| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
6. மஹாத⁴ம்மஸமாதா³னஸுத்தவண்ணனா
6. Mahādhammasamādānasuttavaṇṇanā
473. ஏவங் இதா³னி வுச்சமானாகாரோ காமோ காமனங் இச்சா² ஏதேஸந்தி ஏவங்காமா. ஏவங் ச²ந்தோ³ ச²ந்த³னங் ரோசனங் அஜ்ஜா²ஸயோ ஏதேஸந்தி ஏவங்ச²ந்தா³. அபி⁴முக²ங், அபி⁴னிவிஸ்ஸ வா பகாரேஹி ஏதி உபக³ச்ச²தீதி அதி⁴ப்பாயோ, லத்³தி⁴. ஸா ஹி லத்³த⁴ப்³ப³வத்து²ங் அபி⁴முக²ங் ‘‘ஏவமேத’’ந்தி அபி⁴னிவிஸந்தீ தேன தேன பகாரேன உபக³ச்ச²தி, ஹத்த²க³தங் கத்வா திட்ட²தி ந விஸ்ஸஜ்ஜேதி. ஏவங் வுச்சமானாகாரோ அதி⁴ப்பாயோ ஏதேஸந்தி ஏவங்அதி⁴ப்பாயா. ப⁴க³வா மூலங் காரணங் ஏதேஸங் யாதா²வதோ அதி⁴க³மாயாதி ப⁴க³வங்மூலகா. தேனாஹ ‘‘ப⁴க³வந்தஞ்ஹி நிஸ்ஸாய மயங் இமே த⁴ம்மே ஆஜானாம படிவிஜ்ஜா²மா’’தி. அம்ஹாகங் த⁴ம்மாதி தேஹி அத்தனா அதி⁴க³ந்தப்³ப³தாய வுத்தங். ஸேவிதப்³பா³னஞ்ஹி யாதா²வதோ அதி⁴க³மஞாணானி அதி⁴க³ச்ச²னகஸம்ப³ந்தீ⁴னி, தானி ச ஸம்மாஸம்பு³த்³த⁴மூலகானி அனஞ்ஞவிஸயத்தா. தேனாஹ ‘‘புப்³பே³ கஸ்ஸபஸம்பு³த்³தே⁴னா’’திஆதி³. ப⁴க³வா நேதா தேஸந்தி ப⁴க³வங்னெத்திகா. நேதாதி ஸேவிதப்³ப³த⁴ம்மே வினெய்யஸந்தானங் பாபேதா. வினேதாதி அஸேவிதப்³ப³த⁴ம்மே வினெய்யஸந்தானதோ அபனேதா. தத³ங்க³வினயாதி³வஸேன வா வினேதா. அனுனேதாதி இமே த⁴ம்மா ஸேவிதப்³பா³, இமே ந ஸேவிதப்³பா³தி உப⁴யஸம்பாபனாபனயனத்த²ங் பஞ்ஞபேதா. தேனாஹ ‘‘யதா²ஸபா⁴வதோ’’திஆதி³.
473. Evaṃ idāni vuccamānākāro kāmo kāmanaṃ icchā etesanti evaṃkāmā. Evaṃ chando chandanaṃ rocanaṃ ajjhāsayo etesanti evaṃchandā. Abhimukhaṃ, abhinivissa vā pakārehi eti upagacchatīti adhippāyo, laddhi. Sā hi laddhabbavatthuṃ abhimukhaṃ ‘‘evameta’’nti abhinivisantī tena tena pakārena upagacchati, hatthagataṃ katvā tiṭṭhati na vissajjeti. Evaṃ vuccamānākāro adhippāyo etesanti evaṃadhippāyā. Bhagavā mūlaṃ kāraṇaṃ etesaṃ yāthāvato adhigamāyāti bhagavaṃmūlakā. Tenāha ‘‘bhagavantañhi nissāya mayaṃ ime dhamme ājānāma paṭivijjhāmā’’ti. Amhākaṃdhammāti tehi attanā adhigantabbatāya vuttaṃ. Sevitabbānañhi yāthāvato adhigamañāṇāni adhigacchanakasambandhīni, tāni ca sammāsambuddhamūlakāni anaññavisayattā. Tenāha ‘‘pubbe kassapasambuddhenā’’tiādi. Bhagavā netā tesanti bhagavaṃnettikā. Netāti sevitabbadhamme vineyyasantānaṃ pāpetā. Vinetāti asevitabbadhamme vineyyasantānato apanetā. Tadaṅgavinayādivasena vā vinetā. Anunetāti ime dhammā sevitabbā, ime na sevitabbāti ubhayasampāpanāpanayanatthaṃ paññapetā. Tenāha ‘‘yathāsabhāvato’’tiādi.
படிஸரந்தி எத்தா²தி படிஸரணங், ப⁴க³வா படிஸரணங் ஏதேஸந்தி ப⁴க³வங்படிஸரணா. படிஸரதி ஸபா⁴வஸம்படிவேத⁴வஸேன பச்சேகமுபக³ச்ச²தீதி வா படிஸரணங், ப⁴க³வா படிஸரணங் ஏதேஸந்தி ப⁴க³வங்படிஸரணா. படிவேத⁴வஸேனாதி படிவிஜ்ஜி²தப்³ப³தாவஸேன. அஸதிபி முகே² அத்த²தோ ஏவங் வத³ந்தோ விய ஹோதீதி ஆஹ ‘‘ப²ஸ்ஸோ ஆக³ச்ச²தி, அஹங் ப⁴க³வா கிங் நாமோ’’தி. படிபா⁴தூதி எத்த² படி-ஸத்³தா³பெக்கா²ய ‘‘ப⁴க³வந்த’’ந்தி உபயோக³வசனங், அத்தோ² பன ஸாமிவசனவஸேனேவ வேதி³தப்³போ³தி த³ஸ்ஸெந்தோ ஆஹ ‘‘ப⁴க³வதோ’’தி படிபா⁴தூதி ச ப⁴க³வதோ பா⁴கோ³ ஹோது. ப⁴க³வதோ ஹி ஏஸ பா⁴கோ³, யதி³த³ங் த⁴ம்மஸ்ஸ தே³ஸனா, அம்ஹாகங் பன பா⁴கோ³ ஸவனந்தி அதி⁴ப்பாயோ. கேசி பன படிபா⁴தூதி பதி³ஸ்ஸதூதி அத்த²ங் வத³ந்தி, ஞாணேன தி³ஸ்ஸது, தே³ஸீயதூதி வா அத்தோ². உபட்டா²தூதி ச ஞாணஸ்ஸ பச்சுபட்டா²து.
Paṭisaranti etthāti paṭisaraṇaṃ, bhagavā paṭisaraṇaṃ etesanti bhagavaṃpaṭisaraṇā. Paṭisarati sabhāvasampaṭivedhavasena paccekamupagacchatīti vā paṭisaraṇaṃ, bhagavā paṭisaraṇaṃ etesanti bhagavaṃpaṭisaraṇā. Paṭivedhavasenāti paṭivijjhitabbatāvasena. Asatipi mukhe atthato evaṃ vadanto viya hotīti āha ‘‘phasso āgacchati, ahaṃ bhagavā kiṃ nāmo’’ti. Paṭibhātūti ettha paṭi-saddāpekkhāya ‘‘bhagavanta’’nti upayogavacanaṃ, attho pana sāmivacanavaseneva veditabboti dassento āha ‘‘bhagavato’’ti paṭibhātūti ca bhagavato bhāgo hotu. Bhagavato hi esa bhāgo, yadidaṃ dhammassa desanā, amhākaṃ pana bhāgo savananti adhippāyo. Keci pana paṭibhātūti padissatūti atthaṃ vadanti, ñāṇena dissatu, desīyatūti vā attho. Upaṭṭhātūti ca ñāṇassa paccupaṭṭhātu.
474. நிஸ்ஸயிதப்³பே³தி அத்தனோ ஸந்தானே உப்பாத³னவஸேன அபஸ்ஸயிதப்³பே³. ததியசதுத்த²த⁴ம்மஸமாதா³னானி ஹி அபஸ்ஸாய ஸத்தானங் ஏதரஹி ஆயதிஞ்ச ஸம்பத்தியோ அபி⁴வட்³ட⁴ந்தி. ப⁴ஜிதப்³பே³தி தஸ்ஸேவ வேவசனங். ஸேவிதப்³பே³தி வா ஸப்புரிஸுபஸ்ஸயஸத்³த⁴ம்மஸ்ஸவனயோனிஸோமனஸிகாரே ஸந்தா⁴யாஹ. ப⁴ஜிதப்³பே³தி தப்பச்சயே தா³னாதி³புஞ்ஞத⁴ம்மே.
474.Nissayitabbeti attano santāne uppādanavasena apassayitabbe. Tatiyacatutthadhammasamādānāni hi apassāya sattānaṃ etarahi āyatiñca sampattiyo abhivaḍḍhanti. Bhajitabbeti tasseva vevacanaṃ. Sevitabbeti vā sappurisupassayasaddhammassavanayonisomanasikāre sandhāyāha. Bhajitabbeti tappaccaye dānādipuññadhamme.
475. உப்படிபாடிஆகாரேனாதி பட²மங் ஸங்கிலேஸத⁴ம்மே த³ஸ்ஸெத்வா பச்சா² வோதா³னத⁴ம்மத³ஸ்ஸனங் ஸத்து² தே³ஸனாபடிபாடி, யதா² – ‘‘வாமங் முஞ்ச, த³க்கி²ணங் க³ண்ஹா’’தி (த⁴॰ ஸ॰ அட்ட²॰ 498; விஸுத்³தி⁴॰ மஹாடீ॰ 1.14), ததா² உப்படிபாடிபகாரேன, ஸா ச கோ² புரிமேஸு த்³வீஸு த⁴ம்மஸமாதா³னேஸு , பச்சி²மேஸு பன படிபாடியாவ மாதிகா பட்ட²பிதா. யதா²த⁴ம்மரஸேனேவாதி பஹாதப்³ப³பஹாயகத⁴ம்மானங் யதா²ஸபா⁴வேனேவ. ஸபா⁴வோ ஹி யாதா²வதோ ரஸிதப்³ப³தோ ஜானிதப்³ப³தோ ‘‘ரஸோ’’தி வுச்சதி. பட²மங் பஹாதப்³ப³த⁴ம்மே த³ஸ்ஸெத்வா தத³னந்தரங் ‘‘இமே த⁴ம்மா ஏதேஹி பஹீயந்தீ’’தி பஹாயகத⁴ம்மத³ஸ்ஸனங் தே³ஸனானுபுப்³பீ³. க³ஹணங் ஆதி³யனங் அத்தனோ ஸந்தானே உப்பாத³னங்.
475.Uppaṭipāṭiākārenāti paṭhamaṃ saṃkilesadhamme dassetvā pacchā vodānadhammadassanaṃ satthu desanāpaṭipāṭi, yathā – ‘‘vāmaṃ muñca, dakkhiṇaṃ gaṇhā’’ti (dha. sa. aṭṭha. 498; visuddhi. mahāṭī. 1.14), tathā uppaṭipāṭipakārena, sā ca kho purimesu dvīsu dhammasamādānesu , pacchimesu pana paṭipāṭiyāva mātikā paṭṭhapitā. Yathādhammarasenevāti pahātabbapahāyakadhammānaṃ yathāsabhāveneva. Sabhāvo hi yāthāvato rasitabbato jānitabbato ‘‘raso’’ti vuccati. Paṭhamaṃ pahātabbadhamme dassetvā tadanantaraṃ ‘‘ime dhammā etehi pahīyantī’’ti pahāyakadhammadassanaṃ desanānupubbī. Gahaṇaṃ ādiyanaṃ attano santāne uppādanaṃ.
478. வத⁴த³ண்டா³தீ³ஹி பீ⁴தஸ்ஸ உபஸங்கமனே, மிச்சா² சரித்வா ததா² அபக³மனே ச புப்³பா³பரசேதனானங் வஸேன மிச்சா²சாரோ து³க்க²வேத³னோ ஹோதி, ததா² இஸ்ஸானிந்தா³தீ³ஹி உபத்³து³தஸ்ஸ அபரசேதனாவஸேன, ஏவங் அபி⁴ஜ்ஜா²மிச்சா²தி³ட்டீ²ஸுபி யதா²ரஹங் வேதி³தப்³ப³ங். திஸ்ஸன்னம்பி சேதனானந்தி புப்³பா³பரஸன்னிட்டா²பகசேதனானங். அதி³ன்னாதா³னங் முஸாவாதோ³ பிஸுணவாசா ஸம்ப²ப்பலாபோதி இமேஸங் சதுன்னங் ஸன்னிட்டா²பகசேதனானங் ஸுக²ஸம்பயுத்தா வா உபெக்கா²ஸம்பயுத்தா வாதி அயங் நயோ இத⁴ அதி⁴கதத்தா ந உத்³த⁴டோ. தோ³மனஸ்ஸமேவ செத்த² து³க்க²ந்தி இத³ங் புப்³ப³பா⁴கா³பரபா⁴க³சேதனாபி செத்த² ஆஸன்னா தோ³மனஸ்ஸஸஹக³தா ஏவ ஹொந்தீதி கத்வா வுத்தங். அனாஸன்னா பன ஸந்தா⁴ய ‘‘பரியெட்டி²ங் வா ஆபஜ்ஜந்தஸ்ஸா’’திஆதி³ வுத்தங். தேனேவ மிச்சா²சாராபி⁴ஜ்ஜா²மிச்சா²தி³ட்டீ²னங் புப்³ப³பா⁴கா³பரபா⁴க³சேதனா ஆஸன்னா ஸன்னிட்டா²பகசேதனாக³திகாவாதி த³ஸ்ஸிதங் ஹோதீதி த³ட்ட²ப்³ப³ங். பரியெட்டி²ந்தி மிச்சா²சாராதீ³ஸு வீதிக்கமிதப்³ப³வத்து²மாலாக³ந்தா⁴தி³பரியேஸனங். பாணாதிபாதாதீ³ஸு மாரேதப்³ப³வத்து²ஆவுதா⁴தி³பரியேஸனங் ஆபஜ்ஜந்தஸ்ஸ. அகிச்சே²னபி தேஸங் பரியேஸனங் ஸம்ப⁴வதீதி ‘‘வட்டதியேவா’’தி ஸாஸங்கங் வத³தி.
478. Vadhadaṇḍādīhi bhītassa upasaṅkamane, micchā caritvā tathā apagamane ca pubbāparacetanānaṃ vasena micchācāro dukkhavedano hoti, tathā issānindādīhi upaddutassa aparacetanāvasena, evaṃ abhijjhāmicchādiṭṭhīsupi yathārahaṃ veditabbaṃ. Tissannampi cetanānanti pubbāparasanniṭṭhāpakacetanānaṃ. Adinnādānaṃ musāvādo pisuṇavācā samphappalāpoti imesaṃ catunnaṃ sanniṭṭhāpakacetanānaṃ sukhasampayuttā vā upekkhāsampayuttā vāti ayaṃ nayo idha adhikatattā na uddhaṭo. Domanassameva cettha dukkhanti idaṃ pubbabhāgāparabhāgacetanāpi cettha āsannā domanassasahagatā eva hontīti katvā vuttaṃ. Anāsannā pana sandhāya ‘‘pariyeṭṭhiṃ vā āpajjantassā’’tiādi vuttaṃ. Teneva micchācārābhijjhāmicchādiṭṭhīnaṃ pubbabhāgāparabhāgacetanā āsannā sanniṭṭhāpakacetanāgatikāvāti dassitaṃ hotīti daṭṭhabbaṃ. Pariyeṭṭhinti micchācārādīsu vītikkamitabbavatthumālāgandhādipariyesanaṃ. Pāṇātipātādīsu māretabbavatthuāvudhādipariyesanaṃ āpajjantassa. Akicchenapi tesaṃ pariyesanaṃ sambhavatīti ‘‘vaṭṭatiyevā’’ti sāsaṅkaṃ vadati.
479. ஸுக²வேத³னா ஹொந்தீதி ஸுக²வேத³னாபி ஹொந்தீதி அதி⁴ப்பாயோ. தாஸங் சேதனானங் அஸுக²வேத³னதாபி லப்³ப⁴தீதி ‘‘ஸுக²வேத³னாபி ஹொந்தியேவா’’தி ஸாஸங்கவசனங். ஸோமனஸ்ஸமேவ செத்த² ஸுக²ந்தி இத³ங் புப்³ப³பா⁴கா³பரபா⁴க³சேதனாபி ஸோமனஸ்ஸஸஹக³தா ஏவ ஹொந்தீதி கத்வா வுத்தங். தஞ்ச கோ² மிச்சா²சாரவஜ்ஜானங் ச²ன்னங் வஸேன. மிச்சா²சாரஸ்ஸ பன புப்³பா³பரபா⁴க³ஸ்ஸ வஸேன ‘‘காயிகங் ஸுக²ம்பி வட்டதியேவாதி ஸாஸங்கவசனங்.
479.Sukhavedanā hontīti sukhavedanāpi hontīti adhippāyo. Tāsaṃ cetanānaṃ asukhavedanatāpi labbhatīti ‘‘sukhavedanāpi hontiyevā’’ti sāsaṅkavacanaṃ. Somanassameva cettha sukhanti idaṃ pubbabhāgāparabhāgacetanāpi somanassasahagatā eva hontīti katvā vuttaṃ. Tañca kho micchācāravajjānaṃ channaṃ vasena. Micchācārassa pana pubbāparabhāgassa vasena ‘‘kāyikaṃ sukhampi vaṭṭatiyevāti sāsaṅkavacanaṃ.
480. தோ³ஸஜபரிளாஹவஸேனஸ்ஸ ஸியா காயிகம்பி து³க்க²ந்தி அதி⁴ப்பாயேன ‘‘ஸோ க³ண்ஹந்தோபி து³க்கி²தோ’’தி வுத்தங். சேதோது³க்க²மேவ வா ஸந்தா⁴ய தஸ்ஸ அபராபருப்பத்தித³ஸ்ஸனத்த²ங் ‘‘து³க்கி²தோ தோ³மனஸ்ஸிதோ’’தி வுத்தங்.
480. Dosajapariḷāhavasenassa siyā kāyikampi dukkhanti adhippāyena ‘‘so gaṇhantopi dukkhito’’ti vuttaṃ. Cetodukkhameva vā sandhāya tassa aparāparuppattidassanatthaṃ ‘‘dukkhito domanassito’’ti vuttaṃ.
481. த³ஸஸுபி பதே³ஸூதி த³ஸஸுபி கொட்டா²ஸேஸு, வாக்யேஸு வா. உபெக்கா²ஸம்பயுத்ததாபி ஸம்ப⁴வதீதி ‘‘ஸுக²ஸம்பயுத்தா ஹொந்தியேவா’’தி இத⁴ ஸாஸங்கவசனங். பாணாதிபாதா படிவிரதஸ்ஸ காயோபி ஸியா விக³தத³ரத²பரிளாஹோதி பாணாதிபாதாவேரமணிஆதி³பச்சயா காயிகபடிஸங்வேத³னாபி ஸம்ப⁴வதீதி ஸஹாபி ஸுகே²னாதி எத்த² காயியஸுக²ம்பி வட்டதியேவ.
481.Dasasupipadesūti dasasupi koṭṭhāsesu, vākyesu vā. Upekkhāsampayuttatāpi sambhavatīti ‘‘sukhasampayuttā hontiyevā’’ti idha sāsaṅkavacanaṃ. Pāṇātipātā paṭiviratassa kāyopi siyā vigatadarathapariḷāhoti pāṇātipātāveramaṇiādipaccayā kāyikapaṭisaṃvedanāpi sambhavatīti sahāpi sukhenāti ettha kāyiyasukhampi vaṭṭatiyeva.
482. தித்தகாலாபூ³தி உபபு⁴த்தஸ்ஸ உம்மாதா³தி³பாபனேன குச்சி²ததித்தகரஸோ அலாபு³. ந ருச்சிஸ்ஸதி அனிட்ட²ரஸதாய அனிட்ட²ப²லதாய ச.
482.Tittakālābūti upabhuttassa ummādādipāpanena kucchitatittakaraso alābu. Na ruccissati aniṭṭharasatāya aniṭṭhaphalatāya ca.
483. ரஸங் தே³தீதி ரஸங் த³ஸ்ஸேதி விபா⁴வேதி.
483.Rasaṃ detīti rasaṃ dasseti vibhāveti.
484. பூதிமுத்தந்தி பூதிஸபா⁴வமுத்தங். தருணந்தி தா⁴ராவஸேன நிபதந்தங் ஹுத்வா உண்ஹங். தேனஸ்ஸ உபரிமுத்ததமாஹ. முத்தஞ்ஹி பஸ்ஸாவமக்³க³தோ முச்சமானங் காயுஸ்மாவஸேன உண்ஹங் ஹோதி.
484.Pūtimuttanti pūtisabhāvamuttaṃ. Taruṇanti dhārāvasena nipatantaṃ hutvā uṇhaṃ. Tenassa uparimuttatamāha. Muttañhi passāvamaggato muccamānaṃ kāyusmāvasena uṇhaṃ hoti.
485. யங் ப⁴க³ந்த³ரஸங்ஸட்ட²ங் லோஹிதங் பக்க²ந்த³தீதி ப⁴க³ந்த³ரப்³யாதி⁴ஸஹிதாய லோஹிதபக்க²ந்த³தாய வஸேன யங் லோஹிதங் விஸ்ஸவதி. பித்தஸங்ஸட்ட²ங் லோஹிதங் பக்க²ந்த³தீதி ஆனெத்வா ஸம்ப³ந்தோ⁴.
485.Yaṃ bhagandarasaṃsaṭṭhaṃ lohitaṃ pakkhandatīti bhagandarabyādhisahitāya lohitapakkhandatāya vasena yaṃ lohitaṃ vissavati. Pittasaṃsaṭṭhaṃ lohitaṃ pakkhandatīti ānetvā sambandho.
486. உப்³பி³த்³தே⁴தி தூ³ரே. அப்³ப⁴மஹிகாதி³உபக்கிலேஸவிக³மேன ஹி ஆகாஸங் உத்துங்க³ங் விய தூ³ரங் விய ச கா²யதி. தேனாஹ ‘‘தூ³ரீபூ⁴தே’’தி. தமங்யேவ தமக³தங் ‘‘கூ³த²க³தங் முத்தக³த’’ந்தி (ம॰ நி॰ 2.119; அ॰ நி॰ 9.11) யதா². பா⁴ஸதே ச தபதே ச விரோசதே ச இத³ங் சதுத்த²ங் த⁴ம்மஸமாதா³னங் விப⁴ஜந்தேன குஸலகம்மபத²ஸ்ஸ விப⁴ஜித்வா த³ஸ்ஸிதத்தா.
486.Ubbiddheti dūre. Abbhamahikādiupakkilesavigamena hi ākāsaṃ uttuṅgaṃ viya dūraṃ viya ca khāyati. Tenāha ‘‘dūrībhūte’’ti. Tamaṃyeva tamagataṃ ‘‘gūthagataṃ muttagata’’nti (ma. ni. 2.119; a. ni. 9.11) yathā. Bhāsate ca tapate ca virocate ca idaṃ catutthaṃ dhammasamādānaṃ vibhajantena kusalakammapathassa vibhajitvā dassitattā.
ஸங்க³ரருக்கோ² கந்த³மாத³ஸபோவ. ஸரப⁴ஞ்ஞவஸேனாதி அத்த²ங் அவிப⁴ஜித்வா பத³ஸோ ஸரப⁴ஞ்ஞவஸேன. ஓஸாரெந்தஸ்ஸாதி உச்சாரெந்தஸ்ஸ. ஸத்³தே³தி ஓஸாரணஸத்³தே³. அதி⁴க³தவிஸேஸங் அனாரோசேதுகாமா தே³வதா தத்தே²வ அந்தரதா⁴யி. தங் தி³வஸந்தி ஸத்தா²ரா தே³ஸிததி³வஸே. இதி அத்தனோ விஸேஸாதி⁴க³மனிமித்ததாய அயங் தே³வதா இமங் ஸுத்தங் பியாயதி. ஸேஸங் உத்தானமேவ.
Saṅgararukkho kandamādasapova. Sarabhaññavasenāti atthaṃ avibhajitvā padaso sarabhaññavasena. Osārentassāti uccārentassa. Saddeti osāraṇasadde. Adhigatavisesaṃ anārocetukāmā devatā tattheva antaradhāyi. Taṃ divasanti satthārā desitadivase. Iti attano visesādhigamanimittatāya ayaṃ devatā imaṃ suttaṃ piyāyati. Sesaṃ uttānameva.
மஹாத⁴ம்மஸமாதா³னஸுத்தவண்ணனாய லீனத்த²ப்பகாஸனா ஸமத்தா.
Mahādhammasamādānasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 6. மஹாத⁴ம்மஸமாதா³னஸுத்தங் • 6. Mahādhammasamādānasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 6. மஹாத⁴ம்மஸமாதா³னஸுத்தவண்ணனா • 6. Mahādhammasamādānasuttavaṇṇanā
