| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. மஹாதி³ட்டி²ஸுத்தங்
8. Mahādiṭṭhisuttaṃ
213. ஸாவத்தி²னிதா³னங். ‘‘கிஸ்மிங் நு கோ², பி⁴க்க²வே, ஸதி, கிங் உபாதா³ய, கிங் அபி⁴னிவிஸ்ஸ ஏவங் தி³ட்டி² உப்பஜ்ஜதி – ‘ஸத்திமே காயா அகடா, அகடவிதா⁴, அனிம்மிதா, அனிம்மாதா, வஞ்ஜா², கூடட்டா², ஏஸிகட்டா²யிட்டி²தா; தே ந இஞ்ஜந்தி, ந விபரிணமந்தி 1, ந அஞ்ஞமஞ்ஞங் ப்³யாபா³தெ⁴ந்தி; நாலங் அஞ்ஞமஞ்ஞஸ்ஸ ஸுகா²ய வா து³க்கா²ய வா ஸுக²து³க்கா²ய வா. கதமே ஸத்த? பத²வீகாயோ, ஆபோகாயோ, தேஜோகாயோ, வாயோகாயோ, ஸுகே², து³க்கே², ஜீவே ஸத்தமே. இமே ஸத்த 2 காயா அகடா, அகடவிதா⁴, அனிம்மிதா, அனிம்மாதா, வஞ்ஜா², கூடட்டா² ஏஸிகட்டா²யிட்டி²தா; தே ந இஞ்ஜந்தி, ந விபரிணமந்தி, ந அஞ்ஞமஞ்ஞங் ப்³யாபா³தெ⁴ந்தி; நாலங் அஞ்ஞமஞ்ஞஸ்ஸ ஸுகா²ய வா து³க்கா²ய வா ஸுக²து³க்கா²ய வா. யோபி திண்ஹேன ஸத்தே²ன ஸீஸங் சி²ந்த³தி, ந ஸோபி கஞ்சி 3 ஜீவிதா வோரோபேதி; ஸத்தன்னங்த்வேவ காயானமந்தரேன ஸத்த²ங் விவரமனுபவிஸதி 4. சுத்³த³ஸ கோ² பனிமானி யோனிபமுக²ஸதஸஹஸ்ஸானி ஸட்டி² ச ஸதானி ச² ச ஸதானி பஞ்ச ச கம்முனோ ஸதானி பஞ்ச ச கம்மானி, தீணி ச கம்மானி , கம்மே ச அட்³ட⁴கம்மே ச த்³வட்டி²படிபதா³, த்³வட்ட²ந்தரகப்பா, ச²ளாபி⁴ஜாதியோ, அட்ட²புரிஸபூ⁴மியோ, ஏகூனபஞ்ஞாஸ ஆஜீவகஸதே, ஏகூனபஞ்ஞாஸ பரிப்³பா³ஜகஸதே, ஏகூனபஞ்ஞாஸ நாக³வாஸஸதே, வீஸே இந்த்³ரியஸதே, திங்ஸே நிரயஸதே, ச²த்திங்ஸரஜோதா⁴துயோ, ஸத்த ஸஞ்ஞீக³ப்³பா⁴, ஸத்த அஸஞ்ஞீக³ப்³பா⁴, ஸத்த நிக³ண்டி²க³ப்³பா⁴, ஸத்த தே³வா , ஸத்த மானுஸா, ஸத்த பேஸாசா, ஸத்த ஸரா, ஸத்த பவுடா 5, ஸத்த பபாதா, ஸத்த ச பபாதஸதானி, ஸத்த ஸுபினா, ஸத்த ஸுபினஸதானி, சுல்லாஸீதி மஹாகப்பினோ 6 ஸதஸஹஸ்ஸானி, யானி பா³லே ச பண்டி³தே ச ஸந்தா⁴வித்வா ஸங்ஸரித்வா து³க்க²ஸ்ஸந்தங் கரிஸ்ஸந்தி. தத்த² நத்தி² இமினாஹங் ஸீலேன வா வதேன வா தபேன வா ப்³ரஹ்மசரியேன வா அபரிபக்கங் வா கம்மங் பரிபாசெஸ்ஸாமி; பரிபக்கங் வா கம்மங் பு²ஸ்ஸ பு²ஸ்ஸ ப்³யந்தீகரிஸ்ஸாமீதி ஹேவங் நத்தி² தோ³ணமிதே ஸுக²து³க்கே² பரியந்தகதே ஸங்ஸாரே, நத்தி² ஹாயனவட்³ட⁴னே, நத்தி² உக்கங்ஸாவகங்ஸே. ஸெய்யதா²பி நாம ஸுத்தகு³ளே கி²த்தே நிப்³பே³டி²யமானமேவ பலேதி; ஏவமேவ பா³லே ச பண்டி³தே ச நிப்³பே³டி²யமானா ஸுக²து³க்க²ங் பலெந்தீ’’’தி?
213. Sāvatthinidānaṃ. ‘‘Kismiṃ nu kho, bhikkhave, sati, kiṃ upādāya, kiṃ abhinivissa evaṃ diṭṭhi uppajjati – ‘sattime kāyā akaṭā, akaṭavidhā, animmitā, animmātā, vañjhā, kūṭaṭṭhā, esikaṭṭhāyiṭṭhitā; te na iñjanti, na vipariṇamanti 7, na aññamaññaṃ byābādhenti; nālaṃ aññamaññassa sukhāya vā dukkhāya vā sukhadukkhāya vā. Katame satta? Pathavīkāyo, āpokāyo, tejokāyo, vāyokāyo, sukhe, dukkhe, jīve sattame. Ime satta 8 kāyā akaṭā, akaṭavidhā, animmitā, animmātā, vañjhā, kūṭaṭṭhā esikaṭṭhāyiṭṭhitā; te na iñjanti, na vipariṇamanti, na aññamaññaṃ byābādhenti; nālaṃ aññamaññassa sukhāya vā dukkhāya vā sukhadukkhāya vā. Yopi tiṇhena satthena sīsaṃ chindati, na sopi kañci 9 jīvitā voropeti; sattannaṃtveva kāyānamantarena satthaṃ vivaramanupavisati 10. Cuddasa kho panimāni yonipamukhasatasahassāni saṭṭhi ca satāni cha ca satāni pañca ca kammuno satāni pañca ca kammāni, tīṇi ca kammāni , kamme ca aḍḍhakamme ca dvaṭṭhipaṭipadā, dvaṭṭhantarakappā, chaḷābhijātiyo, aṭṭhapurisabhūmiyo, ekūnapaññāsa ājīvakasate, ekūnapaññāsa paribbājakasate, ekūnapaññāsa nāgavāsasate, vīse indriyasate, tiṃse nirayasate, chattiṃsarajodhātuyo, satta saññīgabbhā, satta asaññīgabbhā, satta nigaṇṭhigabbhā, satta devā , satta mānusā, satta pesācā, satta sarā, satta pavuṭā 11, satta papātā, satta ca papātasatāni, satta supinā, satta supinasatāni, cullāsīti mahākappino 12 satasahassāni, yāni bāle ca paṇḍite ca sandhāvitvā saṃsaritvā dukkhassantaṃ karissanti. Tattha natthi imināhaṃ sīlena vā vatena vā tapena vā brahmacariyena vā aparipakkaṃ vā kammaṃ paripācessāmi; paripakkaṃ vā kammaṃ phussa phussa byantīkarissāmīti hevaṃ natthi doṇamite sukhadukkhe pariyantakate saṃsāre, natthi hāyanavaḍḍhane, natthi ukkaṃsāvakaṃse. Seyyathāpi nāma suttaguḷe khitte nibbeṭhiyamānameva paleti; evameva bāle ca paṇḍite ca nibbeṭhiyamānā sukhadukkhaṃ palentī’’’ti?
ப⁴க³வங்மூலகா நோ, ப⁴ந்தே, த⁴ம்மா…பே॰… ‘‘ரூபே கோ², பி⁴க்க²வே, ஸதி, ரூபங் உபாதா³ய, ரூபங் அபி⁴னிவிஸ்ஸ ஏவங் தி³ட்டி² உப்பஜ்ஜதி – ‘ஸத்திமே காயா அகடா, அகடவிதா⁴…பே॰… ஸுக²து³க்க²ங் பலெந்தீ’தி. வேத³னாய ஸதி…பே॰… ஸஞ்ஞாய ஸதி… ஸங்கா²ரேஸு ஸதி… விஞ்ஞாணே ஸதி, விஞ்ஞாணங் உபாதா³ய, விஞ்ஞாணங் அபி⁴னிவிஸ்ஸ ஏவங் தி³ட்டி² உப்பஜ்ஜதி – ‘ஸத்திமே காயா அகடா, அகடவிதா⁴…பே॰… ஸுக²து³க்க²ங் பலெந்தீ’’’தி. ‘‘தங் கிங் மஞ்ஞத², பி⁴க்க²வே, ரூபங் நிச்சங் வா அனிச்சங் வா’’தி? ‘‘அனிச்சங், ப⁴ந்தே’’…பே॰… ‘‘யங் பனானிச்சங் து³க்க²ங் விபரிணாமத⁴ம்மங், அபி நு தங் அனுபாதா³ய ஏவங் தி³ட்டி² உப்பஜ்ஜெய்ய – ‘ஸத்திமே காயா அகடா அகடவிதா⁴…பே॰… ஸுக²து³க்க²ங் பலெந்தீ’’’தி? ‘‘நோ ஹேதங், ப⁴ந்தே’’. ‘‘யம்பித³ங் தி³ட்ட²ங் ஸுதங் முதங் விஞ்ஞாதங் பத்தங் பரியேஸிதங் அனுவிசரிதங் மனஸா தம்பி நிச்சங் வா அனிச்சங் வா’’தி? ‘‘அனிச்சங், ப⁴ந்தே…பே॰… அபி நு தங் அனுபாதா³ய ஏவங் தி³ட்டி² உப்பஜ்ஜெய்ய – ‘ஸத்திமே காயா அகடா அகடவிதா⁴…பே॰… நிப்³பே³டி²யமானா ஸுக²து³க்க²ங் பலெந்தீ’’’தி? ‘‘நோ ஹேதங், ப⁴ந்தே’’.
Bhagavaṃmūlakā no, bhante, dhammā…pe… ‘‘rūpe kho, bhikkhave, sati, rūpaṃ upādāya, rūpaṃ abhinivissa evaṃ diṭṭhi uppajjati – ‘sattime kāyā akaṭā, akaṭavidhā…pe… sukhadukkhaṃ palentī’ti. Vedanāya sati…pe… saññāya sati… saṅkhāresu sati… viññāṇe sati, viññāṇaṃ upādāya, viññāṇaṃ abhinivissa evaṃ diṭṭhi uppajjati – ‘sattime kāyā akaṭā, akaṭavidhā…pe… sukhadukkhaṃ palentī’’’ti. ‘‘Taṃ kiṃ maññatha, bhikkhave, rūpaṃ niccaṃ vā aniccaṃ vā’’ti? ‘‘Aniccaṃ, bhante’’…pe… ‘‘yaṃ panāniccaṃ dukkhaṃ vipariṇāmadhammaṃ, api nu taṃ anupādāya evaṃ diṭṭhi uppajjeyya – ‘sattime kāyā akaṭā akaṭavidhā…pe… sukhadukkhaṃ palentī’’’ti? ‘‘No hetaṃ, bhante’’. ‘‘Yampidaṃ diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā tampi niccaṃ vā aniccaṃ vā’’ti? ‘‘Aniccaṃ, bhante…pe… api nu taṃ anupādāya evaṃ diṭṭhi uppajjeyya – ‘sattime kāyā akaṭā akaṭavidhā…pe… nibbeṭhiyamānā sukhadukkhaṃ palentī’’’ti? ‘‘No hetaṃ, bhante’’.
‘‘யதோ கோ², பி⁴க்க²வே, அரியஸாவகஸ்ஸ இமேஸு ச டா²னேஸு கங்கா² பஹீனா ஹோதி, து³க்கே²பிஸ்ஸ கங்கா² பஹீனா ஹோதி…பே॰… து³க்க²னிரோத⁴கா³மினியா படிபதா³யபிஸ்ஸ கங்கா² பஹீனா ஹோதி – அயங் வுச்சதி, பி⁴க்க²வே, அரியஸாவகோ ஸோதாபன்னோ அவினிபாதத⁴ம்மோ நியதோ ஸம்போ³தி⁴பராயனோ’’தி. அட்ட²மங்.
‘‘Yato kho, bhikkhave, ariyasāvakassa imesu ca ṭhānesu kaṅkhā pahīnā hoti, dukkhepissa kaṅkhā pahīnā hoti…pe… dukkhanirodhagāminiyā paṭipadāyapissa kaṅkhā pahīnā hoti – ayaṃ vuccati, bhikkhave, ariyasāvako sotāpanno avinipātadhammo niyato sambodhiparāyano’’ti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8-10. மஹாதி³ட்டி²ஸுத்தாதி³வண்ணனா • 8-10. Mahādiṭṭhisuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8-10. மஹாதி³ட்டி²ஸுத்தாதி³வண்ணனா • 8-10. Mahādiṭṭhisuttādivaṇṇanā
