| Library / Tipiṭaka / ཏིཔིཊཀ • Tipiṭaka / ཝིབྷངྒཔཱལི༹ • Vibhaṅgapāḷi |
༡༡. མགྒངྒཝིབྷངྒོ
11. Maggaṅgavibhaṅgo
༡. སུཏྟནྟབྷཱཛནཱིཡཾ
1. Suttantabhājanīyaṃ
༤༨༦. ཨརིཡོ ཨཊྛངྒིཀོ མགྒོ, སེཡྻཐིདཾ – སམྨཱདིཊྛི, སམྨཱསངྐཔྤོ, སམྨཱཝཱཙཱ, སམྨཱཀམྨནྟོ, སམྨཱཨཱཛཱིཝོ, སམྨཱཝཱཡཱམོ, སམྨཱསཏི, སམྨཱསམཱདྷི།
486. Ariyo aṭṭhaṅgiko maggo, seyyathidaṃ – sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi.
༤༨༧. ཏཏྠ ཀཏམཱ སམྨཱདིཊྛི? དུཀྑེ ཉཱཎཾ, དུཀྑསམུདཡེ ཉཱཎཾ, དུཀྑནིརོདྷེ ཉཱཎཾ, དུཀྑནིརོདྷགཱམིནིཡཱ པཊིཔདཱཡ ཉཱཎཾ – ཨཡཾ ཝུཙྩཏི ‘‘སམྨཱདིཊྛི’’།
487. Tattha katamā sammādiṭṭhi? Dukkhe ñāṇaṃ, dukkhasamudaye ñāṇaṃ, dukkhanirodhe ñāṇaṃ, dukkhanirodhagāminiyā paṭipadāya ñāṇaṃ – ayaṃ vuccati ‘‘sammādiṭṭhi’’.
ཏཏྠ ཀཏམོ སམྨཱསངྐཔྤོ? ནེཀྑམྨསངྐཔྤོ, ཨབྱཱཔཱདསངྐཔྤོ, ཨཝིཧིཾསཱསངྐཔྤོ – ཨཡཾ ཝུཙྩཏི ‘‘སམྨཱསངྐཔྤོ’’།
Tattha katamo sammāsaṅkappo? Nekkhammasaṅkappo, abyāpādasaṅkappo, avihiṃsāsaṅkappo – ayaṃ vuccati ‘‘sammāsaṅkappo’’.
ཏཏྠ ཀཏམཱ སམྨཱཝཱཙཱ? མུསཱཝཱདཱ ཝེརམཎཱི, པིསུཎཱཡ ཝཱཙཱཡ ཝེརམཎཱི, ཕརུསཱཡ ཝཱཙཱཡ ཝེརམཎཱི, སམྥཔྤལཱཔཱ ཝེརམཎཱི – ཨཡཾ ཝུཙྩཏི ‘‘སམྨཱཝཱཙཱ’’།
Tattha katamā sammāvācā? Musāvādā veramaṇī, pisuṇāya vācāya veramaṇī, pharusāya vācāya veramaṇī, samphappalāpā veramaṇī – ayaṃ vuccati ‘‘sammāvācā’’.
ཏཏྠ ཀཏམོ སམྨཱཀམྨནྟོ? པཱཎཱཏིཔཱཏཱ ཝེརམཎཱི, ཨདིནྣཱདཱནཱ ཝེརམཎཱི, ཀཱམེསུམིཙྪཱཙཱརཱ ཝེརམཎཱི – ཨཡཾ ཝུཙྩཏི ‘‘སམྨཱཀམྨནྟོ’’།
Tattha katamo sammākammanto? Pāṇātipātā veramaṇī, adinnādānā veramaṇī, kāmesumicchācārā veramaṇī – ayaṃ vuccati ‘‘sammākammanto’’.
ཏཏྠ ཀཏམོ སམྨཱཨཱཛཱིཝོ? ཨིདྷ ཨརིཡསཱཝཀོ མིཙྪཱཨཱཛཱིཝཾ པཧཱཡ སམྨཱཨཱཛཱིཝེན ཛཱིཝིཀཾ ཀཔྤེཏི – ཨཡཾ ཝུཙྩཏི ‘‘སམྨཱཨཱཛཱིཝོ’’།
Tattha katamo sammāājīvo? Idha ariyasāvako micchāājīvaṃ pahāya sammāājīvena jīvikaṃ kappeti – ayaṃ vuccati ‘‘sammāājīvo’’.
ཏཏྠ ཀཏམོ སམྨཱཝཱཡཱམོ? ཨིདྷ བྷིཀྑུ ཨནུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ ཨནུཔྤཱདཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི, ཨུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ པཧཱནཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི, ཨནུཔྤནྣཱནཾ ཀུསལཱནཾ དྷམྨཱནཾ ཨུཔྤཱདཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི, ཨུཔྤནྣཱནཾ ཀུསལཱནཾ དྷམྨཱནཾ ཋིཏིཡཱ ཨསམྨོསཱཡ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི – ཨཡཾ ཝུཙྩཏི ‘‘སམྨཱཝཱཡཱམོ’’།
Tattha katamo sammāvāyāmo? Idha bhikkhu anuppannānaṃ pāpakānaṃ akusalānaṃ dhammānaṃ anuppādāya chandaṃ janeti vāyamati vīriyaṃ ārabhati cittaṃ paggaṇhāti padahati, uppannānaṃ pāpakānaṃ akusalānaṃ dhammānaṃ pahānāya chandaṃ janeti vāyamati vīriyaṃ ārabhati cittaṃ paggaṇhāti padahati, anuppannānaṃ kusalānaṃ dhammānaṃ uppādāya chandaṃ janeti vāyamati vīriyaṃ ārabhati cittaṃ paggaṇhāti padahati, uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā chandaṃ janeti vāyamati vīriyaṃ ārabhati cittaṃ paggaṇhāti padahati – ayaṃ vuccati ‘‘sammāvāyāmo’’.
ཏཏྠ ཀཏམཱ སམྨཱསཏི? ཨིདྷ བྷིཀྑུ ཀཱཡེ ཀཱཡཱནུཔསྶཱི ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ, ཝེདནཱསུ ཝེདནཱནུཔསྶཱི ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ, ཙིཏྟེ ཙིཏྟཱནུཔསྶཱི ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ, དྷམྨེསུ དྷམྨཱནུཔསྶཱི ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ – ཨཡཾ ཝུཙྩཏི ‘‘སམྨཱསཏི’’།
Tattha katamā sammāsati? Idha bhikkhu kāye kāyānupassī viharati ātāpī sampajāno satimā vineyya loke abhijjhādomanassaṃ, vedanāsu vedanānupassī viharati ātāpī sampajāno satimā vineyya loke abhijjhādomanassaṃ, citte cittānupassī viharati ātāpī sampajāno satimā vineyya loke abhijjhādomanassaṃ, dhammesu dhammānupassī viharati ātāpī sampajāno satimā vineyya loke abhijjhādomanassaṃ – ayaṃ vuccati ‘‘sammāsati’’.
ཏཏྠ ཀཏམོ སམྨཱསམཱདྷི? ཨིདྷ བྷིཀྑུ ཝིཝིཙྩེཝ ཀཱམེཧི ཝིཝིཙྩ ཨཀུསལེཧི དྷམྨེཧི སཝིཏཀྐཾ སཝིཙཱརཾ ཝིཝེཀཛཾ པཱིཏིསུཁཾ པཋམཾ ཛྷཱནཾ ཨུཔསམྤཛྫ ཝིཧརཏི; ཝིཏཀྐཝིཙཱརཱནཾ ཝཱུཔསམཱ ཨཛ྄ཛྷཏྟཾ སམྤསཱདནཾ ཙེཏསོ ཨེཀོདིབྷཱཝཾ ཨཝིཏཀྐཾ ཨཝིཙཱརཾ སམཱདྷིཛཾ པཱིཏིསུཁཾ དུཏིཡཾ ཛྷཱནཾ ཨུཔསམྤཛྫ ཝིཧརཏི; པཱིཏིཡཱ ཙ ཝིརཱགཱ ཨུཔེཀྑཀོ ཙ ཝིཧརཏི སཏོ ཙ སམྤཛཱནོ སུཁཉྩ ཀཱཡེན པཊིསཾཝེདེཏི, ཡཾ ཏཾ ཨརིཡཱ ཨཱཙིཀྑནྟི ‘‘ཨུཔེཀྑཀོ སཏིམཱ སུཁཝིཧཱརཱི’’ཏི ཏཏིཡཾ ཛྷཱནཾ ཨུཔསམྤཛྫ ཝིཧརཏི; སུཁསྶ ཙ པཧཱནཱ དུཀྑསྶ ཙ པཧཱནཱ པུབྦེཝ སོམནསྶདོམནསྶཱནཾ ཨཏྠངྒམཱ ཨདུཀྑམསུཁཾ ཨུཔེཀྑཱསཏིཔཱརིསུདྡྷིཾ ཙཏུཏྠཾ ཛྷཱནཾ ཨུཔསམྤཛྫ ཝིཧརཏི – ཨཡཾ ཝུཙྩཏི ‘‘སམྨཱསམཱདྷི’’།
Tattha katamo sammāsamādhi? Idha bhikkhu vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharati; vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ upasampajja viharati; pītiyā ca virāgā upekkhako ca viharati sato ca sampajāno sukhañca kāyena paṭisaṃvedeti, yaṃ taṃ ariyā ācikkhanti ‘‘upekkhako satimā sukhavihārī’’ti tatiyaṃ jhānaṃ upasampajja viharati; sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthaṃ jhānaṃ upasampajja viharati – ayaṃ vuccati ‘‘sammāsamādhi’’.
༤༨༨. ཨརིཡོ ཨཊྛངྒིཀོ མགྒོ, སེཡྻཐིདཾ – སམྨཱདིཊྛི, སམྨཱསངྐཔྤོ, སམྨཱཝཱཙཱ, སམྨཱཀམྨནྟོ, སམྨཱཨཱཛཱིཝོ, སམྨཱཝཱཡཱམོ, སམྨཱསཏི, སམྨཱསམཱདྷི།
488. Ariyo aṭṭhaṅgiko maggo, seyyathidaṃ – sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi.
༤༨༩. ཏཏྠ ཀཏམཱ སམྨཱདིཊྛི? ཨིདྷ བྷིཀྑུ སམྨཱདིཊྛིཾ བྷཱཝེཏི ཝིཝེཀནིསྶིཏཾ ཝིརཱགནིསྶིཏཾ ནིརོདྷནིསྶིཏཾ ཝོསྶགྒཔརིཎཱམིཾ, སམྨཱསངྐཔྤཾ བྷཱཝེཏི…པེ॰… སམྨཱཝཱཙཾ བྷཱཝེཏི…པེ॰… སམྨཱཀམྨནྟཾ བྷཱཝེཏི…པེ॰… སམྨཱཨཱཛཱིཝཾ བྷཱཝེཏི…པེ॰… སམྨཱཝཱཡཱམཾ བྷཱཝེཏི…པེ॰… སམྨཱསཏིཾ བྷཱཝེཏི…པེ॰… སམྨཱསམཱདྷིཾ བྷཱཝེཏི ཝིཝེཀནིསྶིཏཾ ཝིརཱགནིསྶིཏཾ ནིརོདྷནིསྶིཏཾ ཝོསྶགྒཔརིཎཱམིཾ།
489. Tattha katamā sammādiṭṭhi? Idha bhikkhu sammādiṭṭhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ, sammāsaṅkappaṃ bhāveti…pe… sammāvācaṃ bhāveti…pe… sammākammantaṃ bhāveti…pe… sammāājīvaṃ bhāveti…pe… sammāvāyāmaṃ bhāveti…pe… sammāsatiṃ bhāveti…pe… sammāsamādhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ.
སུཏྟནྟབྷཱཛནཱིཡཾ།
Suttantabhājanīyaṃ.
༢. ཨབྷིདྷམྨབྷཱཛནཱིཡཾ
2. Abhidhammabhājanīyaṃ
༤༩༠. ཨཊྛངྒིཀོ མགྒོ – སམྨཱདིཊྛི, སམྨཱསངྐཔྤོ, སམྨཱཝཱཙཱ, སམྨཱཀམྨནྟོ, སམྨཱཨཱཛཱིཝོ, སམྨཱཝཱཡཱམོ, སམྨཱསཏི, སམྨཱསམཱདྷི།
490. Aṭṭhaṅgiko maggo – sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi.
༤༩༡. ཏཏྠ ཀཏམོ ཨཊྛངྒིཀོ མགྒོ? ཨིདྷ བྷིཀྑུ ཡསྨིཾ སམཡེ ལོཀུཏྟརཾ ཛྷཱནཾ བྷཱཝེཏི ནིཡྻཱནིཀཾ ཨཔཙཡགཱམིཾ དིཊྛིགཏཱནཾ པཧཱནཱཡ པཋམཱཡ བྷཱུམིཡཱ པཏྟིཡཱ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི དུཀྑཔཊིཔདཾ དནྡྷཱབྷིཉྙཾ, ཏསྨིཾ སམཡེ ཨཊྛངྒིཀོ མགྒོ ཧོཏི – སམྨཱདིཊྛི…པེ॰… སམྨཱསམཱདྷི།
491. Tattha katamo aṭṭhaṅgiko maggo? Idha bhikkhu yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, tasmiṃ samaye aṭṭhaṅgiko maggo hoti – sammādiṭṭhi…pe… sammāsamādhi.
༤༩༢. ཏཏྠ ཀཏམཱ སམྨཱདིཊྛི? ཡཱ པཉྙཱ པཛཱནནཱ…པེ॰… ཨམོཧོ དྷམྨཝིཙཡོ སམྨཱདིཊྛི དྷམྨཝིཙཡསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨཡཾ ཝུཙྩཏི ‘‘སམྨཱདིཊྛི’’།
492. Tattha katamā sammādiṭṭhi? Yā paññā pajānanā…pe… amoho dhammavicayo sammādiṭṭhi dhammavicayasambojjhaṅgo maggaṅgaṃ maggapariyāpannaṃ – ayaṃ vuccati ‘‘sammādiṭṭhi’’.
ཏཏྠ ཀཏམོ སམྨཱསངྐཔྤོ? ཡོ ཏཀྐོ ཝིཏཀྐོ སངྐཔྤོ ཨཔྤནཱ བྱཔྤནཱ ཙེཏསོ ཨབྷིནིརོཔནཱ སམྨཱསངྐཔྤོ མགྒངྒཾ མགྒཔརིཡཱཔནྣཾ – ཨཡཾ ཝུཙྩཏི ‘‘སམྨཱསངྐཔྤོ’’།
Tattha katamo sammāsaṅkappo? Yo takko vitakko saṅkappo appanā byappanā cetaso abhiniropanā sammāsaṅkappo maggaṅgaṃ maggapariyāpannaṃ – ayaṃ vuccati ‘‘sammāsaṅkappo’’.
ཏཏྠ ཀཏམཱ སམྨཱཝཱཙཱ? ཡཱ ཙཏཱུཧི ཝཙཱིདུཙྩརིཏེཧི ཨཱརཏི ཝིརཏི པཊིཝིརཏི ཝེརམཎཱི ཨཀིརིཡཱ ཨཀརཎཾ ཨནཛ྄ཛྷཱཔཏྟི ཝེལཱཨནཏིཀྐམོ སེཏུགྷཱཏོ སམྨཱཝཱཙཱ མགྒངྒཾ མགྒཔརིཡཱཔནྣཾ – ཨཡཾ ཝུཙྩཏི ‘‘སམྨཱཝཱཙཱ’’།
Tattha katamā sammāvācā? Yā catūhi vacīduccaritehi ārati virati paṭivirati veramaṇī akiriyā akaraṇaṃ anajjhāpatti velāanatikkamo setughāto sammāvācā maggaṅgaṃ maggapariyāpannaṃ – ayaṃ vuccati ‘‘sammāvācā’’.
ཏཏྠ ཀཏམོ སམྨཱཀམྨནྟོ? ཡཱ ཏཱིཧི ཀཱཡདུཙྩརིཏེཧི ཨཱརཏི ཝིརཏི པཊིཝིརཏི ཝེརམཎཱི ཨཀིརིཡཱ ཨཀརཎཾ ཨནཛ྄ཛྷཱཔཏྟི ཝེལཱཨནཏིཀྐམོ སེཏུགྷཱཏོ སམྨཱཀམྨནྟོ མགྒངྒཾ མགྒཔརིཡཱཔནྣཾ – ཨཡཾ ཝུཙྩཏི ‘‘སམྨཱཀམྨནྟོ’’།
Tattha katamo sammākammanto? Yā tīhi kāyaduccaritehi ārati virati paṭivirati veramaṇī akiriyā akaraṇaṃ anajjhāpatti velāanatikkamo setughāto sammākammanto maggaṅgaṃ maggapariyāpannaṃ – ayaṃ vuccati ‘‘sammākammanto’’.
ཏཏྠ ཀཏམོ སམྨཱཨཱཛཱིཝོ? ཡཱ མིཙྪཱཨཱཛཱིཝཱ ཨཱརཏི ཝིརཏི པཊིཝིརཏི ཝེརམཎཱི ཨཀིརིཡཱ ཨཀརཎཾ ཨནཛ྄ཛྷཱཔཏྟི ཝེལཱཨནཏིཀྐམོ སེཏུགྷཱཏོ སམྨཱཨཱཛཱིཝོ མགྒངྒཾ མགྒཔརིཡཱཔནྣཾ – ཨཡཾ ཝུཙྩཏི ‘‘སམྨཱཨཱཛཱིཝོ’’།
Tattha katamo sammāājīvo? Yā micchāājīvā ārati virati paṭivirati veramaṇī akiriyā akaraṇaṃ anajjhāpatti velāanatikkamo setughāto sammāājīvo maggaṅgaṃ maggapariyāpannaṃ – ayaṃ vuccati ‘‘sammāājīvo’’.
ཏཏྠ ཀཏམོ སམྨཱཝཱཡཱམོ? ཡོ ཙེཏསིཀོ ཝཱིརིཡཱརམྦྷོ…པེ॰… སམྨཱཝཱཡཱམོ ཝཱིརིཡསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨཡཾ ཝུཙྩཏི ‘‘སམྨཱཝཱཡཱམོ’’།
Tattha katamo sammāvāyāmo? Yo cetasiko vīriyārambho…pe… sammāvāyāmo vīriyasambojjhaṅgo maggaṅgaṃ maggapariyāpannaṃ – ayaṃ vuccati ‘‘sammāvāyāmo’’.
ཏཏྠ ཀཏམཱ སམྨཱསཏི? ཡཱ སཏི ཨནུསྶཏི…པེ॰… སམྨཱསཏི སཏིསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨཡཾ ཝུཙྩཏི ‘‘སམྨཱསཏི’’།
Tattha katamā sammāsati? Yā sati anussati…pe… sammāsati satisambojjhaṅgo maggaṅgaṃ maggapariyāpannaṃ – ayaṃ vuccati ‘‘sammāsati’’.
ཏཏྠ ཀཏམོ སམྨཱསམཱདྷི? ཡཱ ཙིཏྟསྶ ཋིཏི…པེ॰… སམྨཱསམཱདྷི སམཱདྷིསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨཡཾ ཝུཙྩཏི ‘‘སམྨཱསམཱདྷི’’། ཨཡཾ ཝུཙྩཏི ‘‘ཨཊྛངྒིཀོ མགྒོ’’། ཨཝསེསཱ དྷམྨཱ ཨཊྛངྒིཀེན མགྒེན སམྤཡུཏྟཱ།
Tattha katamo sammāsamādhi? Yā cittassa ṭhiti…pe… sammāsamādhi samādhisambojjhaṅgo maggaṅgaṃ maggapariyāpannaṃ – ayaṃ vuccati ‘‘sammāsamādhi’’. Ayaṃ vuccati ‘‘aṭṭhaṅgiko maggo’’. Avasesā dhammā aṭṭhaṅgikena maggena sampayuttā.
༤༩༣. པཉྩངྒིཀོ མགྒོ – སམྨཱདིཊྛི, སམྨཱསངྐཔྤོ, སམྨཱཝཱཡཱམོ, སམྨཱསཏི, སམྨཱསམཱདྷི།
493. Pañcaṅgiko maggo – sammādiṭṭhi, sammāsaṅkappo, sammāvāyāmo, sammāsati, sammāsamādhi.
༤༩༤. ཏཏྠ ཀཏམོ པཉྩངྒིཀོ མགྒོ? ཨིདྷ བྷིཀྑུ ཡསྨིཾ སམཡེ ལོཀུཏྟརཾ ཛྷཱནཾ བྷཱཝེཏི ནིཡྻཱནིཀཾ ཨཔཙཡགཱམིཾ དིཊྛིགཏཱནཾ པཧཱནཱཡ པཋམཱཡ བྷཱུམིཡཱ པཏྟིཡཱ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི དུཀྑཔཊིཔདཾ དནྡྷཱབྷིཉྙཾ, ཏསྨིཾ སམཡེ པཉྩངྒིཀོ མགྒོ ཧོཏི – སམྨཱདིཊྛི, སམྨཱསངྐཔྤོ, སམྨཱཝཱཡཱམོ, སམྨཱསཏི, སམྨཱསམཱདྷི།
494. Tattha katamo pañcaṅgiko maggo? Idha bhikkhu yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, tasmiṃ samaye pañcaṅgiko maggo hoti – sammādiṭṭhi, sammāsaṅkappo, sammāvāyāmo, sammāsati, sammāsamādhi.
༤༩༥. ཏཏྠ ཀཏམཱ སམྨཱདིཊྛི? ཡཱ པཉྙཱ པཛཱནནཱ…པེ॰… ཨམོཧོ དྷམྨཝིཙཡོ སམྨཱདིཊྛི དྷམྨཝིཙཡསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨཡཾ ཝུཙྩཏི ‘‘སམྨཱདིཊྛི’’།
495. Tattha katamā sammādiṭṭhi? Yā paññā pajānanā…pe… amoho dhammavicayo sammādiṭṭhi dhammavicayasambojjhaṅgo maggaṅgaṃ maggapariyāpannaṃ – ayaṃ vuccati ‘‘sammādiṭṭhi’’.
ཏཏྠ ཀཏམོ སམྨཱསངྐཔྤོ? ཡོ ཏཀྐོ ཝིཏཀྐོ…པེ॰… སམྨཱསངྐཔྤོ མགྒངྒཾ མགྒཔརིཡཱཔནྣཾ – ཨཡཾ ཝུཙྩཏི ‘‘སམྨཱསངྐཔྤོ’’།
Tattha katamo sammāsaṅkappo? Yo takko vitakko…pe… sammāsaṅkappo maggaṅgaṃ maggapariyāpannaṃ – ayaṃ vuccati ‘‘sammāsaṅkappo’’.
ཏཏྠ ཀཏམོ སམྨཱཝཱཡཱམོ? ཡོ ཙེཏསིཀོ ཝཱིརིཡཱརམྦྷོ…པེ॰… སམྨཱཝཱཡཱམོ ཝཱིརིཡསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨཡཾ ཝུཙྩཏི ‘‘སམྨཱཝཱཡཱམོ’’།
Tattha katamo sammāvāyāmo? Yo cetasiko vīriyārambho…pe… sammāvāyāmo vīriyasambojjhaṅgo maggaṅgaṃ maggapariyāpannaṃ – ayaṃ vuccati ‘‘sammāvāyāmo’’.
ཏཏྠ ཀཏམཱ སམྨཱསཏི? ཡཱ སཏི ཨནུསྶཏི…པེ॰… སམྨཱསཏི སཏིསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨཡཾ ཝུཙྩཏི ‘‘སམྨཱསཏི’’།
Tattha katamā sammāsati? Yā sati anussati…pe… sammāsati satisambojjhaṅgo maggaṅgaṃ maggapariyāpannaṃ – ayaṃ vuccati ‘‘sammāsati’’.
ཏཏྠ ཀཏམོ སམྨཱསམཱདྷི? ཡཱ ཙིཏྟསྶ ཋིཏི…པེ॰… སམྨཱསམཱདྷི སམཱདྷིསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨཡཾ ཝུཙྩཏི ‘‘སམྨཱསམཱདྷི’’། ཨཡཾ ཝུཙྩཏི ‘‘པཉྩངྒིཀོ མགྒོ’’། ཨཝསེསཱ དྷམྨཱ པཉྩངྒིཀེན མགྒེན སམྤཡུཏྟཱ།
Tattha katamo sammāsamādhi? Yā cittassa ṭhiti…pe… sammāsamādhi samādhisambojjhaṅgo maggaṅgaṃ maggapariyāpannaṃ – ayaṃ vuccati ‘‘sammāsamādhi’’. Ayaṃ vuccati ‘‘pañcaṅgiko maggo’’. Avasesā dhammā pañcaṅgikena maggena sampayuttā.
༤༩༦. པཉྩངྒིཀོ མགྒོ – སམྨཱདིཊྛི, སམྨཱསངྐཔྤོ, སམྨཱཝཱཡཱམོ, སམྨཱསཏི, སམྨཱསམཱདྷི།
496. Pañcaṅgiko maggo – sammādiṭṭhi, sammāsaṅkappo, sammāvāyāmo, sammāsati, sammāsamādhi.
༤༩༧. ཏཏྠ ཀཏམཱ སམྨཱདིཊྛི? ཨིདྷ བྷིཀྑུ ཡསྨིཾ སམཡེ ལོཀུཏྟརཾ ཛྷཱནཾ བྷཱཝེཏི ནིཡྻཱནིཀཾ ཨཔཙཡགཱམིཾ དིཊྛིགཏཱནཾ པཧཱནཱཡ པཋམཱཡ བྷཱུམིཡཱ པཏྟིཡཱ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི དུཀྑཔཊིཔདཾ དནྡྷཱབྷིཉྙཾ, ཡཱ ཏསྨིཾ སམཡེ པཉྙཱ པཛཱནནཱ…པེ॰… ཨམོཧོ དྷམྨཝིཙཡོ སམྨཱདིཊྛི དྷམྨཝིཙཡསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨཡཾ ཝུཙྩཏི ‘‘སམྨཱདིཊྛི’’། ཨཝསེསཱ དྷམྨཱ སམྨཱདིཊྛིཡཱ སམྤཡུཏྟཱ…པེ॰… ཨཝསེསཱ དྷམྨཱ སམྨཱསངྐཔྤེན སམྤཡུཏྟཱ…པེ॰… ཨཝསེསཱ དྷམྨཱ སམྨཱཝཱཡཱམེན སམྤཡུཏྟཱ…པེ॰… ཨཝསེསཱ དྷམྨཱ སམྨཱསཏིཡཱ སམྤཡུཏྟཱ།
497. Tattha katamā sammādiṭṭhi? Idha bhikkhu yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, yā tasmiṃ samaye paññā pajānanā…pe… amoho dhammavicayo sammādiṭṭhi dhammavicayasambojjhaṅgo maggaṅgaṃ maggapariyāpannaṃ – ayaṃ vuccati ‘‘sammādiṭṭhi’’. Avasesā dhammā sammādiṭṭhiyā sampayuttā…pe… avasesā dhammā sammāsaṅkappena sampayuttā…pe… avasesā dhammā sammāvāyāmena sampayuttā…pe… avasesā dhammā sammāsatiyā sampayuttā.
ཏཏྠ ཀཏམོ སམྨཱསམཱདྷི? ཨིདྷ བྷིཀྑུ ཡསྨིཾ སམཡེ ལོཀུཏྟརཾ ཛྷཱནཾ བྷཱཝེཏི ནིཡྻཱནིཀཾ ཨཔཙཡགཱམིཾ དིཊྛིགཏཱནཾ པཧཱནཱཡ པཋམཱཡ བྷཱུམིཡཱ པཏྟིཡཱ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི དུཀྑཔཊིཔདཾ དནྡྷཱབྷིཉྙཾ, ཡཱ ཏསྨིཾ སམཡེ ཙིཏྟསྶ ཋིཏི…པེ॰… སམྨཱསམཱདྷི སམཱདྷིསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨཡཾ ཝུཙྩཏི ‘‘སམྨཱསམཱདྷི’’། ཨཝསེསཱ དྷམྨཱ སམྨཱསམཱདྷིནཱ སམྤཡུཏྟཱ།
Tattha katamo sammāsamādhi? Idha bhikkhu yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, yā tasmiṃ samaye cittassa ṭhiti…pe… sammāsamādhi samādhisambojjhaṅgo maggaṅgaṃ maggapariyāpannaṃ – ayaṃ vuccati ‘‘sammāsamādhi’’. Avasesā dhammā sammāsamādhinā sampayuttā.
༤༩༨. ཨཊྛངྒིཀོ མགྒོ – སམྨཱདིཊྛི…པེ॰… སམྨཱསམཱདྷི།
498. Aṭṭhaṅgiko maggo – sammādiṭṭhi…pe… sammāsamādhi.
༤༩༩. ཏཏྠ ཀཏམོ ཨཊྛངྒིཀོ མགྒོ? ཨིདྷ བྷིཀྑུ ཡསྨིཾ སམཡེ ལོཀུཏྟརཾ ཛྷཱནཾ བྷཱཝེཏི ནིཡྻཱནིཀཾ ཨཔཙཡགཱམིཾ དིཊྛིགཏཱནཾ པཧཱནཱཡ པཋམཱཡ བྷཱུམིཡཱ པཏྟིཡཱ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི དུཀྑཔཊིཔདཾ དནྡྷཱབྷིཉྙཾ, ཏསྨིཾ སམཡེ ཕསྶོ ཧོཏི…པེ॰… ཨཝིཀྑེཔོ ཧོཏི། ཨིམེ དྷམྨཱ ཀུསལཱ། ཏསྶེཝ ལོཀུཏྟརསྶ ཀུསལསྶ ཛྷཱནསྶ ཀཏཏྟཱ བྷཱཝིཏཏྟཱ ཝིཔཱཀཾ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི དུཀྑཔཊིཔདཾ དནྡྷཱབྷིཉྙཾ སུཉྙཏཾ, ཏསྨིཾ སམཡེ ཨཊྛངྒིཀོ མགྒོ ཧོཏི – སམྨཱདིཊྛི…པེ॰… སམྨཱསམཱདྷི། ཨཡཾ ཝུཙྩཏི ‘‘ཨཊྛངྒིཀོ མགྒོ’’། ཨཝསེསཱ དྷམྨཱ ཨཊྛངྒིཀེན མགྒེན སམྤཡུཏྟཱ།
499. Tattha katamo aṭṭhaṅgiko maggo? Idha bhikkhu yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, tasmiṃ samaye phasso hoti…pe… avikkhepo hoti. Ime dhammā kusalā. Tasseva lokuttarassa kusalassa jhānassa katattā bhāvitattā vipākaṃ vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ suññataṃ, tasmiṃ samaye aṭṭhaṅgiko maggo hoti – sammādiṭṭhi…pe… sammāsamādhi. Ayaṃ vuccati ‘‘aṭṭhaṅgiko maggo’’. Avasesā dhammā aṭṭhaṅgikena maggena sampayuttā.
༥༠༠. པཉྩངྒིཀོ མགྒོ – སམྨཱདིཊྛི, སམྨཱསངྐཔྤོ, སམྨཱཝཱཡཱམོ, སམྨཱསཏི, སམྨཱསམཱདྷི།
500. Pañcaṅgiko maggo – sammādiṭṭhi, sammāsaṅkappo, sammāvāyāmo, sammāsati, sammāsamādhi.
༥༠༡. ཏཏྠ ཀཏམོ པཉྩངྒིཀོ མགྒོ? ཨིདྷ བྷིཀྑུ ཡསྨིཾ སམཡེ ལོཀུཏྟརཾ ཛྷཱནཾ བྷཱཝེཏི ནིཡྻཱནིཀཾ ཨཔཙཡགཱམིཾ དིཊྛིགཏཱནཾ པཧཱནཱཡ པཋམཱཡ བྷཱུམིཡཱ པཏྟིཡཱ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི དུཀྑཔཊིཔདཾ དནྡྷཱབྷིཉྙཾ, ཏསྨིཾ སམཡེ ཕསྶོ ཧོཏི…པེ॰… ཨཝིཀྑེཔོ ཧོཏི། ཨིམེ དྷམྨཱ ཀུསལཱ། ཏསྶེཝ ལོཀུཏྟརསྶ ཀུསལསྶ ཛྷཱནསྶ ཀཏཏྟཱ བྷཱཝིཏཏྟཱ ཝིཔཱཀཾ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི དུཀྑཔཊིཔདཾ དནྡྷཱབྷིཉྙཾ སུཉྙཏཾ, ཏསྨིཾ སམཡེ པཉྩངྒིཀོ མགྒོ ཧོཏི – སམྨཱདིཊྛི, སམྨཱསངྐཔྤོ, སམྨཱཝཱཡཱམོ, སམྨཱསཏི, སམྨཱསམཱདྷི། ཨཡཾ ཝུཙྩཏི ‘‘པཉྩངྒིཀོ མགྒོ’’། ཨཝསེསཱ དྷམྨཱ པཉྩངྒིཀེན མགྒེན སམྤཡུཏྟཱ།
501. Tattha katamo pañcaṅgiko maggo? Idha bhikkhu yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, tasmiṃ samaye phasso hoti…pe… avikkhepo hoti. Ime dhammā kusalā. Tasseva lokuttarassa kusalassa jhānassa katattā bhāvitattā vipākaṃ vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ suññataṃ, tasmiṃ samaye pañcaṅgiko maggo hoti – sammādiṭṭhi, sammāsaṅkappo, sammāvāyāmo, sammāsati, sammāsamādhi. Ayaṃ vuccati ‘‘pañcaṅgiko maggo’’. Avasesā dhammā pañcaṅgikena maggena sampayuttā.
༥༠༢. པཉྩངྒིཀོ མགྒོ – སམྨཱདིཊྛི, སམྨཱསངྐཔྤོ, སམྨཱཝཱཡཱམོ, སམྨཱསཏི, སམྨཱསམཱདྷི།
502. Pañcaṅgiko maggo – sammādiṭṭhi, sammāsaṅkappo, sammāvāyāmo, sammāsati, sammāsamādhi.
༥༠༣. ཏཏྠ ཀཏམཱ སམྨཱདིཊྛི? ཨིདྷ བྷིཀྑུ ཡསྨིཾ སམཡེ ལོཀུཏྟརཾ ཛྷཱནཾ བྷཱཝེཏི ནིཡྻཱནིཀཾ ཨཔཙཡགཱམིཾ དིཊྛིགཏཱནཾ པཧཱནཱཡ པཋམཱཡ བྷཱུམིཡཱ པཏྟིཡཱ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི དུཀྑཔཊིཔདཾ དནྡྷཱབྷིཉྙཾ, ཏསྨིཾ སམཡེ ཕསྶོ ཧོཏི…པེ॰… ཨཝིཀྑེཔོ ཧོཏི། ཨིམེ དྷམྨཱ ཀུསལཱ། ཏསྶེཝ ལོཀུཏྟརསྶ ཀུསལསྶ ཛྷཱནསྶ ཀཏཏྟཱ བྷཱཝིཏཏྟཱ ཝིཔཱཀཾ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི དུཀྑཔཊིཔདཾ དནྡྷཱབྷིཉྙཾ སུཉྙཏཾ, ཡཱ ཏསྨིཾ སམཡེ པཉྙཱ པཛཱནནཱ…པེ॰… ཨམོཧོ དྷམྨཝིཙཡོ སམྨཱདིཊྛི དྷམྨཝིཙཡསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨཡཾ ཝུཙྩཏི ‘‘སམྨཱདིཊྛི’’། ཨཝསེསཱ དྷམྨཱ སམྨཱདིཊྛིཡཱ སམྤཡུཏྟཱ…པེ॰… ཨཝསེསཱ དྷམྨཱ སམྨཱསངྐཔྤེན སམྤཡུཏྟཱ…པེ॰… ཨཝསེསཱ དྷམྨཱ སམྨཱཝཱཡཱམེན སམྤཡུཏྟཱ…པེ॰… ཨཝསེསཱ དྷམྨཱ སམྨཱསཏིཡཱ སམྤཡུཏྟཱ།
503. Tattha katamā sammādiṭṭhi? Idha bhikkhu yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, tasmiṃ samaye phasso hoti…pe… avikkhepo hoti. Ime dhammā kusalā. Tasseva lokuttarassa kusalassa jhānassa katattā bhāvitattā vipākaṃ vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ suññataṃ, yā tasmiṃ samaye paññā pajānanā…pe… amoho dhammavicayo sammādiṭṭhi dhammavicayasambojjhaṅgo maggaṅgaṃ maggapariyāpannaṃ – ayaṃ vuccati ‘‘sammādiṭṭhi’’. Avasesā dhammā sammādiṭṭhiyā sampayuttā…pe… avasesā dhammā sammāsaṅkappena sampayuttā…pe… avasesā dhammā sammāvāyāmena sampayuttā…pe… avasesā dhammā sammāsatiyā sampayuttā.
ཏཏྠ ཀཏམོ སམྨཱསམཱདྷི? ཨིདྷ བྷིཀྑུ ཡསྨིཾ སམཡེ ལོཀུཏྟརཾ ཛྷཱནཾ བྷཱཝེཏི ནིཡྻཱནིཀཾ ཨཔཙཡགཱམིཾ དིཊྛིགཏཱནཾ པཧཱནཱཡ པཋམཱཡ བྷཱུམིཡཱ པཏྟིཡཱ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི དུཀྑཔཊིཔདཾ དནྡྷཱབྷིཉྙཾ, ཏསྨིཾ སམཡེ ཕསྶོ ཧོཏི…པེ॰… ཨཝིཀྑེཔོ ཧོཏི། ཨིམེ དྷམྨཱ ཀུསལཱ། ཏསྶེཝ ལོཀུཏྟརསྶ ཀུསལསྶ ཛྷཱནསྶ ཀཏཏྟཱ བྷཱཝིཏཏྟཱ ཝིཔཱཀཾ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི དུཀྑཔཊིཔདཾ དནྡྷཱབྷིཉྙཾ སུཉྙཏཾ, ཡཱ ཏསྨིཾ སམཡེ ཙིཏྟསྶ ཋིཏི སཎྛིཏི ཨཝཊྛིཏི ཨཝིསཱཧཱརོ ཨཝིཀྑེཔོ ཨཝིསཱཧཊམཱནསཏཱ སམཐོ སམཱདྷིནྡྲིཡཾ སམཱདྷིབལཾ སམྨཱསམཱདྷི སམཱདྷིསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨཡཾ ཝུཙྩཏི ‘‘སམྨཱསམཱདྷི’’། ཨཝསེསཱ དྷམྨཱ སམྨཱསམཱདྷིནཱ སམྤཡུཏྟཱ།
Tattha katamo sammāsamādhi? Idha bhikkhu yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, tasmiṃ samaye phasso hoti…pe… avikkhepo hoti. Ime dhammā kusalā. Tasseva lokuttarassa kusalassa jhānassa katattā bhāvitattā vipākaṃ vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ suññataṃ, yā tasmiṃ samaye cittassa ṭhiti saṇṭhiti avaṭṭhiti avisāhāro avikkhepo avisāhaṭamānasatā samatho samādhindriyaṃ samādhibalaṃ sammāsamādhi samādhisambojjhaṅgo maggaṅgaṃ maggapariyāpannaṃ – ayaṃ vuccati ‘‘sammāsamādhi’’. Avasesā dhammā sammāsamādhinā sampayuttā.
ཨབྷིདྷམྨབྷཱཛནཱིཡཾ།
Abhidhammabhājanīyaṃ.
༣. པཉྷཱཔུཙྪཀཾ
3. Pañhāpucchakaṃ
༥༠༤. ཨརིཡོ ཨཊྛངྒིཀོ མགྒོ, སེཡྻཐིདཾ – སམྨཱདིཊྛི, སམྨཱསངྐཔྤོ, སམྨཱཝཱཙཱ, སམྨཱཀམྨནྟོ, སམྨཱཨཱཛཱིཝོ, སམྨཱཝཱཡཱམོ, སམྨཱསཏི, སམྨཱསམཱདྷི།
504. Ariyo aṭṭhaṅgiko maggo, seyyathidaṃ – sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi.
༥༠༥. ཨཊྛནྣཾ མགྒངྒཱནཾ ཀཏི ཀུསལཱ, ཀཏི ཨཀུསལཱ, ཀཏི ཨབྱཱཀཏཱ…པེ॰… ཀཏི སརཎཱ, ཀཏི ཨརཎཱ?
505. Aṭṭhannaṃ maggaṅgānaṃ kati kusalā, kati akusalā, kati abyākatā…pe… kati saraṇā, kati araṇā?
༡. ཏིཀཾ
1. Tikaṃ
༥༠༦. སིཡཱ ཀུསལཱ, སིཡཱ ཨབྱཱཀཏཱ། སམྨཱསངྐཔྤོ སུཁཱཡ ཝེདནཱཡ སམྤཡུཏྟོ; སཏྟ མགྒངྒཱ སིཡཱ སུཁཱཡ ཝེདནཱཡ སམྤཡུཏྟཱ , སིཡཱ ཨདུཀྑམསུཁཱཡ ཝེདནཱཡ སམྤཡུཏྟཱ། སིཡཱ ཝིཔཱཀཱ, སིཡཱ ཝིཔཱཀདྷམྨདྷམྨཱ། ཨནུཔཱདིནྣཨནུཔཱདཱནིཡཱ། ཨསཾཀིལིཊྛཨསཾཀིལེསིཀཱ། སམྨཱསངྐཔྤོ ཨཝིཏཀྐཝིཙཱརམཏྟོ; སཏྟ མགྒངྒཱ སིཡཱ སཝིཏཀྐསཝིཙཱརཱ, སིཡཱ ཨཝིཏཀྐཝིཙཱརམཏྟཱ, སིཡཱ ཨཝིཏཀྐཨཝིཙཱརཱ། སམྨཱསངྐཔྤོ པཱིཏིསཧགཏོ, སུཁསཧགཏོ, ན ཨུཔེཀྑཱསཧགཏོ; སཏྟ མགྒངྒཱ སིཡཱ པཱིཏིསཧགཏཱ, སིཡཱ སུཁསཧགཏཱ, སིཡཱ ཨུཔེཀྑཱསཧགཏཱ། ནེཝ དསྶནེན ན བྷཱཝནཱཡ པཧཱཏབྦཱ། ནེཝ དསྶནེན ན བྷཱཝནཱཡ པཧཱཏབྦཧེཏུཀཱ། སིཡཱ ཨཔཙཡགཱམིནོ, སིཡཱ ནེཝཱཙཡགཱམིནཱཔཙཡགཱམིནོ། སིཡཱ སེཀྑཱ, སིཡཱ ཨསེཀྑཱ། ཨཔྤམཱཎཱ། ཨཔྤམཱཎཱརམྨཎཱ། པཎཱིཏཱ། སིཡཱ སམྨཏྟནིཡཏཱ, སིཡཱ ཨནིཡཏཱ། ན མགྒཱརམྨཎཱ, སིཡཱ མགྒཧེཏུཀཱ, སིཡཱ མགྒཱདྷིཔཏིནོ; སིཡཱ ན ཝཏྟབྦཱ མགྒཧེཏུཀཱཏིཔི, མགྒཱདྷིཔཏིནོཏིཔི། སིཡཱ ཨུཔྤནྣཱ, སིཡཱ ཨནུཔྤནྣཱ, སིཡཱ ཨུཔྤཱདིནོ། སིཡཱ ཨཏཱིཏཱ, སིཡཱ ཨནཱགཏཱ, སིཡཱ པཙྩུཔྤནྣཱ། ན ཝཏྟབྦཱ ཨཏཱིཏཱརམྨཎཱཏིཔི, ཨནཱགཏཱརམྨཎཱཏིཔི, པཙྩུཔྤནྣཱརམྨཎཱཏིཔི། སིཡཱ ཨཛ྄ཛྷཏྟཱ, སིཡཱ བཧིདྡྷཱ, སིཡཱ ཨཛ྄ཛྷཏྟབཧིདྡྷཱ། བཧིདྡྷཱརམྨཎཱ། ཨནིདསྶནཨཔྤཊིགྷཱ།
506. Siyā kusalā, siyā abyākatā. Sammāsaṅkappo sukhāya vedanāya sampayutto; satta maggaṅgā siyā sukhāya vedanāya sampayuttā , siyā adukkhamasukhāya vedanāya sampayuttā. Siyā vipākā, siyā vipākadhammadhammā. Anupādinnaanupādāniyā. Asaṃkiliṭṭhaasaṃkilesikā. Sammāsaṅkappo avitakkavicāramatto; satta maggaṅgā siyā savitakkasavicārā, siyā avitakkavicāramattā, siyā avitakkaavicārā. Sammāsaṅkappo pītisahagato, sukhasahagato, na upekkhāsahagato; satta maggaṅgā siyā pītisahagatā, siyā sukhasahagatā, siyā upekkhāsahagatā. Neva dassanena na bhāvanāya pahātabbā. Neva dassanena na bhāvanāya pahātabbahetukā. Siyā apacayagāmino, siyā nevācayagāmināpacayagāmino. Siyā sekkhā, siyā asekkhā. Appamāṇā. Appamāṇārammaṇā. Paṇītā. Siyā sammattaniyatā, siyā aniyatā. Na maggārammaṇā, siyā maggahetukā, siyā maggādhipatino; siyā na vattabbā maggahetukātipi, maggādhipatinotipi. Siyā uppannā, siyā anuppannā, siyā uppādino. Siyā atītā, siyā anāgatā, siyā paccuppannā. Na vattabbā atītārammaṇātipi, anāgatārammaṇātipi, paccuppannārammaṇātipi. Siyā ajjhattā, siyā bahiddhā, siyā ajjhattabahiddhā. Bahiddhārammaṇā. Anidassanaappaṭighā.
༢. དུཀཾ
2. Dukaṃ
༥༠༧. སམྨཱདིཊྛི ཧེཏུ, སཏྟ མགྒངྒཱ ན ཧེཏཱུ། སཧེཏུཀཱ། ཧེཏུསམྤཡུཏྟཱ། སམྨཱདིཊྛི ཧེཏུ ཙེཝ སཧེཏུཀཱ ཙ, སཏྟ མགྒངྒཱ ན ཝཏྟབྦཱ ཧེཏཱུ ཙེཝ སཧེཏུཀཱ ཙཱཏི, སཧེཏུཀཱ ཙེཝ ན ཙ ཧེཏཱུ། སམྨཱདིཊྛི ཧེཏུ ཙེཝ ཧེཏུསམྤཡུཏྟཱ ཙ, སཏྟ མགྒངྒཱ ན ཝཏྟབྦཱ ཧེཏཱུ ཙེཝ ཧེཏུསམྤཡུཏྟཱ ཙཱཏི, ཧེཏུསམྤཡུཏྟཱ ཙེཝ ན ཙ ཧེཏཱུ། སཏྟ མགྒངྒཱ ན ཧེཏཱུ སཧེཏུཀཱ, སམྨཱདིཊྛི ན ཝཏྟབྦཱ ན ཧེཏུ སཧེཏུཀཱཏིཔི, ན ཧེཏུ ཨཧེཏུཀཱཏིཔི།
507. Sammādiṭṭhi hetu, satta maggaṅgā na hetū. Sahetukā. Hetusampayuttā. Sammādiṭṭhi hetu ceva sahetukā ca, satta maggaṅgā na vattabbā hetū ceva sahetukā cāti, sahetukā ceva na ca hetū. Sammādiṭṭhi hetu ceva hetusampayuttā ca, satta maggaṅgā na vattabbā hetū ceva hetusampayuttā cāti, hetusampayuttā ceva na ca hetū. Satta maggaṅgā na hetū sahetukā, sammādiṭṭhi na vattabbā na hetu sahetukātipi, na hetu ahetukātipi.
སཔྤཙྩཡཱ ། སངྑཏཱ། ཨནིདསྶནཱ། ཨཔྤཊིགྷཱ། ཨརཱུཔཱ། ལོཀུཏྟརཱ། ཀེནཙི ཝིཉྙེཡྻཱ, ཀེནཙི ན ཝིཉྙེཡྻཱ།
Sappaccayā . Saṅkhatā. Anidassanā. Appaṭighā. Arūpā. Lokuttarā. Kenaci viññeyyā, kenaci na viññeyyā.
ནོ ཨཱསཝཱ། ཨནཱསཝཱ། ཨཱསཝཝིཔྤཡུཏྟཱ། ན ཝཏྟབྦཱ ཨཱསཝཱ ཙེཝ སཱསཝཱ ཙཱཏིཔི, སཱསཝཱ ཙེཝ ནོ ཙ ཨཱསཝཱཏིཔི། ན ཝཏྟབྦཱ ཨཱསཝཱ ཙེཝ ཨཱསཝསམྤཡུཏྟཱ ཙཱཏིཔི, ཨཱསཝསམྤཡུཏྟཱ ཙེཝ ནོ ཙ ཨཱསཝཱཏིཔི། ཨཱསཝཝིཔྤཡུཏྟཱ། ཨནཱསཝཱ།
No āsavā. Anāsavā. Āsavavippayuttā. Na vattabbā āsavā ceva sāsavā cātipi, sāsavā ceva no ca āsavātipi. Na vattabbā āsavā ceva āsavasampayuttā cātipi, āsavasampayuttā ceva no ca āsavātipi. Āsavavippayuttā. Anāsavā.
ནོ སཾཡོཛནཱ…པེ॰… ནོ གནྠཱ…པེ॰… ནོ ཨོགྷཱ…པེ॰… ནོ ཡོགཱ…པེ॰… ནོ ནཱིཝརཎཱ…པེ॰… ནོ པརཱམཱསཱ…པེ॰… སཱརམྨཎཱ། ནོ ཙིཏྟཱ། ཙེཏསིཀཱ། ཙིཏྟསམྤཡུཏྟཱ། ཙིཏྟསཾསཊྛཱ། ཙིཏྟསམུཊྛཱནཱ། ཙིཏྟསཧབྷུནོ། ཙིཏྟཱནུཔརིཝཏྟིནོ། ཙིཏྟསཾསཊྛསམུཊྛཱནཱ། ཙིཏྟསཾསཊྛསམུཊྛཱནསཧབྷུནོ། ཙིཏྟསཾསཊྛསམུཊྛཱནཱནུཔརིཝཏྟིནོ། བཱཧིརཱ། ནོ ཨུཔཱདཱ། ཨནུཔཱདིནྣཱ།
No saṃyojanā…pe… no ganthā…pe… no oghā…pe… no yogā…pe… no nīvaraṇā…pe… no parāmāsā…pe… sārammaṇā. No cittā. Cetasikā. Cittasampayuttā. Cittasaṃsaṭṭhā. Cittasamuṭṭhānā. Cittasahabhuno. Cittānuparivattino. Cittasaṃsaṭṭhasamuṭṭhānā. Cittasaṃsaṭṭhasamuṭṭhānasahabhuno. Cittasaṃsaṭṭhasamuṭṭhānānuparivattino. Bāhirā. No upādā. Anupādinnā.
ནོ ཨུཔཱདཱནཱ…པེ॰… ནོ ཀིལེསཱ…པེ॰… ན དསྶནེན པཧཱཏབྦཱ། ན བྷཱཝནཱཡ པཧཱཏབྦཱ། ན དསྶནེན པཧཱཏབྦཧེཏུཀཱ། ན བྷཱཝནཱཡ པཧཱཏབྦཧེཏུཀཱ། སམྨཱསངྐཔྤོ ཨཝིཏཀྐོ, སཏྟ མགྒངྒཱ སིཡཱ སཝིཏཀྐཱ, སིཡཱ ཨཝིཏཀྐཱ། སམྨཱསངྐཔྤོ སཝིཙཱརོ, སཏྟ མགྒངྒཱ སིཡཱ སཝིཙཱརཱ, སིཡཱ ཨཝིཙཱརཱ། སམྨཱསངྐཔྤོ སཔྤཱིཏིཀོ , སཏྟ མགྒངྒཱ སིཡཱ སཔྤཱིཏིཀཱ, སིཡཱ ཨཔྤཱིཏིཀཱ། སམྨཱསངྐཔྤོ པཱིཏིསཧགཏོ, སཏྟ མགྒངྒཱ སིཡཱ པཱིཏིསཧགཏཱ, སིཡཱ ན པཱིཏིསཧགཏཱ། སམྨཱསངྐཔྤོ སུཁསཧགཏོ, སཏྟ མགྒངྒཱ སིཡཱ སུཁསཧགཏཱ, སིཡཱ ན སུཁསཧགཏཱ། སམྨཱསངྐཔྤོ ན ཨུཔེཀྑཱསཧགཏོ, སཏྟ མགྒངྒཱ སིཡཱ ཨུཔེཀྑཱསཧགཏཱ, སིཡཱ ན ཨུཔེཀྑཱསཧགཏཱ། ན ཀཱམཱཝཙརཱ། ན རཱུཔཱཝཙརཱ། ན ཨརཱུཔཱཝཙརཱ། ཨཔརིཡཱཔནྣཱ། སིཡཱ ནིཡྻཱནིཀཱ, སིཡཱ ཨནིཡྻཱནིཀཱ། སིཡཱ ནིཡཏཱ, སིཡཱ ཨནིཡཏཱ། ཨནུཏྟརཱ། ཨརཎཱཏི།
No upādānā…pe… no kilesā…pe… na dassanena pahātabbā. Na bhāvanāya pahātabbā. Na dassanena pahātabbahetukā. Na bhāvanāya pahātabbahetukā. Sammāsaṅkappo avitakko, satta maggaṅgā siyā savitakkā, siyā avitakkā. Sammāsaṅkappo savicāro, satta maggaṅgā siyā savicārā, siyā avicārā. Sammāsaṅkappo sappītiko , satta maggaṅgā siyā sappītikā, siyā appītikā. Sammāsaṅkappo pītisahagato, satta maggaṅgā siyā pītisahagatā, siyā na pītisahagatā. Sammāsaṅkappo sukhasahagato, satta maggaṅgā siyā sukhasahagatā, siyā na sukhasahagatā. Sammāsaṅkappo na upekkhāsahagato, satta maggaṅgā siyā upekkhāsahagatā, siyā na upekkhāsahagatā. Na kāmāvacarā. Na rūpāvacarā. Na arūpāvacarā. Apariyāpannā. Siyā niyyānikā, siyā aniyyānikā. Siyā niyatā, siyā aniyatā. Anuttarā. Araṇāti.
པཉྷཱཔུཙྪཀཾ།
Pañhāpucchakaṃ.
མགྒངྒཝིབྷངྒོ ནིཊྛིཏོ།
Maggaṅgavibhaṅgo niṭṭhito.
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / སམྨོཧཝིནོདནཱི-ཨཊྛཀཐཱ • Sammohavinodanī-aṭṭhakathā
༡. སུཏྟནྟབྷཱཛནཱིཡཝཎྞནཱ • 1. Suttantabhājanīyavaṇṇanā
༢. ཨབྷིདྷམྨབྷཱཛནཱིཡཝཎྞནཱ • 2. Abhidhammabhājanīyavaṇṇanā
༣. པཉྷཱཔུཙྪཀཝཎྞནཱ • 3. Pañhāpucchakavaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / ཝིབྷངྒ-མཱུལཊཱིཀཱ • Vibhaṅga-mūlaṭīkā / ༡༡. མགྒངྒཝིབྷངྒོ • 11. Maggaṅgavibhaṅgo
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / ཝིབྷངྒ-ཨནུཊཱིཀཱ • Vibhaṅga-anuṭīkā / ༡༡. མགྒངྒཝིབྷངྒོ • 11. Maggaṅgavibhaṅgo
