| Library / Tipiṭaka / তিপিটক • Tipiṭaka / ৰিভঙ্গ-মূলটীকা • Vibhaṅga-mūlaṭīkā |
১১. মগ্গঙ্গৰিভঙ্গো
11. Maggaṅgavibhaṅgo
২. অভিধম্মভাজনীযৰণ্ণনা
2. Abhidhammabhājanīyavaṇṇanā
৪৯০. অভিধম্মে লোকুত্তরচিত্তভাজনীযেপি ‘‘তস্মিং খো পন সমযে চত্তারো খন্ধা হোন্তি…পে॰… অট্ঠঙ্গিকো মগ্গো হোতী’’তি (ধ॰ স॰ ৩৩৭) ৰুত্তত্তা ইধাপি অভিধম্মভাজনীযে অভিধম্মানুরূপং দেসনং করোন্তো ‘‘অট্ঠঙ্গিকো মগ্গো’’তি অরিযোপপদতং ন করোতি।
490. Abhidhamme lokuttaracittabhājanīyepi ‘‘tasmiṃ kho pana samaye cattāro khandhā honti…pe… aṭṭhaṅgiko maggo hotī’’ti (dha. sa. 337) vuttattā idhāpi abhidhammabhājanīye abhidhammānurūpaṃ desanaṃ karonto ‘‘aṭṭhaṅgiko maggo’’ti ariyopapadataṃ na karoti.
৪৯৩. তস্মিং সমযেতি লোকিযকালেন এতেসং অতিরেককিচ্চং দস্সেতি। ৰিরতিউপ্পাদনেন মিচ্ছাৰাচাদীনি পুগ্গলং পজহাপেন্তীতি সম্মাদিট্ঠাদীনি পঞ্চ ‘‘কারাপকঙ্গানী’’তি ৰুত্তানি। সম্মাৰাচাদিকিরিযা হি ৰিরতি, তঞ্চ এতানি কারাপেন্তীতি। ৰিরতিৰসেনাতি ৰিরমণকিরিযাৰসেন, ন কারাপকভাৰেন কত্তুভাৰেন চাতি অত্থো। ইমং…পে॰… কিচ্চাতিরেকতং দস্সেতুন্তি লোকুত্তরক্খণেপি ইমানেৰ পঞ্চ সম্মাৰাচাদিত্তযস্স একক্খণে কারাপকানীতি দস্সেতুন্তি অত্থো। মিচ্ছাদিট্ঠাদিকা দস, তপ্পচ্চযা অকুসলা চ দসাতি ৰীসতি অকুসলপক্খিযা, সম্মাদিট্ঠাদিকা দস, তপ্পচ্চযা চ কুসলা দসাতি ৰীসতি কুসলপক্খিযা চ মহাচত্তারীসকসুত্তে (ম॰ নি॰ ৩.১৩৬) ৰুত্তাতি তস্স এতং নামং।
493. Tasmiṃ samayeti lokiyakālena etesaṃ atirekakiccaṃ dasseti. Viratiuppādanena micchāvācādīni puggalaṃ pajahāpentīti sammādiṭṭhādīni pañca ‘‘kārāpakaṅgānī’’ti vuttāni. Sammāvācādikiriyā hi virati, tañca etāni kārāpentīti. Virativasenāti viramaṇakiriyāvasena, na kārāpakabhāvena kattubhāvena cāti attho. Imaṃ…pe… kiccātirekataṃ dassetunti lokuttarakkhaṇepi imāneva pañca sammāvācādittayassa ekakkhaṇe kārāpakānīti dassetunti attho. Micchādiṭṭhādikā dasa, tappaccayā akusalā ca dasāti vīsati akusalapakkhiyā, sammādiṭṭhādikā dasa, tappaccayā ca kusalā dasāti vīsati kusalapakkhiyā ca mahācattārīsakasutte (ma. ni. 3.136) vuttāti tassa etaṃ nāmaṃ.
পুঞ্ঞভাগিযাতি পুঞ্ঞকোট্ঠাসে ভৰা, পুঞ্ঞাভিসঙ্খারেকদেসভূতাতি অত্থো। খন্ধোপধিং ৰিপচ্চতি, তত্থ ৰা ৰিপচ্চতীতি উপধিৰেপক্কা।
Puññabhāgiyāti puññakoṭṭhāse bhavā, puññābhisaṅkhārekadesabhūtāti attho. Khandhopadhiṃ vipaccati, tattha vā vipaccatīti upadhivepakkā.
পঞ্চঙ্গিকমগ্গং উদ্দিসিত্ৰা তত্থ একেকং পুচ্ছিত্ৰা তস্স তস্সেৰ সমযৰৰত্থানং কত্ৰা ৰিস্সজ্জনং ‘‘পাটিযেক্কং পুচ্ছিত্ৰা পাটিযেক্কং ৰিস্সজ্জন’’ন্তি ৰুত্তং। সহ পন পুচ্ছিত্ৰা পঞ্চন্নম্পি সমযৰৰত্থানং কত্ৰা ৰিস্সজ্জনে ‘‘তত্থ কতমা সম্মাদিট্ঠিযা পঞ্ঞা’’তিআদিকো পটিনিদ্দেসো একতো ৰিস্সজ্জনপটিনিদ্দেসত্তা ন পাটিযেক্কং পুচ্ছাৰিস্সজ্জনং নাম হোতীতি। তত্থ পঞ্চঙ্গিকৰারে এৰ পাটিযেক্কং পুচ্ছাৰিস্সজ্জনং সম্মাদিট্ঠাদীসু কারাপকঙ্গেসু একেকমুখায ভাৰনায মগ্গুপ্পত্তিং সন্ধায কতন্তি ৰেদিতব্বং। ৰাচাদীনি হি পুব্বসুদ্ধিযা সিজ্ঝন্তি, ন মগ্গস্স উপচারেনাতি।
Pañcaṅgikamaggaṃ uddisitvā tattha ekekaṃ pucchitvā tassa tasseva samayavavatthānaṃ katvā vissajjanaṃ ‘‘pāṭiyekkaṃ pucchitvā pāṭiyekkaṃ vissajjana’’nti vuttaṃ. Saha pana pucchitvā pañcannampi samayavavatthānaṃ katvā vissajjane ‘‘tattha katamā sammādiṭṭhiyā paññā’’tiādiko paṭiniddeso ekato vissajjanapaṭiniddesattā na pāṭiyekkaṃ pucchāvissajjanaṃ nāma hotīti. Tattha pañcaṅgikavāre eva pāṭiyekkaṃ pucchāvissajjanaṃ sammādiṭṭhādīsu kārāpakaṅgesu ekekamukhāya bhāvanāya magguppattiṃ sandhāya katanti veditabbaṃ. Vācādīni hi pubbasuddhiyā sijjhanti, na maggassa upacārenāti.
অভিধম্মভাজনীযৰণ্ণনা নিট্ঠিতা।
Abhidhammabhājanīyavaṇṇanā niṭṭhitā.
মগ্গঙ্গৰিভঙ্গৰণ্ণনা নিট্ঠিতা।
Maggaṅgavibhaṅgavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ৰিভঙ্গপাল়ি • Vibhaṅgapāḷi / ১১. মগ্গঙ্গৰিভঙ্গো • 11. Maggaṅgavibhaṅgo
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / সম্মোহৰিনোদনী-অট্ঠকথা • Sammohavinodanī-aṭṭhakathā / ২. অভিধম্মভাজনীযৰণ্ণনা • 2. Abhidhammabhājanīyavaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-অনুটীকা • Vibhaṅga-anuṭīkā / ১১. মগ্গঙ্গৰিভঙ্গো • 11. Maggaṅgavibhaṅgo
