| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৩. মঘদেৰসুত্তৰণ্ণনা
3. Maghadevasuttavaṇṇanā
৩০৮. এৰং মে সুতন্তি মঘদেৰসুত্তং। তত্থ মঘদেৰঅম্বৰনেতি পুব্বে মঘদেৰো নাম রাজা তং অম্বৰনং রোপেসি। তেসু রুক্খেসু পলুজ্জমানেসু অপরভাগে অঞ্ঞেপি রাজানো রোপেসুংযেৰ। তং পন পঠমৰোহারৰসেন মঘদেৰম্বৰনন্তেৰ সঙ্খং গতং। সিতং পাত্ৰাকাসীতি সাযন্হসমযে ৰিহারচারিকং চরমানো রমণীযং ভূমিভাগং দিস্ৰা – ‘‘ৰসিতপুব্বং নু খো মে ইমস্মিং ওকাসে’’তি আৰজ্জন্তো – ‘‘পুব্বে অহং মঘদেৰো নাম রাজা হুত্ৰা ইমং অম্বৰনং রোপেসিং, এত্থেৰ পব্বজিত্ৰা চত্তারো ব্রহ্মৰিহারে ভাৰেত্ৰা ব্রহ্মলোকে নিব্বত্তিং। তং খো পনেতং কারণং ভিক্খুসঙ্ঘস্স অপাকটং, পাকটং করিস্সামী’’তি অগ্গগ্গদন্তে দস্সেন্তো সিতং পাতু অকাসি।
308.Evaṃme sutanti maghadevasuttaṃ. Tattha maghadevaambavaneti pubbe maghadevo nāma rājā taṃ ambavanaṃ ropesi. Tesu rukkhesu palujjamānesu aparabhāge aññepi rājāno ropesuṃyeva. Taṃ pana paṭhamavohāravasena maghadevambavananteva saṅkhaṃ gataṃ. Sitaṃ pātvākāsīti sāyanhasamaye vihāracārikaṃ caramāno ramaṇīyaṃ bhūmibhāgaṃ disvā – ‘‘vasitapubbaṃ nu kho me imasmiṃ okāse’’ti āvajjanto – ‘‘pubbe ahaṃ maghadevo nāma rājā hutvā imaṃ ambavanaṃ ropesiṃ, ettheva pabbajitvā cattāro brahmavihāre bhāvetvā brahmaloke nibbattiṃ. Taṃ kho panetaṃ kāraṇaṃ bhikkhusaṅghassa apākaṭaṃ, pākaṭaṃ karissāmī’’ti aggaggadante dassento sitaṃ pātu akāsi.
ধম্মো অস্স অত্থীতি ধম্মিকো। ধম্মেন রাজা জাতোতি ধম্মরাজা। ধম্মে ঠিতোতি দসকুসলকম্মপথধম্মে ঠিতো। ধম্মং চরতীতি সমং চরতি । তত্র ব্রাহ্মণগহপতিকেসূতি যোপি সো পুব্বরাজূহি ব্রাহ্মণানং দিন্নপরিহারো, তং অহাপেত্ৰা পকতিনিযামেনেৰ অদাসি, তথা গহপতিকানং। তং সন্ধাযেতং ৰুত্তং। পক্খস্সাতি ইমিনা পাটিহারিকপক্খোপি সঙ্গহিতো। অট্ঠমীউপোসথস্স হি পচ্চুগ্গমনানুগ্গমনৰসেন সত্তমিযঞ্চ নৰমিযঞ্চ, চাতুদ্দসপন্নরসানং পচ্চুগ্গমনানুগ্গমনৰসেন তেরসিযঞ্চ পাটিপদে চাতি ইমে দিৰসা পাটিহারিকপক্খাতি ৰেদিতব্বা। তেসুপি উপোসথং উপৰসি।
Dhammo assa atthīti dhammiko. Dhammena rājā jātoti dhammarājā. Dhamme ṭhitoti dasakusalakammapathadhamme ṭhito. Dhammaṃ caratīti samaṃ carati . Tatra brāhmaṇagahapatikesūti yopi so pubbarājūhi brāhmaṇānaṃ dinnaparihāro, taṃ ahāpetvā pakatiniyāmeneva adāsi, tathā gahapatikānaṃ. Taṃ sandhāyetaṃ vuttaṃ. Pakkhassāti iminā pāṭihārikapakkhopi saṅgahito. Aṭṭhamīuposathassa hi paccuggamanānuggamanavasena sattamiyañca navamiyañca, cātuddasapannarasānaṃ paccuggamanānuggamanavasena terasiyañca pāṭipade cāti ime divasā pāṭihārikapakkhāti veditabbā. Tesupi uposathaṃ upavasi.
৩০৯. দেৰদূতাতি দেৰোতি মচ্চু, তস্স দূতাতি দেৰদূতা। সিরস্মিঞ্হি পলিতেসু পাতুভূতেসু মচ্চুরাজস্স সন্তিকে ঠিতো ৰিয হোতি, তস্মা পলিতানি মচ্চুদেৰস্স দূতাতি ৰুচ্চন্তি। দেৰা ৰিয দূতাতিপি দেৰদূতা। যথা হি অলঙ্কতপটিযত্তায দেৰতায আকাসে ঠত্ৰা ‘‘অসুকদিৰসে মরিস্সতী’’তি ৰুত্তে তং তথেৰ হোতি, এৰং সিরস্মিং পলিতেসু পাতুভূতেসু দেৰতাব্যাকরণসদিসমেৰ হোতি। তস্মা পলিতানি দেৰসদিসা দূতাতি ৰুচ্চন্তি। ৰিসুদ্ধিদেৰানং দূতাতিপি দেৰদূতা। সব্ববোধিসত্তা হি জিণ্ণব্যাধিতমতপব্বজিতে দিস্ৰাৰ সংৰেগমাপজ্জিত্ৰা নিক্খম্ম পব্বজন্তি। যথাহ –
309.Devadūtāti devoti maccu, tassa dūtāti devadūtā. Sirasmiñhi palitesu pātubhūtesu maccurājassa santike ṭhito viya hoti, tasmā palitāni maccudevassa dūtāti vuccanti. Devā viya dūtātipi devadūtā. Yathā hi alaṅkatapaṭiyattāya devatāya ākāse ṭhatvā ‘‘asukadivase marissatī’’ti vutte taṃ tatheva hoti, evaṃ sirasmiṃ palitesu pātubhūtesu devatābyākaraṇasadisameva hoti. Tasmā palitāni devasadisā dūtāti vuccanti. Visuddhidevānaṃ dūtātipi devadūtā. Sabbabodhisattā hi jiṇṇabyādhitamatapabbajite disvāva saṃvegamāpajjitvā nikkhamma pabbajanti. Yathāha –
‘‘জিণ্ণঞ্চ দিস্ৰা দুখিতঞ্চ ব্যাধিতং,
‘‘Jiṇṇañca disvā dukhitañca byādhitaṃ,
মতঞ্চ দিস্ৰা গতমাযুসঙ্খযং।
Matañca disvā gatamāyusaṅkhayaṃ;
কাসাযৰত্থং পব্বজিতঞ্চ দিস্ৰা,
Kāsāyavatthaṃ pabbajitañca disvā,
তস্মা অহং পব্বজিতোম্হি রাজা’’তি॥
Tasmā ahaṃ pabbajitomhi rājā’’ti.
ইমিনা পরিযাযেন পলিতানি ৰিসুদ্ধিদেৰানং দূতত্তা দেৰদূতাতি ৰুচ্চন্তি।
Iminā pariyāyena palitāni visuddhidevānaṃ dūtattā devadūtāti vuccanti.
কপ্পকস্স গামৰরং দত্ৰাতি সতসহস্সুট্ঠানকং জেট্ঠকগামং দত্ৰা। কস্মা অদাসি? সংৰিগ্গমানসত্তা। তস্স হি অঞ্জলিস্মিং ঠপিতানি পলিতানি দিস্ৰাৰ সংৰেগো উপ্পজ্জতি। অঞ্ঞানি চতুরাসীতিৰস্সসহস্সানি আযু অত্থি, এৰং সন্তেপি মচ্চুরাজস্স সন্তিকে ঠিতং ৰিয অত্তানং মঞ্ঞমানো সংৰিগ্গো পব্বজ্জং রোচেতি। তেন ৰুত্তং –
Kappakassa gāmavaraṃ datvāti satasahassuṭṭhānakaṃ jeṭṭhakagāmaṃ datvā. Kasmā adāsi? Saṃviggamānasattā. Tassa hi añjalismiṃ ṭhapitāni palitāni disvāva saṃvego uppajjati. Aññāni caturāsītivassasahassāni āyu atthi, evaṃ santepi maccurājassa santike ṭhitaṃ viya attānaṃ maññamāno saṃviggo pabbajjaṃ roceti. Tena vuttaṃ –
‘‘সিরে দিস্ৰান পলিতং, মঘদেৰো দিসম্পতি।
‘‘Sire disvāna palitaṃ, maghadevo disampati;
সংৰেগং অলভী ধীরো, পব্বজ্জং সমরোচযী’’তি॥
Saṃvegaṃ alabhī dhīro, pabbajjaṃ samarocayī’’ti.
অপরম্পি ৰুত্তং –
Aparampi vuttaṃ –
‘‘উত্তমঙ্গরুহা ময্হং, ইমে জাতা ৰযোহরা।
‘‘Uttamaṅgaruhā mayhaṃ, ime jātā vayoharā;
পাতুভূতা দেৰদূতা, পব্বজ্জাসমযো মমা’’তি॥
Pātubhūtā devadūtā, pabbajjāsamayo mamā’’ti.
পুরিসযুগেতি ৰংসসম্ভৰে পুরিসে। কেসমস্সুং ওহারেত্ৰাতি তাপসপব্বজ্জং পব্বজন্তাপি হি পঠমং কেসমস্সুং ওহারেত্ৰা পব্বজন্তি, ততো পট্ঠায ৰড্ঢিতে কেসে বন্ধিত্ৰা জটাকলাপধরা হুত্ৰা ৰিচরন্তি। বোধিসত্তোপি তাপসপব্বজ্জং পব্বজি। পব্বজিতো পন অনেসনং অননুযুঞ্জিত্ৰা রাজগেহতো আহটভিক্খায যাপেন্তো ব্রহ্মৰিহারং ভাৰেসি। তস্মা সো মেত্তাসহগতেনাতিআদি ৰুত্তং।
Purisayugeti vaṃsasambhave purise. Kesamassuṃ ohāretvāti tāpasapabbajjaṃ pabbajantāpi hi paṭhamaṃ kesamassuṃ ohāretvā pabbajanti, tato paṭṭhāya vaḍḍhite kese bandhitvā jaṭākalāpadharā hutvā vicaranti. Bodhisattopi tāpasapabbajjaṃ pabbaji. Pabbajito pana anesanaṃ ananuyuñjitvā rājagehato āhaṭabhikkhāya yāpento brahmavihāraṃ bhāvesi. Tasmā so mettāsahagatenātiādi vuttaṃ.
কুমারকীল়িতং কীল়ীতি অঙ্কেন অঙ্কং পরিহরিযমানো কীল়ি। মালাকলাপং ৰিয হি নং উক্খিপিত্ৰাৰ ৰিচরিংসু। রঞ্ঞো মঘদেৰস্স পুত্তো…পে॰… পব্বজীতি ইমস্স পব্বজিতদিৰসে পঞ্চ মঙ্গলানি অহেসুং। মঘদেৰরঞ্ঞো মতকভত্তং, তস্স রঞ্ঞো পব্বজিতমঙ্গলং, তস্স পুত্তস্স ছত্তুস্সাপনমঙ্গলং, তস্স পুত্তস্স উপরজ্জমঙ্গলং, তস্স পুত্তস্স নামকরণমঙ্গলন্তি একস্মিংযেৰ সমযে পঞ্চ মঙ্গলানি অহেসুং, সকলজম্বুদীপতলে উন্নঙ্গলমহোসি।
Kumārakīḷitaṃ kīḷīti aṅkena aṅkaṃ parihariyamāno kīḷi. Mālākalāpaṃ viya hi naṃ ukkhipitvāva vicariṃsu. Rañño maghadevassa putto…pe… pabbajīti imassa pabbajitadivase pañca maṅgalāni ahesuṃ. Maghadevarañño matakabhattaṃ, tassa rañño pabbajitamaṅgalaṃ, tassa puttassa chattussāpanamaṅgalaṃ, tassa puttassa uparajjamaṅgalaṃ, tassa puttassa nāmakaraṇamaṅgalanti ekasmiṃyeva samaye pañca maṅgalāni ahesuṃ, sakalajambudīpatale unnaṅgalamahosi.
৩১১. পুত্তপপুত্তকাতি পুত্তা চ পুত্তপুত্তা চাতি এৰং পৰত্তা তস্স পরম্পরা। পচ্ছিমকো অহোসীতি পব্বজ্জাপচ্ছিমকো অহোসি। বোধিসত্তো কির ব্রহ্মলোকে নিব্বত্তো – ‘‘পৰত্ততি নু খো তং মযা মনুস্সলোকে নিহতং কল্যাণৰত্ত’’ন্তি আৰজ্জন্তো অদ্দস – ‘‘এত্তকং অদ্ধানং পৰত্ততি, ইদানি ন পৰত্তিস্সতী’’তি। ন খো পনাহং ময্হং পৰেণিযা উচ্ছিজ্জিতুং দস্সামীতি অত্তনো ৰংসে জাতরঞ্ঞোযেৰ অগ্গমহেসিযা কুচ্ছিস্মিং পটিসন্ধিং গহেত্ৰা অত্তনো ৰংসস্স নেমিং ঘটেন্তো ৰিয নিব্বত্তো, তেনেৰস্স নিমীতি নামং অহোসি। ইতি সো পব্বজিতরাজূনং সব্বপচ্ছিমকো হুত্ৰা পব্বজিতোতি পব্বজ্জাপচ্ছিমকো অহোসি। গুণেহি পন অতিরেকতরো। তস্স হি সব্বরাজূহি অতিরেকতরা দ্ৰে গুণা অহেসুং । চতূসু দ্ৰারেসু সতসহস্সং সতসহস্সং ৰিস্সজ্জেত্ৰা দেৰসিকং দানং অদাসি, অনুপোসথিকস্স চ দস্সনং নিৰারেসি। অনুপোসথিকেসু হি রাজানং পস্সিস্সামাতি গতেসু দোৰারিকো পুচ্ছতি ‘‘তুম্হে উপোসথিকা নো ৰা’’তি। যে অনুপোসথিকা হোন্তি, তে নিৰারেতি ‘‘অনুপোসথিকানং রাজা দস্সনং ন দেতী’’তি। ‘‘মযং জনপদৰাসিনো কালে ভোজনং কুহিং লভিস্সামা’’তিপি তত্থ ৰচনোকাসো নত্থি। চতূসু হি দ্ৰারেসু রাজঙ্গণে চ অনেকানি ভত্তচাটিসহস্সানি পটিযত্তানেৰ হোন্তি। তস্মা মহাজনো ইচ্ছিতিচ্ছিতট্ঠানে মস্সুং কারেত্ৰা ন্হাযিত্ৰা ৰত্থানি পরিৰত্তেত্ৰা যথারুচিতং ভোজনং ভুঞ্জিত্ৰা উপোসথঙ্গানি অধিট্ঠায রঞ্ঞো গেহদ্ৰারং গচ্ছতি। দোৰারিকেন ‘‘উপোসথিকা তুম্হে’’তি পুচ্ছিতপুচ্ছিতা ‘‘আম আমা’’তি ৰদন্তি। তেন হি আগচ্ছথাতি পৰেসেত্ৰা রঞ্ঞো দস্সেতি। ইতি ইমেহি দ্ৰীহি গুণেহি অতিরেকতরো অহোসি।
311.Puttapaputtakāti puttā ca puttaputtā cāti evaṃ pavattā tassa paramparā. Pacchimako ahosīti pabbajjāpacchimako ahosi. Bodhisatto kira brahmaloke nibbatto – ‘‘pavattati nu kho taṃ mayā manussaloke nihataṃ kalyāṇavatta’’nti āvajjanto addasa – ‘‘ettakaṃ addhānaṃ pavattati, idāni na pavattissatī’’ti. Na kho panāhaṃ mayhaṃ paveṇiyā ucchijjituṃ dassāmīti attano vaṃse jātaraññoyeva aggamahesiyā kucchismiṃ paṭisandhiṃ gahetvā attano vaṃsassa nemiṃ ghaṭento viya nibbatto, tenevassa nimīti nāmaṃ ahosi. Iti so pabbajitarājūnaṃ sabbapacchimako hutvā pabbajitoti pabbajjāpacchimako ahosi. Guṇehi pana atirekataro. Tassa hi sabbarājūhi atirekatarā dve guṇā ahesuṃ . Catūsu dvāresu satasahassaṃ satasahassaṃ vissajjetvā devasikaṃ dānaṃ adāsi, anuposathikassa ca dassanaṃ nivāresi. Anuposathikesu hi rājānaṃ passissāmāti gatesu dovāriko pucchati ‘‘tumhe uposathikā no vā’’ti. Ye anuposathikā honti, te nivāreti ‘‘anuposathikānaṃ rājā dassanaṃ na detī’’ti. ‘‘Mayaṃ janapadavāsino kāle bhojanaṃ kuhiṃ labhissāmā’’tipi tattha vacanokāso natthi. Catūsu hi dvāresu rājaṅgaṇe ca anekāni bhattacāṭisahassāni paṭiyattāneva honti. Tasmā mahājano icchiticchitaṭṭhāne massuṃ kāretvā nhāyitvā vatthāni parivattetvā yathārucitaṃ bhojanaṃ bhuñjitvā uposathaṅgāni adhiṭṭhāya rañño gehadvāraṃ gacchati. Dovārikena ‘‘uposathikā tumhe’’ti pucchitapucchitā ‘‘āma āmā’’ti vadanti. Tena hi āgacchathāti pavesetvā rañño dasseti. Iti imehi dvīhi guṇehi atirekataro ahosi.
৩১২. দেৰানং তাৰতিংসানন্তি তাৰতিংসভৰনে নিব্বত্তদেৰানং। তে কির দেৰা ৰিদেহরট্ঠে মিথিলনগরৰাসিনো রঞ্ঞো ওৰাদে ঠত্ৰা পঞ্চ সীলানি রক্খিত্ৰা উপোসথকম্মং কত্ৰা তত্থ নিব্বত্তা রঞ্ঞো গুণকথং কথেন্তি। তে সন্ধায ৰুত্তং ‘‘দেৰানং তাৰতিংসান’’ন্তি।
312.Devānaṃ tāvatiṃsānanti tāvatiṃsabhavane nibbattadevānaṃ. Te kira devā videharaṭṭhe mithilanagaravāsino rañño ovāde ṭhatvā pañca sīlāni rakkhitvā uposathakammaṃ katvā tattha nibbattā rañño guṇakathaṃ kathenti. Te sandhāya vuttaṃ ‘‘devānaṃ tāvatiṃsāna’’nti.
নিসিন্নো হোতীতি পাসাদৰরস্স উপরিগতো দানঞ্চ সীলঞ্চ উপপরিক্খমানো নিসিন্নো হোতি। এৰং কিরস্স অহোসি – ‘‘দানং নু খো মহন্তং উদাহু সীলং, যদি দানং মহন্তং, অজ্ঝোত্থরিত্ৰা দানমেৰ দস্সামি। অথ সীলং, সীলমেৰ পূরিস্সামী’’তি। তস্স ‘‘ইদং মহন্তং ইদং মহন্ত’’ন্তি নিচ্ছিতুং অসক্কোন্তস্সেৰ সক্কো গন্ত্ৰা পুরতো পাতুরহোসি। তেন ৰুত্তং অথ খো, আনন্দ,…পে॰… সম্মুখে পাতুরহোসীতি। এৰং কিরস্স অহোসি – ‘‘রঞ্ঞো কঙ্খা উপ্পন্না, তস্স কঙ্খচ্ছেদনত্থং পঞ্হঞ্চ কথেস্সামি, ইধাগমনত্থায পটিঞ্ঞঞ্চ গণ্হিস্সামী’’তি । তস্মা গন্ত্ৰা সম্মুখে পাতুরহোসি। রাজা অদিট্ঠপুব্বং রূপং দিস্ৰা ভীতো অহোসি লোমহট্ঠজাতো। অথ নং সক্কো – ‘‘মা ভাযি, মহারাজ, ৰিস্সত্থো পঞ্হং পুচ্ছ, কঙ্খং তে পটিৰিনোদেস্সামী’’তি আহ।
Nisinnohotīti pāsādavarassa uparigato dānañca sīlañca upaparikkhamāno nisinno hoti. Evaṃ kirassa ahosi – ‘‘dānaṃ nu kho mahantaṃ udāhu sīlaṃ, yadi dānaṃ mahantaṃ, ajjhottharitvā dānameva dassāmi. Atha sīlaṃ, sīlameva pūrissāmī’’ti. Tassa ‘‘idaṃ mahantaṃ idaṃ mahanta’’nti nicchituṃ asakkontasseva sakko gantvā purato pāturahosi. Tena vuttaṃ atha kho, ānanda,…pe… sammukhe pāturahosīti. Evaṃ kirassa ahosi – ‘‘rañño kaṅkhā uppannā, tassa kaṅkhacchedanatthaṃ pañhañca kathessāmi, idhāgamanatthāya paṭiññañca gaṇhissāmī’’ti . Tasmā gantvā sammukhe pāturahosi. Rājā adiṭṭhapubbaṃ rūpaṃ disvā bhīto ahosi lomahaṭṭhajāto. Atha naṃ sakko – ‘‘mā bhāyi, mahārāja, vissattho pañhaṃ puccha, kaṅkhaṃ te paṭivinodessāmī’’ti āha.
রাজা –
Rājā –
‘‘পুচ্ছামি তং মহারাজ, সব্বভূতানমিস্সর।
‘‘Pucchāmi taṃ mahārāja, sabbabhūtānamissara;
দানং ৰা ব্রহ্মচরিযং ৰা, কতমং সু মহপ্ফল’’ন্তি॥ –
Dānaṃ vā brahmacariyaṃ vā, katamaṃ su mahapphala’’nti. –
পঞ্হং পুচ্ছি। সক্কো – ‘‘দানং নাম কিং, সীলমেৰ গুণৰিসিট্ঠতায মহন্তং। অহঞ্হি পুব্বে, মহারাজ, দসৰস্সসহস্সানি দসন্নং জটিলসহস্সানং দানং দত্ৰা পেত্তিৰিসযতো ন মুত্তো, সীলৰন্তা পন ময্হং দানং ভুঞ্জিত্ৰা ব্রহ্মলোকে নিব্বত্তা’’তি ৰত্ৰা ইমা গাথা অৰোচ –
Pañhaṃ pucchi. Sakko – ‘‘dānaṃ nāma kiṃ, sīlameva guṇavisiṭṭhatāya mahantaṃ. Ahañhi pubbe, mahārāja, dasavassasahassāni dasannaṃ jaṭilasahassānaṃ dānaṃ datvā pettivisayato na mutto, sīlavantā pana mayhaṃ dānaṃ bhuñjitvā brahmaloke nibbattā’’ti vatvā imā gāthā avoca –
‘‘হীনেন ব্রহ্মচরিযেন, খত্তিযে উপপজ্জতি।
‘‘Hīnena brahmacariyena, khattiye upapajjati;
মজ্ঝিমেন চ দেৰত্তং, উত্তমেন ৰিসুজ্ঝতি॥
Majjhimena ca devattaṃ, uttamena visujjhati.
ন হেতে সুলভা কাযা, যাচযোগেন কেনচি।
Na hete sulabhā kāyā, yācayogena kenaci;
যে কাযে উপপজ্জন্তি, অনাগারা তপস্সিনো’’তি॥ (জা॰ ২.২২.৪২৯-৪৩০)।
Ye kāye upapajjanti, anāgārā tapassino’’ti. (jā. 2.22.429-430);
এৰং রঞ্ঞো কঙ্খং ৰিনোদেত্ৰা দেৰলোকগমনায পটিঞ্ঞাগহণত্থং লাভা তে মহারাজাতিআদিমাহ। তত্থ অৰিকম্পমানোতি অভাযমানো। অধিৰাসেসীতি অহং মহাজনং কুসলং সমাদপেমি, পুঞ্ঞৰন্তানং পন ৰসনট্ঠানং দিস্ৰা আগতেন মনুস্সপথে সুখং কথেতুং হোতীতি অধিৰাসেসি।
Evaṃ rañño kaṅkhaṃ vinodetvā devalokagamanāya paṭiññāgahaṇatthaṃ lābhā te mahārājātiādimāha. Tattha avikampamānoti abhāyamāno. Adhivāsesīti ahaṃ mahājanaṃ kusalaṃ samādapemi, puññavantānaṃ pana vasanaṭṭhānaṃ disvā āgatena manussapathe sukhaṃ kathetuṃ hotīti adhivāsesi.
৩১৩. এৰং ভদ্দন্তৰাতি এৰং হোতু ভদ্দকং তৰ ৰচনন্তি ৰত্ৰা। যোজেত্ৰাতি একস্মিংযেৰ যুগে সহস্সঅস্সাজানীযে যোজেত্ৰা। তেসং পন পাটিযেক্কং যোজনকিচ্চং নত্থি, মনং আগম্ম যুত্তাযেৰ হোন্তি। সো পন দিব্বরথো দিযড্ঢযোজনসতিকো হোতি, নদ্ধিতো পট্ঠায রথসীসং পঞ্ঞাসযোজনানি, অক্খবন্ধো পণ্ণাসযোজনানি, অক্খবন্ধতো পট্ঠায পচ্ছাভাগো পণ্ণাসযোজনানি, সব্বো সত্তৰণ্ণরতনমযো। দেৰলোকো নাম উদ্ধং, মনুস্সলোকো অধো, তস্মা হেট্ঠামুখং রথং পেসেসীতি ন সল্লক্খেতব্বং। যথা পন পকতিমগ্গং পেসেতি, এৰমেৰ মনুস্সানং সাযমাসভত্তে নিট্ঠিতে চন্দেন সদ্ধিং যুগনদ্ধং কত্ৰা পেসেসি, যমকচন্দা উট্ঠিতা ৰিয অহেসুং। মহাজনো দিস্ৰা ‘‘যমকচন্দা উগ্গতা’’তি আহ। আগচ্ছন্তে আগচ্ছন্তে ন যমকচন্দা, একং ৰিমানং, ন ৰিমানং, একো রথোতি। রথোপি আগচ্ছন্তো আগচ্ছন্তো পকতিরথপ্পমাণোৰ, অস্সাপি পকতিঅস্সপ্পমাণাৰ অহেসুং। এৰং রথং আহরিত্ৰা রঞ্ঞো পাসাদং পদক্খিণং কত্ৰা পাচীনসীহপঞ্জরট্ঠানে রথং নিৰত্তেত্ৰা আগতমগ্গাভিমুখং কত্ৰা সীহপঞ্জরে ঠত্ৰাৰ আরোহনসজ্জং ঠপেসি।
313.Evaṃ bhaddantavāti evaṃ hotu bhaddakaṃ tava vacananti vatvā. Yojetvāti ekasmiṃyeva yuge sahassaassājānīye yojetvā. Tesaṃ pana pāṭiyekkaṃ yojanakiccaṃ natthi, manaṃ āgamma yuttāyeva honti. So pana dibbaratho diyaḍḍhayojanasatiko hoti, naddhito paṭṭhāya rathasīsaṃ paññāsayojanāni, akkhabandho paṇṇāsayojanāni, akkhabandhato paṭṭhāya pacchābhāgo paṇṇāsayojanāni, sabbo sattavaṇṇaratanamayo. Devaloko nāma uddhaṃ, manussaloko adho, tasmā heṭṭhāmukhaṃ rathaṃ pesesīti na sallakkhetabbaṃ. Yathā pana pakatimaggaṃ peseti, evameva manussānaṃ sāyamāsabhatte niṭṭhite candena saddhiṃ yuganaddhaṃ katvā pesesi, yamakacandā uṭṭhitā viya ahesuṃ. Mahājano disvā ‘‘yamakacandā uggatā’’ti āha. Āgacchante āgacchante na yamakacandā, ekaṃ vimānaṃ, na vimānaṃ, eko rathoti. Rathopi āgacchanto āgacchanto pakatirathappamāṇova, assāpi pakatiassappamāṇāva ahesuṃ. Evaṃ rathaṃ āharitvā rañño pāsādaṃ padakkhiṇaṃ katvā pācīnasīhapañjaraṭṭhāne rathaṃ nivattetvā āgatamaggābhimukhaṃ katvā sīhapañjare ṭhatvāva ārohanasajjaṃ ṭhapesi.
অভিরুহ মহারাজাতি রাজা – ‘‘দিব্বযানং মে লদ্ধ’’ন্তি ন তাৰদেৰ অভিরুহি, নাগরানং পন ওৰাদং অদাসি ‘‘পস্সথ তাতা, যং মে সক্কেন দেৰরঞ্ঞা দিব্বরথো পেসিতো, সো চ খো ন জাতিগোত্তং ৰা কুলপ্পদেসং ৰা পটিচ্চ পেসিতো, ময্হং পন সীলাচারগুণে পসীদিত্ৰা পেসিতো। সচে তুম্হেপি সীলং রক্খিস্সথ, তুম্হাকম্পি পেসেস্সতি, এৰং রক্খিতুং যুত্তং নামেতং সীলং। নাহং দেৰলোকং গন্ত্ৰা চিরাযিস্সামি, অপ্পমত্তা হোথা’’তি মহাজনং ওৰদিত্ৰা পঞ্চসু সীলেসু পতিট্ঠাপেত্ৰা রথং অভিরুহি। ততো মাতলি সঙ্গাহকো ‘‘অহম্পি মহারাজস্স মমানুচ্ছৰিকং করিস্সামী’’তি আকাসম্হি দ্ৰে মগ্গে দস্সেত্ৰা অপিচ মহারাজাতিআদিমাহ।
Abhiruha mahārājāti rājā – ‘‘dibbayānaṃ me laddha’’nti na tāvadeva abhiruhi, nāgarānaṃ pana ovādaṃ adāsi ‘‘passatha tātā, yaṃ me sakkena devaraññā dibbaratho pesito, so ca kho na jātigottaṃ vā kulappadesaṃ vā paṭicca pesito, mayhaṃ pana sīlācāraguṇe pasīditvā pesito. Sace tumhepi sīlaṃ rakkhissatha, tumhākampi pesessati, evaṃ rakkhituṃ yuttaṃ nāmetaṃ sīlaṃ. Nāhaṃ devalokaṃ gantvā cirāyissāmi, appamattā hothā’’ti mahājanaṃ ovaditvā pañcasu sīlesu patiṭṭhāpetvā rathaṃ abhiruhi. Tato mātali saṅgāhako ‘‘ahampi mahārājassa mamānucchavikaṃ karissāmī’’ti ākāsamhi dve magge dassetvā apica mahārājātiādimāha.
তত্থ কতমেনাতি, মহারাজ, ইমেসু মগ্গেসু একো নিরযং গচ্ছতি, একো দেৰলোকং, তেসু তং কতমেন নেমি। যেনাতি যেন মগ্গেন গন্ত্ৰা যত্থ পাপকম্মন্তা পাপকানং কম্মানং ৰিপাকং পটিসংৰেদিযন্তি, তং ঠানং সক্কা হোতি পস্সিতুন্তি অত্থো। দুতিযপদেপি এসেৰ নযো। জাতকেপি –
Tattha katamenāti, mahārāja, imesu maggesu eko nirayaṃ gacchati, eko devalokaṃ, tesu taṃ katamena nemi. Yenāti yena maggena gantvā yattha pāpakammantā pāpakānaṃ kammānaṃ vipākaṃ paṭisaṃvediyanti, taṃ ṭhānaṃ sakkā hoti passitunti attho. Dutiyapadepi eseva nayo. Jātakepi –
‘‘কেন তং নেমি মগ্গেন, রাজসেট্ঠ দিসম্পতি।
‘‘Kena taṃ nemi maggena, rājaseṭṭha disampati;
যেন ৰা পাপকম্মন্তা, পুঞ্ঞকম্মা চ যে নরা’’তি॥ (জা॰ ২.২২.৪৫০) –
Yena vā pāpakammantā, puññakammā ca ye narā’’ti. (jā. 2.22.450) –
গাথায অযমেৰত্থো। তেনেৰাহ –
Gāthāya ayamevattho. Tenevāha –
‘‘নিরযে তাৰ পস্সামি, আৰাসে পাপকম্মিনং।
‘‘Niraye tāva passāmi, āvāse pāpakamminaṃ;
ঠানানি লুদ্দকম্মানং, দুস্সীলানঞ্চ যা গতী’’তি॥ (জা॰ ২.২২.৪৫১)।
Ṭhānāni luddakammānaṃ, dussīlānañca yā gatī’’ti. (jā. 2.22.451);
উভযেনেৰ মং মাতলি নেহীতি মাতলি দ্ৰীহি মগ্গেহি মং নেহি, অহং নিরযং পস্সিতুকামো দেৰলোকম্পীতি। পঠমং কতমেন নেমীতি। পঠমং নিরযমগ্গেন নেহীতি। ততো মাতলি অত্তনো আনুভাৰেন রাজানং পঞ্চদস মহানিরযে দস্সেসি। ৰিত্থারকথা পনেত্থ –
Ubhayeneva maṃ mātali nehīti mātali dvīhi maggehi maṃ nehi, ahaṃ nirayaṃ passitukāmo devalokampīti. Paṭhamaṃ katamena nemīti. Paṭhamaṃ nirayamaggena nehīti. Tato mātali attano ānubhāvena rājānaṃ pañcadasa mahāniraye dassesi. Vitthārakathā panettha –
‘‘দস্সেসি মাতলি রঞ্ঞো, দুগ্গং ৰেতরণিং নদিং।
‘‘Dassesi mātali rañño, duggaṃ vetaraṇiṃ nadiṃ;
কুথিতং খারসংযুত্তং, তত্তং অগ্গিসিখূপম’’ন্তি॥ (জা॰ ২.২২.৪৫২) –
Kuthitaṃ khārasaṃyuttaṃ, tattaṃ aggisikhūpama’’nti. (jā. 2.22.452) –
জাতকে ৰুত্তনযেন ৰেদিতব্বা। নিরযং দস্সেত্ৰা রথং নিৰত্তেত্ৰা দেৰলোকাভিমুখং গন্ত্ৰা বীরণীদেৰধীতায সোণদিন্নদেৰপুত্তস্স গণদেৰপুত্তানঞ্চ ৰিমানানি দস্সেন্তো দেৰলোকং নেসি। তত্রাপি ৰিত্থারকথা –
Jātake vuttanayena veditabbā. Nirayaṃ dassetvā rathaṃ nivattetvā devalokābhimukhaṃ gantvā bīraṇīdevadhītāya soṇadinnadevaputtassa gaṇadevaputtānañca vimānāni dassento devalokaṃ nesi. Tatrāpi vitthārakathā –
‘‘যদি তে সুতা বীরণী জীৰলোকে,
‘‘Yadi te sutā bīraṇī jīvaloke,
আমাযদাসী অহু ব্রাহ্মণস্স।
Āmāyadāsī ahu brāhmaṇassa;
সা পত্তকালে অতিথিং ৰিদিত্ৰা,
Sā pattakāle atithiṃ viditvā,
মাতাৰ পুত্তং সকিমাভিনন্দী।
Mātāva puttaṃ sakimābhinandī;
সংযমা সংৰিভাগা চ,
Saṃyamā saṃvibhāgā ca,
সা ৰিমানস্মি মোদতী’’তি॥ (জা॰ ২.২২.৫০৭) –
Sā vimānasmi modatī’’ti. (jā. 2.22.507) –
জাতকে ৰুত্তনযেনেৰ ৰেদিতব্বা।
Jātake vuttanayeneva veditabbā.
এৰং গচ্ছতো পন তস্স রথনেমি ৰট্টিযা চিত্তকূটদ্ৰারকোট্ঠকস্স উম্মারে পহতমত্তেৰ দেৰনগরে কোলাহলং অহোসি। সক্কং দেৰরাজানং এককংযেৰ ওহায দেৰসঙ্ঘো মহাসত্তং পচ্চুগ্গমনমকাসি, তং দেৰতানং আদরং দিস্ৰা সক্কো চিত্তং সন্ধারেতুং অসক্কোন্তো – ‘‘অভিরম, মহারাজ, দেৰেসু দেৰানুভাৰেনা’’তি আহ। এৰং কিরস্স অহোসি – ‘‘অযং রাজা অজ্জ আগন্ত্ৰা একদিৰসেনেৰ দেৰগণং অত্তনো অভিমুখমকাসি। সচে একং দ্ৰে দিৰসে ৰসিস্সতি, ন মং দেৰা ওলোকেস্সন্তী’’তি। সো উসূযমানো, ‘‘মহারাজ, তুয্হং ইমস্মিং দেৰলোকে ৰসিতুং পুঞ্ঞং নত্থি, অঞ্ঞেসং পুঞ্ঞেন ৰসাহী’’তি ইমিনা অধিপ্পাযেন এৰমাহ। বোধিসত্তো – ‘‘নাসক্খি জরসক্কো মনং সন্ধারেতুং, পরং নিস্সায লদ্ধং খো পন যাচিত্ৰা লদ্ধভণ্ডকং ৰিয হোতী’’তি পটিক্খিপন্তো অলং মারিসাতিআদিমাহ। জাতকেপি ৰুত্তং –
Evaṃ gacchato pana tassa rathanemi vaṭṭiyā cittakūṭadvārakoṭṭhakassa ummāre pahatamatteva devanagare kolāhalaṃ ahosi. Sakkaṃ devarājānaṃ ekakaṃyeva ohāya devasaṅgho mahāsattaṃ paccuggamanamakāsi, taṃ devatānaṃ ādaraṃ disvā sakko cittaṃ sandhāretuṃ asakkonto – ‘‘abhirama, mahārāja, devesu devānubhāvenā’’ti āha. Evaṃ kirassa ahosi – ‘‘ayaṃ rājā ajja āgantvā ekadivaseneva devagaṇaṃ attano abhimukhamakāsi. Sace ekaṃ dve divase vasissati, na maṃ devā olokessantī’’ti. So usūyamāno, ‘‘mahārāja, tuyhaṃ imasmiṃ devaloke vasituṃ puññaṃ natthi, aññesaṃ puññena vasāhī’’ti iminā adhippāyena evamāha. Bodhisatto – ‘‘nāsakkhi jarasakko manaṃ sandhāretuṃ, paraṃ nissāya laddhaṃ kho pana yācitvā laddhabhaṇḍakaṃ viya hotī’’ti paṭikkhipanto alaṃ mārisātiādimāha. Jātakepi vuttaṃ –
‘‘যথা যাচিতকং যানং, যথা যাচিতকং ধনং।
‘‘Yathā yācitakaṃ yānaṃ, yathā yācitakaṃ dhanaṃ;
এৰংসম্পদমেৰে তং, যং পরতো দানপচ্চযা।
Evaṃsampadameve taṃ, yaṃ parato dānapaccayā;
ন চাহমেতমিচ্ছামি, যং পরতো দানপচ্চযা’’তি॥ (জা॰ ২.২২.৫৮৫-৫৮৬) –
Na cāhametamicchāmi, yaṃ parato dānapaccayā’’ti. (jā. 2.22.585-586) –
সব্বং ৰত্তব্বং। বোধিসত্তো পন মনুস্সত্তভাৰেন কতিৰারে দেৰলোকং গতোতি। চত্তারো – মন্ধাতুরাজকালে সাধিনরাজকালে গুত্তিলৰীণাৰাদককালে নিমিমহারাজকালেতি। সো মন্ধাতুকালে দেৰলোকে অসঙ্খ্যেয্যং কালং ৰসি, তস্মিঞ্হি ৰসমানেযেৰ ছত্তিংস সক্কা চৰিংসু। সাধিনরাজকালে সত্তাহং ৰসি, মনুস্সগণনায সত্ত ৰস্সসতানি হোন্তি। গুত্তিলৰীণাৰাদককালে চ নিমিরাজকালে চ মুহুত্তমত্তং ৰসি, মনুস্সগণনায সত্ত দিৰসানি হোন্তি।
Sabbaṃ vattabbaṃ. Bodhisatto pana manussattabhāvena kativāre devalokaṃ gatoti. Cattāro – mandhāturājakāle sādhinarājakāle guttilavīṇāvādakakāle nimimahārājakāleti. So mandhātukāle devaloke asaṅkhyeyyaṃ kālaṃ vasi, tasmiñhi vasamāneyeva chattiṃsa sakkā caviṃsu. Sādhinarājakāle sattāhaṃ vasi, manussagaṇanāya satta vassasatāni honti. Guttilavīṇāvādakakāle ca nimirājakāle ca muhuttamattaṃ vasi, manussagaṇanāya satta divasāni honti.
৩১৪. তত্থেৰ মিথিলং পটিনেসীতি পটিনেত্ৰা পকতিসিরিগব্ভেযেৰ পতিট্ঠাপেসি।
314.Tatthevamithilaṃ paṭinesīti paṭinetvā pakatisirigabbheyeva patiṭṭhāpesi.
৩১৫. কল়ারজনকোতি তস্স নামং। কল়ারদন্ততায পন কল়ারজনকোতি ৰুত্তো। ন সো অগারস্মা অনগারিযং পব্বজীতি এত্তকমত্তমেৰ ন অকাসি, সেসং সব্বং পাকতিকমেৰ অহোসি।
315.Kaḷārajanakoti tassa nāmaṃ. Kaḷāradantatāya pana kaḷārajanakoti vutto. Na so agārasmā anagāriyaṃ pabbajīti ettakamattameva na akāsi, sesaṃ sabbaṃ pākatikameva ahosi.
৩১৬. সমুচ্ছেদো হোতীতি এত্থ কল্যাণৰত্তং কো সমুচ্ছিন্দতি, কেন সমুচ্ছিন্নং, কো পৰত্তেতি, কেন পৰত্তিতং নাম হোতীতি অযং ৰিভাগো ৰেদিতব্বো। তত্থ সীলৰা ভিক্খু ‘‘ন সক্কা মযা অরহত্তং লদ্ধু’’ন্তি ৰীরিযং অকরোন্তো সমুচ্ছিন্দতি। দুস্সীলেন সমুচ্ছিন্নং নাম হোতি। সত্ত সেখা পৰত্তেন্তি। খীণাসৰেন পৰত্তিতং নাম হোতি। সেসং সব্বত্থ উত্তানমেৰাতি।
316.Samucchedo hotīti ettha kalyāṇavattaṃ ko samucchindati, kena samucchinnaṃ, ko pavatteti, kena pavattitaṃ nāma hotīti ayaṃ vibhāgo veditabbo. Tattha sīlavā bhikkhu ‘‘na sakkā mayā arahattaṃ laddhu’’nti vīriyaṃ akaronto samucchindati. Dussīlena samucchinnaṃ nāma hoti. Satta sekhā pavattenti. Khīṇāsavena pavattitaṃ nāma hoti. Sesaṃ sabbattha uttānamevāti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
মঘদেৰসুত্তৰণ্ণনা নিট্ঠিতা।
Maghadevasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৩. মঘদেৰসুত্তং • 3. Maghadevasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৩. মঘদেৰসুত্তৰণ্ণনা • 3. Maghadevasuttavaṇṇanā
