| Library / Tipiṭaka / ತಿಪಿಟಕ • Tipiṭaka / ಪಟಿಸಮ್ಭಿದಾಮಗ್ಗಪಾಳಿ • Paṭisambhidāmaggapāḷi |
೪. ಮಗ್ಗಙ್ಗವಾರೋ
4. Maggaṅgavāro
೨೬. ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸಮ್ಮಾ ಪಸ್ಸತಿ। ಸಮ್ಮಾದಿಟ್ಠಿಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ।
26. Sabbe sattā averino hontu, khemino hontu, sukhino hontūti – sammā passati. Sammādiṭṭhiparibhāvitā hoti mettācetovimutti.
ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸಮ್ಮಾ ಅಭಿನಿರೋಪೇತಿ। ಸಮ್ಮಾಸಙ್ಕಪ್ಪಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ।
Sabbe sattā averino hontu, khemino hontu, sukhino hontūti – sammā abhiniropeti. Sammāsaṅkappaparibhāvitā hoti mettācetovimutti.
ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸಮ್ಮಾ ಪರಿಗ್ಗಣ್ಹಾತಿ। ಸಮ್ಮಾವಾಚಾಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ।
Sabbe sattā averino hontu, khemino hontu, sukhino hontūti – sammā pariggaṇhāti. Sammāvācāparibhāvitā hoti mettācetovimutti.
ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸಮ್ಮಾ ಸಮುಟ್ಠಾಪೇತಿ। ಸಮ್ಮಾಕಮ್ಮನ್ತಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ।
Sabbe sattā averino hontu, khemino hontu, sukhino hontūti – sammā samuṭṭhāpeti. Sammākammantaparibhāvitā hoti mettācetovimutti.
ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸಮ್ಮಾ ವೋದಾಪೇತಿ । ಸಮ್ಮಾಆಜೀವಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ।
Sabbe sattā averino hontu, khemino hontu, sukhino hontūti – sammā vodāpeti . Sammāājīvaparibhāvitā hoti mettācetovimutti.
ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸಮ್ಮಾ ಪಗ್ಗಣ್ಹಾತಿ। ಸಮ್ಮಾವಾಯಾಮಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ।
Sabbe sattā averino hontu, khemino hontu, sukhino hontūti – sammā paggaṇhāti. Sammāvāyāmaparibhāvitā hoti mettācetovimutti.
ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸಮ್ಮಾ ಉಪಟ್ಠಾಪೇತಿ। ಸಮ್ಮಾಸತಿಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ।
Sabbe sattā averino hontu, khemino hontu, sukhino hontūti – sammā upaṭṭhāpeti. Sammāsatiparibhāvitā hoti mettācetovimutti.
ಸಬ್ಬೇ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸಮ್ಮಾ ಸಮಾದಹತಿ। ಸಮ್ಮಾಸಮಾಧಿಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ।
Sabbe sattā averino hontu, khemino hontu, sukhino hontūti – sammā samādahati. Sammāsamādhiparibhāvitā hoti mettācetovimutti.
ಇಮೇ ಅಟ್ಠ ಮಗ್ಗಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಆಸೇವನಾ ಹೋನ್ತಿ। ಇಮೇಹಿ ಅಟ್ಠಹಿ ಮಗ್ಗಙ್ಗೇಹಿ ಮೇತ್ತಾಚೇತೋವಿಮುತ್ತಿ ಆಸೇವೀಯತಿ। ಇಮೇ ಅಟ್ಠ ಮಗ್ಗಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಭಾವನಾ ಹೋನ್ತಿ। ಇಮೇಹಿ ಅಟ್ಠಹಿ ಮಗ್ಗಙ್ಗೇಹಿ ಮೇತ್ತಾಚೇತೋವಿಮುತ್ತಿ ಭಾವೀಯತಿ। ಇಮೇ ಅಟ್ಠ ಮಗ್ಗಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಬಹುಲೀಕತಾ ಹೋನ್ತಿ। ಇಮೇಹಿ ಅಟ್ಠಹಿ ಮಗ್ಗಙ್ಗೇಹಿ ಮೇತ್ತಾಚೇತೋವಿಮುತ್ತಿ ಬಹುಲೀಕರೀಯತಿ। ಇಮೇ ಅಟ್ಠ ಮಗ್ಗಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಅಲಙ್ಕಾರಾ ಹೋನ್ತಿ। ಇಮೇಹಿ ಅಟ್ಠಹಿ ಮಗ್ಗಙ್ಗೇಹಿ ಮೇತ್ತಾಚೇತೋವಿಮುತ್ತಿ ಸ್ವಾಲಙ್ಕತಾ ಹೋನ್ತಿ। ಇಮೇ ಅಟ್ಠ ಮಗ್ಗಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಪರಿಕ್ಖಾರಾ ಹೋನ್ತಿ। ಇಮೇಹಿ ಅಟ್ಠಹಿ ಮಗ್ಗಙ್ಗೇಹಿ ಮೇತ್ತಾಚೇತೋವಿಮುತ್ತಿ ಸುಪರಿಕ್ಖತಾ ಹೋತಿ। ಇಮೇ ಅಟ್ಠ ಮಗ್ಗಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಪರಿವಾರಾ ಹೋನ್ತಿ। ಇಮೇಹಿ ಅಟ್ಠಹಿ ಮಗ್ಗಙ್ಗೇಹಿ ಮೇತ್ತಾಚೇತೋವಿಮುತ್ತಿ ಸುಪರಿವುತಾ ಹೋತಿ। ಇಮೇ ಅಟ್ಠ ಮಗ್ಗಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಆಸೇವನಾ ಹೋನ್ತಿ , ಭಾವನಾ ಹೋನ್ತಿ , ಬಹುಲೀಕತಾ ಹೋನ್ತಿ, ಅಲಙ್ಕಾರಾ ಹೋನ್ತಿ, ಪರಿಕ್ಖಾರಾ ಹೋನ್ತಿ, ಪರಿವಾರಾ ಹೋನ್ತಿ, ಪಾರಿಪೂರೀ ಹೋನ್ತಿ, ಸಹಗತಾ ಹೋನ್ತಿ, ಸಹಜಾತಾ ಹೋನ್ತಿ, ಸಂಸಟ್ಠಾ ಹೋನ್ತಿ, ಸಮ್ಪಯುತ್ತಾ ಹೋನ್ತಿ, ಪಕ್ಖನ್ದನಾ ಹೋನ್ತಿ, ಪಸೀದನಾ ಹೋನ್ತಿ, ಸನ್ತಿಟ್ಠನಾ ಹೋನ್ತಿ, ವಿಮುಚ್ಚನಾ ಹೋನ್ತಿ, ‘‘ಏತಂ ಸನ್ತ’’ನ್ತಿ ಫಸ್ಸನಾ ಹೋನ್ತಿ, ಯಾನೀಕತಾ ಹೋನ್ತಿ, ವತ್ಥುಕತಾ ಹೋನ್ತಿ, ಅನುಟ್ಠಿತಾ ಹೋನ್ತಿ, ಪರಿಚಿತಾ ಹೋನ್ತಿ, ಸುಸಮಾರದ್ಧಾ ಹೋನ್ತಿ, ಸುಭಾವಿತಾ ಹೋನ್ತಿ, ಸ್ವಾಧಿಟ್ಠಿತಾ ಹೋನ್ತಿ, ಸುಸಮುಗ್ಗತಾ ಹೋನ್ತಿ, ಸುವಿಮುತ್ತಾ ಹೋನ್ತಿ ನಿಬ್ಬತ್ತೇನ್ತಿ ಜೋತೇನ್ತಿ ಪತಾಪೇನ್ತಿ।
Ime aṭṭha maggaṅgā mettāya cetovimuttiyā āsevanā honti. Imehi aṭṭhahi maggaṅgehi mettācetovimutti āsevīyati. Ime aṭṭha maggaṅgā mettāya cetovimuttiyā bhāvanā honti. Imehi aṭṭhahi maggaṅgehi mettācetovimutti bhāvīyati. Ime aṭṭha maggaṅgā mettāya cetovimuttiyā bahulīkatā honti. Imehi aṭṭhahi maggaṅgehi mettācetovimutti bahulīkarīyati. Ime aṭṭha maggaṅgā mettāya cetovimuttiyā alaṅkārā honti. Imehi aṭṭhahi maggaṅgehi mettācetovimutti svālaṅkatā honti. Ime aṭṭha maggaṅgā mettāya cetovimuttiyā parikkhārā honti. Imehi aṭṭhahi maggaṅgehi mettācetovimutti suparikkhatā hoti. Ime aṭṭha maggaṅgā mettāya cetovimuttiyā parivārā honti. Imehi aṭṭhahi maggaṅgehi mettācetovimutti suparivutā hoti. Ime aṭṭha maggaṅgā mettāya cetovimuttiyā āsevanā honti , bhāvanā honti , bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti, saṃsaṭṭhā honti, sampayuttā honti, pakkhandanā honti, pasīdanā honti, santiṭṭhanā honti, vimuccanā honti, ‘‘etaṃ santa’’nti phassanā honti, yānīkatā honti, vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti, suvimuttā honti nibbattenti jotenti patāpenti.
೨೭. ಸಬ್ಬೇಸಂ ಪಾಣಾನಂ…ಪೇ॰… ಸಬ್ಬೇಸಂ ಭೂತಾನಂ… ಸಬ್ಬೇಸಂ ಪುಗ್ಗಲಾನಂ… ಸಬ್ಬೇಸಂ ಅತ್ತಭಾವಪರಿಯಾಪನ್ನಾನಂ… ಸಬ್ಬಾಸಂ ಇತ್ಥೀನಂ… ಸಬ್ಬೇಸಂ ಪುರಿಸಾನಂ… ಸಬ್ಬೇಸಂ ಅರಿಯಾನಂ… ಸಬ್ಬೇಸಂ ಅನರಿಯಾನಂ… ಸಬ್ಬೇಸಂ ದೇವಾನಂ… ಸಬ್ಬೇಸಂ ಮನುಸ್ಸಾನಂ… ಸಬ್ಬೇಸಂ ವಿನಿಪಾತಿಕಾನಂ ಪೀಳನಂ ವಜ್ಜೇತ್ವಾ ಅಪೀಳನಾಯ, ಉಪಘಾತಂ ವಜ್ಜೇತ್ವಾ ಅನುಪಘಾತೇನ, ಸನ್ತಾಪಂ ವಜ್ಜೇತ್ವಾ ಅಸನ್ತಾಪೇನ, ಪರಿಯಾದಾನಂ ವಜ್ಜೇತ್ವಾ ಅಪರಿಯಾದಾನೇನ, ವಿಹೇಸಂ ವಜ್ಜೇತ್ವಾ ಅವಿಹೇಸಾಯ, ಸಬ್ಬೇ ವಿನಿಪಾತಿಕಾ ಅವೇರಿನೋ ಹೋನ್ತು ಮಾ ವೇರಿನೋ, ಸುಖಿನೋ ಹೋನ್ತು ಮಾ ದುಕ್ಖಿನೋ, ಸುಖಿತತ್ತಾ ಹೋನ್ತು ಮಾ ದುಕ್ಖಿತತ್ತಾತಿ – ಇಮೇಹಿ ಅಟ್ಠಹಾಕಾರೇಹಿ ಸಬ್ಬೇ ವಿನಿಪಾತಿಕೇ ಮೇತ್ತಾಯತೀತಿ – ಮೇತ್ತಾ। ತಂ ಧಮ್ಮಂ ಚೇತಯತೀತಿ – ಚೇತೋ। ಸಬ್ಬಬ್ಯಾಪಾದಪರಿಯುಟ್ಠಾನೇಹಿ ವಿಮುಚ್ಚತೀತಿ – ವಿಮುತ್ತಿ। ಮೇತ್ತಾ ಚ ಚೇತೋ ಚ ವಿಮುತ್ತಿ ಚಾತಿ – ಮೇತ್ತಾಚೇತೋವಿಮುತ್ತಿ।
27. Sabbesaṃ pāṇānaṃ…pe… sabbesaṃ bhūtānaṃ… sabbesaṃ puggalānaṃ… sabbesaṃ attabhāvapariyāpannānaṃ… sabbāsaṃ itthīnaṃ… sabbesaṃ purisānaṃ… sabbesaṃ ariyānaṃ… sabbesaṃ anariyānaṃ… sabbesaṃ devānaṃ… sabbesaṃ manussānaṃ… sabbesaṃ vinipātikānaṃ pīḷanaṃ vajjetvā apīḷanāya, upaghātaṃ vajjetvā anupaghātena, santāpaṃ vajjetvā asantāpena, pariyādānaṃ vajjetvā apariyādānena, vihesaṃ vajjetvā avihesāya, sabbe vinipātikā averino hontu mā verino, sukhino hontu mā dukkhino, sukhitattā hontu mā dukkhitattāti – imehi aṭṭhahākārehi sabbe vinipātike mettāyatīti – mettā. Taṃ dhammaṃ cetayatīti – ceto. Sabbabyāpādapariyuṭṭhānehi vimuccatīti – vimutti. Mettā ca ceto ca vimutti cāti – mettācetovimutti.
ಸಬ್ಬೇ ವಿನಿಪಾತಿಕಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸದ್ಧಾಯ ಅಧಿಮುಚ್ಚತಿ। ಸದ್ಧಿನ್ದ್ರಿಯಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ…ಪೇ॰… ನಿಬ್ಬತ್ತೇನ್ತಿ ಜೋತೇನ್ತಿ ಪತಾಪೇನ್ತಿ।
Sabbe vinipātikā averino hontu, khemino hontu, sukhino hontūti – saddhāya adhimuccati. Saddhindriyaparibhāvitā hoti mettācetovimutti…pe… nibbattenti jotenti patāpenti.
ಸಬ್ಬೇಸಂ ಪುರತ್ಥಿಮಾಯ ದಿಸಾಯ ಸತ್ತಾನಂ…ಪೇ॰… ಸಬ್ಬೇಸಂ ಪಚ್ಛಿಮಾಯ ದಿಸಾಯ ಸತ್ತಾನಂ… ಸಬ್ಬೇಸಂ ಉತ್ತರಾಯ ದಿಸಾಯ ಸತ್ತಾನಂ… ಸಬ್ಬೇಸಂ ದಕ್ಖಿಣಾಯ ದಿಸಾಯ ಸತ್ತಾನಂ… ಸಬ್ಬೇಸಂ ಪುರತ್ಥಿಮಾಯ ಅನುದಿಸಾಯ ಸತ್ತಾನಂ… ಸಬ್ಬೇಸಂ ಪಚ್ಛಿಮಾಯ ಅನುದಿಸಾಯ ಸತ್ತಾನಂ… ಸಬ್ಬೇಸಂ ಉತ್ತರಾಯ ಅನುದಿಸಾಯ ಸತ್ತಾನಂ… ಸಬ್ಬೇಸಂ ದಕ್ಖಿಣಾಯ ಅನುದಿಸಾಯ ಸತ್ತಾನಂ… ಸಬ್ಬೇಸಂ ಹೇಟ್ಠಿಮಾಯ ದಿಸಾಯ ಸತ್ತಾನಂ… ಸಬ್ಬೇಸಂ ಉಪರಿಮಾಯ ದಿಸಾಯ ಸತ್ತಾನಂ ಪೀಳನಂ ವಜ್ಜೇತ್ವಾ ಅಪೀಳನಾಯ, ಉಪಘಾತಂ ವಜ್ಜೇತ್ವಾ ಅನುಪಘಾತೇನ, ಸನ್ತಾಪಂ ವಜ್ಜೇತ್ವಾ ಅಸನ್ತಾಪೇನ, ಪರಿಯಾದಾನಂ ವಜ್ಜೇತ್ವಾ ಅಪರಿಯಾದಾನೇನ, ವಿಹೇಸಂ ವಜ್ಜೇತ್ವಾ ಅವಿಹೇಸಾಯ, ಸಬ್ಬೇ ಉಪರಿಮಾಯ ದಿಸಾಯ ಸತ್ತಾ ಅವೇರಿನೋ ಹೋನ್ತು ಮಾ ವೇರಿನೋ, ಸುಖಿನೋ ಹೋನ್ತು ಮಾ ದುಕ್ಖಿನೋ, ಸುಖಿತತ್ತಾ ಹೋನ್ತು ಮಾ ದುಕ್ಖಿತತ್ತಾತಿ – ಇಮೇಹಿ ಅಟ್ಠಹಾಕಾರೇಹಿ ಸಬ್ಬೇ ಉಪರಿಮಾಯ ದಿಸಾಯ ಸತ್ತೇ ಮೇತ್ತಾಯತೀತಿ – ಮೇತ್ತಾ। ತಂ ಧಮ್ಮಂ ಚೇತಯತೀತಿ – ಚೇತೋ। ಸಬ್ಬಬ್ಯಾಪಾದಪರಿಯುಟ್ಠಾನೇಹಿ ವಿಮುಚ್ಚತೀತಿ – ವಿಮುತ್ತಿ। ಮೇತ್ತಾ ಚ ಚೇತೋ ಚ ವಿಮುತ್ತಿ ಚಾತಿ – ಮೇತ್ತಾಚೇತೋವಿಮುತ್ತಿ।
Sabbesaṃ puratthimāya disāya sattānaṃ…pe… sabbesaṃ pacchimāya disāya sattānaṃ… sabbesaṃ uttarāya disāya sattānaṃ… sabbesaṃ dakkhiṇāya disāya sattānaṃ… sabbesaṃ puratthimāya anudisāya sattānaṃ… sabbesaṃ pacchimāya anudisāya sattānaṃ… sabbesaṃ uttarāya anudisāya sattānaṃ… sabbesaṃ dakkhiṇāya anudisāya sattānaṃ… sabbesaṃ heṭṭhimāya disāya sattānaṃ… sabbesaṃ uparimāya disāya sattānaṃ pīḷanaṃ vajjetvā apīḷanāya, upaghātaṃ vajjetvā anupaghātena, santāpaṃ vajjetvā asantāpena, pariyādānaṃ vajjetvā apariyādānena, vihesaṃ vajjetvā avihesāya, sabbe uparimāya disāya sattā averino hontu mā verino, sukhino hontu mā dukkhino, sukhitattā hontu mā dukkhitattāti – imehi aṭṭhahākārehi sabbe uparimāya disāya satte mettāyatīti – mettā. Taṃ dhammaṃ cetayatīti – ceto. Sabbabyāpādapariyuṭṭhānehi vimuccatīti – vimutti. Mettā ca ceto ca vimutti cāti – mettācetovimutti.
ಸಬ್ಬೇ ಉಪರಿಮಾಯ ದಿಸಾಯ ಸತ್ತಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸದ್ಧಾಯ ಅಧಿಮುಚ್ಚತಿ। ಸದ್ಧಿನ್ದ್ರಿಯಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ…ಪೇ॰… ನಿಬ್ಬತ್ತೇನ್ತಿ ಜೋತೇನ್ತಿ ಪತಾಪೇನ್ತಿ।
Sabbe uparimāya disāya sattā averino hontu, khemino hontu, sukhino hontūti – saddhāya adhimuccati. Saddhindriyaparibhāvitā hoti mettācetovimutti…pe… nibbattenti jotenti patāpenti.
ಸಬ್ಬೇಸಂ ಪುರತ್ಥಿಮಾಯ ದಿಸಾಯ ಪಾಣಾನಂ…ಪೇ॰… ಭೂತಾನಂ… ಪುಗ್ಗಲಾನಂ ಅತ್ತಭಾವಪರಿಯಾಪನ್ನಾನಂ… ಸಬ್ಬಾಸಂ ಇತ್ಥೀನಂ… ಸಬ್ಬೇಸಂ ಪುರಿಸಾನಂ… ಸಬ್ಬೇಸಂ ಅರಿಯಾನಂ… ಸಬ್ಬೇಸಂ ಅನರಿಯಾನಂ… ಸಬ್ಬೇಸಂ ದೇವಾನಂ… ಸಬ್ಬೇಸಂ ಮನುಸ್ಸಾನಂ… ಸಬ್ಬೇಸಂ ವಿನಿಪಾತಿಕಾನಂ… ಸಬ್ಬೇಸಂ ಪಚ್ಛಿಮಾಯ ದಿಸಾಯ ವಿನಿಪಾತಿಕಾನಂ… ಸಬ್ಬೇಸಂ ಉತ್ತರಾಯ ದಿಸಾಯ ವಿನಿಪಾತಿಕಾನಂ… ಸಬ್ಬೇಸಂ ದಕ್ಖಿಣಾಯ ದಿಸಾಯ ವಿನಿಪಾತಿಕಾನಂ… ಸಬ್ಬೇಸಂ ಪುರತ್ಥಿಮಾಯ ಅನುದಿಸಾಯ ವಿನಿಪಾತಿಕಾನಂ… ಸಬ್ಬೇಸಂ ಪಚ್ಛಿಮಾಯ ಅನುದಿಸಾಯ ವಿನಿಪಾತಿಕಾನಂ… ಸಬ್ಬೇಸಂ ಉತ್ತರಾಯ ಅನುದಿಸಾಯ ವಿನಿಪಾತಿಕಾನಂ… ಸಬ್ಬೇಸಂ ದಕ್ಖಿಣಾಯ ಅನುದಿಸಾಯ ವಿನಿಪಾತಿಕಾನಂ… ಸಬ್ಬೇಸಂ ಹೇಟ್ಠಿಮಾಯ ದಿಸಾಯ ವಿನಿಪಾತಿಕಾನಂ… ಸಬ್ಬೇಸಂ ಉಪರಿಮಾಯ ದಿಸಾಯ ವಿನಿಪಾತಿಕಾನಂ ಪೀಳನಂ ವಜ್ಜೇತ್ವಾ ಅಪೀಳನಾಯ, ಉಪಘಾತಂ ವಜ್ಜೇತ್ವಾ ಅನುಪಘಾತೇನ, ಸನ್ತಾಪಂ ವಜ್ಜೇತ್ವಾ ಅಸನ್ತಾಪೇನ, ಪರಿಯಾದಾನಂ ವಜ್ಜೇತ್ವಾ ಅಪರಿಯಾದಾನೇನ, ವಿಹೇಸಂ ವಜ್ಜೇತ್ವಾ ಅವಿಹೇಸಾಯ, ಸಬ್ಬೇ ಉಪರಿಮಾಯ ದಿಸಾಯ ವಿನಿಪಾತಿಕಾ ಅವೇರಿನೋ ಹೋನ್ತು ಮಾ ವೇರಿನೋ, ಸುಖಿನೋ ಹೋನ್ತು ಮಾ ದುಕ್ಖಿನೋ, ಸುಖಿತತ್ತಾ ಹೋನ್ತು ಮಾ ದುಕ್ಖಿತತ್ತಾತಿ – ಇಮೇಹಿ ಅಟ್ಠಹಾಕಾರೇಹಿ ಸಬ್ಬೇ ಉಪರಿಮಾಯ ದಿಸಾಯ ವಿನಿಪಾತಿಕೇ ಮೇತ್ತಾಯತೀತಿ – ಮೇತ್ತಾ। ತಂ ಧಮ್ಮಂ ಚೇತಯತೀತಿ – ಚೇತೋ। ಸಬ್ಬಬ್ಯಾಪಾದಪರಿಯುಟ್ಠಾನೇಹಿ ವಿಮುಚ್ಚತೀತಿ – ವಿಮುತ್ತಿ। ಮೇತ್ತಾ ಚ ಚೇತೋ ಚ ವಿಮುತ್ತಿ ಚಾತಿ – ಮೇತ್ತಾಚೇತೋವಿಮುತ್ತಿ।
Sabbesaṃ puratthimāya disāya pāṇānaṃ…pe… bhūtānaṃ… puggalānaṃ attabhāvapariyāpannānaṃ… sabbāsaṃ itthīnaṃ… sabbesaṃ purisānaṃ… sabbesaṃ ariyānaṃ… sabbesaṃ anariyānaṃ… sabbesaṃ devānaṃ… sabbesaṃ manussānaṃ… sabbesaṃ vinipātikānaṃ… sabbesaṃ pacchimāya disāya vinipātikānaṃ… sabbesaṃ uttarāya disāya vinipātikānaṃ… sabbesaṃ dakkhiṇāya disāya vinipātikānaṃ… sabbesaṃ puratthimāya anudisāya vinipātikānaṃ… sabbesaṃ pacchimāya anudisāya vinipātikānaṃ… sabbesaṃ uttarāya anudisāya vinipātikānaṃ… sabbesaṃ dakkhiṇāya anudisāya vinipātikānaṃ… sabbesaṃ heṭṭhimāya disāya vinipātikānaṃ… sabbesaṃ uparimāya disāya vinipātikānaṃ pīḷanaṃ vajjetvā apīḷanāya, upaghātaṃ vajjetvā anupaghātena, santāpaṃ vajjetvā asantāpena, pariyādānaṃ vajjetvā apariyādānena, vihesaṃ vajjetvā avihesāya, sabbe uparimāya disāya vinipātikā averino hontu mā verino, sukhino hontu mā dukkhino, sukhitattā hontu mā dukkhitattāti – imehi aṭṭhahākārehi sabbe uparimāya disāya vinipātike mettāyatīti – mettā. Taṃ dhammaṃ cetayatīti – ceto. Sabbabyāpādapariyuṭṭhānehi vimuccatīti – vimutti. Mettā ca ceto ca vimutti cāti – mettācetovimutti.
ಸಬ್ಬೇ ಉಪರಿಮಾಯ ದಿಸಾಯ ವಿನಿಪಾತಿಕಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸದ್ಧಾಯ ಅಧಿಮುಚ್ಚತಿ। ಸದ್ಧಿನ್ದ್ರಿಯಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ।
Sabbe uparimāya disāya vinipātikā averino hontu, khemino hontu, sukhino hontūti – saddhāya adhimuccati. Saddhindriyaparibhāvitā hoti mettācetovimutti.
ಸಬ್ಬೇ ಉಪರಿಮಾಯ ದಿಸಾಯ ವಿನಿಪಾತಿಕಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ವೀರಿಯಂ ಪಗ್ಗಣ್ಹಾತಿ। ವೀರಿಯಿನ್ದ್ರಿಯಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ।
Sabbe uparimāya disāya vinipātikā averino hontu, khemino hontu, sukhino hontūti – vīriyaṃ paggaṇhāti. Vīriyindriyaparibhāvitā hoti mettācetovimutti.
ಸತಿಂ ಉಪಟ್ಠಾಪೇತಿ। ಸತಿನ್ದ್ರಿಯಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ। ಚಿತ್ತಂ ಸಮಾದಹತಿ। ಸಮಾಧಿನ್ದ್ರಿಯಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ। ಪಞ್ಞಾಯ ಪಜಾನಾತಿ। ಪಞ್ಞಿನ್ದ್ರಿಯಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ।
Satiṃ upaṭṭhāpeti. Satindriyaparibhāvitā hoti mettācetovimutti. Cittaṃ samādahati. Samādhindriyaparibhāvitā hoti mettācetovimutti. Paññāya pajānāti. Paññindriyaparibhāvitā hoti mettācetovimutti.
ಇಮಾನಿ ಪಞ್ಚಿನ್ದ್ರಿಯಾನಿ ಮೇತ್ತಾಯ ಚೇತೋವಿಮುತ್ತಿಯಾ ಆಸೇವನಾ ಹೋನ್ತಿ। ಇಮೇಹಿ ಪಞ್ಚಹಿ ಇನ್ದ್ರಿಯೇಹಿ ಮೇತ್ತಾಚೇತೋವಿಮುತ್ತಿ ಆಸೇವೀಯತಿ…ಪೇ॰… ನಿಬ್ಬತ್ತೇನ್ತಿ ಜೋತೇನ್ತಿ ಪತಾಪೇನ್ತಿ।
Imāni pañcindriyāni mettāya cetovimuttiyā āsevanā honti. Imehi pañcahi indriyehi mettācetovimutti āsevīyati…pe… nibbattenti jotenti patāpenti.
ಸಬ್ಬೇ ಉಪರಿಮಾಯ ದಿಸಾಯ ವಿನಿಪಾತಿಕಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಅಸ್ಸದ್ಧಿಯೇ ನ ಕಮ್ಪತಿ। ಸದ್ಧಾಬಲಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ। ಕೋಸಜ್ಜೇ ನ ಕಮ್ಪತಿ। ವೀರಿಯಬಲಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ। ಪಮಾದೇ ನ ಕಮ್ಪತಿ। ಸತಿಬಲಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ। ಉದ್ಧಚ್ಚೇ ನ ಕಮ್ಪತಿ। ಸಮಾಧಿಬಲಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ। ಅವಿಜ್ಜಾಯ ನ ಕಮ್ಪತಿ। ಪಞ್ಞಾಬಲಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ।
Sabbe uparimāya disāya vinipātikā averino hontu, khemino hontu, sukhino hontūti – assaddhiye na kampati. Saddhābalaparibhāvitā hoti mettācetovimutti. Kosajje na kampati. Vīriyabalaparibhāvitā hoti mettācetovimutti. Pamāde na kampati. Satibalaparibhāvitā hoti mettācetovimutti. Uddhacce na kampati. Samādhibalaparibhāvitā hoti mettācetovimutti. Avijjāya na kampati. Paññābalaparibhāvitā hoti mettācetovimutti.
ಇಮಾನಿ ಪಞ್ಚ ಬಲಾನಿ ಮೇತ್ತಾಯ ಚೇತೋವಿಮುತ್ತಿಯಾ ಆಸೇವನಾ ಹೋನ್ತಿ। ಇಮೇಹಿ ಪಞ್ಚಹಿ ಬಲೇಹಿ ಮೇತ್ತಾಚೇತೋವಿಮುತ್ತಿ ಆಸೇವೀಯತಿ…ಪೇ॰… ನಿಬ್ಬತ್ತೇನ್ತಿ ಜೋತೇನ್ತಿ ಪತಾಪೇನ್ತಿ।
Imāni pañca balāni mettāya cetovimuttiyā āsevanā honti. Imehi pañcahi balehi mettācetovimutti āsevīyati…pe… nibbattenti jotenti patāpenti.
ಸಬ್ಬೇ ಉಪರಿಮಾಯ ದಿಸಾಯ ವಿನಿಪಾತಿಕಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸತಿಂ ಉಪಟ್ಠಾಪೇತಿ। ಸತಿಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ।
Sabbe uparimāya disāya vinipātikā averino hontu, khemino hontu, sukhino hontūti – satiṃ upaṭṭhāpeti. Satisambojjhaṅgaparibhāvitā hoti mettācetovimutti.
ಪಞ್ಞಾಯ ಪವಿಚಿನಾತಿ। ಧಮ್ಮವಿಚಯಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ। ವೀರಿಯಂ ಪಗ್ಗಣ್ಹಾತಿ। ವೀರಿಯಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ। ಪರಿಳಾಹಂ ಪಟಿಪ್ಪಸ್ಸಮ್ಭೇತಿ। ಪೀತಿಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ। ದುಟ್ಠುಲ್ಲಂ ಪಟಿಪ್ಪಸ್ಸಮ್ಭೇತಿ। ಪಸ್ಸದ್ಧಿಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ। ಚಿತ್ತಂ ಸಮಾದಹತಿ। ಸಮಾಧಿಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ। ಞಾಣೇನ ಕಿಲೇಸೇ ಪಟಿಸಙ್ಖಾತಿ। ಉಪೇಕ್ಖಾಸಮ್ಬೋಜ್ಝಙ್ಗಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ।
Paññāya pavicināti. Dhammavicayasambojjhaṅgaparibhāvitā hoti mettācetovimutti. Vīriyaṃ paggaṇhāti. Vīriyasambojjhaṅgaparibhāvitā hoti mettācetovimutti. Pariḷāhaṃ paṭippassambheti. Pītisambojjhaṅgaparibhāvitā hoti mettācetovimutti. Duṭṭhullaṃ paṭippassambheti. Passaddhisambojjhaṅgaparibhāvitā hoti mettācetovimutti. Cittaṃ samādahati. Samādhisambojjhaṅgaparibhāvitā hoti mettācetovimutti. Ñāṇena kilese paṭisaṅkhāti. Upekkhāsambojjhaṅgaparibhāvitā hoti mettācetovimutti.
ಇಮೇ ಸತ್ತ ಬೋಜ್ಝಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಆಸೇವನಾ ಹೋನ್ತಿ। ಇಮೇಹಿ ಸತ್ತಹಿ ಬೋಜ್ಝಙ್ಗೇಹಿ ಮೇತ್ತಾಚೇತೋವಿಮುತ್ತಿ ಆಸೇವೀಯತಿ…ಪೇ॰… ನಿಬ್ಬತ್ತೇನ್ತಿ ಜೋತೇನ್ತಿ ಪತಾಪೇನ್ತಿ।
Ime satta bojjhaṅgā mettāya cetovimuttiyā āsevanā honti. Imehi sattahi bojjhaṅgehi mettācetovimutti āsevīyati…pe… nibbattenti jotenti patāpenti.
ಸಬ್ಬೇ ಉಪರಿಮಾಯ ದಿಸಾಯ ವಿನಿಪಾತಿಕಾ ಅವೇರಿನೋ ಹೋನ್ತು, ಖೇಮಿನೋ ಹೋನ್ತು, ಸುಖಿನೋ ಹೋನ್ತೂತಿ – ಸಮ್ಮಾ ಪಸ್ಸತಿ। ಸಮ್ಮಾದಿಟ್ಠಿ ಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ। ಸಮ್ಮಾ ಅಭಿನಿರೋಪೇತಿ। ಸಮ್ಮಾಸಙ್ಕಪ್ಪಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ। ಸಮ್ಮಾ ಪರಿಗ್ಗಣ್ಹಾತಿ। ಸಮ್ಮಾವಾಚಾಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ। ಸಮ್ಮಾ ಸಮುಟ್ಠಾಪೇತಿ। ಸಮ್ಮಾಕಮ್ಮನ್ತಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ। ಸಮ್ಮಾ ವೋದಾಪೇತಿ। ಸಮ್ಮಾ ಆಜೀವಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ। ಸಮ್ಮಾ ಪಗ್ಗಣ್ಹಾತಿ। ಸಮ್ಮಾವಾಯಾಮಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ। ಸಮ್ಮಾ ಉಪಟ್ಠಾತಿ। ಸಮ್ಮಾಸತಿಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ। ಸಮ್ಮಾ ಸಮಾದಹತಿ। ಸಮ್ಮಾಸಮಾಧಿಪರಿಭಾವಿತಾ ಹೋತಿ ಮೇತ್ತಾಚೇತೋವಿಮುತ್ತಿ।
Sabbe uparimāya disāya vinipātikā averino hontu, khemino hontu, sukhino hontūti – sammā passati. Sammādiṭṭhi paribhāvitā hoti mettācetovimutti. Sammā abhiniropeti. Sammāsaṅkappaparibhāvitā hoti mettācetovimutti. Sammā pariggaṇhāti. Sammāvācāparibhāvitā hoti mettācetovimutti. Sammā samuṭṭhāpeti. Sammākammantaparibhāvitā hoti mettācetovimutti. Sammā vodāpeti. Sammā ājīvaparibhāvitā hoti mettācetovimutti. Sammā paggaṇhāti. Sammāvāyāmaparibhāvitā hoti mettācetovimutti. Sammā upaṭṭhāti. Sammāsatiparibhāvitā hoti mettācetovimutti. Sammā samādahati. Sammāsamādhiparibhāvitā hoti mettācetovimutti.
ಇಮೇ ಅಟ್ಠ ಮಗ್ಗಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಆಸೇವನಾ ಹೋನ್ತಿ। ಇಮೇಹಿ ಅಟ್ಠಹಿ ಮಗ್ಗಙ್ಗೇಹಿ ಮೇತ್ತಾಚೇತೋವಿಮುತ್ತಿ ಆಸೇವೀಯತಿ…ಪೇ॰… ಇಮೇ ಅಟ್ಠ ಮಗ್ಗಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಪರಿಭಾವಿತಾ ಹೋನ್ತಿ। ಇಮೇಹಿ ಅಟ್ಠಹಿ ಮಗ್ಗಙ್ಗೇಹಿ ಮೇತ್ತಾಚೇತೋವಿಮುತ್ತಿ ಸುಪರಿವುತಾ ಹೋತಿ। ಇಮೇ ಅಟ್ಠ ಮಗ್ಗಙ್ಗಾ ಮೇತ್ತಾಯ ಚೇತೋವಿಮುತ್ತಿಯಾ ಆಸೇವನಾ ಹೋನ್ತಿ, ಭಾವನಾ ಹೋನ್ತಿ, ಬಹುಲೀಕತಾ ಹೋನ್ತಿ, ಅಲಙ್ಕಾರಾ ಹೋನ್ತಿ, ಪರಿಕ್ಖಾರಾ ಹೋನ್ತಿ, ಪರಿವಾರಾ ಹೋನ್ತಿ, ಪಾರಿಪೂರೀ ಹೋನ್ತಿ, ಸಹಗತಾ ಹೋನ್ತಿ, ಸಹಜಾತಾ ಹೋನ್ತಿ , ಸಂಸಟ್ಠಾ ಹೋನ್ತಿ, ಸಮ್ಪಯುತ್ತಾ ಹೋನ್ತಿ, ಪಕ್ಖನ್ದನಾ ಹೋನ್ತಿ, ಪಸೀದನಾ ಹೋನ್ತಿ, ಸನ್ತಿಟ್ಠನಾ ಹೋನ್ತಿ, ವಿಮುಚ್ಚನಾ ಹೋನ್ತಿ, ‘‘ಏತಂ ಸನ್ತ’’ನ್ತಿ ಫಸ್ಸನಾ ಹೋನ್ತಿ, ಯಾನೀಕತಾ ಹೋನ್ತಿ, ವತ್ಥುಕತಾ ಹೋನ್ತಿ, ಅನುಟ್ಠಿತಾ ಹೋನ್ತಿ, ಪರಿಚಿತಾ ಹೋನ್ತಿ, ಸುಸಮಾರದ್ಧಾ ಹೋನ್ತಿ, ಸುಭಾವಿತಾ ಹೋನ್ತಿ, ಸ್ವಾಧಿಟ್ಠಿತಾ ಹೋನ್ತಿ, ಸುಸಮುಗ್ಗತಾ ಹೋನ್ತಿ, ಸುವಿಮುತ್ತಾ ಹೋನ್ತಿ ನಿಬ್ಬತ್ತೇನ್ತಿ ಜೋತೇನ್ತಿ ಪತಾಪೇನ್ತೀತಿ।
Ime aṭṭha maggaṅgā mettāya cetovimuttiyā āsevanā honti. Imehi aṭṭhahi maggaṅgehi mettācetovimutti āsevīyati…pe… ime aṭṭha maggaṅgā mettāya cetovimuttiyā paribhāvitā honti. Imehi aṭṭhahi maggaṅgehi mettācetovimutti suparivutā hoti. Ime aṭṭha maggaṅgā mettāya cetovimuttiyā āsevanā honti, bhāvanā honti, bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti , saṃsaṭṭhā honti, sampayuttā honti, pakkhandanā honti, pasīdanā honti, santiṭṭhanā honti, vimuccanā honti, ‘‘etaṃ santa’’nti phassanā honti, yānīkatā honti, vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti, suvimuttā honti nibbattenti jotenti patāpentīti.
ಮೇತ್ತಾಕಥಾ ನಿಟ್ಠಿತಾ।
Mettākathā niṭṭhitā.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಪಟಿಸಮ್ಭಿದಾಮಗ್ಗ-ಅಟ್ಠಕಥಾ • Paṭisambhidāmagga-aṭṭhakathā / ೨-೪. ಬಲಾದಿವಾರತ್ತಯವಣ್ಣನಾ • 2-4. Balādivārattayavaṇṇanā
