| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
3. மக⁴தே³வஸுத்தவண்ணனா
3. Maghadevasuttavaṇṇanā
308. புப்³பே³ மக⁴தே³வோ நாம ராஜாதி அதீதகாலே இமஸ்மிங்யேவ கப்பே அனேகவஸ்ஸஸஹஸ்ஸாயுகேஸு மனுஸ்ஸேஸு படிபாடியா உப்பன்னானங் சதுராஸீதிஸஹஸ்ஸானங் சக்கவத்திராஜூனங் ஆதி³புரிஸோ மக⁴தே³வோதி ஏவங்னாமோ ராஜா.
308.Pubbemaghadevo nāma rājāti atītakāle imasmiṃyeva kappe anekavassasahassāyukesu manussesu paṭipāṭiyā uppannānaṃ caturāsītisahassānaṃ cakkavattirājūnaṃ ādipuriso maghadevoti evaṃnāmo rājā.
த⁴ம்மோதி ராஜத⁴ம்மோதி லோகிகா வத³ந்தி. மஹாபோ³தி⁴னிதா⁴னபாரமிதாஸங்கா²தோ பன த⁴ம்மோ அத்தீ²தி த⁴ம்மிகோ. த⁴ம்மேனாதி ஞாயேன. ததா³ ப்³ரஹ்மவிஹாராதி³பா⁴வனாத⁴ம்மஸ்ஸ ரஞ்ஞோ அனதி⁴க³தத்தா தஸ்ஸபி வா அனபி⁴ஜ்ஜா²தீ³ஹி ஸமானயோக³க்க²மத்தா வுத்தங் ‘‘த³ஸகுஸலகம்மபதே² டி²தோ’’தி. த⁴ம்மந்தி த⁴ம்மதோ அனபேதங். ததா² ஹி ச ஸோ பக்க²பாதாபா⁴வதோ ‘‘ஸமோ’’தி வுச்சதீதி ஆஹ ‘‘ஸமங் சரதீ’’தி. பகதினியாமேனேவாதி பவேணியா ஆக³தனியாமேனேவ. யஸ்மா நிக³மஜனபதே³ஸு யேபு⁴ய்யேன க³ஹபதீனங் ஸங்க³ஹோ, தஸ்மா அட்ட²கதா²யங் ‘‘க³ஹபதிகான’’ந்த்வேவ வுத்தங். பாளியங் பன அஞ்ஞமேவ நாக³ரசாரித்தங், அஞ்ஞங் நேக³மஜனபத³சாரித்தந்தி தே விஸுங் க³ஹிதா ‘‘நேக³மேஸு சேவ ஜனபதே³ஸு சா’’தி. பச்சுக்³க³மனநிக்³க³மனவஸேன உபோஸத²ஸ்ஸ படிஹரணங் பாடிஹாரியோ, ஸோ ஏவ பாடிஹாரிகோ, பக்கோ². இமே தி³வஸாதி இமே சத்தாரோ தி³வஸா.
Dhammoti rājadhammoti lokikā vadanti. Mahābodhinidhānapāramitāsaṅkhāto pana dhammo atthīti dhammiko. Dhammenāti ñāyena. Tadā brahmavihārādibhāvanādhammassa rañño anadhigatattā tassapi vā anabhijjhādīhi samānayogakkhamattā vuttaṃ ‘‘dasakusalakammapathe ṭhito’’ti. Dhammanti dhammato anapetaṃ. Tathā hi ca so pakkhapātābhāvato ‘‘samo’’ti vuccatīti āha ‘‘samaṃ caratī’’ti. Pakatiniyāmenevāti paveṇiyā āgataniyāmeneva. Yasmā nigamajanapadesu yebhuyyena gahapatīnaṃ saṅgaho, tasmā aṭṭhakathāyaṃ ‘‘gahapatikāna’’ntveva vuttaṃ. Pāḷiyaṃ pana aññameva nāgaracārittaṃ, aññaṃ negamajanapadacārittanti te visuṃ gahitā ‘‘negamesu ceva janapadesu cā’’ti. Paccuggamananiggamanavasena uposathassa paṭiharaṇaṃ pāṭihāriyo, so eva pāṭihāriko, pakkho. Ime divasāti ime cattāro divasā.
309. தே³வோதி மச்சு அபி⁴ப⁴வனட்டே²ன. யதா² ஹி தே³வோ பகதிஸத்தே அபி⁴ப⁴வதி, ஏவங் மச்சு ஸத்தே அபி⁴ப⁴வதி. ‘‘அஹங் அஸுகங் மத்³தி³துங் ஆக³மிஸ்ஸாமி, த்வங் தஸ்ஸ கேஸே க³ஹெத்வா மா விஸ்ஸஜ்ஜேஹீ’’தி மச்சுதே³வஸ்ஸ ஆணாகரா தூ³தா வியாதி தூ³தாதி வுச்சந்தி. அலங்கதபடியத்தாயாதி இத³ங் அத்தனோ தி³ப்³பா³னுபா⁴வங் ஆவிகத்வா டி²தாயாதி த³ஸ்ஸேதுங் வுத்தங். தே³வதாப்³யாகரணஸதி³ஸமேவ ஹோதி ந சிரேனேவ மரணஸம்ப⁴வதோ. விஸுத்³தி⁴தே³வானந்தி கீ²ணாஸவப்³ரஹ்மானங். தே ஹி சரிமப⁴வே போ³தி⁴ஸத்தானங் ஜிண்ணாதி³கே த³ஸ்ஸெந்தி.
309.Devoti maccu abhibhavanaṭṭhena. Yathā hi devo pakatisatte abhibhavati, evaṃ maccu satte abhibhavati. ‘‘Ahaṃ asukaṃ maddituṃ āgamissāmi, tvaṃ tassa kese gahetvā mā vissajjehī’’ti maccudevassa āṇākarā dūtā viyāti dūtāti vuccanti. Alaṅkatapaṭiyattāyāti idaṃ attano dibbānubhāvaṃ āvikatvā ṭhitāyāti dassetuṃ vuttaṃ. Devatābyākaraṇasadisameva hoti na cireneva maraṇasambhavato. Visuddhidevānanti khīṇāsavabrahmānaṃ. Te hi carimabhave bodhisattānaṃ jiṇṇādike dassenti.
து³கி²தஞ்ச ப்³யாதி⁴தந்தி ப்³யாதி⁴பா⁴வேன ஸஞ்ஜாதது³க்க²ந்தி அத்தோ². அந்திமப⁴விகபோ³தி⁴ஸத்தானங் விஸுத்³தி⁴தே³வேஹி உபட்டா²பிதபா⁴வங் உபாதா³ய தத³ஞ்ஞேஸங் தேஹி அனுபட்டா²பிதானம்பி பண்டி³தானங் ததா² வோஹரிதப்³ப³தா பரியாயஸித்³தா⁴தி ஆஹ ‘‘இமினா பரியாயேனா’’தி.
Dukhitañca byādhitanti byādhibhāvena sañjātadukkhanti attho. Antimabhavikabodhisattānaṃ visuddhidevehi upaṭṭhāpitabhāvaṃ upādāya tadaññesaṃ tehi anupaṭṭhāpitānampi paṇḍitānaṃ tathā voharitabbatā pariyāyasiddhāti āha ‘‘iminā pariyāyenā’’ti.
தி³ஸம்பதீதி விப⁴த்திஅலோபேன நித்³தே³ஸோ, தி³ஸாஸீஸேன தே³ஸா வுத்தாதி தே³ஸானங் அதி⁴பதிராஜாதி அத்தோ². உத்தமங்கே³ ஸிரஸி ருஹந்தீதி உத்தமங்க³ருஹா, கேஸா. தே பனெத்த² யஸ்மா பலிதத்தா அவிஸேஸதோ ஸப்³ப³பச்சி²மவயஸந்த³ஸ்ஸகா ஹொந்தி, தஸ்மா ‘‘வயோஹரா’’தி வுத்தா.
Disampatīti vibhattialopena niddeso, disāsīsena desā vuttāti desānaṃ adhipatirājāti attho. Uttamaṅge sirasi ruhantīti uttamaṅgaruhā, kesā. Te panettha yasmā palitattā avisesato sabbapacchimavayasandassakā honti, tasmā ‘‘vayoharā’’ti vuttā.
புரிஸயுகோ³ யஸ்மா தஸ்மிங் வங்ஸே ஸஞ்ஜாதபுரிஸட்டி²தியா பரிச்சி²ன்னோ, தஸ்மா ஆஹ ‘‘வங்ஸஸம்ப⁴வே புரிஸே’’தி. ராஜகே³ஹதோ ஆஹடபி⁴க்கா²ய யாபெந்தோதி இமினா குமாரகபப்³ப³ஜ்ஜாய உபக³தபா⁴வங் த³ஸ்ஸேதி.
Purisayugo yasmā tasmiṃ vaṃse sañjātapurisaṭṭhitiyā paricchinno, tasmā āha ‘‘vaṃsasambhave purise’’ti. Rājagehato āhaṭabhikkhāya yāpentoti iminā kumārakapabbajjāya upagatabhāvaṃ dasseti.
பரிஹரியமானோவாதி அஞ்ஞேன அஞ்ஞேன பரிஹரியமானோ விய வேலாய வேலாய தேன மஹதா பரிஜனேன உபட்டி²யமானோ குமாரகீளங் கீளீதி அத்தோ². கேசி பன ‘‘பரிஹரியமானோ ஏவா’’தி அவதா⁴ரணவஸேன அத்த²ங் வத³ந்தி, ததா² ஸதி சதுராஸீதிவஸ்ஸஸஹஸ்ஸானி த²ஞ்ஞபாயீ தருணதா³ரகோ அஹோஸீதி ஆபஜ்ஜதீதி தத³யுத்தங். குமாரகாலங் வத்வா தத³னந்தரங் ஓபரஜ்ஜவசனதோ விருத்³த⁴ஞ்சேதங். (பஞ்சமங்க³லவசனேன உன்னங்க³லமங்க³லஉக்கந்தனமங்க³லகம்மஹாயமங்க³லது³ஸ்ஸமங்க³லானி ஸமுபக³தானி ஏவ அஹேஸுந்தி த³ட்ட²ப்³ப³ங்).
Parihariyamānovāti aññena aññena parihariyamāno viya velāya velāya tena mahatā parijanena upaṭṭhiyamāno kumārakīḷaṃ kīḷīti attho. Keci pana ‘‘parihariyamāno evā’’ti avadhāraṇavasena atthaṃ vadanti, tathā sati caturāsītivassasahassāni thaññapāyī taruṇadārako ahosīti āpajjatīti tadayuttaṃ. Kumārakālaṃ vatvā tadanantaraṃ oparajjavacanato viruddhañcetaṃ. (Pañcamaṅgalavacanena unnaṅgalamaṅgalaukkantanamaṅgalakammahāyamaṅgaladussamaṅgalāni samupagatāni eva ahesunti daṭṭhabbaṃ).
311. ஸவங்ஸவஸேன ஆக³தா புத்தனத்துஆத³யோ புத்தா ச பபுத்தா ச ஏதிஸ்ஸாதி புத்தபபுத்தகா பரம்பரா. நிஹதந்தி நிஹிதங் ட²பிதங், பவத்திதந்தி அத்தோ². நிஹதந்தி வா ஸததங் பதிட்டி²தபா⁴வேன வளஞ்ஜிதந்தி அத்தோ². தேனாஹ ‘‘கல்யாணவத்த’’ந்தி. அதிரேகதரா த்³வே கு³ணாதி மஹாஸத்தஸ்ஸ மக⁴தே³வகாலதோ அதிரேகதரா த்³வே கு³ணா இதரராஜூஹி பன அதிரேகதரா அனேகஸதஸஹஸ்ஸப்பபே⁴தா³ ஏவ கு³ணா அஹேஸுந்தி.
311. Savaṃsavasena āgatā puttanattuādayo puttā ca paputtā ca etissāti puttapaputtakā paramparā. Nihatanti nihitaṃ ṭhapitaṃ, pavattitanti attho. Nihatanti vā satataṃ patiṭṭhitabhāvena vaḷañjitanti attho. Tenāha ‘‘kalyāṇavatta’’nti. Atirekatarā dve guṇāti mahāsattassa maghadevakālato atirekatarā dve guṇā itararājūhi pana atirekatarā anekasatasahassappabhedā eva guṇā ahesunti.
312. தெத்திங்ஸ ஸஹபுஞ்ஞகாரினோ எத்த² நிப்³ப³த்தாதி தங்ஸஹசரிதட்டா²னங் தெத்திங்ஸங், ததே³வ தாவதிங்ஸங், தங்னிவாஸோ ஏதேஸந்தி தாவதிங்ஸா. நிவாஸபா⁴வோ ச தேஸங் தத்த² நிப்³ப³த்தனபுப்³ப³கோதி ஆஹ – ‘‘தே³வானங் தாவதிங்ஸானந்தி தாவதிங்ஸப⁴வனே நிப்³ப³த்ததே³வான’’ந்தி. ரஞ்ஞோதி நிமிமஹாராஜஸ்ஸ. ஓவாதே³ ட²த்வாதி ‘‘ஸீலங் அரக்க²ந்தோ மம ஸந்திகங் மா ஆக³ச்ச²தூ’’தி நிக்³க³ண்ஹனவஸேனபி, ‘‘ஏகந்ததோ மம விஜிதே வஸந்தேன ஸீலங் ரக்கி²தப்³ப³’’ந்தி ஏவங் பவத்திதஓவாத³வஸேனபி ஓவாதே³ ட²த்வா.
312. Tettiṃsa sahapuññakārino ettha nibbattāti taṃsahacaritaṭṭhānaṃ tettiṃsaṃ, tadeva tāvatiṃsaṃ, taṃnivāso etesanti tāvatiṃsā. Nivāsabhāvo ca tesaṃ tattha nibbattanapubbakoti āha – ‘‘devānaṃ tāvatiṃsānanti tāvatiṃsabhavane nibbattadevāna’’nti. Raññoti nimimahārājassa. Ovāde ṭhatvāti ‘‘sīlaṃ arakkhanto mama santikaṃ mā āgacchatū’’ti niggaṇhanavasenapi, ‘‘ekantato mama vijite vasantena sīlaṃ rakkhitabba’’nti evaṃ pavattitaovādavasenapi ovāde ṭhatvā.
அத² நந்தி மஹாஜுதிகங் மஹாவிப்பா²ரங் மஹானுபா⁴வங் நிமிராஜானங். ‘‘ஸக்கோஹமஸ்மி தே³விந்தோ³, தவ ஸந்திகமாக³தோ’’தி அத்தனோ ஸக்கபா⁴வங் பவேதெ³த்வா ‘‘கங்க²ங் தே படிவினோதெ³ஸ்ஸாமீ’’தி ஆஹ. தேனாஹ ‘‘ஸப்³ப³பூ⁴தானமிஸ்ஸரா’’திஆதி³.
Athananti mahājutikaṃ mahāvipphāraṃ mahānubhāvaṃ nimirājānaṃ. ‘‘Sakkohamasmi devindo, tava santikamāgato’’ti attano sakkabhāvaṃ pavedetvā ‘‘kaṅkhaṃ te paṭivinodessāmī’’ti āha. Tenāha ‘‘sabbabhūtānamissarā’’tiādi.
ஸீலங் உபாதா³ய ஓமகதாய ‘‘கி’’ந்தி ஹீளெந்தோ வத³தி. கு³ணவிஸிட்ட²தாயாதி லாப⁴யஸாதீ³னஞ்சேவ பியமனாபதாதீ³னஞ்ச ஆஸவக்க²யபரியோஸானானங் நிமித்தபா⁴வேன உத்தமகு³ணதாய. ததா³ ஸக்கோ அனுருத்³த⁴த்தே²ரோ, ஸோ அத்தனோ புரிமஜாதியங் பச்சக்க²ஸித்³த⁴ங்வ தா³னதோ ஸீலங் மஹந்தங் விபா⁴வெந்தோ ‘‘அஹஞ்ஹீ’’திஆதி³மாஹ. தத்த² அத்தனா வஸியமானங் காமாவசரதே³வலோகங் ஸந்தா⁴ய ‘‘பெத்திவிஸயதோ’’தி வுத்தங். தஸ்ஸ ஹி கப்பஸதஸஹஸ்ஸங் விவட்டஜ்ஜா²ஸயஸ்ஸ பூரிதபாரமிஸ்ஸ தே³வலோகோ பேதலோகோ விய உபட்டா²ஸி. தேனேவாஹ ‘‘அச்ச²ராக³ணஸங்கு⁴ட்ட²ங், பிஸாசக³ணஸேவித’’ந்தி (ஸங்॰ நி॰ 1.46).
Sīlaṃ upādāya omakatāya ‘‘ki’’nti hīḷento vadati. Guṇavisiṭṭhatāyāti lābhayasādīnañceva piyamanāpatādīnañca āsavakkhayapariyosānānaṃ nimittabhāvena uttamaguṇatāya. Tadā sakko anuruddhatthero, so attano purimajātiyaṃ paccakkhasiddhaṃva dānato sīlaṃ mahantaṃ vibhāvento ‘‘ahañhī’’tiādimāha. Tattha attanā vasiyamānaṃ kāmāvacaradevalokaṃ sandhāya ‘‘pettivisayato’’ti vuttaṃ. Tassa hi kappasatasahassaṃ vivaṭṭajjhāsayassa pūritapāramissa devaloko petaloko viya upaṭṭhāsi. Tenevāha ‘‘accharāgaṇasaṅghuṭṭhaṃ, pisācagaṇasevita’’nti (saṃ. ni. 1.46).
க²த்தியேதி க²த்தியஜாதியங். விஸுஜ்ஜ²தீதி ப்³ரஹ்மலோகூபபத்திங் ஸந்தா⁴ய வத³தி காமஸங்கிலேஸவிஸுஜ்ஜ²னதோ. காயாதி ச ப்³ரஹ்மகாயமாஹ.
Khattiyeti khattiyajātiyaṃ. Visujjhatīti brahmalokūpapattiṃ sandhāya vadati kāmasaṃkilesavisujjhanato. Kāyāti ca brahmakāyamāha.
இமஸ்ஸ மம அதி³ட்ட²புப்³ப³ரூபங் தி³ஸ்வா ‘‘அஹுதே³வ ப⁴ய’’ந்தி சிந்தெத்வா ஆஹ ‘‘அவிகம்பமானோ’’தி. பா⁴யந்தோ ஹி சித்தஸ்ஸ அஞ்ஞத²த்தேன காயஸ்ஸ ச ச²ம்பி⁴தத்தேன விகம்பதி நாம. தேனாஹ ‘‘அபா⁴யமானோ’’தி. ஸுக²ங் கதே²துங் ஹோதீதி புஞ்ஞப²லங் கதே²துங் ஸுக²ங் ஹோதி.
Imassa mama adiṭṭhapubbarūpaṃ disvā ‘‘ahudeva bhaya’’nti cintetvā āha ‘‘avikampamāno’’ti. Bhāyanto hi cittassa aññathattena kāyassa ca chambhitattena vikampati nāma. Tenāha ‘‘abhāyamāno’’ti. Sukhaṃ kathetuṃ hotīti puññaphalaṃ kathetuṃ sukhaṃ hoti.
313. மனங் ஆக³ம்ம யுத்தாயேவ ஹொந்தீதி மாதலிஸ்ஸ ஸக்கஸ்ஸேவ சித்தங் ஜானித்வா யுத்தா விய ஹொந்தி, ரதே² யுத்தஆஜானீயகிச்சங் கரொந்தி தே³வபுத்தா. ஏவங் தாதி³ஸே காலே ததா² படிபஜ்ஜந்தி, யதா² ஏராவணோ தே³வபுத்தோ ஹத்தி²கிச்சங். நத்³தி⁴தோ பட்டா²யாதி ரத²பஞ்ஜரபரியந்தேன அக்க²ஸ்ஸ ஸம்ப³ந்த⁴ட்டா²னங் நத்³தீ⁴, ததோ பட்டா²ய. அக்கோ² ப³ஜ்ஜ²தி எத்தா²தி அக்க²ப³த்³தோ⁴, அக்கே²ன ரத²ஸ்ஸ ப³த்³த⁴ட்டா²னங். யதா² தே³வலோகதோ யாவ சந்த³மண்ட³லஸ்ஸ க³மனவீதி², தாவ அத்தனோ ஆனுபா⁴வேன ஹெட்டா²முக²மேவ ரத²ங் பேஸேஸி, ஏவங் சந்த³மண்ட³லஸ்ஸ க³மனவீதி²தோ யாவ ரஞ்ஞோ பாஸாதோ³, தாவ ததே²வ பேஸேஸி. த்³வே மக்³கே³ த³ஸ்ஸெத்வாதி பதோத³லட்டி²யா ஆகாஸங் விலிக²ந்தோ விய அத்தனோ ஆனுபா⁴வேன நிரயகா³மீ தே³வலோககா³மீ சாதி த்³வே மக்³கே³ த³ஸ்ஸெத்வா. கதமேனாதிஆதி³ தே³ஸனாமத்தங், யதா² தேன ரதே²ன க³ச்ச²ந்தஸ்ஸ நிரயோ தே³வலோகோ ச பாகடா ஹொந்தி, ததா² கரணங் அதி⁴ப்பேதங்.
313.Manaṃ āgamma yuttāyeva hontīti mātalissa sakkasseva cittaṃ jānitvā yuttā viya honti, rathe yuttaājānīyakiccaṃ karonti devaputtā. Evaṃ tādise kāle tathā paṭipajjanti, yathā erāvaṇo devaputto hatthikiccaṃ. Naddhito paṭṭhāyāti rathapañjarapariyantena akkhassa sambandhaṭṭhānaṃ naddhī, tato paṭṭhāya. Akkho bajjhati etthāti akkhabaddho, akkhena rathassa baddhaṭṭhānaṃ. Yathā devalokato yāva candamaṇḍalassa gamanavīthi, tāva attano ānubhāvena heṭṭhāmukhameva rathaṃ pesesi, evaṃ candamaṇḍalassa gamanavīthito yāva rañño pāsādo, tāva tatheva pesesi. Dve magge dassetvāti patodalaṭṭhiyā ākāsaṃ vilikhanto viya attano ānubhāvena nirayagāmī devalokagāmī cāti dve magge dassetvā. Katamenātiādi desanāmattaṃ, yathā tena rathena gacchantassa nirayo devaloko ca pākaṭā honti, tathā karaṇaṃ adhippetaṃ.
வுத்தகாரணமேவ ஸந்தா⁴யாஹ மஹாஸத்தோ ‘‘உப⁴யேனேவ மங் மாதலி நேஹீ’’தி. து³க்³க³ந்தி து³க்³க³மங். வெத்தரணிந்தி ஏவங்னாமகங் நிரயங். குதி²தந்தி பக்குதி²தங் நிபக்கதேலஸதி³ஸஜாலங். கா²ரஸங்யுத்தந்தி கா²ரோத³கஸதி³ஸங்.
Vuttakāraṇameva sandhāyāha mahāsatto ‘‘ubhayeneva maṃ mātali nehī’’ti. Dugganti duggamaṃ. Vettaraṇinti evaṃnāmakaṃ nirayaṃ. Kuthitanti pakkuthitaṃ nipakkatelasadisajālaṃ. Khārasaṃyuttanti khārodakasadisaṃ.
ரத²ங் நிவத்தெத்வாதி நிரயாபி⁴முக²தோ நிவத்தெத்வா. பீ³ரணீதே³வதீ⁴தாயாதி ‘‘பீ³ரணீ’’தி ஏவங்னாமிகாய அச்ச²ராய. ஸோணதி³ன்னதே³வபுத்தஸ்ஸாதி ‘‘ஸோணதி³ன்னோ’’தி ஏவங்னாமகஸ்ஸ தே³வபுத்தஸ்ஸ. க³ணதே³வபுத்தானந்தி க³ணவஸேன புஞ்ஞங் கத்வா க³ணவஸேனேவ நிப்³ப³த்ததே³வபுத்தானங்.
Rathaṃ nivattetvāti nirayābhimukhato nivattetvā. Bīraṇīdevadhītāyāti ‘‘bīraṇī’’ti evaṃnāmikāya accharāya. Soṇadinnadevaputtassāti ‘‘soṇadinno’’ti evaṃnāmakassa devaputtassa. Gaṇadevaputtānanti gaṇavasena puññaṃ katvā gaṇavaseneva nibbattadevaputtānaṃ.
பத்தகாலேதி உபகட்டா²ய வேலாய. அதிதி²ந்தி பச்சேகஸம்பு³த்³த⁴ங். கஸ்ஸபஸ்ஸ ப⁴க³வதோ ஸாஸனே ஏகங் கீ²ணாஸவத்தே²ரந்திபி வத³ந்தி. மாதாவ புத்தங் ஸகிமாபி⁴னந்தீ³தி யதா² பவாஸதோ ஆக³தங் புத்தங் மாதா ஸகிங் ஏகவாரங் ஆக³தகாலே அபி⁴னந்த³தி, ததா² நிச்சகாலே அபி⁴னந்தி³ ஸக்கச்சங் பரிவிஸி. ஸங்யமா ஸங்விபா⁴கா³தி ஸீலஸங்யமா ஸங்விபா⁴க³ஸீலா. ஜாதகேதி நிமிஜாதகே.
Pattakāleti upakaṭṭhāya velāya. Atithinti paccekasambuddhaṃ. Kassapassa bhagavato sāsane ekaṃ khīṇāsavattherantipi vadanti. Mātāva puttaṃ sakimābhinandīti yathā pavāsato āgataṃ puttaṃ mātā sakiṃ ekavāraṃ āgatakāle abhinandati, tathā niccakāle abhinandi sakkaccaṃ parivisi. Saṃyamā saṃvibhāgāti sīlasaṃyamā saṃvibhāgasīlā. Jātaketi nimijātake.
சித்தகூடந்தி தே³வனக³ரஸ்ஸ த³க்கி²ணதி³ஸாய த்³வாரகொட்ட²கங். ஸக்கோ சித்தங் ஸந்தா⁴ரேதுங் அஸக்கொந்தோதி மஹாஸத்தே பவத்தங் தே³வதானங் ஸக்காரஸம்மானங் படிச்ச உப்பன்னங் அத்தனோ உஸூயசித்தங் ப³ஹி அனாவிகத்வா அப்³ப⁴ந்தரேயேவ ச நங் ட²பேதுங் அஸக்கொந்தோ. அஞ்ஞேஸங் புஞ்ஞேன வஸாஹீதி ஸக்கஸ்ஸ மஹாஸத்தங் ரோஸேதுகாமதாய ஆராத⁴னங் நித³ஸ்ஸேதி. புராணஸக்கோ தீ³கா⁴யுகோ, தங் உபாதா³ய ஜராஜிண்ணங் விய கத்வா ‘‘ஜரஸக்கோ’’தி வுத்தங்.
Cittakūṭanti devanagarassa dakkhiṇadisāya dvārakoṭṭhakaṃ. Sakko cittaṃ sandhāretuṃ asakkontoti mahāsatte pavattaṃ devatānaṃ sakkārasammānaṃ paṭicca uppannaṃ attano usūyacittaṃ bahi anāvikatvā abbhantareyeva ca naṃ ṭhapetuṃ asakkonto. Aññesaṃ puññena vasāhīti sakkassa mahāsattaṃ rosetukāmatāya ārādhanaṃ nidasseti. Purāṇasakko dīghāyuko, taṃ upādāya jarājiṇṇaṃ viya katvā ‘‘jarasakko’’ti vuttaṃ.
315. ஸேஸங் ஸப்³ப³ந்தி பப்³ப³ஜ்ஜுபக³மனா ஸேஸங் அத்தனோ வங்ஸே போராணராஜூனங் ராஜசாரித்தங். பாகதிகந்தி புன ஸபா⁴வத்தமேவ க³தோ அஹோஸி, அபப்³ப³ஜிதபா⁴வவசனேனேவஸ்ஸ ப்³ரஹ்மவிஹாரபா⁴வனாதீ³னங் பப்³ப³ஜ்ஜாகு³ணானங் அபா⁴வோ தீ³பிதோ ஹோதி.
315.Sesaṃ sabbanti pabbajjupagamanā sesaṃ attano vaṃse porāṇarājūnaṃ rājacārittaṃ. Pākatikanti puna sabhāvattameva gato ahosi, apabbajitabhāvavacanenevassa brahmavihārabhāvanādīnaṃ pabbajjāguṇānaṃ abhāvo dīpito hoti.
316. வீரியங் அகரொந்தோ ஸமுச்சி²ந்த³தி, ந தாவ ஸமுச்சி²ன்னங், கல்யாணமித்தஸங்ஸக்³கா³தி³பச்சயஸமவாயே ஸதி ஸீலவதங் கல்யாணவத்தங் பவத்தேதுங் ஸக்கோதி . து³ஸ்ஸீலேன ஸமுச்சி²ன்னங் நாம ஹோதி தஸ்ஸ தத்த² நிராஸபா⁴வேன படிபத்தியா ஏவ அஸம்ப⁴வதோ. ஸத்த ஸேகா² பவத்தெந்தி கல்யாணவத்தஸ்ஸ அபரினிட்டி²தகிச்சத்தா. கீ²ணாஸவேன பவத்திதங் நாம பரினிட்டி²தகிச்சத்தா. ஸேஸங் ஸுவிஞ்ஞெய்யமேவ.
316.Vīriyaṃ akaronto samucchindati, na tāva samucchinnaṃ, kalyāṇamittasaṃsaggādipaccayasamavāye sati sīlavataṃ kalyāṇavattaṃ pavattetuṃ sakkoti . Dussīlena samucchinnaṃ nāma hoti tassa tattha nirāsabhāvena paṭipattiyā eva asambhavato. Satta sekhā pavattenti kalyāṇavattassa apariniṭṭhitakiccattā. Khīṇāsavena pavattitaṃ nāma pariniṭṭhitakiccattā. Sesaṃ suviññeyyameva.
மக⁴தே³வஸுத்தவண்ணனாய லீனத்த²ப்பகாஸனா ஸமத்தா.
Maghadevasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 3. மக⁴தே³வஸுத்தங் • 3. Maghadevasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 3. மக⁴தே³வஸுத்தவண்ணனா • 3. Maghadevasuttavaṇṇanā
