| Library / Tipiṭaka / д̇ибидага • Tipiṭaka / маж̇жхиманигааяа (дийгаа) • Majjhimanikāya (ṭīkā) |
9. махааассабурасуд̇д̇аван̣н̣анаа
9. Mahāassapurasuttavaṇṇanā
415. ж̇аанабад̣̇инод̇и ж̇анабад̣̇аванд̇о, ж̇анабад̣̇асса ваа иссараа рааж̇агумаараа г̇од̇д̇авасзна ан̇г̇аа наама. д̇зсам̣ ниваасо яад̣̇и зго ж̇анабад̣̇о , гат̇ам̣ б̣ахуважананд̇и ааха ‘‘рул̣хийсад̣̇д̣̇знаа’’д̇и. агкаражинд̇агаа хи ийд̣̇исзсу таанзсу яуд̇д̇з вияа салин̇г̇аважанаани (баан̣ини 1.2.51) ижчанд̇и. аяамзд̇т̇а рул̣хий яат̇аа ‘‘гуруусу вихарад̇и, маллзсу вихарад̇ий’’д̇и жа. д̇аб̣б̣исзсанз бана ж̇анабад̣̇асад̣̇д̣̇з ж̇аад̇исад̣̇д̣̇з згаважанамзва. д̇знааха ‘‘ан̇г̇зсу ж̇анабад̣̇з’’д̇и. ассаа вужжанд̇и баасаан̣аани, д̇аани сунд̣̇араани д̇ад̇т̇а санд̇ийд̇и ‘‘ассабура’’нд̇и со ниг̇амо вуд̇д̇од̇и гзжий. абарз бана ааж̇аанийяо ассо ран̃н̃о д̇ад̇т̇а г̇ахан̣ам̣ убаг̇ад̇од̇и ‘‘ассабура’’нд̇и вуд̇д̇од̇и вад̣̇анд̇и. гим̣ д̇зхи, наамамзд̇ам̣ д̇асса ниг̇амасса. яасмаа бана д̇ад̇т̇а бхаг̇авад̇о ниб̣ад̣̇д̇хавасанадтаанам̣ гин̃жи наахоси, д̇асмаа ‘‘д̇ам̣ г̇ожараг̇аамам̣ гад̇ваа вихарад̇и’’жжзва вуд̇д̇ам̣. д̇ат̇аа хи баал̣ияам̣ ‘‘ассабурам̣ наама ан̇г̇аанам̣ ниг̇амо’’д̇и г̇ожараг̇аамагид̇д̇анамзва гад̇ам̣.
415.Jānapadinoti janapadavanto, janapadassa vā issarā rājakumārā gottavasena aṅgā nāma. Tesaṃ nivāso yadi eko janapado , kathaṃ bahuvacananti āha ‘‘ruḷhīsaddenā’’ti. Akkharacintakā hi īdisesu ṭhānesu yutte viya saliṅgavacanāni (pāṇini 1.2.51) icchanti. Ayamettha ruḷhī yathā ‘‘kurūsu viharati, mallesu viharatī’’ti ca. Tabbisesane pana janapadasadde jātisadde ekavacanameva. Tenāha ‘‘aṅgesu janapade’’ti. Assā vuccanti pāsāṇāni, tāni sundarāni tattha santīti ‘‘assapura’’nti so nigamo vuttoti kecī. Apare pana ājānīyo asso rañño tattha gahaṇaṃ upagatoti ‘‘assapura’’nti vuttoti vadanti. Kiṃ tehi, nāmametaṃ tassa nigamassa. Yasmā pana tattha bhagavato nibaddhavasanaṭṭhānaṃ kiñci nāhosi, tasmā ‘‘taṃ gocaragāmaṃ katvā viharati’’cceva vuttaṃ. Tathā hi pāḷiyaṃ ‘‘assapuraṃ nāma aṅgānaṃ nigamo’’ti gocaragāmakittanameva kataṃ.
зваруубзна сийлзнаад̇иаад̣̇ийсу сийлаг̇г̇ахан̣зна ваарид̇д̇асийламааха. д̇зна саммааваажаагамманд̇ааж̇ийвз д̣̇ассзд̇и. аажаараг̇г̇ахан̣зна жаарид̇д̇асийлам̣. д̇зна барисуд̣̇д̇хам̣ гааяаважийсамаажаарам̣. бадибад̇д̇иг̇г̇ахан̣зна самат̇авибассанаамаг̇г̇апаласан̇г̇ахам̣ саммаабадибад̇д̇им̣. лаж̇ж̇инод̇и иминаа яат̇аавуд̇д̇асийлаажаарамуулагааран̣ам̣. бзсалаад̇и иминаа баарисуд̣̇д̇хим̣. ул̣аараг̇ун̣аад̇и иминаа бадибад̇д̇ияаа баарибуурим̣. бхигкусан̇гхассзва ван̣н̣ам̣ гат̇знд̇ийд̇и ид̣̇ам̣ д̇зсам̣ убаасагаанам̣ язбхуяязна бхигкуунам̣ г̇ун̣агид̇д̇анабасуд̇ад̇ааяа вуд̇д̇ам̣. д̇з бана сад̣̇д̇хаммзби саммаасамб̣уд̣̇д̇хзби абхиббасаннаа зва. д̇знааха ‘‘б̣уд̣̇д̇хамаамагаа д̇хаммамаамагаа’’д̇и. вад̇т̇уд̇д̇аяз хи згасмим̣ абхиббасаннаа ид̇арад̣̇ваяз абхиббасаннаа зва д̇ад̣̇авинаабхаавад̇о. бин̣д̣абаад̇аабажааяанзд̇и лагкан̣аважанамзд̇ам̣ яат̇аа ‘‘гаагзхи сабби рагкид̇аб̣б̣а’’нд̇и, д̇асмаа бажжаяабадибууж̇анзд̇и вуд̇д̇ам̣ ход̇и. бажжаяад̣̇ааяагаанан̃хи гаарасса ад̇д̇ано саммаабадибад̇д̇ияаа махабпалабхаавасса гаран̣ам̣ ид̇ха ‘‘бин̣д̣абаад̇аабажааяана’’нд̇и ад̇хиббзд̇ам̣.
Evarūpena sīlenātiādīsu sīlaggahaṇena vārittasīlamāha. Tena sammāvācākammantājīve dasseti. Ācāraggahaṇena cārittasīlaṃ. Tena parisuddhaṃ kāyavacīsamācāraṃ. Paṭipattiggahaṇena samathavipassanāmaggaphalasaṅgahaṃ sammāpaṭipattiṃ. Lajjinoti iminā yathāvuttasīlācāramūlakāraṇaṃ. Pesalāti iminā pārisuddhiṃ. Uḷāraguṇāti iminā paṭipattiyā pāripūriṃ. Bhikkhusaṅghasseva vaṇṇaṃ kathentīti idaṃ tesaṃ upāsakānaṃ yebhuyyena bhikkhūnaṃ guṇakittanapasutatāya vuttaṃ. Te pana saddhammepi sammāsambuddhepi abhippasannā eva. Tenāha ‘‘buddhamāmakā dhammamāmakā’’ti. Vatthuttaye hi ekasmiṃ abhippasannā itaradvaye abhippasannā eva tadavinābhāvato. Piṇḍapātāpacāyaneti lakkhaṇavacanametaṃ yathā ‘‘kākehi sappi rakkhitabba’’nti, tasmā paccayapaṭipūjaneti vuttaṃ hoti. Paccayadāyakānañhi kārassa attano sammāpaṭipattiyā mahapphalabhāvassa karaṇaṃ idha ‘‘piṇḍapātāpacāyana’’nti adhippetaṃ.
саман̣агаран̣аад̇и саман̣абхаавагараа, саман̣абхаавасса гаарагаад̇и ад̇т̇о. д̇з бана зганд̇ад̇о ад̇д̇ано санд̇аанз уббаад̣̇ид̇аа вад̣дхид̇аа жа хонд̇ийд̇и ааха ‘‘самаад̣̇ааяа барибуурид̇аа’’д̇и. саман̣аг̇г̇ахан̣ан̃жзд̇т̇а саман̣авасзна, на сааман̃н̃амад̇д̇знаад̇и ааха ‘‘самид̇абаабасаман̣а’’нд̇и. б̣раахман̣агаран̣аад̇и зд̇т̇ааби вуд̇д̇анаязнзвад̇т̇о взд̣̇ид̇аб̣б̣о. б̣яан̃ж̇анад̇о зва жааяам̣ бхзд̣̇о, яад̣̇ид̣̇ам̣ саман̣аб̣раахман̣аад̇и , на ад̇т̇ад̇о. саман̣зна гад̇д̇аб̣б̣ад̇хаммаад̇и саман̣ад̇хаммз тид̇зна самбаад̣̇зд̇аб̣б̣ад̇хаммаа. яо хи хздтимасигкаасан̇каад̇асаман̣абхаавз суббад̇идтид̇о, д̇зна яз убарисигкаасан̇каад̇асаман̣абхааваа самбаад̣̇зд̇аб̣б̣аа, д̇зсам̣ васзнзва вуд̇д̇асаман̣зна гад̇д̇аб̣б̣ад̇хаммаа вуд̇д̇аад̇и. д̇ат̇аа хи д̇зсам̣ саман̣абхааваавахад̇ам̣ санд̇хааяааха ‘‘д̇зби жа саман̣агаран̣аа хонд̇иязваа’’д̇и. ид̇ха банаад̇и махааассабурз. хирод̇д̇аббаад̣̇ивасзна д̣̇зсанаа вид̇т̇аарид̇аад̇и хирод̇д̇абба-барисуд̣̇д̇хагааяаважийманосамаажаарааж̇ийваинд̣̇рияасам̣вара-бхож̇анзмад̇д̇ан̃н̃уд̇а- ж̇ааг̇арияаануяог̇асад̇исамбаж̇ан̃н̃а-жхаанавиж̇ж̇аавасзна саман̣агаран̣ад̇хаммад̣̇зсанаа вид̇т̇аарад̇о д̣̇зсид̇аа, на д̇иганибаад̇з вияа сан̇кзбад̇о. палаг̇г̇ахан̣знзва вибаагапалам̣ г̇ахид̇ам̣, д̇ам̣ бана уггадтанид̣̇д̣̇зсзна жад̇уб̣б̣ид̇хам̣ сааман̃н̃апалам̣ д̣̇адтаб̣б̣ам̣. аанисам̣саг̇г̇ахан̣зна бияаманаабад̇аад̣̇иуд̣̇раяо. д̇ассзва ад̇т̇од̇и д̇ассзва аван̃жаабад̣̇ассзва ад̇т̇анид̣̇д̣̇зсо. ‘‘яассаа хий’’д̇иаад̣̇инаа б̣яад̇ирзгавасзна ад̇т̇ам̣ вад̣̇ад̇и. зд̇д̇агзна таанзнаад̇и зд̇д̇агзна баал̣ибад̣̇зсзна. хирод̇д̇аббаад̣̇ийнам̣ убари баал̣ияам̣ вужжамаанаанам̣ саман̣агаран̣ад̇хаммаанам̣. ван̣н̣ам̣ гат̇зсийд̇и г̇ун̣ам̣ аанисам̣сам̣ абхааси. сад̇ибадтаанз вуд̇д̇анаязнаад̇и ‘‘абижа ван̣н̣абхан̣анамзд̇а’’нд̇иаад̣̇инаа сад̇ибадтаанаван̣н̣анааяам̣ (д̣̇ий. ни. адта. 2.373; ма. ни. адта. 1.106) вуд̇д̇анаязна.
Samaṇakaraṇāti samaṇabhāvakarā, samaṇabhāvassa kārakāti attho. Te pana ekantato attano santāne uppāditā vaḍḍhitā ca hontīti āha ‘‘samādāya paripūritā’’ti. Samaṇaggahaṇañcettha samaṇavasena, na sāmaññamattenāti āha ‘‘samitapāpasamaṇa’’nti. Brāhmaṇakaraṇāti etthāpi vuttanayenevattho veditabbo. Byañjanato eva cāyaṃ bhedo, yadidaṃ samaṇabrāhmaṇāti , na atthato. Samaṇenakattabbadhammāti samaṇadhamme ṭhitena sampādetabbadhammā. Yo hi heṭṭhimasikkhāsaṅkhātasamaṇabhāve suppatiṭṭhito, tena ye uparisikkhāsaṅkhātasamaṇabhāvā sampādetabbā, tesaṃ vaseneva vuttasamaṇena kattabbadhammā vuttāti. Tathā hi tesaṃ samaṇabhāvāvahataṃ sandhāyāha ‘‘tepi ca samaṇakaraṇā hontiyevā’’ti. Idha panāti mahāassapure. Hirottappādivasena desanā vitthāritāti hirottappa-parisuddhakāyavacīmanosamācārājīvaindriyasaṃvara-bhojanemattaññuta- jāgariyānuyogasatisampajañña-jhānavijjāvasena samaṇakaraṇadhammadesanā vitthārato desitā, na tikanipāte viya saṅkhepato. Phalaggahaṇeneva vipākaphalaṃ gahitaṃ, taṃ pana ukkaṭṭhaniddesena catubbidhaṃ sāmaññaphalaṃ daṭṭhabbaṃ. Ānisaṃsaggahaṇena piyamanāpatādiudrayo. Tasseva atthoti tasseva avañcāpadasseva atthaniddeso. ‘‘Yassā hī’’tiādinā byatirekavasena atthaṃ vadati. Ettakena ṭhānenāti ettakena pāḷipadesena. Hirottappādīnaṃ upari pāḷiyaṃ vuccamānānaṃ samaṇakaraṇadhammānaṃ. Vaṇṇaṃ kathesīti guṇaṃ ānisaṃsaṃ abhāsi. Satipaṭṭhāne vuttanayenāti ‘‘apica vaṇṇabhaṇanameta’’ntiādinā satipaṭṭhānavaṇṇanāyaṃ (dī. ni. aṭṭha. 2.373; ma. ni. aṭṭha. 1.106) vuttanayena.
416. яам̣ хирийяад̇ийд̇и язна д̇хаммзна хзд̇убхууд̇зна ваа ж̇иг̇ужчад̇и. гаран̣з хзд̇ам̣ бажжад̇д̇аважанам̣. яанд̇и ваа лин̇г̇авибаллаасзна вуд̇д̇о, д̇хаммод̇и ад̇т̇о. хирийяид̇аб̣б̣знаад̇и убаяог̇ад̇т̇з гаран̣аважанам̣, хирийяид̇аб̣б̣аяуд̇д̇агам̣ гааяад̣̇ужжарид̇аад̣̇инд̇и ад̇т̇о. од̇д̇аббид̇аб̣б̣знаад̇и зд̇т̇ааби зсзва наяо. аж̇жхад̇д̇ам̣ нияагаж̇жхад̇д̇ам̣ ж̇аад̇иаад̣̇и самудтаанам̣ зд̇иссаад̇и аж̇жхад̇д̇асамудтаанаа хирий, б̣ахид̣̇д̇хаа ад̇д̇ад̇о б̣ахибхууд̇о барасад̇д̇о самудтаанам̣ зд̇иссаад̇и б̣ахид̣̇д̇хаасамудтаанам̣ од̇д̇аббам̣. ад̇д̇аад̇хибад̇ид̇о ааг̇ад̇аа ад̇д̇аад̇хибад̇зяяаа, ад̇д̇аанам̣ ад̇хибад̇им̣ гад̇ваа бавад̇д̇аа. лаж̇ж̇аасабхаавасан̣тид̇аад̇и баабаж̇иг̇ужчанасабхаавадтааяиний. саббад̇иссавалагкан̣ад̇д̇аа г̇арунаа гисмин̃жи вуд̇д̇з г̇аарававасзна бад̇иссаванам̣ бад̇иссаво, саха бад̇иссавзнаад̇и саббад̇иссавам̣, бад̇иссавабхууд̇ам̣ д̇ам̣сабхааван̃жа яам̣ гин̃жи г̇ааравам̣. ж̇аад̇иаад̣̇имахад̇д̇ад̇аабажжавзгкан̣зна уббаж̇ж̇амаанаа жа хирий д̇ад̇т̇а г̇аарававасзна бавад̇д̇ад̇ийд̇и саббад̇иссавалагкан̣аад̇и вужжад̇и. бхаяасабхаавасан̣тид̇анд̇и баабад̇о бхааяанасабхаавадтааяий, важ̇ж̇абхийругабхаяад̣̇ассаавилагкан̣ад̇д̇аа важ̇ж̇ам̣ бхааяад̇и д̇ам̣ бхаяад̇о бассад̇ийд̇и важ̇ж̇абхийругабхаяад̣̇ассаавий, звам̣сабхаавам̣ од̇д̇аббам̣. аж̇жхад̇д̇асамудтаанаад̣̇ид̇аа жа хирод̇д̇аббаанам̣ д̇ад̇т̇а д̇ад̇т̇а баагадабхаавзнзва вужжад̇и, на барзсам̣ гад̣̇аажи ан̃н̃аман̃н̃авиббаяог̇аа. на хи лаж̇ж̇анам̣ ниб̣бхаяам̣, баабабхаяам̣ ваа алаж̇ж̇анам̣ ход̇ийд̇и. аяамзд̇т̇а сан̇кзбо, вид̇т̇ааро бана адтасаалинияам̣ (д̇ха. са. адта. 1.б̣алараасиван̣н̣анаа) вуд̇д̇анаязнзва взд̣̇ид̇аб̣б̣о. логамарияаад̣̇асса бааланад̇о логабаалад̇хаммаа наама. суггаад̇и од̣̇аад̇аа бабхассарабхаавагаарагаа, суггаабхиж̇аад̇ихзд̇уд̇ааяа ваа суггаа. самбхзд̣̇анд̇и аажаарамарияаад̣̇аасан̇гарам̣. д̣̇звабхааваавахаа д̇хаммаад̇и д̣̇звад̇хаммаа.
416.Yaṃ hirīyatīti yena dhammena hetubhūtena vā jigucchati. Karaṇe hetaṃ paccattavacanaṃ. Yanti vā liṅgavipallāsena vutto, dhammoti attho. Hirīyitabbenāti upayogatthe karaṇavacanaṃ, hirīyitabbayuttakaṃ kāyaduccaritādinti attho. Ottappitabbenāti etthāpi eseva nayo. Ajjhattaṃ niyakajjhattaṃ jātiādi samuṭṭhānaṃ etissāti ajjhattasamuṭṭhānā hirī, bahiddhā attato bahibhūto parasatto samuṭṭhānaṃ etissāti bahiddhāsamuṭṭhānaṃ ottappaṃ. Attādhipatito āgatā attādhipateyyā, attānaṃ adhipatiṃ katvā pavattā. Lajjāsabhāvasaṇṭhitāti pāpajigucchanasabhāvaṭṭhāyinī. Sappatissavalakkhaṇattā garunā kismiñci vutte gāravavasena patissavanaṃ patissavo, saha patissavenāti sappatissavaṃ, patissavabhūtaṃ taṃsabhāvañca yaṃ kiñci gāravaṃ. Jātiādimahattatāpaccavekkhaṇena uppajjamānā ca hirī tattha gāravavasena pavattatīti sappatissavalakkhaṇāti vuccati. Bhayasabhāvasaṇṭhitanti pāpato bhāyanasabhāvaṭṭhāyī, vajjabhīrukabhayadassāvilakkhaṇattā vajjaṃ bhāyati taṃ bhayato passatīti vajjabhīrukabhayadassāvī, evaṃsabhāvaṃ ottappaṃ. Ajjhattasamuṭṭhānāditā ca hirottappānaṃ tattha tattha pākaṭabhāveneva vuccati, na paresaṃ kadāci aññamaññavippayogā. Na hi lajjanaṃ nibbhayaṃ, pāpabhayaṃ vā alajjanaṃ hotīti. Ayamettha saṅkhepo, vitthāro pana aṭṭhasāliniyaṃ (dha. sa. aṭṭha. 1.balarāsivaṇṇanā) vuttanayeneva veditabbo. Lokamariyādassa pālanato lokapāladhammā nāma. Sukkāti odātā pabhassarabhāvakārakā, sukkābhijātihetutāya vā sukkā. Sambhedanti ācāramariyādāsaṅkaraṃ. Devabhāvāvahā dhammāti devadhammā.
суггад̇хаммасамаахид̇аад̇и яат̇аавуд̇д̇асуггад̇хаммасаман̇г̇ино. санд̇од̇и вуубасанд̇ад̣̇осаа. саббурисаад̇и санд̇аж̇анаа. сабарахид̇асаад̇хагаа хи саад̇хаво.
Sukkadhammasamāhitāti yathāvuttasukkadhammasamaṅgino. Santoti vūpasantadosā. Sappurisāti santajanā. Saparahitasādhakā hi sādhavo.
аваяававинимуд̇д̇асса самуд̣̇ааяасса абхаавад̇о, аваяавзна жа самуд̣̇ааяасса абад̣̇исид̇аб̣б̣ад̇о оваад̣̇уубасамбад̣̇аавахаоваад̣̇згад̣̇зсо оваад̣̇уубасамбад̣̇аад̇и. ид̇хаад̇и имасмим̣ ассабурз. зд̇з хирод̇д̇аббад̇хаммаа. саман̣ад̇хаммаа наамаад̇и д̣̇ассид̇аа муулабхууд̇асаман̣абхаавагараа д̇хаммаад̇и гад̇ваа. д̇ат̇аа хи д̇зсам̣ аад̣̇ид̇о г̇ахан̣ам̣.
Avayavavinimuttassa samudāyassa abhāvato, avayavena ca samudāyassa apadisitabbato ovādūpasampadāvahaovādekadeso ovādūpasampadāti. Idhāti imasmiṃ assapure. Ete hirottappadhammā. Samaṇadhammā nāmāti dassitā mūlabhūtasamaṇabhāvakarā dhammāti katvā. Tathā hi tesaṃ ādito gahaṇaṃ.
яасса ад̇хиг̇амзна ниббарияааяад̇о саман̣аа наама хонд̇и, со арияамаг̇г̇о ‘‘саман̣асса гаммам̣ бадибад̣̇аа’’д̇и гад̇ваа сааман̃н̃ам̣, д̇асса бана палабхаавад̇о, аарамман̣агаран̣авасзна аран̣ийяад̇о паланиб̣б̣аанаани сааман̃н̃ад̇т̇о. рааг̇ам̣ кзбзд̇ийд̇и рааг̇агкаяо, арияамаг̇г̇о. рааг̇о кийяад̇и зд̇т̇аад̇и рааг̇агкаяо, ниб̣б̣аанам̣. палам̣ бана гааран̣уубажаарзна рааг̇агкаяо д̣̇адтаб̣б̣о. д̣̇осагкаяо мохагкаяод̇и зд̇т̇ааби зсзва наяо. сааман̃н̃абхууд̇о ад̇т̇о сааман̃н̃ад̇т̇о, маг̇г̇о, сааман̃н̃асса ад̇т̇од̇и сааман̃н̃ад̇т̇о, паланд̇и ааха ‘‘маг̇г̇амби паламби згад̇о гад̇ваа сааман̃н̃ад̇т̇о гат̇ид̇о’’д̇и. д̇аяид̣̇ам̣ уггадтанид̣̇д̣̇зсзна вуд̇д̇ам̣. сийлаад̣̇ибуб̣б̣абхааг̇абадибад̣̇ааби хи ид̇ха ‘‘сааман̃н̃ад̇т̇о’’д̇и г̇ахид̇аа. д̇знзвааха ‘‘сад̇и уд̇д̇аригаран̣ийяз’’д̇и. бадивзд̣̇аяаамийд̇и бунаббунам̣ н̃аабзми.
Yassa adhigamena nippariyāyato samaṇā nāma honti, so ariyamaggo ‘‘samaṇassa kammaṃ paṭipadā’’ti katvā sāmaññaṃ, tassa pana phalabhāvato, ārammaṇakaraṇavasena araṇīyato phalanibbānāni sāmaññattho. Rāgaṃ khepetīti rāgakkhayo, ariyamaggo. Rāgo khīyati etthāti rāgakkhayo, nibbānaṃ. Phalaṃ pana kāraṇūpacārena rāgakkhayo daṭṭhabbo. Dosakkhayo mohakkhayoti etthāpi eseva nayo. Sāmaññabhūto attho sāmaññattho, maggo, sāmaññassa atthoti sāmaññattho, phalanti āha ‘‘maggampi phalampi ekato katvā sāmaññattho kathito’’ti. Tayidaṃ ukkaṭṭhaniddesena vuttaṃ. Sīlādipubbabhāgapaṭipadāpi hi idha ‘‘sāmaññattho’’ti gahitā. Tenevāha ‘‘sati uttarikaraṇīye’’ti. Paṭivedayāmīti punappunaṃ ñāpemi.
417. гаммабат̇авасзнзваад̇и агусалагаммабат̇абхаавзнзва, д̇ад̇о д̇аад̣̇исамби агусалагаммам̣ бхигкусса гаад̇ум̣ на яуд̇д̇анд̇и д̣̇удтуллабхаавзнзва д̇ад̇о орамад̇ийд̇и ад̇хиббааяо. сигкаабад̣̇аб̣ад̣̇д̇хзнаад̇и сигкаабад̣̇абан̃н̃аабанзна. баанийяагхадз ваа бад̇д̇з ваа гаагаанам̣ хад̇т̇ам̣ ваа д̣̇ан̣д̣ам̣ ваа лзд̣д̣ум̣ ваад̇и саб̣б̣амид̣̇ам̣ нид̣̇ассанамад̇д̇ам̣ д̣̇адтаб̣б̣ам̣. яад̇т̇а гад̇т̇ажи хи тид̇аанам̣ ан̃н̃зсамби баан̣ийнам̣ удтаабанаад̣̇и саб̣б̣ам̣ анидтагаран̣ам̣ ид̇ха абарисуд̣̇д̇хагааяасамаажаарабхаавзнзва сан̇г̇ахид̇анд̇и. уд̇д̇аанод̇и уд̣̇д̇хамуд̣̇д̇хам̣ д̇анод̇ийд̇и уд̇д̇аано. звам̣бхууд̇о жа гзнажи ануббаад̣̇абхуумияам̣ сан̃ж̇аад̇асаалагаляаан̣ийканд̇хо вияа убаруубари уг̇г̇ад̇уг̇г̇ад̇о баагадо жа ход̇ийд̇и ааха ‘‘уг̇г̇ад̇о баагадо’’д̇и. анаавадод̇и анивуд̇о. д̇знааха ‘‘асан̃чанно’’д̇и, нажчаад̣̇зд̇аб̣б̣од̇и ад̇т̇о. згасад̣̇исо висуд̣̇д̇хабхаавзна. анд̇аранд̇арз чид̣̇д̣̇арахид̇о буб̣б̣знаабарам̣ саммаабадибад̇д̇ияаа санд̇хаанзна. сам̣вуд̇о гааяигасса сам̣варасса анубаггилзсад̇о. д̇знааха ‘‘гилзсаанам̣ д̣̇ваарам̣ бид̣̇аханзнаа’’д̇и.
417.Kammapathavasenevāti akusalakammapathabhāveneva, tato tādisampi akusalakammaṃ bhikkhussa kātuṃ na yuttanti duṭṭhullabhāveneva tato oramatīti adhippāyo. Sikkhāpadabaddhenāti sikkhāpadapaññāpanena. Pānīyaghaṭe vā patte vā kākānaṃ hatthaṃ vā daṇḍaṃ vā leḍḍuṃ vāti sabbamidaṃ nidassanamattaṃ daṭṭhabbaṃ. Yattha katthaci hi ṭhitānaṃ aññesampi pāṇīnaṃ uṭṭhāpanādi sabbaṃ aniṭṭhakaraṇaṃ idha aparisuddhakāyasamācārabhāveneva saṅgahitanti. Uttānoti uddhamuddhaṃ tanotīti uttāno. Evaṃbhūto ca kenaci anuppādabhūmiyaṃ sañjātasālakalyāṇīkhandho viya uparūpari uggatuggato pākaṭo ca hotīti āha ‘‘uggato pākaṭo’’ti. Anāvaṭoti anivuto. Tenāha ‘‘asañchanno’’ti, nacchādetabboti attho. Ekasadiso visuddhabhāvena. Antarantare chiddarahito pubbenāparaṃ sammāpaṭipattiyā sandhānena. Saṃvuto kāyikassa saṃvarassa anupakkilesato. Tenāha ‘‘kilesānaṃ dvāraṃ pidahanenā’’ti.
418. зд̇т̇а яат̇аа лахугад̇арам̣ гаагудтаабанаад̣̇игааяагаммам̣ гааяасамаажаарасса абарисуд̣̇д̇хабхааваавахам̣ саллзкавигобанад̇о, мижчаавид̇агганамад̇д̇ан̃жа маносамаажаарасса, звам̣ яам̣ гин̃жи анияяаанагат̇аагат̇анамад̇д̇ам̣ важийсамаажаарасса абарисуд̣̇д̇хабхааваавахам̣ саллзкавигобанад̇о, на хасаад̇хиббааязна мусаагат̇ананд̇и д̣̇адтаб̣б̣ам̣. хасаад̇хиббааязна хи мусаагат̇анам̣ сигкаабад̣̇аб̣ад̣̇д̇хзнзва бадигкид̇д̇анд̇и.
418. Ettha yathā lahukataraṃ kākuṭṭhāpanādikāyakammaṃ kāyasamācārassa aparisuddhabhāvāvahaṃ sallekhavikopanato, micchāvitakkanamattañca manosamācārassa, evaṃ yaṃ kiñci aniyyānakathākathanamattaṃ vacīsamācārassa aparisuddhabhāvāvahaṃ sallekhavikopanato, na hasādhippāyena musākathananti daṭṭhabbaṃ. Hasādhippāyena hi musākathanaṃ sikkhāpadabaddheneva paṭikkhittanti.
420. ааж̇ийвоби згажжо гаммабат̇авасзна ваарид̇о лаб̣бхад̇и. со бана ад̇иол̣аариго гааяаважийсамаажаараваарзсу вуд̇д̇анаяо зваад̇и на г̇ахид̇од̇и д̣̇адтаб̣б̣ам̣. яз бана ‘‘д̇аад̣̇исо бхигкуунам̣ аяог̇яад̇о на г̇ахид̇о’’д̇и вад̣̇анд̇и, д̇ам̣ мижчаа д̇ат̇аа сад̇и гааяаважийсамаажаараваарзби д̇асса аг̇г̇ахзд̇аб̣б̣абхааваабад̇д̇ид̇о. ‘‘каад̣̇ат̇а биват̇аа’’д̇и бужчаа ад̇д̇ано каад̣̇ид̇угаамад̇аад̣̇ийбанзна, барияааяагат̇аабхаавад̇о банзсаа саллзкавигобанаа ж̇аад̇аа.
420. Ājīvopi ekacco kammapathavasena vārito labbhati. So pana atioḷāriko kāyavacīsamācāravāresu vuttanayo evāti na gahitoti daṭṭhabbaṃ. Ye pana ‘‘tādiso bhikkhūnaṃ ayogyato na gahito’’ti vadanti, taṃ micchā tathā sati kāyavacīsamācāravārepi tassa aggahetabbabhāvāpattito. ‘‘Khādatha pivathā’’ti pucchā attano khāditukāmatādīpanena, pariyāyakathābhāvato panesā sallekhavikopanā jātā.
422. анзсанам̣ бахааяа д̇хаммзна самзна бажжаяз бариязсанд̇о бариязсанамад̇д̇ан̃н̃уу наама. д̣̇ааяагасса д̣̇зяяад̇хаммасса ад̇д̇ано жа бамаан̣ан̃н̃уд̇аабадиг̇г̇ан̣ханд̇о бадиг̇г̇ахан̣амад̇д̇ан̃н̃уу наама. яонисо бажжавзгкид̇ваа барибхун̃ж̇анд̇о барибхог̇амад̇д̇ан̃н̃уу наама.
422. Anesanaṃ pahāya dhammena samena paccaye pariyesanto pariyesanamattaññū nāma. Dāyakassa deyyadhammassa attano ca pamāṇaññutāpaṭiggaṇhanto paṭiggahaṇamattaññū nāma. Yoniso paccavekkhitvā paribhuñjanto paribhogamattaññū nāma.
423. згасмим̣ годтаасзд̇и маж̇жхимаяаамасан̃н̃ид̇з згасмим̣ годтаасз. ‘‘ваамзна бассзна сзнд̇ий’’д̇и звам̣ вуд̇д̇аа. д̣̇агкин̣абассзна саяаано наама над̇т̇и д̣̇агкин̣ахад̇т̇асса сарийраг̇г̇ахан̣аад̣̇ибаяог̇агкамад̇о. бурисавасзна жзд̇ам̣ вуд̇д̇ам̣.
423.Ekasmiṃkoṭṭhāseti majjhimayāmasaññite ekasmiṃ koṭṭhāse. ‘‘Vāmena passena sentī’’ti evaṃ vuttā. Dakkhiṇapassena sayāno nāma natthi dakkhiṇahatthassa sarīraggahaṇādipayogakkhamato. Purisavasena cetaṃ vuttaṃ.
д̇зж̇уссад̣̇ад̇д̇аад̇и иминаа сийхасса абхийругабхаавам̣ д̣̇ассзд̇и. бхийругаа хи сзсамиг̇аа ад̇д̇ано аасаяам̣ бависид̇ваа санд̇аасабуб̣б̣агам̣ яат̇аа д̇ат̇аа саяанд̇и, сийхо бана абхийругабхаавад̇о сад̇огаарий бхигку вияа сад̇им̣ убадтабзд̇ваава саяад̇и. д̇знааха ‘‘д̣̇вз буримабаад̣̇з’’д̇иаад̣̇и. сзд̇и аб̣яаавадабхаавзна бавад̇д̇ад̇и зд̇т̇аад̇и сзяяаа, жад̇уд̇т̇аж̇жхаанамзва сзяяаа. гим̣ бана д̇ам̣ жад̇уд̇т̇аж̇жхаананд̇и? аанаабаанажад̇уд̇т̇аж̇жхаанам̣. д̇ад̇т̇а хи тад̇ваа вибассанам̣ вад̣дхзд̇ваа бхаг̇аваа ануггамзна аг̇г̇амаг̇г̇ам̣ ад̇хиг̇ад̇о д̇ат̇ааг̇ад̇о ж̇аад̇од̇и гзжи, д̇аяид̣̇ам̣ бад̣̇адтаанам̣ наама на сзяяаа. абарз бана ‘‘жад̇уд̇т̇аж̇жхаанасамананд̇араа бхаг̇аваа бариниб̣б̣ааяий’’д̇и вуд̇д̇абад̣̇ам̣ г̇ахзд̇ваа ‘‘логияажад̇уд̇т̇аж̇жхаанасамаабад̇д̇и д̇ат̇ааг̇ад̇асзяяаа’’д̇и вад̣̇анд̇и, д̇ат̇аа сад̇и бариниб̣б̣аанагаалигаа д̇ат̇ааг̇ад̇асзяяаад̇и аабаж̇ж̇ад̇и, на жа бхаг̇аваа жад̇уд̇т̇аж̇жхаанам̣ самаабаж̇ж̇анаб̣ахуло вихааси, аг̇г̇апалажхаанам̣ банзд̇т̇а ‘‘жад̇уд̇т̇аж̇жхаана’’нд̇и ад̇хиббзд̇ам̣. д̇ад̇т̇а яат̇аа сад̇д̇аанам̣ нид̣̇д̣̇убаг̇аманалагкан̣аа сзяяаа бхаван̇г̇ажид̇д̇авааравасзна ход̇и, д̇ан̃жа д̇зсам̣ батамаж̇аад̇исаманваяам̣ язбхуяяавуд̇д̇игам̣, звам̣ бхаг̇авад̇о арияаж̇аад̇исаманваяам̣ язбхуяяавуд̇д̇игам̣ аг̇г̇апалабхууд̇ам̣ жад̇уд̇т̇аж̇жхаанам̣ ‘‘д̇ат̇ааг̇ад̇асзяяаа’’д̇и взд̣̇ид̇аб̣б̣ам̣. сийхасзяяаад̇и сздтасзяяаад̇и ааха ‘‘уд̇д̇амасзяяаа’’д̇и.
Tejussadattāti iminā sīhassa abhīrukabhāvaṃ dasseti. Bhīrukā hi sesamigā attano āsayaṃ pavisitvā santāsapubbakaṃ yathā tathā sayanti, sīho pana abhīrukabhāvato satokārī bhikkhu viya satiṃ upaṭṭhapetvāva sayati. Tenāha ‘‘dve purimapāde’’tiādi. Seti abyāvaṭabhāvena pavattati etthāti seyyā, catutthajjhānameva seyyā. Kiṃ pana taṃ catutthajjhānanti? Ānāpānacatutthajjhānaṃ. Tattha hi ṭhatvā vipassanaṃ vaḍḍhetvā bhagavā anukkamena aggamaggaṃ adhigato tathāgato jātoti keci, tayidaṃ padaṭṭhānaṃ nāma na seyyā. Apare pana ‘‘catutthajjhānasamanantarā bhagavā parinibbāyī’’ti vuttapadaṃ gahetvā ‘‘lokiyacatutthajjhānasamāpatti tathāgataseyyā’’ti vadanti, tathā sati parinibbānakālikā tathāgataseyyāti āpajjati, na ca bhagavā catutthajjhānaṃ samāpajjanabahulo vihāsi, aggaphalajhānaṃ panettha ‘‘catutthajjhāna’’nti adhippetaṃ. Tattha yathā sattānaṃ niddupagamanalakkhaṇā seyyā bhavaṅgacittavāravasena hoti, tañca tesaṃ paṭhamajātisamanvayaṃ yebhuyyavuttikaṃ, evaṃ bhagavato ariyajātisamanvayaṃ yebhuyyavuttikaṃ aggaphalabhūtaṃ catutthajjhānaṃ ‘‘tathāgataseyyā’’ti veditabbaṃ. Sīhaseyyāti seṭṭhaseyyāti āha ‘‘uttamaseyyā’’ti.
426. виг̇ад̇анд̇аанийд̇и ин̣амуулаани. д̇зсанд̇и ин̣амуулаанам̣. барияанд̇од̇и авасзсо.
426.Vigatantānīti iṇamūlāni. Tesanti iṇamūlānaṃ. Pariyantoti avaseso.
бавад̇д̇инивааран̣зна жад̇уирияаабат̇ам̣ чинд̣̇анд̇о. ааб̣аад̇хад̇ийд̇и бийл̣зд̇и. д̣̇угкид̇од̇и сан̃ж̇аад̇ад̣̇угко. аббам̣ б̣алам̣ б̣аламад̇д̇аа. аббад̇т̇о хи аяам̣ мад̇д̇аа-сад̣̇д̣̇о ‘‘мад̇д̇аасукабарижжааг̇аа’’д̇иаад̣̇ийсу (д̇ха. ба. 290) вияа, б̣алавад̇т̇о бана мад̇д̇аа-сад̣̇д̣̇о анад̇т̇анд̇аро. сзсанд̇и ‘‘д̇асса хи б̣анд̇ханаа муд̇д̇омхийд̇и ааваж̇ж̇аяад̇о д̇ад̣̇убхаяам̣ ход̇ий’’д̇иаад̣̇инаа вад̇д̇аб̣б̣ам̣ санд̇хааяааха. саб̣б̣абад̣̇зсууд̇и вуд̇д̇аавасидтзсу саб̣б̣абад̣̇зсу. язнагаамам̣ яат̇ааружи г̇ажчад̇ийд̇и язнагаамам̣г̇амод̇и анунаасигалобам̣ агад̇ваа нид̣̇д̣̇зсо. бхуж̇о ад̇д̇ано яат̇аасукавинияог̇о иссо ижчид̇аб̣б̣о зд̇т̇аад̇и бхуж̇иссо, саамиго. со бана абарасанд̇агад̇ааяа ‘‘ад̇д̇ано санд̇аго’’д̇и вуд̇д̇о. д̣̇уллабхааабад̇ааяа гам̣ д̇аарзнд̇и зд̇т̇аад̇и ганд̇аарод̇и ааха ‘‘нируд̣̇агам̣ д̣̇ийгхамаг̇г̇а’’нд̇и.
Pavattinivāraṇena catuiriyāpathaṃ chindanto. Ābādhatīti pīḷeti. Dukkhitoti sañjātadukkho. Appaṃ balaṃ balamattā. Appattho hi ayaṃ mattā-saddo ‘‘mattāsukhapariccāgā’’tiādīsu (dha. pa. 290) viya, balavattho pana mattā-saddo anatthantaro. Sesanti ‘‘tassa hi bandhanā muttomhīti āvajjayato tadubhayaṃ hotī’’tiādinā vattabbaṃ sandhāyāha. Sabbapadesūti vuttāvasiṭṭhesu sabbapadesu. Yenakāmaṃ yathāruci gacchatīti yenakāmaṃgamoti anunāsikalopaṃ akatvā niddeso. Bhujo attano yathāsukhaviniyogo isso icchitabbo etthāti bhujisso, sāmiko. So pana aparasantakatāya ‘‘attano santako’’ti vutto. Dullabhaāpatāya kaṃ tārenti etthāti kantāroti āha ‘‘nirudakaṃ dīghamagga’’nti.
винаасзд̇ийд̇и каад̣̇анад̣̇уб̣б̣инияож̇анаад̣̇ийхи яат̇аа ин̣амуулам̣ гин̃жи на ход̇и, д̇ат̇аа гарод̇и. яамхи рааг̇авад̇т̇умхи. со буг̇г̇ало. д̇зна рааг̇авад̇т̇унаа, бурисо жз ид̇т̇ияаа, ид̇т̇ий жз бурисзна. ин̣ам̣ вияа гаамажчанд̣̇о д̣̇адтаб̣б̣о бийл̣аасамаанад̇о.
Vināsetīti khādanadubbiniyojanādīhi yathā iṇamūlaṃ kiñci na hoti, tathā karoti. Yamhi rāgavatthumhi. So puggalo. Tena rāgavatthunā, puriso ce itthiyā, itthī ce purisena. Iṇaṃ viya kāmacchando daṭṭhabbo pīḷāsamānato.
на винд̣̇ад̇ийд̇и на ж̇аанаад̇и. убад̣̇д̣̇авзт̇аад̇и сукавихаарасса убад̣̇д̣̇авам̣ гарот̇а, виб̣аад̇хзт̇аад̇и ад̇т̇о. рог̇о вияа б̣яаабаад̣̇о д̣̇адтаб̣б̣о сукабхан̃ж̇анасамаанад̇о.
Na vindatīti na jānāti. Upaddavethāti sukhavihārassa upaddavaṃ karotha, vibādhethāti attho. Rogo viya byāpādo daṭṭhabbo sukhabhañjanasamānato.
наанаавид̇хахзд̇уубааяаалан̇гад̇ад̇ааяа канд̇хааяад̇анад̇хаад̇убадижжасамуббаад̣̇аад̣̇ид̇хамманийд̇ивижид̇д̇ад̇ааяа жа вижид̇д̇анаяз. д̇хаммассаванзд̇и д̇хаммагат̇ааяам̣. гат̇аа хи сод̇аб̣б̣адтзна ‘‘савана’’нд̇и вуд̇д̇аа. звамзд̇т̇а сийлам̣ вибхад̇д̇ам̣, звам̣ жхаанаабхин̃н̃аа, звам̣ вибассанаамаг̇г̇апалаанийд̇и нзва д̇асса д̇хаммассаванасса аад̣̇имаж̇жхабарияосаанам̣ ж̇аанаад̇и. удтид̇зд̇и нидтид̇з. ахо гааран̣анд̇и д̇ад̇т̇а д̇ад̇т̇а бадин̃н̃аануруубзна нигкид̇д̇асаад̇ханавасзна г̇ахид̇агааран̣ам̣. ахо убамаад̇и д̇ассзва гааран̣асса бад̇идтаабанавасзна анваяад̇о б̣яад̇ирзгад̇о жа бад̇идтам̣ уд̣̇аахаран̣аад̣̇и. б̣анд̇ханааг̇аарам̣ вияа т̇инамид̣̇д̇хам̣ д̣̇адтаб̣б̣ам̣ д̣̇угкад̇о нияяаанасса виб̣анд̇ханад̇о.
Nānāvidhahetūpāyālaṅkatatāya khandhāyatanadhātupaṭiccasamuppādādidhammanītivicittatāya ca vicittanaye. Dhammassavaneti dhammakathāyaṃ. Kathā hi sotabbaṭṭhena ‘‘savana’’nti vuttā. Evamettha sīlaṃ vibhattaṃ, evaṃ jhānābhiññā, evaṃ vipassanāmaggaphalānīti neva tassa dhammassavanassa ādimajjhapariyosānaṃ jānāti. Uṭṭhiteti niṭṭhite. Aho kāraṇanti tattha tattha paṭiññānurūpena nikkhittasādhanavasena gahitakāraṇaṃ. Aho upamāti tasseva kāraṇassa patiṭṭhāpanavasena anvayato byatirekato ca patiṭṭhaṃ udāharaṇādi. Bandhanāgāraṃ viya thinamiddhaṃ daṭṭhabbaṃ dukkhato niyyānassa vibandhanato.
яасмаа гуггужжанийваран̣ам̣ уд̣̇д̇хажжарахид̇ам̣ над̇т̇и, яасмаа ваа уд̣̇д̇хажжагуггужжам̣ самаанагижжаахаарабадибагкам̣, д̇асмаа гуггужжасса висаяам̣ д̣̇ассзнд̇о ‘‘винаяз абагад̇ан̃н̃унаа’’д̇иаад̣̇имааха. яат̇аа хи уд̣̇д̇хажжам̣ сад̇д̇асса авуубасамагарам̣, д̇ат̇аа гуггужжамби. яат̇ааби уд̣̇д̇хажжасса н̃аад̇ивид̇аггаад̣̇и аахааро, д̇ат̇аа гуггужжассаби. яат̇аа жа уд̣̇д̇хажжасса самат̇о бадибагко, д̇ат̇аа гуггужжассабийд̇и. д̣̇аасаб̣яам̣ вияа уд̣̇д̇хажжагуггужжам̣ д̣̇адтаб̣б̣ам̣ асзрибхааваабаад̣̇анад̇о.
Yasmā kukkuccanīvaraṇaṃ uddhaccarahitaṃ natthi, yasmā vā uddhaccakukkuccaṃ samānakiccāhārapaṭipakkhaṃ, tasmā kukkuccassa visayaṃ dassento ‘‘vinaye apakataññunā’’tiādimāha. Yathā hi uddhaccaṃ sattassa avūpasamakaraṃ, tathā kukkuccampi. Yathāpi uddhaccassa ñātivitakkādi āhāro, tathā kukkuccassapi. Yathā ca uddhaccassa samatho paṭipakkho, tathā kukkuccassapīti. Dāsabyaṃ viya uddhaccakukkuccaṃ daṭṭhabbaṃ aseribhāvāpādanato.
сол̣асавад̇т̇угаа вижигижчаа адтавад̇т̇угам̣ вижигижчам̣ анубавидтаад̇и ааха ‘‘адтасу таанзсу вижигижчаа’’д̇и. вижигижчанд̇од̇и сам̣саяанд̇о. ад̇химужжид̇ваад̇и бад̇д̇ияааязд̇ваа. г̇ан̣хид̇унд̇и сад̣̇д̇хзяяавад̇т̇ум̣ бариг̇г̇ахзд̇ум̣. абхимукам̣ саббанам̣ аасаббанам̣, барид̇о саббанам̣ барисаббанам̣. бад̣̇ад̣̇ваязнаби жид̇д̇асса анижчанаагаарамзва вад̣̇ад̇и. кзманд̇аг̇аамимаг̇г̇ам̣ на барияог̇аахад̇и зд̇знаад̇и абарияог̇ааханам̣, уссан̇гид̇абарисан̇гид̇абхаавзна чамбхид̇ам̣ ход̇и жид̇д̇ам̣ яасса д̇хаммасса васзна, со д̇хаммо чамбхид̇ад̇д̇анд̇и вижигижчанаагаарамааха. д̇знааха ‘‘жид̇д̇асса уббаад̣̇аяамаанаа’’д̇и. ганд̇аарад̣̇д̇хаанамаг̇г̇о вияаад̇и саасан̇гаганд̇аарад̣̇д̇хаанамаг̇г̇о вияа д̣̇адтаб̣б̣аа аббадибад̇д̇ихзд̇убхаавад̇о.
Soḷasavatthukā vicikicchā aṭṭhavatthukaṃ vicikicchaṃ anupaviṭṭhāti āha ‘‘aṭṭhasu ṭhānesu vicikicchā’’ti. Vicikicchantoti saṃsayanto. Adhimuccitvāti pattiyāyetvā. Gaṇhitunti saddheyyavatthuṃ pariggahetuṃ. Abhimukhaṃ sappanaṃ āsappanaṃ, parito sappanaṃ parisappanaṃ. Padadvayenapi cittassa anicchanākārameva vadati. Khemantagāmimaggaṃ na pariyogāhati etenāti apariyogāhanaṃ, ussaṅkitaparisaṅkitabhāvena chambhitaṃ hoti cittaṃ yassa dhammassa vasena, so dhammo chambhitattanti vicikicchanākāramāha. Tenāha ‘‘cittassa uppādayamānā’’ti. Kantāraddhānamaggo viyāti sāsaṅkakantāraddhānamaggo viya daṭṭhabbā appaṭipattihetubhāvato.
над̇т̇и зд̇т̇а ин̣анд̇и ан̣ан̣о, д̇асса бхааво аан̣ан̣яам̣, гассажи ин̣асса ад̇хааран̣ам̣. самид̣̇д̇хагамманд̇од̇и нибпаннаж̇ийвигаббаяог̇о. бариб̣унд̇хад̇и убарод̇хзд̇ийд̇и ра-гаарасса ла-гаарам̣ гад̇ваа балиб̣од̇хо, асзривихааро, д̇асса муулам̣ гааран̣анд̇и балиб̣од̇хамуулам̣. ча д̇хаммз бхаавзд̇ваад̇и асубханимид̇д̇аг̇г̇аахаад̣̇игз ча д̇хаммз уббаад̣̇зд̇ваа вад̣дхзд̇ваа. ча д̇хаммз бхаавзд̇ваад̇и жа мзд̇д̇аанимид̇д̇аг̇г̇аахаад̣̇аяо жа д̇ад̇т̇а д̇ад̇т̇а ча д̇хаммаад̇и вуд̇д̇аад̇и взд̣̇ид̇аб̣б̣о. баж̇ахад̇ийд̇и вигкамбханавасзна баж̇ахад̇и. д̇знааха ‘‘аажаарабан̣н̣ад̇д̇иаад̣̇ийни сигкаабияамаано’’д̇иаад̣̇и. баравад̇т̇умхийд̇и висабхааг̇авад̇т̇усмим̣, барависаяз ваа. барависаяаа хзд̇з бхигкуно, яад̣̇ид̣̇ам̣ бан̃жа гаамаг̇ун̣аа. аан̣ан̣яамива гаамажчанд̣̇аббахаанам̣ ааха бияавад̇т̇уабхааваавахад̇о.
Natthi ettha iṇanti aṇaṇo, tassa bhāvo āṇaṇyaṃ, kassaci iṇassa adhāraṇaṃ. Samiddhakammantoti nipphannajīvikappayogo. Paribundhati uparodhetīti ra-kārassa la-kāraṃ katvā palibodho, aserivihāro, tassa mūlaṃ kāraṇanti palibodhamūlaṃ. Cha dhamme bhāvetvāti asubhanimittaggāhādike cha dhamme uppādetvā vaḍḍhetvā. Cha dhamme bhāvetvāti ca mettānimittaggāhādayo ca tattha tattha cha dhammāti vuttāti veditabbo. Pajahatīti vikkhambhanavasena pajahati. Tenāha ‘‘ācārapaṇṇattiādīni sikkhāpiyamāno’’tiādi. Paravatthumhīti visabhāgavatthusmiṃ, paravisaye vā. Paravisayā hete bhikkhuno, yadidaṃ pañca kāmaguṇā. Āṇaṇyamiva kāmacchandappahānaṃ āha piyavatthuabhāvāvahato.
аажааравибад̇д̇ибадиб̣аахагаани сигкаабад̣̇аани аажаарабан̣н̣ад̇д̇иаад̣̇ийни. аарог̇яамива б̣яаабаад̣̇аббахаанам̣ ааха гааяажид̇д̇аанам̣ паасубхааваавахад̇о.
Ācāravipattipaṭibāhakāni sikkhāpadāni ācārapaṇṇattiādīni. Ārogyamiva byāpādappahānaṃ āha kāyacittānaṃ phāsubhāvāvahato.
б̣анд̇ханаа могкамива т̇инамид̣̇д̇хаббахаанам̣ ааха жид̇д̇асса ниг̇г̇ахид̇абхааваавахад̇о.
Bandhanā mokkhamiva thinamiddhappahānaṃ āha cittassa niggahitabhāvāvahato.
бхуж̇иссам̣ вияа уд̣̇д̇хажжагуггужжаббахаанам̣ ааха жид̇д̇асса сзрибхааваавахад̇о.
Bhujissaṃ viya uddhaccakukkuccappahānaṃ āha cittassa seribhāvāvahato.
д̇ин̣ам̣ вияаад̇и д̇ин̣амива гад̇ваа. аг̇ан̣зд̇ваад̇и ажинд̇зд̇ваа. кзманд̇абхуумим̣ вияа вижигижчаабахаанам̣ ааха ануссан̇гид̇аабарисан̇гид̇абхаавзна саммаабадибад̇д̇ихзд̇убхаавад̇о.
Tiṇaṃviyāti tiṇamiva katvā. Agaṇetvāti acintetvā. Khemantabhūmiṃ viya vicikicchāpahānaṃ āha anussaṅkitāparisaṅkitabhāvena sammāpaṭipattihetubhāvato.
427. гирийяад̇и (а. ни. дий. 3.5.28-29) г̇аб̣бхаасаяз кибийяад̇ийд̇и гаро, самбхаво, гарад̇о ж̇аад̇од̇и гараж̇о, маад̇аабзд̇д̇игасамбхавод̇и ад̇т̇о. маад̇уяаа хи сарийрасан̣таабанавасзна гарад̇о ж̇аад̇од̇и гараж̇од̇и абарз. убхаяат̇ааби гараж̇агааяанд̇и жад̇усанд̇ад̇ируубамааха. д̇змзд̇ийд̇и д̇инд̇ам̣ гарод̇и. го банзд̇т̇а д̇инд̇абхаавод̇и ааха ‘‘снзхзд̇ий’’д̇и, бийд̇иснзхзна бийн̣анам̣ гарод̇ийд̇и ад̇т̇о. д̇знааха ‘‘саб̣б̣ад̇т̇а бавад̇д̇абийд̇исукам̣ гарод̇ий’’д̇и. бийд̇исамудтаанабан̣ийд̇аруубзхи сагаласса гараж̇агааяасса барипудад̇ааяа жзд̇т̇а д̇ам̣самудтаабагабийд̇исукаанам̣ саб̣б̣ад̇т̇а бавад̇д̇и ж̇од̇ид̇аа. барисанд̣̇зд̇ийд̇иаад̣̇ийсуби зсзва наяо. д̇ад̇т̇ааби хи ‘‘саманд̇ад̇о санд̣̇зд̇и д̇змзд̇и снзхзд̇и, саб̣б̣ад̇т̇а бавад̇д̇абийд̇исукам̣ гарод̇ий’’д̇иаад̣̇инаа яат̇аарахам̣ ад̇т̇о взд̣̇ид̇аб̣б̣о. барибуурзд̇ийд̇и вааяунаа бхасд̇ам̣ вияа имам̣ гараж̇агааяам̣ бийд̇исукзна буурзд̇и. саманд̇ад̇о пусад̇ийд̇и имам̣ гараж̇агааяам̣ бийд̇исукзна пусад̇и. саб̣б̣аавад̇од̇и а-гаарасса аа-гааро гад̇о, саб̣б̣ааваяававад̇од̇и ад̇т̇од̇и ааха ‘‘саб̣б̣агодтаасавад̇о’’д̇и, мам̣саад̣̇исаб̣б̣аабхааг̇авад̇од̇и ад̇т̇о. апудам̣ наама на ход̇и бийд̇исукасамудтаанзхи руубзхи саб̣б̣ад̇т̇агамзва б̣яаабид̇ад̇д̇аа. гаад̇ун̃жзва яож̇зд̇ун̃жа чзго саннзд̇ум̣ бадиб̣алод̇и яож̇анаа. нхаанийяажун̣н̣аанам̣ баримад̣̇д̣̇анавасзна бин̣д̣ам̣ гаронд̇зна хад̇т̇зна бхааж̇анам̣ ниббийл̣зд̇аб̣б̣ам̣ ход̇ийд̇и ааха ‘‘саннзнд̇асса бхиж̇ж̇ад̇ий’’д̇и. ануг̇ад̇аад̇и анубавидтаа. бариг̇ад̇аад̇и барид̇о саманд̇ад̇о д̇инд̇аа. д̇инд̇абхаавзнзва самам̣ анд̇арам̣ б̣аахиран̃жа зд̇иссаад̇и санд̇араб̣аахираа. саб̣б̣ад̇т̇агамзваад̇и саб̣б̣ад̇т̇зва. на жа баг̇гхарин̣ий бамаан̣аяуд̇д̇ассзва уд̣̇агасса сид̇д̇ад̇д̇аа. зд̇т̇а жа нхаанийяабин̣д̣ам̣ вияа гараж̇агааяо, д̇ам̣ д̇змзд̇ваа самбин̣д̣ид̇абамаан̣аяуд̇д̇ауд̣̇агам̣ вияа батамаж̇жхаанасукам̣ д̣̇адтаб̣б̣ам̣.
427. Kirīyati (a. ni. ṭī. 3.5.28-29) gabbhāsaye khipīyatīti karo, sambhavo, karato jātoti karajo, mātāpettikasambhavoti attho. Mātuyā hi sarīrasaṇṭhāpanavasena karato jātoti karajoti apare. Ubhayathāpi karajakāyanti catusantatirūpamāha. Temetīti tintaṃ karoti. Ko panettha tintabhāvoti āha ‘‘snehetī’’ti, pītisnehena pīṇanaṃ karotīti attho. Tenāha ‘‘sabbattha pavattapītisukhaṃ karotī’’ti. Pītisamuṭṭhānapaṇītarūpehi sakalassa karajakāyassa pariphuṭatāya cettha taṃsamuṭṭhāpakapītisukhānaṃ sabbattha pavatti jotitā. Parisandetītiādīsupi eseva nayo. Tatthāpi hi ‘‘samantato sandeti temeti sneheti, sabbattha pavattapītisukhaṃ karotī’’tiādinā yathārahaṃ attho veditabbo. Paripūretīti vāyunā bhastaṃ viya imaṃ karajakāyaṃ pītisukhena pūreti. Samantato phusatīti imaṃ karajakāyaṃ pītisukhena phusati. Sabbāvatoti a-kārassa ā-kāro kato, sabbāvayavavatoti atthoti āha ‘‘sabbakoṭṭhāsavato’’ti, maṃsādisabbābhāgavatoti attho. Aphuṭaṃ nāma na hoti pītisukhasamuṭṭhānehi rūpehi sabbatthakameva byāpitattā. Kātuñceva yojetuñca cheko sannetuṃ paṭibaloti yojanā. Nhānīyacuṇṇānaṃ parimaddanavasena piṇḍaṃ karontena hatthena bhājanaṃ nippīḷetabbaṃ hotīti āha ‘‘sannentassa bhijjatī’’ti. Anugatāti anupaviṭṭhā. Parigatāti parito samantato tintā. Tintabhāveneva samaṃ antaraṃ bāhirañca etissāti santarabāhirā. Sabbatthakamevāti sabbattheva. Na ca pagghariṇī pamāṇayuttasseva udakassa sittattā. Ettha ca nhānīyapiṇḍaṃ viya karajakāyo, taṃ temetvā sampiṇḍitapamāṇayuttaudakaṃ viya paṭhamajjhānasukhaṃ daṭṭhabbaṃ.
428. хздтаа уб̣бхиж̇ж̇ид̇ваа уг̇г̇ажчанауд̣̇агод̇и рахад̣̇асса ад̇хот̇уулад̇хаараавасзна уб̣бхиж̇ж̇а удтаханауд̣̇аго. анд̇оязва уб̣бхиж̇ж̇анауд̣̇агод̇и рахад̣̇асса аб̣бханд̇арзязва т̇уулад̇хаараа ахуд̇ваа удтид̇ауд̣̇агасираамукзхи уб̣бхиж̇ж̇анаго. ааг̇аманамаг̇г̇од̇и над̣̇ийд̇ал̣аагаганд̣̇арасарааад̣̇ид̇о ааг̇аманамаг̇г̇о.
428.Heṭṭhā ubbhijjitvā uggacchanaudakoti rahadassa adhothūladhārāvasena ubbhijja uṭṭhahanaudako. Antoyeva ubbhijjanaudakoti rahadassa abbhantareyeva thūladhārā ahutvā uṭṭhitaudakasirāmukhehi ubbhijjanako. Āgamanamaggoti nadītaḷākakandarasaraādito āgamanamaggo.
429. уббалаг̇ажчаани зд̇т̇а санд̇ийд̇и уббалиний (а. ни. дий. 3.5.28-29), ваари. аяамзд̇т̇а винижчаяо, д̇ат̇аа хи логз рад̇д̇агкиго ‘‘бун̣д̣арийгагко’’д̇и вужжад̇и. гзжи бана ‘‘рад̇д̇ам̣ бад̣̇умам̣, сзд̇ам̣ бун̣д̣арийга’’нд̇и вад̣̇анд̇и. уббалаад̣̇ийни вияа гараж̇агааяо, уд̣̇агам̣ вияа д̇ад̇ияаж̇жхаанасуканд̇и аяамби ад̇т̇о ‘‘буриманаязнаа’’д̇и ад̇ид̣̇зсзнзва вибхаавид̇од̇и д̣̇адтаб̣б̣ам̣.
429. Uppalagacchāni ettha santīti uppalinī (a. ni. ṭī. 3.5.28-29), vāri. Ayamettha vinicchayo, tathā hi loke rattakkhiko ‘‘puṇḍarīkakkho’’ti vuccati. Keci pana ‘‘rattaṃ padumaṃ, setaṃ puṇḍarīka’’nti vadanti. Uppalādīni viya karajakāyo, udakaṃ viya tatiyajjhānasukhanti ayampi attho ‘‘purimanayenā’’ti atideseneva vibhāvitoti daṭṭhabbaṃ.
430. нирубаггилзсадтзнаад̇и раж̇ож̇аллаад̣̇инаа анубаггилидтад̇ааяа амалийнабхаавзна. амалийнамби гин̃жи вад̇т̇у бабхассарасабхаавам̣ ход̇ийд̇и вуд̇д̇ам̣ ‘‘бабхассарадтзнаа’’д̇и. уд̇упаран̣анд̇и ун̣хауд̇упаран̣ам̣. саб̣б̣ад̇т̇агамзва жхаанасукзна пудто гараж̇агааяо яат̇аа уд̇унаа пудтавад̇т̇асад̣̇исод̇и ааха ‘‘вад̇т̇ам̣ вияа гараж̇агааяо’’д̇и. д̇асмаад̇и ‘‘вад̇т̇ам̣ вияаа’’д̇иаад̣̇инаа вуд̇д̇амзвад̇т̇ам̣ хзд̇убхаавзна бажжаамасад̇и, гараж̇агааяасса вад̇т̇асад̣̇исад̇д̇аа жад̇уд̇т̇аж̇жхаанасукасса жа уд̇упаран̣асад̣̇исад̇д̇аад̇и ад̇т̇о. санд̇асабхаавад̇д̇аа н̃аан̣уд̇д̇арад̇д̇аа жзд̇т̇а убзгкааби сукз сан̇г̇ахид̇аад̇и жад̇уд̇т̇аж̇жхаанзби сукаг̇г̇ахан̣ам̣ гад̇ам̣. ‘‘барисуд̣̇д̇хзна барияод̣̇аад̇зна парид̇ваа нисинно ход̇ий’’д̇и важанад̇о жад̇уд̇т̇аж̇жхаанажид̇д̇асса вад̇т̇асад̣̇исад̇аа вуд̇д̇аа. жад̇уд̇т̇аж̇жхаанасамудтаанаруубзхи бхигкуно гааяасса пудабхаавам̣ санд̇хааяа ‘‘д̇ам̣самудтаанаруубам̣ уд̇упаран̣ам̣ вияаа’’д̇и вуд̇д̇ам̣. бурисасса гааяо вияа бхигкуно гараж̇агааяод̇и аяам̣ банад̇т̇о баагадод̇и на г̇ахид̇о, г̇ахид̇о зва ваа ‘‘яат̇аа хи гад̇т̇ажи…бз… гааяо пудо ход̇ий’’д̇и вуд̇д̇ад̇д̇аа.
430.Nirupakkilesaṭṭhenāti rajojallādinā anupakkiliṭṭhatāya amalīnabhāvena. Amalīnampi kiñci vatthu pabhassarasabhāvaṃ hotīti vuttaṃ ‘‘pabhassaraṭṭhenā’’ti. Utupharaṇanti uṇhautupharaṇaṃ. Sabbatthakameva jhānasukhena phuṭṭho karajakāyo yathā utunā phuṭṭhavatthasadisoti āha ‘‘vatthaṃ viya karajakāyo’’ti. Tasmāti ‘‘vatthaṃ viyā’’tiādinā vuttamevatthaṃ hetubhāvena paccāmasati, karajakāyassa vatthasadisattā catutthajjhānasukhassa ca utupharaṇasadisattāti attho. Santasabhāvattā ñāṇuttarattā cettha upekkhāpi sukhe saṅgahitāti catutthajjhānepi sukhaggahaṇaṃ kataṃ. ‘‘Parisuddhena pariyodātena pharitvā nisinno hotī’’ti vacanato catutthajjhānacittassa vatthasadisatā vuttā. Catutthajjhānasamuṭṭhānarūpehi bhikkhuno kāyassa phuṭabhāvaṃ sandhāya ‘‘taṃsamuṭṭhānarūpaṃ utupharaṇaṃ viyā’’ti vuttaṃ. Purisassa kāyo viya bhikkhuno karajakāyoti ayaṃ panattho pākaṭoti na gahito, gahito eva vā ‘‘yathā hi katthaci…pe… kāyo phuṭo hotī’’ti vuttattā.
431. буб̣б̣зниваасан̃аан̣аубамааяанд̇и буб̣б̣зниваасан̃аан̣асса д̣̇ассид̇аубамааяам̣. д̇ам̣д̣̇ивасам̣гад̇агирияааг̇ахан̣ам̣ баагад̇игасад̇д̇ассаби язбхуяязна баагадаа ход̇ийд̇и д̣̇ассанад̇т̇ам̣. д̇ам̣д̣̇ивасаг̇ад̇аг̇аамад̇д̇аяаг̇г̇ахан̣знзва махаабхинийхаарзхи ан̃н̃зсамби буб̣б̣зниваасан̃аан̣алаабхийнам̣ д̇ийсу бхавзсу гад̇аа гирияаа язбхуяязна баагадаа ход̇ийд̇и д̣̇ийбид̇анд̇и д̣̇адтаб̣б̣ам̣.
431.Pubbenivāsañāṇaupamāyanti pubbenivāsañāṇassa dassitaupamāyaṃ. Taṃdivasaṃkatakiriyāgahaṇaṃ pākatikasattassapi yebhuyyena pākaṭā hotīti dassanatthaṃ. Taṃdivasagatagāmattayaggahaṇeneva mahābhinīhārehi aññesampi pubbenivāsañāṇalābhīnaṃ tīsu bhavesu katā kiriyā yebhuyyena pākaṭā hotīti dīpitanti daṭṭhabbaṃ.
432. саммукад̣̇ваараад̇и ан̃н̃аман̃н̃асса абхимукад̣̇ваараа. абараабарам̣ сан̃жаранд̇зд̇и д̇ам̣д̇ам̣гижжавасзна ид̇о жид̇о жа сан̃жаранд̇з. ид̇о бана г̇зхаа…бз… бависанавасзнабийд̇и ид̣̇ам̣ жуд̇уубабаад̇ан̃аан̣асса висаяад̣̇ассанавасзна вуд̇д̇ам̣. д̣̇виннам̣ г̇зхаанам̣ анд̇арз тад̇ваад̇и д̣̇виннам̣ г̇зхад̣̇ваараанам̣ саммукадтаанабхууд̇з анд̇аравийт̇ияам̣ взмаж̇жхз тад̇ваа. д̇зсу хи згасса жз баажийнамукад̣̇ваарам̣ ид̇арасса бажчимамукам̣, д̇асса саммукам̣ убхиннам̣ анд̇аравийт̇ияам̣ тид̇асса д̣̇агкин̣аамукасса, уд̇д̇араамукасса ваа жагкумад̇о бурисасса д̇ад̇т̇а бависанаганигкаманагабурисаа яат̇аа сукзнзва баагадаа хонд̇и, звам̣ д̣̇иб̣б̣ажагкун̃аан̣асаман̇г̇ино жаванагаубабаж̇ж̇анагабурисаа. яат̇аа бана д̇асса бурисасса ан̃н̃знзва кан̣зна бависанд̇асса д̣̇ассанам̣, ан̃н̃зна нигкаманд̇асса д̣̇ассанам̣, звам̣ имассаби ан̃н̃знзва кан̣зна жавамаанасса д̣̇ассанам̣, ан̃н̃зна убабаж̇ж̇амаанасса д̣̇ассананд̇и д̣̇адтаб̣б̣ам̣. н̃аан̣асса баагадаад̇и аанзд̇ваа самб̣анд̇хо. д̇ассаад̇и н̃аан̣асса.
432.Sammukhadvārāti aññamaññassa abhimukhadvārā. Aparāparaṃ sañcaranteti taṃtaṃkiccavasena ito cito ca sañcarante. Ito pana gehā…pe… pavisanavasenapīti idaṃ cutūpapātañāṇassa visayadassanavasena vuttaṃ. Dvinnaṃ gehānaṃ antare ṭhatvāti dvinnaṃ gehadvārānaṃ sammukhaṭṭhānabhūte antaravīthiyaṃ vemajjhe ṭhatvā. Tesu hi ekassa ce pācīnamukhadvāraṃ itarassa pacchimamukhaṃ, tassa sammukhaṃ ubhinnaṃ antaravīthiyaṃ ṭhitassa dakkhiṇāmukhassa, uttarāmukhassa vā cakkhumato purisassa tattha pavisanakanikkhamanakapurisā yathā sukheneva pākaṭā honti, evaṃ dibbacakkhuñāṇasamaṅgino cavanakaupapajjanakapurisā. Yathā pana tassa purisassa aññeneva khaṇena pavisantassa dassanaṃ, aññena nikkhamantassa dassanaṃ, evaṃ imassapi aññeneva khaṇena cavamānassa dassanaṃ, aññena upapajjamānassa dassananti daṭṭhabbaṃ. Ñāṇassa pākaṭāti ānetvā sambandho. Tassāti ñāṇassa.
433. баб̣б̣ад̇асикарам̣ язбхуяязна сам̣кид̇д̇ам̣ сан̇гужид̇ам̣ ход̇ийд̇и ид̇ха баб̣б̣ад̇амад̇т̇агам̣ ‘‘баб̣б̣ад̇асан̇кзбо’’д̇и вуд̇д̇ам̣, баб̣б̣ад̇абарияаабанно ваа бад̣̇зсо баб̣б̣ад̇асан̇кзбо. анаавилод̇и агаалуссо. саа жасса анаавилад̇аа гад̣̇д̣̇амаабхаавзна ход̇ийд̇и ааха ‘‘ниггад̣̇д̣̇амо’’д̇и. тид̇аасуби нисиннаасуби г̇аавийсу. виж̇ж̇амаанаасууд̇и лаб̣бхамаанаасу. ид̇араа тид̇ааби нисиннааби жаранд̇ийд̇и вужжанд̇и сахажаран̣ан̃ааязна. д̇идтанд̇амзва, на гад̣̇аажиби жаранд̇ам̣. д̣̇ваяанд̇и сиббисаммугам̣ мажчаг̇умб̣анд̇и имам̣ убхаяам̣ д̇идтанд̇анд̇и вуд̇д̇ам̣, жаранд̇амбийд̇и ад̇хиббааяо. гим̣ ваа имааяа сахажарияааяа, яат̇аалаабхаг̇г̇ахан̣ам̣ банзд̇т̇а д̣̇адтаб̣б̣ам̣. сагкарагат̇аласса хи васзна ‘‘д̇идтанд̇а’’нд̇и, сиббисамб̣угасса мажчаг̇умб̣асса жа васзна ‘‘д̇идтанд̇амби, жаранд̇амбий’’д̇и яож̇анаа гаад̇аб̣б̣аа.
433. Pabbatasikharaṃ yebhuyyena saṃkhittaṃ saṅkucitaṃ hotīti idha pabbatamatthakaṃ ‘‘pabbatasaṅkhepo’’ti vuttaṃ, pabbatapariyāpanno vā padeso pabbatasaṅkhepo. Anāviloti akālusso. Sā cassa anāvilatā kaddamābhāvena hotīti āha ‘‘nikkaddamo’’ti. Ṭhitāsupi nisinnāsupi gāvīsu. Vijjamānāsūti labbhamānāsu. Itarā ṭhitāpi nisinnāpi carantīti vuccanti sahacaraṇañāyena. Tiṭṭhantameva, na kadācipi carantaṃ. Dvayanti sippisammukaṃ macchagumbanti imaṃ ubhayaṃ tiṭṭhantanti vuttaṃ, carantampīti adhippāyo. Kiṃ vā imāya sahacariyāya, yathālābhaggahaṇaṃ panettha daṭṭhabbaṃ. Sakkharakathalassa hi vasena ‘‘tiṭṭhanta’’nti, sippisambukassa macchagumbassa ca vasena ‘‘tiṭṭhantampi, carantampī’’ti yojanā kātabbā.
434. бхигкууд̇и бхиннагилзсод̇и бхигку. со хи барамад̇т̇ад̇о саман̣од̇инаамаго. д̇ад̇т̇а арияамаг̇г̇зна саб̣б̣асо баабаанам̣ самид̇аавийд̇и саман̣о. д̇знааха ‘‘самид̇абаабад̇д̇аа’’д̇и. сздтадтзна б̣рахмаа вужжад̇и саммаасамб̣уд̣̇д̇хо, д̇ад̇о ааг̇ад̇од̇и б̣рахмаа, арияамаг̇г̇о, д̇ам̣ асаммохабадивзд̇хавасзна ан̃н̃аасийд̇и б̣раахман̣о. д̇ам̣саман̇г̇ид̇ааяа хисса баабаанам̣ б̣аахид̇абхааво. д̇знааха ‘‘б̣аахид̇абаабад̇д̇аа б̣раахман̣о’’д̇и. адтан̇г̇игзна арияамаг̇г̇аж̇алзна нхаад̇аваа нид̣̇д̇ход̇агилзсод̇и нхаад̇аго. г̇ад̇ад̇д̇аад̇и бахаанаабхисамаяавасзна бадивид̣̇д̇хад̇д̇аа. д̇знааха ‘‘вид̣̇ид̇ад̇д̇аа’’д̇и. ниссуд̇ад̇д̇аад̇и самужчзд̣̇аббахаанавасзна санд̇аанад̇о саб̣б̣асо нихад̇ад̇д̇аа. д̇знааха ‘‘абахад̇ад̇д̇аа’’д̇и, марияаад̣̇авасзна гилзсаанам̣ хим̣сид̇ад̇д̇аа арияамаг̇г̇зхи од̇хисо саб̣б̣асо гилзсаанам̣ самужчиннад̇д̇аад̇и ад̇т̇о. д̇знааха ‘‘хад̇ад̇д̇аа’’д̇и. аарагад̇д̇аад̇и суббахийнад̇ааяа виббагадтабхаавад̇о. д̇знааха ‘‘д̣̇уурийбхууд̇ад̇д̇аа’’д̇и. убхаяамби убхаяад̇т̇а яож̇зд̇аб̣б̣ам̣ – гилзсаанам̣ аарагад̇д̇аа хад̇ад̇д̇аа д̣̇уурийбхууд̇ад̇д̇аа жа арияо, д̇ат̇аа араханд̇и. яам̣ банзд̇т̇а ад̇т̇ад̇о на вибхад̇д̇ам̣, д̇ам̣ уд̇д̇аанад̇т̇ад̇д̇аа сувин̃н̃зяяамзва.
434.Bhikkhūti bhinnakilesoti bhikkhu. So hi paramatthato samaṇotināmako. Tattha ariyamaggena sabbaso pāpānaṃ samitāvīti samaṇo. Tenāha ‘‘samitapāpattā’’ti. Seṭṭhaṭṭhena brahmā vuccati sammāsambuddho, tato āgatoti brahmā, ariyamaggo, taṃ asammohapaṭivedhavasena aññāsīti brāhmaṇo. Taṃsamaṅgitāya hissa pāpānaṃ bāhitabhāvo. Tenāha ‘‘bāhitapāpattā brāhmaṇo’’ti. Aṭṭhaṅgikena ariyamaggajalena nhātavā niddhotakilesoti nhātako. Gatattāti pahānābhisamayavasena paṭividdhattā. Tenāha ‘‘viditattā’’ti. Nissutattāti samucchedappahānavasena santānato sabbaso nihatattā. Tenāha ‘‘apahatattā’’ti, mariyādavasena kilesānaṃ hiṃsitattā ariyamaggehi odhiso sabbaso kilesānaṃ samucchinnattāti attho. Tenāha ‘‘hatattā’’ti. Ārakattāti suppahīnatāya vippakaṭṭhabhāvato. Tenāha ‘‘dūrībhūtattā’’ti. Ubhayampi ubhayattha yojetabbaṃ – kilesānaṃ ārakattā hatattā dūrībhūtattā ca ariyo, tathā arahanti. Yaṃ panettha atthato na vibhattaṃ, taṃ uttānatthattā suviññeyyameva.
махааассабурасуд̇д̇аван̣н̣анааяа лийнад̇т̇аббагаасанаа самад̇д̇аа.
Mahāassapurasuttavaṇṇanāya līnatthappakāsanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 9. махааассабурасуд̇д̇ам̣ • 9. Mahāassapurasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / маж̇жхиманигааяа (адтагат̇аа) • Majjhimanikāya (aṭṭhakathā) / 9. махааассабурасуд̇д̇аван̣н̣анаа • 9. Mahāassapurasuttavaṇṇanā
