| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೮. ಮಗ್ಗಸಞ್ಞಕತ್ಥೇರಅಪದಾನವಣ್ಣನಾ
8. Maggasaññakattheraapadānavaṇṇanā
ಪದುಮುತ್ತರಬುದ್ಧಸ್ಸಾತಿಆದಿಕಂ ಆಯಸ್ಮತೋ ಮಗ್ಗಸಞ್ಞಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತೋ ಓರಂ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಪದುಮುತ್ತರಸ್ಸ ಭಗವತೋ ಕಾಲೇ ಹಿಮವನ್ತೇ ದೇವಪುತ್ತೋ ಹುತ್ವಾ ನಿಬ್ಬತ್ತೋ ಅರಞ್ಞಂ ಗನ್ತ್ವಾ ಮಗ್ಗಮೂಳ್ಹಾನಂ ಮಗ್ಗಂ ಗವೇಸನ್ತಾನಂ ತಸ್ಸ ಸಾವಕಾನಂ ಭೋಜೇತ್ವಾ ಮಗ್ಗಂ ಆಚಿಕ್ಖಿ। ಸೋ ತೇನ ಪುಞ್ಞೇನ ದೇವಮನುಸ್ಸಸಮ್ಪತ್ತಿಮನುಭವಿತ್ವಾ ಉಪ್ಪನ್ನುಪ್ಪನ್ನಭವೇ ಸಬ್ಬತ್ಥ ಅಮೂಳ್ಹೋ ಸಞ್ಞವಾ ಅಹೋಸಿ। ಅಥ ಇಮಸ್ಮಿಂ ಬುದ್ಧುಪ್ಪಾದೇ ಕುಲಗೇಹೇ ನಿಬ್ಬತ್ತೋ ವಿಞ್ಞುತಂ ಪತ್ತೋ ಘರಾವಾಸೇ ಅನಲ್ಲೀನೋ ಪಬ್ಬಜಿತ್ವಾ ನಚಿರಸ್ಸೇವ ಅರಹಾ ಅಹೋಸಿ।
Padumuttarabuddhassātiādikaṃ āyasmato maggasaññakattherassa apadānaṃ. Ayampi purimabuddhesu katādhikāro tato oraṃ tattha tattha bhave vivaṭṭūpanissayāni puññāni upacinanto padumuttarassa bhagavato kāle himavante devaputto hutvā nibbatto araññaṃ gantvā maggamūḷhānaṃ maggaṃ gavesantānaṃ tassa sāvakānaṃ bhojetvā maggaṃ ācikkhi. So tena puññena devamanussasampattimanubhavitvā uppannuppannabhave sabbattha amūḷho saññavā ahosi. Atha imasmiṃ buddhuppāde kulagehe nibbatto viññutaṃ patto gharāvāse anallīno pabbajitvā nacirasseva arahā ahosi.
೬೬. ಸೋ ಅಪರಭಾಗೇ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಪದುಮುತ್ತರಬುದ್ಧಸ್ಸಾತಿಆದಿಮಾಹ। ಸಾವಕಾ ವನಚಾರಿನೋತಿ ಭಗವತೋ ವುತ್ತವಚನಂ ಸಮ್ಮಾ ಆದರೇನ ಸುಣನ್ತೀತಿ ಸಾವಕಾ, ಅಥ ವಾ ಭಗವತೋ ದೇಸನಾನುಸಾರೇನ ಞಾಣಂ ಪೇಸೇತ್ವಾ ಸದ್ಧಮ್ಮಂ ಸುಣನ್ತೀತಿ ಸಾವಕಾ। ವನಚಾರಿನೋ ವನೇ ವಿಚರಣಕಾ ಸಾವಕಾ ವಿಪ್ಪನಟ್ಠಾ ಮಗ್ಗಮೂಳ್ಹಾ ಮಹಾಅರಞ್ಞೇ ಅನ್ಧಾವ ಚಕ್ಖುವಿರಹಿತಾವ ಅನುಸುಯ್ಯರೇ ವಿಚರನ್ತೀತಿ ಸಮ್ಬನ್ಧೋ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।
66. So aparabhāge attano pubbakammaṃ saritvā somanassajāto pubbacaritāpadānaṃ pakāsento padumuttarabuddhassātiādimāha. Sāvakā vanacārinoti bhagavato vuttavacanaṃ sammā ādarena suṇantīti sāvakā, atha vā bhagavato desanānusārena ñāṇaṃ pesetvā saddhammaṃ suṇantīti sāvakā. Vanacārino vane vicaraṇakā sāvakā vippanaṭṭhā maggamūḷhā mahāaraññe andhāva cakkhuvirahitāva anusuyyare vicarantīti sambandho. Sesaṃ sabbattha uttānamevāti.
ಮಗ್ಗಸಞ್ಞಕತ್ಥೇರಅಪದಾನವಣ್ಣನಾ ಸಮತ್ತಾ।
Maggasaññakattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೮. ಮಗ್ಗಸಞ್ಞಕತ್ಥೇರಅಪದಾನಂ • 8. Maggasaññakattheraapadānaṃ
