| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) |
༦. མཧཱདྷམྨསམཱདཱནསུཏྟཝཎྞནཱ
6. Mahādhammasamādānasuttavaṇṇanā
༤༧༣. ཨེཝཾ ཨིདཱནི ཝུཙྩམཱནཱཀཱརོ ཀཱམོ ཀཱམནཾ ཨིཙྪཱ ཨེཏེསནྟི ཨེཝཾཀཱམཱ། ཨེཝཾ ཚནྡོ ཚནྡནཾ རོཙནཾ ཨཛ྄ཛྷཱསཡོ ཨེཏེསནྟི ཨེཝཾཚནྡཱ། ཨབྷིམུཁཾ, ཨབྷིནིཝིསྶ ཝཱ པཀཱརེཧི ཨེཏི ཨུཔགཙྪཏཱིཏི ཨདྷིཔྤཱཡོ, ལདྡྷི། སཱ ཧི ལདྡྷབྦཝཏྠུཾ ཨབྷིམུཁཾ ‘‘ཨེཝམེཏ’’ནྟི ཨབྷིནིཝིསནྟཱི ཏེན ཏེན པཀཱརེན ཨུཔགཙྪཏི, ཧཏྠགཏཾ ཀཏྭཱ ཏིཊྛཏི ན ཝིསྶཛྫེཏི། ཨེཝཾ ཝུཙྩམཱནཱཀཱརོ ཨདྷིཔྤཱཡོ ཨེཏེསནྟི ཨེཝཾཨདྷིཔྤཱཡཱ། བྷགཝཱ མཱུལཾ ཀཱརཎཾ ཨེཏེསཾ ཡཱཐཱཝཏོ ཨདྷིགམཱཡཱཏི བྷགཝཾམཱུལཀཱ། ཏེནཱཧ ‘‘བྷགཝནྟཉྷི ནིསྶཱཡ མཡཾ ཨིམེ དྷམྨེ ཨཱཛཱནཱམ པཊིཝིཛ྄ཛྷཱམཱ’’ཏི། ཨམྷཱཀཾ དྷམྨཱཏི ཏེཧི ཨཏྟནཱ ཨདྷིགནྟབྦཏཱཡ ཝུཏྟཾ། སེཝིཏབྦཱནཉྷི ཡཱཐཱཝཏོ ཨདྷིགམཉཱཎཱནི ཨདྷིགཙྪནཀསམྦནྡྷཱིནི, ཏཱནི ཙ སམྨཱསམྦུདྡྷམཱུལཀཱནི ཨནཉྙཝིསཡཏྟཱ། ཏེནཱཧ ‘‘པུབྦེ ཀསྶཔསམྦུདྡྷེནཱ’’ཏིཨཱདི། བྷགཝཱ ནེཏཱ ཏེསནྟི བྷགཝཾནེཏྟིཀཱ། ནེཏཱཏི སེཝིཏབྦདྷམྨེ ཝིནེཡྻསནྟཱནཾ པཱཔེཏཱ། ཝིནེཏཱཏི ཨསེཝིཏབྦདྷམྨེ ཝིནེཡྻསནྟཱནཏོ ཨཔནེཏཱ། ཏདངྒཝིནཡཱདིཝསེན ཝཱ ཝིནེཏཱ། ཨནུནེཏཱཏི ཨིམེ དྷམྨཱ སེཝིཏབྦཱ, ཨིམེ ན སེཝིཏབྦཱཏི ཨུབྷཡསམྤཱཔནཱཔནཡནཏྠཾ པཉྙཔེཏཱ། ཏེནཱཧ ‘‘ཡཐཱསབྷཱཝཏོ’’ཏིཨཱདི།
473. Evaṃ idāni vuccamānākāro kāmo kāmanaṃ icchā etesanti evaṃkāmā. Evaṃ chando chandanaṃ rocanaṃ ajjhāsayo etesanti evaṃchandā. Abhimukhaṃ, abhinivissa vā pakārehi eti upagacchatīti adhippāyo, laddhi. Sā hi laddhabbavatthuṃ abhimukhaṃ ‘‘evameta’’nti abhinivisantī tena tena pakārena upagacchati, hatthagataṃ katvā tiṭṭhati na vissajjeti. Evaṃ vuccamānākāro adhippāyo etesanti evaṃadhippāyā. Bhagavā mūlaṃ kāraṇaṃ etesaṃ yāthāvato adhigamāyāti bhagavaṃmūlakā. Tenāha ‘‘bhagavantañhi nissāya mayaṃ ime dhamme ājānāma paṭivijjhāmā’’ti. Amhākaṃdhammāti tehi attanā adhigantabbatāya vuttaṃ. Sevitabbānañhi yāthāvato adhigamañāṇāni adhigacchanakasambandhīni, tāni ca sammāsambuddhamūlakāni anaññavisayattā. Tenāha ‘‘pubbe kassapasambuddhenā’’tiādi. Bhagavā netā tesanti bhagavaṃnettikā. Netāti sevitabbadhamme vineyyasantānaṃ pāpetā. Vinetāti asevitabbadhamme vineyyasantānato apanetā. Tadaṅgavinayādivasena vā vinetā. Anunetāti ime dhammā sevitabbā, ime na sevitabbāti ubhayasampāpanāpanayanatthaṃ paññapetā. Tenāha ‘‘yathāsabhāvato’’tiādi.
པཊིསརནྟི ཨེཏྠཱཏི པཊིསརཎཾ, བྷགཝཱ པཊིསརཎཾ ཨེཏེསནྟི བྷགཝཾཔཊིསརཎཱ། པཊིསརཏི སབྷཱཝསམྤཊིཝེདྷཝསེན པཙྩེཀམུཔགཙྪཏཱིཏི ཝཱ པཊིསརཎཾ, བྷགཝཱ པཊིསརཎཾ ཨེཏེསནྟི བྷགཝཾཔཊིསརཎཱ། པཊིཝེདྷཝསེནཱཏི པཊིཝིཛ྄ཛྷིཏབྦཏཱཝསེན། ཨསཏིཔི མུཁེ ཨཏྠཏོ ཨེཝཾ ཝདནྟོ ཝིཡ ཧོཏཱིཏི ཨཱཧ ‘‘ཕསྶོ ཨཱགཙྪཏི, ཨཧཾ བྷགཝཱ ཀིཾ ནཱམོ’’ཏི། པཊིབྷཱཏཱུཏི ཨེཏྠ པཊི-སདྡཱཔེཀྑཱཡ ‘‘བྷགཝནྟ’’ནྟི ཨུཔཡོགཝཙནཾ, ཨཏྠོ པན སཱམིཝཙནཝསེནེཝ ཝེདིཏབྦོཏི དསྶེནྟོ ཨཱཧ ‘‘བྷགཝཏོ’’ཏི པཊིབྷཱཏཱུཏི ཙ བྷགཝཏོ བྷཱགོ ཧོཏུ། བྷགཝཏོ ཧི ཨེས བྷཱགོ, ཡདིདཾ དྷམྨསྶ དེསནཱ, ཨམྷཱཀཾ པན བྷཱགོ སཝནནྟི ཨདྷིཔྤཱཡོ། ཀེཙི པན པཊིབྷཱཏཱུཏི པདིསྶཏཱུཏི ཨཏྠཾ ཝདནྟི, ཉཱཎེན དིསྶཏུ, དེསཱིཡཏཱུཏི ཝཱ ཨཏྠོ། ཨུཔཊྛཱཏཱུཏི ཙ ཉཱཎསྶ པཙྩུཔཊྛཱཏུ།
Paṭisaranti etthāti paṭisaraṇaṃ, bhagavā paṭisaraṇaṃ etesanti bhagavaṃpaṭisaraṇā. Paṭisarati sabhāvasampaṭivedhavasena paccekamupagacchatīti vā paṭisaraṇaṃ, bhagavā paṭisaraṇaṃ etesanti bhagavaṃpaṭisaraṇā. Paṭivedhavasenāti paṭivijjhitabbatāvasena. Asatipi mukhe atthato evaṃ vadanto viya hotīti āha ‘‘phasso āgacchati, ahaṃ bhagavā kiṃ nāmo’’ti. Paṭibhātūti ettha paṭi-saddāpekkhāya ‘‘bhagavanta’’nti upayogavacanaṃ, attho pana sāmivacanavaseneva veditabboti dassento āha ‘‘bhagavato’’ti paṭibhātūti ca bhagavato bhāgo hotu. Bhagavato hi esa bhāgo, yadidaṃ dhammassa desanā, amhākaṃ pana bhāgo savananti adhippāyo. Keci pana paṭibhātūti padissatūti atthaṃ vadanti, ñāṇena dissatu, desīyatūti vā attho. Upaṭṭhātūti ca ñāṇassa paccupaṭṭhātu.
༤༧༤. ནིསྶཡིཏབྦེཏི ཨཏྟནོ སནྟཱནེ ཨུཔྤཱདནཝསེན ཨཔསྶཡིཏབྦེ། ཏཏིཡཙཏུཏྠདྷམྨསམཱདཱནཱནི ཧི ཨཔསྶཱཡ སཏྟཱནཾ ཨེཏརཧི ཨཱཡཏིཉྩ སམྤཏྟིཡོ ཨབྷིཝཌྜྷནྟི། བྷཛིཏབྦེཏི ཏསྶེཝ ཝེཝཙནཾ། སེཝིཏབྦེཏི ཝཱ སཔྤུརིསུཔསྶཡསདྡྷམྨསྶཝནཡོནིསོམནསིཀཱརེ སནྡྷཱཡཱཧ། བྷཛིཏབྦེཏི ཏཔྤཙྩཡེ དཱནཱདིཔུཉྙདྷམྨེ།
474.Nissayitabbeti attano santāne uppādanavasena apassayitabbe. Tatiyacatutthadhammasamādānāni hi apassāya sattānaṃ etarahi āyatiñca sampattiyo abhivaḍḍhanti. Bhajitabbeti tasseva vevacanaṃ. Sevitabbeti vā sappurisupassayasaddhammassavanayonisomanasikāre sandhāyāha. Bhajitabbeti tappaccaye dānādipuññadhamme.
༤༧༥. ཨུཔྤཊིཔཱཊིཨཱཀཱརེནཱཏི པཋམཾ སཾཀིལེསདྷམྨེ དསྶེཏྭཱ པཙྪཱ ཝོདཱནདྷམྨདསྶནཾ སཏྠུ དེསནཱཔཊིཔཱཊི, ཡཐཱ – ‘‘ཝཱམཾ མུཉྩ, དཀྑིཎཾ གཎྷཱ’’ཏི (དྷ॰ ས॰ ཨཊྛ॰ ༤༩༨; ཝིསུདྡྷི॰ མཧཱཊཱི॰ ༡.༡༤), ཏཐཱ ཨུཔྤཊིཔཱཊིཔཀཱརེན, སཱ ཙ ཁོ པུརིམེསུ དྭཱིསུ དྷམྨསམཱདཱནེསུ , པཙྪིམེསུ པན པཊིཔཱཊིཡཱཝ མཱཏིཀཱ པཊྛཔིཏཱ། ཡཐཱདྷམྨརསེནེཝཱཏི པཧཱཏབྦཔཧཱཡཀདྷམྨཱནཾ ཡཐཱསབྷཱཝེནེཝ། སབྷཱཝོ ཧི ཡཱཐཱཝཏོ རསིཏབྦཏོ ཛཱནིཏབྦཏོ ‘‘རསོ’’ཏི ཝུཙྩཏི། པཋམཾ པཧཱཏབྦདྷམྨེ དསྶེཏྭཱ ཏདནནྟརཾ ‘‘ཨིམེ དྷམྨཱ ཨེཏེཧི པཧཱིཡནྟཱི’’ཏི པཧཱཡཀདྷམྨདསྶནཾ དེསནཱནུཔུབྦཱི། གཧཎཾ ཨཱདིཡནཾ ཨཏྟནོ སནྟཱནེ ཨུཔྤཱདནཾ།
475.Uppaṭipāṭiākārenāti paṭhamaṃ saṃkilesadhamme dassetvā pacchā vodānadhammadassanaṃ satthu desanāpaṭipāṭi, yathā – ‘‘vāmaṃ muñca, dakkhiṇaṃ gaṇhā’’ti (dha. sa. aṭṭha. 498; visuddhi. mahāṭī. 1.14), tathā uppaṭipāṭipakārena, sā ca kho purimesu dvīsu dhammasamādānesu , pacchimesu pana paṭipāṭiyāva mātikā paṭṭhapitā. Yathādhammarasenevāti pahātabbapahāyakadhammānaṃ yathāsabhāveneva. Sabhāvo hi yāthāvato rasitabbato jānitabbato ‘‘raso’’ti vuccati. Paṭhamaṃ pahātabbadhamme dassetvā tadanantaraṃ ‘‘ime dhammā etehi pahīyantī’’ti pahāyakadhammadassanaṃ desanānupubbī. Gahaṇaṃ ādiyanaṃ attano santāne uppādanaṃ.
༤༧༨. ཝདྷདཎྜཱདཱིཧི བྷཱིཏསྶ ཨུཔསངྐམནེ, མིཙྪཱ ཙརིཏྭཱ ཏཐཱ ཨཔགམནེ ཙ པུབྦཱཔརཙེཏནཱནཾ ཝསེན མིཙྪཱཙཱརོ དུཀྑཝེདནོ ཧོཏི, ཏཐཱ ཨིསྶཱནིནྡཱདཱིཧི ཨུཔདྡུཏསྶ ཨཔརཙེཏནཱཝསེན, ཨེཝཾ ཨབྷིཛ྄ཛྷཱམིཙྪཱདིཊྛཱིསུཔི ཡཐཱརཧཾ ཝེདིཏབྦཾ། ཏིསྶནྣམྤི ཙེཏནཱནནྟི པུབྦཱཔརསནྣིཊྛཱཔཀཙེཏནཱནཾ། ཨདིནྣཱདཱནཾ མུསཱཝཱདོ པིསུཎཝཱཙཱ སམྥཔྤལཱཔོཏི ཨིམེསཾ ཙཏུནྣཾ སནྣིཊྛཱཔཀཙེཏནཱནཾ སུཁསམྤཡུཏྟཱ ཝཱ ཨུཔེཀྑཱསམྤཡུཏྟཱ ཝཱཏི ཨཡཾ ནཡོ ཨིདྷ ཨདྷིཀཏཏྟཱ ན ཨུདྡྷཊོ། དོམནསྶམེཝ ཙེཏྠ དུཀྑནྟི ཨིདཾ པུབྦབྷཱགཱཔརབྷཱགཙེཏནཱཔི ཙེཏྠ ཨཱསནྣཱ དོམནསྶསཧགཏཱ ཨེཝ ཧོནྟཱིཏི ཀཏྭཱ ཝུཏྟཾ། ཨནཱསནྣཱ པན སནྡྷཱཡ ‘‘པརིཡེཊྛིཾ ཝཱ ཨཱཔཛྫནྟསྶཱ’’ཏིཨཱདི ཝུཏྟཾ། ཏེནེཝ མིཙྪཱཙཱརཱབྷིཛ྄ཛྷཱམིཙྪཱདིཊྛཱིནཾ པུབྦབྷཱགཱཔརབྷཱགཙེཏནཱ ཨཱསནྣཱ སནྣིཊྛཱཔཀཙེཏནཱགཏིཀཱཝཱཏི དསྶིཏཾ ཧོཏཱིཏི དཊྛབྦཾ། པརིཡེཊྛིནྟི མིཙྪཱཙཱརཱདཱིསུ ཝཱིཏིཀྐམིཏབྦཝཏྠུམཱལཱགནྡྷཱདིཔརིཡེསནཾ། པཱཎཱཏིཔཱཏཱདཱིསུ མཱརེཏབྦཝཏྠུཨཱཝུདྷཱདིཔརིཡེསནཾ ཨཱཔཛྫནྟསྶ། ཨཀིཙྪེནཔི ཏེསཾ པརིཡེསནཾ སམྦྷཝཏཱིཏི ‘‘ཝཊྚཏིཡེཝཱ’’ཏི སཱསངྐཾ ཝདཏི།
478. Vadhadaṇḍādīhi bhītassa upasaṅkamane, micchā caritvā tathā apagamane ca pubbāparacetanānaṃ vasena micchācāro dukkhavedano hoti, tathā issānindādīhi upaddutassa aparacetanāvasena, evaṃ abhijjhāmicchādiṭṭhīsupi yathārahaṃ veditabbaṃ. Tissannampi cetanānanti pubbāparasanniṭṭhāpakacetanānaṃ. Adinnādānaṃ musāvādo pisuṇavācā samphappalāpoti imesaṃ catunnaṃ sanniṭṭhāpakacetanānaṃ sukhasampayuttā vā upekkhāsampayuttā vāti ayaṃ nayo idha adhikatattā na uddhaṭo. Domanassameva cettha dukkhanti idaṃ pubbabhāgāparabhāgacetanāpi cettha āsannā domanassasahagatā eva hontīti katvā vuttaṃ. Anāsannā pana sandhāya ‘‘pariyeṭṭhiṃ vā āpajjantassā’’tiādi vuttaṃ. Teneva micchācārābhijjhāmicchādiṭṭhīnaṃ pubbabhāgāparabhāgacetanā āsannā sanniṭṭhāpakacetanāgatikāvāti dassitaṃ hotīti daṭṭhabbaṃ. Pariyeṭṭhinti micchācārādīsu vītikkamitabbavatthumālāgandhādipariyesanaṃ. Pāṇātipātādīsu māretabbavatthuāvudhādipariyesanaṃ āpajjantassa. Akicchenapi tesaṃ pariyesanaṃ sambhavatīti ‘‘vaṭṭatiyevā’’ti sāsaṅkaṃ vadati.
༤༧༩. སུཁཝེདནཱ ཧོནྟཱིཏི སུཁཝེདནཱཔི ཧོནྟཱིཏི ཨདྷིཔྤཱཡོ། ཏཱསཾ ཙེཏནཱནཾ ཨསུཁཝེདནཏཱཔི ལབྦྷཏཱིཏི ‘‘སུཁཝེདནཱཔི ཧོནྟིཡེཝཱ’’ཏི སཱསངྐཝཙནཾ། སོམནསྶམེཝ ཙེཏྠ སུཁནྟི ཨིདཾ པུབྦབྷཱགཱཔརབྷཱགཙེཏནཱཔི སོམནསྶསཧགཏཱ ཨེཝ ཧོནྟཱིཏི ཀཏྭཱ ཝུཏྟཾ། ཏཉྩ ཁོ མིཙྪཱཙཱརཝཛྫཱནཾ ཚནྣཾ ཝསེན། མིཙྪཱཙཱརསྶ པན པུབྦཱཔརབྷཱགསྶ ཝསེན ‘‘ཀཱཡིཀཾ སུཁམྤི ཝཊྚཏིཡེཝཱཏི སཱསངྐཝཙནཾ།
479.Sukhavedanā hontīti sukhavedanāpi hontīti adhippāyo. Tāsaṃ cetanānaṃ asukhavedanatāpi labbhatīti ‘‘sukhavedanāpi hontiyevā’’ti sāsaṅkavacanaṃ. Somanassameva cettha sukhanti idaṃ pubbabhāgāparabhāgacetanāpi somanassasahagatā eva hontīti katvā vuttaṃ. Tañca kho micchācāravajjānaṃ channaṃ vasena. Micchācārassa pana pubbāparabhāgassa vasena ‘‘kāyikaṃ sukhampi vaṭṭatiyevāti sāsaṅkavacanaṃ.
༤༨༠. དོསཛཔརིལཱ༹ཧཝསེནསྶ སིཡཱ ཀཱཡིཀམྤི དུཀྑནྟི ཨདྷིཔྤཱཡེན ‘‘སོ གཎྷནྟོཔི དུཀྑིཏོ’’ཏི ཝུཏྟཾ། ཙེཏོདུཀྑམེཝ ཝཱ སནྡྷཱཡ ཏསྶ ཨཔརཱཔརུཔྤཏྟིདསྶནཏྠཾ ‘‘དུཀྑིཏོ དོམནསྶིཏོ’’ཏི ཝུཏྟཾ།
480. Dosajapariḷāhavasenassa siyā kāyikampi dukkhanti adhippāyena ‘‘so gaṇhantopi dukkhito’’ti vuttaṃ. Cetodukkhameva vā sandhāya tassa aparāparuppattidassanatthaṃ ‘‘dukkhito domanassito’’ti vuttaṃ.
༤༨༡. དསསུཔི པདེསཱུཏི དསསུཔི ཀོཊྛཱསེསུ, ཝཱཀྱེསུ ཝཱ། ཨུཔེཀྑཱསམྤཡུཏྟཏཱཔི སམྦྷཝཏཱིཏི ‘‘སུཁསམྤཡུཏྟཱ ཧོནྟིཡེཝཱ’’ཏི ཨིདྷ སཱསངྐཝཙནཾ། པཱཎཱཏིཔཱཏཱ པཊིཝིརཏསྶ ཀཱཡོཔི སིཡཱ ཝིགཏདརཐཔརིལཱ༹ཧོཏི པཱཎཱཏིཔཱཏཱཝེརམཎིཨཱདིཔཙྩཡཱ ཀཱཡིཀཔཊིསཾཝེདནཱཔི སམྦྷཝཏཱིཏི སཧཱཔི སུཁེནཱཏི ཨེཏྠ ཀཱཡིཡསུཁམྤི ཝཊྚཏིཡེཝ།
481.Dasasupipadesūti dasasupi koṭṭhāsesu, vākyesu vā. Upekkhāsampayuttatāpi sambhavatīti ‘‘sukhasampayuttā hontiyevā’’ti idha sāsaṅkavacanaṃ. Pāṇātipātā paṭiviratassa kāyopi siyā vigatadarathapariḷāhoti pāṇātipātāveramaṇiādipaccayā kāyikapaṭisaṃvedanāpi sambhavatīti sahāpi sukhenāti ettha kāyiyasukhampi vaṭṭatiyeva.
༤༨༢. ཏིཏྟཀཱལཱབཱུཏི ཨུཔབྷུཏྟསྶ ཨུམྨཱདཱདིཔཱཔནེན ཀུཙྪིཏཏིཏྟཀརསོ ཨལཱབུ། ན རུཙྩིསྶཏི ཨནིཊྛརསཏཱཡ ཨནིཊྛཕལཏཱཡ ཙ།
482.Tittakālābūti upabhuttassa ummādādipāpanena kucchitatittakaraso alābu. Na ruccissati aniṭṭharasatāya aniṭṭhaphalatāya ca.
༤༨༣. རསཾ དེཏཱིཏི རསཾ དསྶེཏི ཝིབྷཱཝེཏི།
483.Rasaṃ detīti rasaṃ dasseti vibhāveti.
༤༨༤. པཱུཏིམུཏྟནྟི པཱུཏིསབྷཱཝམུཏྟཾ། ཏརུཎནྟི དྷཱརཱཝསེན ནིཔཏནྟཾ ཧུཏྭཱ ཨུཎྷཾ། ཏེནསྶ ཨུཔརིམུཏྟཏམཱཧ། མུཏྟཉྷི པསྶཱཝམགྒཏོ མུཙྩམཱནཾ ཀཱཡུསྨཱཝསེན ཨུཎྷཾ ཧོཏི།
484.Pūtimuttanti pūtisabhāvamuttaṃ. Taruṇanti dhārāvasena nipatantaṃ hutvā uṇhaṃ. Tenassa uparimuttatamāha. Muttañhi passāvamaggato muccamānaṃ kāyusmāvasena uṇhaṃ hoti.
༤༨༥. ཡཾ བྷགནྡརསཾསཊྛཾ ལོཧིཏཾ པཀྑནྡཏཱིཏི བྷགནྡརབྱཱདྷིསཧིཏཱཡ ལོཧིཏཔཀྑནྡཏཱཡ ཝསེན ཡཾ ལོཧིཏཾ ཝིསྶཝཏི། པིཏྟསཾསཊྛཾ ལོཧིཏཾ པཀྑནྡཏཱིཏི ཨཱནེཏྭཱ སམྦནྡྷོ།
485.Yaṃ bhagandarasaṃsaṭṭhaṃ lohitaṃ pakkhandatīti bhagandarabyādhisahitāya lohitapakkhandatāya vasena yaṃ lohitaṃ vissavati. Pittasaṃsaṭṭhaṃ lohitaṃ pakkhandatīti ānetvā sambandho.
༤༨༦. ཨུབྦིདྡྷེཏི དཱུརེ། ཨབྦྷམཧིཀཱདིཨུཔཀྐིལེསཝིགམེན ཧི ཨཱཀཱསཾ ཨུཏྟུངྒཾ ཝིཡ དཱུརཾ ཝིཡ ཙ ཁཱཡཏི། ཏེནཱཧ ‘‘དཱུརཱིབྷཱུཏེ’’ཏི། ཏམཾཡེཝ ཏམགཏཾ ‘‘གཱུཐགཏཾ མུཏྟགཏ’’ནྟི (མ॰ ནི॰ ༢.༡༡༩; ཨ॰ ནི॰ ༩.༡༡) ཡཐཱ། བྷཱསཏེ ཙ ཏཔཏེ ཙ ཝིརོཙཏེ ཙ ཨིདཾ ཙཏུཏྠཾ དྷམྨསམཱདཱནཾ ཝིབྷཛནྟེན ཀུསལཀམྨཔཐསྶ ཝིབྷཛིཏྭཱ དསྶིཏཏྟཱ།
486.Ubbiddheti dūre. Abbhamahikādiupakkilesavigamena hi ākāsaṃ uttuṅgaṃ viya dūraṃ viya ca khāyati. Tenāha ‘‘dūrībhūte’’ti. Tamaṃyeva tamagataṃ ‘‘gūthagataṃ muttagata’’nti (ma. ni. 2.119; a. ni. 9.11) yathā. Bhāsate ca tapate ca virocate ca idaṃ catutthaṃ dhammasamādānaṃ vibhajantena kusalakammapathassa vibhajitvā dassitattā.
སངྒརརུཀྑོ ཀནྡམཱདསཔོཝ། སརབྷཉྙཝསེནཱཏི ཨཏྠཾ ཨཝིབྷཛིཏྭཱ པདསོ སརབྷཉྙཝསེན། ཨོསཱརེནྟསྶཱཏི ཨུཙྩཱརེནྟསྶ། སདྡེཏི ཨོསཱརཎསདྡེ། ཨདྷིགཏཝིསེསཾ ཨནཱརོཙེཏུཀཱམཱ དེཝཏཱ ཏཏྠེཝ ཨནྟརདྷཱཡི། ཏཾ དིཝསནྟི སཏྠཱརཱ དེསིཏདིཝསེ། ཨིཏི ཨཏྟནོ ཝིསེསཱདྷིགམནིམིཏྟཏཱཡ ཨཡཾ དེཝཏཱ ཨིམཾ སུཏྟཾ པིཡཱཡཏི། སེསཾ ཨུཏྟཱནམེཝ།
Saṅgararukkho kandamādasapova. Sarabhaññavasenāti atthaṃ avibhajitvā padaso sarabhaññavasena. Osārentassāti uccārentassa. Saddeti osāraṇasadde. Adhigatavisesaṃ anārocetukāmā devatā tattheva antaradhāyi. Taṃ divasanti satthārā desitadivase. Iti attano visesādhigamanimittatāya ayaṃ devatā imaṃ suttaṃ piyāyati. Sesaṃ uttānameva.
མཧཱདྷམྨསམཱདཱནསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ།
Mahādhammasamādānasuttavaṇṇanāya līnatthappakāsanā samattā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༦. མཧཱདྷམྨསམཱདཱནསུཏྟཾ • 6. Mahādhammasamādānasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༦. མཧཱདྷམྨསམཱདཱནསུཏྟཝཎྞནཱ • 6. Mahādhammasamādānasuttavaṇṇanā
