেহি অট্ঠহি মগ্গঙ্গেহি মেত্তাচেতোৰিমুত্তি সুপরিৰুতা হোতি। ইমে অট্ঠ মগ্গঙ্গা মেত্তায চেতোৰিমুত্তিযা আসেৰনা হোন্তি, ভাৰনা হোন্তি, বহুলীকতা হোন্তি, অলঙ্কারা হোন্তি, পরিক্খারা হোন্তি, পরিৰারা হোন্তি, পারিপূরী হোন্তি, সহগতা হোন্তি, সহজাতা হোন্তি , সংসট্ঠা হোন্তি, সম্পযুত্তা হোন্তি, পক্খন্দনা হোন্তি, পসীদনা হোন্তি, সন্তিট্ঠনা হোন্তি, ৰিমুচ্চনা হোন্তি, ‘‘এতং সন্ত’’ন্তি ফস্সনা হোন্তি, যানীকতা হোন্তি, ৰত্থুকতা হোন্তি, অনুট্ঠিতা হোন্তি, পরিচিতা হোন্তি, সুসমারদ্ধা হোন্তি, সুভাৰিতা হোন্তি, স্ৰাধিট্ঠিতা হোন্তি, সুসমুগ্গতা হোন্তি, সুৰিমুত্তা হোন্তি নিব্বত্তেন্তি জোতেন্তি পতাপেন্তীতি।
Ime aṭṭha maggaṅgā mettāya cetovimuttiyā āsevanā honti. Imehi aṭṭhahi maggaṅgehi mettācetovimutti āsevīyati…pe… ime aṭṭha maggaṅgā mettāya cetovimuttiyā paribhāvitā honti. Imehi aṭṭhahi maggaṅgehi mettācetovimutti suparivutā hoti. Ime aṭṭha maggaṅgā mettāya cetovimuttiyā āsevanā honti, bhāvanā honti, bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti , saṃsaṭṭhā honti, sampayuttā honti, pakkhandanā honti, pasīdanā honti, santiṭṭhanā honti, vimuccanā honti, ‘‘etaṃ santa’’nti phassanā honti, yānīkatā honti, vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti, suvimuttā honti nibbattenti jotenti patāpentīti.
মেত্তাকথা নিট্ঠিতা।
Mettākathā niṭṭhitā.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ২-৪. বলাদিৰারত্তযৰণ্ণনা • 2-4. Balādivārattayavaṇṇanā
