| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၄. မဟာစုန္ဒသုတ္တဝဏ္ဏနာ
4. Mahācundasuttavaṇṇanā
၄၆. စတုတ္ထေ စေတီသူတိ စေတိရဋ္ဌေ။ သယံဇာတိယန္တိ ဧဝံနာမကေ နိဂမေ။ မဟာစုန္ဒောတိ ဓမ္မသေနာပတိသ္သ ကနိဋ္ဌဘာတိကော။ ဓမ္မေ ယောဂော အနုယောဂော ဧတေသန္တိ ဓမ္မယောဂာ။ ဓမ္မကထိကာနံ ဧတံ နာမံ။ ဈာယန္တီတိ ဈာယီ။ အပသာဒေန္တီတိ ဃဋ္ဋေန္တိ ဟိံသန္တိ။ ဈာယန္တီတိ စိန္တေန္တိ။ ပဇ္ဈာယန္တီတိအာဒီနိ ဥပသဂ္ဂဝသေန ဝဍ္ဎိတာနိ။ ကိမိမေ ဈာယန္တီတိ ကိံ နာမ ဣမေ ဈာယန္တိ။ ကိန္တိမေ ဈာယန္တီတိ ကိမတ္ထံ ဣမေ ဈာယန္တိ။ ကထံ ဣမေ ဈာယန္တီတိ ကေန ကာရဏေန ဣမေ ဈာယန္တိ။ အမတံ ဓာတုံ ကာယေန ဖုသိတ္ဝာ ဝိဟရန္တီတိ မရဏဝိရဟိတံ နိဗ္ဗာနဓာတုံ သန္ဓာယ ကမ္မဋ္ဌာနံ ဂဟေတ္ဝာ ဝိဟရန္တာ အနုက္ကမေန တံ နာမကာယေန ဖုသိတ္ဝာ ဝိဟရန္တိ။ ဂမ္ဘီရံ အတ္ထပဒန္တိ ဂုဠ္ဟံ ပဋိစ္ဆန္နံ ခန္ဓဓာတုအာယတနာဒိအတ္ထံ။ ပညာယ အတိဝိဇ္ဈ ပသ္သန္တီတိ သဟဝိပသ္သနာယ မဂ္ဂပညာယ ပဋိဝိဇ္ဈိတ္ဝာ ပသ္သန္တိ။ ဣမသ္မိံ ပနတ္ထေ သမ္မသနပဋိဝေဓပညာပိ ဥဂ္ဂဟပရိပုစ္ဆာပညာပိ ဝဋ္ဋတိယေဝာတိ။
46. Catutthe cetīsūti cetiraṭṭhe. Sayaṃjātiyanti evaṃnāmake nigame. Mahācundoti dhammasenāpatissa kaniṭṭhabhātiko. Dhamme yogo anuyogo etesanti dhammayogā. Dhammakathikānaṃ etaṃ nāmaṃ. Jhāyantīti jhāyī. Apasādentīti ghaṭṭenti hiṃsanti. Jhāyantīti cintenti. Pajjhāyantītiādīni upasaggavasena vaḍḍhitāni. Kimime jhāyantīti kiṃ nāma ime jhāyanti. Kintime jhāyantīti kimatthaṃ ime jhāyanti. Kathaṃ ime jhāyantīti kena kāraṇena ime jhāyanti. Amataṃ dhātuṃ kāyena phusitvā viharantīti maraṇavirahitaṃ nibbānadhātuṃ sandhāya kammaṭṭhānaṃ gahetvā viharantā anukkamena taṃ nāmakāyena phusitvā viharanti. Gambhīraṃ atthapadanti guḷhaṃ paṭicchannaṃ khandhadhātuāyatanādiatthaṃ. Paññāyaativijjha passantīti sahavipassanāya maggapaññāya paṭivijjhitvā passanti. Imasmiṃ panatthe sammasanapaṭivedhapaññāpi uggahaparipucchāpaññāpi vaṭṭatiyevāti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၄. မဟာစုန္ဒသုတ္တံ • 4. Mahācundasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၃-၆. ဣဏသုတ္တာဒိဝဏ္ဏနာ • 3-6. Iṇasuttādivaṇṇanā
