| Library / Tipiṭaka / তিপিটক • Tipiṭaka / মজ্ঝিমনিকায • Majjhimanikāya |
৬. মহাধম্মসমাদানসুত্তং
6. Mahādhammasamādānasuttaṃ
৪৭৩. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তত্র খো ভগৰা ভিক্খূ আমন্তেসি – ‘‘ভিক্খৰো’’তি। ‘‘ভদন্তে’’তি তে ভিক্খূ ভগৰতো পচ্চস্সোসুং। ভগৰা এতদৰোচ – ‘‘যেভুয্যেন, ভিক্খৰে, সত্তা এৰংকামা এৰংছন্দা এৰংঅধিপ্পাযা – ‘অহো ৰত অনিট্ঠা অকন্তা অমনাপা ধম্মা পরিহাযেয্যুং, ইট্ঠা কন্তা মনাপা ধম্মা অভিৰড্ঢেয্যু’ন্তি। তেসং, ভিক্খৰে, সত্তানং এৰংকামানং এৰংছন্দানং এৰংঅধিপ্পাযানং অনিট্ঠা অকন্তা অমনাপা ধম্মা অভিৰড্ঢন্তি, ইট্ঠা কন্তা মনাপা ধম্মা পরিহাযন্তি। তত্র তুম্হে, ভিক্খৰে, কং হেতুং পচ্চেথা’’তি? ‘‘ভগৰংমূলকা নো, ভন্তে, ধম্মা, ভগৰংনেত্তিকা, ভগৰংপটিসরণা। সাধু ৰত, ভন্তে, ভগৰন্তঞ্ঞেৰ পটিভাতু এতস্স ভাসিতস্স অত্থো; ভগৰতো সুত্ৰা ভিক্খূ ধারেস্সন্তী’’তি। ‘‘তেন হি, ভিক্খৰে, সুণাথ, সাধুকং মনসি করোথ, ভাসিস্সামী’’তি। ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং। ভগৰা এতদৰোচ –
473. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca – ‘‘yebhuyyena, bhikkhave, sattā evaṃkāmā evaṃchandā evaṃadhippāyā – ‘aho vata aniṭṭhā akantā amanāpā dhammā parihāyeyyuṃ, iṭṭhā kantā manāpā dhammā abhivaḍḍheyyu’nti. Tesaṃ, bhikkhave, sattānaṃ evaṃkāmānaṃ evaṃchandānaṃ evaṃadhippāyānaṃ aniṭṭhā akantā amanāpā dhammā abhivaḍḍhanti, iṭṭhā kantā manāpā dhammā parihāyanti. Tatra tumhe, bhikkhave, kaṃ hetuṃ paccethā’’ti? ‘‘Bhagavaṃmūlakā no, bhante, dhammā, bhagavaṃnettikā, bhagavaṃpaṭisaraṇā. Sādhu vata, bhante, bhagavantaññeva paṭibhātu etassa bhāsitassa attho; bhagavato sutvā bhikkhū dhāressantī’’ti. ‘‘Tena hi, bhikkhave, suṇātha, sādhukaṃ manasi karotha, bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
৪৭৪. ‘‘ইধ, ভিক্খৰে, অস্সুতৰা পুথুজ্জনো, অরিযানং অদস্সাৰী অরিযধম্মস্স অকোৰিদো অরিযধম্মে অৰিনীতো, সপ্পুরিসানং অদস্সাৰী সপ্পুরিসধম্মস্স অকোৰিদো সপ্পুরিসধম্মে অৰিনীতো, সেৰিতব্বে ধম্মে ন জানাতি অসেৰিতব্বে ধম্মে ন জানাতি, ভজিতব্বে ধম্মে ন জানাতি অভজিতব্বে ধম্মে ন জানাতি। সো সেৰিতব্বে ধম্মে অজানন্তো অসেৰিতব্বে ধম্মে অজানন্তো, ভজিতব্বে ধম্মে অজানন্তো অভজিতব্বে ধম্মে অজানন্তো, অসেৰিতব্বে ধম্মে সেৰতি সেৰিতব্বে ধম্মে ন সেৰতি, অভজিতব্বে ধম্মে ভজতি ভজিতব্বে ধম্মে ন ভজতি। তস্স অসেৰিতব্বে ধম্মে সেৰতো সেৰিতব্বে ধম্মে অসেৰতো, অভজিতব্বে ধম্মে ভজতো ভজিতব্বে ধম্মে অভজতো অনিট্ঠা অকন্তা অমনাপা ধম্মা অভিৰড্ঢন্তি, ইট্ঠা কন্তা মনাপা ধম্মা পরিহাযন্তি। তং কিস্স হেতু? এৰঞ্হেতং, ভিক্খৰে, হোতি যথা তং অৰিদ্দসুনো।
474. ‘‘Idha, bhikkhave, assutavā puthujjano, ariyānaṃ adassāvī ariyadhammassa akovido ariyadhamme avinīto, sappurisānaṃ adassāvī sappurisadhammassa akovido sappurisadhamme avinīto, sevitabbe dhamme na jānāti asevitabbe dhamme na jānāti, bhajitabbe dhamme na jānāti abhajitabbe dhamme na jānāti. So sevitabbe dhamme ajānanto asevitabbe dhamme ajānanto, bhajitabbe dhamme ajānanto abhajitabbe dhamme ajānanto, asevitabbe dhamme sevati sevitabbe dhamme na sevati, abhajitabbe dhamme bhajati bhajitabbe dhamme na bhajati. Tassa asevitabbe dhamme sevato sevitabbe dhamme asevato, abhajitabbe dhamme bhajato bhajitabbe dhamme abhajato aniṭṭhā akantā amanāpā dhammā abhivaḍḍhanti, iṭṭhā kantā manāpā dhammā parihāyanti. Taṃ kissa hetu? Evañhetaṃ, bhikkhave, hoti yathā taṃ aviddasuno.
‘‘সুতৰা চ খো, ভিক্খৰে, অরিযসাৰকো, অরিযানং দস্সাৰী অরিযধম্মস্স কোৰিদো অরিযধম্মে সুৰিনীতো, সপ্পুরিসানং দস্সাৰী সপ্পুরিসধম্মস্স কোৰিদো সপ্পুরিসধম্মে সুৰিনীতো, সেৰিতব্বে ধম্মে জানাতি অসেৰিতব্বে ধম্মে জানাতি, ভজিতব্বে ধম্মে জানাতি অভজিতব্বে ধম্মে জানাতি। সো সেৰিতব্বে ধম্মে জানন্তো অসেৰিতব্বে ধম্মে জানন্তো, ভজিতব্বে ধম্মে জানন্তো অভজিতব্বে ধম্মে জানন্তো, অসেৰিতব্বে ধম্মে ন সেৰতি সেৰিতব্বে ধম্মে সেৰতি, অভজিতব্বে ধম্মে ন ভজতি ভজিতব্বে ধম্মে ভজতি। তস্স অসেৰিতব্বে ধম্মে অসেৰতো সেৰিতব্বে ধম্মে সেৰতো, অভজিতব্বে ধম্মে অভজতো ভজিতব্বে ধম্মে ভজতো, অনিট্ঠা অকন্তা অমনাপা ধম্মা পরিহাযন্তি, ইট্ঠা কন্তা মনাপা ধম্মা অভিৰড্ঢন্তি। তং কিস্স হেতু? এৰঞ্হেতং, ভিক্খৰে, হোতি যথা তং ৰিদ্দসুনো।
‘‘Sutavā ca kho, bhikkhave, ariyasāvako, ariyānaṃ dassāvī ariyadhammassa kovido ariyadhamme suvinīto, sappurisānaṃ dassāvī sappurisadhammassa kovido sappurisadhamme suvinīto, sevitabbe dhamme jānāti asevitabbe dhamme jānāti, bhajitabbe dhamme jānāti abhajitabbe dhamme jānāti. So sevitabbe dhamme jānanto asevitabbe dhamme jānanto, bhajitabbe dhamme jānanto abhajitabbe dhamme jānanto, asevitabbe dhamme na sevati sevitabbe dhamme sevati, abhajitabbe dhamme na bhajati bhajitabbe dhamme bhajati. Tassa asevitabbe dhamme asevato sevitabbe dhamme sevato, abhajitabbe dhamme abhajato bhajitabbe dhamme bhajato, aniṭṭhā akantā amanāpā dhammā parihāyanti, iṭṭhā kantā manāpā dhammā abhivaḍḍhanti. Taṃ kissa hetu? Evañhetaṃ, bhikkhave, hoti yathā taṃ viddasuno.
৪৭৫. ‘‘চত্তারিমানি, ভিক্খৰে, ধম্মসমাদানানি। কতমানি চত্তারি? অত্থি, ভিক্খৰে, ধম্মসমাদানং পচ্চুপ্পন্নদুক্খঞ্চেৰ আযতিঞ্চ দুক্খৰিপাকং; অত্থি, ভিক্খৰে, ধম্মসমাদানং পচ্চুপ্পন্নসুখং আযতিং দুক্খৰিপাকং; অত্থি, ভিক্খৰে, ধম্মসমাদানং পচ্চুপ্পন্নদুক্খং আযতিং সুখৰিপাকং; অত্থি, ভিক্খৰে, ধম্মসমাদানং পচ্চুপ্পন্নসুখঞ্চেৰ আযতিঞ্চ সুখৰিপাকং।
475. ‘‘Cattārimāni, bhikkhave, dhammasamādānāni. Katamāni cattāri? Atthi, bhikkhave, dhammasamādānaṃ paccuppannadukkhañceva āyatiñca dukkhavipākaṃ; atthi, bhikkhave, dhammasamādānaṃ paccuppannasukhaṃ āyatiṃ dukkhavipākaṃ; atthi, bhikkhave, dhammasamādānaṃ paccuppannadukkhaṃ āyatiṃ sukhavipākaṃ; atthi, bhikkhave, dhammasamādānaṃ paccuppannasukhañceva āyatiñca sukhavipākaṃ.
৪৭৬. ‘‘তত্র, ভিক্খৰে, যমিদং 1 ধম্মসমাদানং পচ্চুপ্পন্নদুক্খঞ্চেৰ আযতিঞ্চ দুক্খৰিপাকং, তং অৰিদ্ৰা অৰিজ্জাগতো যথাভূতং নপ্পজানাতি – ‘ইদং খো ধম্মসমাদানং পচ্চুপ্পন্নদুক্খঞ্চেৰ আযতিঞ্চ দুক্খৰিপাক’ন্তি। তং অৰিদ্ৰা অৰিজ্জাগতো যথাভূতং অপ্পজানন্তো তং সেৰতি, তং ন পরিৰজ্জেতি। তস্স তং সেৰতো, তং অপরিৰজ্জযতো, অনিট্ঠা অকন্তা অমনাপা ধম্মা অভিৰড্ঢন্তি, ইট্ঠা কন্তা মনাপা ধম্মা পরিহাযন্তি। তং কিস্স হেতু? এৰঞ্হেতং, ভিক্খৰে, হোতি যথা তং অৰিদ্দসুনো।
476. ‘‘Tatra, bhikkhave, yamidaṃ 2 dhammasamādānaṃ paccuppannadukkhañceva āyatiñca dukkhavipākaṃ, taṃ avidvā avijjāgato yathābhūtaṃ nappajānāti – ‘idaṃ kho dhammasamādānaṃ paccuppannadukkhañceva āyatiñca dukkhavipāka’nti. Taṃ avidvā avijjāgato yathābhūtaṃ appajānanto taṃ sevati, taṃ na parivajjeti. Tassa taṃ sevato, taṃ aparivajjayato, aniṭṭhā akantā amanāpā dhammā abhivaḍḍhanti, iṭṭhā kantā manāpā dhammā parihāyanti. Taṃ kissa hetu? Evañhetaṃ, bhikkhave, hoti yathā taṃ aviddasuno.
‘‘তত্র, ভিক্খৰে, যমিদং ধম্মসমাদানং পচ্চুপ্পন্নসুখং আযতিং দুক্খৰিপাকং তং অৰিদ্ৰা অৰিজ্জাগতো যথাভূতং নপ্পজানাতি – ‘ইদং খো ধম্মসমাদানং পচ্চুপ্পন্নসুখং আযতিং দুক্খৰিপাক’ন্তি। তং অৰিদ্ৰা অৰিজ্জাগতো যথাভূতং অপ্পজানন্তো তং সেৰতি, তং ন পরিৰজ্জেতি। তস্স তং সেৰতো, তং অপরিৰজ্জযতো, অনিট্ঠা অকন্তা অমনাপা ধম্মা অভিৰড্ঢন্তি, ইট্ঠা কন্তা মনাপা ধম্মা পরিহাযন্তি। তং কিস্স হেতু? এৰঞ্হেতং, ভিক্খৰে, হোতি যথা তং অৰিদ্দসুনো।
‘‘Tatra, bhikkhave, yamidaṃ dhammasamādānaṃ paccuppannasukhaṃ āyatiṃ dukkhavipākaṃ taṃ avidvā avijjāgato yathābhūtaṃ nappajānāti – ‘idaṃ kho dhammasamādānaṃ paccuppannasukhaṃ āyatiṃ dukkhavipāka’nti. Taṃ avidvā avijjāgato yathābhūtaṃ appajānanto taṃ sevati, taṃ na parivajjeti. Tassa taṃ sevato, taṃ aparivajjayato, aniṭṭhā akantā amanāpā dhammā abhivaḍḍhanti, iṭṭhā kantā manāpā dhammā parihāyanti. Taṃ kissa hetu? Evañhetaṃ, bhikkhave, hoti yathā taṃ aviddasuno.
‘‘তত্র , ভিক্খৰে, যমিদং ধম্মসমাদানং পচ্চুপ্পন্নদুক্খং আযতিং সুখৰিপাকং, তং অৰিদ্ৰা অৰিজ্জাগতো যথাভূতং নপ্পজানাতি – ‘ইদং খো ধম্মসমাদানং পচ্চুপ্পন্নদুক্খং আযতিং সুখৰিপাক’ন্তি। তং অৰিদ্ৰা অৰিজ্জাগতো যথাভূতং অপ্পজানন্তো তং ন সেৰতি, তং পরিৰজ্জেতি। তস্স তং অসেৰতো, তং পরিৰজ্জযতো, অনিট্ঠা অকন্তা অমনাপা ধম্মা অভিৰড্ঢন্তি, ইট্ঠা কন্তা মনাপা ধম্মা পরিহাযন্তি। তং কিস্স হেতু? এৰঞ্হেতং, ভিক্খৰে, হোতি যথা তং অৰিদ্দসুনো।
‘‘Tatra , bhikkhave, yamidaṃ dhammasamādānaṃ paccuppannadukkhaṃ āyatiṃ sukhavipākaṃ, taṃ avidvā avijjāgato yathābhūtaṃ nappajānāti – ‘idaṃ kho dhammasamādānaṃ paccuppannadukkhaṃ āyatiṃ sukhavipāka’nti. Taṃ avidvā avijjāgato yathābhūtaṃ appajānanto taṃ na sevati, taṃ parivajjeti. Tassa taṃ asevato, taṃ parivajjayato, aniṭṭhā akantā amanāpā dhammā abhivaḍḍhanti, iṭṭhā kantā manāpā dhammā parihāyanti. Taṃ kissa hetu? Evañhetaṃ, bhikkhave, hoti yathā taṃ aviddasuno.
‘‘তত্র, ভিক্খৰে, যমিদং ধম্মসমাদানং পচ্চুপ্পন্নসুখঞ্চেৰ আযতিঞ্চ সুখৰিপাকং, তং অৰিদ্ৰা অৰিজ্জাগতো যথাভূতং নপ্পজানাতি – ‘ইদং খো ধম্মসমাদানং পচ্চুপ্পন্নসুখঞ্চেৰ আযতিঞ্চ সুখৰিপাক’ন্তি। তং অৰিদ্ৰা অৰিজ্জাগতো যথাভূতং অপ্পজানন্তো তং ন সেৰতি, তং পরিৰজ্জেতি। তস্স তং অসেৰতো, তং পরিৰজ্জযতো, অনিট্ঠা অকন্তা অমনাপা ধম্মা অভিৰড্ঢন্তি, ইট্ঠা কন্তা মনাপা ধম্মা পরিহাযন্তি। তং কিস্স হেতু? এৰঞ্হেতং, ভিক্খৰে, হোতি যথা তং অৰিদ্দসুনো।
‘‘Tatra, bhikkhave, yamidaṃ dhammasamādānaṃ paccuppannasukhañceva āyatiñca sukhavipākaṃ, taṃ avidvā avijjāgato yathābhūtaṃ nappajānāti – ‘idaṃ kho dhammasamādānaṃ paccuppannasukhañceva āyatiñca sukhavipāka’nti. Taṃ avidvā avijjāgato yathābhūtaṃ appajānanto taṃ na sevati, taṃ parivajjeti. Tassa taṃ asevato, taṃ parivajjayato, aniṭṭhā akantā amanāpā dhammā abhivaḍḍhanti, iṭṭhā kantā manāpā dhammā parihāyanti. Taṃ kissa hetu? Evañhetaṃ, bhikkhave, hoti yathā taṃ aviddasuno.
৪৭৭. ‘‘তত্র, ভিক্খৰে, যমিদং ধম্মসমাদানং পচ্চুপ্পন্নদুক্খঞ্চেৰ আযতিঞ্চ দুক্খৰিপাকং তং ৰিদ্ৰা ৰিজ্জাগতো যথাভূতং পজানাতি – ‘ইদং খো ধম্মসমাদানং পচ্চুপ্পন্নদুক্খঞ্চেৰ আযতিঞ্চ দুক্খৰিপাক’ন্তি। তং ৰিদ্ৰা ৰিজ্জাগতো যথাভূতং পজানন্তো তং ন সেৰতি, তং পরিৰজ্জেতি। তস্স তং অসেৰতো, তং পরিৰজ্জযতো, অনিট্ঠা অকন্তা অমনাপা ধম্মা পরিহাযন্তি, ইট্ঠা কন্তা মনাপা ধম্মা অভিৰড্ঢন্তি। তং কিস্স হেতু? এৰঞ্হেতং, ভিক্খৰে, হোতি যথা তং ৰিদ্দসুনো।
477. ‘‘Tatra, bhikkhave, yamidaṃ dhammasamādānaṃ paccuppannadukkhañceva āyatiñca dukkhavipākaṃ taṃ vidvā vijjāgato yathābhūtaṃ pajānāti – ‘idaṃ kho dhammasamādānaṃ paccuppannadukkhañceva āyatiñca dukkhavipāka’nti. Taṃ vidvā vijjāgato yathābhūtaṃ pajānanto taṃ na sevati, taṃ parivajjeti. Tassa taṃ asevato, taṃ parivajjayato, aniṭṭhā akantā amanāpā dhammā parihāyanti, iṭṭhā kantā manāpā dhammā abhivaḍḍhanti. Taṃ kissa hetu? Evañhetaṃ, bhikkhave, hoti yathā taṃ viddasuno.
‘‘তত্র, ভিক্খৰে, যমিদং ধম্মসমাদানং পচ্চুপ্পন্নসুখং আযতিং দুক্খৰিপাকং তং ৰিদ্ৰা ৰিজ্জাগতো যথাভূতং পজানাতি – ‘ইদং খো ধম্মসমাদানং পচ্চুপ্পন্নসুখং আযতিং দুক্খৰিপাক’ন্তি। তং ৰিদ্ৰা ৰিজ্জাগতো যথাভূতং পজানন্তো তং ন সেৰতি, তং পরিৰজ্জেতি। তস্স তং অসেৰতো, তং পরিৰজ্জযতো , অনিট্ঠা অকন্তা অমনাপা ধম্মা পরিহাযন্তি, ইট্ঠা কন্তা মনাপা ধম্মা অভিৰড্ঢন্তি। তং কিস্স হেতু? এৰঞ্হেতং, ভিক্খৰে, হোতি যথা তং ৰিদ্দসুনো।
‘‘Tatra, bhikkhave, yamidaṃ dhammasamādānaṃ paccuppannasukhaṃ āyatiṃ dukkhavipākaṃ taṃ vidvā vijjāgato yathābhūtaṃ pajānāti – ‘idaṃ kho dhammasamādānaṃ paccuppannasukhaṃ āyatiṃ dukkhavipāka’nti. Taṃ vidvā vijjāgato yathābhūtaṃ pajānanto taṃ na sevati, taṃ parivajjeti. Tassa taṃ asevato, taṃ parivajjayato , aniṭṭhā akantā amanāpā dhammā parihāyanti, iṭṭhā kantā manāpā dhammā abhivaḍḍhanti. Taṃ kissa hetu? Evañhetaṃ, bhikkhave, hoti yathā taṃ viddasuno.
‘‘তত্র , ভিক্খৰে, যমিদং ধম্মসমাদানং পচ্চুপ্পন্নদুক্খং আযতিং সুখৰিপাকং তং ৰিদ্ৰা ৰিজ্জাগতো যথাভূতং পজানাতি – ‘ইদং খো ধম্মসমাদানং পচ্চুপ্পন্নদুক্খং আযতিং সুখৰিপাক’ন্তি। তং ৰিদ্ৰা ৰিজ্জাগতো যথাভূতং পজানন্তো তং সেৰতি, তং ন পরিৰজ্জেতি। তস্স তং সেৰতো, তং অপরিৰজ্জযতো, অনিট্ঠা অকন্তা অমনাপা ধম্মা পরিহাযন্তি, ইট্ঠা কন্তা মনাপা ধম্মা অভিৰড্ঢন্তি। তং কিস্স হেতু? এৰঞ্হেতং, ভিক্খৰে, হোতি যথা তং ৰিদ্দসুনো।
‘‘Tatra , bhikkhave, yamidaṃ dhammasamādānaṃ paccuppannadukkhaṃ āyatiṃ sukhavipākaṃ taṃ vidvā vijjāgato yathābhūtaṃ pajānāti – ‘idaṃ kho dhammasamādānaṃ paccuppannadukkhaṃ āyatiṃ sukhavipāka’nti. Taṃ vidvā vijjāgato yathābhūtaṃ pajānanto taṃ sevati, taṃ na parivajjeti. Tassa taṃ sevato, taṃ aparivajjayato, aniṭṭhā akantā amanāpā dhammā parihāyanti, iṭṭhā kantā manāpā dhammā abhivaḍḍhanti. Taṃ kissa hetu? Evañhetaṃ, bhikkhave, hoti yathā taṃ viddasuno.
‘‘তত্র, ভিক্খৰে, যমিদং ধম্মসমাদানং পচ্চুপ্পন্নসুখঞ্চেৰ আযতিঞ্চ সুখৰিপাকং তং ৰিদ্ৰা ৰিজ্জাগতো যথাভূতং পজানাতি – ‘ইদং খো ধম্মসমাদানং পচ্চুপ্পন্নসুখঞ্চেৰ আযতিঞ্চ সুখৰিপাক’ন্তি। তং ৰিদ্ৰা ৰিজ্জাগতো যথাভূতং পজানন্তো তং সেৰতি, তং ন পরিৰজ্জেতি। তস্স তং সেৰতো, তং অপরিৰজ্জযতো, অনিট্ঠা অকন্তা অমনাপা ধম্মা পরিহাযন্তি, ইট্ঠা কন্তা মনাপা ধম্মা অভিৰড্ঢন্তি। তং কিস্স হেতু? এৰঞ্হেতং, ভিক্খৰে, হোতি যথা তং ৰিদ্দসুনো।
‘‘Tatra, bhikkhave, yamidaṃ dhammasamādānaṃ paccuppannasukhañceva āyatiñca sukhavipākaṃ taṃ vidvā vijjāgato yathābhūtaṃ pajānāti – ‘idaṃ kho dhammasamādānaṃ paccuppannasukhañceva āyatiñca sukhavipāka’nti. Taṃ vidvā vijjāgato yathābhūtaṃ pajānanto taṃ sevati, taṃ na parivajjeti. Tassa taṃ sevato, taṃ aparivajjayato, aniṭṭhā akantā amanāpā dhammā parihāyanti, iṭṭhā kantā manāpā dhammā abhivaḍḍhanti. Taṃ kissa hetu? Evañhetaṃ, bhikkhave, hoti yathā taṃ viddasuno.
৪৭৮. ‘‘কতমঞ্চ , ভিক্খৰে, ধম্মসমাদানং পচ্চুপ্পন্নদুক্খঞ্চেৰ আযতিঞ্চ দুক্খৰিপাকং? ইধ, ভিক্খৰে, একচ্চো সহাপি দুক্খেন সহাপি দোমনস্সেন পাণাতিপাতী হোতি, পাণাতিপাতপচ্চযা চ দুক্খং দোমনস্সং পটিসংৰেদেতি; সহাপি দুক্খেন সহাপি দোমনস্সেন অদিন্নাদাযী হোতি, অদিন্নাদানপচ্চযা চ দুক্খং দোমনস্সং পটিসংৰেদেতি; সহাপি দুক্খেন সহাপি দোমনস্সেন কামেসু মিচ্ছাচারী হোতি, কামেসু মিচ্ছাচারপচ্চযা চ দুক্খং দোমনস্সং পটিসংৰেদেতি; সহাপি দুক্খেন সহাপি দোমনস্সেন মুসাৰাদী হোতি, মুসাৰাদপচ্চযা চ দুক্খং দোমনস্সং পটিসংৰেদেতি; সহাপি দুক্খেন সহাপি দোমনস্সেন পিসুণৰাচো হোতি, পিসুণৰাচাপচ্চযা চ দুক্খং দোমনস্সং পটিসংৰেদেতি; সহাপি দুক্খেন সহাপি দোমনস্সেন ফরুসৰাচো হোতি, ফরুসৰাচাপচ্চযা চ দুক্খং দোমনস্সং পটিসংৰেদেতি; সহাপি দুক্খেন সহাপি দোমনস্সেন সম্ফপ্পলাপী হোতি, সম্ফপ্পলাপপচ্চযা চ দুক্খং দোমনস্সং পটিসংৰেদেতি; সহাপি দুক্খেন সহাপি দোমনস্সেন অভিজ্ঝালু হোতি, অভিজ্ঝাপচ্চযা চ দুক্খং দোমনস্সং পটিসংৰেদেতি; সহাপি দুক্খেন সহাপি দোমনস্সেন ব্যাপন্নচিত্তো হোতি, ব্যাপাদপচ্চযা চ দুক্খং দোমনস্সং পটিসংৰেদেতি; সহাপি দুক্খেন সহাপি দোমনস্সেন মিচ্ছাদিট্ঠি হোতি, মিচ্ছাদিট্ঠিপচ্চযা চ দুক্খং দোমনস্সং পটিসংৰেদেতি। সো কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি। ইদং ৰুচ্চতি, ভিক্খৰে, ধম্মসমাদানং পচ্চুপ্পন্নদুক্খঞ্চেৰ আযতিঞ্চ দুক্খৰিপাকং।
478. ‘‘Katamañca , bhikkhave, dhammasamādānaṃ paccuppannadukkhañceva āyatiñca dukkhavipākaṃ? Idha, bhikkhave, ekacco sahāpi dukkhena sahāpi domanassena pāṇātipātī hoti, pāṇātipātapaccayā ca dukkhaṃ domanassaṃ paṭisaṃvedeti; sahāpi dukkhena sahāpi domanassena adinnādāyī hoti, adinnādānapaccayā ca dukkhaṃ domanassaṃ paṭisaṃvedeti; sahāpi dukkhena sahāpi domanassena kāmesu micchācārī hoti, kāmesu micchācārapaccayā ca dukkhaṃ domanassaṃ paṭisaṃvedeti; sahāpi dukkhena sahāpi domanassena musāvādī hoti, musāvādapaccayā ca dukkhaṃ domanassaṃ paṭisaṃvedeti; sahāpi dukkhena sahāpi domanassena pisuṇavāco hoti, pisuṇavācāpaccayā ca dukkhaṃ domanassaṃ paṭisaṃvedeti; sahāpi dukkhena sahāpi domanassena pharusavāco hoti, pharusavācāpaccayā ca dukkhaṃ domanassaṃ paṭisaṃvedeti; sahāpi dukkhena sahāpi domanassena samphappalāpī hoti, samphappalāpapaccayā ca dukkhaṃ domanassaṃ paṭisaṃvedeti; sahāpi dukkhena sahāpi domanassena abhijjhālu hoti, abhijjhāpaccayā ca dukkhaṃ domanassaṃ paṭisaṃvedeti; sahāpi dukkhena sahāpi domanassena byāpannacitto hoti, byāpādapaccayā ca dukkhaṃ domanassaṃ paṭisaṃvedeti; sahāpi dukkhena sahāpi domanassena micchādiṭṭhi hoti, micchādiṭṭhipaccayā ca dukkhaṃ domanassaṃ paṭisaṃvedeti. So kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Idaṃ vuccati, bhikkhave, dhammasamādānaṃ paccuppannadukkhañceva āyatiñca dukkhavipākaṃ.
৪৭৯. ‘‘কতমঞ্চ, ভিক্খৰে, ধম্মসমাদানং পচ্চুপ্পন্নসুখং আযতিং দুক্খৰিপাকং? ইধ, ভিক্খৰে, একচ্চো সহাপি সুখেন সহাপি সোমনস্সেন পাণাতিপাতী হোতি, পাণাতিপাতপচ্চযা চ সুখং সোমনস্সং পটিসংৰেদেতি; সহাপি সুখেন সহাপি সোমনস্সেন অদিন্নাদাযী হোতি, অদিন্নাদানপচ্চযা চ সুখং সোমনস্সং পটিসংৰেদেতি; সহাপি সুখেন সহাপি সোমনস্সেন কামেসুমিচ্ছাচারী হোতি, কামেসুমিচ্ছাচারপচ্চযা চ সুখং সোমনস্সং পটিসংৰেদেতি; সহাপি সুখেন সহাপি সোমনস্সেন মুসাৰাদী হোতি, মুসাৰাদপচ্চযা চ সুখং সোমনস্সং পটিসংৰেদেতি; সহাপি সুখেন সহাপি সোমনস্সেন পিসুণৰাচো হোতি, পিসুণৰাচাপচ্চযা চ সুখং সোমনস্সং পটিসংৰেদেতি; সহাপি সুখেন সহাপি সোমনস্সেন ফরুসৰাচো হোতি, ফরুসৰাচাপচ্চযা চ সুখং সোমনস্সং পটিসংৰেদেতি; সহাপি সুখেন সহাপি সোমনস্সেন সম্ফপ্পলাপী হোতি, সম্ফপ্পলাপপচ্চযা চ সুখং সোমনস্সং পটিসংৰেদেতি; সহাপি সুখেন সহাপি সোমনস্সেন অভিজ্ঝালু হোতি, অভিজ্ঝাপচ্চযা চ সুখং সোমনস্সং পটিসংৰেদেতি; সহাপি সুখেন সহাপি সোমনস্সেন ব্যাপন্নচিত্তো হোতি, ব্যাপাদপচ্চযা চ সুখং সোমনস্সং পটিসংৰেদেতি; সহাপি সুখেন সহাপি সোমনস্সেন মিচ্ছাদিট্ঠি হোতি, মিচ্ছাদিট্ঠিপচ্চযা চ সুখং সোমনস্সং পটিসংৰেদেতি। সো কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি। ইদং ৰুচ্চতি, ভিক্খৰে, ধম্মসমাদানং পচ্চুপ্পন্নসুখং আযতিং দুক্খৰিপাকং।
479. ‘‘Katamañca, bhikkhave, dhammasamādānaṃ paccuppannasukhaṃ āyatiṃ dukkhavipākaṃ? Idha, bhikkhave, ekacco sahāpi sukhena sahāpi somanassena pāṇātipātī hoti, pāṇātipātapaccayā ca sukhaṃ somanassaṃ paṭisaṃvedeti; sahāpi sukhena sahāpi somanassena adinnādāyī hoti, adinnādānapaccayā ca sukhaṃ somanassaṃ paṭisaṃvedeti; sahāpi sukhena sahāpi somanassena kāmesumicchācārī hoti, kāmesumicchācārapaccayā ca sukhaṃ somanassaṃ paṭisaṃvedeti; sahāpi sukhena sahāpi somanassena musāvādī hoti, musāvādapaccayā ca sukhaṃ somanassaṃ paṭisaṃvedeti; sahāpi sukhena sahāpi somanassena pisuṇavāco hoti, pisuṇavācāpaccayā ca sukhaṃ somanassaṃ paṭisaṃvedeti; sahāpi sukhena sahāpi somanassena pharusavāco hoti, pharusavācāpaccayā ca sukhaṃ somanassaṃ paṭisaṃvedeti; sahāpi sukhena sahāpi somanassena samphappalāpī hoti, samphappalāpapaccayā ca sukhaṃ somanassaṃ paṭisaṃvedeti; sahāpi sukhena sahāpi somanassena abhijjhālu hoti, abhijjhāpaccayā ca sukhaṃ somanassaṃ paṭisaṃvedeti; sahāpi sukhena sahāpi somanassena byāpannacitto hoti, byāpādapaccayā ca sukhaṃ somanassaṃ paṭisaṃvedeti; sahāpi sukhena sahāpi somanassena micchādiṭṭhi hoti, micchādiṭṭhipaccayā ca sukhaṃ somanassaṃ paṭisaṃvedeti. So kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Idaṃ vuccati, bhikkhave, dhammasamādānaṃ paccuppannasukhaṃ āyatiṃ dukkhavipākaṃ.
৪৮০. ‘‘কতমঞ্চ, ভিক্খৰে, ধম্মসমাদানং পচ্চুপ্পন্নদুক্খং আযতিং সুখৰিপাকং? ইধ, ভিক্খৰে, একচ্চো সহাপি দুক্খেন সহাপি দোমনস্সেন পাণাতিপাতা পটিৰিরতো হোতি, পাণাতিপাতা ৰেরমণীপচ্চযা চ দুক্খং দোমনস্সং পটিসংৰেদেতি ; সহাপি দুক্খেন সহাপি দোমনস্সেন অদিন্নাদানা পটিৰিরতো হোতি, অদিন্নাদানা ৰেরমণীপচ্চযা চ দুক্খং দোমনস্সং পটিসংৰেদেতি; সহাপি দুক্খেন সহাপি দোমনস্সেন কামেসুমিচ্ছাচারা পটিৰিরতো হোতি, কামেসুমিচ্ছাচারা ৰেরমণীপচ্চযা চ দুক্খং দোমনস্সং পটিসংৰেদেতি; সহাপি দুক্খেন সহাপি দোমনস্সেন মুসাৰাদা পটিৰিরতো হোতি, মুসাৰাদা ৰেরমণীপচ্চযা চ দুক্খং দোমনস্সং পটিসংৰেদেতি; সহাপি দুক্খেন সহাপি দোমনস্সেন পিসুণায ৰাচায পটিৰিরতো হোতি , পিসুণায ৰাচায ৰেরমণীপচ্চযা চ দুক্খং দোমনস্সং পটিসংৰেদেতি ; সহাপি দুক্খেন সহাপি দোমনস্সেন ফরুসায ৰাচায পটিৰিরতো হোতি, ফরুসায ৰাচায ৰেরমণীপচ্চযা চ দুক্খং দোমনস্সং পটিসংৰেদেতি; সহাপি দুক্খেন সহাপি দোমনস্সেন সম্ফপ্পলাপা পটিৰিরতো হোতি, সম্ফপ্পলাপা ৰেরমণীপচ্চযা চ দুক্খং দোমনস্সং পটিসংৰেদেতি; সহাপি দুক্খেন সহাপি দোমনস্সেন অনভিজ্ঝালু হোতি, অনভিজ্ঝাপচ্চযা চ দুক্খং দোমনস্সং পটিসংৰেদেতি; সহাপি দুক্খেন সহাপি দোমনস্সেন অব্যাপন্নচিত্তো হোতি, অব্যাপাদপচ্চযা চ দুক্খং দোমনস্সং পটিসংৰেদেতি; সহাপি দুক্খেন সহাপি দোমনস্সেন সম্মাদিট্ঠি হোতি, সম্মাদিট্ঠিপচ্চযা চ দুক্খং দোমনস্সং পটিসংৰেদেতি। সো কাযস্স ভেদা পরং মরণা সুগতিং সগ্গং লোকং উপপজ্জতি। ইদং ৰুচ্চতি, ভিক্খৰে, ধম্মসমাদানং পচ্চুপ্পন্নদুক্খং আযতিং সুখৰিপাকং।
480. ‘‘Katamañca, bhikkhave, dhammasamādānaṃ paccuppannadukkhaṃ āyatiṃ sukhavipākaṃ? Idha, bhikkhave, ekacco sahāpi dukkhena sahāpi domanassena pāṇātipātā paṭivirato hoti, pāṇātipātā veramaṇīpaccayā ca dukkhaṃ domanassaṃ paṭisaṃvedeti ; sahāpi dukkhena sahāpi domanassena adinnādānā paṭivirato hoti, adinnādānā veramaṇīpaccayā ca dukkhaṃ domanassaṃ paṭisaṃvedeti; sahāpi dukkhena sahāpi domanassena kāmesumicchācārā paṭivirato hoti, kāmesumicchācārā veramaṇīpaccayā ca dukkhaṃ domanassaṃ paṭisaṃvedeti; sahāpi dukkhena sahāpi domanassena musāvādā paṭivirato hoti, musāvādā veramaṇīpaccayā ca dukkhaṃ domanassaṃ paṭisaṃvedeti; sahāpi dukkhena sahāpi domanassena pisuṇāya vācāya paṭivirato hoti , pisuṇāya vācāya veramaṇīpaccayā ca dukkhaṃ domanassaṃ paṭisaṃvedeti ; sahāpi dukkhena sahāpi domanassena pharusāya vācāya paṭivirato hoti, pharusāya vācāya veramaṇīpaccayā ca dukkhaṃ domanassaṃ paṭisaṃvedeti; sahāpi dukkhena sahāpi domanassena samphappalāpā paṭivirato hoti, samphappalāpā veramaṇīpaccayā ca dukkhaṃ domanassaṃ paṭisaṃvedeti; sahāpi dukkhena sahāpi domanassena anabhijjhālu hoti, anabhijjhāpaccayā ca dukkhaṃ domanassaṃ paṭisaṃvedeti; sahāpi dukkhena sahāpi domanassena abyāpannacitto hoti, abyāpādapaccayā ca dukkhaṃ domanassaṃ paṭisaṃvedeti; sahāpi dukkhena sahāpi domanassena sammādiṭṭhi hoti, sammādiṭṭhipaccayā ca dukkhaṃ domanassaṃ paṭisaṃvedeti. So kāyassa bhedā paraṃ maraṇā sugatiṃ saggaṃ lokaṃ upapajjati. Idaṃ vuccati, bhikkhave, dhammasamādānaṃ paccuppannadukkhaṃ āyatiṃ sukhavipākaṃ.
৪৮১. ‘‘কতমঞ্চ, ভিক্খৰে, ধম্মসমাদানং পচ্চুপ্পন্নসুখঞ্চেৰ আযতিঞ্চ সুখৰিপাকং? ইধ, ভিক্খৰে, একচ্চো সহাপি সুখেন সহাপি সোমনস্সেন পাণাতিপাতা পটিৰিরতো হোতি, পাণাতিপাতা ৰেরমণীপচ্চযা চ সুখং সোমনস্সং পটিসংৰেদেতি; সহাপি সুখেন সহাপি সোমনস্সেন অদিন্নাদানা পটিৰিরতো হোতি, অদিন্নাদানা ৰেরমণীপচ্চযা চ সুখং সোমনস্সং পটিসংৰেদেতি; সহাপি সুখেন সহাপি সোমনস্সেন কামেসুমিচ্ছাচারা পটিৰিরতো হোতি, কামেসুমিচ্ছাচারা ৰেরমণীপচ্চযা চ সুখং সোমনস্সং পটিসংৰেদেতি; সহাপি সুখেন সহাপি সোমনস্সেন মুসাৰাদা পটিৰিরতো হোতি, মুসাৰাদা ৰেরমণীপচ্চযা চ সুখং সোমনস্সং পটিসংৰেদেতি; সহাপি সুখেন সহাপি সোমনস্সেন পিসুণায ৰাচায পটিৰিরতো হোতি, পিসুণায ৰাচায ৰেরমণীপচ্চযা চ সুখং সোমনস্সং পটিসংৰেদেতি; সহাপি সুখেন সহাপি সোমনস্সেন ফরুসায ৰাচায পটিৰিরতো হোতি, ফরুসায ৰাচায ৰেরমণীপচ্চযা চ সুখং সোমনস্সং পটিসংৰেদেতি; সহাপি সুখেন সহাপি সোমনস্সেন সম্ফপ্পলাপা পটিৰিরতো হোতি, সম্ফপ্পলাপা ৰেরমণীপচ্চযা চ সুখং সোমনস্সং পটিসংৰেদেতি; সহাপি সুখেন সহাপি সোমনস্সেন অনভিজ্ঝালু হোতি, অনভিজ্ঝাপচ্চযা চ সুখং সোমনস্সং পটিসংৰেদেতি; সহাপি সুখেন সহাপি সোমনস্সেন অব্যাপন্নচিত্তো হোতি, অব্যাপাদপচ্চযা চ সুখং সোমনস্সং পটিসংৰেদেতি; সহাপি সুখেন সহাপি সোমনস্সেন সম্মাদিট্ঠি হোতি, সম্মাদিট্ঠিপচ্চযা চ সুখং সোমনস্সং পটিসংৰেদেতি। সো কাযস্স ভেদা পরং মরণা সুগতিং সগ্গং লোকং উপপজ্জতি। ইদং, ৰুচ্চতি, ভিক্খৰে, ধম্মসমাদানং পচ্চুপ্পন্নসুখঞ্চেৰ আযতিঞ্চ সুখৰিপাকং। ইমানি খো, ভিক্খৰে, চত্তারি ধম্মসমাদানানি।
481. ‘‘Katamañca, bhikkhave, dhammasamādānaṃ paccuppannasukhañceva āyatiñca sukhavipākaṃ? Idha, bhikkhave, ekacco sahāpi sukhena sahāpi somanassena pāṇātipātā paṭivirato hoti, pāṇātipātā veramaṇīpaccayā ca sukhaṃ somanassaṃ paṭisaṃvedeti; sahāpi sukhena sahāpi somanassena adinnādānā paṭivirato hoti, adinnādānā veramaṇīpaccayā ca sukhaṃ somanassaṃ paṭisaṃvedeti; sahāpi sukhena sahāpi somanassena kāmesumicchācārā paṭivirato hoti, kāmesumicchācārā veramaṇīpaccayā ca sukhaṃ somanassaṃ paṭisaṃvedeti; sahāpi sukhena sahāpi somanassena musāvādā paṭivirato hoti, musāvādā veramaṇīpaccayā ca sukhaṃ somanassaṃ paṭisaṃvedeti; sahāpi sukhena sahāpi somanassena pisuṇāya vācāya paṭivirato hoti, pisuṇāya vācāya veramaṇīpaccayā ca sukhaṃ somanassaṃ paṭisaṃvedeti; sahāpi sukhena sahāpi somanassena pharusāya vācāya paṭivirato hoti, pharusāya vācāya veramaṇīpaccayā ca sukhaṃ somanassaṃ paṭisaṃvedeti; sahāpi sukhena sahāpi somanassena samphappalāpā paṭivirato hoti, samphappalāpā veramaṇīpaccayā ca sukhaṃ somanassaṃ paṭisaṃvedeti; sahāpi sukhena sahāpi somanassena anabhijjhālu hoti, anabhijjhāpaccayā ca sukhaṃ somanassaṃ paṭisaṃvedeti; sahāpi sukhena sahāpi somanassena abyāpannacitto hoti, abyāpādapaccayā ca sukhaṃ somanassaṃ paṭisaṃvedeti; sahāpi sukhena sahāpi somanassena sammādiṭṭhi hoti, sammādiṭṭhipaccayā ca sukhaṃ somanassaṃ paṭisaṃvedeti. So kāyassa bhedā paraṃ maraṇā sugatiṃ saggaṃ lokaṃ upapajjati. Idaṃ, vuccati, bhikkhave, dhammasamādānaṃ paccuppannasukhañceva āyatiñca sukhavipākaṃ. Imāni kho, bhikkhave, cattāri dhammasamādānāni.
৪৮২. ‘‘সেয্যথাপি, ভিক্খৰে, তিত্তকালাবু ৰিসেন সংসট্ঠো। অথ পুরিসো আগচ্ছেয্য জীৰিতুকামো অমরিতুকামো সুখকামো দুক্খপ্পটিকূলো। তমেনং এৰং ৰদেয্যুং – ‘অম্ভো পুরিস, অযং তিত্তকালাবু ৰিসেন সংসট্ঠো, সচে আকঙ্খসি পিৰ 3। তস্স তে পিৰতো 4 চেৰ নচ্ছাদেস্সতি ৰণ্ণেনপি গন্ধেনপি রসেনপি, পিৰিত্ৰা 5 চ পন মরণং ৰা নিগচ্ছসি মরণমত্তং ৰা দুক্খ’ন্তি। সো তং অপ্পটিসঙ্খায পিৰেয্য, নপ্পটিনিস্সজ্জেয্য। তস্স তং পিৰতো চেৰ নচ্ছাদেয্য ৰণ্ণেনপি গন্ধেনপি রসেনপি, পিৰিত্ৰা চ পন মরণং ৰা নিগচ্ছেয্য মরণমত্তং ৰা দুক্খং। তথূপমাহং, ভিক্খৰে, ইমং ধম্মসমাদানং ৰদামি, যমিদং ধম্মসমাদানং পচ্চুপ্পন্নদুক্খঞ্চেৰ আযতিঞ্চ দুক্খৰিপাকং।
482. ‘‘Seyyathāpi, bhikkhave, tittakālābu visena saṃsaṭṭho. Atha puriso āgaccheyya jīvitukāmo amaritukāmo sukhakāmo dukkhappaṭikūlo. Tamenaṃ evaṃ vadeyyuṃ – ‘ambho purisa, ayaṃ tittakālābu visena saṃsaṭṭho, sace ākaṅkhasi piva 6. Tassa te pivato 7 ceva nacchādessati vaṇṇenapi gandhenapi rasenapi, pivitvā 8 ca pana maraṇaṃ vā nigacchasi maraṇamattaṃ vā dukkha’nti. So taṃ appaṭisaṅkhāya piveyya, nappaṭinissajjeyya. Tassa taṃ pivato ceva nacchādeyya vaṇṇenapi gandhenapi rasenapi, pivitvā ca pana maraṇaṃ vā nigaccheyya maraṇamattaṃ vā dukkhaṃ. Tathūpamāhaṃ, bhikkhave, imaṃ dhammasamādānaṃ vadāmi, yamidaṃ dhammasamādānaṃ paccuppannadukkhañceva āyatiñca dukkhavipākaṃ.
৪৮৩. ‘‘সেয্যথাপি, ভিক্খৰে, আপানীযকংসো ৰণ্ণসম্পন্নো গন্ধসম্পন্নো রসসম্পন্নো। সো চ খো ৰিসেন সংসট্ঠো। অথ পুরিসো আগচ্ছেয্য জীৰিতুকামো অমরিতুকামো সুখকামো দুক্খপ্পটিকূলো। তমেনং এৰং ৰদেয্যুং – ‘অম্ভো পুরিস, অযং আপানীযকংসো ৰণ্ণসম্পন্নো গন্ধসম্পন্নো রসসম্পন্নো। সো চ খো ৰিসেন সংসট্ঠো, সচে আকঙ্খসি পিৰ। তস্স তে পিৰতোহি 9 খো ছাদেস্সতি ৰণ্ণেনপি গন্ধেনপি রসেনপি, পিৰিত্ৰা চ পন মরণং ৰা নিগচ্ছসি মরণমত্তং ৰা দুক্খ’ন্তি। সো তং অপ্পটিসঙ্খায পিৰেয্য, নপ্পটিনিস্সজ্জেয্য। তস্স তং পিৰতোহি খো ছাদেয্য ৰণ্ণেনপি গন্ধেনপি রসেনপি, পিৰিত্ৰা চ পন মরণং ৰা নিগচ্ছেয্য মরণমত্তং ৰা দুক্খং। তথূপমাহং, ভিক্খৰে, ইমং ধম্মসমাদানং ৰদামি, যমিদং ধম্মসমাদানং পচ্চুপ্পন্নসুখং আযতিং দুক্খৰিপাকং।
483. ‘‘Seyyathāpi, bhikkhave, āpānīyakaṃso vaṇṇasampanno gandhasampanno rasasampanno. So ca kho visena saṃsaṭṭho. Atha puriso āgaccheyya jīvitukāmo amaritukāmo sukhakāmo dukkhappaṭikūlo. Tamenaṃ evaṃ vadeyyuṃ – ‘ambho purisa, ayaṃ āpānīyakaṃso vaṇṇasampanno gandhasampanno rasasampanno. So ca kho visena saṃsaṭṭho, sace ākaṅkhasi piva. Tassa te pivatohi 10 kho chādessati vaṇṇenapi gandhenapi rasenapi, pivitvā ca pana maraṇaṃ vā nigacchasi maraṇamattaṃ vā dukkha’nti. So taṃ appaṭisaṅkhāya piveyya, nappaṭinissajjeyya. Tassa taṃ pivatohi kho chādeyya vaṇṇenapi gandhenapi rasenapi, pivitvā ca pana maraṇaṃ vā nigaccheyya maraṇamattaṃ vā dukkhaṃ. Tathūpamāhaṃ, bhikkhave, imaṃ dhammasamādānaṃ vadāmi, yamidaṃ dhammasamādānaṃ paccuppannasukhaṃ āyatiṃ dukkhavipākaṃ.
৪৮৪. ‘‘সেয্যথাপি, ভিক্খৰে, পূতিমুত্তং নানাভেসজ্জেহি সংসট্ঠং। অথ পুরিসো আগচ্ছেয্য পণ্ডুকরোগী। তমেনং এৰং ৰদেয্যুং – ‘অম্ভো পুরিস, ইদং পূতিমুত্তং নানাভেসজ্জেহি সংসট্ঠং, সচে আকঙ্খসি পিৰ। তস্স তে পিৰতোহি খো নচ্ছাদেস্সতি ৰণ্ণেনপি গন্ধেনপি রসেনপি, পিৰিত্ৰা চ পন সুখী ভৰিস্সসী’তি। সো তং পটিসঙ্খায পিৰেয্য, নপ্পটিনিস্সজ্জেয্য। তস্স তং পিৰতোহি খো নচ্ছাদেয্য ৰণ্ণেনপি গন্ধেনপি রসেনপি, পিৰিত্ৰা চ পন সুখী অস্স। তথূপমাহং, ভিক্খৰে, ইমং ধম্মসমাদানং ৰদামি, যমিদং ধম্মসমাদানং পচ্চুপ্পন্নদুক্খং আযতিং সুখৰিপাকং।
484. ‘‘Seyyathāpi, bhikkhave, pūtimuttaṃ nānābhesajjehi saṃsaṭṭhaṃ. Atha puriso āgaccheyya paṇḍukarogī. Tamenaṃ evaṃ vadeyyuṃ – ‘ambho purisa, idaṃ pūtimuttaṃ nānābhesajjehi saṃsaṭṭhaṃ, sace ākaṅkhasi piva. Tassa te pivatohi kho nacchādessati vaṇṇenapi gandhenapi rasenapi, pivitvā ca pana sukhī bhavissasī’ti. So taṃ paṭisaṅkhāya piveyya, nappaṭinissajjeyya. Tassa taṃ pivatohi kho nacchādeyya vaṇṇenapi gandhenapi rasenapi, pivitvā ca pana sukhī assa. Tathūpamāhaṃ, bhikkhave, imaṃ dhammasamādānaṃ vadāmi, yamidaṃ dhammasamādānaṃ paccuppannadukkhaṃ āyatiṃ sukhavipākaṃ.
৪৮৫. ‘‘সেয্যথাপি, ভিক্খৰে, দধি চ মধু চ সপ্পি চ ফাণিতঞ্চ একজ্ঝং সংসট্ঠং। অথ পুরিসো আগচ্ছেয্য লোহিতপক্খন্দিকো। তমেনং এৰং ৰদেয্যুং – ‘অম্ভো পুরিস, ইদং দধিং চ মধুং চ সপ্পিং চ ফাণিতঞ্চ একজ্ঝং সংসট্ঠং, সচে আকঙ্খসি পিৰ। তস্স তে পিৰতো চেৰ ছাদেস্সতি ৰণ্ণেনপি গন্ধেনপি রসেনপি, পিৰিত্ৰা চ পন সুখী ভৰিস্সসী’তি। সো তং পটিসঙ্খায পিৰেয্য, নপ্পটিনিস্সজ্জেয্য। তস্স তং পিৰতো চেৰ ছাদেয্য ৰণ্ণেনপি গন্ধেনপি রসেনপি, পিৰিত্ৰা চ পন সুখী অস্স। তথূপমাহং, ভিক্খৰে, ইমং ধম্মসমাদানং ৰদামি, যমিদং ধম্মসমাদানং পচ্চুপ্পন্নসুখঞ্চেৰ আযতিঞ্চ সুখৰিপাকং।
485. ‘‘Seyyathāpi, bhikkhave, dadhi ca madhu ca sappi ca phāṇitañca ekajjhaṃ saṃsaṭṭhaṃ. Atha puriso āgaccheyya lohitapakkhandiko. Tamenaṃ evaṃ vadeyyuṃ – ‘ambho purisa, idaṃ dadhiṃ ca madhuṃ ca sappiṃ ca phāṇitañca ekajjhaṃ saṃsaṭṭhaṃ, sace ākaṅkhasi piva. Tassa te pivato ceva chādessati vaṇṇenapi gandhenapi rasenapi, pivitvā ca pana sukhī bhavissasī’ti. So taṃ paṭisaṅkhāya piveyya, nappaṭinissajjeyya. Tassa taṃ pivato ceva chādeyya vaṇṇenapi gandhenapi rasenapi, pivitvā ca pana sukhī assa. Tathūpamāhaṃ, bhikkhave, imaṃ dhammasamādānaṃ vadāmi, yamidaṃ dhammasamādānaṃ paccuppannasukhañceva āyatiñca sukhavipākaṃ.
৪৮৬. ‘‘সেয্যথাপি, ভিক্খৰে, ৰস্সানং পচ্ছিমে মাসে সরদসমযে ৰিদ্ধে ৰিগতৰলাহকে দেৰে আদিচ্চো নভং অব্ভুস্সক্কমানো সব্বং আকাসগতং তমগতং অভিৰিহচ্চ ভাসতে চ তপতে চ ৰিরোচতে চ; এৰমেৰ খো, ভিক্খৰে, যমিদং ধম্মসমাদানং পচ্চুপ্পন্নসুখঞ্চেৰ আযতিঞ্চ সুখৰিপাকং তদঞ্ঞে পুথুসমণব্রাহ্মণপরপ্পৰাদে অভিৰিহচ্চ ভাসতে চ তপতে চ ৰিরোচতে চা’’তি।
486. ‘‘Seyyathāpi, bhikkhave, vassānaṃ pacchime māse saradasamaye viddhe vigatavalāhake deve ādicco nabhaṃ abbhussakkamāno sabbaṃ ākāsagataṃ tamagataṃ abhivihacca bhāsate ca tapate ca virocate ca; evameva kho, bhikkhave, yamidaṃ dhammasamādānaṃ paccuppannasukhañceva āyatiñca sukhavipākaṃ tadaññe puthusamaṇabrāhmaṇaparappavāde abhivihacca bhāsate ca tapate ca virocate cā’’ti.
ইদমৰোচ ভগৰা। অত্তমনা তে ভিক্খূ ভগৰতো ভাসিতং অভিনন্দুন্তি।
Idamavoca bhagavā. Attamanā te bhikkhū bhagavato bhāsitaṃ abhinandunti.
মহাধম্মসমাদানসুত্তং নিট্ঠিতং ছট্ঠং।
Mahādhammasamādānasuttaṃ niṭṭhitaṃ chaṭṭhaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৬. মহাধম্মসমাদানসুত্তৰণ্ণনা • 6. Mahādhammasamādānasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৬. মহাধম্মসমাদানসুত্তৰণ্ণনা • 6. Mahādhammasamādānasuttavaṇṇanā
