| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
4. මහාචුන්‌දසුත්‌තං
4. Mahācundasuttaṃ
46. එවං මෙ සුතං – එකං සමයං ආයස්‌මා මහාචුන්‌දො චෙතීසු විහරති සයංජාතියං 1. තත්‍ර ඛො ආයස්‌මා මහාචුන්‌දො භික්‌ඛූ ආමන්‌තෙසි – ‘‘ආවුසො භික්‌ඛවෙ’’ති. ‘‘ආවුසො’’ති ඛො තෙ භික්‌ඛූ ආයස්‌මතො මහාචුන්‌දස්‌ස පච්‌චස්‌සොසුං. ආයස්‌මා මහාචුන්‌දො එතදවොච –
46. Evaṃ me sutaṃ – ekaṃ samayaṃ āyasmā mahācundo cetīsu viharati sayaṃjātiyaṃ 2. Tatra kho āyasmā mahācundo bhikkhū āmantesi – ‘‘āvuso bhikkhave’’ti. ‘‘Āvuso’’ti kho te bhikkhū āyasmato mahācundassa paccassosuṃ. Āyasmā mahācundo etadavoca –
‘‘ඉධාවුසො, ධම්‌මයොගා භික්‌ඛූ ඣායී භික්‌ඛූ අපසාදෙන්‌ති – ‘ඉමෙ පන ඣායිනොම්‌හා, ඣායිනොම්‌හාති ඣායන්‌ති පජ්‌ඣායන්‌ති නිජ්‌ඣායන්‌ති අවජ්‌ඣායන්‌ති 3. කිමිමෙ 4 ඣායන්‌ති, කින්‌තිමෙ ඣායන්‌ති, කථං ඉමෙ ඣායන්‌තී’ති? තත්‌ථ ධම්‌මයොගා ච භික්‌ඛූ නප්‌පසීදන්‌ති, ඣායී ච භික්‌ඛූ නප්‌පසීදන්‌ති, න ච බහුජනහිතාය පටිපන්‌නා හොන්‌ති බහුජනසුඛාය බහුනො ජනස්‌ස අත්‌ථාය හිතාය සුඛාය දෙවමනුස්‌සානං.
‘‘Idhāvuso, dhammayogā bhikkhū jhāyī bhikkhū apasādenti – ‘ime pana jhāyinomhā, jhāyinomhāti jhāyanti pajjhāyanti nijjhāyanti avajjhāyanti 5. Kimime 6 jhāyanti, kintime jhāyanti, kathaṃ ime jhāyantī’ti? Tattha dhammayogā ca bhikkhū nappasīdanti, jhāyī ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘ඉධ පනාවුසො, ඣායී භික්‌ඛූ ධම්‌මයොගෙ භික්‌ඛූ අපසාදෙන්‌ති – ‘ඉමෙ පන ධම්‌මයොගම්‌හා, ධම්‌මයොගම්‌හාති උද්‌ධතා උන්‌නළා චපලා මුඛරා විකිණ්‌ණවාචා මුට්‌ඨස්‌සතී අසම්‌පජානා අසමාහිතා විබ්‌භන්‌තචිත්‌තා පාකතින්‌ද්‍රියා. කිමිමෙ ධම්‌මයොගා, කින්‌තිමෙ ධම්‌මයොගා, කථං ඉමෙ ධම්‌මයොගා’ති? තත්‌ථ ඣායී ච භික්‌ඛූ නප්‌පසීදන්‌ති, ධම්‌මයොගා ච භික්‌ඛූ නප්‌පසීදන්‌ති, න ච බහුජනහිතාය පටිපන්‌නා හොන්‌ති බහුජනසුඛාය බහුනො ජනස්‌ස අත්‌ථාය හිතාය සුඛාය දෙවමනුස්‌සානං.
‘‘Idha panāvuso, jhāyī bhikkhū dhammayoge bhikkhū apasādenti – ‘ime pana dhammayogamhā, dhammayogamhāti uddhatā unnaḷā capalā mukharā vikiṇṇavācā muṭṭhassatī asampajānā asamāhitā vibbhantacittā pākatindriyā. Kimime dhammayogā, kintime dhammayogā, kathaṃ ime dhammayogā’ti? Tattha jhāyī ca bhikkhū nappasīdanti, dhammayogā ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘ඉධ පනාවුසො, ධම්‌මයොගා භික්‌ඛූ ධම්‌මයොගානඤ්‌ඤෙව භික්‌ඛූනං වණ්‌ණං භාසන්‌ති, නො ඣායීනං භික්‌ඛූනං වණ්‌ණං භාසන්‌ති. තත්‌ථ ධම්‌මයොගා ච භික්‌ඛූ නප්‌පසීදන්‌ති, ඣායී ච භික්‌ඛූ නප්‌පසීදන්‌ති, න ච බහුජනහිතාය පටිපන්‌නා හොන්‌ති බහුජනසුඛාය බහුනො ජනස්‌ස අත්‌ථාය හිතාය සුඛාය දෙවමනුස්‌සානං.
‘‘Idha panāvuso, dhammayogā bhikkhū dhammayogānaññeva bhikkhūnaṃ vaṇṇaṃ bhāsanti, no jhāyīnaṃ bhikkhūnaṃ vaṇṇaṃ bhāsanti. Tattha dhammayogā ca bhikkhū nappasīdanti, jhāyī ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘ඉධ පනාවුසො, ඣායී භික්‌ඛූ ඣායීනඤ්‌ඤෙව භික්‌ඛූනං වණ්‌ණං භාසන්‌ති, නො ධම්‌මයොගානං භික්‌ඛූනං වණ්‌ණං භාසන්‌ති. තත්‌ථ ඣායී ච භික්‌ඛූ නප්‌පසීදන්‌ති, ධම්‌මයොගා ච භික්‌ඛූ නප්‌පසීදන්‌ති, න ච බහුජනහිතාය පටිපන්‌නා හොන්‌ති බහුජනසුඛාය බහුනො ජනස්‌ස අත්‌ථාය හිතාය සුඛාය දෙවමනුස්‌සානං.
‘‘Idha panāvuso, jhāyī bhikkhū jhāyīnaññeva bhikkhūnaṃ vaṇṇaṃ bhāsanti, no dhammayogānaṃ bhikkhūnaṃ vaṇṇaṃ bhāsanti. Tattha jhāyī ca bhikkhū nappasīdanti, dhammayogā ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘තස්‌මාතිහාවුසො , එවං සික්‌ඛිතබ්‌බං – ‘ධම්‌මයොගා සමානා ඣායීනං භික්‌ඛූනං වණ්‌ණං භාසිස්‌සාමා’ති. එවඤ්‌හි වො, ආවුසො, සික්‌ඛිතබ්‌බං. තං කිස්‌ස හෙතු? අච්‌ඡරියා හෙතෙ, ආවුසො, පුග්‌ගලා දුල්‌ලභා ලොකස්‌මිං, යෙ අමතං ධාතුං කායෙන ඵුසිත්‌වා විහරන්‌ති. තස්‌මාතිහාවුසො, එවං සික්‌ඛිතබ්‌බං – ‘ඣායී සමානා ධම්‌මයොගානං භික්‌ඛූනං වණ්‌ණං භාසිස්‌සාමා’ති. එවඤ්‌හි වො, ආවුසො, සික්‌ඛිතබ්‌බං. තං කිස්‌ස හෙතු? අච්‌ඡරියා හෙතෙ, ආවුසො, පුග්‌ගලා දුල්‌ලභා ලොකස්‌මිං යෙ ගම්‌භීරං අත්‌ථපදං පඤ්‌ඤාය අතිවිජ්‌ඣ පස්‌සන්‌තී’’ති. චතුත්‌ථං.
‘‘Tasmātihāvuso , evaṃ sikkhitabbaṃ – ‘dhammayogā samānā jhāyīnaṃ bhikkhūnaṃ vaṇṇaṃ bhāsissāmā’ti. Evañhi vo, āvuso, sikkhitabbaṃ. Taṃ kissa hetu? Acchariyā hete, āvuso, puggalā dullabhā lokasmiṃ, ye amataṃ dhātuṃ kāyena phusitvā viharanti. Tasmātihāvuso, evaṃ sikkhitabbaṃ – ‘jhāyī samānā dhammayogānaṃ bhikkhūnaṃ vaṇṇaṃ bhāsissāmā’ti. Evañhi vo, āvuso, sikkhitabbaṃ. Taṃ kissa hetu? Acchariyā hete, āvuso, puggalā dullabhā lokasmiṃ ye gambhīraṃ atthapadaṃ paññāya ativijjha passantī’’ti. Catutthaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 4. මහාචුන්‌දසුත්‌තවණ්‌ණනා • 4. Mahācundasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 3-6. ඉණසුත්‌තාදිවණ්‌ණනා • 3-6. Iṇasuttādivaṇṇanā
