| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၈. မဂ္ဂသညကတ္ထေရအပဒာနဝဏ္ဏနာ
8. Maggasaññakattheraapadānavaṇṇanā
ပဒုမုတ္တရဗုဒ္ဓသ္သာတိအာဒိကံ အာယသ္မတော မဂ္ဂသညကတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော တတော ဩရံ တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော ပဒုမုတ္တရသ္သ ဘဂဝတော ကာလေ ဟိမဝန္တေ ဒေဝပုတ္တော ဟုတ္ဝာ နိဗ္ဗတ္တော အရညံ ဂန္တ္ဝာ မဂ္ဂမူဠ္ဟာနံ မဂ္ဂံ ဂဝေသန္တာနံ တသ္သ သာဝကာနံ ဘောဇေတ္ဝာ မဂ္ဂံ အာစိက္ခိ။ သော တေန ပုညေန ဒေဝမနုသ္သသမ္ပတ္တိမနုဘဝိတ္ဝာ ဥပ္ပန္နုပ္ပန္နဘဝေ သဗ္ဗတ္ထ အမူဠ္ဟော သညဝာ အဟောသိ။ အထ ဣမသ္မိံ ဗုဒ္ဓုပ္ပာဒေ ကုလဂေဟေ နိဗ္ဗတ္တော ဝိညုတံ ပတ္တော ဃရာဝာသေ အနလ္လီနော ပဗ္ဗဇိတ္ဝာ နစိရသ္သေဝ အရဟာ အဟောသိ။
Padumuttarabuddhassātiādikaṃ āyasmato maggasaññakattherassa apadānaṃ. Ayampi purimabuddhesu katādhikāro tato oraṃ tattha tattha bhave vivaṭṭūpanissayāni puññāni upacinanto padumuttarassa bhagavato kāle himavante devaputto hutvā nibbatto araññaṃ gantvā maggamūḷhānaṃ maggaṃ gavesantānaṃ tassa sāvakānaṃ bhojetvā maggaṃ ācikkhi. So tena puññena devamanussasampattimanubhavitvā uppannuppannabhave sabbattha amūḷho saññavā ahosi. Atha imasmiṃ buddhuppāde kulagehe nibbatto viññutaṃ patto gharāvāse anallīno pabbajitvā nacirasseva arahā ahosi.
၆၆. သော အပရဘာဂေ အတ္တနော ပုဗ္ဗကမ္မံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော ပဒုမုတ္တရဗုဒ္ဓသ္သာတိအာဒိမာဟ။ သာဝကာ ဝနစာရိနောတိ ဘဂဝတော ဝုတ္တဝစနံ သမ္မာ အာဒရေန သုဏန္တီတိ သာဝကာ, အထ ဝာ ဘဂဝတော ဒေသနာနုသာရေန ဉာဏံ ပေသေတ္ဝာ သဒ္ဓမ္မံ သုဏန္တီတိ သာဝကာ။ ဝနစာရိနော ဝနေ ဝိစရဏကာ သာဝကာ ဝိပ္ပနဋ္ဌာ မဂ္ဂမူဠ္ဟာ မဟာအရညေ အန္ဓာဝ စက္ခုဝိရဟိတာဝ အနုသုယ္ယရေ ဝိစရန္တီတိ သမ္ဗန္ဓော။ သေသံ သဗ္ဗတ္ထ ဥတ္တာနမေဝာတိ။
66. So aparabhāge attano pubbakammaṃ saritvā somanassajāto pubbacaritāpadānaṃ pakāsento padumuttarabuddhassātiādimāha. Sāvakā vanacārinoti bhagavato vuttavacanaṃ sammā ādarena suṇantīti sāvakā, atha vā bhagavato desanānusārena ñāṇaṃ pesetvā saddhammaṃ suṇantīti sāvakā. Vanacārino vane vicaraṇakā sāvakā vippanaṭṭhā maggamūḷhā mahāaraññe andhāva cakkhuvirahitāva anusuyyare vicarantīti sambandho. Sesaṃ sabbattha uttānamevāti.
မဂ္ဂသညကတ္ထေရအပဒာနဝဏ္ဏနာ သမတ္တာ။
Maggasaññakattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၈. မဂ္ဂသညကတ္ထေရအပဒာနံ • 8. Maggasaññakattheraapadānaṃ
