| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༤. མཧཱཙུནྡསུཏྟཾ
4. Mahācundasuttaṃ
༤༦. ཨེཝཾ མེ སུཏཾ – ཨེཀཾ སམཡཾ ཨཱཡསྨཱ མཧཱཙུནྡོ ཙེཏཱིསུ ཝིཧརཏི སཡཾཛཱཏིཡཾ 1། ཏཏྲ ཁོ ཨཱཡསྨཱ མཧཱཙུནྡོ བྷིཀྑཱུ ཨཱམནྟེསི – ‘‘ཨཱཝུསོ བྷིཀྑཝེ’’ཏི། ‘‘ཨཱཝུསོ’’ཏི ཁོ ཏེ བྷིཀྑཱུ ཨཱཡསྨཏོ མཧཱཙུནྡསྶ པཙྩསྶོསུཾ། ཨཱཡསྨཱ མཧཱཙུནྡོ ཨེཏདཝོཙ –
46. Evaṃ me sutaṃ – ekaṃ samayaṃ āyasmā mahācundo cetīsu viharati sayaṃjātiyaṃ 2. Tatra kho āyasmā mahācundo bhikkhū āmantesi – ‘‘āvuso bhikkhave’’ti. ‘‘Āvuso’’ti kho te bhikkhū āyasmato mahācundassa paccassosuṃ. Āyasmā mahācundo etadavoca –
‘‘ཨིདྷཱཝུསོ, དྷམྨཡོགཱ བྷིཀྑཱུ ཛྷཱཡཱི བྷིཀྑཱུ ཨཔསཱདེནྟི – ‘ཨིམེ པན ཛྷཱཡིནོམྷཱ, ཛྷཱཡིནོམྷཱཏི ཛྷཱཡནྟི པཛ྄ཛྷཱཡནྟི ནིཛ྄ཛྷཱཡནྟི ཨཝཛ྄ཛྷཱཡནྟི 3། ཀིམིམེ 4 ཛྷཱཡནྟི, ཀིནྟིམེ ཛྷཱཡནྟི, ཀཐཾ ཨིམེ ཛྷཱཡནྟཱི’ཏི? ཏཏྠ དྷམྨཡོགཱ ཙ བྷིཀྑཱུ ནཔྤསཱིདནྟི, ཛྷཱཡཱི ཙ བྷིཀྑཱུ ནཔྤསཱིདནྟི, ན ཙ བཧུཛནཧིཏཱཡ པཊིཔནྣཱ ཧོནྟི བཧུཛནསུཁཱཡ བཧུནོ ཛནསྶ ཨཏྠཱཡ ཧིཏཱཡ སུཁཱཡ དེཝམནུསྶཱནཾ།
‘‘Idhāvuso, dhammayogā bhikkhū jhāyī bhikkhū apasādenti – ‘ime pana jhāyinomhā, jhāyinomhāti jhāyanti pajjhāyanti nijjhāyanti avajjhāyanti 5. Kimime 6 jhāyanti, kintime jhāyanti, kathaṃ ime jhāyantī’ti? Tattha dhammayogā ca bhikkhū nappasīdanti, jhāyī ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘ཨིདྷ པནཱཝུསོ, ཛྷཱཡཱི བྷིཀྑཱུ དྷམྨཡོགེ བྷིཀྑཱུ ཨཔསཱདེནྟི – ‘ཨིམེ པན དྷམྨཡོགམྷཱ, དྷམྨཡོགམྷཱཏི ཨུདྡྷཏཱ ཨུནྣལཱ༹ ཙཔལཱ མུཁརཱ ཝིཀིཎྞཝཱཙཱ མུཊྛསྶཏཱི ཨསམྤཛཱནཱ ཨསམཱཧིཏཱ ཝིབྦྷནྟཙིཏྟཱ པཱཀཏིནྡྲིཡཱ། ཀིམིམེ དྷམྨཡོགཱ, ཀིནྟིམེ དྷམྨཡོགཱ, ཀཐཾ ཨིམེ དྷམྨཡོགཱ’ཏི? ཏཏྠ ཛྷཱཡཱི ཙ བྷིཀྑཱུ ནཔྤསཱིདནྟི, དྷམྨཡོགཱ ཙ བྷིཀྑཱུ ནཔྤསཱིདནྟི, ན ཙ བཧུཛནཧིཏཱཡ པཊིཔནྣཱ ཧོནྟི བཧུཛནསུཁཱཡ བཧུནོ ཛནསྶ ཨཏྠཱཡ ཧིཏཱཡ སུཁཱཡ དེཝམནུསྶཱནཾ།
‘‘Idha panāvuso, jhāyī bhikkhū dhammayoge bhikkhū apasādenti – ‘ime pana dhammayogamhā, dhammayogamhāti uddhatā unnaḷā capalā mukharā vikiṇṇavācā muṭṭhassatī asampajānā asamāhitā vibbhantacittā pākatindriyā. Kimime dhammayogā, kintime dhammayogā, kathaṃ ime dhammayogā’ti? Tattha jhāyī ca bhikkhū nappasīdanti, dhammayogā ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘ཨིདྷ པནཱཝུསོ, དྷམྨཡོགཱ བྷིཀྑཱུ དྷམྨཡོགཱནཉྙེཝ བྷིཀྑཱུནཾ ཝཎྞཾ བྷཱསནྟི, ནོ ཛྷཱཡཱིནཾ བྷིཀྑཱུནཾ ཝཎྞཾ བྷཱསནྟི། ཏཏྠ དྷམྨཡོགཱ ཙ བྷིཀྑཱུ ནཔྤསཱིདནྟི, ཛྷཱཡཱི ཙ བྷིཀྑཱུ ནཔྤསཱིདནྟི, ན ཙ བཧུཛནཧིཏཱཡ པཊིཔནྣཱ ཧོནྟི བཧུཛནསུཁཱཡ བཧུནོ ཛནསྶ ཨཏྠཱཡ ཧིཏཱཡ སུཁཱཡ དེཝམནུསྶཱནཾ།
‘‘Idha panāvuso, dhammayogā bhikkhū dhammayogānaññeva bhikkhūnaṃ vaṇṇaṃ bhāsanti, no jhāyīnaṃ bhikkhūnaṃ vaṇṇaṃ bhāsanti. Tattha dhammayogā ca bhikkhū nappasīdanti, jhāyī ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘ཨིདྷ པནཱཝུསོ, ཛྷཱཡཱི བྷིཀྑཱུ ཛྷཱཡཱིནཉྙེཝ བྷིཀྑཱུནཾ ཝཎྞཾ བྷཱསནྟི, ནོ དྷམྨཡོགཱནཾ བྷིཀྑཱུནཾ ཝཎྞཾ བྷཱསནྟི། ཏཏྠ ཛྷཱཡཱི ཙ བྷིཀྑཱུ ནཔྤསཱིདནྟི, དྷམྨཡོགཱ ཙ བྷིཀྑཱུ ནཔྤསཱིདནྟི, ན ཙ བཧུཛནཧིཏཱཡ པཊིཔནྣཱ ཧོནྟི བཧུཛནསུཁཱཡ བཧུནོ ཛནསྶ ཨཏྠཱཡ ཧིཏཱཡ སུཁཱཡ དེཝམནུསྶཱནཾ།
‘‘Idha panāvuso, jhāyī bhikkhū jhāyīnaññeva bhikkhūnaṃ vaṇṇaṃ bhāsanti, no dhammayogānaṃ bhikkhūnaṃ vaṇṇaṃ bhāsanti. Tattha jhāyī ca bhikkhū nappasīdanti, dhammayogā ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘ཏསྨཱཏིཧཱཝུསོ , ཨེཝཾ སིཀྑིཏབྦཾ – ‘དྷམྨཡོགཱ སམཱནཱ ཛྷཱཡཱིནཾ བྷིཀྑཱུནཾ ཝཎྞཾ བྷཱསིསྶཱམཱ’ཏི། ཨེཝཉྷི ཝོ, ཨཱཝུསོ, སིཀྑིཏབྦཾ། ཏཾ ཀིསྶ ཧེཏུ? ཨཙྪརིཡཱ ཧེཏེ, ཨཱཝུསོ, པུགྒལཱ དུལླབྷཱ ལོཀསྨིཾ, ཡེ ཨམཏཾ དྷཱཏུཾ ཀཱཡེན ཕུསིཏྭཱ ཝིཧརནྟི། ཏསྨཱཏིཧཱཝུསོ, ཨེཝཾ སིཀྑིཏབྦཾ – ‘ཛྷཱཡཱི སམཱནཱ དྷམྨཡོགཱནཾ བྷིཀྑཱུནཾ ཝཎྞཾ བྷཱསིསྶཱམཱ’ཏི། ཨེཝཉྷི ཝོ, ཨཱཝུསོ, སིཀྑིཏབྦཾ། ཏཾ ཀིསྶ ཧེཏུ? ཨཙྪརིཡཱ ཧེཏེ, ཨཱཝུསོ, པུགྒལཱ དུལླབྷཱ ལོཀསྨིཾ ཡེ གམྦྷཱིརཾ ཨཏྠཔདཾ པཉྙཱཡ ཨཏིཝིཛ྄ཛྷ པསྶནྟཱི’’ཏི། ཙཏུཏྠཾ།
‘‘Tasmātihāvuso , evaṃ sikkhitabbaṃ – ‘dhammayogā samānā jhāyīnaṃ bhikkhūnaṃ vaṇṇaṃ bhāsissāmā’ti. Evañhi vo, āvuso, sikkhitabbaṃ. Taṃ kissa hetu? Acchariyā hete, āvuso, puggalā dullabhā lokasmiṃ, ye amataṃ dhātuṃ kāyena phusitvā viharanti. Tasmātihāvuso, evaṃ sikkhitabbaṃ – ‘jhāyī samānā dhammayogānaṃ bhikkhūnaṃ vaṇṇaṃ bhāsissāmā’ti. Evañhi vo, āvuso, sikkhitabbaṃ. Taṃ kissa hetu? Acchariyā hete, āvuso, puggalā dullabhā lokasmiṃ ye gambhīraṃ atthapadaṃ paññāya ativijjha passantī’’ti. Catutthaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༤. མཧཱཙུནྡསུཏྟཝཎྞནཱ • 4. Mahācundasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༣-༦. ཨིཎསུཏྟཱདིཝཎྞནཱ • 3-6. Iṇasuttādivaṇṇanā
