| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၄. မဟာစုန္ဒသုတ္တံ
4. Mahācundasuttaṃ
၂၄. ဧကံ သမယံ အာယသ္မာ မဟာစုန္ဒော စေတီသု ဝိဟရတိ သဟဇာတိယံ။ တတ္ရ ခော အာယသ္မာ မဟာစုန္ဒော ဘိက္ခူ အာမန္တေသိ – ‘‘အာဝုသော ဘိက္ခဝေ’’တိ။ ‘‘အာဝုသော’’တိ ခော တေ ဘိက္ခူ အာယသ္မတော မဟာစုန္ဒသ္သ ပစ္စသ္သောသုံ။ အာယသ္မာ မဟာစုန္ဒော ဧတဒဝောစ –
24. Ekaṃ samayaṃ āyasmā mahācundo cetīsu viharati sahajātiyaṃ. Tatra kho āyasmā mahācundo bhikkhū āmantesi – ‘‘āvuso bhikkhave’’ti. ‘‘Āvuso’’ti kho te bhikkhū āyasmato mahācundassa paccassosuṃ. Āyasmā mahācundo etadavoca –
‘‘ဉာဏဝာဒံ, အာဝုသော, ဘိက္ခု ဝဒမာနော – ‘ဇာနာမိမံ ဓမ္မံ, ပသ္သာမိမံ ဓမ္မ’န္တိ။ တဉ္စေ, အာဝုသော, ဘိက္ခုံ လောဘော အဘိဘုယ္ယ တိဋ္ဌတိ, ဒောသော။ မောဟော ။ ကောဓော။ ဥပနာဟော။ မက္ခော။ ပဠာသော။ မစ္ဆရိယံ။ ပာပိကာ ဣသ္သာ။ ပာပိကာ ဣစ္ဆာ အဘိဘုယ္ယ တိဋ္ဌတိ, သော ဧဝမသ္သ ဝေဒိတဗ္ဗော – ‘နာယမာယသ္မာ တထာ ပဇာနာတိ ယထာ ပဇာနတော လောဘော န ဟောတိ, တထာဟိမံ အာယသ္မန္တံ လောဘော အဘိဘုယ္ယ တိဋ္ဌတိ; နာယမာယသ္မာ တထာ ပဇာနာတိ ယထာ ပဇာနတော ဒောသော န ဟောတိ။ မောဟော။ ကောဓော။ ဥပနာဟော။ မက္ခော။ ပဠာသော။ မစ္ဆရိယံ။ ပာပိကာ ဣသ္သာ။ ပာပိကာ ဣစ္ဆာ န ဟောတိ, တထာဟိမံ အာယသ္မန္တံ ပာပိကာ ဣစ္ဆာ အဘိဘုယ္ယ တိဋ္ဌတီ’တိ။
‘‘Ñāṇavādaṃ, āvuso, bhikkhu vadamāno – ‘jānāmimaṃ dhammaṃ, passāmimaṃ dhamma’nti. Tañce, āvuso, bhikkhuṃ lobho abhibhuyya tiṭṭhati, doso… moho … kodho… upanāho… makkho… paḷāso… macchariyaṃ… pāpikā issā… pāpikā icchā abhibhuyya tiṭṭhati, so evamassa veditabbo – ‘nāyamāyasmā tathā pajānāti yathā pajānato lobho na hoti, tathāhimaṃ āyasmantaṃ lobho abhibhuyya tiṭṭhati; nāyamāyasmā tathā pajānāti yathā pajānato doso na hoti… moho… kodho… upanāho… makkho… paḷāso… macchariyaṃ… pāpikā issā… pāpikā icchā na hoti, tathāhimaṃ āyasmantaṃ pāpikā icchā abhibhuyya tiṭṭhatī’ti.
‘‘ဘာဝနာဝာဒံ, အာဝုသော, ဘိက္ခု ဝဒမာနော – ‘ဘာဝိတကာယောမ္ဟိ ဘာဝိတသီလော ဘာဝိတစိတ္တော ဘာဝိတပညော’တိ။ တဉ္စေ, အာဝုသော, ဘိက္ခုံ လောဘော အဘိဘုယ္ယ တိဋ္ဌတိ, ဒောသော။ မောဟော။ ကောဓော။ ဥပနာဟော။ မက္ခော။ ပဠာသော။ မစ္ဆရိယံ။ ပာပိကာ ဣသ္သာ။ ပာပိကာ ဣစ္ဆာ အဘိဘုယ္ယ တိဋ္ဌတိ, သော ဧဝမသ္သ ဝေဒိတဗ္ဗော – ‘နာယမာယသ္မာ တထာ ပဇာနာတိ ယထာ ပဇာနတော လောဘော န ဟောတိ, တထာဟိမံ အာယသ္မန္တံ လောဘော အဘိဘုယ္ယ တိဋ္ဌတိ; နာယမာယသ္မာ တထာ ပဇာနာတိ ယထာ ပဇာနတော ဒောသော န ဟောတိ။ မောဟော။ ကောဓော။ ဥပနာဟော။ မက္ခော။ ပဠာသော ။ မစ္ဆရိယံ။ ပာပိကာ ဣသ္သာ။ ပာပိကာ ဣစ္ဆာ န ဟောတိ, တထာဟိမံ အာယသ္မန္တံ ပာပိကာ ဣစ္ဆာ အဘိဘုယ္ယ တိဋ္ဌတီ’တိ။
‘‘Bhāvanāvādaṃ, āvuso, bhikkhu vadamāno – ‘bhāvitakāyomhi bhāvitasīlo bhāvitacitto bhāvitapañño’ti. Tañce, āvuso, bhikkhuṃ lobho abhibhuyya tiṭṭhati, doso… moho… kodho… upanāho… makkho… paḷāso… macchariyaṃ… pāpikā issā… pāpikā icchā abhibhuyya tiṭṭhati, so evamassa veditabbo – ‘nāyamāyasmā tathā pajānāti yathā pajānato lobho na hoti, tathāhimaṃ āyasmantaṃ lobho abhibhuyya tiṭṭhati; nāyamāyasmā tathā pajānāti yathā pajānato doso na hoti… moho… kodho… upanāho… makkho… paḷāso … macchariyaṃ… pāpikā issā… pāpikā icchā na hoti, tathāhimaṃ āyasmantaṃ pāpikā icchā abhibhuyya tiṭṭhatī’ti.
‘‘ဉာဏဝာဒဉ္စ, အာဝုသော, ဘိက္ခု ဝဒမာနော ဘာဝနာဝာဒဉ္စ – ‘ဇာနာမိမံ ဓမ္မံ, ပသ္သာမိမံ ဓမ္မံ, ဘာဝိတကာယောမ္ဟိ ဘာဝိတသီလော ဘာဝိတစိတ္တော ဘာဝိတပညော’တိ။ တဉ္စေ, အာဝုသော, ဘိက္ခုံ လောဘော အဘိဘုယ္ယ တိဋ္ဌတိ, ဒောသော။ မောဟော။ ကောဓော။ ဥပနာဟော။ မက္ခော။ ပဠာသော။ မစ္ဆရိယံ။ ပာပိကာ ဣသ္သာ။ ပာပိကာ ဣစ္ဆာ အဘိဘုယ္ယ တိဋ္ဌတိ, သော ဧဝမသ္သ ဝေဒိတဗ္ဗော – ‘နာယမာယသ္မာ တထာ ပဇာနာတိ ယထာ ပဇာနတော လောဘော န ဟောတိ, တထာဟိမံ အာယသ္မန္တံ လောဘော အဘိဘုယ္ယ တိဋ္ဌတိ; နာယမာယသ္မာ တထာ ပဇာနာတိ ယထာ ပဇာနတော ဒောသော န ဟောတိ။ မောဟော။ ကောဓော။ ဥပနာဟော။ မက္ခော။ ပဠာသော။ မစ္ဆရိယံ။ ပာပိကာ ဣသ္သာ။ ပာပိကာ ဣစ္ဆာ န ဟောတိ, တထာဟိမံ အာယသ္မန္တံ ပာပိကာ ဣစ္ဆာ အဘိဘုယ္ယ တိဋ္ဌတီ’တိ။
‘‘Ñāṇavādañca, āvuso, bhikkhu vadamāno bhāvanāvādañca – ‘jānāmimaṃ dhammaṃ, passāmimaṃ dhammaṃ, bhāvitakāyomhi bhāvitasīlo bhāvitacitto bhāvitapañño’ti. Tañce, āvuso, bhikkhuṃ lobho abhibhuyya tiṭṭhati, doso… moho… kodho… upanāho… makkho… paḷāso… macchariyaṃ… pāpikā issā… pāpikā icchā abhibhuyya tiṭṭhati, so evamassa veditabbo – ‘nāyamāyasmā tathā pajānāti yathā pajānato lobho na hoti, tathāhimaṃ āyasmantaṃ lobho abhibhuyya tiṭṭhati; nāyamāyasmā tathā pajānāti yathā pajānato doso na hoti… moho… kodho… upanāho… makkho… paḷāso… macchariyaṃ… pāpikā issā… pāpikā icchā na hoti, tathāhimaṃ āyasmantaṃ pāpikā icchā abhibhuyya tiṭṭhatī’ti.
‘‘သေယ္ယထာပိ , အာဝုသော, ပုရိသော ဒလိဒ္ဒောဝ သမာနော အဍ္ဎဝာဒံ ဝဒေယ္ယ, အဓနောဝ သမာနော ဓနဝာဝာဒံ ဝဒေယ္ယ, အဘောဂောဝ သမာနော ဘောဂဝာဝာဒံ ဝဒေယ္ယ။ သော ကိသ္မိဉ္စိဒေဝ ဓနကရဏီယေ သမုပ္ပန္နေ န သက္ကုဏေယ္ယ ဥပနီဟာတုံ ဓနံ ဝာ ဓညံ ဝာ ရဇတံ ဝာ ဇာတရူပံ ဝာ။ တမေနံ ဧဝံ ဇာနေယ္ယုံ – ‘ဒလိဒ္ဒောဝ အယမာယသ္မာ သမာနော အဍ္ဎဝာဒံ ဝဒေတိ, အဓနောဝ အယမာယသ္မာ သမာနော ဓနဝာဝာဒံ ဝဒေတိ, အဘောဂဝာဝ အယမာယသ္မာ သမာနော ဘောဂဝာဝာဒံ ဝဒေတိ။ တံ ကိသ္သ ဟေတု? တထာ ဟိ အယမာယသ္မာ ကိသ္မိဉ္စိဒေဝ ဓနကရဏီယေ သမုပ္ပန္နေ န သက္ကောတိ ဥပနီဟာတုံ ဓနံ ဝာ ဓညံ ဝာ ရဇတံ ဝာ ဇာတရူပံ ဝာ’တိ။
‘‘Seyyathāpi , āvuso, puriso daliddova samāno aḍḍhavādaṃ vadeyya, adhanova samāno dhanavāvādaṃ vadeyya, abhogova samāno bhogavāvādaṃ vadeyya. So kismiñcideva dhanakaraṇīye samuppanne na sakkuṇeyya upanīhātuṃ dhanaṃ vā dhaññaṃ vā rajataṃ vā jātarūpaṃ vā. Tamenaṃ evaṃ jāneyyuṃ – ‘daliddova ayamāyasmā samāno aḍḍhavādaṃ vadeti, adhanova ayamāyasmā samāno dhanavāvādaṃ vadeti, abhogavāva ayamāyasmā samāno bhogavāvādaṃ vadeti. Taṃ kissa hetu? Tathā hi ayamāyasmā kismiñcideva dhanakaraṇīye samuppanne na sakkoti upanīhātuṃ dhanaṃ vā dhaññaṃ vā rajataṃ vā jātarūpaṃ vā’ti.
‘‘ဧဝမေဝံ ခော, အာဝုသော, ဉာဏဝာဒဉ္စ ဘိက္ခု ဝဒမာနော ဘာဝနာဝာဒဉ္စ – ‘ဇာနာမိမံ ဓမ္မံ, ပသ္သာမိမံ ဓမ္မံ, ဘာဝိတကာယောမ္ဟိ ဘာဝိတသီလော ဘာဝိတစိတ္တော ဘာဝိတပညော’တိ။ တံ စေ, အာဝုသော, ဘိက္ခုံ လောဘော အဘိဘုယ္ယ တိဋ္ဌတိ, ဒောသော။ မောဟော။ ကောဓော။ ဥပနာဟော။ မက္ခော။ ပဠာသော။ မစ္ဆရိယံ။ ပာပိကာ ဣသ္သာ။ ပာပိကာ ဣစ္ဆာ အဘိဘုယ္ယ တိဋ္ဌတိ, သော ဧဝမသ္သ ဝေဒိတဗ္ဗော – ‘နာယမာယသ္မာ တထာ ပဇာနာတိ ယထာ ပဇာနတော လောဘော န ဟောတိ, တထာဟိမံ အာယသ္မန္တံ လောဘော အဘိဘုယ္ယ တိဋ္ဌတိ; နာယမာယသ္မာ တထာ ပဇာနာတိ ယထာ ပဇာနတော ဒောသော န ဟောတိ။ မောဟော။ ကောဓော။ ဥပနာဟော။ မက္ခော။ ပဠာသော။ မစ္ဆရိယံ။ ပာပိကာ ဣသ္သာ ။ ပာပိကာ ဣစ္ဆာ န ဟောတိ, တထာဟိမံ အာယသ္မန္တံ ပာပိကာ ဣစ္ဆာ အဘိဘုယ္ယ တိဋ္ဌတီ’တိ။
‘‘Evamevaṃ kho, āvuso, ñāṇavādañca bhikkhu vadamāno bhāvanāvādañca – ‘jānāmimaṃ dhammaṃ, passāmimaṃ dhammaṃ, bhāvitakāyomhi bhāvitasīlo bhāvitacitto bhāvitapañño’ti. Taṃ ce, āvuso, bhikkhuṃ lobho abhibhuyya tiṭṭhati, doso… moho… kodho… upanāho… makkho… paḷāso… macchariyaṃ… pāpikā issā… pāpikā icchā abhibhuyya tiṭṭhati, so evamassa veditabbo – ‘nāyamāyasmā tathā pajānāti yathā pajānato lobho na hoti, tathāhimaṃ āyasmantaṃ lobho abhibhuyya tiṭṭhati; nāyamāyasmā tathā pajānāti yathā pajānato doso na hoti… moho… kodho… upanāho… makkho… paḷāso… macchariyaṃ… pāpikā issā … pāpikā icchā na hoti, tathāhimaṃ āyasmantaṃ pāpikā icchā abhibhuyya tiṭṭhatī’ti.
‘‘ဉာဏဝာဒံ, အာဝုသော, ဘိက္ခု ဝဒမာနော – ‘ဇာနာမိမံ ဓမ္မံ, ပသ္သာမိမံ ဓမ္မ’န္တိ။ တဉ္စေ, အာဝုသော, ဘိက္ခုံ လောဘော နာဘိဘုယ္ယ တိဋ္ဌတိ, ဒောသော။ မောဟော။ ကောဓော။ ဥပနာဟော။ မက္ခော။ ပဠာသော။ မစ္ဆရိယံ။ ပာပိကာ ဣသ္သာ။ ပာပိကာ ဣစ္ဆာ နာဘိဘုယ္ယ တိဋ္ဌတိ, သော ဧဝမသ္သ ဝေဒိတဗ္ဗော – ‘အယမာယသ္မာ တထာ ပဇာနာတိ ယထာ ပဇာနတော လောဘော န ဟောတိ, တထာဟိမံ အာယသ္မန္တံ လောဘော နာဘိဘုယ္ယ တိဋ္ဌတိ; တထာ အယမာယသ္မာ ပဇာနာတိ ယထာ ပဇာနတော ဒောသော န ဟောတိ။ မောဟော။ ကောဓော။ ဥပနာဟော။ မက္ခော။ ပဠာသော။ မစ္ဆရိယံ။ ပာပိကာ ဣသ္သာ။ ပာပိကာ ဣစ္ဆာ န ဟောတိ, တထာဟိမံ အာယသ္မန္တံ ပာပိကာ ဣစ္ဆာ နာဘိဘုယ္ယ တိဋ္ဌတီ’တိ။
‘‘Ñāṇavādaṃ, āvuso, bhikkhu vadamāno – ‘jānāmimaṃ dhammaṃ, passāmimaṃ dhamma’nti. Tañce, āvuso, bhikkhuṃ lobho nābhibhuyya tiṭṭhati, doso… moho… kodho… upanāho… makkho… paḷāso… macchariyaṃ… pāpikā issā… pāpikā icchā nābhibhuyya tiṭṭhati, so evamassa veditabbo – ‘ayamāyasmā tathā pajānāti yathā pajānato lobho na hoti, tathāhimaṃ āyasmantaṃ lobho nābhibhuyya tiṭṭhati; tathā ayamāyasmā pajānāti yathā pajānato doso na hoti… moho… kodho… upanāho… makkho… paḷāso… macchariyaṃ… pāpikā issā… pāpikā icchā na hoti, tathāhimaṃ āyasmantaṃ pāpikā icchā nābhibhuyya tiṭṭhatī’ti.
‘‘ဘာဝနာဝာဒံ , အာဝုသော, ဘိက္ခု ဝဒမာနော – ‘ဘာဝိတကာယောမ္ဟိ ဘာဝိတသီလော ဘာဝိတစိတ္တော ဘာဝိတပညော’တိ။ တဉ္စေ, အာဝုသော, ဘိက္ခုံ လောဘော နာဘိဘုယ္ယ တိဋ္ဌတိ, ဒောသော။ မောဟော။ ကောဓော။ ဥပနာဟော။ မက္ခော။ ပဠာသော။ မစ္ဆရိယံ။ ပာပိကာ ဣသ္သာ။ ပာပိကာ ဣစ္ဆာ နာဘိဘုယ္ယ တိဋ္ဌတိ, သော ဧဝမသ္သ ဝေဒိတဗ္ဗော – ‘တထာ အယမာယသ္မာ ပဇာနာတိ ယထာ ပဇာနတော လောဘော န ဟောတိ, တထာဟိမံ အာယသ္မန္တံ လောဘော နာဘိဘုယ္ယ တိဋ္ဌတိ; တထာ အယမာယသ္မာ ပဇာနာတိ ယထာ ပဇာနတော ဒောသော န ဟောတိ။ မောဟော။ ကောဓော။ ဥပနာဟော။ မက္ခော။ ပဠာသော။ မစ္ဆရိယံ။ ပာပိကာ ဣသ္သာ။ ပာပိကာ ဣစ္ဆာ န ဟောတိ, တထာဟိမံ အာယသ္မန္တံ ပာပိကာ ဣစ္ဆာ နာဘိဘုယ္ယ တိဋ္ဌတီ’တိ။
‘‘Bhāvanāvādaṃ , āvuso, bhikkhu vadamāno – ‘bhāvitakāyomhi bhāvitasīlo bhāvitacitto bhāvitapañño’ti. Tañce, āvuso, bhikkhuṃ lobho nābhibhuyya tiṭṭhati, doso… moho… kodho… upanāho… makkho… paḷāso… macchariyaṃ… pāpikā issā… pāpikā icchā nābhibhuyya tiṭṭhati, so evamassa veditabbo – ‘tathā ayamāyasmā pajānāti yathā pajānato lobho na hoti, tathāhimaṃ āyasmantaṃ lobho nābhibhuyya tiṭṭhati; tathā ayamāyasmā pajānāti yathā pajānato doso na hoti… moho… kodho… upanāho… makkho… paḷāso… macchariyaṃ… pāpikā issā… pāpikā icchā na hoti, tathāhimaṃ āyasmantaṃ pāpikā icchā nābhibhuyya tiṭṭhatī’ti.
‘‘ဉာဏဝာဒဉ္စ, အာဝုသော, ဘိက္ခု ဝဒမာနော ဘာဝနာဝာဒဉ္စ – ‘ဇာနာမိမံ ဓမ္မံ, ပသ္သာမိမံ ဓမ္မံ, ဘာဝိတကာယောမ္ဟိ ဘာဝိတသီလော ဘာဝိတစိတ္တော ဘာဝိတပညော’တိ။ တဉ္စေ, အာဝုသော, ဘိက္ခုံ လောဘော နာဘိဘုယ္ယ တိဋ္ဌတိ, ဒောသော။ မောဟော။ ကောဓော။ ဥပနာဟော။ မက္ခော။ ပဠာသော။ မစ္ဆရိယံ။ ပာပိကာ ဣသ္သာ။ ပာပိကာ ဣစ္ဆာ နာဘိဘုယ္ယ တိဋ္ဌတိ, သော ဧဝမသ္သ ဝေဒိတဗ္ဗော – ‘တထာ အယမာယသ္မာ ပဇာနာတိ ယထာ ပဇာနတော လောဘော န ဟောတိ, တထာဟိမံ အာယသ္မန္တံ လောဘော နာဘိဘုယ္ယ တိဋ္ဌတိ; တထာ အယမာယသ္မာ ပဇာနာတိ ယထာ ပဇာနတော ဒောသော ဟောတိ။ မောဟော။ ကောဓော။ ဥပနာဟော။ မက္ခော။ ပဠာသော။ မစ္ဆရိယံ။ ပာပိကာ ဣသ္သာ။ ပာပိကာ ဣစ္ဆာ န ဟောတိ, တထာဟိမံ အာယသ္မန္တံ ပာပိကာ ဣစ္ဆာ နာဘိဘုယ္ယ တိဋ္ဌတီ’တိ။
‘‘Ñāṇavādañca, āvuso, bhikkhu vadamāno bhāvanāvādañca – ‘jānāmimaṃ dhammaṃ, passāmimaṃ dhammaṃ, bhāvitakāyomhi bhāvitasīlo bhāvitacitto bhāvitapañño’ti. Tañce, āvuso, bhikkhuṃ lobho nābhibhuyya tiṭṭhati, doso… moho… kodho… upanāho… makkho… paḷāso… macchariyaṃ… pāpikā issā… pāpikā icchā nābhibhuyya tiṭṭhati, so evamassa veditabbo – ‘tathā ayamāyasmā pajānāti yathā pajānato lobho na hoti, tathāhimaṃ āyasmantaṃ lobho nābhibhuyya tiṭṭhati; tathā ayamāyasmā pajānāti yathā pajānato doso hoti… moho… kodho… upanāho… makkho… paḷāso… macchariyaṃ… pāpikā issā… pāpikā icchā na hoti, tathāhimaṃ āyasmantaṃ pāpikā icchā nābhibhuyya tiṭṭhatī’ti.
‘‘သေယ္ယထာပိ , အာဝုသော, ပုရိသော အဍ္ဎောဝ သမာနော အဍ္ဎဝာဒံ ဝဒေယ္ယ, ဓနဝာဝ သမာနော ဓနဝာဝာဒံ ဝဒေယ္ယ, ဘောဂဝာဝ သမာနော ဘောဂဝာဝာဒံ ဝဒေယ္ယ။ သော ကိသ္မိဉ္စိဒေဝ ဓနကရဏီယေ သမုပ္ပန္နေ သက္ကုဏေယ္ယ ဥပနီဟာတုံ ဓနံ ဝာ ဓညံ ဝာ ရဇတံ ဝာ ဇာတရူပံ ဝာ။ တမေနံ ဧဝံ ဇာနေယ္ယုံ – ‘အဍ္ဎောဝ အယမာယသ္မာ သမာနော အဍ္ဎဝာဒံ ဝဒေတိ, ဓနဝာဝ အယမာယသ္မာ သမာနော ဓနဝာဝာဒံ ဝဒေတိ, ဘောဂဝာဝ အယမာယသ္မာ သမာနော ဘောဂဝာဝာဒံ ဝဒေတိ။ တံ ကိသ္သ ဟေတု? တထာ ဟိ အယမာယသ္မာ ကိသ္မိဉ္စိဒေဝ ဓနကရဏီယေ သမုပ္ပန္နေ သက္ကောတိ ဥပနီဟာတုံ ဓနံ ဝာ ဓညံ ဝာ ရဇတံ ဝာ ဇာတရူပံ ဝာ’တိ။
‘‘Seyyathāpi , āvuso, puriso aḍḍhova samāno aḍḍhavādaṃ vadeyya, dhanavāva samāno dhanavāvādaṃ vadeyya, bhogavāva samāno bhogavāvādaṃ vadeyya. So kismiñcideva dhanakaraṇīye samuppanne sakkuṇeyya upanīhātuṃ dhanaṃ vā dhaññaṃ vā rajataṃ vā jātarūpaṃ vā. Tamenaṃ evaṃ jāneyyuṃ – ‘aḍḍhova ayamāyasmā samāno aḍḍhavādaṃ vadeti, dhanavāva ayamāyasmā samāno dhanavāvādaṃ vadeti, bhogavāva ayamāyasmā samāno bhogavāvādaṃ vadeti. Taṃ kissa hetu? Tathā hi ayamāyasmā kismiñcideva dhanakaraṇīye samuppanne sakkoti upanīhātuṃ dhanaṃ vā dhaññaṃ vā rajataṃ vā jātarūpaṃ vā’ti.
ဧဝမေဝံ ခော, အာဝုသော, ဉာဏဝာဒဉ္စ ဘိက္ခု ဝဒမာနော ဘာဝနာဝာဒဉ္စ – ‘ဇာနာမိမံ ဓမ္မံ, ပသ္သာမိမံ ဓမ္မံ, ဘာဝိတကာယောမ္ဟိ ဘာဝိတသီလော ဘာဝိတစိတ္တော ဘာဝိတပညော’တိ။ တဉ္စေ, အာဝုသော, ဘိက္ခုံ လောဘော နာဘိဘုယ္ယ တိဋ္ဌတိ, ဒောသော။ မောဟော။ ကောဓော။ ဥပနာဟော။ မက္ခော။ ပဠာသော။ မစ္ဆရိယံ။ ပာပိကာ ဣသ္သာ။ ပာပိကာ ဣစ္ဆာ နာဘိဘုယ္ယ တိဋ္ဌတိ, သော ဧဝမသ္သ ဝေဒိတဗ္ဗော – ‘တထာ အယမာယသ္မာ ပဇာနာတိ ယထာ ပဇာနတော လောဘော န ဟောတိ, တထာဟိမံ အာယသ္မန္တံ လောဘော နာဘိဘုယ္ယ တိဋ္ဌတိ; တထာ အယမာယသ္မာ ပဇာနာတိ ယထာ ပဇာနတော ဒောသော န ဟောတိ။ မောဟော။ ကောဓော။ ဥပနာဟော။ မက္ခော။ ပဠာသော။ မစ္ဆရိယံ။ ပာပိကာ ဣသ္သာ။ ပာပိကာ ဣစ္ဆာ န ဟောတိ, တထာဟိမံ အာယသ္မန္တံ ပာပိကာ ဣစ္ဆာ နာဘိဘုယ္ယ တိဋ္ဌတီ’’’တိ။ စတုတ္ထံ။
Evamevaṃ kho, āvuso, ñāṇavādañca bhikkhu vadamāno bhāvanāvādañca – ‘jānāmimaṃ dhammaṃ, passāmimaṃ dhammaṃ, bhāvitakāyomhi bhāvitasīlo bhāvitacitto bhāvitapañño’ti. Tañce, āvuso, bhikkhuṃ lobho nābhibhuyya tiṭṭhati, doso… moho… kodho… upanāho… makkho… paḷāso… macchariyaṃ… pāpikā issā… pāpikā icchā nābhibhuyya tiṭṭhati, so evamassa veditabbo – ‘tathā ayamāyasmā pajānāti yathā pajānato lobho na hoti, tathāhimaṃ āyasmantaṃ lobho nābhibhuyya tiṭṭhati; tathā ayamāyasmā pajānāti yathā pajānato doso na hoti… moho… kodho… upanāho… makkho… paḷāso… macchariyaṃ… pāpikā issā… pāpikā icchā na hoti, tathāhimaṃ āyasmantaṃ pāpikā icchā nābhibhuyya tiṭṭhatī’’’ti. Catutthaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၄. မဟာစုန္ဒသုတ္တဝဏ္ဏနာ • 4. Mahācundasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၂-၄. အဓိဝုတ္တိပဒသုတ္တာဒိဝဏ္ဏနာ • 2-4. Adhivuttipadasuttādivaṇṇanā
