| Library / Tipiṭaka / তিপিটক • Tipiṭaka / ৰিভঙ্গ-অনুটীকা • Vibhaṅga-anuṭīkā |
১১. মগ্গঙ্গৰিভঙ্গো
11. Maggaṅgavibhaṅgo
২. অভিধম্মভাজনীযৰণ্ণনা
2. Abhidhammabhājanīyavaṇṇanā
৪৯০. অভিধম্মেতি ধম্মসঙ্গহে। সো হি নিব্বত্তিতাভিধম্মদেসনা, ন ৰিভঙ্গদেসনা ৰিয সুত্তন্তনযৰিমিস্সা। অরিযোপপদতং ন করোতি ৰিনাপি তেনস্স অরিযভাৰসিদ্ধিতো। তেনাহ অট্ঠকথাযং ‘‘যথা হী’’তিআদি।
490. Abhidhammeti dhammasaṅgahe. So hi nibbattitābhidhammadesanā, na vibhaṅgadesanā viya suttantanayavimissā. Ariyopapadataṃ na karoti vināpi tenassa ariyabhāvasiddhito. Tenāha aṭṭhakathāyaṃ ‘‘yathā hī’’tiādi.
৪৯৩. ‘‘লোকিযকালেনা’’তি ইদং পুব্বভাগভাৰনানুভাৰেন কিচ্চাতিরেকসিদ্ধীতি দস্সনত্থং ৰুত্তং। এতেসন্তি সম্মাদিট্ঠিআদীনং। অপ্পহানে, পহানে চ আদীনৰানিসংসৰিভাৰনাদিনা ৰিসেসপ্পচ্চযত্তা সম্মাদিট্ঠিআদীনি মিচ্ছাৰাচাদীনি পজহাপেন্তীতি ৰুত্তানি। মিচ্ছাৰাচাদিতো নিৰত্তি সম্মাৰাচাদিকিরিযাতি ৰুত্তং ‘‘সম্মাৰাচাদিকিরিযা হি ৰিরতী’’তি। সম্মাদিট্ঠিআদযো ৰিয ন কারাপকভাৰেন, তংসমঙ্গীপুগ্গলো ৰিয ন কত্তুভাৰেন। লোকুত্তরক্খণেপীতি ন কেৰলং লোকিযক্খণেযেৰ, অথ খো লোকুত্তরক্খণেপি।
493. ‘‘Lokiyakālenā’’ti idaṃ pubbabhāgabhāvanānubhāvena kiccātirekasiddhīti dassanatthaṃ vuttaṃ. Etesanti sammādiṭṭhiādīnaṃ. Appahāne, pahāne ca ādīnavānisaṃsavibhāvanādinā visesappaccayattā sammādiṭṭhiādīni micchāvācādīni pajahāpentīti vuttāni. Micchāvācādito nivatti sammāvācādikiriyāti vuttaṃ ‘‘sammāvācādikiriyā hi viratī’’ti. Sammādiṭṭhiādayo viya na kārāpakabhāvena, taṃsamaṅgīpuggalo viya na kattubhāvena. Lokuttarakkhaṇepīti na kevalaṃ lokiyakkhaṇeyeva, atha kho lokuttarakkhaṇepi.
খন্ধোপধিং ৰিপচ্চতীতি পটিসন্ধিদাযিকং সন্ধাযাহ। তত্থ ৰিপচ্চতীতি পৰত্তিৰিপাকদাযিকং।
Khandhopadhiṃ vipaccatīti paṭisandhidāyikaṃ sandhāyāha. Tattha vipaccatīti pavattivipākadāyikaṃ.
একেকন্তি ‘‘তত্থ কতমা সম্মাদিট্ঠী’’তিআদিনা একেকং অঙ্গং পুচ্ছিত্ৰা। তস্স তস্সেৰাতি একেকঅঙ্গস্সেৰ, ন অঙ্গসমুদাযস্স। সহ পন পুচ্ছিত্ৰাতি ‘‘তত্থ কতমো পঞ্চঙ্গিকো মগ্গো’’তি পুচ্ছিত্ৰা। একতো ৰিস্সজ্জনপটিনিদ্দেসত্তাতি যদিপি ‘‘তত্থ কতমা সম্মাদিট্ঠি? যা পঞ্ঞা’’তিআদিনা (ৰিভ॰ ৪৯৫) ৰিস্সজ্জনং কতং, ‘‘তত্থ কতমো পঞ্চঙ্গিকো মগ্গো’’তি (ৰিভ॰ ৪৯৪) পন একতো কতায পুচ্ছায ৰিস্সজ্জনৰসেন পটিনিদ্দেসভাৰতো ন পাটিযেক্কং পুচ্ছাৰিস্সজ্জনং নাম হোতি। কস্মা পনেত্থ পঞ্চঙ্গিকৰারে এৰ পাটিযেক্কং পুচ্ছাৰিস্সজ্জনং কতং, ন অট্ঠঙ্গিকৰারেতি চোদনং সন্ধাযাহ ‘‘তত্থা’’তিআদি। একেকমুখাযাতি সম্মাদিট্ঠিআদিমুখায। তেন ৰুত্তং ‘‘অরিযং ৰো, ভিক্খৰে, সম্মাদিট্ঠিং দেসেস্সামি সউপনিসং সপরিক্খার’’ন্তিআদি (সং॰ নি॰ ৫.২৮)। পুব্বসুদ্ধিযা সিজ্ঝন্তি। তথা হি ৰুত্তং ‘‘পুব্বেৰ খো পনস্স কাযকম্মং ৰচীকম্মং আজীৰো সুপরিসুদ্ধো হোতী’’তি (ম॰ নি॰ ৩.৪৩১), তস্মা সম্মাৰাচাদিমুখা ভাৰনা নত্থীতি অধিপ্পাযো। তেনাহ ‘‘ন মগ্গস্স উপচারেনা’’তি।
Ekekanti ‘‘tattha katamā sammādiṭṭhī’’tiādinā ekekaṃ aṅgaṃ pucchitvā. Tassa tassevāti ekekaaṅgasseva, na aṅgasamudāyassa. Saha pana pucchitvāti ‘‘tattha katamo pañcaṅgiko maggo’’ti pucchitvā. Ekato vissajjanapaṭiniddesattāti yadipi ‘‘tattha katamā sammādiṭṭhi? Yā paññā’’tiādinā (vibha. 495) vissajjanaṃ kataṃ, ‘‘tattha katamo pañcaṅgiko maggo’’ti (vibha. 494) pana ekato katāya pucchāya vissajjanavasena paṭiniddesabhāvato na pāṭiyekkaṃ pucchāvissajjanaṃ nāma hoti. Kasmā panettha pañcaṅgikavāre eva pāṭiyekkaṃ pucchāvissajjanaṃ kataṃ, na aṭṭhaṅgikavāreti codanaṃ sandhāyāha ‘‘tatthā’’tiādi. Ekekamukhāyāti sammādiṭṭhiādimukhāya. Tena vuttaṃ ‘‘ariyaṃ vo, bhikkhave, sammādiṭṭhiṃ desessāmi saupanisaṃ saparikkhāra’’ntiādi (saṃ. ni. 5.28). Pubbasuddhiyā sijjhanti. Tathā hi vuttaṃ ‘‘pubbeva kho panassa kāyakammaṃ vacīkammaṃ ājīvo suparisuddho hotī’’ti (ma. ni. 3.431), tasmā sammāvācādimukhā bhāvanā natthīti adhippāyo. Tenāha ‘‘na maggassa upacārenā’’ti.
অভিধম্মভাজনীযৰণ্ণনা নিট্ঠিতা।
Abhidhammabhājanīyavaṇṇanā niṭṭhitā.
মগ্গঙ্গৰিভঙ্গৰণ্ণনা নিট্ঠিতা।
Maggaṅgavibhaṅgavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ৰিভঙ্গপাল়ি • Vibhaṅgapāḷi / ১১. মগ্গঙ্গৰিভঙ্গো • 11. Maggaṅgavibhaṅgo
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / সম্মোহৰিনোদনী-অট্ঠকথা • Sammohavinodanī-aṭṭhakathā / ২. অভিধম্মভাজনীযৰণ্ণনা • 2. Abhidhammabhājanīyavaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-মূলটীকা • Vibhaṅga-mūlaṭīkā / ১১. মগ্গঙ্গৰিভঙ্গো • 11. Maggaṅgavibhaṅgo
