| Library / Tipiṭaka / तिपिटक • Tipiṭaka / सुत्तनिपातपाळि • Suttanipātapāḷi |
१३. महाब्यूहसुत्तं
13. Mahābyūhasuttaṃ
९०१.
901.
ये केचिमे दिट्ठिपरिब्बसाना, इदमेव सच्चन्ति विवादयन्ति 1।
Ye kecime diṭṭhiparibbasānā, idameva saccanti vivādayanti 2;
सब्बेव ते निन्दमन्वानयन्ति, अथो पसंसम्पि लभन्ति तत्थ॥
Sabbeva te nindamanvānayanti, atho pasaṃsampi labhanti tattha.
९०२.
902.
अप्पञ्हि एतं न अलं समाय, दुवे विवादस्स फलानि ब्रूमि।
Appañhi etaṃ na alaṃ samāya, duve vivādassa phalāni brūmi;
एतम्पि दिस्वा न विवादयेथ, खेमाभिपस्सं अविवादभूमिं॥
Etampi disvā na vivādayetha, khemābhipassaṃ avivādabhūmiṃ.
९०३.
903.
या काचिमा सम्मुतियो पुथुज्जा, सब्बाव एता न उपेति विद्वा।
Yā kācimā sammutiyo puthujjā, sabbāva etā na upeti vidvā;
अनूपयो सो उपयं किमेय्य, दिट्ठे सुते खन्तिमकुब्बमानो॥
Anūpayo so upayaṃ kimeyya, diṭṭhe sute khantimakubbamāno.
९०४.
904.
सीलुत्तमा सञ्ञमेनाहु सुद्धिं, वतं समादाय उपट्ठितासे।
Sīluttamā saññamenāhu suddhiṃ, vataṃ samādāya upaṭṭhitāse;
इधेव सिक्खेम अथस्स सुद्धिं, भवूपनीता कुसला वदाना॥
Idheva sikkhema athassa suddhiṃ, bhavūpanītā kusalā vadānā.
९०५.
905.
सचे चुतो सीलवततो होति, पवेधती 3 कम्म विराधयित्वा।
Sace cuto sīlavatato hoti, pavedhatī 4 kamma virādhayitvā;
पजप्पती पत्थयती च सुद्धिं, सत्थाव हीनो पवसं घरम्हा॥
Pajappatī patthayatī ca suddhiṃ, satthāva hīno pavasaṃ gharamhā.
९०६.
906.
सीलब्बतं वापि पहाय सब्बं, कम्मञ्च सावज्जनवज्जमेतं।
Sīlabbataṃ vāpi pahāya sabbaṃ, kammañca sāvajjanavajjametaṃ;
सुद्धिं असुद्धिन्ति अपत्थयानो, विरतो चरे सन्तिमनुग्गहाय॥
Suddhiṃ asuddhinti apatthayāno, virato care santimanuggahāya.
९०७.
907.
तमूपनिस्साय जिगुच्छितं वा, अथवापि दिट्ठं व सुतं मुतं वा।
Tamūpanissāya jigucchitaṃ vā, athavāpi diṭṭhaṃ va sutaṃ mutaṃ vā;
उद्धंसरा सुद्धिमनुत्थुनन्ति, अवीततण्हासे भवाभवेसु॥
Uddhaṃsarā suddhimanutthunanti, avītataṇhāse bhavābhavesu.
९०८.
908.
पत्थयमानस्स हि जप्पितानि, पवेधितं वापि पकप्पितेसु।
Patthayamānassa hi jappitāni, pavedhitaṃ vāpi pakappitesu;
चुतूपपातो इध यस्स नत्थि, स केन वेधेय्य कुहिंव जप्पे 5॥
Cutūpapāto idha yassa natthi, sa kena vedheyya kuhiṃva jappe 6.
९०९.
909.
यमाहु धम्मं परमन्ति एके, तमेव हीनन्ति पनाहु अञ्ञे।
Yamāhu dhammaṃ paramanti eke, tameva hīnanti panāhu aññe;
सच्चो नु वादो कतमो इमेसं, सब्बेव हीमे कुसला वदाना॥
Sacco nu vādo katamo imesaṃ, sabbeva hīme kusalā vadānā.
९१०.
910.
सकञ्हि धम्मं परिपुण्णमाहु, अञ्ञस्स धम्मं पन हीनमाहु।
Sakañhi dhammaṃ paripuṇṇamāhu, aññassa dhammaṃ pana hīnamāhu;
एवम्पि विग्गय्ह विवादयन्ति, सकं सकं सम्मुतिमाहु सच्चं॥
Evampi viggayha vivādayanti, sakaṃ sakaṃ sammutimāhu saccaṃ.
९११.
911.
परस्स चे वम्भयितेन हीनो, न कोचि धम्मेसु विसेसि अस्स।
Parassa ce vambhayitena hīno, na koci dhammesu visesi assa;
पुथू हि अञ्ञस्स वदन्ति धम्मं, निहीनतो सम्हि दळ्हं वदाना॥
Puthū hi aññassa vadanti dhammaṃ, nihīnato samhi daḷhaṃ vadānā.
९१२.
912.
सद्धम्मपूजापि नेसं तथेव, यथा पसंसन्ति सकायनानि।
Saddhammapūjāpi nesaṃ tatheva, yathā pasaṃsanti sakāyanāni;
९१३.
913.
न ब्राह्मणस्स परनेय्यमत्थि, धम्मेसु निच्छेय्य समुग्गहीतं।
Na brāhmaṇassa paraneyyamatthi, dhammesu niccheyya samuggahītaṃ;
तस्मा विवादानि उपातिवत्तो, न हि सेट्ठतो पस्सति धम्ममञ्ञं॥
Tasmā vivādāni upātivatto, na hi seṭṭhato passati dhammamaññaṃ.
९१४.
914.
जानामि पस्सामि तथेव एतं, दिट्ठिया एके पच्चेन्ति सुद्धिं।
Jānāmi passāmi tatheva etaṃ, diṭṭhiyā eke paccenti suddhiṃ;
अद्दक्खि चे किञ्हि तुमस्स तेन, अतिसित्वा अञ्ञेन वदन्ति सुद्धिं॥
Addakkhi ce kiñhi tumassa tena, atisitvā aññena vadanti suddhiṃ.
९१५.
915.
पस्सं नरो दक्खति 11 नामरूपं, दिस्वान वा ञस्सति तानिमेव।
Passaṃ naro dakkhati 12 nāmarūpaṃ, disvāna vā ñassati tānimeva;
कामं बहुं पस्सतु अप्पकं वा, न हि तेन सुद्धिं कुसला वदन्ति॥
Kāmaṃ bahuṃ passatu appakaṃ vā, na hi tena suddhiṃ kusalā vadanti.
९१६.
916.
निविस्सवादी न हि सुब्बिनायो, पकप्पितं दिट्ठि पुरेक्खरानो।
Nivissavādī na hi subbināyo, pakappitaṃ diṭṭhi purekkharāno;
यं निस्सितो तत्थ सुभं वदानो, सुद्धिंवदो तत्थ तथद्दसा सो॥
Yaṃ nissito tattha subhaṃ vadāno, suddhiṃvado tattha tathaddasā so.
९१७.
917.
न ब्राह्मणो कप्पमुपेति सङ्खा 13, न दिट्ठिसारी नपि ञाणबन्धु।
Na brāhmaṇo kappamupeti saṅkhā 14, na diṭṭhisārī napi ñāṇabandhu;
ञत्वा च सो सम्मुतियो 15 पुथुज्जा, उपेक्खती उग्गहणन्ति मञ्ञे॥
Ñatvā ca so sammutiyo 16 puthujjā, upekkhatī uggahaṇanti maññe.
९१८.
918.
विस्सज्ज गन्थानि मुनीध लोके, विवादजातेसु न वग्गसारी।
Vissajja ganthāni munīdha loke, vivādajātesu na vaggasārī;
सन्तो असन्तेसु उपेक्खको सो, अनुग्गहो उग्गहणन्ति मञ्ञे॥
Santo asantesu upekkhako so, anuggaho uggahaṇanti maññe.
९१९.
919.
पुब्बासवे हित्वा नवे अकुब्बं, न छन्दगू नोपि निविस्सवादी।
Pubbāsave hitvā nave akubbaṃ, na chandagū nopi nivissavādī;
स विप्पमुत्तो दिट्ठिगतेहि धीरो, न लिम्पति 17 लोके अनत्तगरही॥
Sa vippamutto diṭṭhigatehi dhīro, na limpati 18 loke anattagarahī.
९२०.
920.
स सब्बधम्मेसु विसेनिभूतो, यं किञ्चि दिट्ठं व सुतं मुतं वा।
Sa sabbadhammesu visenibhūto, yaṃ kiñci diṭṭhaṃ va sutaṃ mutaṃ vā;
स पन्नभारो मुनि विप्पमुत्तो, न कप्पियो नूपरतो न पत्थियोति॥
Sa pannabhāro muni vippamutto, na kappiyo nūparato na patthiyoti.
महाब्यूहसुत्तं तेरसमं निट्ठितं।
Mahābyūhasuttaṃ terasamaṃ niṭṭhitaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / सुत्तनिपात-अट्ठकथा • Suttanipāta-aṭṭhakathā / १३. महाब्यूहसुत्तवण्णना • 13. Mahābyūhasuttavaṇṇanā
