| Library / Tipiṭaka / д̇ибидага • Tipiṭaka / маж̇жхиманигааяа (дийгаа) • Majjhimanikāya (ṭīkā) |
2. махааг̇осин̇г̇асуд̇д̇аван̣н̣анаа
2. Mahāgosiṅgasuttavaṇṇanā
332. гожид̣̇зваад̇и г̇осин̇г̇асаалаванасааманд̇ад̇о нивидтзсу яо гожи г̇аамо г̇ожараг̇аамо бхависсад̇и, д̇асмаа аниб̣ад̣̇д̇хабхаавад̇о г̇ожараг̇аамо на г̇ахид̇о, васанадтаанамзва барид̣̇ийбид̇ам̣, д̇ад̇о зва аран̃н̃анид̣̇аанагам̣ наамзд̇ам̣. саб̣б̣ад̇т̇аад̇и д̣̇звалогз мануссалогз жа. т̇ирагаарагзхийд̇и саасанз т̇ирабхаавагаарагзхи. савананд̇з ж̇аад̇ад̇д̇аад̇и жад̇усажжаг̇аб̣бхасса д̇хаммассаванасса барияосаанз арияааяа ж̇аад̇ияаа ж̇аад̇ад̇д̇аа. яат̇аа бадивзд̇хаб̣аахусажжам̣ иж̇жхад̇и, д̇ат̇аа д̇хаммасса саванад̇о саавагаа . суурияо вияа бхаасураг̇ун̣арам̣сид̇ааяа моханд̇хагааравид̇хаманад̇о. жанд̣̇о вияа раман̣ийяаманохарасийд̇алаг̇ун̣ад̇ааяа гилзсабарил̣аахавуубасамад̇о. сааг̇аро вияа г̇амбхийрат̇иравибулаанзгаг̇ун̣ад̇ааяа тид̇ад̇хаммасабхаавад̇о. г̇ун̣амаханд̇ад̇ааяа т̇зрасса абхин̃н̃аад̇ад̇аа, г̇ун̣амаханд̇ад̇аа жа суд̇д̇зсу ааг̇ад̇анаязнзва н̃аад̇аб̣б̣аад̇и д̇ам̣ вид̇т̇аарад̇о д̣̇ассзд̇ум̣ ‘‘на гзвала’’нд̇иаад̣̇и вуд̇д̇ам̣. сийханаад̣̇асуд̇д̇анд̇и маж̇жхиманигааяз ааг̇ад̇ам̣ махаасийханаад̣̇асуд̇д̇ам̣ (ма. ни. 1.146). т̇зрабан̃хасуд̇д̇анд̇и суд̇д̇анибаад̇з адтагаваг̇г̇з ааг̇ад̇ам̣ саарибуд̇д̇асуд̇д̇ам̣ (су. ни. 961-981). т̇зрасийханаад̣̇асуд̇д̇анд̇и имасса жа т̇зрасса ж̇анабад̣̇ажааригааяа сад̇т̇у саммукаа сийханаад̣̇асуд̇д̇ам̣. абхинигкамананд̇и т̇зрассзва махад̇аа н̃аад̇ибариваддзна махад̇аа жа бхог̇абариваддзна саха гхарааваасабарижжааг̇о абхинигкаманам̣. зса наяо ид̇о барзсуби. яад̣̇ид̣̇анд̇и нибаад̇о, яо аяанд̇и ад̇т̇о.
332.Kocidevāti gosiṅgasālavanasāmantato niviṭṭhesu yo koci gāmo gocaragāmo bhavissati, tasmā anibaddhabhāvato gocaragāmo na gahito, vasanaṭṭhānameva paridīpitaṃ, tato eva araññanidānakaṃ nāmetaṃ. Sabbatthāti devaloke manussaloke ca. Thirakārakehīti sāsane thirabhāvakārakehi. Savanante jātattāti catusaccagabbhassa dhammassavanassa pariyosāne ariyāya jātiyā jātattā. Yathā paṭivedhabāhusaccaṃ ijjhati, tathā dhammassa savanato sāvakā . Sūriyo viya bhāsuraguṇaraṃsitāya mohandhakāravidhamanato. Cando viya ramaṇīyamanoharasītalaguṇatāya kilesapariḷāhavūpasamato. Sāgaro viya gambhīrathiravipulānekaguṇatāya ṭhitadhammasabhāvato. Guṇamahantatāya therassa abhiññātatā, guṇamahantatā ca suttesu āgatanayeneva ñātabbāti taṃ vitthārato dassetuṃ ‘‘na kevala’’ntiādi vuttaṃ. Sīhanādasuttanti majjhimanikāye āgataṃ mahāsīhanādasuttaṃ (ma. ni. 1.146). Therapañhasuttanti suttanipāte aṭṭhakavagge āgataṃ sāriputtasuttaṃ (su. ni. 961-981). Therasīhanādasuttanti imassa ca therassa janapadacārikāya satthu sammukhā sīhanādasuttaṃ. Abhinikkhamananti therasseva mahatā ñātiparivaṭṭena mahatā ca bhogaparivaṭṭena saha gharāvāsapariccāgo abhinikkhamanaṃ. Esa nayo ito paresupi. Yadidanti nipāto, yo ayanti attho.
махаабан̃н̃з бхигкуу г̇ахзд̇ваад̇и ааяасмад̇о гира саарибуд̇д̇ад̇т̇зрасса бариваарабхигкууби махаабан̃н̃аа зва ахзсум̣. д̇хаад̇усо хи сад̇д̇аа сам̣санд̣̇анд̇и. саяам̣ ид̣̇д̇химаад̇иаад̣̇ийсуби зсзва наяо. аяам̣ банад̇т̇о д̇хаад̇усам̣яуд̇д̇зна (сам̣. ни. 2.99) д̣̇ийбзд̇аб̣б̣о – г̇иж̇жхагуудабаб̣б̣ад̇з г̇илаанасзяяааяа нисинно бхаг̇аваа аарагкад̇т̇ааяа бариваарзд̇ваа васанд̇зсу саарибуд̇д̇амог̇г̇аллаанаад̣̇ийсу згамзгам̣ ад̇д̇ано барисааяа сад̣̇д̇хим̣ жан̇гаманд̇ам̣ вологзд̇ваа бхигкуу ааманд̇зси – ‘‘бассат̇а но д̇умхз, бхигкавз, саарибуд̇д̇ам̣ самб̣ахулзхи бхигкуухи сад̣̇д̇хим̣ жан̇гаманд̇анд̇и. звам̣, бханд̇з. саб̣б̣з ко зд̇з, бхигкавз, бхигкуу махаабан̃н̃аа’’д̇и саб̣б̣ам̣ вид̇т̇аарзд̇аб̣б̣ам̣.
Mahāpaññe bhikkhū gahetvāti āyasmato kira sāriputtattherassa parivārabhikkhūpi mahāpaññā eva ahesuṃ. Dhātuso hi sattā saṃsandanti. Sayaṃ iddhimātiādīsupi eseva nayo. Ayaṃ panattho dhātusaṃyuttena (saṃ. ni. 2.99) dīpetabbo – gijjhakūṭapabbate gilānaseyyāya nisinno bhagavā ārakkhatthāya parivāretvā vasantesu sāriputtamoggallānādīsu ekamekaṃ attano parisāya saddhiṃ caṅkamantaṃ voloketvā bhikkhū āmantesi – ‘‘passatha no tumhe, bhikkhave, sāriputtaṃ sambahulehi bhikkhūhi saddhiṃ caṅkamantanti. Evaṃ, bhante. Sabbe kho ete, bhikkhave, bhikkhū mahāpaññā’’ti sabbaṃ vitthāretabbaṃ.
вананд̇зд̇и убавананд̇з. мзгхаван̣н̣ааяаад̇и нийлаабхааяа. самуд̣̇д̣̇агужчид̇о уг̇г̇ажчанд̇асса вияа убадтаанам̣ санд̇хааяа вуд̇д̇ам̣. жаггаваал̣абаб̣б̣ад̇амад̇т̇агасамийбз аабхаапаран̣авасзна бавад̇д̇ияаа ‘‘баажийнажаггаваал̣абаб̣б̣ад̇амад̇т̇агз’’д̇и вуд̇д̇ам̣, на жаггаваал̣абаб̣б̣ад̇амад̇т̇агз жанд̣̇аман̣д̣аласса вижаран̣ад̇о. д̇ат̇аа сад̇и логанд̇ариганираязсуби жанд̣̇имасуурияаанам̣ аабхаа парзяяа. уб̣б̣зд̇хавасзна хи жаггаваал̣абаб̣б̣ад̇асса взмаж̇жхад̇о жанд̣̇имасуурияаа вижаранд̇и. саалагусумабабхаанам̣ ад̇ирад̇д̇ад̇ааяа вуд̇д̇ам̣ ‘‘лаакаарасзна син̃жамаанам̣ вияаа’’д̇и. убаг̇ааяамаанаа вияаад̇и баяирубаасанавасзна убзжжа г̇ааяамаанаа вияа . гааяа ну ко аж̇ж̇а рад̇ияаад̇и аж̇ж̇а жхаанасамаабад̇д̇ирад̇ияаа зва ну ко, уд̣̇ааху д̇хаммасаагажчаарад̇ияаа д̇хаммад̣̇зсанаарад̇ияаад̇и жинд̇зси.
Vananteti upavanante. Meghavaṇṇāyāti nīlābhāya. Samuddakucchito uggacchantassa viya upaṭṭhānaṃ sandhāya vuttaṃ. Cakkavāḷapabbatamatthakasamīpe ābhāpharaṇavasena pavattiyā ‘‘pācīnacakkavāḷapabbatamatthake’’ti vuttaṃ, na cakkavāḷapabbatamatthake candamaṇḍalassa vicaraṇato. Tathā sati lokantarikanirayesupi candimasūriyānaṃ ābhā phareyya. Ubbedhavasena hi cakkavāḷapabbatassa vemajjhato candimasūriyā vicaranti. Sālakusumapabhānaṃ atirattatāya vuttaṃ ‘‘lākhārasena siñcamānaṃ viyā’’ti. Upagāyamānā viyāti payirupāsanavasena upecca gāyamānā viya . Kāya nu kho ajja ratiyāti ajja jhānasamāpattiratiyā eva nu kho, udāhu dhammasākacchāratiyā dhammadesanāratiyāti cintesi.
д̣̇вз жанд̣̇аман̣д̣алаани вияа барамасобхаг̇г̇аббад̇д̇ааяа ганд̇ияаа. д̣̇вз суурияаман̣д̣алаани вияа ад̇ивияа сувисуд̣̇д̇хасамуж̇ж̇алааяа г̇ун̣авибхууд̇ияаа. д̣̇вз чад̣̇д̣̇анд̇анааг̇арааж̇аано вияа махаанубхаавад̇ааяа. д̣̇вз сийхаа вияа д̇зж̇уссад̣̇ад̇ааяа. д̣̇вз б̣яаг̇гхаа вияа анолийнавуд̇д̇ид̇ааяа. саб̣б̣абаалипулламзваад̇и саб̣б̣амзва саманд̇ад̇о вигасид̇ам̣.
Dve candamaṇḍalāni viya paramasobhaggappattāya kantiyā. Dve sūriyamaṇḍalāni viya ativiya suvisuddhasamujjalāya guṇavibhūtiyā. Dve chaddantanāgarājāno viya mahānubhāvatāya. Dve sīhā viya tejussadatāya. Dve byagghā viya anolīnavuttitāya. Sabbapāliphullamevāti sabbameva samantato vikasitaṃ.
333. гат̇аа убажарад̇и бавад̇д̇ад̇и зд̇т̇аад̇и гат̇ааубажааро, савануубажааро бад̣̇зсо, д̇ам̣ гат̇ааубажаарам̣. раман̣ийяамзва рааман̣зяяагам̣. уж̇ж̇ан̇г̇алзд̇и луукабад̣̇зсз гатинабад̣̇зсз. д̣̇осзхи ид̇аа абаг̇ад̇аад̇и д̣̇осинаа д̇а-гаарасса на-гаарам̣ гад̇ваа. д̣̇иб̣б̣аа ман̃н̃з г̇анд̇хаад̇и д̣̇звалогз г̇анд̇хаа вияа. д̣̇иви бхаваад̇и д̣̇иб̣б̣аа. д̣̇вз т̇зраад̇и саарибуд̇д̇ад̇т̇зрааананд̣̇ад̇т̇зраа. аананд̣̇ад̇т̇зро д̇аава мамааяад̇у акийн̣аасавабхаавад̇о, саарибуд̇д̇ад̇т̇зро гат̇анд̇и? на ид̣̇ам̣ мамааяанам̣ г̇зхассид̇абзмавасзна, ат̇а ко г̇ун̣абхад̇д̇ивасзнаад̇и нааяам̣ д̣̇осо.
333. Kathā upacarati pavattati etthāti kathāupacāro, savanūpacāro padeso, taṃ kathāupacāraṃ. Ramaṇīyameva rāmaṇeyyakaṃ. Ujjaṅgaleti lūkhapadese kaṭhinapadese. Dosehi itā apagatāti dosinā ta-kārassa na-kāraṃ katvā. Dibbā maññe gandhāti devaloke gandhā viya. Divi bhavāti dibbā. Dve therāti sāriputtattheraānandattherā. Ānandatthero tāva mamāyatu akhīṇāsavabhāvato, sāriputtatthero kathanti? Na idaṃ mamāyanaṃ gehassitapemavasena, atha kho guṇabhattivasenāti nāyaṃ doso.
анумад̇ияаа бужчаа анумад̇ибужчаа, анумад̇иг̇г̇ахан̣ад̇т̇ам̣ бужчанам̣. д̇ад̇т̇а яасмаа ад̇хаммигамби вуд̣̇д̇хасса анумад̇им̣ ид̇аро бадигкибид̇ум̣ на лабхад̇и, д̇зна саа ануж̇аанид̇аб̣б̣аава ход̇и, д̇асмаа сан̇гхакуд̣̇д̣̇агад̇о бадтааяа анумад̇и бужчид̇аб̣б̣аа. д̇знааха ‘‘анумад̇ибужчаа наамзсаа’’д̇иаад̣̇и. куд̣̇д̣̇агад̇о бадтааяаад̇и ган̣идтад̇о бадтааяа. бадибхаад̇и убадтаад̇ийд̇и бадибхаанам̣, яат̇аад̇хиббзд̇о ад̇т̇о, д̇ам̣ бадибхаанам̣. сикааббад̇д̇аа взбуллаббад̇д̇аа на бхависсад̇и бад̣̇зсан̃аан̣з тид̇зхи бхаасид̇ад̇д̇аа. сикааббад̇д̇аа взбуллаббад̇д̇аа бхависсад̇и саб̣б̣ан̃н̃уд̇ан̃н̃аан̣зна сам̣санд̣̇ид̇ад̇д̇аа. вуд̇д̇амзвад̇т̇ам̣ убамааяа вибхаавзд̇ум̣ ‘‘яат̇аа хий’’д̇иаад̣̇и вуд̇д̇ам̣. д̇ад̇т̇а бажжад̇т̇игаа аддияанд̇и д̣̇угкааяанд̇и зд̇знаад̇и аддо, винижчид̇аб̣б̣авохааро. г̇аамабхож̇аганд̇и яасмим̣ г̇аамз со уббанно, д̇ам̣ г̇аамабхож̇агам̣. ж̇анабад̣̇абхож̇аганд̇и яасмим̣ ж̇анабад̣̇з со уббанно, д̇ам̣ ж̇анабад̣̇абхож̇агам̣. махаавинижчаяаамажжанд̇и яасмим̣ раж̇ж̇з со ж̇анабад̣̇о, д̇асса рааж̇ад̇хаанияам̣ махаавинижчаяаамажжам̣. сзнаабад̇инд̇и яасса ран̃н̃о со амажжо, д̇асса сзнаабад̇им̣. д̇ат̇аа убарааж̇анд̇и . ид̣̇ам̣ банзд̇т̇а багад̇ижаарид̇д̇авасзна вуд̇д̇ам̣ убамзяяад̇т̇аануруубад̇од̇и д̣̇адтаб̣б̣ам̣. абараабарам̣ на сан̃жарад̇и винижчаяанаарахзна винижчид̇абхаавад̇о.
Anumatiyā pucchā anumatipucchā, anumatiggahaṇatthaṃ pucchanaṃ. Tattha yasmā adhammikampi vuddhassa anumatiṃ itaro paṭikkhipituṃ na labhati, tena sā anujānitabbāva hoti, tasmā saṅghakhuddakato paṭṭhāya anumati pucchitabbā. Tenāha ‘‘anumatipucchā nāmesā’’tiādi. Khuddakato paṭṭhāyāti kaṇiṭṭhato paṭṭhāya. Paṭibhāti upaṭṭhātīti paṭibhānaṃ, yathādhippeto attho, taṃ paṭibhānaṃ. Sikhāppattā vepullappattā na bhavissati padesañāṇe ṭhitehi bhāsitattā. Sikhāppattā vepullappattā bhavissati sabbaññutaññāṇena saṃsanditattā. Vuttamevatthaṃ upamāya vibhāvetuṃ ‘‘yathā hī’’tiādi vuttaṃ. Tattha paccatthikā aṭṭiyanti dukkhāyanti etenāti aṭṭo, vinicchitabbavohāro. Gāmabhojakanti yasmiṃ gāme so uppanno, taṃ gāmabhojakaṃ. Janapadabhojakanti yasmiṃ janapade so uppanno, taṃ janapadabhojakaṃ. Mahāvinicchayaamaccanti yasmiṃ rajje so janapado, tassa rājadhāniyaṃ mahāvinicchayaamaccaṃ. Senāpatinti yassa rañño so amacco, tassa senāpatiṃ. Tathā uparājanti . Idaṃ panettha pakaticārittavasena vuttaṃ upameyyatthānurūpatoti daṭṭhabbaṃ. Aparāparaṃ na sañcarati vinicchayanārahena vinicchitabhāvato.
багадтаанам̣ (а. ни. дий. 2.4.22) уггадтаанам̣ сийлаад̣̇иад̇т̇аанам̣ б̣од̇ханад̇о, сабхааванируд̇д̇ивасзна б̣уд̣̇д̇хаад̣̇ийхи бхаасид̇ад̇д̇аа жа багадтаанам̣ важанаббаб̣анд̇хаанам̣ аал̣ийд̇и баал̣и, барияад̇д̇ид̇хаммо. буримасса ад̇т̇асса бажчимзна ад̇т̇зна анусанд̇хаанам̣ анусанд̇хи. ад̇т̇амукзна бана баал̣ибад̣̇зсаанамби анусанд̇хи ход̇иязва, со жа буб̣б̣аабараанусанд̇хи-бужчаанусанд̇хи-аж̇жхаасаяаанусанд̇хи-яат̇аанусанд̇хивасзна жад̇уб̣б̣ид̇хо. д̇ам̣д̇ам̣д̣̇зсанаанам̣ бана буб̣б̣аабарасам̣санд̣̇анам̣ буб̣б̣аабарам̣. баал̣ивасзна анусанд̇хивасзна буб̣б̣аабаравасзнаад̇и бажжзгам̣ яож̇зд̇аб̣б̣ам̣. уг̇г̇ахид̇анд̇и б̣яан̃ж̇анасо ад̇т̇асо жа уд̣̇д̇хам̣ уд̣̇д̇хам̣ г̇ахид̇ам̣, барияаабун̣анавасзна жзва барибужчаавасзна жа хад̣̇аязна г̇ахид̇анд̇и ад̇т̇о. ваддад̣̇угканиссаран̣ад̇т̇игзхи сод̇аб̣б̣ад̇о суд̇ам̣, барияад̇д̇ид̇хаммо, д̇ам̣ д̇хаарзд̇ийд̇и суд̇ад̇харо. яо хи суд̇ад̇харо, суд̇ам̣ д̇асмим̣ бад̇идтид̇ам̣ ход̇и суббад̇идтид̇ам̣, д̇асмаа вуд̇д̇ам̣ ‘‘суд̇асса аад̇хаарабхууд̇о’’д̇и. д̇знааха ‘‘яасса хий’’д̇иаад̣̇и. згабад̣̇ам̣ згагкарамби авинадтам̣ худ̇ваа саннижийяад̇ийд̇и саннижаяо, суд̇ам̣ саннижаяо зд̇асминд̇и суд̇асаннижаяо. аж̇жхосааяаад̇и анубависид̇ваа. д̇идтад̇ийд̇и на муссад̇и.
Pakaṭṭhānaṃ (a. ni. ṭī. 2.4.22) ukkaṭṭhānaṃ sīlādiatthānaṃ bodhanato, sabhāvaniruttivasena buddhādīhi bhāsitattā ca pakaṭṭhānaṃ vacanappabandhānaṃ āḷīti pāḷi, pariyattidhammo. Purimassa atthassa pacchimena atthena anusandhānaṃ anusandhi. Atthamukhena pana pāḷipadesānampi anusandhi hotiyeva, so ca pubbāparānusandhi-pucchānusandhi-ajjhāsayānusandhi-yathānusandhivasena catubbidho. Taṃtaṃdesanānaṃ pana pubbāparasaṃsandanaṃ pubbāparaṃ. Pāḷivasena anusandhivasena pubbāparavasenāti paccekaṃ yojetabbaṃ. Uggahitanti byañjanaso atthaso ca uddhaṃ uddhaṃ gahitaṃ, pariyāpuṇanavasena ceva paripucchāvasena ca hadayena gahitanti attho. Vaṭṭadukkhanissaraṇatthikehi sotabbato sutaṃ, pariyattidhammo, taṃ dhāretīti sutadharo. Yo hi sutadharo, sutaṃ tasmiṃ patiṭṭhitaṃ hoti suppatiṭṭhitaṃ, tasmā vuttaṃ ‘‘sutassa ādhārabhūto’’ti. Tenāha ‘‘yassa hī’’tiādi. Ekapadaṃ ekakkharampi avinaṭṭhaṃ hutvā sannicīyatīti sannicayo, sutaṃ sannicayo etasminti sutasannicayo. Ajjhosāyāti anupavisitvā. Tiṭṭhatīti na mussati.
тид̇аа баг̇ун̣аад̇и баг̇ун̣аа ваажуг̇г̇ад̇аа. нижжалид̇анд̇и абаривад̇д̇ид̇ам̣. сам̣санд̣̇ид̇ваад̇и ан̃н̃зхи сам̣санд̣̇ид̇ваа. самануг̇г̇аахид̇ваад̇и барибужчаавасзна ад̇т̇ам̣ ог̇аахзд̇ваа. баб̣анд̇хасса виб̣анд̇хаабхаавад̇о г̇ан̇г̇аасод̇асад̣̇исам̣, ‘‘бхаван̇г̇асод̇асад̣̇иса’’нд̇и ваа баато, агид̇д̇имам̣ сукаббавад̇д̇ийд̇и ад̇т̇о. суд̇д̇згад̣̇зсасса суд̇д̇асса жа важасаа барижаяо ид̇ха наад̇хиббзд̇о, ваг̇г̇аад̣̇ивасзна бана ад̇хиббзд̇од̇и ааха ‘‘суд̇д̇ад̣̇асага…бз… саж̇жхааяид̇аа’’д̇и, ‘‘д̣̇аса суд̇д̇аани г̇ад̇аани, д̣̇аса ваг̇г̇ааг̇ад̇аа’’д̇иаад̣̇инаа саллагкзд̇ваа ваажааяа саж̇жхааяид̇аад̇и ад̇т̇о. манасаа ану ану бзгкид̇аа бхааг̇асо ниж̇жхааяид̇аа жинд̇ид̇аа манасаанубзгкид̇аа. руубаг̇ад̇ам̣ вияа бан̃н̃ааяад̇ийд̇и руубаг̇ад̇ам̣ вияа жагкусса вибхууд̇ам̣ худ̇ваа бан̃н̃ааяад̇и. суббадивид̣̇д̇хаад̇и ниж̇ж̇адам̣ ниг̇г̇умб̣ам̣ гад̇ваа судту яаат̇аавад̇о бадивид̣̇д̇хаа.
Ṭhitā paguṇāti paguṇā vācuggatā. Niccalitanti aparivattitaṃ. Saṃsanditvāti aññehi saṃsanditvā. Samanuggāhitvāti paripucchāvasena atthaṃ ogāhetvā. Pabandhassa vibandhābhāvato gaṅgāsotasadisaṃ, ‘‘bhavaṅgasotasadisa’’nti vā pāṭho, akittimaṃ sukhappavattīti attho. Suttekadesassa suttassa ca vacasā paricayo idha nādhippeto, vaggādivasena pana adhippetoti āha ‘‘suttadasaka…pe… sajjhāyitā’’ti, ‘‘dasa suttāni gatāni, dasa vaggāgatā’’tiādinā sallakkhetvā vācāya sajjhāyitāti attho. Manasā anu anu pekkhitā bhāgaso nijjhāyitā cintitā manasānupekkhitā. Rūpagataṃ viya paññāyatīti rūpagataṃ viya cakkhussa vibhūtaṃ hutvā paññāyati. Suppaṭividdhāti nijjaṭaṃ niggumbaṃ katvā suṭṭhu yāthāvato paṭividdhā.
баж̇ж̇ад̇и ад̇т̇о н̃ааяад̇и зд̇знаад̇и бад̣̇ам̣, д̇ад̣̇зва ад̇т̇ам̣ б̣яан̃ж̇зд̇ийд̇и б̣яан̃ж̇ананд̇и ааха ‘‘бад̣̇амзва ад̇т̇асса б̣яан̃ж̇анад̇о бад̣̇аб̣яан̃ж̇ана’’нд̇и. агкарабаарибуурияаа бад̣̇аб̣яан̃ж̇анасса бариман̣д̣алад̇аа, саа бана баарибуурий звам̣ взд̣̇ид̇аб̣б̣аад̇и ааха ‘‘д̣̇асавид̇хаб̣яан̃ж̇анаб̣уд̣̇д̇хияо абарихаабзд̇ваа’’д̇и. ан̃н̃ам̣ убаарамбхагаранд̇и яат̇аанигкид̇д̇асуд̇д̇ад̇о ан̃н̃ам̣ д̇асса анануломагам̣ суд̇д̇ам̣ аахарад̇и. д̇ад̣̇ад̇т̇ам̣ од̇аарзд̇ийд̇и д̇асса аахадасуд̇д̇ассзва ад̇т̇ам̣ вижаарзд̇и. д̇асса гат̇аа абариман̣д̣алаа наама ход̇и ад̇т̇асса абарибун̣н̣абхаавад̇о. яат̇аанигкид̇д̇асса суд̇д̇асса ад̇т̇асам̣ван̣н̣анаавасзнзва суд̇д̇анд̇арамби аанзнд̇о б̣ахи згабад̣̇амби на г̇ажчад̇и наама. амагкзнд̇од̇и авинаасзнд̇о. д̇ам̣ д̇ам̣ ад̇т̇ам̣ судту вавад̇т̇ид̇ам̣ гад̇ваа д̣̇ассзнд̇о д̇улигааяа барижчинд̣̇анд̇о вияа. г̇амбхийрад̇арамад̇т̇ам̣ г̇амзнд̇о г̇амбхийрамаад̇игааяа уд̣̇агам̣ бзсзнд̇о вияа. уд̇д̇аанамаад̇игааяа хи марияаад̣̇ам̣ од̇т̇арид̇ваа уд̣̇агам̣ ан̃н̃ат̇аа г̇ажчзяяа. згам̣язва бад̣̇ам̣ анзгзхи барияааязхи бунаббунам̣ сам̣ван̣н̣знд̇о бад̣̇ам̣ годдзнд̇о синд̇хавааж̇аанийяо вияа. со хи ваг̇г̇ид̇ааяа г̇ад̇ияаа бад̣̇з бад̣̇ам̣ годдзнд̇о г̇ажчад̇и. гат̇аамаг̇г̇зна д̇асса гат̇аа бариман̣д̣алаа наама ход̇и д̇хаммад̇о ад̇т̇ад̇о анусанд̇хид̇о буб̣б̣аабарад̇о аажарияуг̇г̇ахад̇од̇и саб̣б̣асо барибун̣н̣абхаавад̇о.
Pajjati attho ñāyati etenāti padaṃ, tadeva atthaṃ byañjetīti byañjananti āha ‘‘padameva atthassa byañjanato padabyañjana’’nti. Akkharapāripūriyā padabyañjanassa parimaṇḍalatā, sā pana pāripūrī evaṃ veditabbāti āha ‘‘dasavidhabyañjanabuddhiyo aparihāpetvā’’ti. Aññaṃ upārambhakaranti yathānikkhittasuttato aññaṃ tassa ananulomakaṃ suttaṃ āharati. Tadatthaṃ otāretīti tassa āhaṭasuttasseva atthaṃ vicāreti. Tassa kathā aparimaṇḍalā nāma hoti atthassa aparipuṇṇabhāvato. Yathānikkhittassa suttassa atthasaṃvaṇṇanāvaseneva suttantarampi ānento bahi ekapadampi na gacchati nāma. Amakkhentoti avināsento. Taṃ taṃ atthaṃ suṭṭhu vavatthitaṃ katvā dassento tulikāya paricchindanto viya. Gambhīrataramatthaṃ gamento gambhīramātikāya udakaṃ pesento viya. Uttānamātikāya hi mariyādaṃ ottharitvā udakaṃ aññathā gaccheyya. Ekaṃyeva padaṃ anekehi pariyāyehi punappunaṃ saṃvaṇṇento padaṃ koṭṭento sindhavājānīyo viya. So hi vaggitāya gatiyā pade padaṃ koṭṭento gacchati. Kathāmaggena tassa kathā parimaṇḍalā nāma hoti dhammato atthato anusandhito pubbāparato ācariyuggahatoti sabbaso paripuṇṇabhāvato.
ануббаб̣анд̇хзхийд̇и виссадтзхи аасаж̇ж̇амаанзхи. наад̇исийгхам̣ наад̇исан̣игам̣ ниранд̇арам̣ згарасан̃жа гад̇ваа барисааяа аж̇жхаасаяаануруубам̣ д̇хаммам̣ гат̇знд̇о виссадтааяа гат̇ааяа гат̇зд̇и наама, на ан̃н̃ат̇аад̇и д̣̇ассзнд̇о ‘‘яо бхигкуу’’д̇иаад̣̇имааха. аран̣им̣ мант̇знд̇о вияа, ун̣хакаад̣̇анийяам̣ каад̣̇анд̇о вияаад̇и сийгхам̣ сийгхам̣ гат̇анасса уд̣̇аахаран̣ам̣, г̇ахид̇ам̣ г̇ахид̇амзваад̇иаад̣̇и лан̇гхзд̇ваа гат̇анасса. бураан̣абан̣н̣анд̇арзсу хи барибаад̇ияамаанаг̇од̇хаа гад̣̇аажи д̣̇иссад̇и, звамзгажжасса ад̇т̇аван̣н̣анаа гад̇т̇ажи на д̣̇иссад̇и. охааяаад̇и табзд̇ваа. яобийд̇иаад̣̇инаа згаруубзна гат̇ааяа агат̇анам̣ д̣̇ассзд̇и. бзд̇аг̇г̇и ниж̇жхаамад̇ан̣хигабзд̇асса мукад̇о нижчаран̣агааг̇г̇и. вид̇т̇ааяад̇ийд̇и аббадид̇аанад̇амаабаж̇ж̇ад̇и. гзнажи рог̇зна д̣̇угкам̣ бад̇д̇о вияа нид̇т̇унанд̇о. ганд̣̇анд̇о вияаад̇и уггудтим̣ гаронд̇о вияа. аббаб̣анд̇хаа наама ход̇и сукзна аббавад̇д̇абхаавад̇о. аажариязхи д̣̇иннанаяз тид̇од̇и аажарияуг̇г̇ахам̣ амун̃жанд̇о, яат̇аа жа аажарияаа д̇ам̣ д̇ам̣ суд̇д̇ам̣ сам̣ван̣н̣зсум̣, д̇знзва наязна сам̣ван̣н̣знд̇од̇и ад̇т̇о. ажчиннад̇хаарам̣ гад̇ваад̇и ‘‘наад̇исийгхам̣ наад̇исан̣ига’’нд̇иаад̣̇инаа хздтаа вуд̇д̇анаязна авижчиннам̣ гат̇аабаб̣анд̇хам̣ гад̇ваа. анусаяасамуг̇гхаад̇ааяаад̇и иминаа д̇ассаа гат̇ааяа арахад̇д̇абарияосаанад̇ам̣ д̣̇ассзд̇и . зваруубзнаад̇и наяид̣̇ам̣ згаважанам̣ д̇ад̇д̇агавасзна г̇ахзд̇аб̣б̣ам̣, ат̇а ко лагкан̣з бавад̇д̇анд̇и д̣̇ассзнд̇о ‘‘д̇ат̇ааруубзнзва бхигкусад̇зна бхигкусахассзна ваа’’д̇и вуд̇д̇ам̣. баллан̇гзнаад̇и баллан̇габад̣̇зсзна, баллан̇гаасананд̇знаад̇и ад̇т̇о. иминаа наязнаад̇и вааранд̇арасаад̇хааран̣ам̣ ад̇т̇ам̣ ад̇ид̣̇исад̇и, асаад̇хааран̣ам̣ бана вагкад̇зваад̇и.
Anuppabandhehīti vissaṭṭhehi āsajjamānehi. Nātisīghaṃ nātisaṇikaṃ nirantaraṃ ekarasañca katvā parisāya ajjhāsayānurūpaṃ dhammaṃ kathento vissaṭṭhāya kathāya katheti nāma, na aññathāti dassento ‘‘yo bhikkhū’’tiādimāha. Araṇiṃ manthento viya, uṇhakhādanīyaṃ khādanto viyāti sīghaṃ sīghaṃ kathanassa udāharaṇaṃ, gahitaṃ gahitamevātiādi laṅghetvā kathanassa. Purāṇapaṇṇantaresu hi paripātiyamānagodhā kadāci dissati, evamekaccassa atthavaṇṇanā katthaci na dissati. Ohāyāti ṭhapetvā. Yopītiādinā ekarūpena kathāya akathanaṃ dasseti. Petaggi nijjhāmataṇhikapetassa mukhato niccharaṇakaaggi. Vitthāyatīti appaṭitānatamāpajjati. Kenaci rogena dukkhaṃ patto viya nitthunanto. Kandanto viyāti ukkuṭṭhiṃ karonto viya. Appabandhā nāma hoti sukhena appavattabhāvato. Ācariyehi dinnanaye ṭhitoti ācariyuggahaṃ amuñcanto, yathā ca ācariyā taṃ taṃ suttaṃ saṃvaṇṇesuṃ, teneva nayena saṃvaṇṇentoti attho. Acchinnadhāraṃ katvāti ‘‘nātisīghaṃ nātisaṇika’’ntiādinā heṭṭhā vuttanayena avicchinnaṃ kathāpabandhaṃ katvā. Anusayasamugghātāyāti iminā tassā kathāya arahattapariyosānataṃ dasseti . Evarūpenāti nayidaṃ ekavacanaṃ tattakavasena gahetabbaṃ, atha kho lakkhaṇe pavattanti dassento ‘‘tathārūpeneva bhikkhusatena bhikkhusahassena vā’’ti vuttaṃ. Pallaṅkenāti pallaṅkapadesena, pallaṅkāsanantenāti attho. Iminā nayenāti vārantarasādhāraṇaṃ atthaṃ atidisati, asādhāraṇaṃ pana vakkhatevāti.
334. аарамад̇и зд̇знаад̇и аараамо.
334. Āramati etenāti ārāmo.
335. д̇хувасзвананд̇и нияад̇асзвид̇ам̣. баасаад̣̇абаривзн̣зд̇и баасаад̣̇ан̇г̇ан̣з. наабхияаа бад̇идтид̇аананд̇и наабхияаа бхуумияам̣ бад̇идтид̇аанам̣. аранд̇араанийд̇и аравивараани д̇ам̣д̇ам̣араанам̣ взмаж̇жхадтаанаани.
335.Dhuvasevananti niyatasevitaṃ. Pāsādapariveṇeti pāsādaṅgaṇe. Nābhiyā patiṭṭhitānanti nābhiyā bhūmiyaṃ patiṭṭhitānaṃ. Arantarānīti aravivarāni taṃtaṃarānaṃ vemajjhaṭṭhānāni.
336. самаад̣̇иннааран̃н̃ад̇худ̇ан̇г̇о ааран̃н̃иго, на аран̃н̃аваасамад̇д̇зна.
336.Samādinnaaraññadhutaṅgo āraññiko, na araññavāsamattena.
337. на осаад̣̇знд̇ийд̇и на авасаад̣̇знд̇и, на авасаад̣̇анаабзгкаа ан̃н̃аман̃н̃ам̣ бан̃хам̣ бужчанд̇ийд̇и ад̇т̇о. бавад̇д̇инийд̇и баг̇ун̣аа.
337.Naosādentīti na avasādenti, na avasādanāpekkhā aññamaññaṃ pañhaṃ pucchantīti attho. Pavattinīti paguṇā.
338. логуд̇д̇араа вихаарасамаабад̇д̇и наама т̇зрасса арахад̇д̇апаласамаабад̇д̇ияо, барияааяад̇о бана нирод̇хасамаабад̇д̇иби взд̣̇ид̇аб̣б̣аа.
338.Lokuttarā vihārasamāpatti nāma therassa arahattaphalasamāpattiyo, pariyāyato pana nirodhasamāpattipi veditabbā.
339. саад̇хугааро аананд̣̇ад̇т̇зрасса д̣̇инно. д̇знааха бхаг̇аваа ‘‘яат̇аа д̇ам̣ аананд̣̇ова саммаа б̣яаагарамаано б̣яаагарзяяаа’’д̇иаад̣̇и. саммаад̇и судту, яат̇аааж̇жхаасаяанд̇и ад̇хиббааяо. язна хи яам̣ яат̇аажид̇д̇ам̣ гат̇ид̇ам̣, д̇ам̣ саммаа гат̇ид̇ам̣ наама ход̇и. самбад̇д̇авасзна хи яат̇аагаарий д̇ат̇ааваад̣̇ий собхад̇и. д̇знааха ‘‘ад̇д̇ано анужчавигамзваа’’д̇иаад̣̇и. б̣ахуссуд̇о бхигку д̇ад̇т̇а д̇ад̇т̇а суд̇д̇з сийлаад̣̇ийнам̣ ааг̇ад̇адтаанз д̇зсам̣ сувид̣̇ид̇ад̇д̇аа яат̇аанусидтам̣ бадибаж̇ж̇амаано д̇аани барибуурзд̇ийд̇и ааха ‘‘сийласса ааг̇ад̇адтаанз’’д̇иаад̣̇и. маг̇г̇аад̣̇ибасаванааяа вибассанааг̇аб̣бхам̣ г̇ан̣хаабзд̇ваа барибаагам̣ г̇амзд̇ваад̇и ад̇т̇о.
339.Sādhukāro ānandattherassa dinno. Tenāha bhagavā ‘‘yathā taṃ ānandova sammā byākaramāno byākareyyā’’tiādi. Sammāti suṭṭhu, yathāajjhāsayanti adhippāyo. Yena hi yaṃ yathācittaṃ kathitaṃ, taṃ sammā kathitaṃ nāma hoti. Sampattavasena hi yathākārī tathāvādī sobhati. Tenāha ‘‘attano anucchavikamevā’’tiādi. Bahussuto bhikkhu tattha tattha sutte sīlādīnaṃ āgataṭṭhāne tesaṃ suviditattā yathānusiṭṭhaṃ paṭipajjamāno tāni paripūretīti āha ‘‘sīlassa āgataṭṭhāne’’tiādi. Maggādipasavanāya vipassanāgabbhaṃ gaṇhāpetvā paripākaṃ gametvāti attho.
340. ‘‘зсзва наяо’’д̇и ад̇ид̣̇зсавасзна сан̇кзбад̇о вуд̇д̇амад̇т̇ам̣ виваранд̇о ‘‘ааяасмаа хи рзвад̇о’’д̇иаад̣̇имааха.
340. ‘‘Eseva nayo’’ti atidesavasena saṅkhepato vuttamatthaṃ vivaranto ‘‘āyasmā hi revato’’tiādimāha.
342. абарзби наанаббагаарз гилзсзд̇и абарзби наанаббагаарз д̣̇осамохаад̣̇игилзсз. д̇хунид̇ваад̇и вид̇хамзд̇ваа.
342.Aparepinānappakāre kileseti aparepi nānappakāre dosamohādikilese. Dhunitvāti vidhametvā.
343. ааяасмаа махаамог̇г̇аллаано звам̣ б̣яаагаасийд̇и самб̣анд̇хо. сагаламби жагкувин̃н̃аан̣авийт̇иг̇ад̇ам̣ жид̇д̇ам̣ жагкувин̃н̃аан̣анд̇и аг̇г̇ахзд̇ваа жагкусанниссид̇амзва бана вин̃н̃аан̣ам̣ жагкувин̃н̃аан̣ам̣, д̇ад̣̇ананд̇арам̣ самбадижчанам̣, д̇ад̣̇ананд̇арам̣ санд̇ийран̣анд̇иаад̣̇инаа сан̣хам̣ сукумам̣ ад̇иид̇д̇аракан̣аванд̇ам̣ жид̇д̇анд̇арам̣ жид̇д̇анаанад̇д̇ам̣. канд̇хаад̣̇ийнан̃жа наанад̇д̇асан̇каад̇ам̣ канд̇ханд̇араад̣̇и. бат̇авийгасин̣з батамаж̇жхаанам̣ самаабаж̇ж̇ид̇ваа д̇ат̇зва д̇ад̇ияам̣ жхаананд̇иаад̣̇инаа аарамман̣ам̣ ануггамид̇ваа жхаанассзва зганд̇аригабхаавзна уггаманам̣ жхааногганд̇игам̣ наама. бат̇авийгасин̣з батамам̣ жхаанам̣ самаабаж̇ж̇ид̇ваа буна д̇ад̣̇зва д̇зж̇огасин̣зд̇иаад̣̇инаа жхаанам̣ ануггамид̇ваа аарамман̣ассзва зганд̇аригабхаавзна уггаманам̣ аарамман̣огганд̇игам̣ наама. ‘‘батамаж̇жхаанам̣ бан̃жан̇г̇ига’’нд̇иаад̣̇инаа яаава нзвасан̃н̃аанаасан̃н̃ааяад̇анам̣ д̣̇уван̇г̇иганд̇и жхаанан̇г̇амад̇д̇ассзва вавад̇т̇аабанам̣ ан̇г̇ававад̇т̇аанам̣. ‘‘ид̣̇ам̣ бат̇авийгасин̣ам̣…бз… ид̣̇ам̣ од̣̇аад̇агасин̣а’’нд̇и аарамман̣амад̇д̇ассзва вавад̇т̇аабанам̣ аарамман̣ававад̇т̇аанам̣. бат̇авийгасин̣з батамам̣ жхаанам̣ самаабаж̇ж̇ид̇ваа д̇ад̇т̇зва ид̇арзсамби самаабаж̇ж̇анам̣ ан̇г̇асан̇ганд̇и. бат̇авийгасин̣з батамам̣ жхаанам̣ самаабаж̇ж̇ид̇ваа д̇ад̣̇зва аабогасин̣зд̇и звам̣ саб̣б̣агасин̣зсу згассзва жхаанасса самаабаж̇ж̇анам̣ аарамман̣асан̇ганд̇и. згад̇овад̣дханам̣ убхад̇овад̣дхананд̇и ид̣̇ам̣ канд̇хаад̣̇ид̣̇зсанааяам̣ лаб̣бхад̇и. абхид̇хаммабхааж̇анийяз хи взд̣̇анаагканд̇хам̣ бхааж̇знд̇о бхаг̇аваа д̇игз г̇ахзд̇ваа д̣̇угзсу багкиби, д̣̇угз г̇ахзд̇ваа д̇игзсу багкиби, ид̣̇ам̣ згад̇овад̣дханам̣. д̇игз жа д̣̇угз жа убхад̇овад̣дхананийхаарзна гат̇зси, ид̣̇ам̣ убхад̇овад̣дханам̣. звам̣ сзсаканд̇хзсу д̇хаад̇ааяад̇анаад̣̇ийсу жа яат̇аарахам̣ вибхан̇г̇аббагаран̣з (вибха. 32-33; 155-156, 183-184) абхид̇хаммабхааж̇анийяз ааг̇ад̇анаязна взд̣̇ид̇аб̣б̣ам̣. д̇знааха ‘‘аабхид̇хаммигад̇хаммагат̇игассзва баагада’’нд̇и. канд̇хаад̣̇ийсу сабхаавад̇хаммзсу д̇ийсу лагкан̣зсу бан̃н̃ад̇д̇ияам̣ самаяанд̇арзсу жа госаллаабхаавад̇о аяам̣ сагаваад̣̇о аяам̣ бараваад̣̇од̇и на ж̇аанаад̇и. д̇ад̇о зва сагаваад̣̇ам̣…бз… д̇хамманд̇арам̣ висам̣ваад̣̇зд̇и. канд̇хаад̣̇ийсу бана гусалад̇ааяа аабхид̇хаммиго сагаваад̣̇ам̣…бз… на висам̣ваад̣̇зд̇и.
343. Āyasmā mahāmoggallāno evaṃ byākāsīti sambandho. Sakalampi cakkhuviññāṇavīthigataṃ cittaṃ cakkhuviññāṇanti aggahetvā cakkhusannissitameva pana viññāṇaṃ cakkhuviññāṇaṃ, tadanantaraṃ sampaṭicchanaṃ, tadanantaraṃ santīraṇantiādinā saṇhaṃ sukhumaṃ atiittarakhaṇavantaṃ cittantaraṃ cittanānattaṃ. Khandhādīnañca nānattasaṅkhātaṃ khandhantarādi. Pathavīkasiṇe paṭhamajjhānaṃ samāpajjitvā tatheva tatiyaṃ jhānantiādinā ārammaṇaṃ anukkamitvā jhānasseva ekantarikabhāvena ukkamanaṃ jhānokkantikaṃ nāma. Pathavīkasiṇe paṭhamaṃ jhānaṃ samāpajjitvā puna tadeva tejokasiṇetiādinā jhānaṃ anukkamitvā ārammaṇasseva ekantarikabhāvena ukkamanaṃ ārammaṇokkantikaṃ nāma. ‘‘Paṭhamajjhānaṃ pañcaṅgika’’ntiādinā yāva nevasaññānāsaññāyatanaṃ duvaṅgikanti jhānaṅgamattasseva vavatthāpanaṃ aṅgavavatthānaṃ. ‘‘Idaṃ pathavīkasiṇaṃ…pe… idaṃ odātakasiṇa’’nti ārammaṇamattasseva vavatthāpanaṃ ārammaṇavavatthānaṃ. Pathavīkasiṇe paṭhamaṃ jhānaṃ samāpajjitvā tattheva itaresampi samāpajjanaṃ aṅgasaṅkanti. Pathavīkasiṇe paṭhamaṃ jhānaṃ samāpajjitvā tadeva āpokasiṇeti evaṃ sabbakasiṇesu ekasseva jhānassa samāpajjanaṃ ārammaṇasaṅkanti. Ekatovaḍḍhanaṃ ubhatovaḍḍhananti idaṃ khandhādidesanāyaṃ labbhati. Abhidhammabhājanīye hi vedanākkhandhaṃ bhājento bhagavā tike gahetvā dukesu pakkhipi, duke gahetvā tikesu pakkhipi, idaṃ ekatovaḍḍhanaṃ. Tike ca duke ca ubhatovaḍḍhananīhārena kathesi, idaṃ ubhatovaḍḍhanaṃ. Evaṃ sesakhandhesu dhātāyatanādīsu ca yathārahaṃ vibhaṅgappakaraṇe (vibha. 32-33; 155-156, 183-184) abhidhammabhājanīye āgatanayena veditabbaṃ. Tenāha ‘‘ābhidhammikadhammakathikasseva pākaṭa’’nti. Khandhādīsu sabhāvadhammesu tīsu lakkhaṇesu paññattiyaṃ samayantaresu ca kosallābhāvato ayaṃ sakavādo ayaṃ paravādoti na jānāti. Tato eva sakavādaṃ…pe… dhammantaraṃ visaṃvādeti. Khandhādīsu pana kusalatāya ābhidhammiko sakavādaṃ…pe… na visaṃvādeti.
344. жид̇д̇ам̣ ад̇д̇ано васз вад̇д̇зд̇ум̣ саггод̇и бадисан̇каанабхааванааб̣алзхи бариг̇г̇ан̣ханасамад̇т̇ад̇д̇аа. ид̣̇аани д̇амад̇т̇ам̣ б̣яад̇ирзгад̇о анваяад̇о жа вибхаавзд̇ум̣ ‘‘д̣̇уббан̃н̃о хий’’д̇иаад̣̇имааха. д̇ад̇т̇а саб̣б̣аанассаад̇и саб̣б̣аани асса. висзвид̇авибпанд̣̇ид̇аанийд̇и гилзсависуугааяигаани жзва д̣̇ужжарид̇авибпанд̣̇ид̇аани жа. бхан̃ж̇ид̇ваад̇и мад̣̇д̣̇ид̇ваа. б̣ахийд̇и гаммадтаанад̇о б̣ахи бут̇уд̇д̇аарамман̣з.
344.Cittaṃattano vase vattetuṃ sakkoti paṭisaṅkhānabhāvanābalehi pariggaṇhanasamatthattā. Idāni tamatthaṃ byatirekato anvayato ca vibhāvetuṃ ‘‘duppañño hī’’tiādimāha. Tattha sabbānassāti sabbāni assa. Visevitavipphanditānīti kilesavisūkāyikāni ceva duccaritavipphanditāni ca. Bhañjitvāti madditvā. Bahīti kammaṭṭhānato bahi puthuttārammaṇe.
345. барияааязнаад̇и зд̇т̇а барияааяа-сад̣̇д̣̇о ‘‘ад̇т̇и квзса, б̣раахман̣а, барияааяо’’д̇иаад̣̇ийсу (а. ни. 8.11; баараа. 3-9) вияа гааран̣ад̇т̇од̇и ааха ‘‘собханагааран̣ам̣ ад̇т̇ий’’д̇и. яад̣̇и бхаг̇аваа – ‘‘ид̇ха, саарибуд̇д̇а, бхигку бажчаабхад̇д̇ам̣ бин̣д̣абаад̇абадигганд̇о’’д̇иаад̣̇инаа ад̇д̇ано махааб̣од̇хибаллан̇гам̣ санд̇хааяааха, звам̣ санд̇з саммаасамб̣уд̣̇д̇хзхзва сан̇гхаараамо собхзд̇аб̣б̣о, на ан̃н̃зхийд̇и аабаннанд̇и ааха ‘‘абижа бажчимам̣ ж̇анад̇а’’нд̇иаад̣̇и. ниб̣б̣аанад̇т̇ааяа бадибад̇д̇исаарам̣ зд̇ассаад̇и бадибад̇д̇исааро, д̇ам̣ бадибад̇д̇исаарам̣. ниббарияааязнзваад̇и гзнажи барияааязна лзсзна винаа мукязна наязнзва. яо ‘‘арахад̇д̇ам̣ аббад̇ваа на вудтахиссаамий’’д̇и д̣̇ал̣хасамаад̣̇аанам̣ гад̇ваа нисинно д̇ам̣ ад̇хиг̇анд̇ваава удтахад̇и. зваруубзна ид̣̇ам̣ г̇осин̇г̇асаалаванам̣ собхад̇и, саасанз саб̣б̣аарамбхаанам̣ д̇ад̣̇ад̇т̇ад̇д̇аад̇и ад̇т̇о. аасавагкаяаавахам̣ бадибад̇д̇им̣ аарабхид̇ваа аасавагкаязнзва д̣̇зсанааяа барияосаабид̇ад̇д̇аа яат̇аанусанд̇хинаава д̣̇зсанам̣ нидтабзсийд̇и.
345.Pariyāyenāti ettha pariyāya-saddo ‘‘atthi khvesa, brāhmaṇa, pariyāyo’’tiādīsu (a. ni. 8.11; pārā. 3-9) viya kāraṇatthoti āha ‘‘sobhanakāraṇaṃ atthī’’ti. Yadi bhagavā – ‘‘idha, sāriputta, bhikkhu pacchābhattaṃ piṇḍapātapaṭikkanto’’tiādinā attano mahābodhipallaṅkaṃ sandhāyāha, evaṃ sante sammāsambuddheheva saṅghārāmo sobhetabbo, na aññehīti āpannanti āha ‘‘apica pacchimaṃ janata’’ntiādi. Nibbānatthāya paṭipattisāraṃ etassāti paṭipattisāro, taṃ paṭipattisāraṃ. Nippariyāyenevāti kenaci pariyāyena lesena vinā mukhyena nayeneva. Yo ‘‘arahattaṃ appatvā na vuṭṭhahissāmī’’ti daḷhasamādānaṃ katvā nisinno taṃ adhigantvāva uṭṭhahati. Evarūpena idaṃ gosiṅgasālavanaṃ sobhati, sāsane sabbārambhānaṃ tadatthattāti attho. Āsavakkhayāvahaṃ paṭipattiṃ ārabhitvā āsavakkhayeneva desanāya pariyosāpitattā yathānusandhināva desanaṃ niṭṭhapesīti.
махааг̇осин̇г̇асуд̇д̇аван̣н̣анааяа лийнад̇т̇аббагаасанаа самад̇д̇аа.
Mahāgosiṅgasuttavaṇṇanāya līnatthappakāsanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 2. махааг̇осин̇г̇асуд̇д̇ам̣ • 2. Mahāgosiṅgasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / маж̇жхиманигааяа (адтагат̇аа) • Majjhimanikāya (aṭṭhakathā) / 2. махааг̇осин̇г̇асуд̇д̇аван̣н̣анаа • 2. Mahāgosiṅgasuttavaṇṇanā
