| Library / Tipiṭaka / திபிடக • Tipiṭaka / மஹானித்³தே³ஸ-அட்ட²கதா² • Mahāniddesa-aṭṭhakathā |
13. மஹாப்³யூஹஸுத்தனித்³தே³ஸவண்ணனா
13. Mahābyūhasuttaniddesavaṇṇanā
130. தேரஸமே மஹாப்³யூஹஸுத்தனித்³தே³ஸே யே கேசிமே தி³ட்டி²பரிப்³ப³ஸானாதி இத³ம்பி ‘‘கிங் நு கோ² இமே தி³ட்டி²பரிப்³ப³ஸானா விஞ்ஞூனங் ஸந்திகா நிந்த³மேவ லப⁴ந்தி, உதா³ஹு பஸங்ஸம்பீ’’தி உப்பன்னசித்தானங் ஏகச்சானங் தே³வதானங் தமத்த²ங் ஆவிகாதுங் புரிமனயேனேவ நிம்மிதபு³த்³தே⁴ன அத்தானங் புச்சா²பெத்வா வுத்தங். தத்த² அன்வானயந்தீதி அனு ஆனயந்தி புனப்புனங் ஆஹரந்தி.
130. Terasame mahābyūhasuttaniddese ye kecime diṭṭhiparibbasānāti idampi ‘‘kiṃ nu kho ime diṭṭhiparibbasānā viññūnaṃ santikā nindameva labhanti, udāhu pasaṃsampī’’ti uppannacittānaṃ ekaccānaṃ devatānaṃ tamatthaṃ āvikātuṃ purimanayeneva nimmitabuddhena attānaṃ pucchāpetvā vuttaṃ. Tattha anvānayantīti anu ānayanti punappunaṃ āharanti.
நிந்த³மேவ அன்வெந்தீதி க³ரஹமேவ உபக³ச்ச²ந்தி.
Nindameva anventīti garahameva upagacchanti.
131. இதா³னி யஸ்மா தே ‘‘இத³மேவ ஸச்ச’’ந்தி வத³ந்தாபி தி³ட்டி²க³திகவாதி³னோ கதா³சி கத்த²சி பஸங்ஸம்பி லப⁴ந்தி, யங் ஏதங் பஸங்ஸாஸங்கா²தங் வாத³ப²லங், தங் அப்பங், ராகா³தீ³னங் ஸமாய ஸமத்த²ங் ந ஹோதி, கோ பன வாதோ³ து³தியே நிந்தா³ப²லே, தஸ்மா ஏதமத்த²ங் த³ஸ்ஸெந்தோ இமங் தாவ விஸ்ஸஜ்ஜனகா³த²ங் ஆஹ ‘‘அப்பஞ்ஹி ஏதங் ந அலங் ஸமாய, து³வே விவாத³ஸ்ஸ ப²லானி ப்³ரூமீ’’தி. தத்த² து³வே விவாத³ஸ்ஸ ப²லானீதி நிந்தா³ ச பஸங்ஸா ச ஜயபராஜயாதீ³னி வா தங்ஸபா⁴கா³னி. ஏதம்பி தி³ஸ்வாதி ‘‘நிந்தா³ அனிட்டா² ஏவ, பஸங்ஸா நாலங் ஸமாயா’’தி ஏதம்பி விவாத³ப²லே ஆதீ³னவங் தி³ஸ்வா. கே²மாபி⁴பஸ்ஸங் அவிவாத³பூ⁴மிந்தி அவிவாத³பூ⁴மிங் நிப்³பா³னங் கே²மந்தி பஸ்ஸமானோ.
131. Idāni yasmā te ‘‘idameva sacca’’nti vadantāpi diṭṭhigatikavādino kadāci katthaci pasaṃsampi labhanti, yaṃ etaṃ pasaṃsāsaṅkhātaṃ vādaphalaṃ, taṃ appaṃ, rāgādīnaṃ samāya samatthaṃ na hoti, ko pana vādo dutiye nindāphale, tasmā etamatthaṃ dassento imaṃ tāva vissajjanagāthaṃ āha ‘‘appañhi etaṃ na alaṃ samāya, duve vivādassa phalāni brūmī’’ti. Tattha duve vivādassa phalānīti nindā ca pasaṃsā ca jayaparājayādīni vā taṃsabhāgāni. Etampi disvāti ‘‘nindā aniṭṭhā eva, pasaṃsā nālaṃ samāyā’’ti etampi vivādaphale ādīnavaṃ disvā. Khemābhipassaṃ avivādabhūminti avivādabhūmiṃ nibbānaṃ khemanti passamāno.
அப்பகந்தி மந்த³ங். பரித்தகந்தி தோ²கங். ஓமகந்தி ஹெட்டி²மகங். லாமகந்தி பாபகங். ஸமாயாதி ராகா³தீ³னங் ஸமனத்தா²ய. உபஸமாயாதி உபரூபரி ஸமனத்தா²ய. வூபஸமாயாதி ஸன்னிஸீதா³பனத்தா²ய. நிப்³பா³னாயாதி அமதமஹானிப்³பா³னத்தா²ய. படினிஸ்ஸக்³கா³யாதி மக்³கே³ன கிலேஸானங் நிஸ்ஸஜ்ஜனத்தா²ய. படிபஸ்ஸத்³தி⁴யாதி ப²லேன படிபஸ்ஸத்³தா⁴னங் அனுப்பஜ்ஜனத்தா²ய நாலங்.
Appakanti mandaṃ. Parittakanti thokaṃ. Omakanti heṭṭhimakaṃ. Lāmakanti pāpakaṃ. Samāyāti rāgādīnaṃ samanatthāya. Upasamāyāti uparūpari samanatthāya. Vūpasamāyāti sannisīdāpanatthāya. Nibbānāyāti amatamahānibbānatthāya. Paṭinissaggāyāti maggena kilesānaṃ nissajjanatthāya. Paṭipassaddhiyāti phalena paṭipassaddhānaṃ anuppajjanatthāya nālaṃ.
132. ஏவஞ்ஹி அவிவாத³மானோ – யா காசிமாதி கா³தா². தத்த² ஸம்முதியோதி தி³ட்டி²யோ. புது²ஜ்ஜாதி புது²ஜ்ஜனஸம்ப⁴வா. ஸோ உபயங் கிமெய்யாதி ஸோ உபக³ந்தப்³ப³ட்டே²ன உபயங் ரூபாதீ³ஸு ஏகம்பி த⁴ம்மங் கிங் உபெய்ய, கேன வா காரணேன உபெய்ய. தி³ட்டே² ஸுதே க²ந்திமகுப்³ப³மானோதி தி³ட்ட²ஸுதஸுத்³தீ⁴ஸு பேமங் அகரொந்தோ.
132. Evañhi avivādamāno – yā kācimāti gāthā. Tattha sammutiyoti diṭṭhiyo. Puthujjāti puthujjanasambhavā. Soupayaṃ kimeyyāti so upagantabbaṭṭhena upayaṃ rūpādīsu ekampi dhammaṃ kiṃ upeyya, kena vā kāraṇena upeyya. Diṭṭhe sute khantimakubbamānoti diṭṭhasutasuddhīsu pemaṃ akaronto.
புது²ஜ்ஜனேஹி ஜனிதாதி புது²ஜ்ஜனேஹி உப்பாதி³தா. ஸம்முதியோதி தி³ட்டி²யோ. புது² நானாஜனேஹி ஜனிதா வாதி அனேகவிதே⁴ஹி தி³ட்டி²க³திகேஹி உப்பாதி³தா வா. நேதீதி ந ஏதி. ந உபேதீதி ஸமீபங் ந ஏதி. ந உபக³ச்ச²தீதி நிவத்ததி. நாபி⁴னிவிஸதீதி பவிஸித்வா நப்பதிட்ட²தி.
Puthujjanehi janitāti puthujjanehi uppāditā. Sammutiyoti diṭṭhiyo. Puthu nānājanehi janitā vāti anekavidhehi diṭṭhigatikehi uppāditā vā. Netīti na eti. Na upetīti samīpaṃ na eti. Na upagacchatīti nivattati. Nābhinivisatīti pavisitvā nappatiṭṭhati.
133. இதோ பா³ஹிரா பன – ஸீலுத்தமாதி கா³தா² தஸ்ஸத்தோ² – ஸீலங்யேவ ‘‘உத்தம’’ந்தி மஞ்ஞமானா ஸீலுத்தமாதி ஏகே பொ⁴ந்தோ ஸங்யமமத்தேன ஸுத்³தி⁴ங் வத³ந்தி, ஹத்தி²வதாதி³ஞ்ச வதங் ஸமாதா³ய உபட்டி²தாஸே. இதே⁴வ தி³ட்டி²யங் அஸ்ஸ ஸத்து²னோ ஸுத்³தி⁴ங் ப⁴வூபனீதா ப⁴வஜ்ஜோ²ஸிதா ஸமானா வத³ந்தி, அபி ச தே குஸலாவதா³னா ‘‘குஸலா மய’’ந்தி ஏவங்வாதா³.
133. Ito bāhirā pana – sīluttamāti gāthā tassattho – sīlaṃyeva ‘‘uttama’’nti maññamānā sīluttamāti eke bhonto saṃyamamattena suddhiṃ vadanti, hatthivatādiñca vataṃ samādāya upaṭṭhitāse. Idheva diṭṭhiyaṃ assa satthuno suddhiṃ bhavūpanītā bhavajjhositā samānā vadanti, api ca te kusalāvadānā ‘‘kusalā maya’’nti evaṃvādā.
134. ஏவங் ஸீலுத்தமேஸு ச தேஸு ததா² படிபன்னோ யோ கோசி – ஸசே சுதோதி கா³தா². தஸ்ஸத்தோ² – ஸசே ததோ ஸீலவததோ பரவிச்சி²ந்த³னேன வா அனபி⁴ஸம்பு⁴ணந்தோ வா சுதோ ஹோதி, ஸோ தங் ஸீலப்³ப³தகம்மங் புஞ்ஞாபி⁴ஸங்கா²ராதி³கம்மங் வா விராத⁴யித்வா வேத⁴தீ. ந கேவலஞ்ச வேத⁴தி , அபி ச கோ² தங் ஸீலப்³ப³தஸுத்³தி⁴ங் பஜப்பதீ ச விப்பலபதி ச பத்த²யதீ ச. கிமிவ? ஸத்தா²வ ஹீனோ பவஸங் க⁴ரம்ஹா, க⁴ரம்ஹா பவஸந்தோ ஸத்த²தோ ஹீனோ யதா² தங் க⁴ரங் வா ஸத்த²ங் வா பத்த²யதீதி.
134. Evaṃ sīluttamesu ca tesu tathā paṭipanno yo koci – sace cutoti gāthā. Tassattho – sace tato sīlavatato paravicchindanena vā anabhisambhuṇanto vā cuto hoti, so taṃ sīlabbatakammaṃ puññābhisaṅkhārādikammaṃ vā virādhayitvā vedhatī. Na kevalañca vedhati , api ca kho taṃ sīlabbatasuddhiṃ pajappatī ca vippalapati ca patthayatī ca. Kimiva? Satthāva hīno pavasaṃ gharamhā, gharamhā pavasanto satthato hīno yathā taṃ gharaṃ vā satthaṃ vā patthayatīti.
பரவிச்சி²ந்த³னாய வாதி பரேன வாரியமானோ வா. அனபி⁴ஸம்பு⁴ணந்தோ வாதி தங் படிபத்திங் அஸம்பாதெ³ந்தோ வா.
Paravicchindanāya vāti parena vāriyamāno vā. Anabhisambhuṇanto vāti taṃ paṭipattiṃ asampādento vā.
அஞ்ஞாய அபரத்³தோ⁴தி நிப்³பா³னேன பரிஹீனோ மக்³க³தோ வா. தங் வா ஸத்த²ங் அனுப³ந்த⁴தீதி தங் வா ஸத்த²ங் ஸப்³ப³த்த² பச்ச²தோ க³ச்ச²தி.
Aññāya aparaddhoti nibbānena parihīno maggato vā. Taṃ vā satthaṃ anubandhatīti taṃ vā satthaṃ sabbattha pacchato gacchati.
135. ஏவங் பன ஸீலுத்தமானங் பவேத⁴னகாரணங் அரியஸாவகோ ஸீலப்³ப³தங் வாபி பஹாய ஸப்³ப³ந்தி கா³தா². தத்த² ஸாவஜ்ஜானவஜ்ஜந்தி ஸப்³பா³குஸலங் லோகியகுஸலஞ்ச. ஏதங் ஸுத்³தி⁴ங் அஸுத்³தி⁴ந்தி அபத்த²யானோதி பஞ்சகாமகு³ணாதி³பே⁴த³ங் ஸுத்³தி⁴ங் அகுஸலாதி³பே⁴த³ங் அஸுத்³தி⁴ஞ்ச அபத்த²யமானோ. விரதோ சரேதி ஸுத்³தி⁴யா அஸுத்³தி⁴யா ச விரதோ சரெய்ய. ஸந்தி மனுக்³க³ஹாயாதி தி³ட்டி²ங் அக்³க³ஹெத்வா.
135. Evaṃ pana sīluttamānaṃ pavedhanakāraṇaṃ ariyasāvako sīlabbataṃ vāpi pahāya sabbanti gāthā. Tattha sāvajjānavajjanti sabbākusalaṃ lokiyakusalañca. Etaṃ suddhiṃ asuddhintiapatthayānoti pañcakāmaguṇādibhedaṃ suddhiṃ akusalādibhedaṃ asuddhiñca apatthayamāno. Virato careti suddhiyā asuddhiyā ca virato careyya. Santi manuggahāyāti diṭṭhiṃ aggahetvā.
கண்ஹங் கண்ஹவிபாகந்தி அகுஸலகம்மங் அகுஸலவிபாகதா³யகங். ஸுக்கங் ஸுக்கவிபாகந்தி லோகியகுஸலங் அத்தனா ஸதி³ஸங் ஸுக்கவிபாகதா³யகங்.
Kaṇhaṃkaṇhavipākanti akusalakammaṃ akusalavipākadāyakaṃ. Sukkaṃ sukkavipākanti lokiyakusalaṃ attanā sadisaṃ sukkavipākadāyakaṃ.
நியாமாவக்கந்திந்தி மக்³க³பவிஸனங். ஸெக்கா²தி ஸத்த ஸெக்கா². அக்³க³த⁴ம்மந்தி உத்தமத⁴ம்மங், அரஹத்தப²லங்.
Niyāmāvakkantinti maggapavisanaṃ. Sekkhāti satta sekkhā. Aggadhammanti uttamadhammaṃ, arahattaphalaṃ.
136. ஏவங் இதோ பா³ஹிரகே ஸீலுத்தமே ஸங்யமேன விஸுத்³தி⁴வாதே³ தேஸஞ்ச விபாகங் ஸீலப்³ப³தபஹாயினோ அரஹதோ ச படிபத்திங் த³ஸ்ஸெத்வா இதா³னி அஞ்ஞதா²பி ஸுத்³தி⁴வாதே³ பா³ஹிரகே த³ஸ்ஸெந்தோ ‘‘தமூபனிஸ்ஸாயா’’தி கா³த²மாஹ. தஸ்ஸத்தோ² – ஸந்தஞ்ஞேபி ஸமணப்³ராஹ்மணா, தே ஜிகு³ச்சி²தங் அமரந்தபங் வா தி³ட்ட²ஸுத்³தி⁴ஆதீ³ஸு வா அஞ்ஞதரஞ்ஞதரங் உபனிஸ்ஸாயஅகிரியதி³ட்டி²யா வா உத்³த⁴ங்ஸரா ஹுத்வா ப⁴வாப⁴வேஸு அவீததண்ஹா ஸுத்³தி⁴’மனுத்து²னந்தி வத³ந்தி கதெ²ந்தீதி.
136. Evaṃ ito bāhirake sīluttame saṃyamena visuddhivāde tesañca vipākaṃ sīlabbatapahāyino arahato ca paṭipattiṃ dassetvā idāni aññathāpi suddhivāde bāhirake dassento ‘‘tamūpanissāyā’’ti gāthamāha. Tassattho – santaññepi samaṇabrāhmaṇā, te jigucchitaṃ amarantapaṃ vā diṭṭhasuddhiādīsu vā aññataraññataraṃ upanissāyaakiriyadiṭṭhiyā vā uddhaṃsarā hutvā bhavābhavesu avītataṇhā suddhi’manutthunanti vadanti kathentīti.
தபோஜிகு³ச்ச²வாதா³தி காயபீளனாதி³தபேன பாபஹிரீயனவாதா³. தபோஜிகு³ச்ச²ஸாராதி தேனேவ தபேன ஹிரீயனஸாரவந்தோ. உத்³த⁴ங்ஸராவாதா³தி ஸங்ஸாரேன ஸுத்³தி⁴ங் கத²யந்தா.
Tapojigucchavādāti kāyapīḷanāditapena pāpahirīyanavādā. Tapojigucchasārāti teneva tapena hirīyanasāravanto. Uddhaṃsarāvādāti saṃsārena suddhiṃ kathayantā.
137. ஏவங் தேஸங் அவீததண்ஹானங் ஸுத்³தி⁴ங் அனுத்து²னந்தானங் யோபி ஸுத்³தி⁴ப்பத்தமேவ அத்தானங் மஞ்ஞெய்ய, தஸ்ஸாபி அவீததண்ஹத்தா ப⁴வாப⁴வேஸு தங் தங் வத்து²ங் பத்த²யமானஸ்ஸ ஹி ஜப்பிதானி புனப்புனங் ஹொந்தியேவாதி அதி⁴ப்பாயோ. தண்ஹா ஹி ஆஸேவிதா தண்ஹங் வட்³ட⁴யதேவ, ந கேவலஞ்ச ஜப்பிதானி, பவேதி⁴தங் வாபி பகப்பிதேஸு, தண்ஹாதி³ட்டீ²ஹி சஸ்ஸ பகப்பிதேஸு வத்தூ²ஸு பவேதி⁴தம்பி ஹோதீதி வுத்தங் ஹோதி. ப⁴வாப⁴வேஸு பன வீததண்ஹத்தா ஆயதிங் சுதூபபாதோ இத⁴ யஸ்ஸ நத்தி², ஸ கேன வேதெ⁴ய்ய குஹிங் வ ஜப்பேதி அயமேதிஸ்ஸா கா³தா²ய ஸம்ப³ந்தோ⁴.
137. Evaṃ tesaṃ avītataṇhānaṃ suddhiṃ anutthunantānaṃ yopi suddhippattameva attānaṃ maññeyya, tassāpi avītataṇhattā bhavābhavesu taṃ taṃ vatthuṃ patthayamānassa hi jappitāni punappunaṃ hontiyevāti adhippāyo. Taṇhā hi āsevitā taṇhaṃ vaḍḍhayateva, na kevalañca jappitāni, pavedhitaṃ vāpi pakappitesu, taṇhādiṭṭhīhi cassa pakappitesu vatthūsu pavedhitampi hotīti vuttaṃ hoti. Bhavābhavesu pana vītataṇhattā āyatiṃ cutūpapāto idha yassa natthi, sa kena vedheyya kuhiṃ va jappeti ayametissā gāthāya sambandho.
ஆக³மனந்தி புன ஆக³மனங். க³மனந்தி இதோ அஞ்ஞத்த² க³மனங் . க³மனாக³மனந்தி இதோ க³ந்த்வா புன நிவத்தனங். காலந்தி மரணங். க³தீதி க³மனவஸேன க³தியா க³ந்தப்³ப³ங்.
Āgamananti puna āgamanaṃ. Gamananti ito aññattha gamanaṃ . Gamanāgamananti ito gantvā puna nivattanaṃ. Kālanti maraṇaṃ. Gatīti gamanavasena gatiyā gantabbaṃ.
138. யமாஹு த⁴ம்மந்தி புச்சா²கா³தா².
138.Yamāhu dhammanti pucchāgāthā.
139. இதா³னி யஸ்மா ஏகோபி எத்த² வாதோ³ ஸச்சோ நத்தி², கேவலங் தி³ட்டி²மத்தகேன ஹி தே வத³ந்தி, தஸ்மா தமத்த²ங் த³ஸ்ஸெந்தோ ‘‘ஸகங் ஹீ’’தி இமங் தாவ விஸ்ஸஜ்ஜனகா³த²மாஹ. தத்த² ஸம்முதிந்தி தி³ட்டி²ங். அனோமந்தி அனூனங்.
139. Idāni yasmā ekopi ettha vādo sacco natthi, kevalaṃ diṭṭhimattakena hi te vadanti, tasmā tamatthaṃ dassento ‘‘sakaṃ hī’’ti imaṃ tāva vissajjanagāthamāha. Tattha sammutinti diṭṭhiṃ. Anomanti anūnaṃ.
140. ஏவமேதேஸு ஸகங் த⁴ம்மங் பரிபுண்ணங் ப்³ரூவந்தேஸு அஞ்ஞஸ்ஸ த⁴ம்மங் பன ஹீனந்தி வத³ந்தேஸு யஸ்ஸ கஸ்ஸசி – பரஸ்ஸ சே வம்ப⁴யிதேன ஹீனோதி கா³தா². தஸ்ஸத்தோ² – யதி³ பரஸ்ஸ நிந்தி³தகாரணா ஹீனோ ப⁴வெய்ய, ந கோசி த⁴ம்மேஸு விஸேஸி அக்³கோ³ ப⁴வெய்ய. கிங்காரணா? புதூ² ஹி அஞ்ஞஸ்ஸ வத³ந்தி த⁴ம்மங் நிஹீனதோ ஸப்³பே³வ தே ஸம்ஹி த³ள்ஹங் வதா³னாஸகத⁴ம்மே த³ள்ஹவாதா³ ஏவ.
140. Evametesu sakaṃ dhammaṃ paripuṇṇaṃ brūvantesu aññassa dhammaṃ pana hīnanti vadantesu yassa kassaci – parassa ce vambhayitena hīnoti gāthā. Tassattho – yadi parassa ninditakāraṇā hīno bhaveyya, na koci dhammesu visesi aggo bhaveyya. Kiṃkāraṇā? Puthū hi aññassa vadanti dhammaṃ nihīnato sabbeva te samhi daḷhaṃ vadānāsakadhamme daḷhavādā eva.
வம்ப⁴யிதகாரணாதி த⁴ங்ஸிதகாரணா. க³ரஹிதகாரணாதி லாமககதகாரணா. உபவதி³தகாரணாதி அக்கோஸிதகாரணா. ஸகாயனந்தி ஸகமக்³க³ங்.
Vambhayitakāraṇāti dhaṃsitakāraṇā. Garahitakāraṇāti lāmakakatakāraṇā. Upavaditakāraṇāti akkositakāraṇā. Sakāyananti sakamaggaṃ.
141. கிஞ்ச பி⁴ய்யோ – ஸத்³த⁴ம்மபூஜாதி கா³தா². தஸ்ஸத்தோ² – தே ச தித்தி²யா யதா² பஸங்ஸந்தி ஸகாயனானி, ஸத்³த⁴ம்மபூஜாபி நேஸங் ததே²வ வத்ததி. தே ஹி அதிவிய ஸத்தா²ராதீ³னி ஸத்தரொந்தி. தத்த² யதி³ தே பமாணா ஸியுங், ஏவங் ஸந்தே ஸப்³பே³வ வாதா³ ததி²யா ப⁴வெய்யுங். கிங்காரணா ? ஸுத்³தீ⁴ ஹி நேஸங் பச்சத்தமேவ. ந ஸா அஞ்ஞத்த² ஸிஜ்ஜ²தி, நாபி பரமத்த²தோ. அத்தனி தி³ட்டி²கா³ஹமத்தமேவ ஹி தங் தேஸங் பரபச்சயனெய்யபு³த்³தீ⁴னங். பச்சத்தமேவாதி பாடேக்கமேவ.
141. Kiñca bhiyyo – saddhammapūjāti gāthā. Tassattho – te ca titthiyā yathā pasaṃsanti sakāyanāni, saddhammapūjāpi nesaṃ tatheva vattati. Te hi ativiya satthārādīni sattaronti. Tattha yadi te pamāṇā siyuṃ, evaṃ sante sabbeva vādā tathiyā bhaveyyuṃ. Kiṃkāraṇā ? Suddhī hi nesaṃ paccattameva. Na sā aññattha sijjhati, nāpi paramatthato. Attani diṭṭhigāhamattameva hi taṃ tesaṃ parapaccayaneyyabuddhīnaṃ. Paccattamevāti pāṭekkameva.
142. யோ பன விபரீததோ பா³ஹிதபாபத்தா ப்³ராஹ்மணோ, தஸ்ஸ ந ப்³ராஹ்மணஸ்ஸ பரனெய்யமத்தீ²தி கா³தா². தஸ்ஸத்தோ² – ப்³ராஹ்மணஸ்ஸ ஹி ‘‘ஸப்³பே³ ஸங்கா²ரா அனிச்சா’’திஆதி³னா நயேன ஸுதி³ட்ட²த்தா பரேன நேதப்³ப³ங் ஞாணங் நத்தி². தி³ட்டி²த⁴ம்மேஸு ‘‘இத³மேவ ஸச்ச’’ந்தி நிச்சி²னித்வா ஸுமக்³க³ஹீதம்பி நத்தி². தங்காரணா ஸோ தி³ட்டி²கலஹானி அதிக்கந்தோ, ந ஹி ஸோ ஸெட்ட²தோ பஸ்ஸதி த⁴ம்மமஞ்ஞங் அஞ்ஞத்ர ஸதிபட்டா²னாதீ³ஹி.
142. Yo pana viparītato bāhitapāpattā brāhmaṇo, tassa na brāhmaṇassa paraneyyamatthīti gāthā. Tassattho – brāhmaṇassa hi ‘‘sabbe saṅkhārā aniccā’’tiādinā nayena sudiṭṭhattā parena netabbaṃ ñāṇaṃ natthi. Diṭṭhidhammesu ‘‘idameva sacca’’nti nicchinitvā sumaggahītampi natthi. Taṃkāraṇā so diṭṭhikalahāni atikkanto, na hi so seṭṭhato passati dhammamaññaṃ aññatra satipaṭṭhānādīhi.
ந பரனெய்யோதி பரேன நேதப்³போ³ ஜானாபேதப்³போ³ ந ஹோதி. ந பரபத்தியோ ந பரபச்சயோதி பரேஸங் பச்சேதப்³போ³ ந ஹோதி. ந பரபடிப³த்³த⁴கூ³தி பரேஸங் படிப³த்³த⁴க³மனோ ந ஹோதி.
Na paraneyyoti parena netabbo jānāpetabbo na hoti. Na parapattiyo na parapaccayoti paresaṃ paccetabbo na hoti. Na parapaṭibaddhagūti paresaṃ paṭibaddhagamano na hoti.
143. ஜானாமீதி கா³தா²ய ஸம்ப³ந்தோ⁴ அத்தோ² ச – ஏவங் தாவ பரமத்த²ப்³ராஹ்மணோ ந ஹி ஸெட்ட²தோ பஸ்ஸதி த⁴ம்மமஞ்ஞங், அஞ்ஞே பன தித்தி²யா பரசித்தஞாணாதீ³ஹி ஜானந்தாபி பஸ்ஸந்தாபி ‘‘ஜானாமி பஸ்ஸாமி ததே²வ ஏத’’ந்தி ஏவங் வத³ந்தாபி ச தி³ட்டி²யா ஸுத்³தி⁴ங் பச்செந்தி. கஸ்மா? யஸ்மா தேஸு ஏகோபி அத³க்கி² சே அத்³த³ஸ சேபி தேன பரசித்தஞாணாதி³னா யதா²பூ⁴தமத்த²ங், கிஞ்ஹி துமஸ்ஸ தேன தஸ்ஸ தேன த³ஸ்ஸனேன கிங் கதங், கிங் து³க்க²பரிஞ்ஞா ஸாதி⁴தா, உதா³ஹு ஸமுத³யப்பஹானாதீ³னங் அஞ்ஞதரங், யதோ ஸப்³ப³தா²பி அதிக்கமித்வா அரியமக்³க³ங் தே தித்தி²யா அஞ்ஞேனேவ வத³ந்தி ஸுத்³தி⁴ங், அதிக்கமித்வா வா தே தித்தி²யே பு³த்³தா⁴த³யோ அஞ்ஞேனேவ வத³ந்தி ஸுத்³தி⁴ந்தி.
143.Jānāmīti gāthāya sambandho attho ca – evaṃ tāva paramatthabrāhmaṇo na hi seṭṭhato passati dhammamaññaṃ, aññe pana titthiyā paracittañāṇādīhi jānantāpi passantāpi ‘‘jānāmi passāmi tatheva eta’’nti evaṃ vadantāpi ca diṭṭhiyā suddhiṃ paccenti. Kasmā? Yasmā tesu ekopi adakkhi ce addasa cepi tena paracittañāṇādinā yathābhūtamatthaṃ, kiñhi tumassa tena tassa tena dassanena kiṃ kataṃ, kiṃ dukkhapariññā sādhitā, udāhu samudayappahānādīnaṃ aññataraṃ, yato sabbathāpi atikkamitvā ariyamaggaṃ te titthiyā aññeneva vadanti suddhiṃ, atikkamitvā vā te titthiye buddhādayo aññeneva vadanti suddhinti.
144. பஸ்ஸங் நரோதி கா³தா²ய ஸம்ப³ந்தோ⁴ அத்தோ² ச – கிஞ்ச பி⁴ய்யோ? ய்வாயங் பரசித்தஞாணாதீ³ஹி அத்³த³க்கி², ஸோ பஸ்ஸங் நரோ த³க்க²தி நாமரூபங், ந ததோ பரங், தி³ஸ்வான வா ஞஸ்ஸதி தானிமேவ நாமரூபானி நிச்சதோ ஸுக²தோ வா, ந அஞ்ஞதா²; ஸோ ஏவங் பஸ்ஸந்தோ காமங் ப³ஹுங் பஸ்ஸது அப்பகங் வா நாமரூபங் நிச்சதோ ஸுக²தோ ச அத²ஸ்ஸ ஏவரூபேன த³ஸ்ஸனேன ந ஹி தேன ஸுத்³தி⁴ங் குஸலா வத³ந்தி.
144.Passaṃ naroti gāthāya sambandho attho ca – kiñca bhiyyo? Yvāyaṃ paracittañāṇādīhi addakkhi, so passaṃ naro dakkhati nāmarūpaṃ, na tato paraṃ, disvāna vā ñassati tānimeva nāmarūpāni niccato sukhato vā, na aññathā; so evaṃ passanto kāmaṃ bahuṃ passatu appakaṃ vā nāmarūpaṃ niccato sukhato ca athassa evarūpena dassanena na hi tena suddhiṃ kusalā vadanti.
145. நிவிஸ்ஸவாதீ³தி கா³தா²ய ஸம்ப³ந்தோ⁴ அத்தோ² ச – தேன ச த³ஸ்ஸனேன ஸுத்³தி⁴யா அஸதியாபி யோ ‘‘ஜானாமி பஸ்ஸாமி ததே²வ ஏத’’ந்தி ஏவங் நிவிஸ்ஸவாதீ³, ஏதங் வா த³ஸ்ஸனங் படிச்ச தி³ட்டி²யா ஸுத்³தி⁴ங் பச்செந்தோ ‘‘இத³மேவ ஸச்ச’’ந்தி ஏவங் நிவிஸ்ஸவாதீ³, ஸோ ஸுப்³பி³னயோ ந ஹோதி தங் ததா² பகப்பிதங் அபி⁴ஸங்க²தங் தி³ட்டி²ங் புரக்க²ரானோ. ஸோ ஹி யங் ஸத்தா²ராதி³ங் நிஸ்ஸிதோ, தத்தே²வ ஸுப⁴ங் வதா³னோ ஸுத்³தி⁴ங் வதோ³, ‘‘பரிஸுத்³தி⁴வாதோ³ பரிஸுத்³தி⁴த³ஸ்ஸனோ வா அஹ’’ந்தி அத்தானங் மஞ்ஞமானோ தத்த² தத²த்³த³ஸா ஸோ, தத்த² ஸகாய தி³ட்டி²யா அவிபரீதமேவ ஸோ அத்³த³ஸ. யதா² ஸா தி³ட்டி² பவத்ததி, ததே²வ தங் அத்³த³ஸ, ந அஞ்ஞதா² பஸ்ஸிதுங் இச்ச²தீதி அதி⁴ப்பாயோ.
145.Nivissavādīti gāthāya sambandho attho ca – tena ca dassanena suddhiyā asatiyāpi yo ‘‘jānāmi passāmi tatheva eta’’nti evaṃ nivissavādī, etaṃ vā dassanaṃ paṭicca diṭṭhiyā suddhiṃ paccento ‘‘idameva sacca’’nti evaṃ nivissavādī, so subbinayo na hoti taṃ tathā pakappitaṃ abhisaṅkhataṃ diṭṭhiṃ purakkharāno. So hi yaṃ satthārādiṃ nissito, tattheva subhaṃ vadāno suddhiṃ vado, ‘‘parisuddhivādo parisuddhidassano vā aha’’nti attānaṃ maññamāno tattha tathaddasā so, tattha sakāya diṭṭhiyā aviparītameva so addasa. Yathā sā diṭṭhi pavattati, tatheva taṃ addasa, na aññathā passituṃ icchatīti adhippāyo.
நிவிஸ்ஸவாதீ³தி பதிட்ட²ஹித்வா கதெ²ந்தோ. து³ப்³பி³னயோதி வினேதுங் து³க்கோ². து³ப்பஞ்ஞாபயோதி ஞாபேதுங் சித்தேன லப்³பா⁴பேதுங் து³க்கோ². து³ன்னிஜ்ஜா²பயோதி சித்தேன வீமங்ஸித்வா க³ஹணத்த²ங் புனப்புனங் நிஜ்ஜா²பயிதுங் து³க்கோ². து³ப்பெக்கா²பயோதி இக்கா²பயிதுங் து³க்கோ². து³ப்பஸாத³யோதி சித்தே பஸாத³ங் உப்பாதே³துங் து³க்கோ².
Nivissavādīti patiṭṭhahitvā kathento. Dubbinayoti vinetuṃ dukkho. Duppaññāpayoti ñāpetuṃ cittena labbhāpetuṃ dukkho. Dunnijjhāpayoti cittena vīmaṃsitvā gahaṇatthaṃ punappunaṃ nijjhāpayituṃ dukkho. Duppekkhāpayoti ikkhāpayituṃ dukkho. Duppasādayoti citte pasādaṃ uppādetuṃ dukkho.
அப்பஸ்ஸீதி ஞாணேன படிவேத⁴ங் பாபுணி. படிவிஜ்ஜீ²தி சித்தேன அவபோ³த⁴ங் பாபுணி.
Appassīti ñāṇena paṭivedhaṃ pāpuṇi. Paṭivijjhīti cittena avabodhaṃ pāpuṇi.
146. ஏவங் பகப்பிதங் தி³ட்டி²ங் புரக்க²ரானேஸு தித்தி²யேஸு – ந ப்³ராஹ்மணோ கப்பமுபேதி ஸங்கா²தி கா³தா². தத்த² ஸங்கா²தி ஸங்கா²ய, ஜானித்வாதி அத்தோ². நபி ஞாணப³ந்தூ⁴தி ஸமாபத்திஞாணாதி³னா அகததண்ஹாதி³ட்டி²ப³ந்து⁴. தத்த² விக்³க³ஹோ – நாபி அஸ்ஸ ஞாணேன கதோ ப³ந்து⁴ அத்தீ²தி நபி ஞாணப³ந்து⁴. ஸம்முதியோதி தி³ட்டி²ஸம்முதியோ. புது²ஜ்ஜாதி புது²ஜ்ஜனஸம்ப⁴வா. உக்³க³ஹணந்தி மஞ்ஞேதி உக்³க³ஹணந்தி அஞ்ஞே, அஞ்ஞே தா ஸம்முதியோ உக்³க³ண்ஹந்தீதி வுத்தங் ஹோதி.
146. Evaṃ pakappitaṃ diṭṭhiṃ purakkharānesu titthiyesu – na brāhmaṇo kappamupeti saṅkhāti gāthā. Tattha saṅkhāti saṅkhāya, jānitvāti attho. Napi ñāṇabandhūti samāpattiñāṇādinā akatataṇhādiṭṭhibandhu. Tattha viggaho – nāpi assa ñāṇena kato bandhu atthīti napi ñāṇabandhu. Sammutiyoti diṭṭhisammutiyo. Puthujjāti puthujjanasambhavā. Uggahaṇanti maññeti uggahaṇanti aññe, aññe tā sammutiyo uggaṇhantīti vuttaṃ hoti.
உபெக்க²தீதி உபபத்திதோ அபக்க²பதிதோ ஹுத்வா பஸ்ஸதி.
Upekkhatīti upapattito apakkhapatito hutvā passati.
147. கிஞ்ச பி⁴ய்யோ – விஸ்ஸஜ்ஜ க³ந்தா²னீதி கா³தா². தத்த² அனுக்³க³ஹோதி உக்³க³ஹணவிரஹிதோ, ஸோபி நாஸ்ஸ உக்³க³ஹோதி அனுக்³க³ஹோ. ந வா உக்³க³ண்ஹாதீதி அனுக்³க³ஹோ.
147. Kiñca bhiyyo – vissajja ganthānīti gāthā. Tattha anuggahoti uggahaṇavirahito, sopi nāssa uggahoti anuggaho. Na vā uggaṇhātīti anuggaho.
க³ந்தே² வொஸ்ஸஜ்ஜித்வாதி அபி⁴ஜ்ஜா²தி³கே க³ந்தே² சஜித்வா. விஸ்ஸஜ்ஜாதி புன அனாதி³யனவஸேன ஜஹித்வா. க³தி⁴தேதி க⁴டிதே. க³ந்தி²தேதி ஸுத்தேன ஸங்க³ஹிதே விய க³ந்தி²தே. ப³ந்தே⁴தி ஸுட்டு² ப³ந்தே⁴. விப³ந்தே⁴தி விவிதா⁴ ப³ந்தே⁴. பலிபு³த்³தே⁴தி ஸமந்ததோ ப³ந்த⁴னேன ப³ந்தே⁴. ப³ந்த⁴னேதி கிலேஸப³ந்த⁴னே. போ²டயித்வாதி பப்போ²டெத்வா. ஸச்சங் விஸ்ஸஜ்ஜங் கரொந்தீதி விஸங்க²ரித்வா அபரிபோ⁴க³ங் கரொந்தி. விகோபெந்தீதி சுண்ணவிசுண்ணங் கரொந்தி.
Ganthe vossajjitvāti abhijjhādike ganthe cajitvā. Vissajjāti puna anādiyanavasena jahitvā. Gadhiteti ghaṭite. Ganthiteti suttena saṅgahite viya ganthite. Bandheti suṭṭhu bandhe. Vibandheti vividhā bandhe. Palibuddheti samantato bandhanena bandhe. Bandhaneti kilesabandhane. Phoṭayitvāti papphoṭetvā. Saccaṃ vissajjaṃ karontīti visaṅkharitvā aparibhogaṃ karonti. Vikopentīti cuṇṇavicuṇṇaṃ karonti.
148. கிஞ்ச பி⁴ய்யோ – ஸோ ஏவரூபோ – புப்³பா³ஸவேதி கா³தா². தத்த² புப்³பா³ஸவேதி அதீதரூபாதீ³னி ஆரப்³ப⁴ உப்பஜ்ஜனத⁴ம்மகிலேஸே . நவேதி பச்சுப்பன்னரூபாதீ³னி ஆரப்³ப⁴ உப்பஜ்ஜனத⁴ம்மே. ந ச²ந்த³கூ³தி ச²ந்தா³தி³வஸேன ந க³ச்ச²தி. அனத்தக³ரஹீதி கதாகதவஸேன அத்தானங் அக³ரஹந்தோ.
148. Kiñca bhiyyo – so evarūpo – pubbāsaveti gāthā. Tattha pubbāsaveti atītarūpādīni ārabbha uppajjanadhammakilese . Naveti paccuppannarūpādīni ārabbha uppajjanadhamme. Na chandagūti chandādivasena na gacchati. Anattagarahīti katākatavasena attānaṃ agarahanto.
149. ஏவங் அனத்தக³ரஹீ ச – ஸ ஸப்³ப³த⁴ம்மேஸூதி கா³தா². தத்த² ஸப்³ப³த⁴ம்மேஸூதி த்³வாஸட்டி²தி³ட்டி²த⁴ம்மேஸு ‘‘யங் கிஞ்சி தி³ட்ட²ங் வா’’தி ஏவங்பபே⁴தே³ஸு. பன்னபா⁴ரோதி பதிதபா⁴ரோ. ந கப்பேதீதி ந கப்பியோ, து³வித⁴ம்பி கப்பங் ந கரோதீதி அத்தோ². நூபரதோதி புது²ஜ்ஜனகல்யாணகஸெக்கா² விய உபரதிஸமங்கீ³பி நோ ஹோதி. ந பத்தி²யோதி நித்தண்ஹோ. தண்ஹா ஹி பத்த²யதீதி பத்தி²யா, நாஸ்ஸ பத்தி²யாதி ந பத்தி²யோ. இதோ பரஞ்ச ஹெட்டா² ச தத்த² தத்த² வுத்தனயத்தா உத்தானத்த²மேவ. ஏவங் அரஹத்தனிகூடேனேவ தே³ஸனங் நிட்டா²பேஸி, தே³ஸனாபரியோஸானே புராபே⁴த³ஸுத்தே (மஹானி॰ 83) வுத்தஸதி³ஸோ ஏவ அபி⁴ஸமயோ அஹோஸீதி.
149. Evaṃ anattagarahī ca – sa sabbadhammesūti gāthā. Tattha sabbadhammesūti dvāsaṭṭhidiṭṭhidhammesu ‘‘yaṃ kiñci diṭṭhaṃ vā’’ti evaṃpabhedesu. Pannabhāroti patitabhāro. Na kappetīti na kappiyo, duvidhampi kappaṃ na karotīti attho. Nūparatoti puthujjanakalyāṇakasekkhā viya uparatisamaṅgīpi no hoti. Na patthiyoti nittaṇho. Taṇhā hi patthayatīti patthiyā, nāssa patthiyāti na patthiyo. Ito parañca heṭṭhā ca tattha tattha vuttanayattā uttānatthameva. Evaṃ arahattanikūṭeneva desanaṃ niṭṭhāpesi, desanāpariyosāne purābhedasutte (mahāni. 83) vuttasadiso eva abhisamayo ahosīti.
ஸத்³த⁴ம்மப்பஜ்ஜோதிகாய மஹானித்³தே³ஸட்ட²கதா²ய
Saddhammappajjotikāya mahāniddesaṭṭhakathāya
மஹாப்³யூஹஸுத்தனித்³தே³ஸவண்ணனா நிட்டி²தா.
Mahābyūhasuttaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / மஹானித்³தே³ஸபாளி • Mahāniddesapāḷi / 13. மஹாவியூஹஸுத்தனித்³தே³ஸோ • 13. Mahāviyūhasuttaniddeso
