| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৩. মহাদুক্খক্খন্ধসুত্তৰণ্ণনা
3. Mahādukkhakkhandhasuttavaṇṇanā
১৬৩. এৰং মে সুতন্তি মহাদুক্খক্খন্ধসুত্তং। তত্থ ৰিনযপরিযাযেন তযো জনা সম্বহুলাতি ৰুচ্চন্তি, ততো পরং সঙ্ঘো। সুত্তন্তপরিযাযেন তযো তযো এৰ, ততো উদ্ধং সম্বহুলাতি ৰুচ্চন্তি। ইধ সুত্তন্তপরিযাযেন সম্বহুলাতি ৰেদিতব্বা। পিণ্ডায পাৰিসিংসূতি পৰিট্ঠা, তে পন ন তাৰ পৰিট্ঠা, পৰিসিস্সামাতি নিক্খন্তত্তা পন পৰিসিংসূতি ৰুত্তা। যথা গামং গমিস্সামীতি নিক্খন্তপুরিসো তং গামং অপ্পত্তোপি ‘‘কুহিং ইত্থন্নামো’’তি ৰুত্তে ‘‘গামং গতো’’তি ৰুচ্চতি, এৰং। পরিব্বাজকানং আরামোতি জেতৰনতো অৰিদূরে অঞ্ঞতিত্থিযানং পরিব্বাজকানং আরামো অত্থি, তং সন্ধায এৰমাহংসু। সমণো, আৰুসোতি, আৰুসো, তুম্হাকং সত্থা সমণো গোতমো। কামানং পরিঞ্ঞন্তি কামানং পহানং সমতিক্কমং পঞ্ঞপেতি। রূপৰেদনাসুপি এসেৰ নযো।
163.Evaṃme sutanti mahādukkhakkhandhasuttaṃ. Tattha vinayapariyāyena tayo janā sambahulāti vuccanti, tato paraṃ saṅgho. Suttantapariyāyena tayo tayo eva, tato uddhaṃ sambahulāti vuccanti. Idha suttantapariyāyena sambahulāti veditabbā. Piṇḍāya pāvisiṃsūti paviṭṭhā, te pana na tāva paviṭṭhā, pavisissāmāti nikkhantattā pana pavisiṃsūti vuttā. Yathā gāmaṃ gamissāmīti nikkhantapuriso taṃ gāmaṃ appattopi ‘‘kuhiṃ itthannāmo’’ti vutte ‘‘gāmaṃ gato’’ti vuccati, evaṃ. Paribbājakānaṃ ārāmoti jetavanato avidūre aññatitthiyānaṃ paribbājakānaṃ ārāmo atthi, taṃ sandhāya evamāhaṃsu. Samaṇo, āvusoti, āvuso, tumhākaṃ satthā samaṇo gotamo. Kāmānaṃ pariññanti kāmānaṃ pahānaṃ samatikkamaṃ paññapeti. Rūpavedanāsupi eseva nayo.
তত্থ তিত্থিযা সকসমযং জানন্তা কামানং পরিঞ্ঞং পঞ্ঞপেয্যুং পঠমজ্ঝানং ৰদমানা, রূপানং পরিঞ্ঞং পঞ্ঞপেয্যুং অরূপভৰং ৰদমানা, ৰেদনানং পরিঞ্ঞং পঞ্ঞপেয্যুং অসঞ্ঞভৰং ৰদমানা। তে পন ‘‘ইদং নাম পঠমজ্ঝানং অযং রূপভৰো অযং অরূপভৰো’’তিপি ন জানন্তি। তে পঞ্ঞপেতুং অসক্কোন্তাপি কেৰলং ‘‘পঞ্ঞপেম পঞ্ঞপেমা’’তি ৰদন্তি। তথাগতো কামানং পরিঞ্ঞং অনাগামিমগ্গেন পঞ্ঞপেতি, রূপৰেদনানং অরহত্তমগ্গেন । তে এৰং মহন্তে ৰিসেসে ৰিজ্জমানেপি ইধ নো, আৰুসো, কো ৰিৰেসোতিআদিমাহংসু।
Tattha titthiyā sakasamayaṃ jānantā kāmānaṃ pariññaṃ paññapeyyuṃ paṭhamajjhānaṃ vadamānā, rūpānaṃ pariññaṃ paññapeyyuṃ arūpabhavaṃ vadamānā, vedanānaṃ pariññaṃ paññapeyyuṃ asaññabhavaṃ vadamānā. Te pana ‘‘idaṃ nāma paṭhamajjhānaṃ ayaṃ rūpabhavo ayaṃ arūpabhavo’’tipi na jānanti. Te paññapetuṃ asakkontāpi kevalaṃ ‘‘paññapema paññapemā’’ti vadanti. Tathāgato kāmānaṃ pariññaṃ anāgāmimaggena paññapeti, rūpavedanānaṃ arahattamaggena . Te evaṃ mahante visese vijjamānepi idha no, āvuso, ko vivesotiādimāhaṃsu.
তত্থ ইধাতি ইমস্মিং পঞ্ঞাপনে। ধম্মদেসনায ৰা ধম্মদেসনন্তি যদিদং সমণস্স ৰা গোতমস্স ধম্মদেসনায সদ্ধিং অম্হাকং ধম্মদেসনং, অম্হাকং ৰা ধম্মদেসনায সদ্ধিং সমণস্স গোতমস্স ধম্মদেসনং আরব্ভ নানাকরণং ৰুচ্চেথ, তং কিন্নামাতি ৰদন্তি। দুতিযপদেপি এসেৰ নযো । ইতি ৰেমজ্ঝে ভিন্নসুৰণ্ণং ৰিয সাসনেন সদ্ধিং অত্তনো লদ্ধিৰচনমত্তেন সমধুরং ঠপযিংসু। নেৰ অভিনন্দিংসূতি এৰমেতন্তি ন সম্পটিচ্ছিংসু। নপ্পটিক্কোসিংসূতি নযিদং এৰন্তি নপ্পটিসেধেসুং। কস্মা? তে কির তিত্থিযা নাম অন্ধসদিসা, জানিত্ৰা ৰা অজানিত্ৰা ৰা কথেয্যুন্তি নাভিনন্দিংসু, পরিঞ্ঞন্তি ৰচনেন ঈসকং সাসনগন্ধো অত্থীতি নপ্পটিক্কোসিংসু। জনপদৰাসিনো ৰা তে সকসমযপরসমযেসু ন সুট্ঠু কুসলাতিপি উভযং নাকংসু।
Tattha idhāti imasmiṃ paññāpane. Dhammadesanāya vā dhammadesananti yadidaṃ samaṇassa vā gotamassa dhammadesanāya saddhiṃ amhākaṃ dhammadesanaṃ, amhākaṃ vā dhammadesanāya saddhiṃ samaṇassa gotamassa dhammadesanaṃ ārabbha nānākaraṇaṃ vuccetha, taṃ kinnāmāti vadanti. Dutiyapadepi eseva nayo . Iti vemajjhe bhinnasuvaṇṇaṃ viya sāsanena saddhiṃ attano laddhivacanamattena samadhuraṃ ṭhapayiṃsu. Neva abhinandiṃsūti evametanti na sampaṭicchiṃsu. Nappaṭikkosiṃsūti nayidaṃ evanti nappaṭisedhesuṃ. Kasmā? Te kira titthiyā nāma andhasadisā, jānitvā vā ajānitvā vā katheyyunti nābhinandiṃsu, pariññanti vacanena īsakaṃ sāsanagandho atthīti nappaṭikkosiṃsu. Janapadavāsino vā te sakasamayaparasamayesu na suṭṭhu kusalātipi ubhayaṃ nākaṃsu.
১৬৫. ন চেৰ সম্পাযিস্সন্তীতি সম্পাদেত্ৰা কথেতুং ন সক্খিস্সন্তি। উত্তরিঞ্চ ৰিঘাতন্তি অসম্পাযনতো উত্তরিম্পি দুক্খং আপজ্জিস্সন্তি। সম্পাদেত্ৰা কথেতুং অসক্কোন্তানং নাম হি দুক্খং উপ্পজ্জতি। যথা তং, ভিক্খৰে, অৰিসযস্মিন্তি এত্থ যথাতি কারণৰচনং, তন্তি নিপাতমত্তং। যস্মা অৰিসযে পঞ্হো পুচ্ছিতো হোতীতি অত্থো। সদেৰকেতি সহ দেৰেহি সদেৰকে। সমারকাদীসুপি এসেৰ নযো। এৰং তীণি ঠানানি লোকে পক্খিপিত্ৰা দ্ৰে পজাযাতি পঞ্চহিপি সত্তলোকমেৰ পরিযাদিযিত্ৰা এতস্মিং সদেৰকাদিভেদে লোকে তং দেৰং ৰা মনুস্সং ৰা ন পস্সামীতি দীপেতি। ইতো ৰা পন সুত্ৰাতি ইতো ৰা পন মম সাসনতো সুত্ৰা অতথাগতোপি অতথাগতসাৰকোপি আরাধেয্য পরিতোসেয্য। অঞ্ঞথা আরাধনং নাম নত্থীতি দস্সেতি।
165.Na ceva sampāyissantīti sampādetvā kathetuṃ na sakkhissanti. Uttariñca vighātanti asampāyanato uttarimpi dukkhaṃ āpajjissanti. Sampādetvā kathetuṃ asakkontānaṃ nāma hi dukkhaṃ uppajjati. Yathā taṃ, bhikkhave, avisayasminti ettha yathāti kāraṇavacanaṃ, tanti nipātamattaṃ. Yasmā avisaye pañho pucchito hotīti attho. Sadevaketi saha devehi sadevake. Samārakādīsupi eseva nayo. Evaṃ tīṇi ṭhānāni loke pakkhipitvā dve pajāyāti pañcahipi sattalokameva pariyādiyitvā etasmiṃ sadevakādibhede loke taṃ devaṃ vā manussaṃ vā na passāmīti dīpeti. Ito vā pana sutvāti ito vā pana mama sāsanato sutvā atathāgatopi atathāgatasāvakopi ārādheyya paritoseyya. Aññathā ārādhanaṃ nāma natthīti dasseti.
১৬৬. ইদানি অত্তনো তেসং পঞ্হানং ৰেয্যাকরণেন চিত্তারাধনং দস্সেন্তো কো চ, ভিক্খৰেতিআদিমাহ। কামগুণাতি কামযিতব্বট্ঠেন কামা। বন্ধনট্ঠেন গুণা। ‘‘অনুজানামি, ভিক্খৰে, অহতানং ৰত্থানং দ্ৰিগুণং সঙ্ঘাটি’’ন্তি (মহাৰ॰ ৩৪৮) এত্থ হি পটলট্ঠো গুণট্ঠো। ‘‘অচ্চেন্তি কালা তরযন্তি রত্তিযো, ৰযোগুণা অনুপুব্বং জহন্তী’’তি (সং॰ নি॰ ১.৪) এত্থ রাসট্ঠো গুণট্ঠো। ‘‘সতগুণা দক্খিণা পাটিকঙ্খিতব্বা’’তি (ম॰ নি॰ ৩.৩৭৯) এত্থ আনিসংসট্ঠো গুণট্ঠো। ‘‘অন্তং অন্তগুণং (খু॰ পা॰ ৩ দ্ৰত্তিংসাকারে; দী॰ নি॰ ২.৩৭৭) কযিরা মালাগুণে বহূ’’তি (ধ॰ প॰ ৫৩) এত্থ বন্ধনট্ঠো গুণট্ঠো। ইধাপি এসেৰ অধিপ্পেতো, তেন ৰুত্তং ‘‘বন্ধনট্ঠেন গুণা’’তি। চক্খুৰিঞ্ঞেয্যাতি চক্খুৰিঞ্ঞাণেন পস্সিতব্বা। এতেনুপাযেন সোতৰিঞ্ঞেয্যাদীসুপি অত্থো ৰেদিতব্বো। ইট্ঠাতি পরিযিট্ঠা ৰা হোন্তু মা ৰা, ইট্ঠারম্মণভূতাতি অত্থো। কন্তাতি কমনীযা। মনাপাতি মনৰড্ঢনকা। পিযরূপাতি পিযজাতিকা। কামূপসংহিতাতি আরম্মণং কত্ৰা উপ্পজ্জমানেন কামেন উপসংহিতা। রজনীযাতি রজ্জনিযা, রাগুপ্পত্তিকারণভূতাতি অত্থো।
166. Idāni attano tesaṃ pañhānaṃ veyyākaraṇena cittārādhanaṃ dassento ko ca, bhikkhavetiādimāha. Kāmaguṇāti kāmayitabbaṭṭhena kāmā. Bandhanaṭṭhena guṇā. ‘‘Anujānāmi, bhikkhave, ahatānaṃ vatthānaṃ dviguṇaṃ saṅghāṭi’’nti (mahāva. 348) ettha hi paṭalaṭṭho guṇaṭṭho. ‘‘Accenti kālā tarayanti rattiyo, vayoguṇā anupubbaṃ jahantī’’ti (saṃ. ni. 1.4) ettha rāsaṭṭho guṇaṭṭho. ‘‘Sataguṇā dakkhiṇā pāṭikaṅkhitabbā’’ti (ma. ni. 3.379) ettha ānisaṃsaṭṭho guṇaṭṭho. ‘‘Antaṃ antaguṇaṃ (khu. pā. 3 dvattiṃsākāre; dī. ni. 2.377) kayirā mālāguṇe bahū’’ti (dha. pa. 53) ettha bandhanaṭṭho guṇaṭṭho. Idhāpi eseva adhippeto, tena vuttaṃ ‘‘bandhanaṭṭhena guṇā’’ti. Cakkhuviññeyyāti cakkhuviññāṇena passitabbā. Etenupāyena sotaviññeyyādīsupi attho veditabbo. Iṭṭhāti pariyiṭṭhā vā hontu mā vā, iṭṭhārammaṇabhūtāti attho. Kantāti kamanīyā. Manāpāti manavaḍḍhanakā. Piyarūpāti piyajātikā. Kāmūpasaṃhitāti ārammaṇaṃ katvā uppajjamānena kāmena upasaṃhitā. Rajanīyāti rajjaniyā, rāguppattikāraṇabhūtāti attho.
১৬৭. যদি মুদ্দাযাতিআদীসু মুদ্দাতি অঙ্গুলিপব্বেসু সঞ্ঞং ঠপেত্ৰা হত্থমুদ্দা। গণনাতি অচ্ছিদ্দগণনা। সঙ্খানন্তি পিণ্ডগণনা। যায খেত্তং ওলোকেত্ৰা ইধ এত্তকা ৰীহী ভৰিস্সন্তি , রুক্খং ওলোকেত্ৰা ইধ এত্তকানি ফলানি ভৰিস্সন্তি, আকাসং ওলোকেত্ৰা ইমে আকাসে সকুণা এত্তকা নাম ভৰিস্সন্তীতি জানন্তি।
167.Yadi muddāyātiādīsu muddāti aṅgulipabbesu saññaṃ ṭhapetvā hatthamuddā. Gaṇanāti acchiddagaṇanā. Saṅkhānanti piṇḍagaṇanā. Yāya khettaṃ oloketvā idha ettakā vīhī bhavissanti , rukkhaṃ oloketvā idha ettakāni phalāni bhavissanti, ākāsaṃ oloketvā ime ākāse sakuṇā ettakā nāma bhavissantīti jānanti.
কসীতি কসিকম্মং। ৰণিজ্জাতি জঙ্ঘৰণিজ্জথলৰণিজ্জাদিৰণিপ্পথো। গোরক্খন্তি অত্তনো ৰা পরেসং ৰা গাৰো রক্খিত্ৰা পঞ্চগোরসৰিক্কযেন জীৰনকম্মং। ইস্সত্থো ৰুচ্চতি আৰুধং গহেত্ৰা উপট্ঠানকম্মং। রাজপোরিসন্তি আৰুধেন রাজকম্মং কত্ৰা উপট্ঠানং। সিপ্পঞ্ঞতরন্তি গহিতাৰসেসং হত্থিঅস্সসিপ্পাদি। সীতস্স পুরক্খতোতি লক্খং ৰিয সরস্স সীতস্স পুরতো, সীতেন বাধীযমানোতি অত্থো। উণ্হেপি এসেৰ নযো। ডংসাদীসু ডংসাতি পিঙ্গলমক্খিকা। মকসাতি সব্বমক্খিকা, সরীসপাতি যে কেচি সরিত্ৰা গচ্ছন্তি। রিস্সমানোতি রুপ্পমানো, ঘট্টিযমানো। মীযমানোতি মরমানো। অযং, ভিক্খৰেতি, ভিক্খৰে, অযং মুদ্দাদীহি জীৰিককপ্পনং আগম্ম সীতাদিপচ্চযো আবাধো। কামানং আদীনৰোতি কামেসু উপদ্দৰো, উপস্সগ্গোতি অত্থো। সন্দিট্ঠিকোতি পচ্চক্খো সামং পস্সিতব্বো। দুক্খক্খন্ধোতি দুক্খরাসি। কামহেতূতিআদীসু পচ্চযট্ঠেন কামা অস্স হেতূতি কামহেতু। মূলট্ঠেন কামা নিদানমস্সাতি কামনিদানো। লিঙ্গৰিপল্লাসেন পন কামনিদানন্তি ৰুত্তো। কারণট্ঠেন কামা অধিকরণং অস্সাতি কামাধিকরণো। লিঙ্গৰিপল্লাসেনেৰ পন কামাধিকরণন্তি ৰুত্তো। কামানমেৰ হেতূতি ইদং নিযমৰচনং, কামপচ্চযা উপ্পজ্জতিযেৰাতি অত্থো।
Kasīti kasikammaṃ. Vaṇijjāti jaṅghavaṇijjathalavaṇijjādivaṇippatho. Gorakkhanti attano vā paresaṃ vā gāvo rakkhitvā pañcagorasavikkayena jīvanakammaṃ. Issattho vuccati āvudhaṃ gahetvā upaṭṭhānakammaṃ. Rājaporisanti āvudhena rājakammaṃ katvā upaṭṭhānaṃ. Sippaññataranti gahitāvasesaṃ hatthiassasippādi. Sītassa purakkhatoti lakkhaṃ viya sarassa sītassa purato, sītena bādhīyamānoti attho. Uṇhepi eseva nayo. Ḍaṃsādīsu ḍaṃsāti piṅgalamakkhikā. Makasāti sabbamakkhikā, sarīsapāti ye keci saritvā gacchanti. Rissamānoti ruppamāno, ghaṭṭiyamāno. Mīyamānoti maramāno. Ayaṃ, bhikkhaveti, bhikkhave, ayaṃ muddādīhi jīvikakappanaṃ āgamma sītādipaccayo ābādho. Kāmānaṃ ādīnavoti kāmesu upaddavo, upassaggoti attho. Sandiṭṭhikoti paccakkho sāmaṃ passitabbo. Dukkhakkhandhoti dukkharāsi. Kāmahetūtiādīsu paccayaṭṭhena kāmā assa hetūti kāmahetu. Mūlaṭṭhena kāmā nidānamassāti kāmanidāno. Liṅgavipallāsena pana kāmanidānanti vutto. Kāraṇaṭṭhena kāmā adhikaraṇaṃ assāti kāmādhikaraṇo. Liṅgavipallāseneva pana kāmādhikaraṇanti vutto. Kāmānameva hetūti idaṃ niyamavacanaṃ, kāmapaccayā uppajjatiyevāti attho.
উট্ঠহতোতি আজীৰসমুট্ঠাপকৰীরিযেন উট্ঠহন্তস্স। ঘটতোতি তং ৰীরিযং পুব্বেনাপরং ঘটেন্তস্স। ৰাযমতোতি ৰাযামং পরক্কমং পযোগং করোন্তস্স। নাভিনিপ্ফজ্জন্তীতি ন নিপ্ফজ্জন্তি, হত্থং নাভিরুহন্তি। সোচতীতি চিত্তে উপ্পন্নবলৰসোকেন সোচতি। কিলমতীতি কাযে উপ্পন্নদুক্খেন কিলমতি। পরিদেৰতীতি ৰাচায পরিদেৰতি। উরত্তাল়িন্তি উরং তাল়েত্ৰা। কন্দতীতি রোদতি। সম্মোহং আপজ্জতীতি ৰিসঞ্ঞী ৰিয সম্মূল়্হো হোতি। মোঘন্তি তুচ্ছং। অফলোতি নিপ্ফলো। আরক্খাধিকরণন্তি আরক্খকারণা। কিন্তীতি কেন নু খো উপাযেন। যম্পি মেতি যম্পি ময্হং কসিকম্মাদীনি কত্ৰা উপ্পাদিতং ধনং অহোসি। তম্পি নো নত্থীতি তম্পি অম্হাকং ইদানি নত্থি।
Uṭṭhahatoti ājīvasamuṭṭhāpakavīriyena uṭṭhahantassa. Ghaṭatoti taṃ vīriyaṃ pubbenāparaṃ ghaṭentassa. Vāyamatoti vāyāmaṃ parakkamaṃ payogaṃ karontassa. Nābhinipphajjantīti na nipphajjanti, hatthaṃ nābhiruhanti. Socatīti citte uppannabalavasokena socati. Kilamatīti kāye uppannadukkhena kilamati. Paridevatīti vācāya paridevati. Urattāḷinti uraṃ tāḷetvā. Kandatīti rodati. Sammohaṃ āpajjatīti visaññī viya sammūḷho hoti. Moghanti tucchaṃ. Aphaloti nipphalo. Ārakkhādhikaraṇanti ārakkhakāraṇā. Kintīti kena nu kho upāyena. Yampi meti yampi mayhaṃ kasikammādīni katvā uppāditaṃ dhanaṃ ahosi. Tampi no natthīti tampi amhākaṃ idāni natthi.
১৬৮. পুন চপরং, ভিক্খৰে, কামহেতূতিআদিনাপি কারণং দস্সেত্ৰাৰ আদীনৰং দীপেতি। তত্থ কামহেতূতি কামপচ্চযা রাজানোপি রাজূহি ৰিৰদন্তি। কামনিদানন্তি ভাৰনপুংসকং, কামে নিদানং কত্ৰা ৰিৰদন্তীতি অত্থো। কামাধিকরণন্তিপি ভাৰনপুংসকমেৰ, কামে অধিকরণং কত্ৰা ৰিৰদন্তীতি অত্থো। কামানমেৰ হেতূতি গামনিগমনগরসেনাপতিপুরোহিতট্ঠানন্তরাদীনং কামানমেৰ হেতু ৰিৰদন্তীতি অত্থো। উপক্কমন্তীতি পহরন্তি। অসিচম্মন্তি অসিঞ্চেৰ খেটকফলকাদীনি চ। ধনুকলাপং সন্নয্হিত্ৰাতি ধনুং গহেত্ৰা সরকলাপং সন্নয্হিত্ৰা। উভতোব্যূল়ন্তি উভতো রাসিভূতং। পক্খন্দন্তীতি পৰিসন্তি। উসূসূতি কণ্ডেসু। ৰিজ্জোতলন্তেসূতি ৰিপরিৰত্তন্তেসু। তে তত্থাতি তে তস্মিং সঙ্গামে।
168.Puna caparaṃ, bhikkhave, kāmahetūtiādināpi kāraṇaṃ dassetvāva ādīnavaṃ dīpeti. Tattha kāmahetūti kāmapaccayā rājānopi rājūhi vivadanti. Kāmanidānanti bhāvanapuṃsakaṃ, kāme nidānaṃ katvā vivadantīti attho. Kāmādhikaraṇantipi bhāvanapuṃsakameva, kāme adhikaraṇaṃ katvā vivadantīti attho. Kāmānameva hetūti gāmanigamanagarasenāpatipurohitaṭṭhānantarādīnaṃ kāmānameva hetu vivadantīti attho. Upakkamantīti paharanti. Asicammanti asiñceva kheṭakaphalakādīni ca. Dhanukalāpaṃ sannayhitvāti dhanuṃ gahetvā sarakalāpaṃ sannayhitvā. Ubhatobyūḷanti ubhato rāsibhūtaṃ. Pakkhandantīti pavisanti. Usūsūti kaṇḍesu. Vijjotalantesūti viparivattantesu. Te tatthāti te tasmiṃ saṅgāme.
অদ্দাৰলেপনা উপকারিযোতি চেত্থ মনুস্সা পাকারপাদং অস্সখুরসণ্ঠানেন ইট্ঠকাহি চিনিত্ৰা উপরি সুধায লিম্পন্তি। এৰং কতা পাকারপাদা উপকারিযোতি ৰুচ্চন্তি। তা তিন্তেন কললেন সিত্তা অদ্দাৰলেপনা নাম হোন্তি। পক্খন্দন্তীতি তাসং হেট্ঠা তিখিণঅযসূলাদীহি ৰিজ্ঝীযমানাপি পাকারস্স পিচ্ছিলভাৰেন আরোহিতুং অসক্কোন্তাপি উপধাৰন্তিযেৰ। ছকণকাযাতি কুথিতগোমযেন। অভিৰগ্গেনাতি সতদন্তেন। তং অট্ঠদন্তাকারেন কত্ৰা ‘‘নগরদ্ৰারং ভিন্দিত্ৰা পৰিসিস্সামা’’তি আগতে উপরিদ্ৰারে ঠিতা তস্স বন্ধনযোত্তানি ছিন্দিত্ৰা তেন অভিৰগ্গেন ওমদ্দন্তি।
Addāvalepanāupakāriyoti cettha manussā pākārapādaṃ assakhurasaṇṭhānena iṭṭhakāhi cinitvā upari sudhāya limpanti. Evaṃ katā pākārapādā upakāriyoti vuccanti. Tā tintena kalalena sittā addāvalepanā nāma honti. Pakkhandantīti tāsaṃ heṭṭhā tikhiṇaayasūlādīhi vijjhīyamānāpi pākārassa picchilabhāvena ārohituṃ asakkontāpi upadhāvantiyeva. Chakaṇakāyāti kuthitagomayena. Abhivaggenāti satadantena. Taṃ aṭṭhadantākārena katvā ‘‘nagaradvāraṃ bhinditvā pavisissāmā’’ti āgate uparidvāre ṭhitā tassa bandhanayottāni chinditvā tena abhivaggena omaddanti.
১৬৯. সন্ধিম্পি ছিন্দন্তীতি ঘরসন্ধিম্পি ছিন্দন্তি। নিল্লোপন্তি গামে পহরিত্ৰা মহাৰিলোপং করোন্তি। একাগারিকন্তি পণ্ণাসমত্তাপি সট্ঠিমত্তাপি পরিৰারেত্ৰা জীৰগ্গাহং গহেত্ৰা আহরাপেন্তি। পরিপন্থেপি তিট্ঠন্তীতি পন্থদূহনকম্মং করোন্তি। অড্ঢদণ্ডকেহীতি মুগ্গরেহি পহারসাধনত্থং ৰা চতুহত্থদণ্ডং দ্ৰেধা ছেত্ৰা গহিতদণ্ডকেহি। বিলঙ্গথালিকন্তি কঞ্জিযউক্খলিকম্মকারণং, তং করোন্তা সীসকপালং উপ্পাটেত্ৰা তত্তং অযোগুল়ং সণ্ডাসেন গহেত্ৰা তত্থ পক্খিপন্তি, তেন মত্থলুঙ্গং পক্কুথিত্ৰা উপরি উত্তরতি। সঙ্খমুণ্ডিকন্তি সঙ্খমুণ্ডকম্মকারণং, তং করোন্তা উত্তরোট্ঠউভতোকণ্ণচূল়িকগল়ৰাটপরিচ্ছেদেন চম্মং ছিন্দিত্ৰা সব্বকেসে একতো গণ্ঠিং কত্ৰা দণ্ডকেন ৰল্লিত্ৰা উপ্পাটেন্তি, সহ কেসেহি চম্মং উট্ঠহতি। ততো সীসকটাহং থূলসক্খরাহি ঘংসিত্ৰা ধোৰন্তা সঙ্খৰণ্ণং করোন্তি।
169.Sandhimpi chindantīti gharasandhimpi chindanti. Nillopanti gāme paharitvā mahāvilopaṃ karonti. Ekāgārikanti paṇṇāsamattāpi saṭṭhimattāpi parivāretvā jīvaggāhaṃ gahetvā āharāpenti. Paripanthepi tiṭṭhantīti panthadūhanakammaṃ karonti. Aḍḍhadaṇḍakehīti muggarehi pahārasādhanatthaṃ vā catuhatthadaṇḍaṃ dvedhā chetvā gahitadaṇḍakehi. Bilaṅgathālikanti kañjiyaukkhalikammakāraṇaṃ, taṃ karontā sīsakapālaṃ uppāṭetvā tattaṃ ayoguḷaṃ saṇḍāsena gahetvā tattha pakkhipanti, tena matthaluṅgaṃ pakkuthitvā upari uttarati. Saṅkhamuṇḍikanti saṅkhamuṇḍakammakāraṇaṃ, taṃ karontā uttaroṭṭhaubhatokaṇṇacūḷikagaḷavāṭaparicchedena cammaṃ chinditvā sabbakese ekato gaṇṭhiṃ katvā daṇḍakena vallitvā uppāṭenti, saha kesehi cammaṃ uṭṭhahati. Tato sīsakaṭāhaṃ thūlasakkharāhi ghaṃsitvā dhovantā saṅkhavaṇṇaṃ karonti.
রাহুমুখন্তি রাহুমুখকম্মকারণং, তং করোন্তা সঙ্কুনা মুখং ৰিৰরিত্ৰা অন্তোমুখে দীপং জালেন্তি । কণ্ণচূল়িকাহি ৰা পট্ঠায মুখং নিখাদনেন খণন্তি। লোহিতং পগ্ঘরিত্ৰা মুখং পূরেতি। জোতিমালিকন্তি সকলসরীরং তেলপিলোতিকায ৰেঠেত্ৰা আলিম্পন্তি। হত্থপজ্জোতিকন্তি হত্থে তেলপিলোতিকায ৰেঠেত্ৰা দীপং ৰিয জালেন্তি। এরকৰত্তিকন্তি এরকৰত্তকম্মকারণং, তং করোন্তা গীৰতো পট্ঠায চম্মবদ্ধে কন্তিত্ৰা গোপ্ফকে ঠপেন্তি। অথ নং যোত্তেহি বন্ধিত্ৰা কড্ঢন্তি। সো অত্তনো চম্মবদ্ধে অক্কমিত্ৰা অক্কমিত্ৰা পততি। চীরকৰাসিকন্তি চীরকৰাসিককম্মকারণং, তং করোন্তা তথেৰ চম্মবদ্ধে কন্তিত্ৰা কটিযং ঠপেন্তি। কটিতো পট্ঠায কন্তিত্ৰা গোপ্ফকেসু ঠপেন্তি। উপরিমেহি হেট্ঠিমসরীরং চীরকনিৰাসননিৰত্থং ৰিয হোতি। এণেয্যকন্তি এণেয্যককম্মকারণং। তং করোন্তা উভোসু কপ্পরেসু চ জাণূসু চ অযৰলযানি দত্ৰা অযসূলানি কোট্টেন্তি। সো চতূহি অযসূলেহি ভূমিযং পতিট্ঠহতি। অথ নং পরিৰারেত্ৰা অগ্গিং করোন্তি। ‘‘এণেয্যকো জোতিপরিগ্গহো যথা’’তি আগতট্ঠানেপি ইদমেৰ ৰুত্তং। তং কালেন কালং সূলানি অপনেত্ৰা চতূহি অট্ঠিকোটীহিযেৰ ঠপেন্তি। এৰরূপা কারণা নাম নত্থি।
Rāhumukhanti rāhumukhakammakāraṇaṃ, taṃ karontā saṅkunā mukhaṃ vivaritvā antomukhe dīpaṃ jālenti . Kaṇṇacūḷikāhi vā paṭṭhāya mukhaṃ nikhādanena khaṇanti. Lohitaṃ paggharitvā mukhaṃ pūreti. Jotimālikanti sakalasarīraṃ telapilotikāya veṭhetvā ālimpanti. Hatthapajjotikanti hatthe telapilotikāya veṭhetvā dīpaṃ viya jālenti. Erakavattikanti erakavattakammakāraṇaṃ, taṃ karontā gīvato paṭṭhāya cammabaddhe kantitvā gopphake ṭhapenti. Atha naṃ yottehi bandhitvā kaḍḍhanti. So attano cammabaddhe akkamitvā akkamitvā patati. Cīrakavāsikanti cīrakavāsikakammakāraṇaṃ, taṃ karontā tatheva cammabaddhe kantitvā kaṭiyaṃ ṭhapenti. Kaṭito paṭṭhāya kantitvā gopphakesu ṭhapenti. Uparimehi heṭṭhimasarīraṃ cīrakanivāsananivatthaṃ viya hoti. Eṇeyyakanti eṇeyyakakammakāraṇaṃ. Taṃ karontā ubhosu kapparesu ca jāṇūsu ca ayavalayāni datvā ayasūlāni koṭṭenti. So catūhi ayasūlehi bhūmiyaṃ patiṭṭhahati. Atha naṃ parivāretvā aggiṃ karonti. ‘‘Eṇeyyako jotipariggaho yathā’’ti āgataṭṭhānepi idameva vuttaṃ. Taṃ kālena kālaṃ sūlāni apanetvā catūhi aṭṭhikoṭīhiyeva ṭhapenti. Evarūpā kāraṇā nāma natthi.
বল়িসমংসিকন্তি উভতোমুখেহি বল়িসেহি পহরিত্ৰা চম্মমংসন্হারূনি উপ্পাটেন্তি। কহাপণিকন্তি সকলসরীরং তিণ্হাহি ৰাসীহি কোটিতো পট্ঠায কহাপণমত্তং কহাপণমত্তং পাতেন্তা কোট্টেন্তি। খারাপতচ্ছিকন্তি সরীরং তত্থ তত্থ আৰুধেহি পহরিত্ৰা কোচ্ছেহি খারং ঘংসন্তি। চম্মসংসন্হারূনি পগ্ঘরিত্ৰা সৰন্তি। অট্ঠিকসঙ্খলিকাৰ তিট্ঠতি। পলিঘপরিৰত্তিকন্তি একেন পস্সেন নিপজ্জাপেত্ৰা কণ্ণচ্ছিদ্দে অযসূলং কোট্টেত্ৰা পথৰিযা একাবদ্ধং করোন্তি। অথ নং পাদে গহেত্ৰা আৰিজ্ঝন্তি। পলালপীঠকন্তি ছেকো কারণিকো ছৰিচম্মং অচ্ছিন্দিত্ৰা নিসদপোতেহি অট্ঠীনি ভিন্দিত্ৰা কেসেসু গহেত্ৰা উক্খিপন্তি। মংসরাসিযেৰ হোতি, অথ নং কেসেহেৰ পরিযোনন্ধিত্ৰা গণ্হন্তি। পলালৰট্টিং ৰিয কত্ৰা পন ৰেঠেন্তি। সুনখেহিপীতি কতিপযানি দিৰসানি আহারং অদত্ৰা ছাতকেহি সুনখেহি খাদাপেন্তি। তে মুহুত্তেন অট্ঠিসঙ্খলিকমেৰ করোন্তি। সম্পরাযিকোতি সম্পরাযে দুতিযত্তভাৰে ৰিপাকোতি অত্থো।
Baḷisamaṃsikanti ubhatomukhehi baḷisehi paharitvā cammamaṃsanhārūni uppāṭenti. Kahāpaṇikanti sakalasarīraṃ tiṇhāhi vāsīhi koṭito paṭṭhāya kahāpaṇamattaṃ kahāpaṇamattaṃ pātentā koṭṭenti. Khārāpatacchikanti sarīraṃ tattha tattha āvudhehi paharitvā kocchehi khāraṃ ghaṃsanti. Cammasaṃsanhārūni paggharitvā savanti. Aṭṭhikasaṅkhalikāva tiṭṭhati. Palighaparivattikanti ekena passena nipajjāpetvā kaṇṇacchidde ayasūlaṃ koṭṭetvā pathaviyā ekābaddhaṃ karonti. Atha naṃ pāde gahetvā āvijjhanti. Palālapīṭhakanti cheko kāraṇiko chavicammaṃ acchinditvā nisadapotehi aṭṭhīni bhinditvā kesesu gahetvā ukkhipanti. Maṃsarāsiyeva hoti, atha naṃ keseheva pariyonandhitvā gaṇhanti. Palālavaṭṭiṃ viya katvā pana veṭhenti. Sunakhehipīti katipayāni divasāni āhāraṃ adatvā chātakehi sunakhehi khādāpenti. Te muhuttena aṭṭhisaṅkhalikameva karonti. Samparāyikoti samparāye dutiyattabhāve vipākoti attho.
১৭০. ছন্দরাগৰিনযো ছন্দরাগপ্পহানন্তি নিব্বানং। নিব্বানঞ্হি আগম্ম কামেসু ছন্দরাগো ৰিনীযতি চেৰ পহীযতি চ, তস্মা নিব্বানং ছন্দরাগৰিনযো ছন্দরাগপ্পহানন্তি চ ৰুত্তং। সামং ৰা কামে পরিজানিস্সন্তীতি সযং ৰা তে কামে তীহি পরিঞ্ঞাহি পরিজানিস্সন্তি। তথত্তাযাতি তথভাৰায। যথাপটিপন্নোতি যায পটিপদায পটিপন্নো।
170.Chandarāgavinayo chandarāgappahānanti nibbānaṃ. Nibbānañhi āgamma kāmesu chandarāgo vinīyati ceva pahīyati ca, tasmā nibbānaṃ chandarāgavinayo chandarāgappahānanti ca vuttaṃ. Sāmaṃ vā kāme parijānissantīti sayaṃ vā te kāme tīhi pariññāhi parijānissanti. Tathattāyāti tathabhāvāya. Yathāpaṭipannoti yāya paṭipadāya paṭipanno.
১৭১. খত্তিযকঞ্ঞা ৰাতিআদি অপরিত্তেন ৰিপুলেন কুসলেন গহিতপটিসন্ধিকং ৰত্থালঙ্কারাদীনি লভনট্ঠানে নিব্বত্তং দস্সেতুং ৰুত্তং। পন্নরসৰস্সুদ্দেসিকাতি পন্নরসৰস্সৰযা। দুতিযপদেপি এসেৰ নযো। ৰযপদেসং কস্মা গণ্হাতি? ৰণ্ণসম্পত্তিদস্সনত্থং। মাতুগামস্স হি দুগ্গতকুলে নিব্বত্তস্সাপি এতস্মিং কালে থোকং থোকং ৰণ্ণাযতনং পসীদতি। পুরিসানং পন ৰীসতিৰস্সকালে পঞ্চৰীসতিৰস্সকালে পসন্নং হোতি। নাতিদীঘাতিআদীহি ছদোসৰিরহিতং সরীরসম্পত্তিং দীপেতি। ৰণ্ণনিভাতি ৰণ্ণোযেৰ।
171.Khattiyakaññāvātiādi aparittena vipulena kusalena gahitapaṭisandhikaṃ vatthālaṅkārādīni labhanaṭṭhāne nibbattaṃ dassetuṃ vuttaṃ. Pannarasavassuddesikāti pannarasavassavayā. Dutiyapadepi eseva nayo. Vayapadesaṃ kasmā gaṇhāti? Vaṇṇasampattidassanatthaṃ. Mātugāmassa hi duggatakule nibbattassāpi etasmiṃ kāle thokaṃ thokaṃ vaṇṇāyatanaṃ pasīdati. Purisānaṃ pana vīsativassakāle pañcavīsativassakāle pasannaṃ hoti. Nātidīghātiādīhi chadosavirahitaṃ sarīrasampattiṃ dīpeti. Vaṇṇanibhāti vaṇṇoyeva.
জিণ্ণন্তি জরাজিণ্ণং। গোপানসিৰঙ্কন্তি গোপানসী ৰিয ৰঙ্কং। ভোগ্গন্তি ভগ্গং, ইমিনাপিস্স ৰঙ্কভাৰমেৰ দীপেতি। দণ্ডপরাযণন্তি দণ্ডপটিসরণং দণ্ডদুতিযং। পৰেধমানন্তি কম্পমানং। আতুরন্তি জরাতুরং। খণ্ডদন্তন্তি জিণ্ণভাৰেন খণ্ডিতদন্তং। পলিতকেসন্তি পণ্ডরকেসং। ৰিলূনন্তি লুঞ্চিত্ৰা গহিতকেসং ৰিয খল্লাটং। খলিতসিরন্তি মহাখল্লাটসীসং। ৰলিনন্তি সঞ্জাতৰলিং। তিলকাহতগত্তন্তি সেতকাল়তিলকেহি ৰিকিণ্ণসরীরং। আবাধিকন্তি ব্যাধিকং। দুক্খিতন্তি দুক্খপত্তং।
Jiṇṇanti jarājiṇṇaṃ. Gopānasivaṅkanti gopānasī viya vaṅkaṃ. Bhogganti bhaggaṃ, imināpissa vaṅkabhāvameva dīpeti. Daṇḍaparāyaṇanti daṇḍapaṭisaraṇaṃ daṇḍadutiyaṃ. Pavedhamānanti kampamānaṃ. Āturanti jarāturaṃ. Khaṇḍadantanti jiṇṇabhāvena khaṇḍitadantaṃ. Palitakesanti paṇḍarakesaṃ. Vilūnanti luñcitvā gahitakesaṃ viya khallāṭaṃ. Khalitasiranti mahākhallāṭasīsaṃ. Valinanti sañjātavaliṃ. Tilakāhatagattanti setakāḷatilakehi vikiṇṇasarīraṃ. Ābādhikanti byādhikaṃ. Dukkhitanti dukkhapattaṃ.
বাল়্হগিলানন্তি অধিমত্তগিলানং। সিৰথিকায ছড্ডিতন্তি আমকসুসানে পাতিতং। সেসমেত্থ সতিপট্ঠানে ৰুত্তমেৰ। ইধাপি নিব্বানংযেৰ ছন্দরাগৰিনযো।
Bāḷhagilānanti adhimattagilānaṃ. Sivathikāya chaḍḍitanti āmakasusāne pātitaṃ. Sesamettha satipaṭṭhāne vuttameva. Idhāpi nibbānaṃyeva chandarāgavinayo.
১৭৩. নেৰ তস্মিং সমযে অত্তব্যাবাধাযাতি তস্মিং সমযে অত্তনোপি দুক্খত্থায ন চেতেতি। অব্যাবজ্ঝংযেৰাতি নিদ্দুক্খমেৰ ।
173.Neva tasmiṃ samaye attabyābādhāyāti tasmiṃ samaye attanopi dukkhatthāya na ceteti. Abyābajjhaṃyevāti niddukkhameva .
১৭৪. যং, ভিক্খৰে, ৰেদনা অনিচ্চাতি, ভিক্খৰে, যস্মা ৰেদনা অনিচ্চা, তস্মা অযং অনিচ্চাদিআকারোৰ ৰেদনায আদীনৰোতি অত্থো, নিস্সরণং ৰুত্তপ্পকারমেৰাতি।
174.Yaṃ, bhikkhave, vedanā aniccāti, bhikkhave, yasmā vedanā aniccā, tasmā ayaṃ aniccādiākārova vedanāya ādīnavoti attho, nissaraṇaṃ vuttappakāramevāti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
মহাদুক্খক্খন্ধসুত্তৰণ্ণনা নিট্ঠিতা।
Mahādukkhakkhandhasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৩. মহাদুক্খক্খন্ধসুত্তং • 3. Mahādukkhakkhandhasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৩. মহাদুক্খক্খন্ধসুত্তৰণ্ণনা • 3. Mahādukkhakkhandhasuttavaṇṇanā
