| Library / Tipiṭaka / திபிடக • Tipiṭaka / விப⁴ங்க³-அனுடீகா • Vibhaṅga-anuṭīkā |
11. மக்³க³ங்க³விப⁴ங்கோ³
11. Maggaṅgavibhaṅgo
2. அபி⁴த⁴ம்மபா⁴ஜனீயவண்ணனா
2. Abhidhammabhājanīyavaṇṇanā
490. அபி⁴த⁴ம்மேதி த⁴ம்மஸங்க³ஹே. ஸோ ஹி நிப்³ப³த்திதாபி⁴த⁴ம்மதே³ஸனா, ந விப⁴ங்க³தே³ஸனா விய ஸுத்தந்தனயவிமிஸ்ஸா. அரியோபபத³தங் ந கரோதி வினாபி தேனஸ்ஸ அரியபா⁴வஸித்³தி⁴தோ. தேனாஹ அட்ட²கதா²யங் ‘‘யதா² ஹீ’’திஆதி³.
490. Abhidhammeti dhammasaṅgahe. So hi nibbattitābhidhammadesanā, na vibhaṅgadesanā viya suttantanayavimissā. Ariyopapadataṃ na karoti vināpi tenassa ariyabhāvasiddhito. Tenāha aṭṭhakathāyaṃ ‘‘yathā hī’’tiādi.
493. ‘‘லோகியகாலேனா’’தி இத³ங் புப்³ப³பா⁴க³பா⁴வனானுபா⁴வேன கிச்சாதிரேகஸித்³தீ⁴தி த³ஸ்ஸனத்த²ங் வுத்தங். ஏதேஸந்தி ஸம்மாதி³ட்டி²ஆதீ³னங். அப்பஹானே, பஹானே ச ஆதீ³னவானிஸங்ஸவிபா⁴வனாதி³னா விஸேஸப்பச்சயத்தா ஸம்மாதி³ட்டி²ஆதீ³னி மிச்சா²வாசாதீ³னி பஜஹாபெந்தீதி வுத்தானி. மிச்சா²வாசாதி³தோ நிவத்தி ஸம்மாவாசாதி³கிரியாதி வுத்தங் ‘‘ஸம்மாவாசாதி³கிரியா ஹி விரதீ’’தி. ஸம்மாதி³ட்டி²ஆத³யோ விய ந காராபகபா⁴வேன, தங்ஸமங்கீ³புக்³க³லோ விய ந கத்துபா⁴வேன. லோகுத்தரக்க²ணேபீதி ந கேவலங் லோகியக்க²ணேயேவ, அத² கோ² லோகுத்தரக்க²ணேபி.
493. ‘‘Lokiyakālenā’’ti idaṃ pubbabhāgabhāvanānubhāvena kiccātirekasiddhīti dassanatthaṃ vuttaṃ. Etesanti sammādiṭṭhiādīnaṃ. Appahāne, pahāne ca ādīnavānisaṃsavibhāvanādinā visesappaccayattā sammādiṭṭhiādīni micchāvācādīni pajahāpentīti vuttāni. Micchāvācādito nivatti sammāvācādikiriyāti vuttaṃ ‘‘sammāvācādikiriyā hi viratī’’ti. Sammādiṭṭhiādayo viya na kārāpakabhāvena, taṃsamaṅgīpuggalo viya na kattubhāvena. Lokuttarakkhaṇepīti na kevalaṃ lokiyakkhaṇeyeva, atha kho lokuttarakkhaṇepi.
க²ந்தோ⁴பதி⁴ங் விபச்சதீதி படிஸந்தி⁴தா³யிகங் ஸந்தா⁴யாஹ. தத்த² விபச்சதீதி பவத்திவிபாகதா³யிகங்.
Khandhopadhiṃ vipaccatīti paṭisandhidāyikaṃ sandhāyāha. Tattha vipaccatīti pavattivipākadāyikaṃ.
ஏகேகந்தி ‘‘தத்த² கதமா ஸம்மாதி³ட்டீ²’’திஆதி³னா ஏகேகங் அங்க³ங் புச்சி²த்வா. தஸ்ஸ தஸ்ஸேவாதி ஏகேகஅங்க³ஸ்ஸேவ, ந அங்க³ஸமுதா³யஸ்ஸ. ஸஹ பன புச்சி²த்வாதி ‘‘தத்த² கதமோ பஞ்சங்கி³கோ மக்³கோ³’’தி புச்சி²த்வா. ஏகதோ விஸ்ஸஜ்ஜனபடினித்³தே³ஸத்தாதி யதி³பி ‘‘தத்த² கதமா ஸம்மாதி³ட்டி²? யா பஞ்ஞா’’திஆதி³னா (விப⁴॰ 495) விஸ்ஸஜ்ஜனங் கதங், ‘‘தத்த² கதமோ பஞ்சங்கி³கோ மக்³கோ³’’தி (விப⁴॰ 494) பன ஏகதோ கதாய புச்சா²ய விஸ்ஸஜ்ஜனவஸேன படினித்³தே³ஸபா⁴வதோ ந பாடியேக்கங் புச்சா²விஸ்ஸஜ்ஜனங் நாம ஹோதி. கஸ்மா பனெத்த² பஞ்சங்கி³கவாரே ஏவ பாடியேக்கங் புச்சா²விஸ்ஸஜ்ஜனங் கதங், ந அட்ட²ங்கி³கவாரேதி சோத³னங் ஸந்தா⁴யாஹ ‘‘தத்தா²’’திஆதி³. ஏகேகமுகா²யாதி ஸம்மாதி³ட்டி²ஆதி³முகா²ய. தேன வுத்தங் ‘‘அரியங் வோ, பி⁴க்க²வே, ஸம்மாதி³ட்டி²ங் தே³ஸெஸ்ஸாமி ஸஉபனிஸங் ஸபரிக்கா²ர’’ந்திஆதி³ (ஸங்॰ நி॰ 5.28). புப்³ப³ஸுத்³தி⁴யா ஸிஜ்ஜ²ந்தி. ததா² ஹி வுத்தங் ‘‘புப்³பே³வ கோ² பனஸ்ஸ காயகம்மங் வசீகம்மங் ஆஜீவோ ஸுபரிஸுத்³தோ⁴ ஹோதீ’’தி (ம॰ நி॰ 3.431), தஸ்மா ஸம்மாவாசாதி³முகா² பா⁴வனா நத்தீ²தி அதி⁴ப்பாயோ. தேனாஹ ‘‘ந மக்³க³ஸ்ஸ உபசாரேனா’’தி.
Ekekanti ‘‘tattha katamā sammādiṭṭhī’’tiādinā ekekaṃ aṅgaṃ pucchitvā. Tassa tassevāti ekekaaṅgasseva, na aṅgasamudāyassa. Saha pana pucchitvāti ‘‘tattha katamo pañcaṅgiko maggo’’ti pucchitvā. Ekato vissajjanapaṭiniddesattāti yadipi ‘‘tattha katamā sammādiṭṭhi? Yā paññā’’tiādinā (vibha. 495) vissajjanaṃ kataṃ, ‘‘tattha katamo pañcaṅgiko maggo’’ti (vibha. 494) pana ekato katāya pucchāya vissajjanavasena paṭiniddesabhāvato na pāṭiyekkaṃ pucchāvissajjanaṃ nāma hoti. Kasmā panettha pañcaṅgikavāre eva pāṭiyekkaṃ pucchāvissajjanaṃ kataṃ, na aṭṭhaṅgikavāreti codanaṃ sandhāyāha ‘‘tatthā’’tiādi. Ekekamukhāyāti sammādiṭṭhiādimukhāya. Tena vuttaṃ ‘‘ariyaṃ vo, bhikkhave, sammādiṭṭhiṃ desessāmi saupanisaṃ saparikkhāra’’ntiādi (saṃ. ni. 5.28). Pubbasuddhiyā sijjhanti. Tathā hi vuttaṃ ‘‘pubbeva kho panassa kāyakammaṃ vacīkammaṃ ājīvo suparisuddho hotī’’ti (ma. ni. 3.431), tasmā sammāvācādimukhā bhāvanā natthīti adhippāyo. Tenāha ‘‘na maggassa upacārenā’’ti.
அபி⁴த⁴ம்மபா⁴ஜனீயவண்ணனா நிட்டி²தா.
Abhidhammabhājanīyavaṇṇanā niṭṭhitā.
மக்³க³ங்க³விப⁴ங்க³வண்ணனா நிட்டி²தா.
Maggaṅgavibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 11. மக்³க³ங்க³விப⁴ங்கோ³ • 11. Maggaṅgavibhaṅgo
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / ஸம்மோஹவினோத³னீ-அட்ட²கதா² • Sammohavinodanī-aṭṭhakathā / 2. அபி⁴த⁴ம்மபா⁴ஜனீயவண்ணனா • 2. Abhidhammabhājanīyavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 11. மக்³க³ங்க³விப⁴ங்கோ³ • 11. Maggaṅgavibhaṅgo
