| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
৯. মহাঅস্সপুরসুত্তৰণ্ণনা
9. Mahāassapurasuttavaṇṇanā
৪১৫. জানপদিনোতি জনপদৰন্তো, জনপদস্স ৰা ইস্সরা রাজকুমারা গোত্তৰসেন অঙ্গা নাম। তেসং নিৰাসো যদি একো জনপদো , কথং বহুৰচনন্তি আহ ‘‘রুল়্হীসদ্দেনা’’তি। অক্খরচিন্তকা হি ঈদিসেসু ঠানেসু যুত্তে ৰিয সলিঙ্গৰচনানি (পাণিনি ১.২.৫১) ইচ্ছন্তি। অযমেত্থ রুল়্হী যথা ‘‘কুরূসু ৰিহরতি, মল্লেসু ৰিহরতী’’তি চ। তব্বিসেসনে পন জনপদসদ্দে জাতিসদ্দে একৰচনমেৰ। তেনাহ ‘‘অঙ্গেসু জনপদে’’তি। অস্সা ৰুচ্চন্তি পাসাণানি, তানি সুন্দরানি তত্থ সন্তীতি ‘‘অস্সপুর’’ন্তি সো নিগমো ৰুত্তোতি কেচী। অপরে পন আজানীযো অস্সো রঞ্ঞো তত্থ গহণং উপগতোতি ‘‘অস্সপুর’’ন্তি ৰুত্তোতি ৰদন্তি। কিং তেহি, নামমেতং তস্স নিগমস্স। যস্মা পন তত্থ ভগৰতো নিবদ্ধৰসনট্ঠানং কিঞ্চি নাহোসি, তস্মা ‘‘তং গোচরগামং কত্ৰা ৰিহরতি’’চ্চেৰ ৰুত্তং। তথা হি পাল়িযং ‘‘অস্সপুরং নাম অঙ্গানং নিগমো’’তি গোচরগামকিত্তনমেৰ কতং।
415.Jānapadinoti janapadavanto, janapadassa vā issarā rājakumārā gottavasena aṅgā nāma. Tesaṃ nivāso yadi eko janapado , kathaṃ bahuvacananti āha ‘‘ruḷhīsaddenā’’ti. Akkharacintakā hi īdisesu ṭhānesu yutte viya saliṅgavacanāni (pāṇini 1.2.51) icchanti. Ayamettha ruḷhī yathā ‘‘kurūsu viharati, mallesu viharatī’’ti ca. Tabbisesane pana janapadasadde jātisadde ekavacanameva. Tenāha ‘‘aṅgesu janapade’’ti. Assā vuccanti pāsāṇāni, tāni sundarāni tattha santīti ‘‘assapura’’nti so nigamo vuttoti kecī. Apare pana ājānīyo asso rañño tattha gahaṇaṃ upagatoti ‘‘assapura’’nti vuttoti vadanti. Kiṃ tehi, nāmametaṃ tassa nigamassa. Yasmā pana tattha bhagavato nibaddhavasanaṭṭhānaṃ kiñci nāhosi, tasmā ‘‘taṃ gocaragāmaṃ katvā viharati’’cceva vuttaṃ. Tathā hi pāḷiyaṃ ‘‘assapuraṃ nāma aṅgānaṃ nigamo’’ti gocaragāmakittanameva kataṃ.
এৰরূপেন সীলেনাতিআদীসু সীলগ্গহণেন ৰারিত্তসীলমাহ। তেন সম্মাৰাচাকম্মন্তাজীৰে দস্সেতি। আচারগ্গহণেন চারিত্তসীলং। তেন পরিসুদ্ধং কাযৰচীসমাচারং। পটিপত্তিগ্গহণেন সমথৰিপস্সনামগ্গফলসঙ্গহং সম্মাপটিপত্তিং। লজ্জিনোতি ইমিনা যথাৰুত্তসীলাচারমূলকারণং। পেসলাতি ইমিনা পারিসুদ্ধিং। উল়ারগুণাতি ইমিনা পটিপত্তিযা পারিপূরিং। ভিক্খুসঙ্ঘস্সেৰ ৰণ্ণং কথেন্তীতি ইদং তেসং উপাসকানং যেভুয্যেন ভিক্খূনং গুণকিত্তনপসুততায ৰুত্তং। তে পন সদ্ধম্মেপি সম্মাসম্বুদ্ধেপি অভিপ্পসন্না এৰ। তেনাহ ‘‘বুদ্ধমামকা ধম্মমামকা’’তি। ৰত্থুত্তযে হি একস্মিং অভিপ্পসন্না ইতরদ্ৰযে অভিপ্পসন্না এৰ তদৰিনাভাৰতো। পিণ্ডপাতাপচাযনেতি লক্খণৰচনমেতং যথা ‘‘কাকেহি সপ্পি রক্খিতব্ব’’ন্তি, তস্মা পচ্চযপটিপূজনেতি ৰুত্তং হোতি। পচ্চযদাযকানঞ্হি কারস্স অত্তনো সম্মাপটিপত্তিযা মহপ্ফলভাৰস্স করণং ইধ ‘‘পিণ্ডপাতাপচাযন’’ন্তি অধিপ্পেতং।
Evarūpena sīlenātiādīsu sīlaggahaṇena vārittasīlamāha. Tena sammāvācākammantājīve dasseti. Ācāraggahaṇena cārittasīlaṃ. Tena parisuddhaṃ kāyavacīsamācāraṃ. Paṭipattiggahaṇena samathavipassanāmaggaphalasaṅgahaṃ sammāpaṭipattiṃ. Lajjinoti iminā yathāvuttasīlācāramūlakāraṇaṃ. Pesalāti iminā pārisuddhiṃ. Uḷāraguṇāti iminā paṭipattiyā pāripūriṃ. Bhikkhusaṅghasseva vaṇṇaṃ kathentīti idaṃ tesaṃ upāsakānaṃ yebhuyyena bhikkhūnaṃ guṇakittanapasutatāya vuttaṃ. Te pana saddhammepi sammāsambuddhepi abhippasannā eva. Tenāha ‘‘buddhamāmakā dhammamāmakā’’ti. Vatthuttaye hi ekasmiṃ abhippasannā itaradvaye abhippasannā eva tadavinābhāvato. Piṇḍapātāpacāyaneti lakkhaṇavacanametaṃ yathā ‘‘kākehi sappi rakkhitabba’’nti, tasmā paccayapaṭipūjaneti vuttaṃ hoti. Paccayadāyakānañhi kārassa attano sammāpaṭipattiyā mahapphalabhāvassa karaṇaṃ idha ‘‘piṇḍapātāpacāyana’’nti adhippetaṃ.
সমণকরণাতি সমণভাৰকরা, সমণভাৰস্স কারকাতি অত্থো। তে পন একন্ততো অত্তনো সন্তানে উপ্পাদিতা ৰড্ঢিতা চ হোন্তীতি আহ ‘‘সমাদায পরিপূরিতা’’তি। সমণগ্গহণঞ্চেত্থ সমণৰসেন, ন সামঞ্ঞমত্তেনাতি আহ ‘‘সমিতপাপসমণ’’ন্তি। ব্রাহ্মণকরণাতি এত্থাপি ৰুত্তনযেনেৰত্থো ৰেদিতব্বো। ব্যঞ্জনতো এৰ চাযং ভেদো, যদিদং সমণব্রাহ্মণাতি , ন অত্থতো। সমণেন কত্তব্বধম্মাতি সমণধম্মে ঠিতেন সম্পাদেতব্বধম্মা। যো হি হেট্ঠিমসিক্খাসঙ্খাতসমণভাৰে সুপ্পতিট্ঠিতো, তেন যে উপরিসিক্খাসঙ্খাতসমণভাৰা সম্পাদেতব্বা, তেসং ৰসেনেৰ ৰুত্তসমণেন কত্তব্বধম্মা ৰুত্তাতি। তথা হি তেসং সমণভাৰাৰহতং সন্ধাযাহ ‘‘তেপি চ সমণকরণা হোন্তিযেৰা’’তি। ইধ পনাতি মহাঅস্সপুরে। হিরোত্তপ্পাদিৰসেন দেসনা ৰিত্থারিতাতি হিরোত্তপ্প-পরিসুদ্ধকাযৰচীমনোসমাচারাজীৰইন্দ্রিযসংৰর-ভোজনেমত্তঞ্ঞুত- জাগরিযানুযোগসতিসম্পজঞ্ঞ-ঝানৰিজ্জাৰসেন সমণকরণধম্মদেসনা ৰিত্থারতো দেসিতা, ন তিকনিপাতে ৰিয সঙ্খেপতো। ফলগ্গহণেনেৰ ৰিপাকফলং গহিতং, তং পন উক্কট্ঠনিদ্দেসেন চতুব্বিধং সামঞ্ঞফলং দট্ঠব্বং। আনিসংসগ্গহণেন পিযমনাপতাদিউদ্রযো। তস্সেৰ অত্থোতি তস্সেৰ অৰঞ্চাপদস্সেৰ অত্থনিদ্দেসো। ‘‘যস্সা হী’’তিআদিনা ব্যতিরেকৰসেন অত্থং ৰদতি। এত্তকেন ঠানেনাতি এত্তকেন পাল়িপদেসেন। হিরোত্তপ্পাদীনং উপরি পাল়িযং ৰুচ্চমানানং সমণকরণধম্মানং। ৰণ্ণং কথেসীতি গুণং আনিসংসং অভাসি। সতিপট্ঠানে ৰুত্তনযেনাতি ‘‘অপিচ ৰণ্ণভণনমেত’’ন্তিআদিনা সতিপট্ঠানৰণ্ণনাযং (দী॰ নি॰ অট্ঠ॰ ২.৩৭৩; ম॰ নি॰ অট্ঠ॰ ১.১০৬) ৰুত্তনযেন।
Samaṇakaraṇāti samaṇabhāvakarā, samaṇabhāvassa kārakāti attho. Te pana ekantato attano santāne uppāditā vaḍḍhitā ca hontīti āha ‘‘samādāya paripūritā’’ti. Samaṇaggahaṇañcettha samaṇavasena, na sāmaññamattenāti āha ‘‘samitapāpasamaṇa’’nti. Brāhmaṇakaraṇāti etthāpi vuttanayenevattho veditabbo. Byañjanato eva cāyaṃ bhedo, yadidaṃ samaṇabrāhmaṇāti , na atthato. Samaṇenakattabbadhammāti samaṇadhamme ṭhitena sampādetabbadhammā. Yo hi heṭṭhimasikkhāsaṅkhātasamaṇabhāve suppatiṭṭhito, tena ye uparisikkhāsaṅkhātasamaṇabhāvā sampādetabbā, tesaṃ vaseneva vuttasamaṇena kattabbadhammā vuttāti. Tathā hi tesaṃ samaṇabhāvāvahataṃ sandhāyāha ‘‘tepi ca samaṇakaraṇā hontiyevā’’ti. Idha panāti mahāassapure. Hirottappādivasena desanā vitthāritāti hirottappa-parisuddhakāyavacīmanosamācārājīvaindriyasaṃvara-bhojanemattaññuta- jāgariyānuyogasatisampajañña-jhānavijjāvasena samaṇakaraṇadhammadesanā vitthārato desitā, na tikanipāte viya saṅkhepato. Phalaggahaṇeneva vipākaphalaṃ gahitaṃ, taṃ pana ukkaṭṭhaniddesena catubbidhaṃ sāmaññaphalaṃ daṭṭhabbaṃ. Ānisaṃsaggahaṇena piyamanāpatādiudrayo. Tasseva atthoti tasseva avañcāpadasseva atthaniddeso. ‘‘Yassā hī’’tiādinā byatirekavasena atthaṃ vadati. Ettakena ṭhānenāti ettakena pāḷipadesena. Hirottappādīnaṃ upari pāḷiyaṃ vuccamānānaṃ samaṇakaraṇadhammānaṃ. Vaṇṇaṃ kathesīti guṇaṃ ānisaṃsaṃ abhāsi. Satipaṭṭhāne vuttanayenāti ‘‘apica vaṇṇabhaṇanameta’’ntiādinā satipaṭṭhānavaṇṇanāyaṃ (dī. ni. aṭṭha. 2.373; ma. ni. aṭṭha. 1.106) vuttanayena.
৪১৬. যং হিরীযতীতি যেন ধম্মেন হেতুভূতেন ৰা জিগুচ্ছতি। করণে হেতং পচ্চত্তৰচনং। যন্তি ৰা লিঙ্গৰিপল্লাসেন ৰুত্তো, ধম্মোতি অত্থো। হিরীযিতব্বেনাতি উপযোগত্থে করণৰচনং, হিরীযিতব্বযুত্তকং কাযদুচ্চরিতাদিন্তি অত্থো। ওত্তপ্পিতব্বেনাতি এত্থাপি এসেৰ নযো। অজ্ঝত্তং নিযকজ্ঝত্তং জাতিআদি সমুট্ঠানং এতিস্সাতি অজ্ঝত্তসমুট্ঠানা হিরী, বহিদ্ধা অত্ততো বহিভূতো পরসত্তো সমুট্ঠানং এতিস্সাতি বহিদ্ধাসমুট্ঠানং ওত্তপ্পং। অত্তাধিপতিতো আগতা অত্তাধিপতেয্যা, অত্তানং অধিপতিং কত্ৰা পৰত্তা। লজ্জাসভাৰসণ্ঠিতাতি পাপজিগুচ্ছনসভাৰট্ঠাযিনী। সপ্পতিস্সৰলক্খণত্তা গরুনা কিস্মিঞ্চি ৰুত্তে গারৰৰসেন পতিস্সৰনং পতিস্সৰো, সহ পতিস্সৰেনাতি সপ্পতিস্সৰং, পতিস্সৰভূতং তংসভাৰঞ্চ যং কিঞ্চি গারৰং। জাতিআদিমহত্ততাপচ্চৰেক্খণেন উপ্পজ্জমানা চ হিরী তত্থ গারৰৰসেন পৰত্ততীতি সপ্পতিস্সৰলক্খণাতি ৰুচ্চতি। ভযসভাৰসণ্ঠিতন্তি পাপতো ভাযনসভাৰট্ঠাযী, ৰজ্জভীরুকভযদস্সাৰিলক্খণত্তা ৰজ্জং ভাযতি তং ভযতো পস্সতীতি ৰজ্জভীরুকভযদস্সাৰী, এৰংসভাৰং ওত্তপ্পং। অজ্ঝত্তসমুট্ঠানাদিতা চ হিরোত্তপ্পানং তত্থ তত্থ পাকটভাৰেনেৰ ৰুচ্চতি, ন পরেসং কদাচি অঞ্ঞমঞ্ঞৰিপ্পযোগা। ন হি লজ্জনং নিব্ভযং, পাপভযং ৰা অলজ্জনং হোতীতি। অযমেত্থ সঙ্খেপো, ৰিত্থারো পন অট্ঠসালিনিযং (ধ॰ স॰ অট্ঠ॰ ১.বলরাসিৰণ্ণনা) ৰুত্তনযেনেৰ ৰেদিতব্বো। লোকমরিযাদস্স পালনতো লোকপালধম্মা নাম। সুক্কাতি ওদাতা পভস্সরভাৰকারকা, সুক্কাভিজাতিহেতুতায ৰা সুক্কা। সম্ভেদন্তি আচারমরিযাদাসঙ্করং। দেৰভাৰাৰহা ধম্মাতি দেৰধম্মা।
416.Yaṃ hirīyatīti yena dhammena hetubhūtena vā jigucchati. Karaṇe hetaṃ paccattavacanaṃ. Yanti vā liṅgavipallāsena vutto, dhammoti attho. Hirīyitabbenāti upayogatthe karaṇavacanaṃ, hirīyitabbayuttakaṃ kāyaduccaritādinti attho. Ottappitabbenāti etthāpi eseva nayo. Ajjhattaṃ niyakajjhattaṃ jātiādi samuṭṭhānaṃ etissāti ajjhattasamuṭṭhānā hirī, bahiddhā attato bahibhūto parasatto samuṭṭhānaṃ etissāti bahiddhāsamuṭṭhānaṃ ottappaṃ. Attādhipatito āgatā attādhipateyyā, attānaṃ adhipatiṃ katvā pavattā. Lajjāsabhāvasaṇṭhitāti pāpajigucchanasabhāvaṭṭhāyinī. Sappatissavalakkhaṇattā garunā kismiñci vutte gāravavasena patissavanaṃ patissavo, saha patissavenāti sappatissavaṃ, patissavabhūtaṃ taṃsabhāvañca yaṃ kiñci gāravaṃ. Jātiādimahattatāpaccavekkhaṇena uppajjamānā ca hirī tattha gāravavasena pavattatīti sappatissavalakkhaṇāti vuccati. Bhayasabhāvasaṇṭhitanti pāpato bhāyanasabhāvaṭṭhāyī, vajjabhīrukabhayadassāvilakkhaṇattā vajjaṃ bhāyati taṃ bhayato passatīti vajjabhīrukabhayadassāvī, evaṃsabhāvaṃ ottappaṃ. Ajjhattasamuṭṭhānāditā ca hirottappānaṃ tattha tattha pākaṭabhāveneva vuccati, na paresaṃ kadāci aññamaññavippayogā. Na hi lajjanaṃ nibbhayaṃ, pāpabhayaṃ vā alajjanaṃ hotīti. Ayamettha saṅkhepo, vitthāro pana aṭṭhasāliniyaṃ (dha. sa. aṭṭha. 1.balarāsivaṇṇanā) vuttanayeneva veditabbo. Lokamariyādassa pālanato lokapāladhammā nāma. Sukkāti odātā pabhassarabhāvakārakā, sukkābhijātihetutāya vā sukkā. Sambhedanti ācāramariyādāsaṅkaraṃ. Devabhāvāvahā dhammāti devadhammā.
সুক্কধম্মসমাহিতাতি যথাৰুত্তসুক্কধম্মসমঙ্গিনো। সন্তোতি ৰূপসন্তদোসা। সপ্পুরিসাতি সন্তজনা। সপরহিতসাধকা হি সাধৰো।
Sukkadhammasamāhitāti yathāvuttasukkadhammasamaṅgino. Santoti vūpasantadosā. Sappurisāti santajanā. Saparahitasādhakā hi sādhavo.
অৰযৰৰিনিমুত্তস্স সমুদাযস্স অভাৰতো, অৰযৰেন চ সমুদাযস্স অপদিসিতব্বতো ওৰাদূপসম্পদাৰহওৰাদেকদেসো ওৰাদূপসম্পদাতি। ইধাতি ইমস্মিং অস্সপুরে। এতে হিরোত্তপ্পধম্মা। সমণধম্মা নামাতি দস্সিতা মূলভূতসমণভাৰকরা ধম্মাতি কত্ৰা। তথা হি তেসং আদিতো গহণং।
Avayavavinimuttassa samudāyassa abhāvato, avayavena ca samudāyassa apadisitabbato ovādūpasampadāvahaovādekadeso ovādūpasampadāti. Idhāti imasmiṃ assapure. Ete hirottappadhammā. Samaṇadhammā nāmāti dassitā mūlabhūtasamaṇabhāvakarā dhammāti katvā. Tathā hi tesaṃ ādito gahaṇaṃ.
যস্স অধিগমেন নিপ্পরিযাযতো সমণা নাম হোন্তি, সো অরিযমগ্গো ‘‘সমণস্স কম্মং পটিপদা’’তি কত্ৰা সামঞ্ঞং, তস্স পন ফলভাৰতো, আরম্মণকরণৰসেন অরণীযতো ফলনিব্বানানি সামঞ্ঞত্থো। রাগং খেপেতীতি রাগক্খযো, অরিযমগ্গো। রাগো খীযতি এত্থাতি রাগক্খযো, নিব্বানং। ফলং পন কারণূপচারেন রাগক্খযো দট্ঠব্বো। দোসক্খযো মোহক্খযোতি এত্থাপি এসেৰ নযো। সামঞ্ঞভূতো অত্থো সামঞ্ঞত্থো, মগ্গো, সামঞ্ঞস্স অত্থোতি সামঞ্ঞত্থো, ফলন্তি আহ ‘‘মগ্গম্পি ফলম্পি একতো কত্ৰা সামঞ্ঞত্থো কথিতো’’তি। তযিদং উক্কট্ঠনিদ্দেসেন ৰুত্তং। সীলাদিপুব্বভাগপটিপদাপি হি ইধ ‘‘সামঞ্ঞত্থো’’তি গহিতা। তেনেৰাহ ‘‘সতি উত্তরিকরণীযে’’তি। পটিৰেদযামীতি পুনপ্পুনং ঞাপেমি।
Yassa adhigamena nippariyāyato samaṇā nāma honti, so ariyamaggo ‘‘samaṇassa kammaṃ paṭipadā’’ti katvā sāmaññaṃ, tassa pana phalabhāvato, ārammaṇakaraṇavasena araṇīyato phalanibbānāni sāmaññattho. Rāgaṃ khepetīti rāgakkhayo, ariyamaggo. Rāgo khīyati etthāti rāgakkhayo, nibbānaṃ. Phalaṃ pana kāraṇūpacārena rāgakkhayo daṭṭhabbo. Dosakkhayo mohakkhayoti etthāpi eseva nayo. Sāmaññabhūto attho sāmaññattho, maggo, sāmaññassa atthoti sāmaññattho, phalanti āha ‘‘maggampi phalampi ekato katvā sāmaññattho kathito’’ti. Tayidaṃ ukkaṭṭhaniddesena vuttaṃ. Sīlādipubbabhāgapaṭipadāpi hi idha ‘‘sāmaññattho’’ti gahitā. Tenevāha ‘‘sati uttarikaraṇīye’’ti. Paṭivedayāmīti punappunaṃ ñāpemi.
৪১৭. কম্মপথৰসেনেৰাতি অকুসলকম্মপথভাৰেনেৰ, ততো তাদিসম্পি অকুসলকম্মং ভিক্খুস্স কাতুং ন যুত্তন্তি দুট্ঠুল্লভাৰেনেৰ ততো ওরমতীতি অধিপ্পাযো। সিক্খাপদবদ্ধেনাতি সিক্খাপদপঞ্ঞাপনেন। পানীযঘটে ৰা পত্তে ৰা কাকানং হত্থং ৰা দণ্ডং ৰা লেড্ডুং ৰাতি সব্বমিদং নিদস্সনমত্তং দট্ঠব্বং। যত্থ কত্থচি হি ঠিতানং অঞ্ঞেসম্পি পাণীনং উট্ঠাপনাদি সব্বং অনিট্ঠকরণং ইধ অপরিসুদ্ধকাযসমাচারভাৰেনেৰ সঙ্গহিতন্তি। উত্তানোতি উদ্ধমুদ্ধং তনোতীতি উত্তানো। এৰংভূতো চ কেনচি অনুপ্পাদভূমিযং সঞ্জাতসালকল্যাণীখন্ধো ৰিয উপরূপরি উগ্গতুগ্গতো পাকটো চ হোতীতি আহ ‘‘উগ্গতো পাকটো’’তি। অনাৰটোতি অনিৰুতো। তেনাহ ‘‘অসঞ্ছন্নো’’তি, নচ্ছাদেতব্বোতি অত্থো। একসদিসো ৰিসুদ্ধভাৰেন। অন্তরন্তরে ছিদ্দরহিতো পুব্বেনাপরং সম্মাপটিপত্তিযা সন্ধানেন। সংৰুতো কাযিকস্স সংৰরস্স অনুপক্কিলেসতো। তেনাহ ‘‘কিলেসানং দ্ৰারং পিদহনেনা’’তি।
417.Kammapathavasenevāti akusalakammapathabhāveneva, tato tādisampi akusalakammaṃ bhikkhussa kātuṃ na yuttanti duṭṭhullabhāveneva tato oramatīti adhippāyo. Sikkhāpadabaddhenāti sikkhāpadapaññāpanena. Pānīyaghaṭe vā patte vā kākānaṃ hatthaṃ vā daṇḍaṃ vā leḍḍuṃ vāti sabbamidaṃ nidassanamattaṃ daṭṭhabbaṃ. Yattha katthaci hi ṭhitānaṃ aññesampi pāṇīnaṃ uṭṭhāpanādi sabbaṃ aniṭṭhakaraṇaṃ idha aparisuddhakāyasamācārabhāveneva saṅgahitanti. Uttānoti uddhamuddhaṃ tanotīti uttāno. Evaṃbhūto ca kenaci anuppādabhūmiyaṃ sañjātasālakalyāṇīkhandho viya uparūpari uggatuggato pākaṭo ca hotīti āha ‘‘uggato pākaṭo’’ti. Anāvaṭoti anivuto. Tenāha ‘‘asañchanno’’ti, nacchādetabboti attho. Ekasadiso visuddhabhāvena. Antarantare chiddarahito pubbenāparaṃ sammāpaṭipattiyā sandhānena. Saṃvuto kāyikassa saṃvarassa anupakkilesato. Tenāha ‘‘kilesānaṃ dvāraṃ pidahanenā’’ti.
৪১৮. এত্থ যথা লহুকতরং কাকুট্ঠাপনাদিকাযকম্মং কাযসমাচারস্স অপরিসুদ্ধভাৰাৰহং সল্লেখৰিকোপনতো, মিচ্ছাৰিতক্কনমত্তঞ্চ মনোসমাচারস্স, এৰং যং কিঞ্চি অনিয্যানকথাকথনমত্তং ৰচীসমাচারস্স অপরিসুদ্ধভাৰাৰহং সল্লেখৰিকোপনতো, ন হসাধিপ্পাযেন মুসাকথনন্তি দট্ঠব্বং। হসাধিপ্পাযেন হি মুসাকথনং সিক্খাপদবদ্ধেনেৰ পটিক্খিত্তন্তি।
418. Ettha yathā lahukataraṃ kākuṭṭhāpanādikāyakammaṃ kāyasamācārassa aparisuddhabhāvāvahaṃ sallekhavikopanato, micchāvitakkanamattañca manosamācārassa, evaṃ yaṃ kiñci aniyyānakathākathanamattaṃ vacīsamācārassa aparisuddhabhāvāvahaṃ sallekhavikopanato, na hasādhippāyena musākathananti daṭṭhabbaṃ. Hasādhippāyena hi musākathanaṃ sikkhāpadabaddheneva paṭikkhittanti.
৪২০. আজীৰোপি একচ্চো কম্মপথৰসেন ৰারিতো লব্ভতি। সো পন অতিওল়ারিকো কাযৰচীসমাচারৰারেসু ৰুত্তনযো এৰাতি ন গহিতোতি দট্ঠব্বং। যে পন ‘‘তাদিসো ভিক্খূনং অযোগ্যতো ন গহিতো’’তি ৰদন্তি, তং মিচ্ছা তথা সতি কাযৰচীসমাচারৰারেপি তস্স অগ্গহেতব্বভাৰাপত্তিতো। ‘‘খাদথ পিৰথা’’তি পুচ্ছা অত্তনো খাদিতুকামতাদীপনেন, পরিযাযকথাভাৰতো পনেসা সল্লেখৰিকোপনা জাতা।
420. Ājīvopi ekacco kammapathavasena vārito labbhati. So pana atioḷāriko kāyavacīsamācāravāresu vuttanayo evāti na gahitoti daṭṭhabbaṃ. Ye pana ‘‘tādiso bhikkhūnaṃ ayogyato na gahito’’ti vadanti, taṃ micchā tathā sati kāyavacīsamācāravārepi tassa aggahetabbabhāvāpattito. ‘‘Khādatha pivathā’’ti pucchā attano khāditukāmatādīpanena, pariyāyakathābhāvato panesā sallekhavikopanā jātā.
৪২২. অনেসনং পহায ধম্মেন সমেন পচ্চযে পরিযেসন্তো পরিযেসনমত্তঞ্ঞূ নাম। দাযকস্স দেয্যধম্মস্স অত্তনো চ পমাণঞ্ঞুতাপটিগ্গণ্হন্তো পটিগ্গহণমত্তঞ্ঞূ নাম। যোনিসো পচ্চৰেক্খিত্ৰা পরিভুঞ্জন্তো পরিভোগমত্তঞ্ঞূ নাম।
422. Anesanaṃ pahāya dhammena samena paccaye pariyesanto pariyesanamattaññū nāma. Dāyakassa deyyadhammassa attano ca pamāṇaññutāpaṭiggaṇhanto paṭiggahaṇamattaññū nāma. Yoniso paccavekkhitvā paribhuñjanto paribhogamattaññū nāma.
৪২৩. একস্মিং কোট্ঠাসেতি মজ্ঝিমযামসঞ্ঞিতে একস্মিং কোট্ঠাসে। ‘‘ৰামেন পস্সেন সেন্তী’’তি এৰং ৰুত্তা। দক্খিণপস্সেন সযানো নাম নত্থি দক্খিণহত্থস্স সরীরগ্গহণাদিপযোগক্খমতো। পুরিসৰসেন চেতং ৰুত্তং।
423.Ekasmiṃkoṭṭhāseti majjhimayāmasaññite ekasmiṃ koṭṭhāse. ‘‘Vāmena passena sentī’’ti evaṃ vuttā. Dakkhiṇapassena sayāno nāma natthi dakkhiṇahatthassa sarīraggahaṇādipayogakkhamato. Purisavasena cetaṃ vuttaṃ.
তেজুস্সদত্তাতি ইমিনা সীহস্স অভীরুকভাৰং দস্সেতি। ভীরুকা হি সেসমিগা অত্তনো আসযং পৰিসিত্ৰা সন্তাসপুব্বকং যথা তথা সযন্তি, সীহো পন অভীরুকভাৰতো সতোকারী ভিক্খু ৰিয সতিং উপট্ঠপেত্ৰাৰ সযতি। তেনাহ ‘‘দ্ৰে পুরিমপাদে’’তিআদি। সেতি অব্যাৰটভাৰেন পৰত্ততি এত্থাতি সেয্যা, চতুত্থজ্ঝানমেৰ সেয্যা। কিং পন তং চতুত্থজ্ঝানন্তি? আনাপানচতুত্থজ্ঝানং। তত্থ হি ঠত্ৰা ৰিপস্সনং ৰড্ঢেত্ৰা ভগৰা অনুক্কমেন অগ্গমগ্গং অধিগতো তথাগতো জাতোতি কেচি, তযিদং পদট্ঠানং নাম ন সেয্যা। অপরে পন ‘‘চতুত্থজ্ঝানসমনন্তরা ভগৰা পরিনিব্বাযী’’তি ৰুত্তপদং গহেত্ৰা ‘‘লোকিযচতুত্থজ্ঝানসমাপত্তি তথাগতসেয্যা’’তি ৰদন্তি, তথা সতি পরিনিব্বানকালিকা তথাগতসেয্যাতি আপজ্জতি, ন চ ভগৰা চতুত্থজ্ঝানং সমাপজ্জনবহুলো ৰিহাসি, অগ্গফলঝানং পনেত্থ ‘‘চতুত্থজ্ঝান’’ন্তি অধিপ্পেতং। তত্থ যথা সত্তানং নিদ্দুপগমনলক্খণা সেয্যা ভৰঙ্গচিত্তৰারৰসেন হোতি, তঞ্চ তেসং পঠমজাতিসমন্ৰযং যেভুয্যৰুত্তিকং, এৰং ভগৰতো অরিযজাতিসমন্ৰযং যেভুয্যৰুত্তিকং অগ্গফলভূতং চতুত্থজ্ঝানং ‘‘তথাগতসেয্যা’’তি ৰেদিতব্বং। সীহসেয্যাতি সেট্ঠসেয্যাতি আহ ‘‘উত্তমসেয্যা’’তি।
Tejussadattāti iminā sīhassa abhīrukabhāvaṃ dasseti. Bhīrukā hi sesamigā attano āsayaṃ pavisitvā santāsapubbakaṃ yathā tathā sayanti, sīho pana abhīrukabhāvato satokārī bhikkhu viya satiṃ upaṭṭhapetvāva sayati. Tenāha ‘‘dve purimapāde’’tiādi. Seti abyāvaṭabhāvena pavattati etthāti seyyā, catutthajjhānameva seyyā. Kiṃ pana taṃ catutthajjhānanti? Ānāpānacatutthajjhānaṃ. Tattha hi ṭhatvā vipassanaṃ vaḍḍhetvā bhagavā anukkamena aggamaggaṃ adhigato tathāgato jātoti keci, tayidaṃ padaṭṭhānaṃ nāma na seyyā. Apare pana ‘‘catutthajjhānasamanantarā bhagavā parinibbāyī’’ti vuttapadaṃ gahetvā ‘‘lokiyacatutthajjhānasamāpatti tathāgataseyyā’’ti vadanti, tathā sati parinibbānakālikā tathāgataseyyāti āpajjati, na ca bhagavā catutthajjhānaṃ samāpajjanabahulo vihāsi, aggaphalajhānaṃ panettha ‘‘catutthajjhāna’’nti adhippetaṃ. Tattha yathā sattānaṃ niddupagamanalakkhaṇā seyyā bhavaṅgacittavāravasena hoti, tañca tesaṃ paṭhamajātisamanvayaṃ yebhuyyavuttikaṃ, evaṃ bhagavato ariyajātisamanvayaṃ yebhuyyavuttikaṃ aggaphalabhūtaṃ catutthajjhānaṃ ‘‘tathāgataseyyā’’ti veditabbaṃ. Sīhaseyyāti seṭṭhaseyyāti āha ‘‘uttamaseyyā’’ti.
৪২৬. ৰিগতন্তানীতি ইণমূলানি। তেসন্তি ইণমূলানং। পরিযন্তোতি অৰসেসো।
426.Vigatantānīti iṇamūlāni. Tesanti iṇamūlānaṃ. Pariyantoti avaseso.
পৰত্তিনিৰারণেন চতুইরিযাপথং ছিন্দন্তো। আবাধতীতি পীল়েতি। দুক্খিতোতি সঞ্জাতদুক্খো। অপ্পং বলং বলমত্তা। অপ্পত্থো হি অযং মত্তা-সদ্দো ‘‘মত্তাসুখপরিচ্চাগা’’তিআদীসু (ধ॰ প॰ ২৯০) ৰিয, বলৰত্থো পন মত্তা-সদ্দো অনত্থন্তরো। সেসন্তি ‘‘তস্স হি বন্ধনা মুত্তোম্হীতি আৰজ্জযতো তদুভযং হোতী’’তিআদিনা ৰত্তব্বং সন্ধাযাহ। সব্বপদেসূতি ৰুত্তাৰসিট্ঠেসু সব্বপদেসু। যেনকামং যথারুচি গচ্ছতীতি যেনকামংগমোতি অনুনাসিকলোপং অকত্ৰা নিদ্দেসো। ভুজো অত্তনো যথাসুখৰিনিযোগো ইস্সো ইচ্ছিতব্বো এত্থাতি ভুজিস্সো, সামিকো। সো পন অপরসন্তকতায ‘‘অত্তনো সন্তকো’’তি ৰুত্তো। দুল্লভআপতায কং তারেন্তি এত্থাতি কন্তারোতি আহ ‘‘নিরুদকং দীঘমগ্গ’’ন্তি।
Pavattinivāraṇena catuiriyāpathaṃ chindanto. Ābādhatīti pīḷeti. Dukkhitoti sañjātadukkho. Appaṃ balaṃ balamattā. Appattho hi ayaṃ mattā-saddo ‘‘mattāsukhapariccāgā’’tiādīsu (dha. pa. 290) viya, balavattho pana mattā-saddo anatthantaro. Sesanti ‘‘tassa hi bandhanā muttomhīti āvajjayato tadubhayaṃ hotī’’tiādinā vattabbaṃ sandhāyāha. Sabbapadesūti vuttāvasiṭṭhesu sabbapadesu. Yenakāmaṃ yathāruci gacchatīti yenakāmaṃgamoti anunāsikalopaṃ akatvā niddeso. Bhujo attano yathāsukhaviniyogo isso icchitabbo etthāti bhujisso, sāmiko. So pana aparasantakatāya ‘‘attano santako’’ti vutto. Dullabhaāpatāya kaṃ tārenti etthāti kantāroti āha ‘‘nirudakaṃ dīghamagga’’nti.
ৰিনাসেতীতি খাদনদুব্বিনিযোজনাদীহি যথা ইণমূলং কিঞ্চি ন হোতি, তথা করোতি। যম্হি রাগৰত্থুম্হি। সো পুগ্গলো। তেন রাগৰত্থুনা, পুরিসো চে ইত্থিযা, ইত্থী চে পুরিসেন। ইণং ৰিয কামচ্ছন্দো দট্ঠব্বো পীল়াসমানতো।
Vināsetīti khādanadubbiniyojanādīhi yathā iṇamūlaṃ kiñci na hoti, tathā karoti. Yamhi rāgavatthumhi. So puggalo. Tena rāgavatthunā, puriso ce itthiyā, itthī ce purisena. Iṇaṃ viya kāmacchando daṭṭhabbo pīḷāsamānato.
ন ৰিন্দতীতি ন জানাতি। উপদ্দৰেথাতি সুখৰিহারস্স উপদ্দৰং করোথ, ৰিবাধেথাতি অত্থো। রোগো ৰিয ব্যাপাদো দট্ঠব্বো সুখভঞ্জনসমানতো।
Na vindatīti na jānāti. Upaddavethāti sukhavihārassa upaddavaṃ karotha, vibādhethāti attho. Rogo viya byāpādo daṭṭhabbo sukhabhañjanasamānato.
নানাৰিধহেতূপাযালঙ্কততায খন্ধাযতনধাতুপটিচ্চসমুপ্পাদাদিধম্মনীতিৰিচিত্ততায চ ৰিচিত্তনযে। ধম্মস্সৰনেতি ধম্মকথাযং। কথা হি সোতব্বট্ঠেন ‘‘সৰন’’ন্তি ৰুত্তা। এৰমেত্থ সীলং ৰিভত্তং, এৰং ঝানাভিঞ্ঞা, এৰং ৰিপস্সনামগ্গফলানীতি নেৰ তস্স ধম্মস্সৰনস্স আদিমজ্ঝপরিযোসানং জানাতি। উট্ঠিতেতি নিট্ঠিতে। অহো কারণন্তি তত্থ তত্থ পটিঞ্ঞানুরূপেন নিক্খিত্তসাধনৰসেন গহিতকারণং। অহো উপমাতি তস্সেৰ কারণস্স পতিট্ঠাপনৰসেন অন্ৰযতো ব্যতিরেকতো চ পতিট্ঠং উদাহরণাদি। বন্ধনাগারং ৰিয থিনমিদ্ধং দট্ঠব্বং দুক্খতো নিয্যানস্স ৰিবন্ধনতো।
Nānāvidhahetūpāyālaṅkatatāya khandhāyatanadhātupaṭiccasamuppādādidhammanītivicittatāya ca vicittanaye. Dhammassavaneti dhammakathāyaṃ. Kathā hi sotabbaṭṭhena ‘‘savana’’nti vuttā. Evamettha sīlaṃ vibhattaṃ, evaṃ jhānābhiññā, evaṃ vipassanāmaggaphalānīti neva tassa dhammassavanassa ādimajjhapariyosānaṃ jānāti. Uṭṭhiteti niṭṭhite. Aho kāraṇanti tattha tattha paṭiññānurūpena nikkhittasādhanavasena gahitakāraṇaṃ. Aho upamāti tasseva kāraṇassa patiṭṭhāpanavasena anvayato byatirekato ca patiṭṭhaṃ udāharaṇādi. Bandhanāgāraṃ viya thinamiddhaṃ daṭṭhabbaṃ dukkhato niyyānassa vibandhanato.
যস্মা কুক্কুচ্চনীৰরণং উদ্ধচ্চরহিতং নত্থি, যস্মা ৰা উদ্ধচ্চকুক্কুচ্চং সমানকিচ্চাহারপটিপক্খং, তস্মা কুক্কুচ্চস্স ৰিসযং দস্সেন্তো ‘‘ৰিনযে অপকতঞ্ঞুনা’’তিআদিমাহ। যথা হি উদ্ধচ্চং সত্তস্স অৰূপসমকরং, তথা কুক্কুচ্চম্পি। যথাপি উদ্ধচ্চস্স ঞাতিৰিতক্কাদি আহারো, তথা কুক্কুচ্চস্সপি। যথা চ উদ্ধচ্চস্স সমথো পটিপক্খো, তথা কুক্কুচ্চস্সপীতি। দাসব্যং ৰিয উদ্ধচ্চকুক্কুচ্চং দট্ঠব্বং অসেরিভাৰাপাদনতো।
Yasmā kukkuccanīvaraṇaṃ uddhaccarahitaṃ natthi, yasmā vā uddhaccakukkuccaṃ samānakiccāhārapaṭipakkhaṃ, tasmā kukkuccassa visayaṃ dassento ‘‘vinaye apakataññunā’’tiādimāha. Yathā hi uddhaccaṃ sattassa avūpasamakaraṃ, tathā kukkuccampi. Yathāpi uddhaccassa ñātivitakkādi āhāro, tathā kukkuccassapi. Yathā ca uddhaccassa samatho paṭipakkho, tathā kukkuccassapīti. Dāsabyaṃ viya uddhaccakukkuccaṃ daṭṭhabbaṃ aseribhāvāpādanato.
সোল়সৰত্থুকা ৰিচিকিচ্ছা অট্ঠৰত্থুকং ৰিচিকিচ্ছং অনুপৰিট্ঠাতি আহ ‘‘অট্ঠসু ঠানেসু ৰিচিকিচ্ছা’’তি। ৰিচিকিচ্ছন্তোতি সংসযন্তো। অধিমুচ্চিত্ৰাতি পত্তিযাযেত্ৰা। গণ্হিতুন্তি সদ্ধেয্যৰত্থুং পরিগ্গহেতুং। অভিমুখং সপ্পনং আসপ্পনং, পরিতো সপ্পনং পরিসপ্পনং। পদদ্ৰযেনপি চিত্তস্স অনিচ্ছনাকারমেৰ ৰদতি। খেমন্তগামিমগ্গং ন পরিযোগাহতি এতেনাতি অপরিযোগাহনং, উস্সঙ্কিতপরিসঙ্কিতভাৰেন ছম্ভিতং হোতি চিত্তং যস্স ধম্মস্স ৰসেন, সো ধম্মো ছম্ভিতত্তন্তি ৰিচিকিচ্ছনাকারমাহ। তেনাহ ‘‘চিত্তস্স উপ্পাদযমানা’’তি। কন্তারদ্ধানমগ্গো ৰিযাতি সাসঙ্ককন্তারদ্ধানমগ্গো ৰিয দট্ঠব্বা অপ্পটিপত্তিহেতুভাৰতো।
Soḷasavatthukā vicikicchā aṭṭhavatthukaṃ vicikicchaṃ anupaviṭṭhāti āha ‘‘aṭṭhasu ṭhānesu vicikicchā’’ti. Vicikicchantoti saṃsayanto. Adhimuccitvāti pattiyāyetvā. Gaṇhitunti saddheyyavatthuṃ pariggahetuṃ. Abhimukhaṃ sappanaṃ āsappanaṃ, parito sappanaṃ parisappanaṃ. Padadvayenapi cittassa anicchanākārameva vadati. Khemantagāmimaggaṃ na pariyogāhati etenāti apariyogāhanaṃ, ussaṅkitaparisaṅkitabhāvena chambhitaṃ hoti cittaṃ yassa dhammassa vasena, so dhammo chambhitattanti vicikicchanākāramāha. Tenāha ‘‘cittassa uppādayamānā’’ti. Kantāraddhānamaggo viyāti sāsaṅkakantāraddhānamaggo viya daṭṭhabbā appaṭipattihetubhāvato.
নত্থি এত্থ ইণন্তি অণণো, তস্স ভাৰো আণণ্যং, কস্সচি ইণস্স অধারণং। সমিদ্ধকম্মন্তোতি নিপ্ফন্নজীৰিকপ্পযোগো। পরিবুন্ধতি উপরোধেতীতি র-কারস্স ল-কারং কত্ৰা পলিবোধো, অসেরিৰিহারো, তস্স মূলং কারণন্তি পলিবোধমূলং। ছ ধম্মে ভাৰেত্ৰাতি অসুভনিমিত্তগ্গাহাদিকে ছ ধম্মে উপ্পাদেত্ৰা ৰড্ঢেত্ৰা। ছ ধম্মে ভাৰেত্ৰাতি চ মেত্তানিমিত্তগ্গাহাদযো চ তত্থ তত্থ ছ ধম্মাতি ৰুত্তাতি ৰেদিতব্বো। পজহতীতি ৰিক্খম্ভনৰসেন পজহতি। তেনাহ ‘‘আচারপণ্ণত্তিআদীনি সিক্খাপিযমানো’’তিআদি। পরৰত্থুম্হীতি ৰিসভাগৰত্থুস্মিং, পরৰিসযে ৰা। পরৰিসযা হেতে ভিক্খুনো, যদিদং পঞ্চ কামগুণা। আণণ্যমিৰ কামচ্ছন্দপ্পহানং আহ পিযৰত্থুঅভাৰাৰহতো।
Natthi ettha iṇanti aṇaṇo, tassa bhāvo āṇaṇyaṃ, kassaci iṇassa adhāraṇaṃ. Samiddhakammantoti nipphannajīvikappayogo. Paribundhati uparodhetīti ra-kārassa la-kāraṃ katvā palibodho, aserivihāro, tassa mūlaṃ kāraṇanti palibodhamūlaṃ. Cha dhamme bhāvetvāti asubhanimittaggāhādike cha dhamme uppādetvā vaḍḍhetvā. Cha dhamme bhāvetvāti ca mettānimittaggāhādayo ca tattha tattha cha dhammāti vuttāti veditabbo. Pajahatīti vikkhambhanavasena pajahati. Tenāha ‘‘ācārapaṇṇattiādīni sikkhāpiyamāno’’tiādi. Paravatthumhīti visabhāgavatthusmiṃ, paravisaye vā. Paravisayā hete bhikkhuno, yadidaṃ pañca kāmaguṇā. Āṇaṇyamiva kāmacchandappahānaṃ āha piyavatthuabhāvāvahato.
আচারৰিপত্তিপটিবাহকানি সিক্খাপদানি আচারপণ্ণত্তিআদীনি। আরোগ্যমিৰ ব্যাপাদপ্পহানং আহ কাযচিত্তানং ফাসুভাৰাৰহতো।
Ācāravipattipaṭibāhakāni sikkhāpadāni ācārapaṇṇattiādīni. Ārogyamiva byāpādappahānaṃ āha kāyacittānaṃ phāsubhāvāvahato.
বন্ধনা মোক্খমিৰ থিনমিদ্ধপ্পহানং আহ চিত্তস্স নিগ্গহিতভাৰাৰহতো।
Bandhanā mokkhamiva thinamiddhappahānaṃ āha cittassa niggahitabhāvāvahato.
ভুজিস্সং ৰিয উদ্ধচ্চকুক্কুচ্চপ্পহানং আহ চিত্তস্স সেরিভাৰাৰহতো।
Bhujissaṃ viya uddhaccakukkuccappahānaṃ āha cittassa seribhāvāvahato.
তিণং ৰিযাতি তিণমিৰ কত্ৰা। অগণেত্ৰাতি অচিন্তেত্ৰা। খেমন্তভূমিং ৰিয ৰিচিকিচ্ছাপহানং আহ অনুস্সঙ্কিতাপরিসঙ্কিতভাৰেন সম্মাপটিপত্তিহেতুভাৰতো।
Tiṇaṃviyāti tiṇamiva katvā. Agaṇetvāti acintetvā. Khemantabhūmiṃ viya vicikicchāpahānaṃ āha anussaṅkitāparisaṅkitabhāvena sammāpaṭipattihetubhāvato.
৪২৭. কিরীযতি (অ॰ নি॰ টী॰ ৩.৫.২৮-২৯) গব্ভাসযে খিপীযতীতি করো, সম্ভৰো, করতো জাতোতি করজো, মাতাপেত্তিকসম্ভৰোতি অত্থো। মাতুযা হি সরীরসণ্ঠাপনৰসেন করতো জাতোতি করজোতি অপরে। উভযথাপি করজকাযন্তি চতুসন্ততিরূপমাহ। তেমেতীতি তিন্তং করোতি। কো পনেত্থ তিন্তভাৰোতি আহ ‘‘স্নেহেতী’’তি, পীতিস্নেহেন পীণনং করোতীতি অত্থো। তেনাহ ‘‘সব্বত্থ পৰত্তপীতিসুখং করোতী’’তি। পীতিসমুট্ঠানপণীতরূপেহি সকলস্স করজকাযস্স পরিফুটতায চেত্থ তংসমুট্ঠাপকপীতিসুখানং সব্বত্থ পৰত্তি জোতিতা। পরিসন্দেতীতিআদীসুপি এসেৰ নযো। তত্থাপি হি ‘‘সমন্ততো সন্দেতি তেমেতি স্নেহেতি, সব্বত্থ পৰত্তপীতিসুখং করোতী’’তিআদিনা যথারহং অত্থো ৰেদিতব্বো। পরিপূরেতীতি ৰাযুনা ভস্তং ৰিয ইমং করজকাযং পীতিসুখেন পূরেতি। সমন্ততো ফুসতীতি ইমং করজকাযং পীতিসুখেন ফুসতি। সব্বাৰতোতি অ-কারস্স আ-কারো কতো, সব্বাৰযৰৰতোতি অত্থোতি আহ ‘‘সব্বকোট্ঠাসৰতো’’তি, মংসাদিসব্বাভাগৰতোতি অত্থো। অফুটং নাম ন হোতি পীতিসুখসমুট্ঠানেহি রূপেহি সব্বত্থকমেৰ ব্যাপিতত্তা। কাতুঞ্চেৰ যোজেতুঞ্চ ছেকো সন্নেতুং পটিবলোতি যোজনা। ন্হানীযচুণ্ণানং পরিমদ্দনৰসেন পিণ্ডং করোন্তেন হত্থেন ভাজনং নিপ্পীল়েতব্বং হোতীতি আহ ‘‘সন্নেন্তস্স ভিজ্জতী’’তি। অনুগতাতি অনুপৰিট্ঠা। পরিগতাতি পরিতো সমন্ততো তিন্তা। তিন্তভাৰেনেৰ সমং অন্তরং বাহিরঞ্চ এতিস্সাতি সন্তরবাহিরা। সব্বত্থকমেৰাতি সব্বত্থেৰ। ন চ পগ্ঘরিণী পমাণযুত্তস্সেৰ উদকস্স সিত্তত্তা। এত্থ চ ন্হানীযপিণ্ডং ৰিয করজকাযো, তং তেমেত্ৰা সম্পিণ্ডিতপমাণযুত্তউদকং ৰিয পঠমজ্ঝানসুখং দট্ঠব্বং।
427. Kirīyati (a. ni. ṭī. 3.5.28-29) gabbhāsaye khipīyatīti karo, sambhavo, karato jātoti karajo, mātāpettikasambhavoti attho. Mātuyā hi sarīrasaṇṭhāpanavasena karato jātoti karajoti apare. Ubhayathāpi karajakāyanti catusantatirūpamāha. Temetīti tintaṃ karoti. Ko panettha tintabhāvoti āha ‘‘snehetī’’ti, pītisnehena pīṇanaṃ karotīti attho. Tenāha ‘‘sabbattha pavattapītisukhaṃ karotī’’ti. Pītisamuṭṭhānapaṇītarūpehi sakalassa karajakāyassa pariphuṭatāya cettha taṃsamuṭṭhāpakapītisukhānaṃ sabbattha pavatti jotitā. Parisandetītiādīsupi eseva nayo. Tatthāpi hi ‘‘samantato sandeti temeti sneheti, sabbattha pavattapītisukhaṃ karotī’’tiādinā yathārahaṃ attho veditabbo. Paripūretīti vāyunā bhastaṃ viya imaṃ karajakāyaṃ pītisukhena pūreti. Samantato phusatīti imaṃ karajakāyaṃ pītisukhena phusati. Sabbāvatoti a-kārassa ā-kāro kato, sabbāvayavavatoti atthoti āha ‘‘sabbakoṭṭhāsavato’’ti, maṃsādisabbābhāgavatoti attho. Aphuṭaṃ nāma na hoti pītisukhasamuṭṭhānehi rūpehi sabbatthakameva byāpitattā. Kātuñceva yojetuñca cheko sannetuṃ paṭibaloti yojanā. Nhānīyacuṇṇānaṃ parimaddanavasena piṇḍaṃ karontena hatthena bhājanaṃ nippīḷetabbaṃ hotīti āha ‘‘sannentassa bhijjatī’’ti. Anugatāti anupaviṭṭhā. Parigatāti parito samantato tintā. Tintabhāveneva samaṃ antaraṃ bāhirañca etissāti santarabāhirā. Sabbatthakamevāti sabbattheva. Na ca pagghariṇī pamāṇayuttasseva udakassa sittattā. Ettha ca nhānīyapiṇḍaṃ viya karajakāyo, taṃ temetvā sampiṇḍitapamāṇayuttaudakaṃ viya paṭhamajjhānasukhaṃ daṭṭhabbaṃ.
৪২৮. হেট্ঠা উব্ভিজ্জিত্ৰা উগ্গচ্ছনউদকোতি রহদস্স অধোথূলধারাৰসেন উব্ভিজ্জ উট্ঠহনউদকো। অন্তোযেৰ উব্ভিজ্জনউদকোতি রহদস্স অব্ভন্তরেযেৰ থূলধারা অহুত্ৰা উট্ঠিতউদকসিরামুখেহি উব্ভিজ্জনকো। আগমনমগ্গোতি নদীতল়াককন্দরসরআদিতো আগমনমগ্গো।
428.Heṭṭhā ubbhijjitvā uggacchanaudakoti rahadassa adhothūladhārāvasena ubbhijja uṭṭhahanaudako. Antoyeva ubbhijjanaudakoti rahadassa abbhantareyeva thūladhārā ahutvā uṭṭhitaudakasirāmukhehi ubbhijjanako. Āgamanamaggoti nadītaḷākakandarasaraādito āgamanamaggo.
৪২৯. উপ্পলগচ্ছানি এত্থ সন্তীতি উপ্পলিনী (অ॰ নি॰ টী॰ ৩.৫.২৮-২৯), ৰারি। অযমেত্থ ৰিনিচ্ছযো, তথা হি লোকে রত্তক্খিকো ‘‘পুণ্ডরীকক্খো’’তি ৰুচ্চতি। কেচি পন ‘‘রত্তং পদুমং, সেতং পুণ্ডরীক’’ন্তি ৰদন্তি। উপ্পলাদীনি ৰিয করজকাযো, উদকং ৰিয ততিযজ্ঝানসুখন্তি অযম্পি অত্থো ‘‘পুরিমনযেনা’’তি অতিদেসেনেৰ ৰিভাৰিতোতি দট্ঠব্বং।
429. Uppalagacchāni ettha santīti uppalinī (a. ni. ṭī. 3.5.28-29), vāri. Ayamettha vinicchayo, tathā hi loke rattakkhiko ‘‘puṇḍarīkakkho’’ti vuccati. Keci pana ‘‘rattaṃ padumaṃ, setaṃ puṇḍarīka’’nti vadanti. Uppalādīni viya karajakāyo, udakaṃ viya tatiyajjhānasukhanti ayampi attho ‘‘purimanayenā’’ti atideseneva vibhāvitoti daṭṭhabbaṃ.
৪৩০. নিরুপক্কিলেসট্ঠেনাতি রজোজল্লাদিনা অনুপক্কিলিট্ঠতায অমলীনভাৰেন। অমলীনম্পি কিঞ্চি ৰত্থু পভস্সরসভাৰং হোতীতি ৰুত্তং ‘‘পভস্সরট্ঠেনা’’তি। উতুফরণন্তি উণ্হউতুফরণং। সব্বত্থকমেৰ ঝানসুখেন ফুট্ঠো করজকাযো যথা উতুনা ফুট্ঠৰত্থসদিসোতি আহ ‘‘ৰত্থং ৰিয করজকাযো’’তি। তস্মাতি ‘‘ৰত্থং ৰিযা’’তিআদিনা ৰুত্তমেৰত্থং হেতুভাৰেন পচ্চামসতি, করজকাযস্স ৰত্থসদিসত্তা চতুত্থজ্ঝানসুখস্স চ উতুফরণসদিসত্তাতি অত্থো। সন্তসভাৰত্তা ঞাণুত্তরত্তা চেত্থ উপেক্খাপি সুখে সঙ্গহিতাতি চতুত্থজ্ঝানেপি সুখগ্গহণং কতং। ‘‘পরিসুদ্ধেন পরিযোদাতেন ফরিত্ৰা নিসিন্নো হোতী’’তি ৰচনতো চতুত্থজ্ঝানচিত্তস্স ৰত্থসদিসতা ৰুত্তা। চতুত্থজ্ঝানসমুট্ঠানরূপেহি ভিক্খুনো কাযস্স ফুটভাৰং সন্ধায ‘‘তংসমুট্ঠানরূপং উতুফরণং ৰিযা’’তি ৰুত্তং। পুরিসস্স কাযো ৰিয ভিক্খুনো করজকাযোতি অযং পনত্থো পাকটোতি ন গহিতো, গহিতো এৰ ৰা ‘‘যথা হি কত্থচি…পে॰… কাযো ফুটো হোতী’’তি ৰুত্তত্তা।
430.Nirupakkilesaṭṭhenāti rajojallādinā anupakkiliṭṭhatāya amalīnabhāvena. Amalīnampi kiñci vatthu pabhassarasabhāvaṃ hotīti vuttaṃ ‘‘pabhassaraṭṭhenā’’ti. Utupharaṇanti uṇhautupharaṇaṃ. Sabbatthakameva jhānasukhena phuṭṭho karajakāyo yathā utunā phuṭṭhavatthasadisoti āha ‘‘vatthaṃ viya karajakāyo’’ti. Tasmāti ‘‘vatthaṃ viyā’’tiādinā vuttamevatthaṃ hetubhāvena paccāmasati, karajakāyassa vatthasadisattā catutthajjhānasukhassa ca utupharaṇasadisattāti attho. Santasabhāvattā ñāṇuttarattā cettha upekkhāpi sukhe saṅgahitāti catutthajjhānepi sukhaggahaṇaṃ kataṃ. ‘‘Parisuddhena pariyodātena pharitvā nisinno hotī’’ti vacanato catutthajjhānacittassa vatthasadisatā vuttā. Catutthajjhānasamuṭṭhānarūpehi bhikkhuno kāyassa phuṭabhāvaṃ sandhāya ‘‘taṃsamuṭṭhānarūpaṃ utupharaṇaṃ viyā’’ti vuttaṃ. Purisassa kāyo viya bhikkhuno karajakāyoti ayaṃ panattho pākaṭoti na gahito, gahito eva vā ‘‘yathā hi katthaci…pe… kāyo phuṭo hotī’’ti vuttattā.
৪৩১. পুব্বেনিৰাসঞাণউপমাযন্তি পুব্বেনিৰাসঞাণস্স দস্সিতউপমাযং। তংদিৰসংকতকিরিযাগহণং পাকতিকসত্তস্সপি যেভুয্যেন পাকটা হোতীতি দস্সনত্থং। তংদিৰসগতগামত্তযগ্গহণেনেৰ মহাভিনীহারেহি অঞ্ঞেসম্পি পুব্বেনিৰাসঞাণলাভীনং তীসু ভৰেসু কতা কিরিযা যেভুয্যেন পাকটা হোতীতি দীপিতন্তি দট্ঠব্বং।
431.Pubbenivāsañāṇaupamāyanti pubbenivāsañāṇassa dassitaupamāyaṃ. Taṃdivasaṃkatakiriyāgahaṇaṃ pākatikasattassapi yebhuyyena pākaṭā hotīti dassanatthaṃ. Taṃdivasagatagāmattayaggahaṇeneva mahābhinīhārehi aññesampi pubbenivāsañāṇalābhīnaṃ tīsu bhavesu katā kiriyā yebhuyyena pākaṭā hotīti dīpitanti daṭṭhabbaṃ.
৪৩২. সম্মুখদ্ৰারাতি অঞ্ঞমঞ্ঞস্স অভিমুখদ্ৰারা। অপরাপরং সঞ্চরন্তেতি তংতংকিচ্চৰসেন ইতো চিতো চ সঞ্চরন্তে। ইতো পন গেহা…পে॰… পৰিসনৰসেনপীতি ইদং চুতূপপাতঞাণস্স ৰিসযদস্সনৰসেন ৰুত্তং। দ্ৰিন্নং গেহানং অন্তরে ঠত্ৰাতি দ্ৰিন্নং গেহদ্ৰারানং সম্মুখট্ঠানভূতে অন্তরৰীথিযং ৰেমজ্ঝে ঠত্ৰা। তেসু হি একস্স চে পাচীনমুখদ্ৰারং ইতরস্স পচ্ছিমমুখং, তস্স সম্মুখং উভিন্নং অন্তরৰীথিযং ঠিতস্স দক্খিণামুখস্স, উত্তরামুখস্স ৰা চক্খুমতো পুরিসস্স তত্থ পৰিসনকনিক্খমনকপুরিসা যথা সুখেনেৰ পাকটা হোন্তি, এৰং দিব্বচক্খুঞাণসমঙ্গিনো চৰনকউপপজ্জনকপুরিসা। যথা পন তস্স পুরিসস্স অঞ্ঞেনেৰ খণেন পৰিসন্তস্স দস্সনং, অঞ্ঞেন নিক্খমন্তস্স দস্সনং, এৰং ইমস্সপি অঞ্ঞেনেৰ খণেন চৰমানস্স দস্সনং, অঞ্ঞেন উপপজ্জমানস্স দস্সনন্তি দট্ঠব্বং। ঞাণস্স পাকটাতি আনেত্ৰা সম্বন্ধো। তস্সাতি ঞাণস্স।
432.Sammukhadvārāti aññamaññassa abhimukhadvārā. Aparāparaṃ sañcaranteti taṃtaṃkiccavasena ito cito ca sañcarante. Ito pana gehā…pe… pavisanavasenapīti idaṃ cutūpapātañāṇassa visayadassanavasena vuttaṃ. Dvinnaṃ gehānaṃ antare ṭhatvāti dvinnaṃ gehadvārānaṃ sammukhaṭṭhānabhūte antaravīthiyaṃ vemajjhe ṭhatvā. Tesu hi ekassa ce pācīnamukhadvāraṃ itarassa pacchimamukhaṃ, tassa sammukhaṃ ubhinnaṃ antaravīthiyaṃ ṭhitassa dakkhiṇāmukhassa, uttarāmukhassa vā cakkhumato purisassa tattha pavisanakanikkhamanakapurisā yathā sukheneva pākaṭā honti, evaṃ dibbacakkhuñāṇasamaṅgino cavanakaupapajjanakapurisā. Yathā pana tassa purisassa aññeneva khaṇena pavisantassa dassanaṃ, aññena nikkhamantassa dassanaṃ, evaṃ imassapi aññeneva khaṇena cavamānassa dassanaṃ, aññena upapajjamānassa dassananti daṭṭhabbaṃ. Ñāṇassa pākaṭāti ānetvā sambandho. Tassāti ñāṇassa.
৪৩৩. পব্বতসিখরং যেভুয্যেন সংখিত্তং সঙ্কুচিতং হোতীতি ইধ পব্বতমত্থকং ‘‘পব্বতসঙ্খেপো’’তি ৰুত্তং, পব্বতপরিযাপন্নো ৰা পদেসো পব্বতসঙ্খেপো। অনাৰিলোতি অকালুস্সো। সা চস্স অনাৰিলতা কদ্দমাভাৰেন হোতীতি আহ ‘‘নিক্কদ্দমো’’তি। ঠিতাসুপি নিসিন্নাসুপি গাৰীসু। ৰিজ্জমানাসূতি লব্ভমানাসু। ইতরা ঠিতাপি নিসিন্নাপি চরন্তীতি ৰুচ্চন্তি সহচরণঞাযেন। তিট্ঠন্তমেৰ, ন কদাচিপি চরন্তং। দ্ৰযন্তি সিপ্পিসম্মুকং মচ্ছগুম্বন্তি ইমং উভযং তিট্ঠন্তন্তি ৰুত্তং, চরন্তম্পীতি অধিপ্পাযো। কিং ৰা ইমায সহচরিযায, যথালাভগ্গহণং পনেত্থ দট্ঠব্বং। সক্খরকথলস্স হি ৰসেন ‘‘তিট্ঠন্ত’’ন্তি, সিপ্পিসম্বুকস্স মচ্ছগুম্বস্স চ ৰসেন ‘‘তিট্ঠন্তম্পি, চরন্তম্পী’’তি যোজনা কাতব্বা।
433. Pabbatasikharaṃ yebhuyyena saṃkhittaṃ saṅkucitaṃ hotīti idha pabbatamatthakaṃ ‘‘pabbatasaṅkhepo’’ti vuttaṃ, pabbatapariyāpanno vā padeso pabbatasaṅkhepo. Anāviloti akālusso. Sā cassa anāvilatā kaddamābhāvena hotīti āha ‘‘nikkaddamo’’ti. Ṭhitāsupi nisinnāsupi gāvīsu. Vijjamānāsūti labbhamānāsu. Itarā ṭhitāpi nisinnāpi carantīti vuccanti sahacaraṇañāyena. Tiṭṭhantameva, na kadācipi carantaṃ. Dvayanti sippisammukaṃ macchagumbanti imaṃ ubhayaṃ tiṭṭhantanti vuttaṃ, carantampīti adhippāyo. Kiṃ vā imāya sahacariyāya, yathālābhaggahaṇaṃ panettha daṭṭhabbaṃ. Sakkharakathalassa hi vasena ‘‘tiṭṭhanta’’nti, sippisambukassa macchagumbassa ca vasena ‘‘tiṭṭhantampi, carantampī’’ti yojanā kātabbā.
৪৩৪. ভিক্খূতি ভিন্নকিলেসোতি ভিক্খু। সো হি পরমত্থতো সমণোতিনামকো। তত্থ অরিযমগ্গেন সব্বসো পাপানং সমিতাৰীতি সমণো। তেনাহ ‘‘সমিতপাপত্তা’’তি। সেট্ঠট্ঠেন ব্রহ্মা ৰুচ্চতি সম্মাসম্বুদ্ধো, ততো আগতোতি ব্রহ্মা, অরিযমগ্গো, তং অসম্মোহপটিৰেধৰসেন অঞ্ঞাসীতি ব্রাহ্মণো। তংসমঙ্গিতায হিস্স পাপানং বাহিতভাৰো। তেনাহ ‘‘বাহিতপাপত্তা ব্রাহ্মণো’’তি। অট্ঠঙ্গিকেন অরিযমগ্গজলেন ন্হাতৰা নিদ্ধোতকিলেসোতি ন্হাতকো। গতত্তাতি পহানাভিসমযৰসেন পটিৰিদ্ধত্তা। তেনাহ ‘‘ৰিদিতত্তা’’তি। নিস্সুতত্তাতি সমুচ্ছেদপ্পহানৰসেন সন্তানতো সব্বসো নিহতত্তা। তেনাহ ‘‘অপহতত্তা’’তি, মরিযাদৰসেন কিলেসানং হিংসিতত্তা অরিযমগ্গেহি ওধিসো সব্বসো কিলেসানং সমুচ্ছিন্নত্তাতি অত্থো। তেনাহ ‘‘হতত্তা’’তি। আরকত্তাতি সুপ্পহীনতায ৰিপ্পকট্ঠভাৰতো। তেনাহ ‘‘দূরীভূতত্তা’’তি। উভযম্পি উভযত্থ যোজেতব্বং – কিলেসানং আরকত্তা হতত্তা দূরীভূতত্তা চ অরিযো, তথা অরহন্তি। যং পনেত্থ অত্থতো ন ৰিভত্তং, তং উত্তানত্থত্তা সুৰিঞ্ঞেয্যমেৰ।
434.Bhikkhūti bhinnakilesoti bhikkhu. So hi paramatthato samaṇotināmako. Tattha ariyamaggena sabbaso pāpānaṃ samitāvīti samaṇo. Tenāha ‘‘samitapāpattā’’ti. Seṭṭhaṭṭhena brahmā vuccati sammāsambuddho, tato āgatoti brahmā, ariyamaggo, taṃ asammohapaṭivedhavasena aññāsīti brāhmaṇo. Taṃsamaṅgitāya hissa pāpānaṃ bāhitabhāvo. Tenāha ‘‘bāhitapāpattā brāhmaṇo’’ti. Aṭṭhaṅgikena ariyamaggajalena nhātavā niddhotakilesoti nhātako. Gatattāti pahānābhisamayavasena paṭividdhattā. Tenāha ‘‘viditattā’’ti. Nissutattāti samucchedappahānavasena santānato sabbaso nihatattā. Tenāha ‘‘apahatattā’’ti, mariyādavasena kilesānaṃ hiṃsitattā ariyamaggehi odhiso sabbaso kilesānaṃ samucchinnattāti attho. Tenāha ‘‘hatattā’’ti. Ārakattāti suppahīnatāya vippakaṭṭhabhāvato. Tenāha ‘‘dūrībhūtattā’’ti. Ubhayampi ubhayattha yojetabbaṃ – kilesānaṃ ārakattā hatattā dūrībhūtattā ca ariyo, tathā arahanti. Yaṃ panettha atthato na vibhattaṃ, taṃ uttānatthattā suviññeyyameva.
মহাঅস্সপুরসুত্তৰণ্ণনায লীনত্থপ্পকাসনা সমত্তা।
Mahāassapurasuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৯. মহাঅস্সপুরসুত্তং • 9. Mahāassapurasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৯. মহাঅস্সপুরসুত্তৰণ্ণনা • 9. Mahāassapurasuttavaṇṇanā
