| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
9. மஹாஅஸ்ஸபுரஸுத்தவண்ணனா
9. Mahāassapurasuttavaṇṇanā
415. ஜானபதி³னோதி ஜனபத³வந்தோ, ஜனபத³ஸ்ஸ வா இஸ்ஸரா ராஜகுமாரா கொ³த்தவஸேன அங்கா³ நாம. தேஸங் நிவாஸோ யதி³ ஏகோ ஜனபதோ³ , கத²ங் ப³ஹுவசனந்தி ஆஹ ‘‘ருள்ஹீஸத்³தே³னா’’தி. அக்க²ரசிந்தகா ஹி ஈதி³ஸேஸு டா²னேஸு யுத்தே விய ஸலிங்க³வசனானி (பாணினி 1.2.51) இச்ச²ந்தி. அயமெத்த² ருள்ஹீ யதா² ‘‘குரூஸு விஹரதி, மல்லேஸு விஹரதீ’’தி ச. தப்³பி³ஸேஸனே பன ஜனபத³ஸத்³தே³ ஜாதிஸத்³தே³ ஏகவசனமேவ. தேனாஹ ‘‘அங்கே³ஸு ஜனபதே³’’தி. அஸ்ஸா வுச்சந்தி பாஸாணானி, தானி ஸுந்த³ரானி தத்த² ஸந்தீதி ‘‘அஸ்ஸபுர’’ந்தி ஸோ நிக³மோ வுத்தோதி கேசீ. அபரே பன ஆஜானீயோ அஸ்ஸோ ரஞ்ஞோ தத்த² க³ஹணங் உபக³தோதி ‘‘அஸ்ஸபுர’’ந்தி வுத்தோதி வத³ந்தி. கிங் தேஹி, நாமமேதங் தஸ்ஸ நிக³மஸ்ஸ. யஸ்மா பன தத்த² ப⁴க³வதோ நிப³த்³த⁴வஸனட்டா²னங் கிஞ்சி நாஹோஸி, தஸ்மா ‘‘தங் கோ³சரகா³மங் கத்வா விஹரதி’’ச்சேவ வுத்தங். ததா² ஹி பாளியங் ‘‘அஸ்ஸபுரங் நாம அங்கா³னங் நிக³மோ’’தி கோ³சரகா³மகித்தனமேவ கதங்.
415.Jānapadinoti janapadavanto, janapadassa vā issarā rājakumārā gottavasena aṅgā nāma. Tesaṃ nivāso yadi eko janapado , kathaṃ bahuvacananti āha ‘‘ruḷhīsaddenā’’ti. Akkharacintakā hi īdisesu ṭhānesu yutte viya saliṅgavacanāni (pāṇini 1.2.51) icchanti. Ayamettha ruḷhī yathā ‘‘kurūsu viharati, mallesu viharatī’’ti ca. Tabbisesane pana janapadasadde jātisadde ekavacanameva. Tenāha ‘‘aṅgesu janapade’’ti. Assā vuccanti pāsāṇāni, tāni sundarāni tattha santīti ‘‘assapura’’nti so nigamo vuttoti kecī. Apare pana ājānīyo asso rañño tattha gahaṇaṃ upagatoti ‘‘assapura’’nti vuttoti vadanti. Kiṃ tehi, nāmametaṃ tassa nigamassa. Yasmā pana tattha bhagavato nibaddhavasanaṭṭhānaṃ kiñci nāhosi, tasmā ‘‘taṃ gocaragāmaṃ katvā viharati’’cceva vuttaṃ. Tathā hi pāḷiyaṃ ‘‘assapuraṃ nāma aṅgānaṃ nigamo’’ti gocaragāmakittanameva kataṃ.
ஏவரூபேன ஸீலேனாதிஆதீ³ஸு ஸீலக்³க³ஹணேன வாரித்தஸீலமாஹ. தேன ஸம்மாவாசாகம்மந்தாஜீவே த³ஸ்ஸேதி. ஆசாரக்³க³ஹணேன சாரித்தஸீலங். தேன பரிஸுத்³த⁴ங் காயவசீஸமாசாரங். படிபத்திக்³க³ஹணேன ஸமத²விபஸ்ஸனாமக்³க³ப²லஸங்க³ஹங் ஸம்மாபடிபத்திங். லஜ்ஜினோதி இமினா யதா²வுத்தஸீலாசாரமூலகாரணங். பேஸலாதி இமினா பாரிஸுத்³தி⁴ங். உளாரகு³ணாதி இமினா படிபத்தியா பாரிபூரிங். பி⁴க்கு²ஸங்க⁴ஸ்ஸேவ வண்ணங் கதெ²ந்தீதி இத³ங் தேஸங் உபாஸகானங் யேபு⁴ய்யேன பி⁴க்கூ²னங் கு³ணகித்தனபஸுததாய வுத்தங். தே பன ஸத்³த⁴ம்மேபி ஸம்மாஸம்பு³த்³தே⁴பி அபி⁴ப்பஸன்னா ஏவ. தேனாஹ ‘‘பு³த்³த⁴மாமகா த⁴ம்மமாமகா’’தி. வத்து²த்தயே ஹி ஏகஸ்மிங் அபி⁴ப்பஸன்னா இதரத்³வயே அபி⁴ப்பஸன்னா ஏவ தத³வினாபா⁴வதோ. பிண்ட³பாதாபசாயனேதி லக்க²ணவசனமேதங் யதா² ‘‘காகேஹி ஸப்பி ரக்கி²தப்³ப³’’ந்தி, தஸ்மா பச்சயபடிபூஜனேதி வுத்தங் ஹோதி. பச்சயதா³யகானஞ்ஹி காரஸ்ஸ அத்தனோ ஸம்மாபடிபத்தியா மஹப்ப²லபா⁴வஸ்ஸ கரணங் இத⁴ ‘‘பிண்ட³பாதாபசாயன’’ந்தி அதி⁴ப்பேதங்.
Evarūpena sīlenātiādīsu sīlaggahaṇena vārittasīlamāha. Tena sammāvācākammantājīve dasseti. Ācāraggahaṇena cārittasīlaṃ. Tena parisuddhaṃ kāyavacīsamācāraṃ. Paṭipattiggahaṇena samathavipassanāmaggaphalasaṅgahaṃ sammāpaṭipattiṃ. Lajjinoti iminā yathāvuttasīlācāramūlakāraṇaṃ. Pesalāti iminā pārisuddhiṃ. Uḷāraguṇāti iminā paṭipattiyā pāripūriṃ. Bhikkhusaṅghasseva vaṇṇaṃ kathentīti idaṃ tesaṃ upāsakānaṃ yebhuyyena bhikkhūnaṃ guṇakittanapasutatāya vuttaṃ. Te pana saddhammepi sammāsambuddhepi abhippasannā eva. Tenāha ‘‘buddhamāmakā dhammamāmakā’’ti. Vatthuttaye hi ekasmiṃ abhippasannā itaradvaye abhippasannā eva tadavinābhāvato. Piṇḍapātāpacāyaneti lakkhaṇavacanametaṃ yathā ‘‘kākehi sappi rakkhitabba’’nti, tasmā paccayapaṭipūjaneti vuttaṃ hoti. Paccayadāyakānañhi kārassa attano sammāpaṭipattiyā mahapphalabhāvassa karaṇaṃ idha ‘‘piṇḍapātāpacāyana’’nti adhippetaṃ.
ஸமணகரணாதி ஸமணபா⁴வகரா, ஸமணபா⁴வஸ்ஸ காரகாதி அத்தோ². தே பன ஏகந்ததோ அத்தனோ ஸந்தானே உப்பாதி³தா வட்³டி⁴தா ச ஹொந்தீதி ஆஹ ‘‘ஸமாதா³ய பரிபூரிதா’’தி. ஸமணக்³க³ஹணஞ்செத்த² ஸமணவஸேன, ந ஸாமஞ்ஞமத்தேனாதி ஆஹ ‘‘ஸமிதபாபஸமண’’ந்தி. ப்³ராஹ்மணகரணாதி எத்தா²பி வுத்தனயேனேவத்தோ² வேதி³தப்³போ³. ப்³யஞ்ஜனதோ ஏவ சாயங் பே⁴தோ³, யதி³த³ங் ஸமணப்³ராஹ்மணாதி , ந அத்த²தோ. ஸமணேன கத்தப்³ப³த⁴ம்மாதி ஸமணத⁴ம்மே டி²தேன ஸம்பாதே³தப்³ப³த⁴ம்மா. யோ ஹி ஹெட்டி²மஸிக்கா²ஸங்கா²தஸமணபா⁴வே ஸுப்பதிட்டி²தோ, தேன யே உபரிஸிக்கா²ஸங்கா²தஸமணபா⁴வா ஸம்பாதே³தப்³பா³, தேஸங் வஸேனேவ வுத்தஸமணேன கத்தப்³ப³த⁴ம்மா வுத்தாதி. ததா² ஹி தேஸங் ஸமணபா⁴வாவஹதங் ஸந்தா⁴யாஹ ‘‘தேபி ச ஸமணகரணா ஹொந்தியேவா’’தி. இத⁴ பனாதி மஹாஅஸ்ஸபுரே. ஹிரொத்தப்பாதி³வஸேன தே³ஸனா வித்தா²ரிதாதி ஹிரொத்தப்ப-பரிஸுத்³த⁴காயவசீமனோஸமாசாராஜீவஇந்த்³ரியஸங்வர-போ⁴ஜனேமத்தஞ்ஞுத- ஜாக³ரியானுயோக³ஸதிஸம்பஜஞ்ஞ-ஜா²னவிஜ்ஜாவஸேன ஸமணகரணத⁴ம்மதே³ஸனா வித்தா²ரதோ தே³ஸிதா, ந திகனிபாதே விய ஸங்கே²பதோ. ப²லக்³க³ஹணேனேவ விபாகப²லங் க³ஹிதங், தங் பன உக்கட்ட²னித்³தே³ஸேன சதுப்³பி³த⁴ங் ஸாமஞ்ஞப²லங் த³ட்ட²ப்³ப³ங். ஆனிஸங்ஸக்³க³ஹணேன பியமனாபதாதி³உத்³ரயோ. தஸ்ஸேவ அத்தோ²தி தஸ்ஸேவ அவஞ்சாபத³ஸ்ஸேவ அத்த²னித்³தே³ஸோ. ‘‘யஸ்ஸா ஹீ’’திஆதி³னா ப்³யதிரேகவஸேன அத்த²ங் வத³தி. எத்தகேன டா²னேனாதி எத்தகேன பாளிபதே³ஸேன. ஹிரொத்தப்பாதீ³னங் உபரி பாளியங் வுச்சமானானங் ஸமணகரணத⁴ம்மானங். வண்ணங் கதே²ஸீதி கு³ணங் ஆனிஸங்ஸங் அபா⁴ஸி. ஸதிபட்டா²னே வுத்தனயேனாதி ‘‘அபிச வண்ணப⁴ணனமேத’’ந்திஆதி³னா ஸதிபட்டா²னவண்ணனாயங் (தீ³॰ நி॰ அட்ட²॰ 2.373; ம॰ நி॰ அட்ட²॰ 1.106) வுத்தனயேன.
Samaṇakaraṇāti samaṇabhāvakarā, samaṇabhāvassa kārakāti attho. Te pana ekantato attano santāne uppāditā vaḍḍhitā ca hontīti āha ‘‘samādāya paripūritā’’ti. Samaṇaggahaṇañcettha samaṇavasena, na sāmaññamattenāti āha ‘‘samitapāpasamaṇa’’nti. Brāhmaṇakaraṇāti etthāpi vuttanayenevattho veditabbo. Byañjanato eva cāyaṃ bhedo, yadidaṃ samaṇabrāhmaṇāti , na atthato. Samaṇenakattabbadhammāti samaṇadhamme ṭhitena sampādetabbadhammā. Yo hi heṭṭhimasikkhāsaṅkhātasamaṇabhāve suppatiṭṭhito, tena ye uparisikkhāsaṅkhātasamaṇabhāvā sampādetabbā, tesaṃ vaseneva vuttasamaṇena kattabbadhammā vuttāti. Tathā hi tesaṃ samaṇabhāvāvahataṃ sandhāyāha ‘‘tepi ca samaṇakaraṇā hontiyevā’’ti. Idha panāti mahāassapure. Hirottappādivasena desanā vitthāritāti hirottappa-parisuddhakāyavacīmanosamācārājīvaindriyasaṃvara-bhojanemattaññuta- jāgariyānuyogasatisampajañña-jhānavijjāvasena samaṇakaraṇadhammadesanā vitthārato desitā, na tikanipāte viya saṅkhepato. Phalaggahaṇeneva vipākaphalaṃ gahitaṃ, taṃ pana ukkaṭṭhaniddesena catubbidhaṃ sāmaññaphalaṃ daṭṭhabbaṃ. Ānisaṃsaggahaṇena piyamanāpatādiudrayo. Tasseva atthoti tasseva avañcāpadasseva atthaniddeso. ‘‘Yassā hī’’tiādinā byatirekavasena atthaṃ vadati. Ettakena ṭhānenāti ettakena pāḷipadesena. Hirottappādīnaṃ upari pāḷiyaṃ vuccamānānaṃ samaṇakaraṇadhammānaṃ. Vaṇṇaṃ kathesīti guṇaṃ ānisaṃsaṃ abhāsi. Satipaṭṭhāne vuttanayenāti ‘‘apica vaṇṇabhaṇanameta’’ntiādinā satipaṭṭhānavaṇṇanāyaṃ (dī. ni. aṭṭha. 2.373; ma. ni. aṭṭha. 1.106) vuttanayena.
416. யங் ஹிரீயதீதி யேன த⁴ம்மேன ஹேதுபூ⁴தேன வா ஜிகு³ச்ச²தி. கரணே ஹேதங் பச்சத்தவசனங். யந்தி வா லிங்க³விபல்லாஸேன வுத்தோ, த⁴ம்மோதி அத்தோ². ஹிரீயிதப்³பே³னாதி உபயோக³த்தே² கரணவசனங், ஹிரீயிதப்³ப³யுத்தகங் காயது³ச்சரிதாதி³ந்தி அத்தோ². ஒத்தப்பிதப்³பே³னாதி எத்தா²பி ஏஸேவ நயோ. அஜ்ஜ²த்தங் நியகஜ்ஜ²த்தங் ஜாதிஆதி³ ஸமுட்டா²னங் ஏதிஸ்ஸாதி அஜ்ஜ²த்தஸமுட்டா²னா ஹிரீ, ப³ஹித்³தா⁴ அத்ததோ ப³ஹிபூ⁴தோ பரஸத்தோ ஸமுட்டா²னங் ஏதிஸ்ஸாதி ப³ஹித்³தா⁴ஸமுட்டா²னங் ஒத்தப்பங். அத்தாதி⁴பதிதோ ஆக³தா அத்தாதி⁴பதெய்யா, அத்தானங் அதி⁴பதிங் கத்வா பவத்தா. லஜ்ஜாஸபா⁴வஸண்டி²தாதி பாபஜிகு³ச்ச²னஸபா⁴வட்டா²யினீ. ஸப்பதிஸ்ஸவலக்க²ணத்தா க³ருனா கிஸ்மிஞ்சி வுத்தே கா³ரவவஸேன பதிஸ்ஸவனங் பதிஸ்ஸவோ, ஸஹ பதிஸ்ஸவேனாதி ஸப்பதிஸ்ஸவங், பதிஸ்ஸவபூ⁴தங் தங்ஸபா⁴வஞ்ச யங் கிஞ்சி கா³ரவங். ஜாதிஆதி³மஹத்ததாபச்சவெக்க²ணேன உப்பஜ்ஜமானா ச ஹிரீ தத்த² கா³ரவவஸேன பவத்ததீதி ஸப்பதிஸ்ஸவலக்க²ணாதி வுச்சதி. ப⁴யஸபா⁴வஸண்டி²தந்தி பாபதோ பா⁴யனஸபா⁴வட்டா²யீ, வஜ்ஜபீ⁴ருகப⁴யத³ஸ்ஸாவிலக்க²ணத்தா வஜ்ஜங் பா⁴யதி தங் ப⁴யதோ பஸ்ஸதீதி வஜ்ஜபீ⁴ருகப⁴யத³ஸ்ஸாவீ, ஏவங்ஸபா⁴வங் ஒத்தப்பங். அஜ்ஜ²த்தஸமுட்டா²னாதி³தா ச ஹிரொத்தப்பானங் தத்த² தத்த² பாகடபா⁴வேனேவ வுச்சதி, ந பரேஸங் கதா³சி அஞ்ஞமஞ்ஞவிப்பயோகா³. ந ஹி லஜ்ஜனங் நிப்³ப⁴யங், பாபப⁴யங் வா அலஜ்ஜனங் ஹோதீதி. அயமெத்த² ஸங்கே²போ, வித்தா²ரோ பன அட்ட²ஸாலினியங் (த⁴॰ ஸ॰ அட்ட²॰ 1.ப³லராஸிவண்ணனா) வுத்தனயேனேவ வேதி³தப்³போ³. லோகமரியாத³ஸ்ஸ பாலனதோ லோகபாலத⁴ம்மா நாம. ஸுக்காதி ஓதா³தா பப⁴ஸ்ஸரபா⁴வகாரகா, ஸுக்காபி⁴ஜாதிஹேதுதாய வா ஸுக்கா. ஸம்பே⁴த³ந்தி ஆசாரமரியாதா³ஸங்கரங். தே³வபா⁴வாவஹா த⁴ம்மாதி தே³வத⁴ம்மா.
416.Yaṃ hirīyatīti yena dhammena hetubhūtena vā jigucchati. Karaṇe hetaṃ paccattavacanaṃ. Yanti vā liṅgavipallāsena vutto, dhammoti attho. Hirīyitabbenāti upayogatthe karaṇavacanaṃ, hirīyitabbayuttakaṃ kāyaduccaritādinti attho. Ottappitabbenāti etthāpi eseva nayo. Ajjhattaṃ niyakajjhattaṃ jātiādi samuṭṭhānaṃ etissāti ajjhattasamuṭṭhānā hirī, bahiddhā attato bahibhūto parasatto samuṭṭhānaṃ etissāti bahiddhāsamuṭṭhānaṃ ottappaṃ. Attādhipatito āgatā attādhipateyyā, attānaṃ adhipatiṃ katvā pavattā. Lajjāsabhāvasaṇṭhitāti pāpajigucchanasabhāvaṭṭhāyinī. Sappatissavalakkhaṇattā garunā kismiñci vutte gāravavasena patissavanaṃ patissavo, saha patissavenāti sappatissavaṃ, patissavabhūtaṃ taṃsabhāvañca yaṃ kiñci gāravaṃ. Jātiādimahattatāpaccavekkhaṇena uppajjamānā ca hirī tattha gāravavasena pavattatīti sappatissavalakkhaṇāti vuccati. Bhayasabhāvasaṇṭhitanti pāpato bhāyanasabhāvaṭṭhāyī, vajjabhīrukabhayadassāvilakkhaṇattā vajjaṃ bhāyati taṃ bhayato passatīti vajjabhīrukabhayadassāvī, evaṃsabhāvaṃ ottappaṃ. Ajjhattasamuṭṭhānāditā ca hirottappānaṃ tattha tattha pākaṭabhāveneva vuccati, na paresaṃ kadāci aññamaññavippayogā. Na hi lajjanaṃ nibbhayaṃ, pāpabhayaṃ vā alajjanaṃ hotīti. Ayamettha saṅkhepo, vitthāro pana aṭṭhasāliniyaṃ (dha. sa. aṭṭha. 1.balarāsivaṇṇanā) vuttanayeneva veditabbo. Lokamariyādassa pālanato lokapāladhammā nāma. Sukkāti odātā pabhassarabhāvakārakā, sukkābhijātihetutāya vā sukkā. Sambhedanti ācāramariyādāsaṅkaraṃ. Devabhāvāvahā dhammāti devadhammā.
ஸுக்கத⁴ம்மஸமாஹிதாதி யதா²வுத்தஸுக்கத⁴ம்மஸமங்கி³னோ. ஸந்தோதி வூபஸந்ததோ³ஸா. ஸப்புரிஸாதி ஸந்தஜனா. ஸபரஹிதஸாத⁴கா ஹி ஸாத⁴வோ.
Sukkadhammasamāhitāti yathāvuttasukkadhammasamaṅgino. Santoti vūpasantadosā. Sappurisāti santajanā. Saparahitasādhakā hi sādhavo.
அவயவவினிமுத்தஸ்ஸ ஸமுதா³யஸ்ஸ அபா⁴வதோ, அவயவேன ச ஸமுதா³யஸ்ஸ அபதி³ஸிதப்³ப³தோ ஓவாதூ³பஸம்பதா³வஹஓவாதே³கதே³ஸோ ஓவாதூ³பஸம்பதா³தி. இதா⁴தி இமஸ்மிங் அஸ்ஸபுரே. ஏதே ஹிரொத்தப்பத⁴ம்மா. ஸமணத⁴ம்மா நாமாதி த³ஸ்ஸிதா மூலபூ⁴தஸமணபா⁴வகரா த⁴ம்மாதி கத்வா. ததா² ஹி தேஸங் ஆதி³தோ க³ஹணங்.
Avayavavinimuttassa samudāyassa abhāvato, avayavena ca samudāyassa apadisitabbato ovādūpasampadāvahaovādekadeso ovādūpasampadāti. Idhāti imasmiṃ assapure. Ete hirottappadhammā. Samaṇadhammā nāmāti dassitā mūlabhūtasamaṇabhāvakarā dhammāti katvā. Tathā hi tesaṃ ādito gahaṇaṃ.
யஸ்ஸ அதி⁴க³மேன நிப்பரியாயதோ ஸமணா நாம ஹொந்தி, ஸோ அரியமக்³கோ³ ‘‘ஸமணஸ்ஸ கம்மங் படிபதா³’’தி கத்வா ஸாமஞ்ஞங், தஸ்ஸ பன ப²லபா⁴வதோ, ஆரம்மணகரணவஸேன அரணீயதோ ப²லனிப்³பா³னானி ஸாமஞ்ஞத்தோ². ராக³ங் கே²பேதீதி ராக³க்க²யோ, அரியமக்³கோ³. ராகோ³ கீ²யதி எத்தா²தி ராக³க்க²யோ, நிப்³பா³னங். ப²லங் பன காரணூபசாரேன ராக³க்க²யோ த³ட்ட²ப்³போ³. தோ³ஸக்க²யோ மோஹக்க²யோதி எத்தா²பி ஏஸேவ நயோ. ஸாமஞ்ஞபூ⁴தோ அத்தோ² ஸாமஞ்ஞத்தோ², மக்³கோ³, ஸாமஞ்ஞஸ்ஸ அத்தோ²தி ஸாமஞ்ஞத்தோ², ப²லந்தி ஆஹ ‘‘மக்³க³ம்பி ப²லம்பி ஏகதோ கத்வா ஸாமஞ்ஞத்தோ² கதி²தோ’’தி. தயித³ங் உக்கட்ட²னித்³தே³ஸேன வுத்தங். ஸீலாதி³புப்³ப³பா⁴க³படிபதா³பி ஹி இத⁴ ‘‘ஸாமஞ்ஞத்தோ²’’தி க³ஹிதா. தேனேவாஹ ‘‘ஸதி உத்தரிகரணீயே’’தி. படிவேத³யாமீதி புனப்புனங் ஞாபேமி.
Yassa adhigamena nippariyāyato samaṇā nāma honti, so ariyamaggo ‘‘samaṇassa kammaṃ paṭipadā’’ti katvā sāmaññaṃ, tassa pana phalabhāvato, ārammaṇakaraṇavasena araṇīyato phalanibbānāni sāmaññattho. Rāgaṃ khepetīti rāgakkhayo, ariyamaggo. Rāgo khīyati etthāti rāgakkhayo, nibbānaṃ. Phalaṃ pana kāraṇūpacārena rāgakkhayo daṭṭhabbo. Dosakkhayo mohakkhayoti etthāpi eseva nayo. Sāmaññabhūto attho sāmaññattho, maggo, sāmaññassa atthoti sāmaññattho, phalanti āha ‘‘maggampi phalampi ekato katvā sāmaññattho kathito’’ti. Tayidaṃ ukkaṭṭhaniddesena vuttaṃ. Sīlādipubbabhāgapaṭipadāpi hi idha ‘‘sāmaññattho’’ti gahitā. Tenevāha ‘‘sati uttarikaraṇīye’’ti. Paṭivedayāmīti punappunaṃ ñāpemi.
417. கம்மபத²வஸேனேவாதி அகுஸலகம்மபத²பா⁴வேனேவ, ததோ தாதி³ஸம்பி அகுஸலகம்மங் பி⁴க்கு²ஸ்ஸ காதுங் ந யுத்தந்தி து³ட்டு²ல்லபா⁴வேனேவ ததோ ஓரமதீதி அதி⁴ப்பாயோ. ஸிக்கா²பத³ப³த்³தே⁴னாதி ஸிக்கா²பத³பஞ்ஞாபனேன. பானீயக⁴டே வா பத்தே வா காகானங் ஹத்த²ங் வா த³ண்ட³ங் வா லெட்³டு³ங் வாதி ஸப்³ப³மித³ங் நித³ஸ்ஸனமத்தங் த³ட்ட²ப்³ப³ங். யத்த² கத்த²சி ஹி டி²தானங் அஞ்ஞேஸம்பி பாணீனங் உட்டா²பனாதி³ ஸப்³ப³ங் அனிட்ட²கரணங் இத⁴ அபரிஸுத்³த⁴காயஸமாசாரபா⁴வேனேவ ஸங்க³ஹிதந்தி. உத்தானோதி உத்³த⁴முத்³த⁴ங் தனோதீதி உத்தானோ. ஏவங்பூ⁴தோ ச கேனசி அனுப்பாத³பூ⁴மியங் ஸஞ்ஜாதஸாலகல்யாணீக²ந்தோ⁴ விய உபரூபரி உக்³க³துக்³க³தோ பாகடோ ச ஹோதீதி ஆஹ ‘‘உக்³க³தோ பாகடோ’’தி. அனாவடோதி அனிவுதோ. தேனாஹ ‘‘அஸஞ்ச²ன்னோ’’தி, நச்சா²தே³தப்³போ³தி அத்தோ². ஏகஸதி³ஸோ விஸுத்³த⁴பா⁴வேன. அந்தரந்தரே சி²த்³த³ரஹிதோ புப்³பே³னாபரங் ஸம்மாபடிபத்தியா ஸந்தா⁴னேன. ஸங்வுதோ காயிகஸ்ஸ ஸங்வரஸ்ஸ அனுபக்கிலேஸதோ. தேனாஹ ‘‘கிலேஸானங் த்³வாரங் பித³ஹனேனா’’தி.
417.Kammapathavasenevāti akusalakammapathabhāveneva, tato tādisampi akusalakammaṃ bhikkhussa kātuṃ na yuttanti duṭṭhullabhāveneva tato oramatīti adhippāyo. Sikkhāpadabaddhenāti sikkhāpadapaññāpanena. Pānīyaghaṭe vā patte vā kākānaṃ hatthaṃ vā daṇḍaṃ vā leḍḍuṃ vāti sabbamidaṃ nidassanamattaṃ daṭṭhabbaṃ. Yattha katthaci hi ṭhitānaṃ aññesampi pāṇīnaṃ uṭṭhāpanādi sabbaṃ aniṭṭhakaraṇaṃ idha aparisuddhakāyasamācārabhāveneva saṅgahitanti. Uttānoti uddhamuddhaṃ tanotīti uttāno. Evaṃbhūto ca kenaci anuppādabhūmiyaṃ sañjātasālakalyāṇīkhandho viya uparūpari uggatuggato pākaṭo ca hotīti āha ‘‘uggato pākaṭo’’ti. Anāvaṭoti anivuto. Tenāha ‘‘asañchanno’’ti, nacchādetabboti attho. Ekasadiso visuddhabhāvena. Antarantare chiddarahito pubbenāparaṃ sammāpaṭipattiyā sandhānena. Saṃvuto kāyikassa saṃvarassa anupakkilesato. Tenāha ‘‘kilesānaṃ dvāraṃ pidahanenā’’ti.
418. எத்த² யதா² லஹுகதரங் காகுட்டா²பனாதி³காயகம்மங் காயஸமாசாரஸ்ஸ அபரிஸுத்³த⁴பா⁴வாவஹங் ஸல்லேக²விகோபனதோ, மிச்சா²விதக்கனமத்தஞ்ச மனோஸமாசாரஸ்ஸ, ஏவங் யங் கிஞ்சி அனிய்யானகதா²கத²னமத்தங் வசீஸமாசாரஸ்ஸ அபரிஸுத்³த⁴பா⁴வாவஹங் ஸல்லேக²விகோபனதோ, ந ஹஸாதி⁴ப்பாயேன முஸாகத²னந்தி த³ட்ட²ப்³ப³ங். ஹஸாதி⁴ப்பாயேன ஹி முஸாகத²னங் ஸிக்கா²பத³ப³த்³தே⁴னேவ படிக்கி²த்தந்தி.
418. Ettha yathā lahukataraṃ kākuṭṭhāpanādikāyakammaṃ kāyasamācārassa aparisuddhabhāvāvahaṃ sallekhavikopanato, micchāvitakkanamattañca manosamācārassa, evaṃ yaṃ kiñci aniyyānakathākathanamattaṃ vacīsamācārassa aparisuddhabhāvāvahaṃ sallekhavikopanato, na hasādhippāyena musākathananti daṭṭhabbaṃ. Hasādhippāyena hi musākathanaṃ sikkhāpadabaddheneva paṭikkhittanti.
420. ஆஜீவோபி ஏகச்சோ கம்மபத²வஸேன வாரிதோ லப்³ப⁴தி. ஸோ பன அதிஓளாரிகோ காயவசீஸமாசாரவாரேஸு வுத்தனயோ ஏவாதி ந க³ஹிதோதி த³ட்ட²ப்³ப³ங். யே பன ‘‘தாதி³ஸோ பி⁴க்கூ²னங் அயொக்³யதோ ந க³ஹிதோ’’தி வத³ந்தி, தங் மிச்சா² ததா² ஸதி காயவசீஸமாசாரவாரேபி தஸ்ஸ அக்³க³ஹேதப்³ப³பா⁴வாபத்திதோ. ‘‘கா²த³த² பிவதா²’’தி புச்சா² அத்தனோ கா²தி³துகாமதாதீ³பனேன, பரியாயகதா²பா⁴வதோ பனேஸா ஸல்லேக²விகோபனா ஜாதா.
420. Ājīvopi ekacco kammapathavasena vārito labbhati. So pana atioḷāriko kāyavacīsamācāravāresu vuttanayo evāti na gahitoti daṭṭhabbaṃ. Ye pana ‘‘tādiso bhikkhūnaṃ ayogyato na gahito’’ti vadanti, taṃ micchā tathā sati kāyavacīsamācāravārepi tassa aggahetabbabhāvāpattito. ‘‘Khādatha pivathā’’ti pucchā attano khāditukāmatādīpanena, pariyāyakathābhāvato panesā sallekhavikopanā jātā.
422. அனேஸனங் பஹாய த⁴ம்மேன ஸமேன பச்சயே பரியேஸந்தோ பரியேஸனமத்தஞ்ஞூ நாம. தா³யகஸ்ஸ தெ³ய்யத⁴ம்மஸ்ஸ அத்தனோ ச பமாணஞ்ஞுதாபடிக்³க³ண்ஹந்தோ படிக்³க³ஹணமத்தஞ்ஞூ நாம. யோனிஸோ பச்சவெக்கி²த்வா பரிபு⁴ஞ்ஜந்தோ பரிபோ⁴க³மத்தஞ்ஞூ நாம.
422. Anesanaṃ pahāya dhammena samena paccaye pariyesanto pariyesanamattaññū nāma. Dāyakassa deyyadhammassa attano ca pamāṇaññutāpaṭiggaṇhanto paṭiggahaṇamattaññū nāma. Yoniso paccavekkhitvā paribhuñjanto paribhogamattaññū nāma.
423. ஏகஸ்மிங் கொட்டா²ஸேதி மஜ்ஜி²மயாமஸஞ்ஞிதே ஏகஸ்மிங் கொட்டா²ஸே. ‘‘வாமேன பஸ்ஸேன ஸெந்தீ’’தி ஏவங் வுத்தா. த³க்கி²ணபஸ்ஸேன ஸயானோ நாம நத்தி² த³க்கி²ணஹத்த²ஸ்ஸ ஸரீரக்³க³ஹணாதி³பயோக³க்க²மதோ. புரிஸவஸேன சேதங் வுத்தங்.
423.Ekasmiṃkoṭṭhāseti majjhimayāmasaññite ekasmiṃ koṭṭhāse. ‘‘Vāmena passena sentī’’ti evaṃ vuttā. Dakkhiṇapassena sayāno nāma natthi dakkhiṇahatthassa sarīraggahaṇādipayogakkhamato. Purisavasena cetaṃ vuttaṃ.
தேஜுஸ்ஸத³த்தாதி இமினா ஸீஹஸ்ஸ அபீ⁴ருகபா⁴வங் த³ஸ்ஸேதி. பீ⁴ருகா ஹி ஸேஸமிகா³ அத்தனோ ஆஸயங் பவிஸித்வா ஸந்தாஸபுப்³ப³கங் யதா² ததா² ஸயந்தி, ஸீஹோ பன அபீ⁴ருகபா⁴வதோ ஸதோகாரீ பி⁴க்கு² விய ஸதிங் உபட்ட²பெத்வாவ ஸயதி. தேனாஹ ‘‘த்³வே புரிமபாதே³’’திஆதி³. ஸேதி அப்³யாவடபா⁴வேன பவத்ததி எத்தா²தி ஸெய்யா, சதுத்த²ஜ்ஜா²னமேவ ஸெய்யா. கிங் பன தங் சதுத்த²ஜ்ஜா²னந்தி? ஆனாபானசதுத்த²ஜ்ஜா²னங். தத்த² ஹி ட²த்வா விபஸ்ஸனங் வட்³டெ⁴த்வா ப⁴க³வா அனுக்கமேன அக்³க³மக்³க³ங் அதி⁴க³தோ ததா²க³தோ ஜாதோதி கேசி, தயித³ங் பத³ட்டா²னங் நாம ந ஸெய்யா. அபரே பன ‘‘சதுத்த²ஜ்ஜா²னஸமனந்தரா ப⁴க³வா பரினிப்³பா³யீ’’தி வுத்தபத³ங் க³ஹெத்வா ‘‘லோகியசதுத்த²ஜ்ஜா²னஸமாபத்தி ததா²க³தஸெய்யா’’தி வத³ந்தி, ததா² ஸதி பரினிப்³பா³னகாலிகா ததா²க³தஸெய்யாதி ஆபஜ்ஜதி, ந ச ப⁴க³வா சதுத்த²ஜ்ஜா²னங் ஸமாபஜ்ஜனப³ஹுலோ விஹாஸி, அக்³க³ப²லஜா²னங் பனெத்த² ‘‘சதுத்த²ஜ்ஜா²ன’’ந்தி அதி⁴ப்பேதங். தத்த² யதா² ஸத்தானங் நித்³து³பக³மனலக்க²ணா ஸெய்யா ப⁴வங்க³சித்தவாரவஸேன ஹோதி, தஞ்ச தேஸங் பட²மஜாதிஸமன்வயங் யேபு⁴ய்யவுத்திகங், ஏவங் ப⁴க³வதோ அரியஜாதிஸமன்வயங் யேபு⁴ய்யவுத்திகங் அக்³க³ப²லபூ⁴தங் சதுத்த²ஜ்ஜா²னங் ‘‘ததா²க³தஸெய்யா’’தி வேதி³தப்³ப³ங். ஸீஹஸெய்யாதி ஸெட்ட²ஸெய்யாதி ஆஹ ‘‘உத்தமஸெய்யா’’தி.
Tejussadattāti iminā sīhassa abhīrukabhāvaṃ dasseti. Bhīrukā hi sesamigā attano āsayaṃ pavisitvā santāsapubbakaṃ yathā tathā sayanti, sīho pana abhīrukabhāvato satokārī bhikkhu viya satiṃ upaṭṭhapetvāva sayati. Tenāha ‘‘dve purimapāde’’tiādi. Seti abyāvaṭabhāvena pavattati etthāti seyyā, catutthajjhānameva seyyā. Kiṃ pana taṃ catutthajjhānanti? Ānāpānacatutthajjhānaṃ. Tattha hi ṭhatvā vipassanaṃ vaḍḍhetvā bhagavā anukkamena aggamaggaṃ adhigato tathāgato jātoti keci, tayidaṃ padaṭṭhānaṃ nāma na seyyā. Apare pana ‘‘catutthajjhānasamanantarā bhagavā parinibbāyī’’ti vuttapadaṃ gahetvā ‘‘lokiyacatutthajjhānasamāpatti tathāgataseyyā’’ti vadanti, tathā sati parinibbānakālikā tathāgataseyyāti āpajjati, na ca bhagavā catutthajjhānaṃ samāpajjanabahulo vihāsi, aggaphalajhānaṃ panettha ‘‘catutthajjhāna’’nti adhippetaṃ. Tattha yathā sattānaṃ niddupagamanalakkhaṇā seyyā bhavaṅgacittavāravasena hoti, tañca tesaṃ paṭhamajātisamanvayaṃ yebhuyyavuttikaṃ, evaṃ bhagavato ariyajātisamanvayaṃ yebhuyyavuttikaṃ aggaphalabhūtaṃ catutthajjhānaṃ ‘‘tathāgataseyyā’’ti veditabbaṃ. Sīhaseyyāti seṭṭhaseyyāti āha ‘‘uttamaseyyā’’ti.
426. விக³தந்தானீதி இணமூலானி. தேஸந்தி இணமூலானங். பரியந்தோதி அவஸேஸோ.
426.Vigatantānīti iṇamūlāni. Tesanti iṇamūlānaṃ. Pariyantoti avaseso.
பவத்தினிவாரணேன சதுஇரியாபத²ங் சி²ந்த³ந்தோ. ஆபா³த⁴தீதி பீளேதி. து³க்கி²தோதி ஸஞ்ஜாதது³க்கோ². அப்பங் ப³லங் ப³லமத்தா. அப்பத்தோ² ஹி அயங் மத்தா-ஸத்³தோ³ ‘‘மத்தாஸுக²பரிச்சாகா³’’திஆதீ³ஸு (த⁴॰ ப॰ 290) விய, ப³லவத்தோ² பன மத்தா-ஸத்³தோ³ அனத்த²ந்தரோ. ஸேஸந்தி ‘‘தஸ்ஸ ஹி ப³ந்த⁴னா முத்தொம்ஹீதி ஆவஜ்ஜயதோ தது³ப⁴யங் ஹோதீ’’திஆதி³னா வத்தப்³ப³ங் ஸந்தா⁴யாஹ. ஸப்³ப³பதே³ஸூதி வுத்தாவஸிட்டே²ஸு ஸப்³ப³பதே³ஸு. யேனகாமங் யதா²ருசி க³ச்ச²தீதி யேனகாமங்க³மோதி அனுனாஸிகலோபங் அகத்வா நித்³தே³ஸோ. பு⁴ஜோ அத்தனோ யதா²ஸுக²வினியோகோ³ இஸ்ஸோ இச்சி²தப்³போ³ எத்தா²தி பு⁴ஜிஸ்ஸோ, ஸாமிகோ. ஸோ பன அபரஸந்தகதாய ‘‘அத்தனோ ஸந்தகோ’’தி வுத்தோ. து³ல்லப⁴ஆபதாய கங் தாரெந்தி எத்தா²தி கந்தாரோதி ஆஹ ‘‘நிருத³கங் தீ³க⁴மக்³க³’’ந்தி.
Pavattinivāraṇena catuiriyāpathaṃ chindanto. Ābādhatīti pīḷeti. Dukkhitoti sañjātadukkho. Appaṃ balaṃ balamattā. Appattho hi ayaṃ mattā-saddo ‘‘mattāsukhapariccāgā’’tiādīsu (dha. pa. 290) viya, balavattho pana mattā-saddo anatthantaro. Sesanti ‘‘tassa hi bandhanā muttomhīti āvajjayato tadubhayaṃ hotī’’tiādinā vattabbaṃ sandhāyāha. Sabbapadesūti vuttāvasiṭṭhesu sabbapadesu. Yenakāmaṃ yathāruci gacchatīti yenakāmaṃgamoti anunāsikalopaṃ akatvā niddeso. Bhujo attano yathāsukhaviniyogo isso icchitabbo etthāti bhujisso, sāmiko. So pana aparasantakatāya ‘‘attano santako’’ti vutto. Dullabhaāpatāya kaṃ tārenti etthāti kantāroti āha ‘‘nirudakaṃ dīghamagga’’nti.
வினாஸேதீதி கா²த³னது³ப்³பி³னியோஜனாதீ³ஹி யதா² இணமூலங் கிஞ்சி ந ஹோதி, ததா² கரோதி. யம்ஹி ராக³வத்து²ம்ஹி. ஸோ புக்³க³லோ. தேன ராக³வத்து²னா, புரிஸோ சே இத்தி²யா, இத்தீ² சே புரிஸேன. இணங் விய காமச்ச²ந்தோ³ த³ட்ட²ப்³போ³ பீளாஸமானதோ.
Vināsetīti khādanadubbiniyojanādīhi yathā iṇamūlaṃ kiñci na hoti, tathā karoti. Yamhi rāgavatthumhi. So puggalo. Tena rāgavatthunā, puriso ce itthiyā, itthī ce purisena. Iṇaṃ viya kāmacchando daṭṭhabbo pīḷāsamānato.
ந விந்த³தீதி ந ஜானாதி. உபத்³த³வேதா²தி ஸுக²விஹாரஸ்ஸ உபத்³த³வங் கரோத², விபா³தே⁴தா²தி அத்தோ². ரோகோ³ விய ப்³யாபாதோ³ த³ட்ட²ப்³போ³ ஸுக²ப⁴ஞ்ஜனஸமானதோ.
Na vindatīti na jānāti. Upaddavethāti sukhavihārassa upaddavaṃ karotha, vibādhethāti attho. Rogo viya byāpādo daṭṭhabbo sukhabhañjanasamānato.
நானாவித⁴ஹேதூபாயாலங்கததாய க²ந்தா⁴யதனதா⁴துபடிச்சஸமுப்பாதா³தி³த⁴ம்மனீதிவிசித்ததாய ச விசித்தனயே. த⁴ம்மஸ்ஸவனேதி த⁴ம்மகதா²யங். கதா² ஹி ஸோதப்³ப³ட்டே²ன ‘‘ஸவன’’ந்தி வுத்தா. ஏவமெத்த² ஸீலங் விப⁴த்தங், ஏவங் ஜா²னாபி⁴ஞ்ஞா, ஏவங் விபஸ்ஸனாமக்³க³ப²லானீதி நேவ தஸ்ஸ த⁴ம்மஸ்ஸவனஸ்ஸ ஆதி³மஜ்ஜ²பரியோஸானங் ஜானாதி. உட்டி²தேதி நிட்டி²தே. அஹோ காரணந்தி தத்த² தத்த² படிஞ்ஞானுரூபேன நிக்கி²த்தஸாத⁴னவஸேன க³ஹிதகாரணங். அஹோ உபமாதி தஸ்ஸேவ காரணஸ்ஸ பதிட்டா²பனவஸேன அன்வயதோ ப்³யதிரேகதோ ச பதிட்ட²ங் உதா³ஹரணாதி³. ப³ந்த⁴னாகா³ரங் விய தி²னமித்³த⁴ங் த³ட்ட²ப்³ப³ங் து³க்க²தோ நிய்யானஸ்ஸ விப³ந்த⁴னதோ.
Nānāvidhahetūpāyālaṅkatatāya khandhāyatanadhātupaṭiccasamuppādādidhammanītivicittatāya ca vicittanaye. Dhammassavaneti dhammakathāyaṃ. Kathā hi sotabbaṭṭhena ‘‘savana’’nti vuttā. Evamettha sīlaṃ vibhattaṃ, evaṃ jhānābhiññā, evaṃ vipassanāmaggaphalānīti neva tassa dhammassavanassa ādimajjhapariyosānaṃ jānāti. Uṭṭhiteti niṭṭhite. Aho kāraṇanti tattha tattha paṭiññānurūpena nikkhittasādhanavasena gahitakāraṇaṃ. Aho upamāti tasseva kāraṇassa patiṭṭhāpanavasena anvayato byatirekato ca patiṭṭhaṃ udāharaṇādi. Bandhanāgāraṃ viya thinamiddhaṃ daṭṭhabbaṃ dukkhato niyyānassa vibandhanato.
யஸ்மா குக்குச்சனீவரணங் உத்³த⁴ச்சரஹிதங் நத்தி², யஸ்மா வா உத்³த⁴ச்சகுக்குச்சங் ஸமானகிச்சாஹாரபடிபக்க²ங், தஸ்மா குக்குச்சஸ்ஸ விஸயங் த³ஸ்ஸெந்தோ ‘‘வினயே அபகதஞ்ஞுனா’’திஆதி³மாஹ. யதா² ஹி உத்³த⁴ச்சங் ஸத்தஸ்ஸ அவூபஸமகரங், ததா² குக்குச்சம்பி. யதா²பி உத்³த⁴ச்சஸ்ஸ ஞாதிவிதக்காதி³ ஆஹாரோ, ததா² குக்குச்சஸ்ஸபி. யதா² ச உத்³த⁴ச்சஸ்ஸ ஸமதோ² படிபக்கோ², ததா² குக்குச்சஸ்ஸபீதி. தா³ஸப்³யங் விய உத்³த⁴ச்சகுக்குச்சங் த³ட்ட²ப்³ப³ங் அஸேரிபா⁴வாபாத³னதோ.
Yasmā kukkuccanīvaraṇaṃ uddhaccarahitaṃ natthi, yasmā vā uddhaccakukkuccaṃ samānakiccāhārapaṭipakkhaṃ, tasmā kukkuccassa visayaṃ dassento ‘‘vinaye apakataññunā’’tiādimāha. Yathā hi uddhaccaṃ sattassa avūpasamakaraṃ, tathā kukkuccampi. Yathāpi uddhaccassa ñātivitakkādi āhāro, tathā kukkuccassapi. Yathā ca uddhaccassa samatho paṭipakkho, tathā kukkuccassapīti. Dāsabyaṃ viya uddhaccakukkuccaṃ daṭṭhabbaṃ aseribhāvāpādanato.
ஸோளஸவத்து²கா விசிகிச்சா² அட்ட²வத்து²கங் விசிகிச்ச²ங் அனுபவிட்டா²தி ஆஹ ‘‘அட்ட²ஸு டா²னேஸு விசிகிச்சா²’’தி. விசிகிச்ச²ந்தோதி ஸங்ஸயந்தோ. அதி⁴முச்சித்வாதி பத்தியாயெத்வா. க³ண்ஹிதுந்தி ஸத்³தெ⁴ய்யவத்து²ங் பரிக்³க³ஹேதுங். அபி⁴முக²ங் ஸப்பனங் ஆஸப்பனங், பரிதோ ஸப்பனங் பரிஸப்பனங். பத³த்³வயேனபி சித்தஸ்ஸ அனிச்ச²னாகாரமேவ வத³தி. கே²மந்தகா³மிமக்³க³ங் ந பரியோகா³ஹதி ஏதேனாதி அபரியோகா³ஹனங், உஸ்ஸங்கிதபரிஸங்கிதபா⁴வேன ச²ம்பி⁴தங் ஹோதி சித்தங் யஸ்ஸ த⁴ம்மஸ்ஸ வஸேன, ஸோ த⁴ம்மோ ச²ம்பி⁴தத்தந்தி விசிகிச்ச²னாகாரமாஹ. தேனாஹ ‘‘சித்தஸ்ஸ உப்பாத³யமானா’’தி. கந்தாரத்³தா⁴னமக்³கோ³ வியாதி ஸாஸங்ககந்தாரத்³தா⁴னமக்³கோ³ விய த³ட்ட²ப்³பா³ அப்படிபத்திஹேதுபா⁴வதோ.
Soḷasavatthukā vicikicchā aṭṭhavatthukaṃ vicikicchaṃ anupaviṭṭhāti āha ‘‘aṭṭhasu ṭhānesu vicikicchā’’ti. Vicikicchantoti saṃsayanto. Adhimuccitvāti pattiyāyetvā. Gaṇhitunti saddheyyavatthuṃ pariggahetuṃ. Abhimukhaṃ sappanaṃ āsappanaṃ, parito sappanaṃ parisappanaṃ. Padadvayenapi cittassa anicchanākārameva vadati. Khemantagāmimaggaṃ na pariyogāhati etenāti apariyogāhanaṃ, ussaṅkitaparisaṅkitabhāvena chambhitaṃ hoti cittaṃ yassa dhammassa vasena, so dhammo chambhitattanti vicikicchanākāramāha. Tenāha ‘‘cittassa uppādayamānā’’ti. Kantāraddhānamaggo viyāti sāsaṅkakantāraddhānamaggo viya daṭṭhabbā appaṭipattihetubhāvato.
நத்தி² எத்த² இணந்தி அணணோ, தஸ்ஸ பா⁴வோ ஆணண்யங், கஸ்ஸசி இணஸ்ஸ அதா⁴ரணங். ஸமித்³த⁴கம்மந்தோதி நிப்ப²ன்னஜீவிகப்பயோகோ³. பரிபு³ந்த⁴தி உபரோதே⁴தீதி ர-காரஸ்ஸ ல-காரங் கத்வா பலிபோ³தோ⁴, அஸேரிவிஹாரோ, தஸ்ஸ மூலங் காரணந்தி பலிபோ³த⁴மூலங். ச² த⁴ம்மே பா⁴வெத்வாதி அஸுப⁴னிமித்தக்³கா³ஹாதி³கே ச² த⁴ம்மே உப்பாதெ³த்வா வட்³டெ⁴த்வா. ச² த⁴ம்மே பா⁴வெத்வாதி ச மெத்தானிமித்தக்³கா³ஹாத³யோ ச தத்த² தத்த² ச² த⁴ம்மாதி வுத்தாதி வேதி³தப்³போ³. பஜஹதீதி விக்க²ம்ப⁴னவஸேன பஜஹதி. தேனாஹ ‘‘ஆசாரபண்ணத்திஆதீ³னி ஸிக்கா²பியமானோ’’திஆதி³. பரவத்து²ம்ஹீதி விஸபா⁴க³வத்து²ஸ்மிங், பரவிஸயே வா. பரவிஸயா ஹேதே பி⁴க்கு²னோ, யதி³த³ங் பஞ்ச காமகு³ணா. ஆணண்யமிவ காமச்ச²ந்த³ப்பஹானங் ஆஹ பியவத்து²அபா⁴வாவஹதோ.
Natthi ettha iṇanti aṇaṇo, tassa bhāvo āṇaṇyaṃ, kassaci iṇassa adhāraṇaṃ. Samiddhakammantoti nipphannajīvikappayogo. Paribundhati uparodhetīti ra-kārassa la-kāraṃ katvā palibodho, aserivihāro, tassa mūlaṃ kāraṇanti palibodhamūlaṃ. Cha dhamme bhāvetvāti asubhanimittaggāhādike cha dhamme uppādetvā vaḍḍhetvā. Cha dhamme bhāvetvāti ca mettānimittaggāhādayo ca tattha tattha cha dhammāti vuttāti veditabbo. Pajahatīti vikkhambhanavasena pajahati. Tenāha ‘‘ācārapaṇṇattiādīni sikkhāpiyamāno’’tiādi. Paravatthumhīti visabhāgavatthusmiṃ, paravisaye vā. Paravisayā hete bhikkhuno, yadidaṃ pañca kāmaguṇā. Āṇaṇyamiva kāmacchandappahānaṃ āha piyavatthuabhāvāvahato.
ஆசாரவிபத்திபடிபா³ஹகானி ஸிக்கா²பதா³னி ஆசாரபண்ணத்திஆதீ³னி. ஆரொக்³யமிவ ப்³யாபாத³ப்பஹானங் ஆஹ காயசித்தானங் பா²ஸுபா⁴வாவஹதோ.
Ācāravipattipaṭibāhakāni sikkhāpadāni ācārapaṇṇattiādīni. Ārogyamiva byāpādappahānaṃ āha kāyacittānaṃ phāsubhāvāvahato.
ப³ந்த⁴னா மொக்க²மிவ தி²னமித்³த⁴ப்பஹானங் ஆஹ சித்தஸ்ஸ நிக்³க³ஹிதபா⁴வாவஹதோ.
Bandhanā mokkhamiva thinamiddhappahānaṃ āha cittassa niggahitabhāvāvahato.
பு⁴ஜிஸ்ஸங் விய உத்³த⁴ச்சகுக்குச்சப்பஹானங் ஆஹ சித்தஸ்ஸ ஸேரிபா⁴வாவஹதோ.
Bhujissaṃ viya uddhaccakukkuccappahānaṃ āha cittassa seribhāvāvahato.
திணங் வியாதி திணமிவ கத்வா. அக³ணெத்வாதி அசிந்தெத்வா. கே²மந்தபூ⁴மிங் விய விசிகிச்சா²பஹானங் ஆஹ அனுஸ்ஸங்கிதாபரிஸங்கிதபா⁴வேன ஸம்மாபடிபத்திஹேதுபா⁴வதோ.
Tiṇaṃviyāti tiṇamiva katvā. Agaṇetvāti acintetvā. Khemantabhūmiṃ viya vicikicchāpahānaṃ āha anussaṅkitāparisaṅkitabhāvena sammāpaṭipattihetubhāvato.
427. கிரீயதி (அ॰ நி॰ டீ॰ 3.5.28-29) க³ப்³பா⁴ஸயே கி²பீயதீதி கரோ, ஸம்ப⁴வோ, கரதோ ஜாதோதி கரஜோ, மாதாபெத்திகஸம்ப⁴வோதி அத்தோ². மாதுயா ஹி ஸரீரஸண்டா²பனவஸேன கரதோ ஜாதோதி கரஜோதி அபரே. உப⁴யதா²பி கரஜகாயந்தி சதுஸந்ததிரூபமாஹ. தேமேதீதி திந்தங் கரோதி. கோ பனெத்த² திந்தபா⁴வோதி ஆஹ ‘‘ஸ்னேஹேதீ’’தி, பீதிஸ்னேஹேன பீணனங் கரோதீதி அத்தோ². தேனாஹ ‘‘ஸப்³ப³த்த² பவத்தபீதிஸுக²ங் கரோதீ’’தி. பீதிஸமுட்டா²னபணீதரூபேஹி ஸகலஸ்ஸ கரஜகாயஸ்ஸ பரிபு²டதாய செத்த² தங்ஸமுட்டா²பகபீதிஸுகா²னங் ஸப்³ப³த்த² பவத்தி ஜோதிதா. பரிஸந்தே³தீதிஆதீ³ஸுபி ஏஸேவ நயோ. தத்தா²பி ஹி ‘‘ஸமந்ததோ ஸந்தே³தி தேமேதி ஸ்னேஹேதி, ஸப்³ப³த்த² பவத்தபீதிஸுக²ங் கரோதீ’’திஆதி³னா யதா²ரஹங் அத்தோ² வேதி³தப்³போ³. பரிபூரேதீதி வாயுனா ப⁴ஸ்தங் விய இமங் கரஜகாயங் பீதிஸுகே²ன பூரேதி. ஸமந்ததோ பு²ஸதீதி இமங் கரஜகாயங் பீதிஸுகே²ன பு²ஸதி. ஸப்³பா³வதோதி அ-காரஸ்ஸ ஆ-காரோ கதோ, ஸப்³பா³வயவவதோதி அத்தோ²தி ஆஹ ‘‘ஸப்³ப³கொட்டா²ஸவதோ’’தி, மங்ஸாதி³ஸப்³பா³பா⁴க³வதோதி அத்தோ². அபு²டங் நாம ந ஹோதி பீதிஸுக²ஸமுட்டா²னேஹி ரூபேஹி ஸப்³ப³த்த²கமேவ ப்³யாபிதத்தா. காதுஞ்சேவ யோஜேதுஞ்ச சே²கோ ஸன்னேதுங் படிப³லோதி யோஜனா. ந்ஹானீயசுண்ணானங் பரிமத்³த³னவஸேன பிண்ட³ங் கரொந்தேன ஹத்தே²ன பா⁴ஜனங் நிப்பீளேதப்³ப³ங் ஹோதீதி ஆஹ ‘‘ஸன்னெந்தஸ்ஸ பி⁴ஜ்ஜதீ’’தி. அனுக³தாதி அனுபவிட்டா². பரிக³தாதி பரிதோ ஸமந்ததோ திந்தா. திந்தபா⁴வேனேவ ஸமங் அந்தரங் பா³ஹிரஞ்ச ஏதிஸ்ஸாதி ஸந்தரபா³ஹிரா. ஸப்³ப³த்த²கமேவாதி ஸப்³ப³த்தே²வ. ந ச பக்³க⁴ரிணீ பமாணயுத்தஸ்ஸேவ உத³கஸ்ஸ ஸித்தத்தா. எத்த² ச ந்ஹானீயபிண்ட³ங் விய கரஜகாயோ, தங் தேமெத்வா ஸம்பிண்டி³தபமாணயுத்தஉத³கங் விய பட²மஜ்ஜா²னஸுக²ங் த³ட்ட²ப்³ப³ங்.
427. Kirīyati (a. ni. ṭī. 3.5.28-29) gabbhāsaye khipīyatīti karo, sambhavo, karato jātoti karajo, mātāpettikasambhavoti attho. Mātuyā hi sarīrasaṇṭhāpanavasena karato jātoti karajoti apare. Ubhayathāpi karajakāyanti catusantatirūpamāha. Temetīti tintaṃ karoti. Ko panettha tintabhāvoti āha ‘‘snehetī’’ti, pītisnehena pīṇanaṃ karotīti attho. Tenāha ‘‘sabbattha pavattapītisukhaṃ karotī’’ti. Pītisamuṭṭhānapaṇītarūpehi sakalassa karajakāyassa pariphuṭatāya cettha taṃsamuṭṭhāpakapītisukhānaṃ sabbattha pavatti jotitā. Parisandetītiādīsupi eseva nayo. Tatthāpi hi ‘‘samantato sandeti temeti sneheti, sabbattha pavattapītisukhaṃ karotī’’tiādinā yathārahaṃ attho veditabbo. Paripūretīti vāyunā bhastaṃ viya imaṃ karajakāyaṃ pītisukhena pūreti. Samantato phusatīti imaṃ karajakāyaṃ pītisukhena phusati. Sabbāvatoti a-kārassa ā-kāro kato, sabbāvayavavatoti atthoti āha ‘‘sabbakoṭṭhāsavato’’ti, maṃsādisabbābhāgavatoti attho. Aphuṭaṃ nāma na hoti pītisukhasamuṭṭhānehi rūpehi sabbatthakameva byāpitattā. Kātuñceva yojetuñca cheko sannetuṃ paṭibaloti yojanā. Nhānīyacuṇṇānaṃ parimaddanavasena piṇḍaṃ karontena hatthena bhājanaṃ nippīḷetabbaṃ hotīti āha ‘‘sannentassa bhijjatī’’ti. Anugatāti anupaviṭṭhā. Parigatāti parito samantato tintā. Tintabhāveneva samaṃ antaraṃ bāhirañca etissāti santarabāhirā. Sabbatthakamevāti sabbattheva. Na ca pagghariṇī pamāṇayuttasseva udakassa sittattā. Ettha ca nhānīyapiṇḍaṃ viya karajakāyo, taṃ temetvā sampiṇḍitapamāṇayuttaudakaṃ viya paṭhamajjhānasukhaṃ daṭṭhabbaṃ.
428. ஹெட்டா² உப்³பி⁴ஜ்ஜித்வா உக்³க³ச்ச²னஉத³கோதி ரஹத³ஸ்ஸ அதோ⁴தூ²லதா⁴ராவஸேன உப்³பி⁴ஜ்ஜ உட்ட²ஹனஉத³கோ. அந்தோயேவ உப்³பி⁴ஜ்ஜனஉத³கோதி ரஹத³ஸ்ஸ அப்³ப⁴ந்தரேயேவ தூ²லதா⁴ரா அஹுத்வா உட்டி²தஉத³கஸிராமுகே²ஹி உப்³பி⁴ஜ்ஜனகோ. ஆக³மனமக்³கோ³தி நதீ³தளாககந்த³ரஸரஆதி³தோ ஆக³மனமக்³கோ³.
428.Heṭṭhā ubbhijjitvā uggacchanaudakoti rahadassa adhothūladhārāvasena ubbhijja uṭṭhahanaudako. Antoyeva ubbhijjanaudakoti rahadassa abbhantareyeva thūladhārā ahutvā uṭṭhitaudakasirāmukhehi ubbhijjanako. Āgamanamaggoti nadītaḷākakandarasaraādito āgamanamaggo.
429. உப்பலக³ச்சா²னி எத்த² ஸந்தீதி உப்பலினீ (அ॰ நி॰ டீ॰ 3.5.28-29), வாரி. அயமெத்த² வினிச்ச²யோ, ததா² ஹி லோகே ரத்தக்கி²கோ ‘‘புண்ட³ரீகக்கோ²’’தி வுச்சதி. கேசி பன ‘‘ரத்தங் பது³மங், ஸேதங் புண்ட³ரீக’’ந்தி வத³ந்தி. உப்பலாதீ³னி விய கரஜகாயோ, உத³கங் விய ததியஜ்ஜா²னஸுக²ந்தி அயம்பி அத்தோ² ‘‘புரிமனயேனா’’தி அதிதே³ஸேனேவ விபா⁴விதோதி த³ட்ட²ப்³ப³ங்.
429. Uppalagacchāni ettha santīti uppalinī (a. ni. ṭī. 3.5.28-29), vāri. Ayamettha vinicchayo, tathā hi loke rattakkhiko ‘‘puṇḍarīkakkho’’ti vuccati. Keci pana ‘‘rattaṃ padumaṃ, setaṃ puṇḍarīka’’nti vadanti. Uppalādīni viya karajakāyo, udakaṃ viya tatiyajjhānasukhanti ayampi attho ‘‘purimanayenā’’ti atideseneva vibhāvitoti daṭṭhabbaṃ.
430. நிருபக்கிலேஸட்டே²னாதி ரஜோஜல்லாதி³னா அனுபக்கிலிட்ட²தாய அமலீனபா⁴வேன. அமலீனம்பி கிஞ்சி வத்து² பப⁴ஸ்ஸரஸபா⁴வங் ஹோதீதி வுத்தங் ‘‘பப⁴ஸ்ஸரட்டே²னா’’தி. உதுப²ரணந்தி உண்ஹஉதுப²ரணங். ஸப்³ப³த்த²கமேவ ஜா²னஸுகே²ன பு²ட்டோ² கரஜகாயோ யதா² உதுனா பு²ட்ட²வத்த²ஸதி³ஸோதி ஆஹ ‘‘வத்த²ங் விய கரஜகாயோ’’தி. தஸ்மாதி ‘‘வத்த²ங் வியா’’திஆதி³னா வுத்தமேவத்த²ங் ஹேதுபா⁴வேன பச்சாமஸதி, கரஜகாயஸ்ஸ வத்த²ஸதி³ஸத்தா சதுத்த²ஜ்ஜா²னஸுக²ஸ்ஸ ச உதுப²ரணஸதி³ஸத்தாதி அத்தோ². ஸந்தஸபா⁴வத்தா ஞாணுத்தரத்தா செத்த² உபெக்கா²பி ஸுகே² ஸங்க³ஹிதாதி சதுத்த²ஜ்ஜா²னேபி ஸுக²க்³க³ஹணங் கதங். ‘‘பரிஸுத்³தே⁴ன பரியோதா³தேன ப²ரித்வா நிஸின்னோ ஹோதீ’’தி வசனதோ சதுத்த²ஜ்ஜா²னசித்தஸ்ஸ வத்த²ஸதி³ஸதா வுத்தா. சதுத்த²ஜ்ஜா²னஸமுட்டா²னரூபேஹி பி⁴க்கு²னோ காயஸ்ஸ பு²டபா⁴வங் ஸந்தா⁴ய ‘‘தங்ஸமுட்டா²னரூபங் உதுப²ரணங் வியா’’தி வுத்தங். புரிஸஸ்ஸ காயோ விய பி⁴க்கு²னோ கரஜகாயோதி அயங் பனத்தோ² பாகடோதி ந க³ஹிதோ, க³ஹிதோ ஏவ வா ‘‘யதா² ஹி கத்த²சி…பே॰… காயோ பு²டோ ஹோதீ’’தி வுத்தத்தா.
430.Nirupakkilesaṭṭhenāti rajojallādinā anupakkiliṭṭhatāya amalīnabhāvena. Amalīnampi kiñci vatthu pabhassarasabhāvaṃ hotīti vuttaṃ ‘‘pabhassaraṭṭhenā’’ti. Utupharaṇanti uṇhautupharaṇaṃ. Sabbatthakameva jhānasukhena phuṭṭho karajakāyo yathā utunā phuṭṭhavatthasadisoti āha ‘‘vatthaṃ viya karajakāyo’’ti. Tasmāti ‘‘vatthaṃ viyā’’tiādinā vuttamevatthaṃ hetubhāvena paccāmasati, karajakāyassa vatthasadisattā catutthajjhānasukhassa ca utupharaṇasadisattāti attho. Santasabhāvattā ñāṇuttarattā cettha upekkhāpi sukhe saṅgahitāti catutthajjhānepi sukhaggahaṇaṃ kataṃ. ‘‘Parisuddhena pariyodātena pharitvā nisinno hotī’’ti vacanato catutthajjhānacittassa vatthasadisatā vuttā. Catutthajjhānasamuṭṭhānarūpehi bhikkhuno kāyassa phuṭabhāvaṃ sandhāya ‘‘taṃsamuṭṭhānarūpaṃ utupharaṇaṃ viyā’’ti vuttaṃ. Purisassa kāyo viya bhikkhuno karajakāyoti ayaṃ panattho pākaṭoti na gahito, gahito eva vā ‘‘yathā hi katthaci…pe… kāyo phuṭo hotī’’ti vuttattā.
431. புப்³பே³னிவாஸஞாணஉபமாயந்தி புப்³பே³னிவாஸஞாணஸ்ஸ த³ஸ்ஸிதஉபமாயங். தங்தி³வஸங்கதகிரியாக³ஹணங் பாகதிகஸத்தஸ்ஸபி யேபு⁴ய்யேன பாகடா ஹோதீதி த³ஸ்ஸனத்த²ங். தங்தி³வஸக³தகா³மத்தயக்³க³ஹணேனேவ மஹாபி⁴னீஹாரேஹி அஞ்ஞேஸம்பி புப்³பே³னிவாஸஞாணலாபீ⁴னங் தீஸு ப⁴வேஸு கதா கிரியா யேபு⁴ய்யேன பாகடா ஹோதீதி தீ³பிதந்தி த³ட்ட²ப்³ப³ங்.
431.Pubbenivāsañāṇaupamāyanti pubbenivāsañāṇassa dassitaupamāyaṃ. Taṃdivasaṃkatakiriyāgahaṇaṃ pākatikasattassapi yebhuyyena pākaṭā hotīti dassanatthaṃ. Taṃdivasagatagāmattayaggahaṇeneva mahābhinīhārehi aññesampi pubbenivāsañāṇalābhīnaṃ tīsu bhavesu katā kiriyā yebhuyyena pākaṭā hotīti dīpitanti daṭṭhabbaṃ.
432. ஸம்முக²த்³வாராதி அஞ்ஞமஞ்ஞஸ்ஸ அபி⁴முக²த்³வாரா. அபராபரங் ஸஞ்சரந்தேதி தங்தங்கிச்சவஸேன இதோ சிதோ ச ஸஞ்சரந்தே. இதோ பன கே³ஹா…பே॰… பவிஸனவஸேனபீதி இத³ங் சுதூபபாதஞாணஸ்ஸ விஸயத³ஸ்ஸனவஸேன வுத்தங். த்³வின்னங் கே³ஹானங் அந்தரே ட²த்வாதி த்³வின்னங் கே³ஹத்³வாரானங் ஸம்முக²ட்டா²னபூ⁴தே அந்தரவீதி²யங் வேமஜ்ஜே² ட²த்வா. தேஸு ஹி ஏகஸ்ஸ சே பாசீனமுக²த்³வாரங் இதரஸ்ஸ பச்சி²மமுக²ங், தஸ்ஸ ஸம்முக²ங் உபி⁴ன்னங் அந்தரவீதி²யங் டி²தஸ்ஸ த³க்கி²ணாமுக²ஸ்ஸ, உத்தராமுக²ஸ்ஸ வா சக்கு²மதோ புரிஸஸ்ஸ தத்த² பவிஸனகனிக்க²மனகபுரிஸா யதா² ஸுகே²னேவ பாகடா ஹொந்தி, ஏவங் தி³ப்³ப³சக்கு²ஞாணஸமங்கி³னோ சவனகஉபபஜ்ஜனகபுரிஸா. யதா² பன தஸ்ஸ புரிஸஸ்ஸ அஞ்ஞேனேவ க²ணேன பவிஸந்தஸ்ஸ த³ஸ்ஸனங், அஞ்ஞேன நிக்க²மந்தஸ்ஸ த³ஸ்ஸனங், ஏவங் இமஸ்ஸபி அஞ்ஞேனேவ க²ணேன சவமானஸ்ஸ த³ஸ்ஸனங், அஞ்ஞேன உபபஜ்ஜமானஸ்ஸ த³ஸ்ஸனந்தி த³ட்ட²ப்³ப³ங். ஞாணஸ்ஸ பாகடாதி ஆனெத்வா ஸம்ப³ந்தோ⁴. தஸ்ஸாதி ஞாணஸ்ஸ.
432.Sammukhadvārāti aññamaññassa abhimukhadvārā. Aparāparaṃ sañcaranteti taṃtaṃkiccavasena ito cito ca sañcarante. Ito pana gehā…pe… pavisanavasenapīti idaṃ cutūpapātañāṇassa visayadassanavasena vuttaṃ. Dvinnaṃ gehānaṃ antare ṭhatvāti dvinnaṃ gehadvārānaṃ sammukhaṭṭhānabhūte antaravīthiyaṃ vemajjhe ṭhatvā. Tesu hi ekassa ce pācīnamukhadvāraṃ itarassa pacchimamukhaṃ, tassa sammukhaṃ ubhinnaṃ antaravīthiyaṃ ṭhitassa dakkhiṇāmukhassa, uttarāmukhassa vā cakkhumato purisassa tattha pavisanakanikkhamanakapurisā yathā sukheneva pākaṭā honti, evaṃ dibbacakkhuñāṇasamaṅgino cavanakaupapajjanakapurisā. Yathā pana tassa purisassa aññeneva khaṇena pavisantassa dassanaṃ, aññena nikkhamantassa dassanaṃ, evaṃ imassapi aññeneva khaṇena cavamānassa dassanaṃ, aññena upapajjamānassa dassananti daṭṭhabbaṃ. Ñāṇassa pākaṭāti ānetvā sambandho. Tassāti ñāṇassa.
433. பப்³ப³தஸிக²ரங் யேபு⁴ய்யேன ஸங்கி²த்தங் ஸங்குசிதங் ஹோதீதி இத⁴ பப்³ப³தமத்த²கங் ‘‘பப்³ப³தஸங்கே²போ’’தி வுத்தங், பப்³ப³தபரியாபன்னோ வா பதே³ஸோ பப்³ப³தஸங்கே²போ. அனாவிலோதி அகாலுஸ்ஸோ. ஸா சஸ்ஸ அனாவிலதா கத்³த³மாபா⁴வேன ஹோதீதி ஆஹ ‘‘நிக்கத்³த³மோ’’தி. டி²தாஸுபி நிஸின்னாஸுபி கா³வீஸு. விஜ்ஜமானாஸூதி லப்³ப⁴மானாஸு. இதரா டி²தாபி நிஸின்னாபி சரந்தீதி வுச்சந்தி ஸஹசரணஞாயேன. திட்ட²ந்தமேவ, ந கதா³சிபி சரந்தங். த்³வயந்தி ஸிப்பிஸம்முகங் மச்ச²கு³ம்ப³ந்தி இமங் உப⁴யங் திட்ட²ந்தந்தி வுத்தங், சரந்தம்பீதி அதி⁴ப்பாயோ. கிங் வா இமாய ஸஹசரியாய, யதா²லாப⁴க்³க³ஹணங் பனெத்த² த³ட்ட²ப்³ப³ங். ஸக்க²ரகத²லஸ்ஸ ஹி வஸேன ‘‘திட்ட²ந்த’’ந்தி, ஸிப்பிஸம்பு³கஸ்ஸ மச்ச²கு³ம்ப³ஸ்ஸ ச வஸேன ‘‘திட்ட²ந்தம்பி, சரந்தம்பீ’’தி யோஜனா காதப்³பா³.
433. Pabbatasikharaṃ yebhuyyena saṃkhittaṃ saṅkucitaṃ hotīti idha pabbatamatthakaṃ ‘‘pabbatasaṅkhepo’’ti vuttaṃ, pabbatapariyāpanno vā padeso pabbatasaṅkhepo. Anāviloti akālusso. Sā cassa anāvilatā kaddamābhāvena hotīti āha ‘‘nikkaddamo’’ti. Ṭhitāsupi nisinnāsupi gāvīsu. Vijjamānāsūti labbhamānāsu. Itarā ṭhitāpi nisinnāpi carantīti vuccanti sahacaraṇañāyena. Tiṭṭhantameva, na kadācipi carantaṃ. Dvayanti sippisammukaṃ macchagumbanti imaṃ ubhayaṃ tiṭṭhantanti vuttaṃ, carantampīti adhippāyo. Kiṃ vā imāya sahacariyāya, yathālābhaggahaṇaṃ panettha daṭṭhabbaṃ. Sakkharakathalassa hi vasena ‘‘tiṭṭhanta’’nti, sippisambukassa macchagumbassa ca vasena ‘‘tiṭṭhantampi, carantampī’’ti yojanā kātabbā.
434. பி⁴க்கூ²தி பி⁴ன்னகிலேஸோதி பி⁴க்கு². ஸோ ஹி பரமத்த²தோ ஸமணோதினாமகோ. தத்த² அரியமக்³கே³ன ஸப்³ப³ஸோ பாபானங் ஸமிதாவீதி ஸமணோ. தேனாஹ ‘‘ஸமிதபாபத்தா’’தி. ஸெட்ட²ட்டே²ன ப்³ரஹ்மா வுச்சதி ஸம்மாஸம்பு³த்³தோ⁴, ததோ ஆக³தோதி ப்³ரஹ்மா, அரியமக்³கோ³, தங் அஸம்மோஹபடிவேத⁴வஸேன அஞ்ஞாஸீதி ப்³ராஹ்மணோ. தங்ஸமங்கி³தாய ஹிஸ்ஸ பாபானங் பா³ஹிதபா⁴வோ. தேனாஹ ‘‘பா³ஹிதபாபத்தா ப்³ராஹ்மணோ’’தி. அட்ட²ங்கி³கேன அரியமக்³க³ஜலேன ந்ஹாதவா நித்³தோ⁴தகிலேஸோதி ந்ஹாதகோ. க³தத்தாதி பஹானாபி⁴ஸமயவஸேன படிவித்³த⁴த்தா. தேனாஹ ‘‘விதி³தத்தா’’தி. நிஸ்ஸுதத்தாதி ஸமுச்சே²த³ப்பஹானவஸேன ஸந்தானதோ ஸப்³ப³ஸோ நிஹதத்தா. தேனாஹ ‘‘அபஹதத்தா’’தி, மரியாத³வஸேன கிலேஸானங் ஹிங்ஸிதத்தா அரியமக்³கே³ஹி ஓதி⁴ஸோ ஸப்³ப³ஸோ கிலேஸானங் ஸமுச்சி²ன்னத்தாதி அத்தோ². தேனாஹ ‘‘ஹதத்தா’’தி. ஆரகத்தாதி ஸுப்பஹீனதாய விப்பகட்ட²பா⁴வதோ. தேனாஹ ‘‘தூ³ரீபூ⁴தத்தா’’தி. உப⁴யம்பி உப⁴யத்த² யோஜேதப்³ப³ங் – கிலேஸானங் ஆரகத்தா ஹதத்தா தூ³ரீபூ⁴தத்தா ச அரியோ, ததா² அரஹந்தி. யங் பனெத்த² அத்த²தோ ந விப⁴த்தங், தங் உத்தானத்த²த்தா ஸுவிஞ்ஞெய்யமேவ.
434.Bhikkhūti bhinnakilesoti bhikkhu. So hi paramatthato samaṇotināmako. Tattha ariyamaggena sabbaso pāpānaṃ samitāvīti samaṇo. Tenāha ‘‘samitapāpattā’’ti. Seṭṭhaṭṭhena brahmā vuccati sammāsambuddho, tato āgatoti brahmā, ariyamaggo, taṃ asammohapaṭivedhavasena aññāsīti brāhmaṇo. Taṃsamaṅgitāya hissa pāpānaṃ bāhitabhāvo. Tenāha ‘‘bāhitapāpattā brāhmaṇo’’ti. Aṭṭhaṅgikena ariyamaggajalena nhātavā niddhotakilesoti nhātako. Gatattāti pahānābhisamayavasena paṭividdhattā. Tenāha ‘‘viditattā’’ti. Nissutattāti samucchedappahānavasena santānato sabbaso nihatattā. Tenāha ‘‘apahatattā’’ti, mariyādavasena kilesānaṃ hiṃsitattā ariyamaggehi odhiso sabbaso kilesānaṃ samucchinnattāti attho. Tenāha ‘‘hatattā’’ti. Ārakattāti suppahīnatāya vippakaṭṭhabhāvato. Tenāha ‘‘dūrībhūtattā’’ti. Ubhayampi ubhayattha yojetabbaṃ – kilesānaṃ ārakattā hatattā dūrībhūtattā ca ariyo, tathā arahanti. Yaṃ panettha atthato na vibhattaṃ, taṃ uttānatthattā suviññeyyameva.
மஹாஅஸ்ஸபுரஸுத்தவண்ணனாய லீனத்த²ப்பகாஸனா ஸமத்தா.
Mahāassapurasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 9. மஹாஅஸ்ஸபுரஸுத்தங் • 9. Mahāassapurasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 9. மஹாஅஸ்ஸபுரஸுத்தவண்ணனா • 9. Mahāassapurasuttavaṇṇanā
