| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
13. மஹாப்³யூஹஸுத்தவண்ணனா
13. Mahābyūhasuttavaṇṇanā
902. யே கேசிமேதி மஹாப்³யூஹஸுத்தங். கா உப்பத்தி? இத³ம்பி தஸ்மிங்யேவ மஹாஸமயே ‘‘கிங் நு கோ² இமே தி³ட்டி²பரிப்³ப³ஸானா விஞ்ஞூனங் ஸந்திகா நிந்த³மேவ லப⁴ந்தி, உதா³ஹு பஸங்ஸம்பீ’’தி உப்பன்னசித்தானங் ஏகச்சானங் தே³வதானங் தமத்த²ங் ஆவிகாதுங் புரிமனயேன நிம்மிதபு³த்³தே⁴ன அத்தானங் புச்சா²பெத்வா வுத்தங். தத்த² அன்வானயந்தீதி அனு ஆனயந்தி, புனப்புனங் ஆஹரந்தி.
902.Yekecimeti mahābyūhasuttaṃ. Kā uppatti? Idampi tasmiṃyeva mahāsamaye ‘‘kiṃ nu kho ime diṭṭhiparibbasānā viññūnaṃ santikā nindameva labhanti, udāhu pasaṃsampī’’ti uppannacittānaṃ ekaccānaṃ devatānaṃ tamatthaṃ āvikātuṃ purimanayena nimmitabuddhena attānaṃ pucchāpetvā vuttaṃ. Tattha anvānayantīti anu ānayanti, punappunaṃ āharanti.
903. இதா³னி யஸ்மா தே ‘‘இத³மேவ ஸச்ச’’ந்தி வத³ந்தா தி³ட்டி²க³திகா வாதி³னோ கதா³சி கத்த²சி பஸங்ஸம்பி லப⁴ந்தி, யங் ஏதங் பஸங்ஸாஸங்கா²தங் வாத³ப²லங், தங் அப்பங் ராகா³தீ³னங் ஸமாய ஸமத்த²ங் ந ஹோதி, கோ பன வாதோ³ து³தியே நிந்தா³ப²லே, தஸ்மா ஏதமத்த²ங் த³ஸ்ஸெந்தோ இமங் தாவ விஸ்ஸஜ்ஜனகா³த²மாஹ. ‘‘அப்பஞ்ஹி ஏதங் ந அலங் ஸமாய, து³வே விவாத³ஸ்ஸ ப²லானி ப்³ரூமீ’’திஆதி³. தத்த² து³வே விவாத³ஸ்ஸ ப²லானீதி நிந்தா³ பஸங்ஸா ச, ஜயபராஜயாதீ³னி வா தங்ஸபா⁴கா³னி. ஏதம்பி தி³ஸ்வாதி ‘‘நிந்தா³ அனிட்டா² ஏவ, பஸங்ஸா நாலங் ஸமாயா’’தி ஏதம்பி விவாத³ப²லே ஆதீ³னவங் தி³ஸ்வா. கே²மாபி⁴பஸ்ஸங் அவிவாத³பூ⁴மிந்தி அவிவாத³பூ⁴மிங் நிப்³பா³னங் ‘‘கே²ம’’ந்தி பஸ்ஸமானோ.
903. Idāni yasmā te ‘‘idameva sacca’’nti vadantā diṭṭhigatikā vādino kadāci katthaci pasaṃsampi labhanti, yaṃ etaṃ pasaṃsāsaṅkhātaṃ vādaphalaṃ, taṃ appaṃ rāgādīnaṃ samāya samatthaṃ na hoti, ko pana vādo dutiye nindāphale, tasmā etamatthaṃ dassento imaṃ tāva vissajjanagāthamāha. ‘‘Appañhi etaṃ na alaṃ samāya, duve vivādassa phalāni brūmī’’tiādi. Tattha duve vivādassa phalānīti nindā pasaṃsā ca, jayaparājayādīni vā taṃsabhāgāni. Etampi disvāti ‘‘nindā aniṭṭhā eva, pasaṃsā nālaṃ samāyā’’ti etampi vivādaphale ādīnavaṃ disvā. Khemābhipassaṃ avivādabhūminti avivādabhūmiṃ nibbānaṃ ‘‘khema’’nti passamāno.
904. ஏவஞ்ஹி அவிவத³மானோ – யா காசிமாதி கா³தா². தத்த² ஸம்முதியோதி தி³ட்டி²யோ. புது²ஜ்ஜாதி புது²ஜ்ஜனஸம்ப⁴வா. ஸோ உபயங் கிமெய்யாதி ஸோ உபக³ந்தப்³ப³ட்டே²ன உபயங் ரூபாதீ³ஸு ஏகம்பி த⁴ம்மங் கிங் உபெய்ய, கேன வா காரணேன உபெய்ய. தி³ட்டே² ஸுதே க²ந்திமகுப்³ப³மானோதி தி³ட்ட²ஸுதஸுத்³தீ⁴ஸு பேமங் அகரொந்தோ.
904. Evañhi avivadamāno – yā kācimāti gāthā. Tattha sammutiyoti diṭṭhiyo. Puthujjāti puthujjanasambhavā. So upayaṃ kimeyyāti so upagantabbaṭṭhena upayaṃ rūpādīsu ekampi dhammaṃ kiṃ upeyya, kena vā kāraṇena upeyya. Diṭṭhe sute khantimakubbamānoti diṭṭhasutasuddhīsu pemaṃ akaronto.
905. இதோ பா³ஹிரா பன – ஸீலுத்தமாதி கா³தா². தஸ்ஸத்தோ² – ஸீலங்யேவ ‘‘உத்தம’’ந்தி மஞ்ஞமானா ஸீலுத்தமா ஏகே பொ⁴ந்தோ ஸங்யமமத்தேன ஸுத்³தி⁴ங் வத³ந்தி, ஹத்தி²வதாதி³ஞ்ச வதங் ஸமாதா³ய உபட்டி²தா, இதே⁴வ தி³ட்டி²யங் அஸ்ஸ ஸத்து²னோ ஸுத்³தி⁴ந்தி ப⁴வூபனீதா ப⁴வஜ்ஜோ²ஸிதா ஸமானா வத³ந்தி, அபிச தே குஸலா வதா³னா ‘‘குஸலா மய’’ந்தி ஏவங் வாதா³.
905. Ito bāhirā pana – sīluttamāti gāthā. Tassattho – sīlaṃyeva ‘‘uttama’’nti maññamānā sīluttamā eke bhonto saṃyamamattena suddhiṃ vadanti, hatthivatādiñca vataṃ samādāya upaṭṭhitā, idheva diṭṭhiyaṃ assa satthuno suddhinti bhavūpanītā bhavajjhositā samānā vadanti, apica te kusalā vadānā ‘‘kusalā maya’’nti evaṃ vādā.
906. ஏவங் ஸீலுத்தமேஸு ச தேஸு ததா² படிபன்னோ யோ கோசி – ஸசே சுதோதி கா³தா². தஸ்ஸத்தோ² – ஸசே ததோ ஸீலவததோ பரவிச்ச²ந்த³னேன வா அனபி⁴ஸம்பு⁴ணந்தோ வா சுதோ ஹோதி, ஸோ தங் ஸீலப்³ப³தாதி³கம்மங் புஞ்ஞாபி⁴ஸங்கா²ராதி³கம்மங் வா விராத⁴யித்வா பவேத⁴தீ. ந கேவலஞ்ச வேத⁴தி, அபிச கோ² தங் ஸீலப்³ப³தஸுத்³தி⁴ங் பஜப்பதீ ச விப்பலபதி பத்த²யதீ ச. கிமிவ? ஸத்தா²வ ஹீனோ பவஸங் க⁴ரம்ஹா. க⁴ரம்ஹா பவஸந்தோ ஸத்த²தோ ஹீனோ யதா² தங் க⁴ரங் வா ஸத்த²ங் வா பத்தெ²ய்யாதி.
906. Evaṃ sīluttamesu ca tesu tathā paṭipanno yo koci – sace cutoti gāthā. Tassattho – sace tato sīlavatato paravicchandanena vā anabhisambhuṇanto vā cuto hoti, so taṃ sīlabbatādikammaṃ puññābhisaṅkhārādikammaṃ vā virādhayitvā pavedhatī. Na kevalañca vedhati, apica kho taṃ sīlabbatasuddhiṃ pajappatī ca vippalapati patthayatī ca. Kimiva? Satthāva hīno pavasaṃ gharamhā. Gharamhā pavasanto satthato hīno yathā taṃ gharaṃ vā satthaṃ vā pattheyyāti.
907. ஏவங் பன ஸீலுத்தமானங் வேத⁴காரணங் அரியஸாவகோ – ஸீலப்³ப³தங் வாபி பஹாய ஸப்³ப³ந்தி கா³தா². தத்த² ஸாவஜ்ஜனவஜ்ஜந்தி ஸப்³பா³குஸலங் லோகியகுஸலஞ்ச. ஏதங் ஸுத்³தி⁴ங் அஸுத்³தி⁴ந்தி அபத்த²யானோதி பஞ்சகாமகு³ணாதி³பே⁴த³ங் ஏதங் ஸுத்³தி⁴ங், அகுஸலாதி³பே⁴த³ங் அஸுத்³தி⁴ஞ்ச அபத்த²யமானோ. விரதோ சரேதி ஸுத்³தி⁴யா அஸுத்³தி⁴யா ச விரதோ சரெய்ய. ஸந்திமனுக்³க³ஹாயாதி தி³ட்டி²ங் அக³ஹெத்வா.
907. Evaṃ pana sīluttamānaṃ vedhakāraṇaṃ ariyasāvako – sīlabbataṃ vāpi pahāya sabbanti gāthā. Tattha sāvajjanavajjanti sabbākusalaṃ lokiyakusalañca. Etaṃ suddhiṃ asuddhinti apatthayānoti pañcakāmaguṇādibhedaṃ etaṃ suddhiṃ, akusalādibhedaṃ asuddhiñca apatthayamāno. Virato careti suddhiyā asuddhiyā ca virato careyya. Santimanuggahāyāti diṭṭhiṃ agahetvā.
908. ஏவங் இதோ பா³ஹிரகே ஸீலுத்தமே ஸங்யமேன விஸுத்³தி⁴வாதே³ தேஸங் விகா⁴தங் ஸீலப்³ப³தப்பஹாயினோ அரஹதோ ச படிபத்திங் த³ஸ்ஸெத்வா இதா³னி அஞ்ஞதா²பி ஸுத்³தி⁴வாதே³ பா³ஹிரகே த³ஸ்ஸெந்தோ ‘‘தமூபனிஸ்ஸாயா’’தி கா³த²மாஹ. தஸ்ஸத்தோ² – ஸந்தஞ்ஞேபி ஸமணப்³ராஹ்மணா, தே ஜிகு³ச்சி²தங் அமரந்தபங் வா தி³ட்ட²ஸுத்³தி⁴ஆதீ³ஸு வா அஞ்ஞதரஞ்ஞதரங் உபனிஸ்ஸாய அகிரியதி³ட்டி²யா வா உத்³த⁴ங்ஸரா ஹுத்வா ப⁴வாப⁴வேஸு அவீததண்ஹாஸே ஸுத்³தி⁴மனுத்து²னந்தி வத³ந்தி கதெ²ந்தீதி.
908. Evaṃ ito bāhirake sīluttame saṃyamena visuddhivāde tesaṃ vighātaṃ sīlabbatappahāyino arahato ca paṭipattiṃ dassetvā idāni aññathāpi suddhivāde bāhirake dassento ‘‘tamūpanissāyā’’ti gāthamāha. Tassattho – santaññepi samaṇabrāhmaṇā, te jigucchitaṃ amarantapaṃ vā diṭṭhasuddhiādīsu vā aññataraññataraṃ upanissāya akiriyadiṭṭhiyā vā uddhaṃsarā hutvā bhavābhavesu avītataṇhāsesuddhimanutthunanti vadanti kathentīti.
909. ஏவங் தேஸங் அவீததண்ஹானங் ஸுத்³தி⁴ங் அனுத்து²னந்தானங் யோபி ஸுத்³தி⁴ப்பத்தமேவ அத்தானங் மஞ்ஞெய்ய, தஸ்ஸபி அவீததண்ஹத்தா ப⁴வாப⁴வேஸு தங் தங் வத்து²ங் பத்த²யமானஸ்ஸ ஹி ஜப்பிதானி புனப்புனங் ஹொந்தியேவாதி அதி⁴ப்பாயோ. தண்ஹா ஹி ஆஸேவிதா தண்ஹங் வட்³ட⁴யதேவ. ந கேவலஞ்ச ஜப்பிதானி, பவேதி⁴தங் வாபி பகப்பிதேஸு, தண்ஹாதி³ட்டீ²ஹி சஸ்ஸ பகப்பிதேஸு வத்தூ²ஸு பவேதி⁴தம்பி ஹோதீதி வுத்தங் ஹோதி. ப⁴வாப⁴வேஸு பன வீததண்ஹத்தா ஆயதிங் சுதூபபாதோ இத⁴ யஸ்ஸ நத்தி², ஸகேன வேதெ⁴ய்ய குஹிங்வ ஜப்பேதி அயமேதிஸ்ஸா கா³தா²ய ஸம்ப³ந்தோ⁴. ஸேஸங் நித்³தே³ஸே வுத்தனயமேவ.
909. Evaṃ tesaṃ avītataṇhānaṃ suddhiṃ anutthunantānaṃ yopi suddhippattameva attānaṃ maññeyya, tassapi avītataṇhattā bhavābhavesu taṃ taṃ vatthuṃ patthayamānassa hi jappitāni punappunaṃ hontiyevāti adhippāyo. Taṇhā hi āsevitā taṇhaṃ vaḍḍhayateva. Na kevalañca jappitāni, pavedhitaṃ vāpi pakappitesu, taṇhādiṭṭhīhi cassa pakappitesu vatthūsu pavedhitampi hotīti vuttaṃ hoti. Bhavābhavesu pana vītataṇhattā āyatiṃ cutūpapāto idha yassa natthi, sakena vedheyya kuhiṃva jappeti ayametissā gāthāya sambandho. Sesaṃ niddese vuttanayameva.
910-11. யமாஹூதி புச்சா²கா³தா². இதா³னி யஸ்மா ஏகோபி எத்த² வாதோ³ ஸச்சோ நத்தி², கேவலங் தி³ட்டி²மத்தகேன ஹி தே வத³ந்தி, தஸ்மா தமத்த²ங் த³ஸ்ஸெந்தோ ‘‘ஸகஞ்ஹீ’’தி இமங் தாவ விஸ்ஸஜ்ஜனகா³த²மாஹ. தத்த² ஸம்முதிந்தி தி³ட்டி²ங்.
910-11.Yamāhūti pucchāgāthā. Idāni yasmā ekopi ettha vādo sacco natthi, kevalaṃ diṭṭhimattakena hi te vadanti, tasmā tamatthaṃ dassento ‘‘sakañhī’’ti imaṃ tāva vissajjanagāthamāha. Tattha sammutinti diṭṭhiṃ.
912. ஏவமேதேஸு ஸகங் த⁴ம்மங் பரிபுண்ணங் ப்³ருவந்தேஸு அஞ்ஞஸ்ஸ பன த⁴ம்மங் ‘‘ஹீன’’ந்தி வத³ந்தேஸு யஸ்ஸ கஸ்ஸசி – பரஸ்ஸ சே வம்ப⁴யிதேன ஹீனோதி கா³தா². தஸ்ஸத்தோ² – யதி³ பரஸ்ஸ நிந்தி³தகாரணா ஹீனோ ப⁴வெய்ய, ந கோசி த⁴ம்மேஸு விஸேஸி அக்³கோ³ ப⁴வெய்ய. கிங் காரணங்? புதூ² ஹி அஞ்ஞஸ்ஸ வத³ந்தி த⁴ம்மங், நிஹீனதோ ஸப்³பே³வ தே ஸம்ஹி த³ள்ஹங் வதா³னா ஸகத⁴ம்மே த³ள்ஹவாதா³ ஏவ.
912. Evametesu sakaṃ dhammaṃ paripuṇṇaṃ bruvantesu aññassa pana dhammaṃ ‘‘hīna’’nti vadantesu yassa kassaci – parassa ce vambhayitena hīnoti gāthā. Tassattho – yadi parassa ninditakāraṇā hīno bhaveyya, na koci dhammesu visesi aggo bhaveyya. Kiṃ kāraṇaṃ? Puthū hiaññassa vadanti dhammaṃ, nihīnato sabbeva te samhi daḷhaṃ vadānā sakadhamme daḷhavādā eva.
913. கிஞ்ச பி⁴ய்யோ – ஸத்³த⁴ம்மபூஜாதி கா³தா². தஸ்ஸத்தோ² – தே ச தித்தி²யா யதா² பஸங்ஸந்தி ஸகாயனானி, ஸத்³த⁴ம்மபூஜாபி நேஸங் ததே²வ வத்ததி. தே ஹி அதிவிய ஸத்தா²ராதீ³னி ஸக்கரொந்தி. தத்த² யதி³ தே பமாணா ஸியுங், ஏவங் ஸந்தே ஸப்³பே³வ வாதா³ ததி²யா ப⁴வெய்யுங். கிங் காரணங்? ஸுத்³தீ⁴ ஹி நேஸங் பச்சத்தமேவ, ந ஸா அஞ்ஞத்ர ஸிஜ்ஜ²தி, நாபி பரமத்த²தோ. அத்தனி தி³ட்டி²கா³ஹமத்தமேவ ஹி தங் தேஸங் பரபச்சயனெய்யபு³த்³தீ⁴னங்.
913. Kiñca bhiyyo – saddhammapūjāti gāthā. Tassattho – te ca titthiyā yathā pasaṃsanti sakāyanāni, saddhammapūjāpi nesaṃ tatheva vattati. Te hi ativiya satthārādīni sakkaronti. Tattha yadi te pamāṇā siyuṃ, evaṃ sante sabbeva vādā tathiyā bhaveyyuṃ. Kiṃ kāraṇaṃ? Suddhī hi nesaṃ paccattameva, na sā aññatra sijjhati, nāpi paramatthato. Attani diṭṭhigāhamattameva hi taṃ tesaṃ parapaccayaneyyabuddhīnaṃ.
914. யோ வா பன விபரீதோ பா³ஹிதபாபத்தா ப்³ராஹ்மணோ, தஸ்ஸ – ந ப்³ராஹ்மணஸ்ஸ பரனெய்யமத்தீ²தி கா³தா². தஸ்ஸத்தோ² – ப்³ராஹ்மணஸ்ஸ ஹி ‘‘ஸப்³பே³ ஸங்கா²ரா அனிச்சா’’திஆதி³னா (த⁴॰ ப॰ 277; நெத்தி॰ 5) நயேன ஸுதி³ட்ட²த்தா பரேன நேதப்³ப³ங் ஞாணங் நத்தி², தி³ட்டி²த⁴ம்மேஸு ‘‘இத³மேவ ஸச்ச’’ந்தி நிச்சி²னித்வா ஸமுக்³க³ஹீதம்பி நத்தி². தங்காரணா ஸோ தி³ட்டி²கலஹானி அதீதோ, ந ச ஸோ ஸெட்ட²தோ பஸ்ஸதி த⁴ம்மமஞ்ஞங் அஞ்ஞத்ர ஸதிபட்டா²னாதீ³ஹி.
914. Yo vā pana viparīto bāhitapāpattā brāhmaṇo, tassa – na brāhmaṇassa paraneyyamatthīti gāthā. Tassattho – brāhmaṇassa hi ‘‘sabbe saṅkhārā aniccā’’tiādinā (dha. pa. 277; netti. 5) nayena sudiṭṭhattā parena netabbaṃ ñāṇaṃ natthi, diṭṭhidhammesu ‘‘idameva sacca’’nti nicchinitvā samuggahītampi natthi. Taṃkāraṇā so diṭṭhikalahāni atīto, na ca so seṭṭhato passati dhammamaññaṃ aññatra satipaṭṭhānādīhi.
915. ஜானாமீதி கா³தா²ய ஸம்ப³ந்தோ⁴ அத்தோ² ச – ஏவங் தாவ பரமத்த²ப்³ராஹ்மணோ ந ஹி ஸெட்ட²தோ பஸ்ஸதி த⁴ம்மமஞ்ஞங், அஞ்ஞே பன தித்தி²யா பரசித்தஞாணாதீ³ஹி ஜானந்தா பஸ்ஸந்தாபி ‘‘ஜானாமி பஸ்ஸாமி ததே²வ ஏத’’ந்தி ஏவங் வத³ந்தாபி ச தி³ட்டி²யா ஸுத்³தி⁴ங் பச்செந்தி. கஸ்மா? யஸ்மா தேஸு ஏகோபி அத்³த³க்கி² சே அத்³த³ஸ சேபி தேன பரசித்தஞாணாதி³னா யதா²பூ⁴தங் அத்த²ங், கிஞ்ஹி துமஸ்ஸ தேன தஸ்ஸ தேன த³ஸ்ஸனேன கிங் கதங், கிங் து³க்க²பரிஞ்ஞா ஸாதி⁴தா, உதா³ஹு ஸமுத³யபஹானாதீ³னங் அஞ்ஞதரங், யதோ ஸப்³ப³தா²பி அதிக்கமித்வா அரியமக்³க³ங் தே தித்தி²யா அஞ்ஞேனேவ வத³ந்தி ஸுத்³தி⁴ங், அதிக்கமித்வா வா தே தித்தி²யே பு³த்³தா⁴த³யோ அஞ்ஞேனேவ வத³ந்தி ஸுத்³தி⁴ந்தி.
915.Jānāmīti gāthāya sambandho attho ca – evaṃ tāva paramatthabrāhmaṇo na hi seṭṭhato passati dhammamaññaṃ, aññe pana titthiyā paracittañāṇādīhi jānantā passantāpi ‘‘jānāmi passāmi tatheva eta’’nti evaṃ vadantāpi ca diṭṭhiyā suddhiṃ paccenti. Kasmā? Yasmā tesu ekopi addakkhi ce addasa cepi tena paracittañāṇādinā yathābhūtaṃ atthaṃ, kiñhi tumassa tena tassa tena dassanena kiṃ kataṃ, kiṃ dukkhapariññā sādhitā, udāhu samudayapahānādīnaṃ aññataraṃ, yato sabbathāpi atikkamitvā ariyamaggaṃ te titthiyā aññeneva vadanti suddhiṃ, atikkamitvā vā te titthiye buddhādayo aññeneva vadanti suddhinti.
916. பஸ்ஸங் நரோதி கா³தா²ய ஸம்ப³ந்தோ⁴ அத்தோ² ச. கிஞ்ச பி⁴ய்யோ? ய்வாயங் பரசித்தஞாணாதீ³ஹி அத்³த³க்கி², ஸோ பஸ்ஸங் நரோ த³க்க²தி நாமரூபங், ந ததோ பரங் தி³ஸ்வான வா ஞஸ்ஸதி தானிமேவ நாமரூபானி நிச்சதோ ஸுக²தோ வா ந அஞ்ஞதா². ஸோ ஏவங் பஸ்ஸந்தோ காமங் ப³ஹுங் பஸ்ஸது அப்பகங் வா நாமரூபங் நிச்சதோ ஸுக²தோ ச, அத²ஸ்ஸ ஏவரூபேன த³ஸ்ஸனேன ந ஹி தேன ஸுத்³தி⁴ங் குஸலா வத³ந்தீதி.
916.Passaṃ naroti gāthāya sambandho attho ca. Kiñca bhiyyo? Yvāyaṃ paracittañāṇādīhi addakkhi, so passaṃ naro dakkhati nāmarūpaṃ, na tato paraṃ disvāna vā ñassati tānimeva nāmarūpāni niccato sukhato vā na aññathā. So evaṃ passanto kāmaṃ bahuṃ passatu appakaṃ vā nāmarūpaṃ niccato sukhato ca, athassa evarūpena dassanena na hi tena suddhiṃ kusalā vadantīti.
917. நிவிஸ்ஸவாதீ³தி கா³தா²ய ஸம்ப³ந்தோ⁴ அத்தோ² ச – தேன ச த³ஸ்ஸனேன ஸுத்³தி⁴யா அஸதியாபி யோ ‘‘ஜானாமி பஸ்ஸாமி ததே²வ ஏத’’ந்தி ஏவங் நிவிஸ்ஸவாதீ³, ஏதங் வா த³ஸ்ஸனங் படிச்ச தி³ட்டி²யா ஸுத்³தி⁴ங் பச்செந்தோ ‘‘இத³மேவ ஸச்ச’’ந்தி ஏவங் நிவிஸ்ஸவாதீ³, ஸோ ஸுப்³பி³னயோ ந ஹோதி தங் ததா² பகப்பிதங் அபி⁴ஸங்க²தங் தி³ட்டி²ங் புரெக்க²ரானோ. ஸோ ஹி யங் ஸத்தா²ராதி³ங் நிஸ்ஸிதோ, தத்தே²வ ஸுப⁴ங் வதா³னோ ஸுத்³தி⁴ங் வதோ³, ‘‘பரிஸுத்³த⁴வாதோ³ பரிஸுத்³த⁴த³ஸ்ஸனோ வா அஹ’’ந்தி அத்தானங் மஞ்ஞமானோ தத்த² தத²த்³த³ஸா ஸோ, தத்த² ஸகாய தி³ட்டி²யா அவிபரீதமேவ ஸோ அத்³த³ஸ. யதா² ஸா தி³ட்டி² பவத்ததி, ததே²வ நங் அத்³த³ஸ, ந அஞ்ஞதா² பஸ்ஸிதுங் இச்ச²தீதி அதி⁴ப்பாயோ.
917.Nivissavādīti gāthāya sambandho attho ca – tena ca dassanena suddhiyā asatiyāpi yo ‘‘jānāmi passāmi tatheva eta’’nti evaṃ nivissavādī, etaṃ vā dassanaṃ paṭicca diṭṭhiyā suddhiṃ paccento ‘‘idameva sacca’’nti evaṃ nivissavādī, so subbinayo na hoti taṃ tathā pakappitaṃ abhisaṅkhataṃ diṭṭhiṃ purekkharāno. So hi yaṃ satthārādiṃ nissito, tattheva subhaṃ vadāno suddhiṃ vado, ‘‘parisuddhavādo parisuddhadassano vā aha’’nti attānaṃ maññamāno tattha tathaddasā so, tattha sakāya diṭṭhiyā aviparītameva so addasa. Yathā sā diṭṭhi pavattati, tatheva naṃ addasa, na aññathā passituṃ icchatīti adhippāyo.
918. ஏவங் பகப்பிதங் தி³ட்டி²ங் புரெக்க²ரானேஸு தித்தி²யேஸு – ந ப்³ராஹ்மணோ கப்பமுபேதி ஸங்கா²தி கா³தா². தத்த² ஸங்கா²தி ஸங்கா²ய, ஜானித்வாதி அத்தோ². நபி ஞாணப³ந்தூ⁴தி ஸமாபத்திஞாணாதி³னா அகததண்ஹாதி³ட்டி²ப³ந்து⁴. தத்த² விக்³க³ஹோ – நாபி அஸ்ஸ ஞாணேன கதோ ப³ந்து⁴ அத்தீ²தி நபி ஞாணப³ந்து⁴. ஸம்முதியோதி தி³ட்டி²ஸம்முதியோ. புது²ஜ்ஜாதி புது²ஜ்ஜனஸம்ப⁴வா. உக்³க³ஹணந்தி மஞ்ஞேதி உக்³க³ஹணந்தி அஞ்ஞே, அஞ்ஞே தா ஸம்முதியோ உக்³க³ண்ஹந்தீதி வுத்தங் ஹோதி.
918. Evaṃ pakappitaṃ diṭṭhiṃ purekkharānesu titthiyesu – na brāhmaṇo kappamupeti saṅkhāti gāthā. Tattha saṅkhāti saṅkhāya, jānitvāti attho. Napi ñāṇabandhūti samāpattiñāṇādinā akatataṇhādiṭṭhibandhu. Tattha viggaho – nāpi assa ñāṇena kato bandhu atthīti napi ñāṇabandhu. Sammutiyoti diṭṭhisammutiyo. Puthujjāti puthujjanasambhavā. Uggahaṇanti maññeti uggahaṇanti aññe, aññe tā sammutiyo uggaṇhantīti vuttaṃ hoti.
919. கிஞ்ச பி⁴ய்யோ – விஸ்ஸஜ்ஜ க³ந்தா²னீதி கா³தா². தத்த² அனுக்³க³ஹோதி உக்³க³ஹணவிரஹிதோ, ஸோபி நாஸ்ஸ உக்³க³ஹோதி அனுக்³க³ஹோ, ந வா உக்³க³ண்ஹாதீதி அனுக்³க³ஹோ.
919. Kiñca bhiyyo – vissajja ganthānīti gāthā. Tattha anuggahoti uggahaṇavirahito, sopi nāssa uggahoti anuggaho, na vā uggaṇhātīti anuggaho.
920. கிஞ்ச பி⁴ய்யோ – ஸோ ஏவரூபோ – புப்³பா³ஸவேதி கா³தா². தத்த² புப்³பா³ஸவேதி அதீதரூபாதீ³னி ஆரப்³ப⁴ உப்பஜ்ஜமானத⁴ம்மே கிலேஸே. நவேதி பச்சுப்பன்னரூபாதீ³னி ஆரப்³ப⁴ உப்பஜ்ஜமானத⁴ம்மே. ந ச²ந்த³கூ³தி ச²ந்தா³தி³வஸேன ந க³ச்ச²தி. அனத்தக³ரஹீதி கதாகதவஸேன அத்தானங் அக³ரஹந்தோ.
920. Kiñca bhiyyo – so evarūpo – pubbāsaveti gāthā. Tattha pubbāsaveti atītarūpādīni ārabbha uppajjamānadhamme kilese. Naveti paccuppannarūpādīni ārabbha uppajjamānadhamme. Na chandagūti chandādivasena na gacchati. Anattagarahīti katākatavasena attānaṃ agarahanto.
921. ஏவங் அனத்தக³ரஹீ ச – ஸ ஸப்³ப³த⁴ம்மேஸூதி கா³தா². தத்த² ஸப்³ப³த⁴ம்மேஸூதி த்³வாஸட்டி²தி³ட்டி²த⁴ம்மேஸு ‘‘யங் கிஞ்சி தி³ட்ட²ங் வா’’தி ஏவங்பபே⁴தே³ஸு. பன்னபா⁴ரோதி பதிதபா⁴ரோ. ந கப்பேதீதி ந கப்பியோ, து³வித⁴ம்பி கப்பங் ந கரோதீதி அத்தோ². நூபரதோதி புது²ஜ்ஜனகல்யாணகஸெக்கா² விய உபரதிஸமங்கீ³பி ந ஹோதி. ந பத்தி²யோதி நித்தண்ஹோ. தண்ஹா ஹி பத்தி²யதீதி பத்தி²யா, நாஸ்ஸ பத்தி²யாதி ந பத்தி²யோதி. ஸேஸங் தத்த² தத்த² பாகடமேவாதி ந வுத்தங். ஏவங் அரஹத்தனிகூடேன தே³ஸனங் நிட்டா²பேஸி, தே³ஸனாபரியோஸானே புராபே⁴த³ஸுத்தே வுத்தஸதி³ஸோ ஏவாபி⁴ஸமயோ அஹோஸீதி.
921. Evaṃ anattagarahī ca – sa sabbadhammesūti gāthā. Tattha sabbadhammesūti dvāsaṭṭhidiṭṭhidhammesu ‘‘yaṃ kiñci diṭṭhaṃ vā’’ti evaṃpabhedesu. Pannabhāroti patitabhāro. Na kappetīti na kappiyo, duvidhampi kappaṃ na karotīti attho. Nūparatoti puthujjanakalyāṇakasekkhā viya uparatisamaṅgīpi na hoti. Na patthiyoti nittaṇho. Taṇhā hi patthiyatīti patthiyā, nāssa patthiyāti na patthiyoti. Sesaṃ tattha tattha pākaṭamevāti na vuttaṃ. Evaṃ arahattanikūṭena desanaṃ niṭṭhāpesi, desanāpariyosāne purābhedasutte vuttasadiso evābhisamayo ahosīti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய மஹாப்³யூஹஸுத்தவண்ணனா நிட்டி²தா.
Suttanipāta-aṭṭhakathāya mahābyūhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 13. மஹாப்³யூஹஸுத்தங் • 13. Mahābyūhasuttaṃ
