| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
8. மக்³க³ஸஞ்ஞகத்தே²ரஅபதா³னவண்ணனா
8. Maggasaññakattheraapadānavaṇṇanā
பது³முத்தரபு³த்³த⁴ஸ்ஸாதிஆதி³கங் ஆயஸ்மதோ மக்³க³ஸஞ்ஞகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ ததோ ஓரங் தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ஹிமவந்தே தே³வபுத்தோ ஹுத்வா நிப்³ப³த்தோ அரஞ்ஞங் க³ந்த்வா மக்³க³மூள்ஹானங் மக்³க³ங் க³வேஸந்தானங் தஸ்ஸ ஸாவகானங் போ⁴ஜெத்வா மக்³க³ங் ஆசிக்கி². ஸோ தேன புஞ்ஞேன தே³வமனுஸ்ஸஸம்பத்திமனுப⁴வித்வா உப்பன்னுப்பன்னப⁴வே ஸப்³ப³த்த² அமூள்ஹோ ஸஞ்ஞவா அஹோஸி. அத² இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ விஞ்ஞுதங் பத்தோ க⁴ராவாஸே அனல்லீனோ பப்³ப³ஜித்வா நசிரஸ்ஸேவ அரஹா அஹோஸி.
Padumuttarabuddhassātiādikaṃ āyasmato maggasaññakattherassa apadānaṃ. Ayampi purimabuddhesu katādhikāro tato oraṃ tattha tattha bhave vivaṭṭūpanissayāni puññāni upacinanto padumuttarassa bhagavato kāle himavante devaputto hutvā nibbatto araññaṃ gantvā maggamūḷhānaṃ maggaṃ gavesantānaṃ tassa sāvakānaṃ bhojetvā maggaṃ ācikkhi. So tena puññena devamanussasampattimanubhavitvā uppannuppannabhave sabbattha amūḷho saññavā ahosi. Atha imasmiṃ buddhuppāde kulagehe nibbatto viññutaṃ patto gharāvāse anallīno pabbajitvā nacirasseva arahā ahosi.
66. ஸோ அபரபா⁴கே³ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ பது³முத்தரபு³த்³த⁴ஸ்ஸாதிஆதி³மாஹ. ஸாவகா வனசாரினோதி ப⁴க³வதோ வுத்தவசனங் ஸம்மா ஆத³ரேன ஸுணந்தீதி ஸாவகா, அத² வா ப⁴க³வதோ தே³ஸனானுஸாரேன ஞாணங் பேஸெத்வா ஸத்³த⁴ம்மங் ஸுணந்தீதி ஸாவகா. வனசாரினோ வனே விசரணகா ஸாவகா விப்பனட்டா² மக்³க³மூள்ஹா மஹாஅரஞ்ஞே அந்தா⁴வ சக்கு²விரஹிதாவ அனுஸுய்யரே விசரந்தீதி ஸம்ப³ந்தோ⁴. ஸேஸங் ஸப்³ப³த்த² உத்தானமேவாதி.
66. So aparabhāge attano pubbakammaṃ saritvā somanassajāto pubbacaritāpadānaṃ pakāsento padumuttarabuddhassātiādimāha. Sāvakā vanacārinoti bhagavato vuttavacanaṃ sammā ādarena suṇantīti sāvakā, atha vā bhagavato desanānusārena ñāṇaṃ pesetvā saddhammaṃ suṇantīti sāvakā. Vanacārino vane vicaraṇakā sāvakā vippanaṭṭhā maggamūḷhā mahāaraññe andhāva cakkhuvirahitāva anusuyyare vicarantīti sambandho. Sesaṃ sabbattha uttānamevāti.
மக்³க³ஸஞ்ஞகத்தே²ரஅபதா³னவண்ணனா ஸமத்தா.
Maggasaññakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 8. மக்³க³ஸஞ்ஞகத்தே²ரஅபதா³னங் • 8. Maggasaññakattheraapadānaṃ
