| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
11. மஹாசோரஸுத்தவண்ணனா
11. Mahācorasuttavaṇṇanā
51. ஏகாத³ஸமே மஹாசோரோதி மஹந்தோ ப³லவசோரோ. ஸந்தி⁴ந்தி க⁴ரஸந்தி⁴ங். நில்லோபந்தி மஹாவிலோபங். ஏகாகா³ரிகந்தி ஏகமேவ கே³ஹங் பரிவாரெத்வா விலும்பனங். பரிபந்தே²பி திட்ட²தீதி பந்த²தூ³ஹனகம்மங் கரோதி. நதீ³விது³க்³க³ந்தி நதீ³னங் து³க்³க³மட்டா²னங் அந்தரதீ³பகங், யத்த² ஸக்கா ஹோதி த்³வீஹிபி தீஹிபி ஜங்க⁴ஸஹஸ்ஸேஹி ஸத்³தி⁴ங் நிலீயிதுங். பப்³ப³தவிஸமந்தி பப்³ப³தானங் விஸமட்டா²னங் பப்³ப³தந்தரங், யத்த² ஸக்கா ஹோதி ஸத்தஹி வா அட்ட²ஹி வா ஜங்க⁴ஸஹஸ்ஸேஹி ஸத்³தி⁴ங் நிலீயிதுங். திணக³ஹனந்தி திணேன வட்³டி⁴த்வா ஸஞ்ச²ன்னங் த்³வத்தியோஜனட்டா²னங். ரோத⁴ந்தி க⁴னங் அஞ்ஞமஞ்ஞங் ஸங்ஸட்ட²ஸாக²ங் ஏகாப³த்³த⁴ங் மஹாவனஸண்ட³ங். பரியோதா⁴ய அத்த²ங் ப⁴ணிஸ்ஸந்தீதி பரியோத³ஹித்வா தங் தங் காரணங் பக்கி²பித்வா அத்த²ங் கத²யிஸ்ஸந்தி. த்யாஸ்ஸாதி தே அஸ்ஸ. பரியோதா⁴ய அத்த²ங் ப⁴ணந்தீதி கிஸ்மிஞ்சி கிஞ்சி வத்துங் ஆரத்³தே⁴யேவ ‘‘மா ஏவங் அவசுத்த², மயங் ஏதங் குலபரம்பராய ஜானாம, ந ஏஸ ஏவரூபங் கரிஸ்ஸதீ’’தி தங் தங் காரணங் பக்கி²பித்வா மஹந்தம்பி தோ³ஸங் ஹரந்தா அத்த²ங் ப⁴ணந்தி. அத² வா பரியோதா⁴யாதி படிச்சா²தெ³த்வாதிபி அத்தோ². தே ஹி தஸ்ஸபி தோ³ஸங் படிச்சா²தெ³த்வா அத்த²ங் ப⁴ணந்தி. க²தங் உபஹதந்தி கு³ணக²னநேன க²தங், கு³ணுபகா⁴தேன உபஹதங். விஸமேன காயகம்மேனாதி ஸம்பக்க²லனட்டே²ன விஸமேன காயத்³வாரிககம்மேன. வசீமனோகம்மேஸுபி ஏஸேவ நயோ. அந்தக்³கா³ஹிகாயாதி த³ஸவத்து²காய அந்தங் க³ஹெத்வா டி²ததி³ட்டி²யா. ஸேஸங் ஸப்³ப³த்த² உத்தானத்த²மேவாதி.
51. Ekādasame mahācoroti mahanto balavacoro. Sandhinti gharasandhiṃ. Nillopanti mahāvilopaṃ. Ekāgārikanti ekameva gehaṃ parivāretvā vilumpanaṃ. Paripanthepi tiṭṭhatīti panthadūhanakammaṃ karoti. Nadīvidugganti nadīnaṃ duggamaṭṭhānaṃ antaradīpakaṃ, yattha sakkā hoti dvīhipi tīhipi jaṅghasahassehi saddhiṃ nilīyituṃ. Pabbatavisamanti pabbatānaṃ visamaṭṭhānaṃ pabbatantaraṃ, yattha sakkā hoti sattahi vā aṭṭhahi vā jaṅghasahassehi saddhiṃ nilīyituṃ. Tiṇagahananti tiṇena vaḍḍhitvā sañchannaṃ dvattiyojanaṭṭhānaṃ. Rodhanti ghanaṃ aññamaññaṃ saṃsaṭṭhasākhaṃ ekābaddhaṃ mahāvanasaṇḍaṃ. Pariyodhāya atthaṃ bhaṇissantīti pariyodahitvā taṃ taṃ kāraṇaṃ pakkhipitvā atthaṃ kathayissanti. Tyāssāti te assa. Pariyodhāya atthaṃ bhaṇantīti kismiñci kiñci vattuṃ āraddheyeva ‘‘mā evaṃ avacuttha, mayaṃ etaṃ kulaparamparāya jānāma, na esa evarūpaṃ karissatī’’ti taṃ taṃ kāraṇaṃ pakkhipitvā mahantampi dosaṃ harantā atthaṃ bhaṇanti. Atha vā pariyodhāyāti paṭicchādetvātipi attho. Te hi tassapi dosaṃ paṭicchādetvā atthaṃ bhaṇanti. Khataṃ upahatanti guṇakhananena khataṃ, guṇupaghātena upahataṃ. Visamena kāyakammenāti sampakkhalanaṭṭhena visamena kāyadvārikakammena. Vacīmanokammesupi eseva nayo. Antaggāhikāyāti dasavatthukāya antaṃ gahetvā ṭhitadiṭṭhiyā. Sesaṃ sabbattha uttānatthamevāti.
சூளவக்³கோ³ பஞ்சமோ.
Cūḷavaggo pañcamo.
பட²மபண்ணாஸகங் நிட்டி²தங்.
Paṭhamapaṇṇāsakaṃ niṭṭhitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 11. மஹாசோரஸுத்தங் • 11. Mahācorasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 11. மஹாசோரஸுத்தவண்ணனா • 11. Mahācorasuttavaṇṇanā
