| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೪. ಮಹಾಚುನ್ದಸುತ್ತಂ
4. Mahācundasuttaṃ
೪೬. ಏವಂ ಮೇ ಸುತಂ – ಏಕಂ ಸಮಯಂ ಆಯಸ್ಮಾ ಮಹಾಚುನ್ದೋ ಚೇತೀಸು ವಿಹರತಿ ಸಯಂಜಾತಿಯಂ 1। ತತ್ರ ಖೋ ಆಯಸ್ಮಾ ಮಹಾಚುನ್ದೋ ಭಿಕ್ಖೂ ಆಮನ್ತೇಸಿ – ‘‘ಆವುಸೋ ಭಿಕ್ಖವೇ’’ತಿ। ‘‘ಆವುಸೋ’’ತಿ ಖೋ ತೇ ಭಿಕ್ಖೂ ಆಯಸ್ಮತೋ ಮಹಾಚುನ್ದಸ್ಸ ಪಚ್ಚಸ್ಸೋಸುಂ। ಆಯಸ್ಮಾ ಮಹಾಚುನ್ದೋ ಏತದವೋಚ –
46. Evaṃ me sutaṃ – ekaṃ samayaṃ āyasmā mahācundo cetīsu viharati sayaṃjātiyaṃ 2. Tatra kho āyasmā mahācundo bhikkhū āmantesi – ‘‘āvuso bhikkhave’’ti. ‘‘Āvuso’’ti kho te bhikkhū āyasmato mahācundassa paccassosuṃ. Āyasmā mahācundo etadavoca –
‘‘ಇಧಾವುಸೋ, ಧಮ್ಮಯೋಗಾ ಭಿಕ್ಖೂ ಝಾಯೀ ಭಿಕ್ಖೂ ಅಪಸಾದೇನ್ತಿ – ‘ಇಮೇ ಪನ ಝಾಯಿನೋಮ್ಹಾ, ಝಾಯಿನೋಮ್ಹಾತಿ ಝಾಯನ್ತಿ ಪಜ್ಝಾಯನ್ತಿ ನಿಜ್ಝಾಯನ್ತಿ ಅವಜ್ಝಾಯನ್ತಿ 3। ಕಿಮಿಮೇ 4 ಝಾಯನ್ತಿ, ಕಿನ್ತಿಮೇ ಝಾಯನ್ತಿ, ಕಥಂ ಇಮೇ ಝಾಯನ್ತೀ’ತಿ? ತತ್ಥ ಧಮ್ಮಯೋಗಾ ಚ ಭಿಕ್ಖೂ ನಪ್ಪಸೀದನ್ತಿ, ಝಾಯೀ ಚ ಭಿಕ್ಖೂ ನಪ್ಪಸೀದನ್ತಿ, ನ ಚ ಬಹುಜನಹಿತಾಯ ಪಟಿಪನ್ನಾ ಹೋನ್ತಿ ಬಹುಜನಸುಖಾಯ ಬಹುನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ।
‘‘Idhāvuso, dhammayogā bhikkhū jhāyī bhikkhū apasādenti – ‘ime pana jhāyinomhā, jhāyinomhāti jhāyanti pajjhāyanti nijjhāyanti avajjhāyanti 5. Kimime 6 jhāyanti, kintime jhāyanti, kathaṃ ime jhāyantī’ti? Tattha dhammayogā ca bhikkhū nappasīdanti, jhāyī ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘ಇಧ ಪನಾವುಸೋ, ಝಾಯೀ ಭಿಕ್ಖೂ ಧಮ್ಮಯೋಗೇ ಭಿಕ್ಖೂ ಅಪಸಾದೇನ್ತಿ – ‘ಇಮೇ ಪನ ಧಮ್ಮಯೋಗಮ್ಹಾ, ಧಮ್ಮಯೋಗಮ್ಹಾತಿ ಉದ್ಧತಾ ಉನ್ನಳಾ ಚಪಲಾ ಮುಖರಾ ವಿಕಿಣ್ಣವಾಚಾ ಮುಟ್ಠಸ್ಸತೀ ಅಸಮ್ಪಜಾನಾ ಅಸಮಾಹಿತಾ ವಿಬ್ಭನ್ತಚಿತ್ತಾ ಪಾಕತಿನ್ದ್ರಿಯಾ। ಕಿಮಿಮೇ ಧಮ್ಮಯೋಗಾ, ಕಿನ್ತಿಮೇ ಧಮ್ಮಯೋಗಾ, ಕಥಂ ಇಮೇ ಧಮ್ಮಯೋಗಾ’ತಿ? ತತ್ಥ ಝಾಯೀ ಚ ಭಿಕ್ಖೂ ನಪ್ಪಸೀದನ್ತಿ, ಧಮ್ಮಯೋಗಾ ಚ ಭಿಕ್ಖೂ ನಪ್ಪಸೀದನ್ತಿ, ನ ಚ ಬಹುಜನಹಿತಾಯ ಪಟಿಪನ್ನಾ ಹೋನ್ತಿ ಬಹುಜನಸುಖಾಯ ಬಹುನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ।
‘‘Idha panāvuso, jhāyī bhikkhū dhammayoge bhikkhū apasādenti – ‘ime pana dhammayogamhā, dhammayogamhāti uddhatā unnaḷā capalā mukharā vikiṇṇavācā muṭṭhassatī asampajānā asamāhitā vibbhantacittā pākatindriyā. Kimime dhammayogā, kintime dhammayogā, kathaṃ ime dhammayogā’ti? Tattha jhāyī ca bhikkhū nappasīdanti, dhammayogā ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘ಇಧ ಪನಾವುಸೋ, ಧಮ್ಮಯೋಗಾ ಭಿಕ್ಖೂ ಧಮ್ಮಯೋಗಾನಞ್ಞೇವ ಭಿಕ್ಖೂನಂ ವಣ್ಣಂ ಭಾಸನ್ತಿ, ನೋ ಝಾಯೀನಂ ಭಿಕ್ಖೂನಂ ವಣ್ಣಂ ಭಾಸನ್ತಿ। ತತ್ಥ ಧಮ್ಮಯೋಗಾ ಚ ಭಿಕ್ಖೂ ನಪ್ಪಸೀದನ್ತಿ, ಝಾಯೀ ಚ ಭಿಕ್ಖೂ ನಪ್ಪಸೀದನ್ತಿ, ನ ಚ ಬಹುಜನಹಿತಾಯ ಪಟಿಪನ್ನಾ ಹೋನ್ತಿ ಬಹುಜನಸುಖಾಯ ಬಹುನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ।
‘‘Idha panāvuso, dhammayogā bhikkhū dhammayogānaññeva bhikkhūnaṃ vaṇṇaṃ bhāsanti, no jhāyīnaṃ bhikkhūnaṃ vaṇṇaṃ bhāsanti. Tattha dhammayogā ca bhikkhū nappasīdanti, jhāyī ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘ಇಧ ಪನಾವುಸೋ, ಝಾಯೀ ಭಿಕ್ಖೂ ಝಾಯೀನಞ್ಞೇವ ಭಿಕ್ಖೂನಂ ವಣ್ಣಂ ಭಾಸನ್ತಿ, ನೋ ಧಮ್ಮಯೋಗಾನಂ ಭಿಕ್ಖೂನಂ ವಣ್ಣಂ ಭಾಸನ್ತಿ। ತತ್ಥ ಝಾಯೀ ಚ ಭಿಕ್ಖೂ ನಪ್ಪಸೀದನ್ತಿ, ಧಮ್ಮಯೋಗಾ ಚ ಭಿಕ್ಖೂ ನಪ್ಪಸೀದನ್ತಿ, ನ ಚ ಬಹುಜನಹಿತಾಯ ಪಟಿಪನ್ನಾ ಹೋನ್ತಿ ಬಹುಜನಸುಖಾಯ ಬಹುನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ।
‘‘Idha panāvuso, jhāyī bhikkhū jhāyīnaññeva bhikkhūnaṃ vaṇṇaṃ bhāsanti, no dhammayogānaṃ bhikkhūnaṃ vaṇṇaṃ bhāsanti. Tattha jhāyī ca bhikkhū nappasīdanti, dhammayogā ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘ತಸ್ಮಾತಿಹಾವುಸೋ , ಏವಂ ಸಿಕ್ಖಿತಬ್ಬಂ – ‘ಧಮ್ಮಯೋಗಾ ಸಮಾನಾ ಝಾಯೀನಂ ಭಿಕ್ಖೂನಂ ವಣ್ಣಂ ಭಾಸಿಸ್ಸಾಮಾ’ತಿ। ಏವಞ್ಹಿ ವೋ, ಆವುಸೋ, ಸಿಕ್ಖಿತಬ್ಬಂ। ತಂ ಕಿಸ್ಸ ಹೇತು? ಅಚ್ಛರಿಯಾ ಹೇತೇ, ಆವುಸೋ, ಪುಗ್ಗಲಾ ದುಲ್ಲಭಾ ಲೋಕಸ್ಮಿಂ, ಯೇ ಅಮತಂ ಧಾತುಂ ಕಾಯೇನ ಫುಸಿತ್ವಾ ವಿಹರನ್ತಿ। ತಸ್ಮಾತಿಹಾವುಸೋ, ಏವಂ ಸಿಕ್ಖಿತಬ್ಬಂ – ‘ಝಾಯೀ ಸಮಾನಾ ಧಮ್ಮಯೋಗಾನಂ ಭಿಕ್ಖೂನಂ ವಣ್ಣಂ ಭಾಸಿಸ್ಸಾಮಾ’ತಿ। ಏವಞ್ಹಿ ವೋ, ಆವುಸೋ, ಸಿಕ್ಖಿತಬ್ಬಂ। ತಂ ಕಿಸ್ಸ ಹೇತು? ಅಚ್ಛರಿಯಾ ಹೇತೇ, ಆವುಸೋ, ಪುಗ್ಗಲಾ ದುಲ್ಲಭಾ ಲೋಕಸ್ಮಿಂ ಯೇ ಗಮ್ಭೀರಂ ಅತ್ಥಪದಂ ಪಞ್ಞಾಯ ಅತಿವಿಜ್ಝ ಪಸ್ಸನ್ತೀ’’ತಿ। ಚತುತ್ಥಂ।
‘‘Tasmātihāvuso , evaṃ sikkhitabbaṃ – ‘dhammayogā samānā jhāyīnaṃ bhikkhūnaṃ vaṇṇaṃ bhāsissāmā’ti. Evañhi vo, āvuso, sikkhitabbaṃ. Taṃ kissa hetu? Acchariyā hete, āvuso, puggalā dullabhā lokasmiṃ, ye amataṃ dhātuṃ kāyena phusitvā viharanti. Tasmātihāvuso, evaṃ sikkhitabbaṃ – ‘jhāyī samānā dhammayogānaṃ bhikkhūnaṃ vaṇṇaṃ bhāsissāmā’ti. Evañhi vo, āvuso, sikkhitabbaṃ. Taṃ kissa hetu? Acchariyā hete, āvuso, puggalā dullabhā lokasmiṃ ye gambhīraṃ atthapadaṃ paññāya ativijjha passantī’’ti. Catutthaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೪. ಮಹಾಚುನ್ದಸುತ್ತವಣ್ಣನಾ • 4. Mahācundasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೩-೬. ಇಣಸುತ್ತಾದಿವಣ್ಣನಾ • 3-6. Iṇasuttādivaṇṇanā
