Library / Tipiṭaka / ཏིཔིཊཀ • Tipiṭaka / ཛཱཏཀ-ཨཊྛཀཐཱ • Jātaka-aṭṭhakathā

    [༥༣༤] ༢. མཧཱཧཾསཛཱཏཀཝཎྞནཱ

    [534] 2. Mahāhaṃsajātakavaṇṇanā

    ཨེཏེ ཧཾསཱ པཀྐམནྟཱིཏི ཨིདཾ སཏྠཱ ཝེལུ༹ཝནེ ཝིཧརནྟོ ཨཱནནྡཐེརསྶ ཛཱིཝིཏཔརིཙྩཱགམེཝ ཨཱརབྦྷ ཀཐེསི། ཝཏྠུ ཧེཊྛཱ ཝུཏྟསདིསམེཝ, ཨིདྷ པན སཏྠཱ ཨཏཱིཏཾ ཨཱཧརནྟོ ཨིདམཱཧརི།

    Ete haṃsā pakkamantīti idaṃ satthā veḷuvane viharanto ānandatherassa jīvitapariccāgameva ārabbha kathesi. Vatthu heṭṭhā vuttasadisameva, idha pana satthā atītaṃ āharanto idamāhari.

    ཨཏཱིཏེ བཱརཱཎསིཡཾ སཾཡམསྶ ནཱམ བཱརཱཎསིརཉྙོ ཁེམཱ ནཱམ ཨགྒམཧེསཱི ཨཧོསི། ཏདཱ བོདྷིསཏྟོ ནཝུཏིཧཾསསཧསྶཔརིཝུཏོ ཙིཏྟཀཱུཊེ ཝིཧཱསི། ཨཐེཀདིཝསཾ ཁེམཱ དེཝཱི པཙྩཱུསསམཡེ སུཔིནཾ ཨདྡས། སུཝཎྞཝཎྞཱ ཧཾསཱ ཨཱགནྟྭཱ རཱཛཔལླངྐེ ནིསཱིདིཏྭཱ མདྷུརསྶརེན དྷམྨཀཐཾ ཀཐེསུཾ། དེཝིཡཱ སཱདྷུཀཱརཾ དཏྭཱ དྷམྨཾ སུཎནྟིཡཱ དྷམྨསྶཝནེན ཨཏིཏྟཱཡ ཨེཝ རཏྟི ཝིབྷཱཡི། ཧཾསཱ དྷམྨཾ ཀཐེཏྭཱ སཱིཧཔཉྫརེན ནིཀྑམིཏྭཱ ཨགམཾསུ། སཱ ཝེགེནུཊྛཱཡ ‘‘པལཱཡམཱནེ ཧཾསེ གཎྷཐ གཎྷཐཱ’’ཏི ཝཏྭཱ ཧཏྠཾ པསཱརེནྟཱིཡེཝ པབུཛ྄ཛྷི། ཏསྶཱ ཀཐཾ སུཏྭཱ པརིཙཱརིཀཱཡོ ‘‘ཀུཧིཾ ཧཾསཱ’’ཏི ཐོཀཾ ཨཝཧསིཾསུ། སཱ ཏསྨིཾ ཁཎེ སུཔིནབྷཱཝཾ ཉཏྭཱ ཙིནྟེསི – ‘‘ཨཧཾ ཨབྷཱུཏཾ ན པསྶཱམི, ཨདྡྷཱ ཨིམསྨིཾ ལོཀེ སུཝཎྞཝཎྞཱ ཧཾསཱ བྷཝིསྶནྟི, སཙེ ཁོ པན ‘སུཝཎྞཧཾསཱནཾ དྷམྨཾ སོཏུཀཱམཱམྷཱི’ཏི རཱཛཱནཾ ཝཀྑཱམི, ‘ཨམྷེཧི སུཝཎྞཧཾསཱ ནཱམ ན དིཊྛཔུབྦཱ, ཧཾསཱནཉྩ ཀཐཱ ནཱམ ཨབྷཱུཏཱཡེཝཱ’ཏི ཝཏྭཱ ནིརུསྶུཀྐོ བྷཝིསྶཏི, ‘དོཧལོ༹’ཏི ཝུཏྟེ པན ཡེན ཀེནཙི ཨུཔཱཡེན པརིཡེསིསྶཏི, ཨེཝཾ མེ མནོརཐོ སམིཛ྄ཛྷིསྶཏཱི’’ཏི། སཱ གིལཱནཱལཡཾ དསྶེཏྭཱ པརིཙཱརིཀཱནཾ སཉྙཾ དཏྭཱ ནིཔཛྫི།

    Atīte bārāṇasiyaṃ saṃyamassa nāma bārāṇasirañño khemā nāma aggamahesī ahosi. Tadā bodhisatto navutihaṃsasahassaparivuto cittakūṭe vihāsi. Athekadivasaṃ khemā devī paccūsasamaye supinaṃ addasa. Suvaṇṇavaṇṇā haṃsā āgantvā rājapallaṅke nisīditvā madhurassarena dhammakathaṃ kathesuṃ. Deviyā sādhukāraṃ datvā dhammaṃ suṇantiyā dhammassavanena atittāya eva ratti vibhāyi. Haṃsā dhammaṃ kathetvā sīhapañjarena nikkhamitvā agamaṃsu. Sā vegenuṭṭhāya ‘‘palāyamāne haṃse gaṇhatha gaṇhathā’’ti vatvā hatthaṃ pasārentīyeva pabujjhi. Tassā kathaṃ sutvā paricārikāyo ‘‘kuhiṃ haṃsā’’ti thokaṃ avahasiṃsu. Sā tasmiṃ khaṇe supinabhāvaṃ ñatvā cintesi – ‘‘ahaṃ abhūtaṃ na passāmi, addhā imasmiṃ loke suvaṇṇavaṇṇā haṃsā bhavissanti, sace kho pana ‘suvaṇṇahaṃsānaṃ dhammaṃ sotukāmāmhī’ti rājānaṃ vakkhāmi, ‘amhehi suvaṇṇahaṃsā nāma na diṭṭhapubbā, haṃsānañca kathā nāma abhūtāyevā’ti vatvā nirussukko bhavissati, ‘dohaḷo’ti vutte pana yena kenaci upāyena pariyesissati, evaṃ me manoratho samijjhissatī’’ti. Sā gilānālayaṃ dassetvā paricārikānaṃ saññaṃ datvā nipajji.

    རཱཛཱ རཱཛཱསནེ ནིསིནྣོ ཏསྶཱ དསྶནཝེལཱཡ ཏཾ ཨདིསྭཱ ‘‘ཀཧཾ, ཁེམཱ དེཝཱི’’ཏི པུཙྪིཏྭཱ ‘‘གིལཱནཱ’’ཏི སུཏྭཱ ཏསྶཱ སནྟིཀཾ གནྟྭཱ སཡནེཀདེསེ ནིསཱིདིཏྭཱ པིཊྛིཾ པརིམཛྫནྟོ ‘‘ཀིཾ ཏེ ཨཕཱསུཀ’’ནྟི པུཙྪི། ‘‘དེཝ ཨཉྙཾ ཨཕཱསུཀཾ ནཏྠི, དོཧལོ༹ པན མེ ཨུཔྤནྣོ’’ཏི། ཏེན ཧི ‘‘བྷཎ, དེཝི, ཡཾ ཨིཙྪསི, ཏཾ སཱིགྷཾ ཏེ ཨུཔནཱམེསྶཱམཱི’’ཏི། ‘‘མཧཱརཱཛ, ཨཧམེཀསྶ སུཝཎྞཧཾསསྶ སམུསྶིཏསེཏཙྪཏྟེ རཱཛཔལླངྐེ ནིསིནྣསྶ གནྡྷམཱལཱདཱིཧི པཱུཛཾ ཀཏྭཱ སཱདྷུཀཱརཾ དདམཱནཱ དྷམྨཀཐཾ སོཏུམིཙྪཱམི, སཙེ ལབྷཱམི, ཨིཙྩེཏཾ ཀུསལཾ, ནོ ཙེ, ཛཱིཝིཏཾ མེ ནཏྠཱི’’ཏི། ཨཐ ནཾ རཱཛཱ ‘‘སཙེ མནུསྶལོཀེ ཨཏྠི, ལབྷིསྶསི , མཱ ཙིནྟཡཱི’’ཏི ཨསྶཱསེཏྭཱ སིརིགབྦྷཏོ ནིཀྑམྨ ཨམཙྩེཧི སདྡྷིཾ མནྟེསི – ‘‘ཨམྦྷོ, ཁེམཱ དེཝཱི, ‘སུཝཎྞཧཾསསྶ དྷམྨཀཐཾ སོཏུཾ ལབྷནྟཱི ཛཱིཝིསྶཱམི, ཨལབྷནྟིཡཱ མེ ཛཱིཝིཏཾ ནཏྠཱི’ཏི ཝདཏི, ཨཏྠི ནུ ཁོ སུཝཎྞཝཎྞཱ ཧཾསཱ’’ཏི། ‘‘དེཝ ཨམྷེཧི ནེཝ དིཊྛཔུབྦཱ ན སུཏཔུབྦཱ’’ཏི། ‘‘ཀེ པན ཛཱནེཡྻུ’’ནྟི? ‘‘བྲཱཧྨཎཱ, དེཝཱ’’ཏི། རཱཛཱ བྲཱཧྨཎེ པཀྐོསཱཔེཏྭཱ སཀྐཱརཾ ཀཏྭཱ པུཙྪི – ‘‘ཧོནྟི ནུ ཁོ ཨཱཙརིཡཱ སུཝཎྞཝཎྞཱ ཧཾསཱ’’ཏི? ‘‘ཨཱམ, མཧཱརཱཛ ཨམྷཱཀཾ མནྟེསུམཙྪཱ, ཀཀྐཊཀཱ, ཀཙྪཔཱ, མིགཱ, མོརཱ, ཧཾསཱཏི ཚ ཨེཏེ ཏིརཙྪཱནགཏཱ སུཝཎྞཝཎྞཱ ཧོནྟཱིཏི ཨཱགཏཱ, ཏཏྠ དྷཏརཊྛཀུལཧཾསཱ ནཱམ པཎྜིཏཱ ཉཱཎསམྤནྣཱ, ཨིཏི མནུསྶེཧི སདྡྷིཾ སཏྟ སུཝཎྞཝཎྞཱ ཧོནྟཱི’’ཏི།

    Rājā rājāsane nisinno tassā dassanavelāya taṃ adisvā ‘‘kahaṃ, khemā devī’’ti pucchitvā ‘‘gilānā’’ti sutvā tassā santikaṃ gantvā sayanekadese nisīditvā piṭṭhiṃ parimajjanto ‘‘kiṃ te aphāsuka’’nti pucchi. ‘‘Deva aññaṃ aphāsukaṃ natthi, dohaḷo pana me uppanno’’ti. Tena hi ‘‘bhaṇa, devi, yaṃ icchasi, taṃ sīghaṃ te upanāmessāmī’’ti. ‘‘Mahārāja, ahamekassa suvaṇṇahaṃsassa samussitasetacchatte rājapallaṅke nisinnassa gandhamālādīhi pūjaṃ katvā sādhukāraṃ dadamānā dhammakathaṃ sotumicchāmi, sace labhāmi, iccetaṃ kusalaṃ, no ce, jīvitaṃ me natthī’’ti. Atha naṃ rājā ‘‘sace manussaloke atthi, labhissasi , mā cintayī’’ti assāsetvā sirigabbhato nikkhamma amaccehi saddhiṃ mantesi – ‘‘ambho, khemā devī, ‘suvaṇṇahaṃsassa dhammakathaṃ sotuṃ labhantī jīvissāmi, alabhantiyā me jīvitaṃ natthī’ti vadati, atthi nu kho suvaṇṇavaṇṇā haṃsā’’ti. ‘‘Deva amhehi neva diṭṭhapubbā na sutapubbā’’ti. ‘‘Ke pana jāneyyu’’nti? ‘‘Brāhmaṇā, devā’’ti. Rājā brāhmaṇe pakkosāpetvā sakkāraṃ katvā pucchi – ‘‘honti nu kho ācariyā suvaṇṇavaṇṇā haṃsā’’ti? ‘‘Āma, mahārāja amhākaṃ mantesumacchā, kakkaṭakā, kacchapā, migā, morā, haṃsāti cha ete tiracchānagatā suvaṇṇavaṇṇā hontīti āgatā, tattha dhataraṭṭhakulahaṃsā nāma paṇḍitā ñāṇasampannā, iti manussehi saddhiṃ satta suvaṇṇavaṇṇā hontī’’ti.

    ཏཾ སུཏྭཱ རཱཛཱ ཨཏྟམནོ ཧུཏྭཱ ‘‘ཀཧཾ ནུ ཁོ ཨཱཙརིཡཱ དྷཏརཊྛཧཾསཱ ཝསནྟཱི’’ཏི པུཙྪིཏྭཱ ‘‘ན ཛཱནཱམ, མཧཱརཱཛཱ’’ཏི ཝུཏྟེ ‘‘ཨཐ ཀེ པན ཛཱནིསྶནྟཱི’’ཏི ཝཏྭཱ ‘‘ལུདྡཔུཏྟཱ’’ཏི ཝུཏྟེ སབྦེ ཨཏྟནོ ཝིཛིཏེ ལུདྡཀེ སནྣིཔཱཏཱཔེཏྭཱ པུཙྪི – ‘‘ཏཱཏཱ, སུཝཎྞཝཎྞཱ དྷཏརཊྛཀུལཧཾསཱ ནཱམ ཀཧཾ ཝསནྟཱི’’ཏི? ཨཐེཀོ ལུདྡོ ‘‘ཧིམཝནྟེ ཀིར, དེཝ, ཙིཏྟཀཱུཊཔབྦཏེཏི ནོ ཀུལཔརམྤརཱཡ ཀཐེནྟཱི’’ཏི ཨཱཧ། ‘‘ཛཱནཱསི པན ནེསཾ གཧཎཱུཔཱཡ’’ནྟི? ‘‘ན ཛཱནཱམི, དེཝཱ’’ཏི། ‘‘ཀེ པན ཛཱནིསྶནྟཱི’’ཏི? བྲཱཧྨཎཱཏི། སོ བྲཱཧྨཎཔཎྜིཏེ པཀྐོསཱཔེཏྭཱ ཙིཏྟཀཱུཊཔབྦཏེ སུཝཎྞཝཎྞཱནཾ ཧཾསཱནཾ ཨཏྠིབྷཱཝཾ ཨཱརོཙེཏྭཱ ‘‘ཛཱནཱཐ ནུ ཁོ ཏེསཾ གཧཎཱུཔཱཡ’’ནྟི པུཙྪི། ‘‘མཧཱརཱཛ, ཀིཾ ཏེཧི གནྟྭཱ གཧིཏེཧི, ཨུཔཱཡེན ཏེ ནགརསམཱིཔཾ ཨཱནེཏྭཱ གཧེསྶཱམཱ’’ཏི། ‘‘ཀོ པན ཨུཔཱཡོ’’ཏི? ‘‘མཧཱརཱཛ, ནགརཏོ ཨཝིདཱུརེ ཨུཏྟརེན ཏིགཱཝུཏམཏྟེ ཏིགཱཝུཏཔྤམཱཎཾ ཁེམཾ ནཱམ སརཾ ཀཱརཱཔེཏྭཱ ཨུདཀསྶ པཱུརེཏྭཱ ནཱནཱདྷཉྙཱནི རོཔེཏྭཱ པཉྩཝཎྞཔདུམསཉྪནྣཾ ཀཱརཱཔེཏྭཱ ཨེཀཾ པཎྜིཏཾ ནེསཱདཾ པཊིཙྪཱཔེཏྭཱ མནུསྶཱནཾ ཨུཔགནྟུཾ ཨདཏྭཱ ཙཏཱུསུ ཀཎྞེསུ ཋིཏེཧི ཨབྷཡཾ གྷོསཱཔེཐ, ཏཾ སུཏྭཱ ནཱནཱསཀུཎཱ དས དིསཱ ཨོཏརིསྶནྟི, ཏེཔི ཧཾསཱ པརམྤརཱཡ ཏསྶ སརསྶ ཁེམབྷཱཝཾ སུཏྭཱ ཨཱགཙྪིསྶནྟི, ཨཐ ནེ ཝཱལཔཱསེཧི བནྡྷཱཔེཏྭཱ གཎྷཱཔེཡྻཱཐཱ’’ཏི།

    Taṃ sutvā rājā attamano hutvā ‘‘kahaṃ nu kho ācariyā dhataraṭṭhahaṃsā vasantī’’ti pucchitvā ‘‘na jānāma, mahārājā’’ti vutte ‘‘atha ke pana jānissantī’’ti vatvā ‘‘luddaputtā’’ti vutte sabbe attano vijite luddake sannipātāpetvā pucchi – ‘‘tātā, suvaṇṇavaṇṇā dhataraṭṭhakulahaṃsā nāma kahaṃ vasantī’’ti? Atheko luddo ‘‘himavante kira, deva, cittakūṭapabbateti no kulaparamparāya kathentī’’ti āha. ‘‘Jānāsi pana nesaṃ gahaṇūpāya’’nti? ‘‘Na jānāmi, devā’’ti. ‘‘Ke pana jānissantī’’ti? Brāhmaṇāti. So brāhmaṇapaṇḍite pakkosāpetvā cittakūṭapabbate suvaṇṇavaṇṇānaṃ haṃsānaṃ atthibhāvaṃ ārocetvā ‘‘jānātha nu kho tesaṃ gahaṇūpāya’’nti pucchi. ‘‘Mahārāja, kiṃ tehi gantvā gahitehi, upāyena te nagarasamīpaṃ ānetvā gahessāmā’’ti. ‘‘Ko pana upāyo’’ti? ‘‘Mahārāja, nagarato avidūre uttarena tigāvutamatte tigāvutappamāṇaṃ khemaṃ nāma saraṃ kārāpetvā udakassa pūretvā nānādhaññāni ropetvā pañcavaṇṇapadumasañchannaṃ kārāpetvā ekaṃ paṇḍitaṃ nesādaṃ paṭicchāpetvā manussānaṃ upagantuṃ adatvā catūsu kaṇṇesu ṭhitehi abhayaṃ ghosāpetha, taṃ sutvā nānāsakuṇā dasa disā otarissanti, tepi haṃsā paramparāya tassa sarassa khemabhāvaṃ sutvā āgacchissanti, atha ne vālapāsehi bandhāpetvā gaṇhāpeyyāthā’’ti.

    ཏཾ སུཏྭཱ རཱཛཱ ཏེཧི ཝུཏྟཔདེསེ ཝུཏྟཔྤཀཱརཾ སརཾ ཀཱརཱཔེཏྭཱ ཚེཀཾ ནེསཱདཾ པཀྐོསཱཔེཏྭཱ ཏསྶ སཧསྶཾ དཱཔེཏྭཱ ‘‘ཏྭཾ ཨིཏོ པཊྛཱཡ ཨཏྟནོ ཀམྨཾ མཱ ཀརི, པུཏྟདཱརཾ ཏེ ཨཧཾ པོསེསྶཱམི, ཏྭཾ ཨཔྤམཏྟོ ཁེམཾ སརཾ རཀྑནྟོ མནུསྶེ པཊིཀྐམཱཔེཏྭཱ ཙཏཱུསུ ཀཎྞེསུ ཨབྷཡཾ གྷོསཱཔེཏྭཱ ཨཱགཏཱགཏེ སཀུཎེ མམ ཨཱཙིཀྑེཡྻཱསི, སུཝཎྞཧཾསེསུ ཨཱགཏེསུ མཧནྟཾ སཀྐཱརཾ ལབྷིསྶསཱི’’ཏི ཏམསྶཱསེཏྭཱ ཁེམཾ སརཾ པཊིཙྪཱཔེསི། སོ ཏཏོ པཊྛཱཡ རཉྙཱ ཝུཏྟནཡེནེཝ ཏཏྠ པཊིཔཛྫི, ‘‘ཁེམཾ སརཾ རཀྑཏཱི’’ཏི ཙསྶ ‘‘ཁེམནེསཱདོ’’ཏྭེཝ ནཱམཾ ཨུདཔཱདི ། ཏཏོ པཊྛཱཡ ཙ ནཱནཔྤཀཱརཱ སཀུཎཱ ཨོཏརིཾསུ, ‘‘ཁེམཾ ནིབྦྷཡཾ སར’’ནྟི པརམྤརཱགྷོསེན ནཱནཱཧཾསཱ ཨཱགམིཾསུ། པཋམཾ ཏཱཝ ཏིཎཧཾསཱ ཨཱགམིཾསུ, ཏེསཾ གྷོསེན པཎྜུཧཾསཱ, ཏེསཾ གྷོསེན མནོསིལཱཝཎྞཱ ཧཾསཱ, ཏེསཾ གྷོསེན སེཏཧཾསཱ, ཏེསཾ གྷོསེན པཱཀཧཾསཱ ཨཱགམིཾསུ། ཏེསུ ཨཱགཏེསུ ཁེམཀོ རཉྙོ ཨཱརོཙེསི – ‘‘དེཝ, པཉྩཝཎྞཱ ཧཾསཱ ཨཱགནྟྭཱ སརེ གོཙརཾ གཎྷནྟི, པཱཀཧཾསཱནཾ ཨཱགཏཏྟཱ ཨིདཱནི ཀཏིཔཱཧེནེཝ སུཝཎྞཧཾསཱ ཨཱགམིསྶནྟི, མཱ ཙིནྟཡིཏྠ, དེཝཱ’’ཏི།

    Taṃ sutvā rājā tehi vuttapadese vuttappakāraṃ saraṃ kārāpetvā chekaṃ nesādaṃ pakkosāpetvā tassa sahassaṃ dāpetvā ‘‘tvaṃ ito paṭṭhāya attano kammaṃ mā kari, puttadāraṃ te ahaṃ posessāmi, tvaṃ appamatto khemaṃ saraṃ rakkhanto manusse paṭikkamāpetvā catūsu kaṇṇesu abhayaṃ ghosāpetvā āgatāgate sakuṇe mama ācikkheyyāsi, suvaṇṇahaṃsesu āgatesu mahantaṃ sakkāraṃ labhissasī’’ti tamassāsetvā khemaṃ saraṃ paṭicchāpesi. So tato paṭṭhāya raññā vuttanayeneva tattha paṭipajji, ‘‘khemaṃ saraṃ rakkhatī’’ti cassa ‘‘khemanesādo’’tveva nāmaṃ udapādi . Tato paṭṭhāya ca nānappakārā sakuṇā otariṃsu, ‘‘khemaṃ nibbhayaṃ sara’’nti paramparāghosena nānāhaṃsā āgamiṃsu. Paṭhamaṃ tāva tiṇahaṃsā āgamiṃsu, tesaṃ ghosena paṇḍuhaṃsā, tesaṃ ghosena manosilāvaṇṇā haṃsā, tesaṃ ghosena setahaṃsā, tesaṃ ghosena pākahaṃsā āgamiṃsu. Tesu āgatesu khemako rañño ārocesi – ‘‘deva, pañcavaṇṇā haṃsā āgantvā sare gocaraṃ gaṇhanti, pākahaṃsānaṃ āgatattā idāni katipāheneva suvaṇṇahaṃsā āgamissanti, mā cintayittha, devā’’ti.

    ཏཾ སུཏྭཱ རཱཛཱ ‘‘ཨཉྙེན ཏཏྠ ན གནྟབྦཾ, ཡོ གཙྪིསྶཏི, ཧཏྠཔཱདཚེདནཉྩ གྷརཝིལོཔཉྩ པཱཔུཎིསྶཏཱི’’ཏི ནགར བྷེརིཾ ཙརཱཔེསི། ཏཏོ པཊྛཱཡ ཏཏྠ ཀོཙི ན གཙྪཏི། ཙིཏྟཀཱུཊསྶ པནཱཝིདཱུརེ ཀཉྩནགུཧཱཡཾཔཱཀཧཾསཱ ཝསནྟི, ཏེཔི མཧབྦལཱ། དྷཏརཊྛཀུལེན སདྡྷིཾ ཏེསཾ སརཱིརཝཎྞོཝ ཝིསེསོ། པཱཀཧཾསརཉྙོ པན དྷཱིཏཱ སུཝཎྞཝཎྞཱ ཨཧོསི། སོ ཏཾ དྷཏརཊྛམཧིསྶརསྶ ཨནུརཱུཔཱཏི ཏསྶ པཱདཔརིཙཱརིཀཾ ཀཏྭཱ པེསེསི། སཱ ཏསྶ པིཡཱ ཨཧོསི མནཱཔཱ, ཏེནེཝ ཙ ཀཱརཎེན ཏཱནི དྭེ ཧཾསཀུལཱནི ཨཉྙམཉྙཾ ཝིསྶཱསིཀཱནི ཛཱཏཱནི།

    Taṃ sutvā rājā ‘‘aññena tattha na gantabbaṃ, yo gacchissati, hatthapādachedanañca gharavilopañca pāpuṇissatī’’ti nagara bheriṃ carāpesi. Tato paṭṭhāya tattha koci na gacchati. Cittakūṭassa panāvidūre kañcanaguhāyaṃpākahaṃsā vasanti, tepi mahabbalā. Dhataraṭṭhakulena saddhiṃ tesaṃ sarīravaṇṇova viseso. Pākahaṃsarañño pana dhītā suvaṇṇavaṇṇā ahosi. So taṃ dhataraṭṭhamahissarassa anurūpāti tassa pādaparicārikaṃ katvā pesesi. Sā tassa piyā ahosi manāpā, teneva ca kāraṇena tāni dve haṃsakulāni aññamaññaṃ vissāsikāni jātāni.

    ཨཐེཀདིཝསཾ བོདྷིསཏྟསྶ པརིཝཱརཧཾསཱ པཱཀཧཾསེ པུཙྪིཾསུ – ‘‘ཏུམྷེ ཨིམེསུ དིཝསེསུ ཀཧཾ གོཙརཾ གཎྷཐཱ’’ཏི? ‘‘མཡཾ བཱརཱཎསིཏོ ཨཝིདཱུརེ ཁེམསརེ གོཙརཾ གཎྷཱམ, ཏུམྷེ པན ཀུཧིཾ ཨཱཧིཎྜཐཱ’’ཏི། ‘‘ཨསུཀཾ ནཱམཱ’’ཏི ཝུཏྟེ ‘‘ཀསྨཱ ཁེམསརཾ ན གཙྪཐ, སོ ཧི སརོ རམཎཱིཡོ ནཱནཱསཀུཎསམཱཀིཎྞོ པཉྩཝཎྞཔདུམསཉྪནྣོ ནཱནཱདྷཉྙཕལསམྤནྣོ ནཱནཔྤཀཱརབྷམརགཎནིཀཱུཛིཏོ ཙཏཱུསུ ཀཎྞེསུ ནིཙྩཾ པཝཏྟཨབྷཡགྷོསནོ, ཀོཙི ནཾ ཨུཔསངྐམིཏུཾ སམཏྠོ ནཱམ ནཏྠི, པགེཝ ཨཉྙཾ ཨུཔདྡཝཾ ཀཱཏུཾ, ཨེཝརཱུཔོ སོ སརོ’’ཏི ཁེམསརཾ ཝཎྞཡིཾསུ། ཏེ ཏེསཾ ཝཙནཾ སུཏྭཱ ‘‘བཱརཱཎསིཡཱ སམཱིཔེ ཀིར ཨེཝརཱུཔོ ཁེམོ ནཱམ སརོ ཨཏྠི, པཱཀཧཾསཱ ཏཏྠ གནྟྭཱ གོཙརཾ གཎྷནྟི, ཏུམྷེཔི དྷཏརཊྛམཧིསྶརསྶ ཨཱརོཙེཐ, སཙེ ཨནུཛཱནཱཏི, མཡམྤི ཏཏྠ གནྟྭཱ གོཙརཾ གཎྷེཡྻཱམཱ’’ཏི སུམུཁསྶ ཀཐེསུཾ། སུམུཁོ རཉྙོ ཨཱརོཙེསི། སོ ཙིནྟེསི – ‘‘མནུསྶཱ ནཱམ བཧུམཱཡཱ ཁརམནྟཱ ཨུཔཱཡཀུསལཱ, བྷཝིཏབྦམེཏྠ ཀཱརཎེན, ཨེཏྟཀཾ ཀཱལཾ ཨེསོ སརོ ནཏྠི, ཨིདཱནི ཨམྷཱཀཾ གཧཎཏྠཱཡ ཀཏོ བྷཝིསྶཏཱི’’ཏི། སོ སུམུཁཾ ཨཱཧ – ‘‘མཱ ཝོ ཏཏྠ གམནཾ རུཙྩཐ, ན སོ སརོ ཏེཧི སུདྷམྨཏཱཡ ཀཏོ, ཨམྷཱཀཾ གཧཎཏྠཱཡེཝ ཀཏོ, མནུསྶཱ ནཱམ བཧུམཱཡཱ ཁརམནྟཱ ཨུཔཱཡཀུསལཱ, ཏུམྷེ སཀེཡེཝ གོཙརེ ཙརཐཱ’’ཏི །

    Athekadivasaṃ bodhisattassa parivārahaṃsā pākahaṃse pucchiṃsu – ‘‘tumhe imesu divasesu kahaṃ gocaraṃ gaṇhathā’’ti? ‘‘Mayaṃ bārāṇasito avidūre khemasare gocaraṃ gaṇhāma, tumhe pana kuhiṃ āhiṇḍathā’’ti. ‘‘Asukaṃ nāmā’’ti vutte ‘‘kasmā khemasaraṃ na gacchatha, so hi saro ramaṇīyo nānāsakuṇasamākiṇṇo pañcavaṇṇapadumasañchanno nānādhaññaphalasampanno nānappakārabhamaragaṇanikūjito catūsu kaṇṇesu niccaṃ pavattaabhayaghosano, koci naṃ upasaṅkamituṃ samattho nāma natthi, pageva aññaṃ upaddavaṃ kātuṃ, evarūpo so saro’’ti khemasaraṃ vaṇṇayiṃsu. Te tesaṃ vacanaṃ sutvā ‘‘bārāṇasiyā samīpe kira evarūpo khemo nāma saro atthi, pākahaṃsā tattha gantvā gocaraṃ gaṇhanti, tumhepi dhataraṭṭhamahissarassa ārocetha, sace anujānāti, mayampi tattha gantvā gocaraṃ gaṇheyyāmā’’ti sumukhassa kathesuṃ. Sumukho rañño ārocesi. So cintesi – ‘‘manussā nāma bahumāyā kharamantā upāyakusalā, bhavitabbamettha kāraṇena, ettakaṃ kālaṃ eso saro natthi, idāni amhākaṃ gahaṇatthāya kato bhavissatī’’ti. So sumukhaṃ āha – ‘‘mā vo tattha gamanaṃ ruccatha, na so saro tehi sudhammatāya kato, amhākaṃ gahaṇatthāyeva kato, manussā nāma bahumāyā kharamantā upāyakusalā, tumhe sakeyeva gocare carathā’’ti .

    སུཝཎྞཧཾསཱ ‘‘ཁེམཾ སརཾ གནྟུཀཱམམྷཱ’’ཏི དུཏིཡམྤི ཏཏིཡམྤི སུམུཁསྶ ཨཱརོཙེསུཾ། སོ ཏེསཾ ཏཏྠ གནྟུཀཱམཏཾ མཧཱསཏྟསྶ ཨཱརོཙེསི། ཨཐ མཧཱསཏྟོ ‘‘མམ ཉཱཏཀཱ མཾ ནིསྶཱཡ མཱ ཀིལམནྟུ, ཏེན ཧི གཙྪཱམཱ’’ཏི ནཝུཏིཧཾསསཧསྶཔརིཝུཏོ ཏཏྠ གནྟྭཱ གོཙརཾ གཧེཏྭཱ ཧཾསཀཱིལ༹ཾ ཀཱིལི༹ཏྭཱ ཙིཏྟཀཱུཊམེཝ པཙྩཱགམི། ཁེམཀོ ཏེསཾ གོཙརཾ ཙརིཏྭཱ གཏཀཱལེ གནྟྭཱ ཏེསཾ ཨཱགཏབྷཱཝཾ རཉྙོ ཨཱརོཙེསི། རཱཛཱ ཏུཊྛཙིཏྟོ ཧུཏྭཱ, ‘‘སམྨ ཁེམཀ, ཨེཀཾ ཝཱ དྭེ ཝཱ ཧཾསེ གཎྷིཏུཾ ཝཱཡམ, མཧནྟཾ ཏེ ཡསཾ དསྶཱམཱི’’ཏི ཝཏྭཱ པརིབྦཡཾ དཏྭཱ ཏཾ ཨུཡྻོཛེསི། སོ ཏཏྠ གནྟྭཱ ཙཱཊིཔཉྫརེ ནིསཱིདིཏྭཱ ཧཾསཱནཾ ཙརཎཊྛཱནཾ ཝཱིམཾསི། བོདྷིསཏྟཱ ནཱམ ནིལློལུཔྤཙཱརིནོ ཧོནྟི, ཏསྨཱ མཧཱསཏྟོ ཨོཏིཎྞཊྛཱནཏོ པཊྛཱཡ སཔདཱནཾ སཱལིཾ ཁཱདནྟོ ཨགམཱསི། སེསཱ ཨིཏོ ཙིཏོ ཙ ཁཱདནྟཱ ཝིཙརིཾསུ།

    Suvaṇṇahaṃsā ‘‘khemaṃ saraṃ gantukāmamhā’’ti dutiyampi tatiyampi sumukhassa ārocesuṃ. So tesaṃ tattha gantukāmataṃ mahāsattassa ārocesi. Atha mahāsatto ‘‘mama ñātakā maṃ nissāya mā kilamantu, tena hi gacchāmā’’ti navutihaṃsasahassaparivuto tattha gantvā gocaraṃ gahetvā haṃsakīḷaṃ kīḷitvā cittakūṭameva paccāgami. Khemako tesaṃ gocaraṃ caritvā gatakāle gantvā tesaṃ āgatabhāvaṃ rañño ārocesi. Rājā tuṭṭhacitto hutvā, ‘‘samma khemaka, ekaṃ vā dve vā haṃse gaṇhituṃ vāyama, mahantaṃ te yasaṃ dassāmī’’ti vatvā paribbayaṃ datvā taṃ uyyojesi. So tattha gantvā cāṭipañjare nisīditvā haṃsānaṃ caraṇaṭṭhānaṃ vīmaṃsi. Bodhisattā nāma nilloluppacārino honti, tasmā mahāsatto otiṇṇaṭṭhānato paṭṭhāya sapadānaṃ sāliṃ khādanto agamāsi. Sesā ito cito ca khādantā vicariṃsu.

    ཨཐ ལུདྡཔུཏྟོ ‘‘ཨཡཾ ཧཾསོ ནིལློལུཔྤཙཱརཱི, ཨིམཾ བནྡྷིཏུཾ ཝཊྚཏཱི’’ཏི ཙིནྟེཏྭཱ པུནདིཝསེ ཧཾསེསུ སརཾ ཨནོཏིཎྞེསུཡེཝ ཙཱཊིཔཉྫརེ ནིསིནྣོ ཏཾ ཋཱནཾ གནྟྭཱ ཨཝིདཱུརེ པཉྫརེ ཨཏྟཱནཾ པཊིཙྪཱདེཏྭཱ ཚིདྡེན ཨོལོཀེནྟོ ཨཙྪི། ཏསྨིཾ ཁཎེ མཧཱསཏྟོ ནཝུཏིཧཾསསཧསྶཔུརཀྑཏོ ཧིཡྻོ ཨོཏིཎྞཊྛཱནེཡེཝ ཨོཏརིཏྭཱ ཨོདྷིཡཾ ནིསཱིདིཏྭཱ སཱལིཾ ཁཱདནྟོ པཱཡཱསི། ནེསཱདོ པཉྫརཚིདྡེན ཨོལོཀེནྟོ ཏསྶ རཱུཔསོབྷགྒཔྤཏྟཾ ཨཏྟབྷཱཝཾ དིསྭཱ ‘‘ཨཡཾ ཧཾསོ སཀཊནཱབྷིཔྤམཱཎསརཱིརོ སུཝཎྞཝཎྞོ, ཏཱིཧི རཏྟརཱཛཱིཧི གཱིཝཱཡཾ པརིཀྑིཏྟོ, ཏིསྶོ རཱཛིཡོ གལེན ཨོཏརིཏྭཱ ཨུརནྟརེན གཏཱ, ཏིསྶོ པཙྪཱབྷཱགེན ནིབྦིཛ྄ཛྷིཏྭཱ གཏཱ, རཏྟཀམྦལསུཏྟསིཀྐཱཡ ཋཔིཏཀཉྩནཀྑནྡྷོ ཝིཡ ཨཏིརོཙཏི, ཨིམིནཱ ཨེཏེསཾ རཉྙཱ བྷཝིཏབྦཾ, ཨིམམེཝ གཎྷིསྶཱམཱི’’ཏི ཙིནྟེསི། ཧཾསརཱཛཱཔི བཧུཾ གོཙརཾ ཙརིཏྭཱ ཛལཀཱིལ༹ཾ ཀཱིལི༹ཏྭཱ ཧཾསགཎཔརིཝུཏོ ཙིཏྟཀཱུཊམེཝ ཨགམཱསི། ཨིམིནཱ ནིཡཱམེནེཝ པཉྩ དིཝསེ གོཙརཾ གཎྷི། ཚཊྛེ དིཝསེ ཁེམཀོ ཀཱལ༹ཨསྶཝཱལམཡཾ དལ༹ྷཾ མཧཱརཛྫུཾ ཝཊྚིཏྭཱ ཡཊྛིཡཱ པཱསཾ ཀཏྭཱ ‘‘སྭེ ཧཾསརཱཛཱ ཨིམསྨིཾ ཨོཀཱསེ ཨོཏརིསྶཏཱི’’ཏི ཏཐཏོ ཉཏྭཱ ཨནྟོཨུདཀེ ཡཊྛིཔཱསཾ ཨོཌྜི།

    Atha luddaputto ‘‘ayaṃ haṃso nilloluppacārī, imaṃ bandhituṃ vaṭṭatī’’ti cintetvā punadivase haṃsesu saraṃ anotiṇṇesuyeva cāṭipañjare nisinno taṃ ṭhānaṃ gantvā avidūre pañjare attānaṃ paṭicchādetvā chiddena olokento acchi. Tasmiṃ khaṇe mahāsatto navutihaṃsasahassapurakkhato hiyyo otiṇṇaṭṭhāneyeva otaritvā odhiyaṃ nisīditvā sāliṃ khādanto pāyāsi. Nesādo pañjarachiddena olokento tassa rūpasobhaggappattaṃ attabhāvaṃ disvā ‘‘ayaṃ haṃso sakaṭanābhippamāṇasarīro suvaṇṇavaṇṇo, tīhi rattarājīhi gīvāyaṃ parikkhitto, tisso rājiyo galena otaritvā urantarena gatā, tisso pacchābhāgena nibbijjhitvā gatā, rattakambalasuttasikkāya ṭhapitakañcanakkhandho viya atirocati, iminā etesaṃ raññā bhavitabbaṃ, imameva gaṇhissāmī’’ti cintesi. Haṃsarājāpi bahuṃ gocaraṃ caritvā jalakīḷaṃ kīḷitvā haṃsagaṇaparivuto cittakūṭameva agamāsi. Iminā niyāmeneva pañca divase gocaraṃ gaṇhi. Chaṭṭhe divase khemako kāḷaassavālamayaṃ daḷhaṃ mahārajjuṃ vaṭṭitvā yaṭṭhiyā pāsaṃ katvā ‘‘sve haṃsarājā imasmiṃ okāse otarissatī’’ti tathato ñatvā antoudake yaṭṭhipāsaṃ oḍḍi.

    པུནདིཝསེ ཧཾསརཱཛཱ ཨོཏརནྟོ པཱདཾ པཱསེ པཝེསནྟོཡེཝ ཨོཏརི། ཨཐསྶ པཱསོ པཱདཾ ཨཡཔཊྚཀེན ཀཌྜྷནྟོ ཝིཡ ཨཱབནྡྷིཏྭཱ གཎྷི། སོ ‘‘ཚིནྡིསྶཱམི ན’’ནྟི ཝེགཾ ཛནེཏྭཱ ཀཌྜྷིཏྭཱ པཱཏེསི། པཋམཝཱརེ སུཝཎྞཝཎྞཾ ཙམྨཾ ཚིཛྫི, དུཏིཡཝཱརེ ཀམྦལཝཎྞཾ མཾསཾ ཚིཛྫི, ཏཏིཡཝཱརེ ནྷཱརུ ཚིཛྫི, ཙཏུཏྠཝཱརེ པན ‘‘པཱདཱ ཚིཛྫེཡྻུཾ, རཉྙོ པན ཧཱིནངྒཏཱ ནཱམ ཨནནུཙྪཝིཀཱ’’ཏི ན ཝཱཡཱམཾ ཨཀཱསི, བལཝཝེདནཱ ཙ པཝཏྟིཾསུ། སོ ཙིནྟེསི – ‘‘སཙཱཧཾ བདྡྷརཝཾ རཝིསྶཱམི, ཉཱཏཀཱ མེ ཉཏྲསྟཱ ཧུཏྭཱ གོཙརཾ ཨགྒཧེཏྭཱ ཚཱཏཛ྄ཛྷཏྟཱཝ པལཱཡནྟཱ དུབྦལཏྟཱ སམུདྡེ པཏིསྶནྟཱི’’ཏི། སོ ཝེདནཾ ཨདྷིཝཱསེཏྭཱ པཱསཝསེ ཝཏྟེཏྭཱ སཱལིཾ ཁཱདནྟོ ཝིཡ ཧུཏྭཱ ཏེསཾ ཡཱཝདཏྠཾ ཙརིཏྭཱ ཧཾསཀཱིལ༹ཾ ཀཱིལ༹ནཀཱལེ མཧནྟེན སདྡེན བདྡྷརཝཾ རཝི། ཏཾ སུཏྭཱ ཧཾསཱ མརཎབྷཡཏཛྫིཏཱ ཝགྒཝགྒཱ ཙིཏྟཀཱུཊཱབྷིམུཁཱ པུརིམནཡེནེཝ པཀྐམིཾསུ།

    Punadivase haṃsarājā otaranto pādaṃ pāse pavesantoyeva otari. Athassa pāso pādaṃ ayapaṭṭakena kaḍḍhanto viya ābandhitvā gaṇhi. So ‘‘chindissāmi na’’nti vegaṃ janetvā kaḍḍhitvā pātesi. Paṭhamavāre suvaṇṇavaṇṇaṃ cammaṃ chijji, dutiyavāre kambalavaṇṇaṃ maṃsaṃ chijji, tatiyavāre nhāru chijji, catutthavāre pana ‘‘pādā chijjeyyuṃ, rañño pana hīnaṅgatā nāma ananucchavikā’’ti na vāyāmaṃ akāsi, balavavedanā ca pavattiṃsu. So cintesi – ‘‘sacāhaṃ baddharavaṃ ravissāmi, ñātakā me ñatrastā hutvā gocaraṃ aggahetvā chātajjhattāva palāyantā dubbalattā samudde patissantī’’ti. So vedanaṃ adhivāsetvā pāsavase vattetvā sāliṃ khādanto viya hutvā tesaṃ yāvadatthaṃ caritvā haṃsakīḷaṃ kīḷanakāle mahantena saddena baddharavaṃ ravi. Taṃ sutvā haṃsā maraṇabhayatajjitā vaggavaggā cittakūṭābhimukhā purimanayeneva pakkamiṃsu.

    སུམུཁོཔི ཧེཊྛཱ ཝུཏྟནཡེནེཝ ཙིནྟེཏྭཱ ཝིཙིནིཏྭཱ ཏཱིསུཔི ཀོཊྛཱསེསུ མཧཱསཏྟཾ ཨདིསྭཱ ‘‘ཨདྡྷཱ ཏསྶེཝེདཾ བྷཡཾ ཨུཔྤནྣ’’ནྟི ནིཝཏྟིཏྭཱ ཨཱགཏོ མཧཱསཏྟཾ པཱསེན བདྡྷཾ ལོཧིཏམཀྑིཏཾ དུཀྑཱཏུརཾ པངྐཔིཊྛེ ནིཔནྣཾ དིསྭཱ ‘‘མཱ བྷཱཡི, མཧཱརཱཛ, ཨཧཾ མམ ཛཱིཝིཏཾ པརིཙྩཛིཏྭཱ ཏུམྷེ མོཙེསྶཱམཱི’’ཏི ཝདནྟོ ཨོཏརིཏྭཱ མཧཱསཏྟཾ ཨསྶཱསེནྟོ པངྐཔིཊྛེ ནིསཱིདི། མཧཱསཏྟོ ‘‘ནཝུཏིཧཾསསཧསྶེསུ མཾ ཚཌྜེཏྭཱ པལཱཡནྟེསུ ཨཡཾ སུམུཁོ ཨེཀཀོཝ ཨཱགཏོ, ཀིཾ ནུ ཁོ ལུདྡཔུཏྟསྶ ཨཱགཏཀཱལེ མཾ ཚཌྜེཏྭཱ པལཱཡིསྶཏི, ཨུདཱཧུ ནོ’’ཏི ཝཱིམཾསནཝསེན ལོཧིཏམཀྑིཏོ པཱསཡཊྛིཡཾ ཨོལམྦནྟོཡེཝ ཏིསྶོ གཱཐཱ ཨབྷཱསི –

    Sumukhopi heṭṭhā vuttanayeneva cintetvā vicinitvā tīsupi koṭṭhāsesu mahāsattaṃ adisvā ‘‘addhā tassevedaṃ bhayaṃ uppanna’’nti nivattitvā āgato mahāsattaṃ pāsena baddhaṃ lohitamakkhitaṃ dukkhāturaṃ paṅkapiṭṭhe nipannaṃ disvā ‘‘mā bhāyi, mahārāja, ahaṃ mama jīvitaṃ pariccajitvā tumhe mocessāmī’’ti vadanto otaritvā mahāsattaṃ assāsento paṅkapiṭṭhe nisīdi. Mahāsatto ‘‘navutihaṃsasahassesu maṃ chaḍḍetvā palāyantesu ayaṃ sumukho ekakova āgato, kiṃ nu kho luddaputtassa āgatakāle maṃ chaḍḍetvā palāyissati, udāhu no’’ti vīmaṃsanavasena lohitamakkhito pāsayaṭṭhiyaṃ olambantoyeva tisso gāthā abhāsi –

    ༨༩.

    89.

    ‘‘ཨེཏེ ཧཾསཱ པཀྐམནྟི, ཝཀྐངྒཱ བྷཡམེརིཏཱ།

    ‘‘Ete haṃsā pakkamanti, vakkaṅgā bhayameritā;

    ཧརིཏྟཙ ཧེམཝཎྞ, ཀཱམཾ སུམུཁ པཀྐམ༎

    Harittaca hemavaṇṇa, kāmaṃ sumukha pakkama.

    ༩༠.

    90.

    ‘‘ཨོཧཱཡ མཾ ཉཱཏིགཎཱ, ཨེཀཾ པཱསཝསཾ གཏཾ།

    ‘‘Ohāya maṃ ñātigaṇā, ekaṃ pāsavasaṃ gataṃ;

    ཨནཔེཀྑམཱནཱ གཙྪནྟི, ཀིཾ ཨེཀོ ཨཝཧཱིཡསི༎

    Anapekkhamānā gacchanti, kiṃ eko avahīyasi.

    ༩༡.

    91.

    ‘‘པཏེཝ པཏཏཾ སེཊྛ, ནཏྠི བདྡྷེ སཧཱཡཏཱ།

    ‘‘Pateva patataṃ seṭṭha, natthi baddhe sahāyatā;

    མཱ ཨནཱིགྷཱཡ ཧཱཔེསི, ཀཱམཾ སུམུཁ པཀྐམཱ’’ཏི༎

    Mā anīghāya hāpesi, kāmaṃ sumukha pakkamā’’ti.

    ཏཏྠ བྷཡམེརིཏཱཏི བྷཡེན ཨེརིཏཱ བྷཡཊྚིཏཱ བྷཡཙལིཏཱ། ཏཏིཡཔདེ ‘‘ཧརཱི’’ཏིཔི ‘‘ཧེམ’’ནྟིཔི སུཝཎྞསྶེཝ ནཱམཾ། སོ ཙ ཧརིཏྟཙཏཱཡ ཧེམཝཎྞོ, ཏེན ཏཾ ཨེཝཾ ཨཱལཔཏི། སུམུཁཱཏི སུནྡརམུཁ། ཨནཔེཀྑམཱནཱཏི ཏཝ ཉཱཏཀཱ མཾ ཨནོལོཀེནྟཱ ནིརཱལཡཱ ཧུཏྭཱ། པཏེཝཱཏི ཨུཔྤཏཱཧིཡེཝ། མཱ ཨནཱིགྷཱཡཱཏི ཨིཏོ གནྟྭཱ པཏྟབྦཱཡ ནིདུཀྑབྷཱཝཱཡ ཝཱིརིཡཾ མཱ ཧཱཔེསི།

    Tattha bhayameritāti bhayena eritā bhayaṭṭitā bhayacalitā. Tatiyapade ‘‘harī’’tipi ‘‘hema’’ntipi suvaṇṇasseva nāmaṃ. So ca harittacatāya hemavaṇṇo, tena taṃ evaṃ ālapati. Sumukhāti sundaramukha. Anapekkhamānāti tava ñātakā maṃ anolokentā nirālayā hutvā. Patevāti uppatāhiyeva. Mā anīghāyāti ito gantvā pattabbāya nidukkhabhāvāya vīriyaṃ mā hāpesi.

    ཏཾ སུཏྭཱ སུམུཁོ ‘‘ཨཡཾ ཧཾསརཱཛཱ མམ པིཡམིཏྟབྷཱཝཾ ན ཛཱནཱཏི, ཨནུཔྤིཡབྷཱཎཱི མིཏྟོཏི མཾ སལླཀྑེཏི, སིནེཧབྷཱཝམསྶ དསྶེསྶཱམཱི’’ཏི ཙིནྟེཏྭཱ ཙཏསྶོ གཱཐཱ ཨབྷཱསི –

    Taṃ sutvā sumukho ‘‘ayaṃ haṃsarājā mama piyamittabhāvaṃ na jānāti, anuppiyabhāṇī mittoti maṃ sallakkheti, sinehabhāvamassa dassessāmī’’ti cintetvā catasso gāthā abhāsi –

    ༩༢.

    92.

    ‘‘ནཱཧཾ དུཀྑཔརེཏོཔི, དྷཏརཊྛ ཏུཝཾ ཛཧེ།

    ‘‘Nāhaṃ dukkhaparetopi, dhataraṭṭha tuvaṃ jahe;

    ཛཱིཝིཏཾ མརཎཾ ཝཱ མེ, ཏཡཱ སདྡྷིཾ བྷཝིསྶཏི༎

    Jīvitaṃ maraṇaṃ vā me, tayā saddhiṃ bhavissati.

    ༩༣.

    93.

    ‘‘ནཱཧཾ དུཀྑཔརེཏོཔི, དྷཏརཊྛ ཏུཝཾ ཛཧེ།

    ‘‘Nāhaṃ dukkhaparetopi, dhataraṭṭha tuvaṃ jahe;

    ན མཾ ཨནརིཡསཾཡུཏྟེ, ཀམྨེ ཡོཛེཏུམརཧསི༎

    Na maṃ anariyasaṃyutte, kamme yojetumarahasi.

    ༩༤.

    94.

    ‘‘སཀུམཱརོ སཁཱཏྱསྨི, སཙིཏྟེ ཙསྨི ཏེ ཋིཏོ།

    ‘‘Sakumāro sakhātyasmi, sacitte casmi te ṭhito;

    ཉཱཏོ སེནཱཔཏཱི ཏྱཱཧཾ, ཧཾསཱནཾ པཝརུཏྟམ༎

    Ñāto senāpatī tyāhaṃ, haṃsānaṃ pavaruttama.

    ༩༥.

    95.

    ‘‘ཀཐཾ ཨཧཾ ཝིཀཏྟིསྶཾ, ཉཱཏིམཛ྄ཛྷེ ཨིཏོ གཏོ།

    ‘‘Kathaṃ ahaṃ vikattissaṃ, ñātimajjhe ito gato;

    ཏཾ ཧིཏྭཱ པཏཏཾ སེཊྛ, ཀིཾ ཏེ ཝཀྑཱམིཏོ གཏོ།

    Taṃ hitvā patataṃ seṭṭha, kiṃ te vakkhāmito gato;

    ཨིདྷ པཱཎཾ ཙཛིསྶཱམི, ནཱནརིཡཾ ཀཏྟུམུསྶཧེ’’ཏི༎

    Idha pāṇaṃ cajissāmi, nānariyaṃ kattumussahe’’ti.

    ཏཏྠ ནཱཧནྟི ཨཧཾ, མཧཱརཱཛ, ཀཱཡིཀཙེཏསིཀེན དུཀྑེན ཕུཊྛོཔི ཏཾ ན ཛཧཱམི། ཨནརིཡསཾཡུཏྟེཏི མིཏྟདུབྦྷཱིཧི ཨཧིརིཀེཧི ཀཏྟབྦཏཱཡ ཨནརིཡབྷཱཝེན སཾཡུཏྟེ། ཀམྨེཏི ཏཾ ཛཧིཏྭཱ པཀྐམནཀམྨེ། སཀུམཱརོཏི སམཱནཀུམཱརོ, ཨེཀདིཝསེནེཝ པཊིསནྡྷིཾ གཧེཏྭཱ ཨེཀདིཝསེ ཨཎྜཀོསཾ པདཱལེཏྭཱ ཨེཀཏོ ཝཌྜྷིཏཀུམཱརོཏི ཨཏྠོ། སཁཱཏྱསྨཱིཏི ཨཧཾ ཏེ དཀྑིཎཀྑིསམོ པིཡསཧཱཡོ། སཙིཏྟེཏི ཏཝ སཀེ ཙིཏྟེ ཨཧཾ ཋིཏོ ཏཝ ཝསེ ཝཏྟཱམི, ཏཡི ཛཱིཝནྟེ ཛཱིཝཱམི, ན ཛཱིཝནྟེ ན ཛཱིཝཱམཱིཏི ཨཏྠོ། ‘‘སཾཙིཏྟེ’’ཏིཔི པཱཋོ, ཏཝ ཙིཏྟེ ཨཧཾ སཎྛིཏོ སུཊྛུ ཋིཏོཏི ཨཏྠོ། ཉཱཏོཏི སབྦཧཾསཱནཾ ཨནྟརེ པཉྙཱཏོ། ཝིཀཏྟིསྶནྟི ‘‘ཀུཧིཾ ཧཾསརཱཛཱ’’ཏི པུཙྪིཏོ ཨཧཾ ཀིནྟི ཀཐེསྶཱམི། ཀིཾ ཏེ ཝཀྑཱམཱིཏི ཏེ ཏཝ པཝཏྟིཾ པུཙྪནྟེ ཧཾསགཎེ ཀིཾ ཝཀྑཱམི།

    Tattha nāhanti ahaṃ, mahārāja, kāyikacetasikena dukkhena phuṭṭhopi taṃ na jahāmi. Anariyasaṃyutteti mittadubbhīhi ahirikehi kattabbatāya anariyabhāvena saṃyutte. Kammeti taṃ jahitvā pakkamanakamme. Sakumāroti samānakumāro, ekadivaseneva paṭisandhiṃ gahetvā ekadivase aṇḍakosaṃ padāletvā ekato vaḍḍhitakumāroti attho. Sakhātyasmīti ahaṃ te dakkhiṇakkhisamo piyasahāyo. Sacitteti tava sake citte ahaṃ ṭhito tava vase vattāmi, tayi jīvante jīvāmi, na jīvante na jīvāmīti attho. ‘‘Saṃcitte’’tipi pāṭho, tava citte ahaṃ saṇṭhito suṭṭhu ṭhitoti attho. Ñātoti sabbahaṃsānaṃ antare paññāto. Vikattissanti ‘‘kuhiṃ haṃsarājā’’ti pucchito ahaṃ kinti kathessāmi. Kiṃ te vakkhāmīti te tava pavattiṃ pucchante haṃsagaṇe kiṃ vakkhāmi.

    ཨེཝཾ སུམུཁེན ཙཏཱུཧི གཱཐཱཧི སཱིཧནཱདེ ནདིཏེ ཏསྶ གུཎཾ པཀཱསེནྟོ མཧཱསཏྟོ ཨཱཧ –

    Evaṃ sumukhena catūhi gāthāhi sīhanāde nadite tassa guṇaṃ pakāsento mahāsatto āha –

    ༩༦.

    96.

    ‘‘ཨེསོ ཧི དྷམྨོ སུམུཁ, ཡཾ ཏྭཾ ཨརིཡཔཐེ ཋིཏོ།

    ‘‘Eso hi dhammo sumukha, yaṃ tvaṃ ariyapathe ṭhito;

    ཡོ བྷཏྟཱརཾ སཁཱརཾ མཾ, ན པརིཙྩཏྟུམུསྶཧེ༎

    Yo bhattāraṃ sakhāraṃ maṃ, na pariccattumussahe.

    ༩༧.

    97.

    ‘‘ཏཉྷི མེ པེཀྑམཱནསྶ, བྷཡཾ ན ཏྭེཝ ཛཱཡཏི།

    ‘‘Tañhi me pekkhamānassa, bhayaṃ na tveva jāyati;

    ཨདྷིགཙྪསི ཏྭཾ མཡ྄ཧཾ, ཨེཝཾབྷཱུཏསྶ ཛཱིཝིཏ’’ནྟི༎

    Adhigacchasi tvaṃ mayhaṃ, evaṃbhūtassa jīvita’’nti.

    ཏཏྠ ཨེསོ དྷམྨོཏི ཨེས པོརཱཎཀཔཎྜིཏཱནཾ སབྷཱཝོ། བྷཏྟཱརཾ སཁཱརཾ མནྟི སཱམིཀཉྩ སཧཱཡཉྩ མཾ། བྷཡནྟི ཙིཏྟུཏྲཱསོ མཡ྄ཧཾ ན ཛཱཡཏི, ཙིཏྟཀཱུཊཔབྦཏེ ཧཾསགཎམཛ྄ཛྷེ ཋིཏོ ཝིཡ ཧོམི། མཡ྄ཧནྟི མམ ཛཱིཝིཏཾ ཏྭཾ ལབྷཱཔེསྶསི།

    Tattha eso dhammoti esa porāṇakapaṇḍitānaṃ sabhāvo. Bhattāraṃ sakhāraṃ manti sāmikañca sahāyañca maṃ. Bhayanti cittutrāso mayhaṃ na jāyati, cittakūṭapabbate haṃsagaṇamajjhe ṭhito viya homi. Mayhanti mama jīvitaṃ tvaṃ labhāpessasi.

    ཨེཝཾ ཏེསཾ ཀཐེནྟཱནཉྙེཝ ལུདྡཔུཏྟོ སརཔརིཡནྟེ ཋིཏོ ཧཾསེ ཏཱིཧི ཁནྡྷེཧི པལཱཡནྟེ དིསྭཱ ‘‘ཀིཾ ནུ ཁོ’’ཏི པཱསཊྛཱནཾ ཨོལོཀེནྟོ བོདྷིསཏྟཾ པཱསཡཊྛིཡཾ ཨོལམྦནྟཾ དིསྭཱ སཉྫཱཏསོམནསྶོ ཀཙྪཾ དལ༹ྷཾ བནྡྷིཏྭཱ མུགྒརཾ གཧེཏྭཱ ཀཔྤུཊྛཱནགྒི ཝིཡ ཨཝཏྠརམཱནོ པཎྷིཡཱ ཨཀྐནྟཀལལེ ཨུཔརིསཱིསེན གནྟྭཱ པུརཏོ པཏནྟེ ཝེགེན ཨུཔསངྐམི། ཏམཏྠཾ པཀཱསེནྟོ སཏྠཱ ཨཱཧ –

    Evaṃ tesaṃ kathentānaññeva luddaputto sarapariyante ṭhito haṃse tīhi khandhehi palāyante disvā ‘‘kiṃ nu kho’’ti pāsaṭṭhānaṃ olokento bodhisattaṃ pāsayaṭṭhiyaṃ olambantaṃ disvā sañjātasomanasso kacchaṃ daḷhaṃ bandhitvā muggaraṃ gahetvā kappuṭṭhānaggi viya avattharamāno paṇhiyā akkantakalale uparisīsena gantvā purato patante vegena upasaṅkami. Tamatthaṃ pakāsento satthā āha –

    ༩༨.

    98.

    ‘‘ཨིཙྩེཝཾ མནྟཡནྟཱནཾ, ཨརིཡཱནཾ ཨརིཡཝུཏྟིནཾ།

    ‘‘Iccevaṃ mantayantānaṃ, ariyānaṃ ariyavuttinaṃ;

    དཎྜམཱདཱཡ ནེསཱདོ, ཨཱཔཏཱི ཏུརིཏོ བྷུསཾ༎

    Daṇḍamādāya nesādo, āpatī turito bhusaṃ.

    ༩༩.

    99.

    ‘‘ཏམཱཔཏནྟཾ དིསྭཱན, སུམུཁོ ཨཏིབྲཱུཧཡི།

    ‘‘Tamāpatantaṃ disvāna, sumukho atibrūhayi;

    ཨཊྛཱསི པུརཏོ རཉྙོ, ཧཾསོ ཝིསྶཱསཡཾ བྱཐཾ༎

    Aṭṭhāsi purato rañño, haṃso vissāsayaṃ byathaṃ.

    ༡༠༠.

    100.

    ‘‘མཱ བྷཱཡི པཏཏཾ སེཊྛ, ན ཧི བྷཱཡནྟི ཏཱདིསཱ།

    ‘‘Mā bhāyi patataṃ seṭṭha, na hi bhāyanti tādisā;

    ཨཧཾ ཡོགཾ པཡུཉྫིསྶཾ, ཡུཏྟཾ དྷམྨཱུཔསཉྷིཏཾ།

    Ahaṃ yogaṃ payuñjissaṃ, yuttaṃ dhammūpasañhitaṃ;

    ཏེན པརིཡཱཔདཱནེན, ཁིཔྤཾ པཱསཱ པམོཀྑསཱི’’ཏི༎

    Tena pariyāpadānena, khippaṃ pāsā pamokkhasī’’ti.

    ཏཏྠ ཨརིཡཝུཏྟིནནྟི ཨརིཡཱཙཱརེ ཝཏྟམཱནཱནཾ། བྷུསནྟི དལ༹ྷཾ བལཝཾ། ཨཏིབྲཱུཧཡཱིཏི ཨནནྟརགཱཐཱཡ ཨཱགཏཾ ‘‘མཱ བྷཱཡཱི’’ཏི ཝཙནཾ ཝདནྟོ ཨཏིབྲཱུཧེསི མཧཱསདྡཾ ནིཙྪཱརེསི། ཨཊྛཱསཱིཏི སཙེ ནེསཱདོ རཱཛཱནཾ པཧརིསྶཏི, ཨཧཾ པཧཱརཾ སམྤཊིཙྪིསྶཱམཱིཏི ཛཱིཝིཏཾ པརིཙྩཛིཏྭཱ པུརཏོ ཨཊྛཱསི། ཝིསྶཱསཡནྟི ཝིསྶཱསེནྟོ ཨསྶཱསེནྟོ། བྱཐནྟི བྱཐིཏཾ བྷཱིཏཾ རཱཛཱནཾ ‘‘མཱ བྷཱཡཱི’’ཏི ཨིམིནཱ ཝཙནེན ཝིསྶཱསེནྟོ། ཏཱདིསཱཏི ཏུམྷཱདིསཱ ཉཱཎཝཱིརིཡསམྤནྣཱ། ཡོགནྟི ཉཱཎཝཱིརིཡཡོགཾ། ཡུཏྟནྟི ཨནུཙྪཝིཀཾ། དྷམྨཱུཔསཉྷིཏནྟི ཀཱརཎནིསྶིཏཾ། ཏེན པརིཡཱཔདཱནེནཱཏི ཏེན མཡཱ པཡུཏྟེན ཡོགེན པརིསུདྡྷེན། པམོཀྑསཱིཏི མུཙྩིསྶསི།

    Tattha ariyavuttinanti ariyācāre vattamānānaṃ. Bhusanti daḷhaṃ balavaṃ. Atibrūhayīti anantaragāthāya āgataṃ ‘‘mā bhāyī’’ti vacanaṃ vadanto atibrūhesi mahāsaddaṃ nicchāresi. Aṭṭhāsīti sace nesādo rājānaṃ paharissati, ahaṃ pahāraṃ sampaṭicchissāmīti jīvitaṃ pariccajitvā purato aṭṭhāsi. Vissāsayanti vissāsento assāsento. Byathanti byathitaṃ bhītaṃ rājānaṃ ‘‘mā bhāyī’’ti iminā vacanena vissāsento. Tādisāti tumhādisā ñāṇavīriyasampannā. Yoganti ñāṇavīriyayogaṃ. Yuttanti anucchavikaṃ. Dhammūpasañhitanti kāraṇanissitaṃ. Tena pariyāpadānenāti tena mayā payuttena yogena parisuddhena. Pamokkhasīti muccissasi.

    ཨེཝཾ སུམུཁོ མཧཱསཏྟཾ ཨསྶཱསེཏྭཱ ལུདྡཔུཏྟསྶ སནྟིཀཾ གནྟྭཱ མདྷུརཾ མཱནུསིཾ ཝཱཙཾ ནིཙྪཱརེནྟོ, ‘‘སམྨ, ཏྭཾ ཀོནཱམོསཱི’’ཏི པུཙྪིཏྭཱ ‘‘སུཝཎྞཝཎྞཧཾསརཱཛ, ཨཧཾ ཁེམཀོ ནཱམཱ’’ཏི ཝུཏྟེ, ‘‘སམྨ ཁེམཀ, ‘ཏཡཱ ཨོཌྜིཏཝཱལཔཱསེ ཡོ ཝཱ སོ ཝཱ ཧཾསོ བདྡྷོ’ཏི སཉྙཾ མཱ ཀརི, ནཝུཏིཡཱ ཧཾསསཧསྶཱནཾ པཝརོ དྷཏརཊྛཧཾསརཱཛཱ ཏེ པཱསེ བདྡྷོ, ཉཱཎསཱིལཱཙཱརསམྤནྣོ སངྒཱཧཀཔཀྑེ ཋིཏོ, ན ཏཾ མཱརེཏུཾ ཡུཏྟོ, ཨཧཾ ཏཝ ཨིམིནཱ ཀཏྟབྦཀིཙྩཾ ཀརིསྶཱམི, ཨཡམྤི སུཝཎྞཝཎྞོ, ཨཧམྤི ཏཐེཝ, ཨཧཾ ཨེཏསྶཏྠཱཡ ཨཏྟནོ ཛཱིཝིཏཾ པརིཙྩཛིསྶཱམི, སཙེ ཏྭཾ ཨེཏསྶ པཏྟཱནི གཎྷིཏུཀཱམོསི, མམ པཏྟཱནི གཎྷ, ཨཐོཔི ཙམྨམཾསནྷཱརུཨཊྛཱིནམཉྙཏརཾ གཎྷིཏུཀཱམོསི, མམེཝ སརཱིརཏོ གཎྷ, ཨཐ ནཾ ཀཱིལཱ༹ཧཾསཾ ཀཱཏུཀཱམོསི, མཉྙེཝ ཀར, ཛཱིཝནྟམེཝ ཝིཀྐིཎིཏྭཱ སཙེ དྷནཾ ཨུཔྤཱདེཏུཀཱམོསི, མཾ ཛཱིཝནྟམེཝ ཝིཀྐིཎིཏྭཱ དྷནཾ ཨུཔྤཱདེཧི, མཱ ཨེཏཾ ཉཱཎཱདིགུཎསཾཡུཏྟཾ ཧཾསརཱཛཱནཾ ཨཝདྷི, སཙེ ཧི ནཾ ཝདྷིསྶསི, ནིརཡཱདཱིཧི ན མུཙྩིསྶསཱི’’ཏི ཏཾ ནིརཡཱདིབྷཡེན སནྟཛྫེཏྭཱ ཨཏྟནོ མདྷུརཀཐཾ གཎྷཱཔེཏྭཱ པུན བོདྷིསཏྟསྶ སནྟིཀཾ གནྟྭཱ ཏཾ ཨསྶཱསེནྟོ ཨཊྛཱསི། ནེསཱདོ ཏསྶ ཀཐཾ སུཏྭཱ ‘‘ཨཡཾ ཏིརཙྪཱནགཏོ སམཱནོ མནུསྶེཧིཔི ཀཱཏུཾ ཨསཀྐུཎེཡྻཾ ཨེཝརཱུཔཾ མིཏྟདྷམྨཾ ཀརོཏི, མནུསྶཱཔི ཨེཝཾ མིཏྟདྷམྨེ ཋཱཏུཾ ན སཀྐོནྟི, ཨཧོ ཨེས ཉཱཎསམྤནྣོ མདྷུརཀཐོ དྷམྨིཀོ’’ཏི སཀལསརཱིརཾ པཱིཏིསོམནསྶཔརིཔུཎྞཾ ཀཏྭཱ པཧཊྛལོམོ དཎྜཾ ཚཌྜེཏྭཱ སིརསི ཨཉྫལིཾ པཏིཊྛཔེཏྭཱ སཱུརིཡཾ ནམསྶནྟོ ཝིཡ སུམུཁསྶ གུཎཾ ཀིཏྟེནྟོ ཨཊྛཱསི། ཏམཏྠཾ པཀཱསེནྟོ སཏྠཱ ཨཱཧ –

    Evaṃ sumukho mahāsattaṃ assāsetvā luddaputtassa santikaṃ gantvā madhuraṃ mānusiṃ vācaṃ nicchārento, ‘‘samma, tvaṃ konāmosī’’ti pucchitvā ‘‘suvaṇṇavaṇṇahaṃsarāja, ahaṃ khemako nāmā’’ti vutte, ‘‘samma khemaka, ‘tayā oḍḍitavālapāse yo vā so vā haṃso baddho’ti saññaṃ mā kari, navutiyā haṃsasahassānaṃ pavaro dhataraṭṭhahaṃsarājā te pāse baddho, ñāṇasīlācārasampanno saṅgāhakapakkhe ṭhito, na taṃ māretuṃ yutto, ahaṃ tava iminā kattabbakiccaṃ karissāmi, ayampi suvaṇṇavaṇṇo, ahampi tatheva, ahaṃ etassatthāya attano jīvitaṃ pariccajissāmi, sace tvaṃ etassa pattāni gaṇhitukāmosi, mama pattāni gaṇha, athopi cammamaṃsanhāruaṭṭhīnamaññataraṃ gaṇhitukāmosi, mameva sarīrato gaṇha, atha naṃ kīḷāhaṃsaṃ kātukāmosi, maññeva kara, jīvantameva vikkiṇitvā sace dhanaṃ uppādetukāmosi, maṃ jīvantameva vikkiṇitvā dhanaṃ uppādehi, mā etaṃ ñāṇādiguṇasaṃyuttaṃ haṃsarājānaṃ avadhi, sace hi naṃ vadhissasi, nirayādīhi na muccissasī’’ti taṃ nirayādibhayena santajjetvā attano madhurakathaṃ gaṇhāpetvā puna bodhisattassa santikaṃ gantvā taṃ assāsento aṭṭhāsi. Nesādo tassa kathaṃ sutvā ‘‘ayaṃ tiracchānagato samāno manussehipi kātuṃ asakkuṇeyyaṃ evarūpaṃ mittadhammaṃ karoti, manussāpi evaṃ mittadhamme ṭhātuṃ na sakkonti, aho esa ñāṇasampanno madhurakatho dhammiko’’ti sakalasarīraṃ pītisomanassaparipuṇṇaṃ katvā pahaṭṭhalomo daṇḍaṃ chaḍḍetvā sirasi añjaliṃ patiṭṭhapetvā sūriyaṃ namassanto viya sumukhassa guṇaṃ kittento aṭṭhāsi. Tamatthaṃ pakāsento satthā āha –

    ༡༠༡.

    101.

    ‘‘ཏསྶ ཏཾ ཝཙནཾ སུཏྭཱ, སུམུཁསྶ སུབྷཱསིཏཾ།

    ‘‘Tassa taṃ vacanaṃ sutvā, sumukhassa subhāsitaṃ;

    པཧཊྛལོམོ ནེསཱདོ, ཨཉྫལིསྶ པཎཱམཡི༎

    Pahaṭṭhalomo nesādo, añjalissa paṇāmayi.

    ༡༠༢.

    102.

    ‘‘ན མེ སུཏཾ ཝཱ དིཊྛཾ ཝཱ, བྷཱསནྟོ མཱནུསིཾ དིཛོ།

    ‘‘Na me sutaṃ vā diṭṭhaṃ vā, bhāsanto mānusiṃ dijo;

    ཨརིཡཾ བྲུཝཱནོ ཝཀྐངྒོ, ཙཛནྟོ མཱནུསིཾ གིརཾ༎

    Ariyaṃ bruvāno vakkaṅgo, cajanto mānusiṃ giraṃ.

    ༡༠༣.

    103.

    ‘‘ཀིཾ ནུ ཏཱཡཾ དིཛོ ཧོཏི, མུཏྟོ བདྡྷཾ ཨུཔཱསསི།

    ‘‘Kiṃ nu tāyaṃ dijo hoti, mutto baddhaṃ upāsasi;

    ཨོཧཱཡ སཀུཎཱ ཡནྟི, ཀིཾ ཨེཀོ ཨཝཧཱིཡསཱི’’ཏི༎

    Ohāya sakuṇā yanti, kiṃ eko avahīyasī’’ti.

    ཏཏྠ ཨཉྫལིསྶ པཎཱམཡཱིཏི ཨཉྫལིཾ ཨསྶ ཨུཔནཱམཡི, ‘‘ན མེ’’ཏི གཱཐཱཡསྶ ཐུཏིཾ ཀརོཏི། ཏཏྠ མཱནུསིནྟི མནུསྶཝཱཙཾ། ཨརིཡནྟི སུནྡརཾ ནིདྡོསཾ། ཙཛནྟོཏི ཝིསྶཛྫེནྟོ། ཨིདཾ ཝུཏྟཾ ཧོཏི – སམྨ, ཏྭཾ དིཛོ སམཱནོ ཨཛྫ མཡཱ སདྡྷིཾ མཱནུསིཾ ཝཱཙཾ བྷཱསནྟོ ནིདྡོསཾ བྲུཝཱནོ མཱནུསིཾ གིརཾ ཙཛནྟོ པཙྩཀྑཏོ དིཊྛོ, ཨིཏོ པུབྦེ པན ཨིདཾ ཨཙྪརིཡཾ མཡཱ ནེཝ སུཏཾ ན དིཊྛནྟི། ཀིཾ ནུ ཏཱཡནྟི ཡཾ ཨེཏཾ ཏྭཾ ཨུཔཱསསི, ཀིཾ ནུ ཏེ ཨཡཾ ཧོཏི།

    Tattha añjalissa paṇāmayīti añjaliṃ assa upanāmayi, ‘‘na me’’ti gāthāyassa thutiṃ karoti. Tattha mānusinti manussavācaṃ. Ariyanti sundaraṃ niddosaṃ. Cajantoti vissajjento. Idaṃ vuttaṃ hoti – samma, tvaṃ dijo samāno ajja mayā saddhiṃ mānusiṃ vācaṃ bhāsanto niddosaṃ bruvāno mānusiṃ giraṃ cajanto paccakkhato diṭṭho, ito pubbe pana idaṃ acchariyaṃ mayā neva sutaṃ na diṭṭhanti. Kiṃ nu tāyanti yaṃ etaṃ tvaṃ upāsasi, kiṃ nu te ayaṃ hoti.

    ཨེཝཾ ཏུཊྛཙིཏྟེན ནེསཱདེན པུཊྛོ སུམུཁོ ‘‘ཨཡཾ མུདུཀོ ཛཱཏོ, ཨིདཱནིསྶ བྷིཡྻོསོམཏྟཱཡ མུདུབྷཱཝཏྠཾ མམ གུཎཾ དསྶེསཱམཱི’’ཏི ཙིནྟེཏྭཱ ཨཱཧ –

    Evaṃ tuṭṭhacittena nesādena puṭṭho sumukho ‘‘ayaṃ muduko jāto, idānissa bhiyyosomattāya mudubhāvatthaṃ mama guṇaṃ dassesāmī’’ti cintetvā āha –

    ༡༠༤.

    104.

    ‘‘རཱཛཱ མེ སོ དིཛཱམིཏྟ, སེནཱཔཙྩསྶ ཀཱརཡིཾ།

    ‘‘Rājā me so dijāmitta, senāpaccassa kārayiṃ;

    ཏམཱཔདེ པརིཙྩཏུཾ, ནུསྶཧེ ཝིཧགཱདྷིཔཾ༎

    Tamāpade pariccatuṃ, nussahe vihagādhipaṃ.

    ༡༠༥.

    105.

    ‘‘མཧཱགཎཱཡ བྷཏྟཱ མེ, མཱ ཨེཀོ བྱསནཾ ཨགཱ།

    ‘‘Mahāgaṇāya bhattā me, mā eko byasanaṃ agā;

    ཏཐཱ ཏཾ སམྨ ནེསཱད, བྷཏྟཱཡཾ ཨབྷིཏོ རམེ’’ཏི༎

    Tathā taṃ samma nesāda, bhattāyaṃ abhito rame’’ti.

    ཏཏྠ ནུསྶཧེཏི ན སམཏྠོམྷི། མཧཱགཎཱཡཱཏི མཧཏོ ཧཾསགཎསྶ། མཱ ཨེཀོཏི མཱདིསེ སེཝཀེ ཝིཛྫམཱནེ མཱ ཨེཀཀོ བྱསནཾ ཨགཱ། ཏཐཱ ཏནྟི ཡཐཱ ཨཧཾ ཝདཱམི, ཏཐེཝ ཏཾ། སམྨཱཏི ཝཡསྶ། བྷཏྟཱཡཾ ཨབྷིཏོ རམེཏི བྷཏྟཱ ཨཡཾ མམ, ཨཧམསྶ ཨབྷིཏོ རམེ སནྟིཀེ རམཱམི ན ཨུཀྐཎྛཱམཱིཏི།

    Tattha nussaheti na samatthomhi. Mahāgaṇāyāti mahato haṃsagaṇassa. Mā ekoti mādise sevake vijjamāne mā ekako byasanaṃ agā. Tathā tanti yathā ahaṃ vadāmi, tatheva taṃ. Sammāti vayassa. Bhattāyaṃ abhito rameti bhattā ayaṃ mama, ahamassa abhito rame santike ramāmi na ukkaṇṭhāmīti.

    ནེསཱདོ ཏཾ ཏསྶ དྷམྨནིསྶིཏཾ མདྷུརཀཐཾ སུཏྭཱ སོམནསྶཔྤཏྟོ པཧཊྛལོམོ ‘‘སཙཱཧཾ ཨེཏཾ སཱིལཱདིགུཎསཾཡུཏྟཾ ཧཾསརཱཛཱནཾ ཝདྷིསྶཱམི, ཙཏཱུཧི ཨཔཱཡེཧི ན མུཙྩིསྶཱམི, རཱཛཱ མཾ ཡདིཙྪཏི, ཏཾ ཀརོཏུ, ཨཧམེཏཾ སུམུཁསྶ དཱཡཾ ཀཏྭཱ ཝིསྶཛྫེསྶཱམཱི’’ཏི ཙིནྟེཏྭཱ གཱཐམཱཧ –

    Nesādo taṃ tassa dhammanissitaṃ madhurakathaṃ sutvā somanassappatto pahaṭṭhalomo ‘‘sacāhaṃ etaṃ sīlādiguṇasaṃyuttaṃ haṃsarājānaṃ vadhissāmi, catūhi apāyehi na muccissāmi, rājā maṃ yadicchati, taṃ karotu, ahametaṃ sumukhassa dāyaṃ katvā vissajjessāmī’’ti cintetvā gāthamāha –

    ༡༠༦.

    106.

    ‘‘ཨརིཡཝཏྟསི ཝཀྐངྒ, ཡོ པིཎྜམཔཙཱཡསི།

    ‘‘Ariyavattasi vakkaṅga, yo piṇḍamapacāyasi;

    ཙཛཱམི ཏེ ཏཾ བྷཏྟཱརཾ, གཙྪཐཱུབྷོ ཡཐཱསུཁ’’ནྟི༎

    Cajāmi te taṃ bhattāraṃ, gacchathūbho yathāsukha’’nti.

    ཏཏྠ ཨརིཡཝཏྟསཱིཏི མིཏྟདྷམྨརཀྑཎསངྑཱཏེན ཨཱཙཱརཨརིཡཱནཾ ཝཏྟེན སམནྣཱགཏོསི། པིཎྜམཔཙཱཡསཱིཏི བྷཏྟུ སནྟིཀཱ ལདྡྷཾ པིཎྜཾ སེནཱཔཏིཊྛཱནཾ པཱུཛེསི། གཙྪཐཱུབྷོཏི དྭེཔི ཛནཱ ཨསྶུམུཁེ ཉཱཏིསངྒྷེ ཧཱསཡམཱནཱ ཡཐཱསུཁཾ གཙྪཐཱཏི།

    Tattha ariyavattasīti mittadhammarakkhaṇasaṅkhātena ācāraariyānaṃ vattena samannāgatosi. Piṇḍamapacāyasīti bhattu santikā laddhaṃ piṇḍaṃ senāpatiṭṭhānaṃ pūjesi. Gacchathūbhoti dvepi janā assumukhe ñātisaṅghe hāsayamānā yathāsukhaṃ gacchathāti.

    ཨེཝཾ ཝཏྭཱ ནེསཱདོ མུདུཙིཏྟེན མཧཱསཏྟཾ ཨུཔསངྐམིཏྭཱ ཡཊྛིཾ ཨོནཱམེཏྭཱ པངྐཔིཊྛེ ནིསཱིདཱཔེཏྭཱ པཱསཡཊྛིཡཱ མོཙེཏྭཱ ཏཾ ཨུཀྑིཔིཏྭཱ སརཏོ ནཱིཧརིཏྭཱ ཏརུཎདབྦཏིཎཔིཊྛེ ནིསཱིདཱཔེཏྭཱ པཱདེ བདྡྷཔཱསཾ སཎིཀཾ མོཙེཏྭཱ མཧཱསཏྟེ བལཝསིནེཧཾ པཙྩུཔཊྛཱཔེཏྭཱ མེཏྟཙིཏྟེན ཨུདཀཾ ཨཱདཱཡ ལོཧིཏཾ དྷོཝིཏྭཱ པུནཔྤུནཾ པརིམཛྫི, ཨཐསྶ མེཏྟཱནུབྷཱཝེན སིརཱཡ སིརཱ, མཾསེན མཾསཾ, ཙམྨེན ཙམྨཾ གྷཊིཏཾ, པཱདོ པཱཀཏིཀོ ཨཧོསི, ཨིཏརེན ནིབྦིསེསོ། བོདྷིསཏྟོ སུཁཔྤཏྟོ ཧུཏྭཱ པཀཏིབྷཱཝེན ནིསཱིདི། སུམུཁོ ཨཏྟཱནཾ ནིསྶཱཡ རཉྙོ སུཁིཏབྷཱཝཾ དིསྭཱ སཉྫཱཏསོམནསྶོ ཙིནྟེསི – ‘‘ཨིམིནཱ ཨམྷཱཀཾ མཧཱཨུཔཀཱརོ ཀཏོ, ཨམྷེཧི ཨེཏསྶ ཀཏོ ཨུཔཀཱརོ ནཱམ ནཏྠི, སཙེ ཨེས རཱཛརཱཛམཧཱམཏྟཱནཾ ཨཏྠཱཡ ཨམྷེ གཎྷི, ཏེསཾ སནྟིཀཾ ནེཏྭཱ བཧུཾ དྷནཾ ལབྷིསྶཏི, སཙེ ཨཏྟནོ ཨཏྠཱཡ གཎྷི, ཨམྷེ ཝིཀྐིཎིཏྭཱ དྷནཾ ལབྷིསྶཏེཝ, པུཙྪིསྶཱམི ཏཱཝ ན’’ནྟི། ཨཐ ནཾ ཨུཔཀཱརཾ ཀཱཏུཀཱམཏཱཡ པུཙྪནྟོ ཨཱཧ –

    Evaṃ vatvā nesādo muducittena mahāsattaṃ upasaṅkamitvā yaṭṭhiṃ onāmetvā paṅkapiṭṭhe nisīdāpetvā pāsayaṭṭhiyā mocetvā taṃ ukkhipitvā sarato nīharitvā taruṇadabbatiṇapiṭṭhe nisīdāpetvā pāde baddhapāsaṃ saṇikaṃ mocetvā mahāsatte balavasinehaṃ paccupaṭṭhāpetvā mettacittena udakaṃ ādāya lohitaṃ dhovitvā punappunaṃ parimajji, athassa mettānubhāvena sirāya sirā, maṃsena maṃsaṃ, cammena cammaṃ ghaṭitaṃ, pādo pākatiko ahosi, itarena nibbiseso. Bodhisatto sukhappatto hutvā pakatibhāvena nisīdi. Sumukho attānaṃ nissāya rañño sukhitabhāvaṃ disvā sañjātasomanasso cintesi – ‘‘iminā amhākaṃ mahāupakāro kato, amhehi etassa kato upakāro nāma natthi, sace esa rājarājamahāmattānaṃ atthāya amhe gaṇhi, tesaṃ santikaṃ netvā bahuṃ dhanaṃ labhissati, sace attano atthāya gaṇhi, amhe vikkiṇitvā dhanaṃ labhissateva, pucchissāmi tāva na’’nti. Atha naṃ upakāraṃ kātukāmatāya pucchanto āha –

    ༡༠༧.

    107.

    ‘‘སཙེ ཨཏྟཔྤཡོགེན, ཨོཧིཏོ ཧཾསཔཀྑིནཾ།

    ‘‘Sace attappayogena, ohito haṃsapakkhinaṃ;

    པཊིགྒཎྷཱམ ཏེ སམྨ, ཨེཏཾ ཨབྷཡདཀྑིཎཾ༎

    Paṭiggaṇhāma te samma, etaṃ abhayadakkhiṇaṃ.

    ༡༠༨.

    108.

    ‘‘ནོ ཙེ ཨཏྟཔྤཡོགེན, ཨོཧིཏོ ཧཾསཔཀྑིནཾ།

    ‘‘No ce attappayogena, ohito haṃsapakkhinaṃ;

    ཨནིསྶརོ མུཉྩམམྷེ, ཐེཡྻཾ ཀཡིརཱསི ལུདྡཀཱ’’ཏི༎

    Anissaro muñcamamhe, theyyaṃ kayirāsi luddakā’’ti.

    ཏཏྠ སཙེཏི, སམྨ ནེསཱད, སཙེ ཏཡཱ ཨཏྟནོ པཡོགེན ཨཏྟནོ ཨཏྠཱཡ ཧཾསཱནཉྩེཝ སེསཔཀྑཱིནཉྩ པཱསོ ཨོཧིཏོ། ཨནིསྶརོཏི ཨནིསྶརོ ཧུཏྭཱ ཨམྷེ མུཉྩནྟོ ཡེནཱསི ཨཱཎཏྟོ, ཏསྶསནྟཀཾ གཎྷནྟོ ཐེཡྻཾ ཀཡིརཱསི།

    Tattha saceti, samma nesāda, sace tayā attano payogena attano atthāya haṃsānañceva sesapakkhīnañca pāso ohito. Anissaroti anissaro hutvā amhe muñcanto yenāsi āṇatto, tassasantakaṃ gaṇhanto theyyaṃ kayirāsi.

    ཏཾ སུཏྭཱ ནེསཱདོ ‘‘ནཱཧཾ ཏུམྷེ ཨཏྟནོ ཨཏྠཱཡ གཎྷིཾ, བཱརཱཎསིརཉྙཱ པན སཾཡམེན གཎྷཱཔིཏོམྷཱི’’ཏི ཝཏྭཱ དེཝིཡཱ དིཊྛསུཔིནཀཱལཏོ པཊྛཱཡ ཡཱཝ རཉྙཱ ཏེསཾ ཨཱགཏབྷཱཝཾ སུཏྭཱ, ‘‘སམྨ ཁེམཀ, ཨེཀཾ ཝཱ དྭེ ཝཱ ཧཾསེ གཎྷིཏུཾ ཝཱཡམ, མཧནྟཾ ཏེ ཡསཾ དསྶཱམཱི’’ཏི ཝཏྭཱ པརིབྦཡཾ དཏྭཱ ཨུཡྻོཛིཏབྷཱཝོ, ཏཱཝ སབྦཾ པཝཏྟིཾ ཨཱརོཙེསི། ཏཾ སུཏྭཱ སུམུཁོ ‘‘ཨིམིནཱ ནེསཱདེན ཨཏྟནོ ཛཱིཝིཏཾ ཨགཎེཏྭཱ ཨམྷེ ཝིསྶཛྫེནྟེན དུཀྐརཾ ཀཏཾ, སཙེ མཡཾ ཨིཏོ ཙིཏྟཀཱུཊཾ གམིསྶཱམ, ནེཝ དྷཏརཊྛརཉྙོ པཉྙཱནུབྷཱཝོ, ན མཡ྄ཧཾ མིཏྟདྷམྨོ པཱཀཊོ བྷཝིསྶཏི, ན ལུདྡཔུཏྟོ མཧནྟཾ ཡསཾ ལཙྪཏི, ན རཱཛཱ པཉྩསུ སཱིལེསུ པཏིཊྛཧིསྶཏི, ན དེཝིཡཱ མནོརཐོ མཏྠཀཾ པཱཔུཎིསྶཏཱི’’ཏི ཙིནྟེཏྭཱ , ‘‘སམྨ, ཨེཝཾ སནྟེ ཨམྷེ ཝིསྶཛྫེཏུཾ ན ལབྷསི, རཉྙོ ནོ དསྶེཧི, སོ ཨམྷེ ཡཐཱརུཙིཾ ཀརིསྶཏཱི’’ཏི ཨིམམཏྠཾ པཀཱསེནྟོ གཱཐམཱཧ –

    Taṃ sutvā nesādo ‘‘nāhaṃ tumhe attano atthāya gaṇhiṃ, bārāṇasiraññā pana saṃyamena gaṇhāpitomhī’’ti vatvā deviyā diṭṭhasupinakālato paṭṭhāya yāva raññā tesaṃ āgatabhāvaṃ sutvā, ‘‘samma khemaka, ekaṃ vā dve vā haṃse gaṇhituṃ vāyama, mahantaṃ te yasaṃ dassāmī’’ti vatvā paribbayaṃ datvā uyyojitabhāvo, tāva sabbaṃ pavattiṃ ārocesi. Taṃ sutvā sumukho ‘‘iminā nesādena attano jīvitaṃ agaṇetvā amhe vissajjentena dukkaraṃ kataṃ, sace mayaṃ ito cittakūṭaṃ gamissāma, neva dhataraṭṭharañño paññānubhāvo, na mayhaṃ mittadhammo pākaṭo bhavissati, na luddaputto mahantaṃ yasaṃ lacchati, na rājā pañcasu sīlesu patiṭṭhahissati, na deviyā manoratho matthakaṃ pāpuṇissatī’’ti cintetvā , ‘‘samma, evaṃ sante amhe vissajjetuṃ na labhasi, rañño no dassehi, so amhe yathāruciṃ karissatī’’ti imamatthaṃ pakāsento gāthamāha –

    ༡༠༩.

    109.

    ‘‘ཡསྶ ཏྭཾ བྷཏཀོ རཉྙོ, ཀཱམཾ ཏསྶེཝ པཱཔཡ།

    ‘‘Yassa tvaṃ bhatako rañño, kāmaṃ tasseva pāpaya;

    ཏཏྠ སཾཡམནོ རཱཛཱ, ཡཐཱབྷིཉྙཾ ཀརིསྶཏཱི’’ཏི༎

    Tattha saṃyamano rājā, yathābhiññaṃ karissatī’’ti.

    ཏཏྠ ཏསྶེཝཱཏི ཏསྶེཝ སནྟིཀཾ ནེཧི། ཏཏྠཱཏི ཏསྨིཾ རཱཛནིཝེསནེ། ཡཐཱབྷིཉྙནྟི ཡཐཱདྷིཔྤཱཡཾ ཡཐཱརུཙིཾ།

    Tattha tassevāti tasseva santikaṃ nehi. Tatthāti tasmiṃ rājanivesane. Yathābhiññanti yathādhippāyaṃ yathāruciṃ.

    ཏཾ སུཏྭཱ ནེསཱདོ ‘‘མཱ ཝོ བྷདྡནྟེ རཱཛདསྶནཾ རུཙྩིཏྠ, རཱཛཱནོ ནཱམ སཔྤཊིབྷཡཱ, ཀཱིལཱ༹ཧཾསེ ཝཱ ཝོ ཀརེཡྻུཾ མཱརེཡྻུཾ ཝཱ’’ཏི ཨཱཧ། ཨཐ ནཾ སུམུཁོ, ‘‘སམྨ ལུདྡཀ མཱ ཨམྷཱཀཾ ཙིནྟཡི, ཨཧཾ ཏཱདིསསྶ ཀཀྑལ༹སྶ དྷམྨཀཐཱཡ མདྡཝཾ ཛནེསིཾ, རཉྙོ ཀིཾ ན ཛནེསྶཱམི, རཱཛཱནོ ཧི པཎྜིཏཱ སུབྷཱསིཏདུབྦྷཱསིཏཉྙུ, ཁིཔྤཾ ནོ རཉྙོ སནྟིཀཾ ནེཧི, ནཡནྟོ ཙ མཱ བནྡྷནེན ནཡི, པུཔྥཔཉྫརེ པན ནིསཱིདཱཔེཏྭཱ ནེཧི, པུཔྥཔཉྫརཾ ཀརོནྟོ དྷཏརཊྛསྶ མཧནྟཾ སེཏཔདུམསཉྪནྣཾ, མམ ཁུདྡཀཾ རཏྟཔདུམསཉྪནྣཾ ཀཏྭཱ དྷཏརཊྛཾ པུརཏོ, མམཾ པཙྪཏོ ནཱིཙཏརཾ ཀཏྭཱ ཨཱདཱཡ ཁིཔྤཾ ནེཏྭཱ རཉྙོ དསྶེཧཱི’’ཏི ཨཱཧ། སོ ཏསྶ ཝཙནཾ སུཏྭཱ ‘‘སུམུཁོ རཱཛཱནཾ དིསྭཱ མམ མཧནྟཾ ཡསཾ དཱཏུཀཱམོ བྷཝིསྶཏཱི’’ཏི སཉྫཱཏསོམནསྶོ མུདཱུཧི ལཏཱཧི པཉྫརེ ཀཏྭཱ པདུམེཧི ཚཱདེཏྭཱ ཝུཏྟནཡེནེཝ ཏེ གཧེཏྭཱ ཨགམཱསི། ཏམཏྠཾ པཀཱསེནྟོ སཏྠཱ ཨཱཧ –

    Taṃ sutvā nesādo ‘‘mā vo bhaddante rājadassanaṃ ruccittha, rājāno nāma sappaṭibhayā, kīḷāhaṃse vā vo kareyyuṃ māreyyuṃ vā’’ti āha. Atha naṃ sumukho, ‘‘samma luddaka mā amhākaṃ cintayi, ahaṃ tādisassa kakkhaḷassa dhammakathāya maddavaṃ janesiṃ, rañño kiṃ na janessāmi, rājāno hi paṇḍitā subhāsitadubbhāsitaññu, khippaṃ no rañño santikaṃ nehi, nayanto ca mā bandhanena nayi, pupphapañjare pana nisīdāpetvā nehi, pupphapañjaraṃ karonto dhataraṭṭhassa mahantaṃ setapadumasañchannaṃ, mama khuddakaṃ rattapadumasañchannaṃ katvā dhataraṭṭhaṃ purato, mamaṃ pacchato nīcataraṃ katvā ādāya khippaṃ netvā rañño dassehī’’ti āha. So tassa vacanaṃ sutvā ‘‘sumukho rājānaṃ disvā mama mahantaṃ yasaṃ dātukāmo bhavissatī’’ti sañjātasomanasso mudūhi latāhi pañjare katvā padumehi chādetvā vuttanayeneva te gahetvā agamāsi. Tamatthaṃ pakāsento satthā āha –

    ༡༡༠.

    110.

    ‘‘ཨིཙྩེཝཾ ཝུཏྟོ ནེསཱདོ, ཧེམཝཎྞེ ཧརིཏྟཙེ།

    ‘‘Iccevaṃ vutto nesādo, hemavaṇṇe harittace;

    ཨུབྷོ ཧཏྠེཧི སངྒཡ྄ཧ, པཉྫརེ ཨཛ྄ཛྷཝོདཧི༎

    Ubho hatthehi saṅgayha, pañjare ajjhavodahi.

    ༡༡༡.

    111.

    ‘‘ཏེ པཉྫརགཏེ པཀྑཱི, ཨུབྷོ བྷསྶརཝཎྞིནེ།

    ‘‘Te pañjaragate pakkhī, ubho bhassaravaṇṇine;

    སུམུཁཾ དྷཏརཊྛཉྩ, ལུདྡོ ཨཱདཱཡ པཀྐམཱི’’ཏི༎

    Sumukhaṃ dhataraṭṭhañca, luddo ādāya pakkamī’’ti.

    ཏཏྠ ཨཛ྄ཛྷཝོདཧཱིཏི ཨོདཧི ཋཔེསི། བྷསྶརཝཎྞིནེཏི པབྷཱསམྤནྣཝཎྞེ།

    Tattha ajjhavodahīti odahi ṭhapesi. Bhassaravaṇṇineti pabhāsampannavaṇṇe.

    ཨེཝཾ ལུདྡསྶ ཏེ ཨཱདཱཡ པཀྐམནཀཱལེ དྷཏརཊྛོ པཱཀཧཾསརཱཛདྷཱིཏརཾ ཨཏྟནོ བྷརིཡཾ སརིཏྭཱ སུམུཁཾ ཨཱམནྟེཏྭཱ ཀིལེསཝསེན ཝིལཔི། ཏམཏྠཾ པཀཱསེནྟོ སཏྠཱ ཨཱཧ –

    Evaṃ luddassa te ādāya pakkamanakāle dhataraṭṭho pākahaṃsarājadhītaraṃ attano bhariyaṃ saritvā sumukhaṃ āmantetvā kilesavasena vilapi. Tamatthaṃ pakāsento satthā āha –

    ༡༡༢.

    112.

    ‘‘ཧརཱིཡམཱནོ དྷཏརཊྛོ, སུམུཁཾ ཨེཏདབྲཝི།

    ‘‘Harīyamāno dhataraṭṭho, sumukhaṃ etadabravi;

    བཱལ༹ྷཾ བྷཱཡཱམི སུམུཁ, སཱམཱཡ ལཀྑཎཱུརུཡཱ།

    Bāḷhaṃ bhāyāmi sumukha, sāmāya lakkhaṇūruyā;

    ཨསྨཱཀཾ ཝདྷམཉྙཱཡ, ཨཐཏྟཱནཾ ཝདྷིསྶཏི༎

    Asmākaṃ vadhamaññāya, athattānaṃ vadhissati.

    ༡༡༣.

    113.

    ‘‘པཱཀཧཾསཱ ཙ སུམུཁ, སུཧེམཱ ཧེམསུཏྟཙཱ།

    ‘‘Pākahaṃsā ca sumukha, suhemā hemasuttacā;

    ཀོཉྩཱི སམུདྡཏཱིརེཝ, ཀཔཎཱ ནཱུན རུཙྪཏཱི’’ཏི༎

    Koñcī samuddatīreva, kapaṇā nūna rucchatī’’ti.

    ཏཏྠ བྷཱཡཱམཱིཏི མརཎཏོ བྷཱཡཱམི། སཱམཱཡཱཏི སུཝཎྞཝཎྞཱཡ། ལཀྑཎཱུརུཡཱཏི ལཀྑཎསམྤནྣཨཱུརུཡཱ། ཝཙམཉྙཱཡཱཏི ཝདྷཾ ཛཱནིཏྭཱ ‘‘མམ པིཡསཱམིཀོ མཱརིཏོ’’ཏི སཉྙཱི ཧུཏྭཱ། ཝདྷིསྶཏཱིཏི ཀིཾ མེ པིཡསཱམིཀེ མཏེ ཛཱིཝིཏེནཱཏི མརིསྶཏི། པཱཀཧཾསཱཏི པཱཀཧཾསརཱཛདྷཱིཏཱ། སུཧེམཱཏི ཨེཝཾནཱམིཀཱ། ཧེམསུཏྟཙཱཏི ཧེམསདིསསུནྡརཏཙཱ། རུཙྪཏཱིཏི ཡཐཱ ལོཎིསངྑཱཏཾ སམུདྡཾ ཨོཏརིཏྭཱ མཏེ པཏིམྷི ཀོཉྩཱི སཀུཎིཀཱ ཀཔཎཱ རོདཏི, ཨེཝཾ ནཱུན སཱ རོདིསྶཏཱིཏི།

    Tattha bhāyāmīti maraṇato bhāyāmi. Sāmāyāti suvaṇṇavaṇṇāya. Lakkhaṇūruyāti lakkhaṇasampannaūruyā. Vacamaññāyāti vadhaṃ jānitvā ‘‘mama piyasāmiko mārito’’ti saññī hutvā. Vadhissatīti kiṃ me piyasāmike mate jīvitenāti marissati. Pākahaṃsāti pākahaṃsarājadhītā. Suhemāti evaṃnāmikā. Hemasuttacāti hemasadisasundaratacā. Rucchatīti yathā loṇisaṅkhātaṃ samuddaṃ otaritvā mate patimhi koñcī sakuṇikā kapaṇā rodati, evaṃ nūna sā rodissatīti.

    ཏཾ སུཏྭཱ སུམུཁོ ‘‘ཨཡཾ ཧཾསརཱཛཱ ཨཉྙེ ཨོཝདིཏུཾ ཡུཏྟོ མཱཏུགཱམཾ ནིསྶཱཡ ཀིལེསཝསེན ཝིལཔཏི, ཨུདཀསྶ ཨཱདིཏྟཀཱལོ ཝིཡ ཝཏིཡཱ ཨུཊྛཱཡ ཀེདཱརཁཱདནཀཱལོ ཝིཡ ཙ ཛཱཏོ, ཡཾནཱུནཱཧཾ ཨཏྟནོ བལེན མཱཏུགཱམསྶ དོསཾ པཀཱསེཏྭཱ ཨེཏཾ སཉྙཱཔེཡྻ’’ནྟི ཙིནྟེཏྭཱ གཱཐམཱཧ –

    Taṃ sutvā sumukho ‘‘ayaṃ haṃsarājā aññe ovadituṃ yutto mātugāmaṃ nissāya kilesavasena vilapati, udakassa ādittakālo viya vatiyā uṭṭhāya kedārakhādanakālo viya ca jāto, yaṃnūnāhaṃ attano balena mātugāmassa dosaṃ pakāsetvā etaṃ saññāpeyya’’nti cintetvā gāthamāha –

    ༡༡༤.

    114.

    ‘‘ཨེཝཾ མཧནྟོ ལོཀསྶ, ཨཔྤམེཡྻོ མཧཱགཎཱི།

    ‘‘Evaṃ mahanto lokassa, appameyyo mahāgaṇī;

    ཨེཀིཏྠིམནུསོཙེཡྻ, ནཡིདཾ པཉྙཝཏཱམིཝ༎

    Ekitthimanusoceyya, nayidaṃ paññavatāmiva.

    ༡༡༥.

    115.

    ‘‘ཝཱཏོཝ གནྡྷམཱདེཏི, ཨུབྷཡཾ ཚེཀཔཱཔཀཾ།

    ‘‘Vātova gandhamādeti, ubhayaṃ chekapāpakaṃ;

    བཱལོ ཨཱམཀཔཀྐཾཝ, ལོལོ ཨནྡྷོཝ ཨཱམིསཾ༎

    Bālo āmakapakkaṃva, lolo andhova āmisaṃ.

    ༡༡༦.

    116.

    ‘‘ཨཝིནིཙྪཡཉྙུ ཨཏྠེསུ, མནྡོཝ པཊིབྷཱསི མཾ།

    ‘‘Avinicchayaññu atthesu, mandova paṭibhāsi maṃ;

    ཀིཙྩཱཀིཙྩཾ ན ཛཱནཱསི, སམྤཏྟོ ཀཱལཔརིཡཱཡཾ༎

    Kiccākiccaṃ na jānāsi, sampatto kālapariyāyaṃ.

    ༡༡༧.

    117.

    ‘‘ཨཌྜྷུམྨཏྟོ ཨུདཱིརེསི, ཡོ སེཡྻཱ མཉྙསིཏྠིཡོ།

    ‘‘Aḍḍhummatto udīresi, yo seyyā maññasitthiyo;

    བཧུསཱདྷཱརཎཱ ཧེཏཱ, སོཎྜཱནཾཝ སུརཱགྷརཾ༎

    Bahusādhāraṇā hetā, soṇḍānaṃva surāgharaṃ.

    ༡༡༨.

    118.

    ‘‘མཱཡཱ ཙེཏཱ མརཱིཙཱི ཙ, སོཀཱ རོགཱ ཙུཔདྡཝཱ།

    ‘‘Māyā cetā marīcī ca, sokā rogā cupaddavā;

    ཁརཱ ཙ བནྡྷནཱ ཙེཏཱ, མཙྩུཔཱསཱ གུཧཱསཡཱ།

    Kharā ca bandhanā cetā, maccupāsā guhāsayā;

    ཏཱསུ ཡོ ཝིསྶསེ པོསོ, སོ ནརེསུ ནརཱདྷམོ’’ཏི༎

    Tāsu yo vissase poso, so naresu narādhamo’’ti.

    ཏཏྠ མཧནྟོཏི མཧནྟོ སམཱནོ། ལོཀསྶཱཏི ཧཾསལོཀསྶ། ཨཔྤམེཡྻོཏི གུཎེཧི པམེཏུཾ ཨསཀྐུཎེཡྻོ། མཧཱགཎཱིཏི མཧནྟེན གཎེན སམནྣཱགཏོ གཎསཏྠཱ། ཨེཀིཏྠིནྟི ཡཾ ཨེཝརཱུཔོ བྷཝཾ ཨེཀཾ ཨིཏྠིཾ ཨནུསོཙེཡྻ, ཨིདཾ ཨནུསོཙནཾ ན པཉྙཝཏཾ ཨིཝ, ཏེནཱཧཾ ཨཛྫ ཏཾ བཱལོཏི མཉྙཱམཱིཏི ཨདྷིཔྤཱཡེནེཝམཱཧ།

    Tattha mahantoti mahanto samāno. Lokassāti haṃsalokassa. Appameyyoti guṇehi pametuṃ asakkuṇeyyo. Mahāgaṇīti mahantena gaṇena samannāgato gaṇasatthā. Ekitthinti yaṃ evarūpo bhavaṃ ekaṃ itthiṃ anusoceyya, idaṃ anusocanaṃ na paññavataṃ iva, tenāhaṃ ajja taṃ bāloti maññāmīti adhippāyenevamāha.

    ཨཱདེཏཱིཏི གཎྷཱཏི། ཚེཀཔཱཔཀནྟི སུནྡརཱསུནྡརཾ། ཨཱམཀཔཀྐཏི ཨཱམཀཉྩ པཀྐཉྩ། ལོལོཏི རསལོལོ། ཨིདཾ ཝུཏྟཾ ཧོཏི – མཧཱརཱཛ, ཡཐཱ ནཱམ ཝཱཏོ པདུམསརཱདཱིནི པཧརིཏྭཱ སུགནྡྷམྤི སངྐཱརཊྛཱནཱདཱིནི པཧརིཏྭཱ དུགྒནྡྷམྤཱིཏི ཨུབྷཡཾ ཚེཀཔཱཔཀཾ གནྡྷཾ ཨཱདིཡཏི, ཡཐཱ ཙ བཱལོ ཀུམཱརཀོ ཨམྦཛམྦཱུནཾ ཧེཊྛཱ ནིསིནྣོ ཧཏྠཾ པསཱརེཏྭཱ པཏིཏཔཏིཏཾ ཨཱམཀམྤི པཀྐམྤི ཕལཾ གཧེཏྭཱ ཁཱདཏི, ཡཐཱ ཙ རསལོལོ ཨནྡྷོ བྷཏྟེ ཨུཔནཱིཏེ ཡཾཀིཉྩི སམཀྑིཀམྤི ནིམྨཀྑིཀམྤི ཨཱམིསཾ ཨཱདིཡཏི, ཨེཝཾ ཨིཏྠིཡོ ནཱམ ཀིལེསཝསེན ཨཌྜྷམྤི དུགྒཏམྤི ཀུལཱིནམྤི ཨཀུལཱིནམྤི ཨབྷིརཱུཔམྤི ཝིརཱུཔམྤི གཎྷནྟི བྷཛནྟི, ཏཱདིསཱནཾ པཱཔདྷམྨཱནཾ ཨིཏྠཱིནཾ ཀིཾཀཱརཎཱ ཝིཔྤལཔསི, མཧཱརཱཛཱཏི།

    Ādetīti gaṇhāti. Chekapāpakanti sundarāsundaraṃ. Āmakapakkati āmakañca pakkañca. Loloti rasalolo. Idaṃ vuttaṃ hoti – mahārāja, yathā nāma vāto padumasarādīni paharitvā sugandhampi saṅkāraṭṭhānādīni paharitvā duggandhampīti ubhayaṃ chekapāpakaṃ gandhaṃ ādiyati, yathā ca bālo kumārako ambajambūnaṃ heṭṭhā nisinno hatthaṃ pasāretvā patitapatitaṃ āmakampi pakkampi phalaṃ gahetvā khādati, yathā ca rasalolo andho bhatte upanīte yaṃkiñci samakkhikampi nimmakkhikampi āmisaṃ ādiyati, evaṃ itthiyo nāma kilesavasena aḍḍhampi duggatampi kulīnampi akulīnampi abhirūpampi virūpampi gaṇhanti bhajanti, tādisānaṃ pāpadhammānaṃ itthīnaṃ kiṃkāraṇā vippalapasi, mahārājāti.

    ཨཏྠེསཱུཏི ཀཱརཎཱཀཱརཎེསུ། མནྡོཏི ཨནྡྷབཱལོ། པཊིབྷཱསི མནྟི མམ ཨུཔཊྛཱསི། ཀཱལཔརིཡཱཡནྟི ཨེཝརཱུཔཾ མརཎཀཱལཾ པཏྟོ ‘‘ཨིམསྨིཾ ཀཱལེ ཨིདཾ ཀཏྟབྦཾ, ཨིདཾ ནཀཏྟབྦཾ, ཨིདཾ ཝཏྟབྦཾ, ཨིདཾ ན ཝཏྟབྦ’’ནྟི ན ཛཱནཱསི དེཝཱཏི། ཨཌྜྷུམྨཏྟོཏི ཨཌྜྷུམྨཏྟཀོ མཉྙེ ཧུཏྭཱ། ཨུདཱིརེསཱིཏི ཡཐཱ སུརཾ པིཝིཏྭཱ ནཱཏིམཏྟོ པུརིསོ ཡཾ ཝཱ ཏཾ ཝཱ པལཔཏི, ཨེཝཾ པལཔསཱིཏི ཨཏྠོ། སེཡྻཱཏི ཝརཱ ཨུཏྟམཱ།

    Atthesūti kāraṇākāraṇesu. Mandoti andhabālo. Paṭibhāsi manti mama upaṭṭhāsi. Kālapariyāyanti evarūpaṃ maraṇakālaṃ patto ‘‘imasmiṃ kāle idaṃ kattabbaṃ, idaṃ nakattabbaṃ, idaṃ vattabbaṃ, idaṃ na vattabba’’nti na jānāsi devāti. Aḍḍhummattoti aḍḍhummattako maññe hutvā. Udīresīti yathā suraṃ pivitvā nātimatto puriso yaṃ vā taṃ vā palapati, evaṃ palapasīti attho. Seyyāti varā uttamā.

    ‘‘མཱཡཱ ཙཱ’’ཏིཨཱདཱིསུ, དེཝ, ཨིཏྠིཡོ ནཱམེཏཱ ཝཉྩནཊྛེན མཱཡཱ, ཨགཡ྄ཧུཔགཊྛེན མརཱིཙཱི, སོཀཱདཱིནཾ པཙྩཡཏྟཱ སོཀཱ, རོགཱ, ཨནེཀཔྤཀཱརཱ ཨུཔདྡཝཱ, ཀོདྷཱདཱིཧི ཐདྡྷབྷཱཝེནེཝ ཁརཱ། ཏཱ ཧི ནིསྶཱཡ ཨནྡུབནྡྷནཱདཱིཧི བནྡྷནཏོ བནྡྷནཱ ཙེཏཱ, ཨིཏྠིཡོ ནཱམ སརཱིརགུཧཱསཡཝསེནེཝ མཙྩུ ནཱམ ཨེཏཱ, དེཝཱཏི། ‘‘ཀཱམཧེཏུ, ཀཱམནིདཱནཾ, ཀཱམཱདྷིཀརཎཾ, ཀཱམཱནམེཝ ཧེཏུ རཱཛཱནོ ཙོརཾ གཧེཏྭཱ’’ཏི (མ॰ ནི॰ ༡.༡༦༨-༡༦༩) སུཏྟེནཔེས ཨཏྠོ དཱིཔེཏབྦོ།

    ‘‘Māyā cā’’tiādīsu, deva, itthiyo nāmetā vañcanaṭṭhena māyā, agayhupagaṭṭhena marīcī, sokādīnaṃ paccayattā sokā, rogā, anekappakārā upaddavā, kodhādīhi thaddhabhāveneva kharā. Tā hi nissāya andubandhanādīhi bandhanato bandhanā cetā, itthiyo nāma sarīraguhāsayavaseneva maccu nāma etā, devāti. ‘‘Kāmahetu, kāmanidānaṃ, kāmādhikaraṇaṃ, kāmānameva hetu rājāno coraṃ gahetvā’’ti (ma. ni. 1.168-169) suttenapesa attho dīpetabbo.

    ཏཏོ དྷཏརཊྛོ མཱཏུགཱམེ པཊིབདྡྷཙིཏྟཏཱཡ ‘‘ཏྭཾ མཱཏུགཱམསྶ གུཎཾ ན ཛཱནཱསི, པཎྜིཏཱ ཨེཝ ཨེཏཾ ཛཱནནྟི, ན ཧེཏཱ གརཧིཏབྦཱ’’ཏི དཱིཔེནྟོ ཨཱཧ –

    Tato dhataraṭṭho mātugāme paṭibaddhacittatāya ‘‘tvaṃ mātugāmassa guṇaṃ na jānāsi, paṇḍitā eva etaṃ jānanti, na hetā garahitabbā’’ti dīpento āha –

    ༡༡༩.

    119.

    ‘‘ཡཾ ཝུདྡྷེཧི ཨུཔཉྙཱཏཾ, ཀོ ཏཾ ནིནྡིཏུམརཧཏི།

    ‘‘Yaṃ vuddhehi upaññātaṃ, ko taṃ ninditumarahati;

    མཧཱབྷཱུཏིཏྠིཡོ ནཱམ, ལོཀསྨིཾ ཨུདཔཛྫིསུཾ༎

    Mahābhūtitthiyo nāma, lokasmiṃ udapajjisuṃ.

    ༡༢༠.

    120.

    ‘‘ཁིཌྜཱ པཎིཧིཏཱ ཏྱཱསུ, རཏི ཏྱཱསུ པཏིཊྛིཏཱ།

    ‘‘Khiḍḍā paṇihitā tyāsu, rati tyāsu patiṭṭhitā;

    བཱིཛཱནི ཏྱཱསུ རཱུཧནྟི, ཡདིདཾ སཏྟཱ པཛཱཡརེ།

    Bījāni tyāsu rūhanti, yadidaṃ sattā pajāyare;

    ཏཱསུ ཀོ ནིབྦིདེ པོསོ, པཱཎམཱསཛྫ པཱཎིབྷི༎

    Tāsu ko nibbide poso, pāṇamāsajja pāṇibhi.

    ༡༢༡.

    121.

    ‘‘ཏྭམེཝ ནཉྙོ སུམུཁ, ཐཱིནཾ ཨཏྠེསུ ཡུཉྫསི།

    ‘‘Tvameva nañño sumukha, thīnaṃ atthesu yuñjasi;

    ཏསྶ ཏྱཛྫ བྷཡེ ཛཱཏེ, བྷཱིཏེ ན ཛཱཡཏེ མཏི༎

    Tassa tyajja bhaye jāte, bhīte na jāyate mati.

    ༡༢༢.

    122.

    ‘‘སབྦོ ཧི སཾསཡཾ པཏྟོ, བྷཡཾ བྷཱིརཱུ ཏིཏིཀྑཏི།

    ‘‘Sabbo hi saṃsayaṃ patto, bhayaṃ bhīrū titikkhati;

    པཎྜིཏཱ ཙ མཧནྟཱནོ, ཨཏྠེ ཡུཉྫནྟི དུཡྻུཛེ༎

    Paṇḍitā ca mahantāno, atthe yuñjanti duyyuje.

    ༡༢༣.

    123.

    ‘‘ཨེཏདཏྠཱཡ རཱཛཱནོ, སཱུརམིཙྪནྟི མནྟིནཾ།

    ‘‘Etadatthāya rājāno, sūramicchanti mantinaṃ;

    པཊིབཱཧཏི ཡཾ སཱུརོ, ཨཱཔདཾ ཨཏྟཔརིཡཱཡཾ༎

    Paṭibāhati yaṃ sūro, āpadaṃ attapariyāyaṃ.

    ༡༢༤.

    124.

    ‘‘མཱ ནོ ཨཛྫ ཝིཀནྟིཾསུ, རཉྙོ སཱུདཱ མཧཱནསེ།

    ‘‘Mā no ajja vikantiṃsu, rañño sūdā mahānase;

    ཏཐཱ ཧི ཝཎྞོ པཏྟཱནཾ, ཕལཾ ཝེལུ༹ཾཝ ཏཾ ཝདྷི༎

    Tathā hi vaṇṇo pattānaṃ, phalaṃ veḷuṃva taṃ vadhi.

    ༡༢༥.

    125.

    ‘‘མུཏྟོཔི ན ཨིཙྪི ཨུཌྜེཏུཾ, སཡཾ བནྡྷཾ ཨུཔཱགམི།

    ‘‘Muttopi na icchi uḍḍetuṃ, sayaṃ bandhaṃ upāgami;

    སོཔཛྫ སཾསཡཾ པཏྟོ, ཨཏྠཾ གཎྷཱཧི མཱ མུཁ’’ནྟི༎

    Sopajja saṃsayaṃ patto, atthaṃ gaṇhāhi mā mukha’’nti.

    ཏཏྠ ཡནྟི ཡཾ མཱཏུགཱམསངྑཱཏཾ ཝཏྠུ པཉྙཱཝུདྡྷེཧི ཉཱཏཾ, ཏེསམེཝ པཱཀཊཾ, ན བཱལཱནཾ། མཧཱབྷཱུཏཱཏི མཧཱགུཎཱ མཧཱནིསཾསཱ། ཨུདཔཛྫིསུནྟི པཋམཀཔྤིཀཀཱལེ ཨིཏྠིལིངྒསྶེཝ པཋམཾ པཱཏུབྷཱུཏཏྟཱ པཋམཾ ནིབྦཏྟཱཏི ཨཏྠོ། ཏྱཱསཱུཏི སུམུཁ ཏཱསུ ཨིཏྠཱིསུ ཀཱཡཝཙཱིཁིཌྜཱ ཙ པཎིཧིཏཱ ཨོཧིཏཱ ཋཔིཏཱ, ཀཱམགུཎརཏི ཙ པཏིཊྛིཏཱ། བཱིཛཱནཱིཏི བུདྡྷཔཙྩེཀབུདྡྷཨརིཡསཱཝཀཙཀྐཝཏྟིཨཱདིབཱིཛཱནི ཏཱསུ རུཧནྟི། ཡདིདནྟི ཡེ ཨེཏེ སབྦེཔི སཏྟཱ། པཛཱཡརེཏི སབྦེ ཏཱསཉྙེཝ ཀུཙྪིམྷི སཾཝདྡྷཱཏི དཱིཔེཏི། ནིབྦིདེཏི ནིབྦིནྡེཡྻ། པཱཎམཱསཛྫ པཱཎིབྷཱིཏི ཨཏྟནོ པཱཎེཧིཔི ཏཱསཾ པཱཎཾ ཨཱསཱདེཏྭཱ ཨཏྟནོ ཛཱིཝིཏཾ ཙཛནྟོཔི ཏཱ ལབྷིཏྭཱ ཀོ ནིབྦིནྡེཡྻཱཏི ཨཏྠོ།

    Tattha yanti yaṃ mātugāmasaṅkhātaṃ vatthu paññāvuddhehi ñātaṃ, tesameva pākaṭaṃ, na bālānaṃ. Mahābhūtāti mahāguṇā mahānisaṃsā. Udapajjisunti paṭhamakappikakāle itthiliṅgasseva paṭhamaṃ pātubhūtattā paṭhamaṃ nibbattāti attho. Tyāsūti sumukha tāsu itthīsu kāyavacīkhiḍḍā ca paṇihitā ohitā ṭhapitā, kāmaguṇarati ca patiṭṭhitā. Bījānīti buddhapaccekabuddhaariyasāvakacakkavattiādibījāni tāsu ruhanti. Yadidanti ye ete sabbepi sattā. Pajāyareti sabbe tāsaññeva kucchimhi saṃvaddhāti dīpeti. Nibbideti nibbindeyya. Pāṇamāsajja pāṇibhīti attano pāṇehipi tāsaṃ pāṇaṃ āsādetvā attano jīvitaṃ cajantopi tā labhitvā ko nibbindeyyāti attho.

    ནཉྙོཏི ན ཨཉྙོ, སུམུཁ, མཡཱ ཙིཏྟཀཱུཊཏལེ ཧཾསགཎམཛ྄ཛྷེ ནིསིནྣེན ཏཾ ཨདིསྭཱ ‘‘ཀཧཾ ནུ སུམུཁོ’’ཏི ཝུཏྟེ ‘‘ཨེས མཱཏུགཱམཾ གཧེཏྭཱ ཀཉྩནགུཧཱཡཾ ཨུཏྟམརཏིཾ ཨནུབྷོཏཱི’’ཏི ཝདནྟི, ཨེཝཾ ཏྭམེཝ ཐཱིནཾ ཨཏྠེསུ ཡུཉྫསི ཡུཏྟཔཡུཏྟོ ཧོསི, ན ཨཉྙོཏི ཨཏྠོ། ཏསྶ ཏྱཛྫཱཏི ཏསྶ ཏེ ཨཛྫ མརཎབྷཡེ ཛཱཏེ ཨིམིནཱ བྷཱིཏེན མརཎབྷཡེན བྷཱིཏོ མཉྙེ, ཨཡཾ མཱཏུགཱམསྶ དོསདསྶནེ ནིཔུཎཱ མཏི ཛཱཡཏེཏི ཨདྷིཔྤཱཡེནེཝམཱཧ།

    Naññoti na añño, sumukha, mayā cittakūṭatale haṃsagaṇamajjhe nisinnena taṃ adisvā ‘‘kahaṃ nu sumukho’’ti vutte ‘‘esa mātugāmaṃ gahetvā kañcanaguhāyaṃ uttamaratiṃ anubhotī’’ti vadanti, evaṃ tvameva thīnaṃ atthesu yuñjasi yuttapayutto hosi, na aññoti attho. Tassa tyajjāti tassa te ajja maraṇabhaye jāte iminā bhītena maraṇabhayena bhīto maññe, ayaṃ mātugāmassa dosadassane nipuṇā mati jāyateti adhippāyenevamāha.

    སབྦོ ཧཱིཏི ཡོ ཧི ཀོཙི། སཾསཡཾ པཏྟོཏི ཛཱིཝིཏསཾསཡཔྤཏྟོ། བྷཱིརཱུཏི བྷཱིརཱུ ཧུཏྭཱཔི བྷཡཾ ཨདྷིཝཱསེཏི། མཧནྟཱནོཏི ཡེ པན པཎྜིཏཱ ཙ ཧོནྟི མཧནྟེ ཙ ཋཱནེ ཋིཏཱ མཧནྟཱནོ, ཏེ དུཡྻུཛེ ཨཏྠེ ཡུཉྫནྟི གྷཊེནྟི ཝཱཡམནྟི, ཏསྨཱ ‘‘མཱ བྷཱཡི, དྷཱིརོ ཧོཧཱི’’ཏི ཏཾ ཨུསྶཱཧེནྟོ ཨེཝམཱཧ། ཨཱཔདནྟི སཱམིནོ ཨཱགཏཾ ཨཱཔདཾ ཨེས སཱུརོ པཊིབཱཧཏི, ཨེཏདཏྠཱཡ སཱུརཾ མནྟིནཾ ཨིཙྪནྟི། ཨཏྟཔརིཡཱཡནྟི ཨཏྟནོ པརིཏྟཱཎམྤི ཙ ཀཱཏུཾ སཀྐོཏཱིཏི ཨདྷིཔྤཱཡོ།

    Sabbo hīti yo hi koci. Saṃsayaṃ pattoti jīvitasaṃsayappatto. Bhīrūti bhīrū hutvāpi bhayaṃ adhivāseti. Mahantānoti ye pana paṇḍitā ca honti mahante ca ṭhāne ṭhitā mahantāno, te duyyuje atthe yuñjanti ghaṭenti vāyamanti, tasmā ‘‘mā bhāyi, dhīro hohī’’ti taṃ ussāhento evamāha. Āpadanti sāmino āgataṃ āpadaṃ esa sūro paṭibāhati, etadatthāya sūraṃ mantinaṃ icchanti. Attapariyāyanti attano parittāṇampi ca kātuṃ sakkotīti adhippāyo.

    ཝིཀནྟིཾསཱུཏི ཚིནྡིཾསུ། ཨིདཾ ཝུཏྟཾ ཧོཏི – སམྨ སུམུཁ, ཏྭཾ མཡཱ ཨཏྟནོ ཨནནྟརེ ཋཱནེ ཋཔིཏོ, ཏསྨཱ ཡཐཱ ཨཛྫ རཉྙོ སཱུདཱ ཨམྷེ མཾསཏྠཱཡ ན ཝིཀནྟིཾསུ, ཏཐཱ ཀརོཧི, ཏཱདིསོ ཧི ཨམྷཱཀཾ པཏྟཝཎྞོ། ཏཾ ཝདྷཱིཏི སྭཱཡཾ ཝཎྞོ ཡཐཱ ནཱམ ཝེལུ༹ཾ ནིསྶཱཡ ཛཱཏཾ ཕལཾ ཝེལུ༹མེཝ ཝདྷཏི, ཏཐཱ མཱ ཏཾ ཝདྷི, ཏཉྩ མཉྩ མཱ ཝདྷཱིཏི ཨདྷིཔྤཱཡེནེཝམཱཧ།

    Vikantiṃsūti chindiṃsu. Idaṃ vuttaṃ hoti – samma sumukha, tvaṃ mayā attano anantare ṭhāne ṭhapito, tasmā yathā ajja rañño sūdā amhe maṃsatthāya na vikantiṃsu, tathā karohi, tādiso hi amhākaṃ pattavaṇṇo. Taṃ vadhīti svāyaṃ vaṇṇo yathā nāma veḷuṃ nissāya jātaṃ phalaṃ veḷumeva vadhati, tathā mā taṃ vadhi, tañca mañca mā vadhīti adhippāyenevamāha.

    མུཏྟོཔཱིཏི ཡཐཱསུཁཾ ཙིཏྟཀཱུཊཔབྦཏཾ གཙྪཱཏི ཨེཝཾ ལུདྡཔུཏྟེན མཡཱ སདྡྷིཾ མུཏྟོ ཝིསྶཛྫིཏོ སམཱནོཔི ཨུཌྜིཏུཾ ན ཨིཙྪི། སཡནྟི རཱཛཱནཾ དཊྛུཀཱམོ ཧུཏྭཱ སཡམེཝ བནྡྷཾ ཨུཔགཏོཏི ཨེཝམིདཾ ཨམྷཱཀཾ བྷཡཾ ཏཾ ནིསྶཱཡ ཨཱགཏཾ། སོཔཛྫཱཏི སོཔི ཨཛྫ ཛཱིཝིཏསཾསཡཾ པཏྟོ། ཨཏྠཾ གཎྷཱཧི མཱ མུཁནྟི ཨིདཱནི ཨམྷཱཀཾ མུཉྩནཀཱརཎཾ གཎྷ, ཡཐཱ མུཙྩཱམ, ཏཐཱ ཝཱཡམ, ‘‘ཝཱཏོཝ གནྡྷམཱདེཏཱི’’ཏིཨཱདཱིནི ཝདནྟོ ཨིཏྠིགརཧཏྠཱཡ མུཁཾ མཱ པསཱརཡི།

    Muttopīti yathāsukhaṃ cittakūṭapabbataṃ gacchāti evaṃ luddaputtena mayā saddhiṃ mutto vissajjito samānopi uḍḍituṃ na icchi. Sayanti rājānaṃ daṭṭhukāmo hutvā sayameva bandhaṃ upagatoti evamidaṃ amhākaṃ bhayaṃ taṃ nissāya āgataṃ. Sopajjāti sopi ajja jīvitasaṃsayaṃ patto. Atthaṃ gaṇhāhi mā mukhanti idāni amhākaṃ muñcanakāraṇaṃ gaṇha, yathā muccāma, tathā vāyama, ‘‘vātova gandhamādetī’’tiādīni vadanto itthigarahatthāya mukhaṃ mā pasārayi.

    ཨེཝཾ མཧཱསཏྟོ མཱཏུགཱམཾ ཝཎྞེཏྭཱ སུམུཁཾ ཨཔྤཊིབྷཱཎཾ ཀཏྭཱ ཏསྶ ཨནཏྟམནབྷཱཝཾ ཝིདིཏྭཱ ཨིདཱནི ནཾ པགྒཎྷནྟོ གཱཐམཱཧ –

    Evaṃ mahāsatto mātugāmaṃ vaṇṇetvā sumukhaṃ appaṭibhāṇaṃ katvā tassa anattamanabhāvaṃ viditvā idāni naṃ paggaṇhanto gāthamāha –

    ༡༢༦.

    126.

    ‘‘སོ ཏཾ ཡོགཾ པཡུཉྫསྶུ, ཡུཏྟཾ དྷམྨཱུཔསཾཧིཏཾ།

    ‘‘So taṃ yogaṃ payuñjassu, yuttaṃ dhammūpasaṃhitaṃ;

    ཏཝ པརིཡཱཔདཱནེན, མམ པཱཎེསནཾ ཙརཱ’’ཏི༎

    Tava pariyāpadānena, mama pāṇesanaṃ carā’’ti.

    ཏཏྠ སོཏི, སམྨ སུམུཁ, སོ ཏྭཾ། ཏཾ ཡོགནྟི ཡཾ པུབྦེ ‘‘ཨཧཾ ཡོགཾ པཡུཉྫིསྶཾ, ཡུཏྟཾ དྷམྨཱུཔསཾཧིཏ’’ནྟི ཨཝཙཱསི, ཏཾ ཨིདཱནི པཡུཉྫསྶུ། ཏཝ པརིཡཱཔདཱནེནཱཏི ཏཝ ཏེན ཡོགེན པརིསུདྡྷེན། ‘‘པརིཡོདཱཏེནཱ’’ཏིཔི པཱཋོ, པརིཏྟཱཎེནཱཏི ཨཏྠོ, ཏཡཱ ཀཏཏྟཱ ཏཝ སནྟཀེན པརིཏྟཱཎེན མམ ཛཱིཝིཏཔརིཡེསནཾ ཙརཱཏི ཨདྷིཔྤཱཡོ།

    Tattha soti, samma sumukha, so tvaṃ. Taṃ yoganti yaṃ pubbe ‘‘ahaṃ yogaṃ payuñjissaṃ, yuttaṃ dhammūpasaṃhita’’nti avacāsi, taṃ idāni payuñjassu. Tava pariyāpadānenāti tava tena yogena parisuddhena. ‘‘Pariyodātenā’’tipi pāṭho, parittāṇenāti attho, tayā katattā tava santakena parittāṇena mama jīvitapariyesanaṃ carāti adhippāyo.

    ཨཐ སུམུཁོ ‘‘ཨཡཾ ཨཏིཝིཡ མརཎབྷཡབྷཱིཏོ མམ ཉཱཎབལཾ ན ཛཱནཱཏི, རཱཛཱནཾ དིསྭཱ ཐོཀཾ ཀཐཾ ལབྷིཏྭཱ ཛཱནིསྶཱམི, ཨསྶཱསེསྶཱམི ཏཱཝ ན’’ནྟི ཙིནྟེཏྭཱ གཱཐམཱཧ –

    Atha sumukho ‘‘ayaṃ ativiya maraṇabhayabhīto mama ñāṇabalaṃ na jānāti, rājānaṃ disvā thokaṃ kathaṃ labhitvā jānissāmi, assāsessāmi tāva na’’nti cintetvā gāthamāha –

    ༡༢༧.

    127.

    ‘‘མཱ བྷཱཡི པཏཏཾ སེཊྛ, ན ཧི བྷཱཡནྟི ཏཱདིསཱ།

    ‘‘Mā bhāyi patataṃ seṭṭha, na hi bhāyanti tādisā;

    ཨཧཾ ཡོགཾ པཡུཉྫིསྶཾ, ཡུཏྟཾ དྷམྨཱུཔསཾཧིཏཾ།

    Ahaṃ yogaṃ payuñjissaṃ, yuttaṃ dhammūpasaṃhitaṃ;

    མམ པརིཡཱཔདཱནེན, ཁིཔྤཾ པཱསཱ པམོཀྑསཱི’’ཏི༎

    Mama pariyāpadānena, khippaṃ pāsā pamokkhasī’’ti.

    ཏཏྠ པཱསཱཏི དུཀྑཔཱསཏོ།

    Tattha pāsāti dukkhapāsato.

    ཨིཏི ཏེསཾ སཀུཎབྷཱསཱཡ ཀཐེནྟཱནཾ ལུདྡཔུཏྟོ ན ཀིཉྩི ཨཉྙཱསི, ཀེཝལཾ པན ཏེ ཀཱཛེནཱདཱཡ བཱརཱཎསིཾ པཱཝིསི། ཨཙྪརིཡབྦྷུཏཛཱཏེན ཨཉྫལིནཱ མཧཱཛནེན ཨནུགྒཙྪམཱནོ སོ རཱཛདྭཱརཾ པཏྭཱ ཨཏྟནོ ཨཱགཏབྷཱཝཾ རཉྙོ ཨཱརོཙཱཔེསི། ཏམཏྠཾ པཀཱསེནྟོ སཏྠཱ ཨཱཧ –

    Iti tesaṃ sakuṇabhāsāya kathentānaṃ luddaputto na kiñci aññāsi, kevalaṃ pana te kājenādāya bārāṇasiṃ pāvisi. Acchariyabbhutajātena añjalinā mahājanena anuggacchamāno so rājadvāraṃ patvā attano āgatabhāvaṃ rañño ārocāpesi. Tamatthaṃ pakāsento satthā āha –

    ༡༢༨.

    128.

    ‘‘སོ ལུདྡོ ཧཾསཀཱཛེན, རཱཛདྭཱརཾ ཨུཔཱགམི།

    ‘‘So luddo haṃsakājena, rājadvāraṃ upāgami;

    པཊིཝེདེཐ མཾ རཉྙོ, དྷཏརཊྛཱཡམཱགཏོ’’ཏི༎

    Paṭivedetha maṃ rañño, dhataraṭṭhāyamāgato’’ti.

    ཏཏྠ པཊིཝེདེཐ མནྟི ཁེམཀོ ཨཱགཏོཏི ཨེཝཾ མཾ རཉྙོ ནིཝེདེཐ། དྷཏརཊྛཱཡནྟི ཨཡཾ དྷཏརཊྛོ ཨཱགཏོཏི པཊིཝེདེཐ།

    Tattha paṭivedetha manti khemako āgatoti evaṃ maṃ rañño nivedetha. Dhataraṭṭhāyanti ayaṃ dhataraṭṭho āgatoti paṭivedetha.

    དོཝཱརིཀོ གནྟྭཱ པཊིཝེདེསི། རཱཛཱ སཉྫཱཏསོམནསྶོ ‘‘ཁིཔྤཾ ཨཱགཙྪཏཱུ’’ཏི ཝཏྭཱ ཨམཙྩགཎཔརིཝུཏོ སམུསྶིཏསེཏཙྪཏྟེ རཱཛཔལླངྐེ ནིསིནྣོ ཁེམཀཾ ཧཾསཀཱཛཾ ཨཱདཱཡ མཧཱཏལཾ ཨབྷིརུལ༹ྷཾ དིསྭཱ སུཝཎྞཝཎྞེ ཧཾསེ ཨོལོཀེཏྭཱ ‘‘སམྤུཎྞོ མེ མནོརཐོ’’ཏི ཏསྶ ཀཏྟབྦཀིཙྩཾ ཨམཙྩེ ཨཱཎཱཔེསི། ཏམཏྠཾ པཀཱསེནྟོ སཏྠཱ ཨཱཧ –

    Dovāriko gantvā paṭivedesi. Rājā sañjātasomanasso ‘‘khippaṃ āgacchatū’’ti vatvā amaccagaṇaparivuto samussitasetacchatte rājapallaṅke nisinno khemakaṃ haṃsakājaṃ ādāya mahātalaṃ abhiruḷhaṃ disvā suvaṇṇavaṇṇe haṃse oloketvā ‘‘sampuṇṇo me manoratho’’ti tassa kattabbakiccaṃ amacce āṇāpesi. Tamatthaṃ pakāsento satthā āha –

    ༡༢༩.

    129.

    ‘‘ཏེ དིསྭཱ པུཉྙསངྐཱསེ, ཨུབྷོ ལཀྑཎསམྨཏེ།

    ‘‘Te disvā puññasaṅkāse, ubho lakkhaṇasammate;

    ཁལུ སཾཡམནོ རཱཛཱ, ཨམཙྩེ ཨཛ྄ཛྷབྷཱསཐ༎

    Khalu saṃyamano rājā, amacce ajjhabhāsatha.

    ༡༣༠.

    130.

    ‘‘དེཐ ལུདྡསྶ ཝཏྠཱནི, ཨནྣཾ པཱནཉྩ བྷོཛནཾ།

    ‘‘Detha luddassa vatthāni, annaṃ pānañca bhojanaṃ;

    ཀཱམཾཀརོ ཧིརཉྙསྶ, ཡཱཝནྟོ ཨེས ཨིཙྪཏཱི’’ཏི༎

    Kāmaṃkaro hiraññassa, yāvanto esa icchatī’’ti.

    ཏཏྠ པུཉྙསངྐཱསེཏི ཨཏྟནོ པུཉྙསདིསེ། ལཀྑཎསམྨཏེཏི སེཊྛསམྨཏེ ཨབྷིཉྙཱཏེ། ཁལཱུཏི ནིཔཱཏོ, ཏསྶ ‘‘ཏེ ཁལུ དིསྭཱ’’ཏི པུརིམཔདེན སམྦནྡྷོ། ‘‘དེཐཱ’’ཏིཨཱདཱིནི རཱཛཱ པསནྣཱཀཱརཾ ཀརོནྟོ ཨཱཧ། ཏཏྠ ཀཱམཾཀརོ ཧིརཉྙསྶཱཏི ཧིརཉྙཾ ཨསྶ ཀཱམཀིརིཡཱ ཨཏྠུ། ཡཱཝནྟོཏི ཡཏྟཀཾ ཨེས ཨིཙྪཏི, ཏཏྟཀཾ ཧིརཉྙམསྶ དེཐཱཏི ཨཏྠོ།

    Tattha puññasaṅkāseti attano puññasadise. Lakkhaṇasammateti seṭṭhasammate abhiññāte. Khalūti nipāto, tassa ‘‘te khalu disvā’’ti purimapadena sambandho. ‘‘Dethā’’tiādīni rājā pasannākāraṃ karonto āha. Tattha kāmaṃkaro hiraññassāti hiraññaṃ assa kāmakiriyā atthu. Yāvantoti yattakaṃ esa icchati, tattakaṃ hiraññamassa dethāti attho.

    ཨེཝཾ པསནྣཱཀཱརཾ ཀཱརེཏྭཱ པཱིཏིསོམནསྶཱསམུསྶཧིཏོ ‘‘གཙྪཐ ནཾ ཨལངྐརིཏྭཱ ཨཱནེཐཱ’’ཏི ཨཱཧ། ཨཐ ནཾ ཨམཙྩཱ རཱཛནིཝེསནཱ ཨོཏཱརེཏྭཱ ཀཔྤིཏཀེསམསྶུཾ ནྷཱཏཱནུལིཏྟཾ སབྦཱལངྐཱརཔཊིམཎྜིཏཾ ཀཏྭཱ རཉྙོ དསྶེསུཾ། ཨཐསྶ རཱཛཱ སཾཝཙྪརེ སཏསཧསྶུཊྛཱནཀེ དྭཱདས གཱམེ ཨཱཛཉྙཡུཏྟཾ རཐཾ ཨལངྐཏམཧཱགེཧཉྩཱཏི མཧནྟཾ ཡསཾ དཱཔེསི། སོ མཧནྟཾ ཡསཾ ལབྷིཏྭཱ ཨཏྟནོ ཀམྨཾ པཀཱསེཏུཾ ‘‘ན ཏེ, དེཝ, མཡཱ ཡོ ཝཱ སོ ཝཱ ཧཾསོ ཨཱནཱིཏོ, ཨཡཾ པན ནཝུཏིཡཱ ཧཾསསཧསྶཱནཾ རཱཛཱ དྷཏརཊྛོ ནཱམ, ཨཡཾ སེནཱཔཏི སུམུཁོ ནཱམཱ’’ཏི ཨཱཧ ། ཨཐ ནཾ རཱཛཱ ‘‘ཀཐཾ ཏེ, སམྨ, ཨེཏེ གཧིཏཱ’’ཏི པུཙྪི། ཏམཏྠཾ པཀཱསེནྟོ སཏྠཱ ཨཱཧ –

    Evaṃ pasannākāraṃ kāretvā pītisomanassāsamussahito ‘‘gacchatha naṃ alaṅkaritvā ānethā’’ti āha. Atha naṃ amaccā rājanivesanā otāretvā kappitakesamassuṃ nhātānulittaṃ sabbālaṅkārapaṭimaṇḍitaṃ katvā rañño dassesuṃ. Athassa rājā saṃvacchare satasahassuṭṭhānake dvādasa gāme ājaññayuttaṃ rathaṃ alaṅkatamahāgehañcāti mahantaṃ yasaṃ dāpesi. So mahantaṃ yasaṃ labhitvā attano kammaṃ pakāsetuṃ ‘‘na te, deva, mayā yo vā so vā haṃso ānīto, ayaṃ pana navutiyā haṃsasahassānaṃ rājā dhataraṭṭho nāma, ayaṃ senāpati sumukho nāmā’’ti āha . Atha naṃ rājā ‘‘kathaṃ te, samma, ete gahitā’’ti pucchi. Tamatthaṃ pakāsento satthā āha –

    ༡༣༡.

    131.

    ‘‘དིསྭཱ ལུདྡཾ པསནྣཏྟཾ, ཀཱསིརཱཛཱ ཏདབྲཝི།

    ‘‘Disvā luddaṃ pasannattaṃ, kāsirājā tadabravi;

    ཡདྱཱཡཾ སམྨ ཁེམཀ, པུཎྞཱ ཧཾསེཧི ཏིཊྛཏི༎

    Yadyāyaṃ samma khemaka, puṇṇā haṃsehi tiṭṭhati.

    ༡༣༢.

    132.

    ‘‘ཀཐཾ རུཙིམཛ྄ཛྷགཏཾ, པཱསཧཏྠོ ཨུཔཱགམི།

    ‘‘Kathaṃ rucimajjhagataṃ, pāsahattho upāgami;

    ཨོཀིཎྞཾ ཉཱཏིསངྒྷེཧི, ནིམྨཛ྄ཛྷིམཾ ཀཐཾ གཧཱི’’ཏི༎

    Okiṇṇaṃ ñātisaṅghehi, nimmajjhimaṃ kathaṃ gahī’’ti.

    ཏཏྠ པསནྣཏྟནྟི པསནྣབྷཱཝཾ སོམནསྶཔྤཏྟཾ། ཡདྱཱཡནྟི, སམྨ ཁེམཀ, ཡདི ཨཡཾ ཨམྷཱཀཾ པོཀྑརཎཱི ནཝུཏིཧཾསསཧསྶེཧི པུཎྞཱ ཏིཊྛཏི། ཀཐཾ རུཙིམཛ྄ཛྷགཏནྟི ཨེཝཾ སནྟེ ཏྭཾ ཏེསཾ རུཙཱིནཾ པིཡདསྶནཱནཾ ཧཾསཱནཾ མཛ྄ཛྷགཏཾ ཨེཏཾ ཉཱཏིསངྒྷེཧི ཨོཀིཎྞཾ། ནིམྨཛ྄ཛྷིམནྟི ནེཝ མཛ྄ཛྷིམཾ ནེཝ ཀནིཊྛཾ ཨུཏྟམཾ ཧཾསརཱཛཱནཾ ཀཐཾ པཱསཧཏྠོ ཨུཔཱགམི ཀཐཾ གཎྷཱིཏི།

    Tattha pasannattanti pasannabhāvaṃ somanassappattaṃ. Yadyāyanti, samma khemaka, yadi ayaṃ amhākaṃ pokkharaṇī navutihaṃsasahassehi puṇṇā tiṭṭhati. Kathaṃ rucimajjhagatanti evaṃ sante tvaṃ tesaṃ rucīnaṃ piyadassanānaṃ haṃsānaṃ majjhagataṃ etaṃ ñātisaṅghehi okiṇṇaṃ. Nimmajjhimanti neva majjhimaṃ neva kaniṭṭhaṃ uttamaṃ haṃsarājānaṃ kathaṃ pāsahattho upāgami kathaṃ gaṇhīti.

    སོ ཏསྶ ཀཐེནྟོ ཨཱཧ –

    So tassa kathento āha –

    ༡༣༣.

    133.

    ‘‘ཨཛྫ མེ སཏྟམཱ རཏྟི, ཨདནཱནི ཨུཔཱསཏོ།

    ‘‘Ajja me sattamā ratti, adanāni upāsato;

    པདམེཏསྶ ཨནྭེསཾ, ཨཔྤམཏྟོ གྷཊསྶིཏོ༎

    Padametassa anvesaṃ, appamatto ghaṭassito.

    ༡༣༤.

    134.

    ‘‘ཨཐསྶ པདམདྡཀྑིཾ, ཙརཏོ ཨདནེསནཾ།

    ‘‘Athassa padamaddakkhiṃ, carato adanesanaṃ;

    ཏཏྠཱཧཾ ཨོདཧིཾ པཱསཾ, ཨེཝཾ ཏཾ དིཛམགྒཧི’’ནྟི༎

    Tatthāhaṃ odahiṃ pāsaṃ, evaṃ taṃ dijamaggahi’’nti.

    ཏཏྠ ཨདནཱནཱིཏི ཨཱདཱནཱནི, གོཙརགྒཧཎཊྛཱནཱནཱིཏི ཨཏྠོ, ཨཡམེཝ ཝཱ པཱཋོ། ཨུཔཱསཏོཏི ཨུཔགཙྪནྟསྶ། པདནྟི གོཙརབྷཱུམིཡཾ ཨཀྐནྟཔདཾ། གྷཊསྶིཏོཏི ཙཱཊིཔཉྫརེ ནིསྶིཏོ ཧུཏྭཱ། ཨཐསྶཱཏི ཨཐ ཚཊྛེ དིཝསེ ཨེཏསྶ ཨདནེསནཾ ཙརནྟསྶ པདཾ ཨདྡཀྑིཾ། ཨེཝཾ ཏནྟི ཨེཝཾ ཏཾ དིཛཾ ཨགྒཧིནྟི སབྦཾ གཧིཏོཔཱཡཾ ཨཱཙིཀྑི།

    Tattha adanānīti ādānāni, gocaraggahaṇaṭṭhānānīti attho, ayameva vā pāṭho. Upāsatoti upagacchantassa. Padanti gocarabhūmiyaṃ akkantapadaṃ. Ghaṭassitoti cāṭipañjare nissito hutvā. Athassāti atha chaṭṭhe divase etassa adanesanaṃ carantassa padaṃ addakkhiṃ. Evaṃ tanti evaṃ taṃ dijaṃ aggahinti sabbaṃ gahitopāyaṃ ācikkhi.

    ཏཾ སུཏྭཱ རཱཛཱ ‘‘ཨཡཾ དྭཱརེ ཋཏྭཱ པཊིཝེདེནྟོཔི དྷཏརཊྛསྶེཝཱགམནཾ པཊིཝེདེསི, ཨིདཱནིཔི ཨེཏཾ ཨེཀམེཝ གཎྷིནྟི ཝདཏི, ཀིཾ ནུ ཁོ ཨེཏྠ ཀཱརཎ’’ནྟི ཙིནྟེཏྭཱ གཱཐམཱཧ –

    Taṃ sutvā rājā ‘‘ayaṃ dvāre ṭhatvā paṭivedentopi dhataraṭṭhassevāgamanaṃ paṭivedesi, idānipi etaṃ ekameva gaṇhinti vadati, kiṃ nu kho ettha kāraṇa’’nti cintetvā gāthamāha –

    ༡༣༥.

    135.

    ‘‘ལུདྡ དྭེ ཨིམེ སཀུཎཱ, ཨཐ ཨེཀོཏི བྷཱསསི།

    ‘‘Ludda dve ime sakuṇā, atha ekoti bhāsasi;

    ཙིཏྟཾ ནུ ཏེ ཝིཔརིཡཏྟཾ, ཨདུ ཀིཾ ནུ ཛིགཱིསསཱི’’ཏི༎

    Cittaṃ nu te vipariyattaṃ, adu kiṃ nu jigīsasī’’ti.

    ཏཏྠ ཝིཔརིཡཏྟནྟི ཝིཔལླཏྠཾ། ཨདུ ཀིཾ ནུ ཛིགཱིསསཱིཏི ཨུདཱཧུ ཀིཾ ནུ ཙིནྟེསི, ཀིཾ ཨིཏརཾ གཧེཏྭཱ ཨཉྙསྶ དཱཏུཀཱམོ ཧུཏྭཱ ཙིནྟེསཱིཏི པུཙྪཏི།

    Tattha vipariyattanti vipallatthaṃ. Adu kiṃ nu jigīsasīti udāhu kiṃ nu cintesi, kiṃ itaraṃ gahetvā aññassa dātukāmo hutvā cintesīti pucchati.

    ཏཏོ ལུདྡོ ‘‘ན མེ, དེཝ, ཙིཏྟཾ ཝིཔལླཏྠཾ, ནཱཔི ཨཧཾ ཨིཏརཾ ཨཉྙསྶ དཱཏུཀཱམོ, ཨཔིཙ ཁོ པན མཡཱ ཨོཧིཏེ པཱསེ ཨེཀོཝ བདྡྷོ’’ཏི ཨཱཝི ཀརོནྟོ ཨཱཧ –

    Tato luddo ‘‘na me, deva, cittaṃ vipallatthaṃ, nāpi ahaṃ itaraṃ aññassa dātukāmo, apica kho pana mayā ohite pāse ekova baddho’’ti āvi karonto āha –

    ༡༣༦.

    136.

    ‘‘ཡསྶ ལོཧིཏཀཱ ཏཱལཱ, ཏཔནཱིཡནིབྷཱ སུབྷཱ།

    ‘‘Yassa lohitakā tālā, tapanīyanibhā subhā;

    ཨུརཾ སཾཧཙྩ ཏིཊྛནྟི, སོ མེ བནྡྷཾ ཨུཔཱགམི༎

    Uraṃ saṃhacca tiṭṭhanti, so me bandhaṃ upāgami.

    ༡༣༧.

    137.

    ‘‘ཨཐཱཡཾ བྷསྶརོ པཀྑཱི, ཨབདྡྷོ བདྡྷམཱཏུརཾ།

    ‘‘Athāyaṃ bhassaro pakkhī, abaddho baddhamāturaṃ;

    ཨརིཡཾ བྲུཝཱནོ ཨཊྛཱསི, ཙཛནྟོ མཱནུསིཾ གིར’’ནྟི༎

    Ariyaṃ bruvāno aṭṭhāsi, cajanto mānusiṃ gira’’nti.

    ཏཏྠ ལོཧིཏཀཱཏི རཏྟཝཎྞཱ། ལཱཏཱཏི རཱཛིཡོ། ཨུརཾ སཾཧཙྩཱཏི ཨུརཾ ཨཱཧཙྩ། ཨིདཾ ཝུཏྟཾ ཧོཏི – མཧཱརཱཛ, ཡསྶེཏཱ རཏྟསུཝཎྞསཔྤཊིབྷཱགཱ ཏིསྶོ ལོཧིཏཀཱ རཱཛིཡོ གཱིཝཾ པརིཀྑིཔིཏྭཱ ཨུརཾ ཨཱཧཙྩ ཏིཊྛནྟི, སོ ཨེཀོཝ མམ པཱསེ བནྡྷཾ ཨུཔཱགཏོཏི། བྷསྶརོཏི པརིསུདྡྷོ པབྷཱསམྤནྣོ། ཨཱཏུརནྟི གིལཱནཾ དུཀྑིཏཾ ཨཊྛཱསཱིཏི།

    Tattha lohitakāti rattavaṇṇā. Lātāti rājiyo. Uraṃ saṃhaccāti uraṃ āhacca. Idaṃ vuttaṃ hoti – mahārāja, yassetā rattasuvaṇṇasappaṭibhāgā tisso lohitakā rājiyo gīvaṃ parikkhipitvā uraṃ āhacca tiṭṭhanti, so ekova mama pāse bandhaṃ upāgatoti. Bhassaroti parisuddho pabhāsampanno. Āturanti gilānaṃ dukkhitaṃ aṭṭhāsīti.

    ཨཐ དྷཏརཊྛསྶ བདྡྷབྷཱཝཾ ཉཏྭཱ ནིཝཏྟིཏྭཱ ཨེཏཾ སམསྶཱསེཏྭཱ མམཱགམནཀཱལེ ཙ པཙྩུགྒམནཾ ཀཏྭཱ ཨཱཀཱསེཡེཝ མཡཱ སདྡྷིཾ མདྷུརཔཊིསནྠཱརཾ ཀཏྭཱ མནུསྶབྷཱསཱཡ དྷཏརཊྛསྶ གུཎཾ ཀཐེནྟོ ཨཊྛཱསི, མམ ཧདཡཾ མུདུཀཾ ཀཏྭཱ པུན ཨེཏསྶེཝ པུརཏོ ཨཊྛཱསི། ཨཐཱཧཾ, དེཝ, སུམུཁསྶ སུབྷཱསིཏཾ སུཏྭཱ པསནྣཙིཏྟོ དྷཏརཊྛཾ ཝིསྶཛྫེསིཾ, ཨིཏི དྷཏརཊྛསྶ པཱསཏོ མོཀྑོ, ཨིམེ ཧཾསེ ཨཱདཱཡ མམ ཨིདྷཱགམནཉྩ སུམུཁེནེཝ ཀཏནྟི། ཨེཝཾ སོ སུམུཁསྶ གུཎཀཐཾ ཀཐེསི། ཏཾ སུཏྭཱ རཱཛཱ སུམུཁསྶ དྷམྨཀཐཾ སོཏུཀཱམོ ཨཧོསི། ལུདྡཔུཏྟསྶ སཀྐཱརཾ ཀརོནྟསྶེཝ སཱུརིཡོ ཨཏྠངྒཏོ, དཱིཔཱ པཛྫལིཏཱ, བཧཱུ ཁཏྟིཡཱདཡོ སནྣིཔཏིཏཱ, ཁེམཱ དེཝཱིཔི ཝིཝིདྷནཱཊཀཔརིཝཱརཱ རཉྙོ དཀྑིཎཔསྶེ ནིསཱིདི། ཏསྨིཾ ཁཎེ རཱཛཱ སུམུཁཾ ཀཐཱཔེཏུཀཱམོ གཱཐམཱཧ –

    Atha dhataraṭṭhassa baddhabhāvaṃ ñatvā nivattitvā etaṃ samassāsetvā mamāgamanakāle ca paccuggamanaṃ katvā ākāseyeva mayā saddhiṃ madhurapaṭisanthāraṃ katvā manussabhāsāya dhataraṭṭhassa guṇaṃ kathento aṭṭhāsi, mama hadayaṃ mudukaṃ katvā puna etasseva purato aṭṭhāsi. Athāhaṃ, deva, sumukhassa subhāsitaṃ sutvā pasannacitto dhataraṭṭhaṃ vissajjesiṃ, iti dhataraṭṭhassa pāsato mokkho, ime haṃse ādāya mama idhāgamanañca sumukheneva katanti. Evaṃ so sumukhassa guṇakathaṃ kathesi. Taṃ sutvā rājā sumukhassa dhammakathaṃ sotukāmo ahosi. Luddaputtassa sakkāraṃ karontasseva sūriyo atthaṅgato, dīpā pajjalitā, bahū khattiyādayo sannipatitā, khemā devīpi vividhanāṭakaparivārā rañño dakkhiṇapasse nisīdi. Tasmiṃ khaṇe rājā sumukhaṃ kathāpetukāmo gāthamāha –

    ༡༣༨.

    138.

    ‘‘ཨཐ ཀིཾ དཱནི སུམུཁ, ཧནུཾ སཾཧཙྩ ཏིཊྛསི།

    ‘‘Atha kiṃ dāni sumukha, hanuṃ saṃhacca tiṭṭhasi;

    ཨདུ མེ པརིསཾ པཏྟོ, བྷཡཱ བྷཱིཏོ ན བྷཱསསཱི’’ཏི༎

    Adu me parisaṃ patto, bhayā bhīto na bhāsasī’’ti.

    ཏཏྠ ཧནུཾ སཾཧཙྩཱཏི མདྷུརཀཐོ ཀིར ཏྭཾ, ཨཐ ཀསྨཱ ཨིདཱནི མུཁཾ པིདྷཱཡ ཏིཊྛསི། ཨདཱུཏི ཀཙྩི། བྷཡཱ བྷཱིཏོཏི པརིསསཱརཛྫབྷཡེན བྷཱིཏོ ཧུཏྭཱ།

    Tattha hanuṃ saṃhaccāti madhurakatho kira tvaṃ, atha kasmā idāni mukhaṃ pidhāya tiṭṭhasi. Adūti kacci. Bhayā bhītoti parisasārajjabhayena bhīto hutvā.

    ཏཾ སུཏྭཱ སུམུཁོ ཨབྷཱིཏབྷཱཝཾ དསྶེནྟོ གཱཐམཱཧ –

    Taṃ sutvā sumukho abhītabhāvaṃ dassento gāthamāha –

    ༡༣༩.

    139.

    ‘‘ནཱཧཾ ཀཱསིཔཏི བྷཱིཏོ, ཨོགཡ྄ཧ པརིསཾ ཏཝ།

    ‘‘Nāhaṃ kāsipati bhīto, ogayha parisaṃ tava;

    ནཱཧཾ བྷཡཱ ན བྷཱསིསྶཾ, ཝཱཀྱཾ ཨཏྠསྨིཾ ཏཱདིསེ’’ཏི༎

    Nāhaṃ bhayā na bhāsissaṃ, vākyaṃ atthasmiṃ tādise’’ti.

    ཏཏྠ ཏཱདིསེཏི ཨཔིཙ ཁོ པན ཏཐཱརཱུཔེ ཨཏྠེ ཨུཔྤནྣེ ཝཱཀྱཾ བྷཱསིསྶཱམཱིཏི ཝཙནོཀཱསཾ ཨོལོཀེནྟོ ནིསིནྣོམྷཱིཏི ཨཏྠོ།

    Tattha tādiseti apica kho pana tathārūpe atthe uppanne vākyaṃ bhāsissāmīti vacanokāsaṃ olokento nisinnomhīti attho.

    ཏཾ སུཏྭཱ རཱཛཱ ཏསྶ ཀཐཾ ཝཌྜྷེཏུཀཱམཏཱཡ པརིཧཱསཾ ཀརོནྟོ ཨཱཧ –

    Taṃ sutvā rājā tassa kathaṃ vaḍḍhetukāmatāya parihāsaṃ karonto āha –

    ༡༤༠.

    140.

    ‘‘ན ཏེ ཨབྷིསརཾ པསྶེ, ན རཐེ ནཔི པཏྟིཀེ།

    ‘‘Na te abhisaraṃ passe, na rathe napi pattike;

    ནཱསྶ ཙམྨཾཝ ཀཱིཊཾ ཝཱ, ཝམྨིཏེ ཙ དྷནུགྒཧེ༎

    Nāssa cammaṃva kīṭaṃ vā, vammite ca dhanuggahe.

    ༡༤༡.

    141.

    ‘‘ན ཧིརཉྙཾ སུཝཎྞཾ ཝཱ, ནགརཾ ཝཱ སུམཱཔིཏཾ།

    ‘‘Na hiraññaṃ suvaṇṇaṃ vā, nagaraṃ vā sumāpitaṃ;

    ཨོཀིཎྞཔརིཁཾ དུགྒཾ, དལ༹ྷམཊྚཱལཀོཊྛཀཾ།

    Okiṇṇaparikhaṃ duggaṃ, daḷhamaṭṭālakoṭṭhakaṃ;

    ཡཏྠ པཝིཊྛོ སུམུཁ, བྷཱཡིཏབྦཾ ན བྷཱཡསཱི’’ཏི༎

    Yattha paviṭṭho sumukha, bhāyitabbaṃ na bhāyasī’’ti.

    ཏཏྠ ཨབྷིསརནྟི རཀྑཎཏྠཱཡ པརིཝཱརེཏྭཱ ཋིཏཾ ཨཱཝུདྷཧཏྠཾ པརིསཾ ཏེ ན པསྶཱམི། ནཱསྶཱཏི ཨེཏྠ ཨསྶཱཏི ནིཔཱཏམཏྟཾ། ཙམྨནྟི སརཔརིཏྟཱཎཙམྨཾ། ཀཱིཊནྟི ཀཱིཊཾ ཙཱཊིཀཔཱལཱདི ཝུཙྩཏི། ཙཱཊིཀཔཱལཧཏྠཱཔི ཏེ སནྟིཀེ ནཏྠཱིཏི དཱིཔེཏི། ཝམྨིཏེཏི ཙམྨསནྣདྡྷེ། ན ཧིརཉྙནྟི ཡཾ ནིསྶཱཡ ན བྷཱཡསི, ཏཾ ཧིརཉྙམྤི ཏེ ན པསྶཱམི།

    Tattha abhisaranti rakkhaṇatthāya parivāretvā ṭhitaṃ āvudhahatthaṃ parisaṃ te na passāmi. Nāssāti ettha assāti nipātamattaṃ. Cammanti saraparittāṇacammaṃ. Kīṭanti kīṭaṃ cāṭikapālādi vuccati. Cāṭikapālahatthāpi te santike natthīti dīpeti. Vammiteti cammasannaddhe. Na hiraññanti yaṃ nissāya na bhāyasi, taṃ hiraññampi te na passāmi.

    ཨེཝཾ རཉྙཱ ‘‘ཀིཾ ཏེ ཨབྷཱཡནཀཱརཎ’’ནྟི ཝུཏྟེ ཏཾ ཀཐེནྟོ ཨཱཧ –

    Evaṃ raññā ‘‘kiṃ te abhāyanakāraṇa’’nti vutte taṃ kathento āha –

    ༡༤༢.

    142.

    ‘‘ན མེ ཨབྷིསརེནཏྠོ, ནགརེན དྷནེན ཝཱ།

    ‘‘Na me abhisarenattho, nagarena dhanena vā;

    ཨཔཐེན པཐཾ ཡཱམ, ཨནྟལིཀྑེཙརཱ མཡཾ༎

    Apathena pathaṃ yāma, antalikkhecarā mayaṃ.

    ༡༤༣.

    143.

    ‘‘སུཏཱ ཙ པཎྜིཏཱ ཏྱམྷཱ, ནིཔུཎཱ ཙཏྠཙིནྟཀཱ།

    ‘‘Sutā ca paṇḍitā tyamhā, nipuṇā catthacintakā;

    བྷཱསེམཏྠཝཏིཾ ཝཱཙཾ, སཙྩེ ཙསྶ པཏིཊྛིཏོ༎

    Bhāsematthavatiṃ vācaṃ, sacce cassa patiṭṭhito.

    ༡༤༤.

    144.

    ‘‘ཀིཉྩ ཏུཡ྄ཧཾ ཨསཙྩསྶ, ཨནརིཡསྶ ཀརིསྶཏི།

    ‘‘Kiñca tuyhaṃ asaccassa, anariyassa karissati;

    མུསཱཝཱདིསྶ ལུདྡསྶ, བྷཎིཏམྤི སུབྷཱསིཏ’’ནྟི༎

    Musāvādissa luddassa, bhaṇitampi subhāsita’’nti.

    ཏཏྠ ཨབྷིསརེནཱཏི ཨཱརཀྑཔརིཝཱརེན། ཨཏྠོཏི ཨེཏེན མམ ཀིཙྩཾ ནཏྠི། ཀསྨཱ? ཡསྨཱ ཨཔཐེན ཏུམྷཱདིསཱནཾ ཨམགྒེན པཐཾ མཱཔེཏྭཱ ཡཱམ, ཨཱཀཱསཙཱརིནོ མཡནྟི། པཎྜིཏཱ ཏྱམྷཱཏི པཎྜིཏཱཏི ཏཡཱ སུཏཱམྷཱ, ཏེནེཝ ཀཱརཎེན ཨམྷཱཀཾ སནྟིཀཱ དྷམྨཾ སོཏུཀཱམོ ཀིར ནོ གཱཧཱཔེསི། སཙྩེ ཙསྶཱཏི སཙེ པན ཏྭཾ སཙྩེ པཏིཊྛིཏོ ཨསྶ, ཨཏྠཝཏིཾ ཀཱརཎནིསྶིཏཾ ཝཱཙཾ བྷཱསེཡྻཱམ། ཨསཙྩསྶཱཏི ཝཙཱིསཙྩརཧིཏསྶ ཏཝ སུབྷཱསིཏཾ མུཎྜསྶ དནྟསཱུཙི ཝིཡ ཀིཾ ཀརིསྶཏི།

    Tattha abhisarenāti ārakkhaparivārena. Atthoti etena mama kiccaṃ natthi. Kasmā? Yasmā apathena tumhādisānaṃ amaggena pathaṃ māpetvā yāma, ākāsacārino mayanti. Paṇḍitā tyamhāti paṇḍitāti tayā sutāmhā, teneva kāraṇena amhākaṃ santikā dhammaṃ sotukāmo kira no gāhāpesi. Sacce cassāti sace pana tvaṃ sacce patiṭṭhito assa, atthavatiṃ kāraṇanissitaṃ vācaṃ bhāseyyāma. Asaccassāti vacīsaccarahitassa tava subhāsitaṃ muṇḍassa dantasūci viya kiṃ karissati.

    ཏཾ སུཏྭཱ རཱཛཱ ‘‘ཀསྨཱ མཾ མུསཱཝཱདཱི ཨནརིཡོཏི ཝདསི, ཀིཾ མཡཱ ཀཏ’’ནྟི ཨཱཧ། ཨཐ ནཾ སུམུཁོ ‘‘ཏེན ཧི, མཧཱརཱཛ, སུཎཱཧཱི’’ཏི ཝཏྭཱ ཨཱཧ –

    Taṃ sutvā rājā ‘‘kasmā maṃ musāvādī anariyoti vadasi, kiṃ mayā kata’’nti āha. Atha naṃ sumukho ‘‘tena hi, mahārāja, suṇāhī’’ti vatvā āha –

    ༡༤༥.

    145.

    ‘‘ཏཾ བྲཱཧྨཎཱནཾ ཝཙནཱ, ཨིམཾ ཁེམམཀཱརཡི།

    ‘‘Taṃ brāhmaṇānaṃ vacanā, imaṃ khemamakārayi;

    ཨབྷཡཉྩ ཏཡཱ གྷུཊྛཾ, ཨིམཱཡོ དསདྷཱ དིསཱ༎

    Abhayañca tayā ghuṭṭhaṃ, imāyo dasadhā disā.

    ༡༤༦.

    146.

    ‘‘ཨོགཡ྄ཧ ཏེ པོཀྑརཎིཾ, ཝིཔྤསནྣོདཀཾ སུཙིཾ།

    ‘‘Ogayha te pokkharaṇiṃ, vippasannodakaṃ suciṃ;

    པཧཱུཏཾ ཙཱདནཾ ཏཏྠ, ཨཧིཾསཱ ཙེཏྠ པཀྑིནཾ༎

    Pahūtaṃ cādanaṃ tattha, ahiṃsā cettha pakkhinaṃ.

    ༡༤༧.

    147.

    ‘‘ཨིདཾ སུཏྭཱན ནིགྒྷོསཾ, ཨཱགཏམྷ ཏཝནྟིཀེ།

    ‘‘Idaṃ sutvāna nigghosaṃ, āgatamha tavantike;

    ཏེ ཏེ བདྡྷསྨ པཱསེན, ཨེཏཾ ཏེ བྷཱསིཏཾ མུསཱ༎

    Te te baddhasma pāsena, etaṃ te bhāsitaṃ musā.

    ༡༤༨.

    148.

    ‘‘མུསཱཝཱདཾ པུརཀྑཏྭཱ, ཨིཙྪཱལོབྷཉྩ པཱཔཀཾ།

    ‘‘Musāvādaṃ purakkhatvā, icchālobhañca pāpakaṃ;

    ཨུབྷོསནྡྷིམཏིཀྐམྨ, ཨསཱཏཾ ཨུཔཔཛྫཏཱི’’ཏི༎

    Ubhosandhimatikkamma, asātaṃ upapajjatī’’ti.

    ཏཏྠ ཏནྟི ཏྭཾ། ཁེམནྟི ཨེཝཾནཱམིཀཾ པོཀྑརཎིཾ། གྷུཊྛནྟི ཙཏཱུསུ ཀཎྞེསུ ཋཏྭཱ གྷོསཱཔིཏཾ། དསདྷཱཏི ཨིམཱསུ དསདྷཱ ཋིཏཱསུ དིསཱསུ ཏཡཱ ཨབྷཡཾ གྷུཊྛཾ། ཨོགཡ྄ཧཱཏི ཨོགཱཧེཏྭཱ ཨཱགཏཱནཾ སནྟིཀཱ། པཧཱུཏཾ ཙཱདནནྟི པཧཱུཏཉྩ པདུམཔུཔྥསཱལིཨཱདིཀཾ ཨདནཾ། ཨིདཾ སུཏྭཱནཱཏི ཏེསཾ ཏཾ པོཀྑརཎིཾ ཨོགཱཧེཏྭཱ ཨཱགཏཱནཾ སནྟིཀཱ ཨིདཾ ཨབྷཡཾ སུཏྭཱ ཏཝནྟིཀེ ཏཝ སམཱིཔེ ཏཡཱ ཀཱརིཏཔོཀྑརཎིཾ ཨཱགཏཱམྷཱཏི ཨཏྠོ། ཏེ ཏེཏི ཏེ མཡཾ ཏཝ པཱསེན བདྡྷཱ། པུརཀྑཏྭཱཏི པུརཏོ ཀཏྭཱ ། ཨིཙྪཱལོབྷནྟི ཨིཙྪཱསངྑཱཏཾ པཱཔཀཾ ལོབྷཾ། ཨུབྷོསནྡྷིནྟི ཨུབྷཡཾ དེཝལོཀེ ཙ མནུསྶལོཀེ ཙ པཊིསནྡྷིཾ ཨིམེ པཱཔདྷམྨེ པུརཏོ ཀཏྭཱ ཙརནྟོ པུགྒལོ སུགཏིཔཊིསནྡྷིཾ ཨཏིཀྐམིཏྭཱ ཨསཱཏཾ ནིརཡཾ ཨུཔཔཛྫཏཱིཏི།

    Tattha tanti tvaṃ. Khemanti evaṃnāmikaṃ pokkharaṇiṃ. Ghuṭṭhanti catūsu kaṇṇesu ṭhatvā ghosāpitaṃ. Dasadhāti imāsu dasadhā ṭhitāsu disāsu tayā abhayaṃ ghuṭṭhaṃ. Ogayhāti ogāhetvā āgatānaṃ santikā. Pahūtaṃ cādananti pahūtañca padumapupphasāliādikaṃ adanaṃ. Idaṃ sutvānāti tesaṃ taṃ pokkharaṇiṃ ogāhetvā āgatānaṃ santikā idaṃ abhayaṃ sutvā tavantike tava samīpe tayā kāritapokkharaṇiṃ āgatāmhāti attho. Te teti te mayaṃ tava pāsena baddhā. Purakkhatvāti purato katvā . Icchālobhanti icchāsaṅkhātaṃ pāpakaṃ lobhaṃ. Ubhosandhinti ubhayaṃ devaloke ca manussaloke ca paṭisandhiṃ ime pāpadhamme purato katvā caranto puggalo sugatipaṭisandhiṃ atikkamitvā asātaṃ nirayaṃ upapajjatīti.

    ཨེཝཾ པརིསམཛ྄ཛྷེཡེཝ རཱཛཱནཾ ལཛྫཱཔེསི། ཨཐ ནཾ རཱཛཱ ‘‘ནཱཧཾ, སུམུཁ, ཏུམྷེ མཱརེཏྭཱ མཾསཾ ཁཱདིཏུཀཱམོ གཎྷཱཔེསིཾ, པཎྜིཏབྷཱཝཾ པན ཝོ སུཏྭཱ སུབྷཱསིཏཾ སོཏུཀཱམོ གཎྷཱཔེསི’’ནྟི པཀཱསེནྟོ ཨཱཧ –

    Evaṃ parisamajjheyeva rājānaṃ lajjāpesi. Atha naṃ rājā ‘‘nāhaṃ, sumukha, tumhe māretvā maṃsaṃ khāditukāmo gaṇhāpesiṃ, paṇḍitabhāvaṃ pana vo sutvā subhāsitaṃ sotukāmo gaṇhāpesi’’nti pakāsento āha –

    ༡༤༩.

    149.

    ‘‘ནཱཔརཛ྄ཛྷཱམ སུམུཁ, ནཔི ལོབྷཱཝ མགྒཧིཾ།

    ‘‘Nāparajjhāma sumukha, napi lobhāva maggahiṃ;

    སུཏཱ ཙ པཎྜིཏཱཏྱཏྠ, ནིཔུཎཱ ཨཏྠཙིནྟཀཱ༎

    Sutā ca paṇḍitātyattha, nipuṇā atthacintakā.

    ༡༥༠.

    150.

    ‘‘ཨཔྤེཝཏྠཝཏིཾ ཝཱཙཾ, བྱཱཧརེཡྻུཾ ཨིདྷཱགཏཱ།

    ‘‘Appevatthavatiṃ vācaṃ, byāhareyyuṃ idhāgatā;

    ཏཐཱ ཏཾ སམྨ ནེསཱདོ, ཝུཏྟོ སུམུཁ མགྒཧཱི’’ཏི༎

    Tathā taṃ samma nesādo, vutto sumukha maggahī’’ti.

    ཏཏྠ ནཱཔརཛ྄ཛྷཱམཱཏི མཱརེནྟོ ཨཔརཛ྄ཛྷཏི ནཱམ, མཡཾ ན མཱརེམ། ལོབྷཱཝ མགྒཧིནྟི མཾསཾ ཁཱདིཏུཀཱམོ ཧུཏྭཱ ལོབྷཱཝ ཏུམྷེ ནཱཧཾ ཨགྒཧིཾ། པཎྜིཏཱཏྱཏྠཱཏི པཎྜིཏཱཏི སུཏཱ ཨཏྠ། ཨཏྠཙིནྟཀཱཏི པཊིཙྪནྣཱནཾ ཨཏྠཱནཾ ཙིནྟཀཱ། ཨཏྠཝཏིནྟི ཀཱརཎནིསྶིཏཾ། ཏཐཱཏི ཏེན ཀཱརཎེན། ཝུཏྟོཏི མཡཱ ཝུཏྟོ ཧུཏྭཱ། སུམུཁ, མགྒཧཱིཏི, སུམུཁཱཏི ཨཱལཔཏི, མ-ཀཱརོ པདསནྡྷིཀརོ། ཨགྒཧཱིཏི དྷམྨཾ དེསེཏུཾ ཏུམྷེ གཎྷི།

    Tattha nāparajjhāmāti mārento aparajjhati nāma, mayaṃ na mārema. Lobhāva maggahinti maṃsaṃ khāditukāmo hutvā lobhāva tumhe nāhaṃ aggahiṃ. Paṇḍitātyatthāti paṇḍitāti sutā attha. Atthacintakāti paṭicchannānaṃ atthānaṃ cintakā. Atthavatinti kāraṇanissitaṃ. Tathāti tena kāraṇena. Vuttoti mayā vutto hutvā. Sumukha, maggahīti, sumukhāti ālapati, ma-kāro padasandhikaro. Aggahīti dhammaṃ desetuṃ tumhe gaṇhi.

    ཏཾ སུཏྭཱ སུམུཁོ ‘‘སུབྷཱསིཏཾ སོཏུཀཱམེན ཨཡུཏྟཾ ཏེ ཀཏཾ, མཧཱརཱཛཱ’’ཏི ཝཏྭཱ ཨཱཧ –

    Taṃ sutvā sumukho ‘‘subhāsitaṃ sotukāmena ayuttaṃ te kataṃ, mahārājā’’ti vatvā āha –

    ༡༥༡.

    151.

    ‘‘ནེཝ བྷཱིཏཱ ཀཱསིཔཏི, ཨུཔནཱིཏསྨིཾ ཛཱིཝིཏེ།

    ‘‘Neva bhītā kāsipati, upanītasmiṃ jīvite;

    བྷཱསེམཏྠཝཏིཾ ཝཱཙཾ, སམྤཏྟཱ ཀཱལཔརིཡཱཡཾ༎

    Bhāsematthavatiṃ vācaṃ, sampattā kālapariyāyaṃ.

    ༡༥༢.

    152.

    ‘‘ཡོ མིགེན མིགཾ ཧནྟི, པཀྑིཾ ཝཱ པན པཀྑིནཱ།

    ‘‘Yo migena migaṃ hanti, pakkhiṃ vā pana pakkhinā;

    སུཏེན ཝཱ སུཏཾ ཀིཎྱཱ, ཀིཾ ཨནརིཡཏརཾ ཏཏོ༎

    Sutena vā sutaṃ kiṇyā, kiṃ anariyataraṃ tato.

    ༡༥༣.

    153.

    ‘‘ཡོ ཙཱརིཡརུདཾ བྷཱསེ, ཨནརིཡདྷམྨཝསྶིཏོ།

    ‘‘Yo cāriyarudaṃ bhāse, anariyadhammavassito;

    ཨུབྷོ སོ དྷཾསཏེ ལོཀཱ, ཨིདྷ ཙེཝ པརཏྠ ཙ༎

    Ubho so dhaṃsate lokā, idha ceva parattha ca.

    ༡༥༤.

    154.

    ‘‘ན མཛྫེཐ ཡསཾ པཏྟོ, ན བྱཱདྷེ པཏྟསཾསཡཾ།

    ‘‘Na majjetha yasaṃ patto, na byādhe pattasaṃsayaṃ;

    ཝཱཡམེཐེཝ ཀིཙྩེསུ, སཾཝརེ ཝིཝརཱནི ཙ༎

    Vāyametheva kiccesu, saṃvare vivarāni ca.

    ༡༥༥.

    155.

    ‘‘ཡེ ཝུདྡྷཱ ཨབྦྷཏིཀྐནྟཱ, སམྤཏྟཱ ཀཱལཔརིཡཱཡཾ།

    ‘‘Ye vuddhā abbhatikkantā, sampattā kālapariyāyaṃ;

    ཨིདྷ དྷམྨཾ ཙརིཏྭཱན, ཨེཝཾཏེ ཏིདིཝཾ གཏཱ༎

    Idha dhammaṃ caritvāna, evaṃte tidivaṃ gatā.

    ༡༥༦.

    156.

    ‘‘ཨིདཾ སུཏྭཱ ཀཱསིཔཏི, དྷམྨམཏྟནི པཱལཡ།

    ‘‘Idaṃ sutvā kāsipati, dhammamattani pālaya;

    དྷཏརཊྛཉྩ མུཉྩཱཧི, ཧཾསཱནཾ པཝརུཏྟམ’’ནྟི༎

    Dhataraṭṭhañca muñcāhi, haṃsānaṃ pavaruttama’’nti.

    ཏཏྠ ཨུཔནཱིཏསྨིནྟི མརཎསནྟིཀཾ ཨུཔནཱིཏེ། ཀཱལཔརིཡཱཡནྟི མརཎཀཱལཝཱརཾ སམྤཏྟཱ སམཱནཱ ན བྷཱསིསྶཱམ། ན ཧི དྷམྨཀཐིཀཾ བནྡྷིཏྭཱ མརཎབྷཡེན ཏཛྫེཏྭཱ དྷམྨཾ སུཎནྟི, ཨཡུཏྟཾ ཏེ ཀཏནྟི། མིགེནཱཏི སུཊྛུ སིཀྑཱཔིཏེན དཱིཔཀམིགེན། ཧནྟཱིཏི ཧནཏི། པཀྑིནཱཏི དཱིཔཀཔཀྑིནཱ། སུཏེནཱཏི ཁེམཾ ནིབྦྷཡནྟི ཝིསྶུཏེན དཱིཔཀམིགཔཀྑིསདིསེན པདུམསརེན། སུཏནྟི ‘‘པཎྜིཏོ ཙིཏྲཀཐཱི’’ཏི ཨེཝཾ སུཏཾ དྷམྨཀཐིཀཾ། ཀིཎྱཱཏི ‘‘དྷམྨཾ སོསྶཱམཱི’’ཏི པཱསབནྡྷནེན ཡོ ཀིཎེཡྻ ཧིཾསེཡྻ བཱདྷེཡྻ། ཏཏོཏི ཏེསཾ ཀིརིཡཏོ ཨུཏྟརི ཨཉྙཾ ཨནརིཡཏརཾ ནཱམ ཀིམཏྠི།

    Tattha upanītasminti maraṇasantikaṃ upanīte. Kālapariyāyanti maraṇakālavāraṃ sampattā samānā na bhāsissāma. Na hi dhammakathikaṃ bandhitvā maraṇabhayena tajjetvā dhammaṃ suṇanti, ayuttaṃ te katanti. Migenāti suṭṭhu sikkhāpitena dīpakamigena. Hantīti hanati. Pakkhināti dīpakapakkhinā. Sutenāti khemaṃ nibbhayanti vissutena dīpakamigapakkhisadisena padumasarena. Sutanti ‘‘paṇḍito citrakathī’’ti evaṃ sutaṃ dhammakathikaṃ. Kiṇyāti ‘‘dhammaṃ sossāmī’’ti pāsabandhanena yo kiṇeyya hiṃseyya bādheyya. Tatoti tesaṃ kiriyato uttari aññaṃ anariyataraṃ nāma kimatthi.

    ཨརིཡརུདནྟི མུཁེན ཨརིཡཝཙནཾ སུནྡརཝཙནཾ བྷཱསཏི། ཨནརིཡདྷམྨཝསྶིཏོཏི ཀམྨེན ཨནརིཡདྷམྨཾ ཨཝསྶིཏོ། ཨུབྷོཏི དེཝལོཀཱ ཙ མནུསྶལོཀཱ ཙཱཏི ཨུབྷཡམྷཱ། ཨིདྷ ཙེཝཱཏི ཨིདྷ ཨུཔྤནྣོཔི པརཏྠ ཨུཔྤནྣོཔི ཨེཝརཱུཔོ དྭཱིཧི སུགཏིལོཀེཧི དྷཾསིཏྭཱ ནིརཡམེཝ ཨུཔཔཛྫཏི། པཏྟསཾསཡནྟི ཛཱིཝིཏསཾསཡམཱཔནྣམྤི དུཀྑཾ པཏྭཱ ན ཀིལམེཡྻ། སཾཝརེ ཝིཝརཱནི ཙཱཏི ཨཏྟནོ ཚིདྡཱནི དྭཱརཱནི སཾཝརེཡྻ པིདཧེཡྻ། ཝུདྡྷཱཏི གུཎཝུདྡྷཱ པཎྜིཏཱ། ཨབྦྷཏིཀྐནྟཱཏི ཨིམཾ མནུསྶལོཀཾ ཨཏིཀྐནྟཱ། ཀཱལཔརིཡཱཡནྟི མརཎཀཱལཔརིཡཱཡཾ པཏྟཱ ཧུཏྭཱ། ཨེཝཾཏེཏི ཨེཝཾ ཨེཏེ། ཨིདནྟི ཨིདཾ མཡཱ ཝུཏྟཾ ཨཏྠནིསྶིཏཾ ཝཙནཾ། དྷམྨནྟི པཝེཎིཡདྷམྨམྤི སུཙརིཏདྷམྨམྤི།

    Ariyarudanti mukhena ariyavacanaṃ sundaravacanaṃ bhāsati. Anariyadhammavassitoti kammena anariyadhammaṃ avassito. Ubhoti devalokā ca manussalokā cāti ubhayamhā. Idha cevāti idha uppannopi parattha uppannopi evarūpo dvīhi sugatilokehi dhaṃsitvā nirayameva upapajjati. Pattasaṃsayanti jīvitasaṃsayamāpannampi dukkhaṃ patvā na kilameyya. Saṃvare vivarāni cāti attano chiddāni dvārāni saṃvareyya pidaheyya. Vuddhāti guṇavuddhā paṇḍitā. Abbhatikkantāti imaṃ manussalokaṃ atikkantā. Kālapariyāyanti maraṇakālapariyāyaṃ pattā hutvā. Evaṃteti evaṃ ete. Idanti idaṃ mayā vuttaṃ atthanissitaṃ vacanaṃ. Dhammanti paveṇiyadhammampi sucaritadhammampi.

    ཏཾ སུཏྭཱ རཱཛཱ ཨཱཧ –

    Taṃ sutvā rājā āha –

    ༡༥༧.

    157.

    ‘‘ཨཱཧརནྟུདཀཾ པཛྫཾ, ཨཱསནཉྩ མཧཱརཧཾ།

    ‘‘Āharantudakaṃ pajjaṃ, āsanañca mahārahaṃ;

    པཉྫརཏོ པམོཀྑཱམི, དྷཏརཊྛཾ ཡསསྶིནཾ༎

    Pañjarato pamokkhāmi, dhataraṭṭhaṃ yasassinaṃ.

    ༡༥༨.

    158.

    ‘‘ཏཉྩ སེནཱཔཏིཾ དྷཱིརཾ, ནིཔུཎཾ ཨཏྠཙིནྟཀཾ།

    ‘‘Tañca senāpatiṃ dhīraṃ, nipuṇaṃ atthacintakaṃ;

    ཡོ སུཁེ སུཁིཏོ རཉྙོ, དུཀྑིཏེ ཧོཏི དུཀྑིཏོ༎

    Yo sukhe sukhito rañño, dukkhite hoti dukkhito.

    ༡༥༩.

    159.

    ‘‘ཨེདིསོ ཁོ ཨརཧཏི, པིཎྜམསྣཱཏུ བྷཏྟུནོ།

    ‘‘Ediso kho arahati, piṇḍamasnātu bhattuno;

    ཡཐཱཡཾ སུམུཁོ རཉྙོ, པཱཎསཱདྷཱརཎོ སཁཱ’’ཏི༎

    Yathāyaṃ sumukho rañño, pāṇasādhāraṇo sakhā’’ti.

    ཏཏྠ ཨུདཀནྟི པཱདདྷོཝནཾ། པཛྫནྟི པཱདབྦྷཉྫནཾ། སུཁེཏི སུཁམྷི སཏི།

    Tattha udakanti pādadhovanaṃ. Pajjanti pādabbhañjanaṃ. Sukheti sukhamhi sati.

    རཉྙོ ཝཙནཾ སུཏྭཱ ཏེསཾ ཨཱསནཱནི ཨཱཧརིཏྭཱ ཏཏྠ ནིསིནྣཱནཾ གནྡྷོདཀེན པཱདེ དྷོཝིཏྭཱ སཏཔཱཀེན ཏེལེན ཨབྦྷཉྫིཾསུ། ཏམཏྠཾ པཀཱསེནྟོ སཏྠཱ ཨཱཧ –

    Rañño vacanaṃ sutvā tesaṃ āsanāni āharitvā tattha nisinnānaṃ gandhodakena pāde dhovitvā satapākena telena abbhañjiṃsu. Tamatthaṃ pakāsento satthā āha –

    ༡༦༠.

    160.

    ‘‘པཱིཋཉྩ སབྦསོཝཎྞཾ, ཨཊྛཔཱདཾ མནོརམཾ།

    ‘‘Pīṭhañca sabbasovaṇṇaṃ, aṭṭhapādaṃ manoramaṃ;

    མཊྛཾ ཀཱསིཀམཏྠནྣཾ, དྷཏརཊྛོ ཨུཔཱཝིསི༎

    Maṭṭhaṃ kāsikamatthannaṃ, dhataraṭṭho upāvisi.

    ༡༦༡.

    161.

    ‘‘ཀོཙྪཉྩ སབྦསོཝཎྞཾ, ཝེཡྻགྒྷཔརིསིབྦིཏཾ།

    ‘‘Kocchañca sabbasovaṇṇaṃ, veyyagghaparisibbitaṃ;

    སུམུཁོ ཨཛ྄ཛྷུཔཱཝེཀྑི, དྷཏརཊྛསྶནནྟརཱ༎

    Sumukho ajjhupāvekkhi, dhataraṭṭhassanantarā.

    ༡༦༢.

    162.

    ‘‘ཏེསཾ ཀཉྩནཔཏྟཧི, པུཐཱུ ཨཱདཱཡ ཀཱསིཡོ།

    ‘‘Tesaṃ kañcanapattahi, puthū ādāya kāsiyo;

    ཧཾསཱནཾ ཨབྷིཧཱརེསུ, ཨགྒརཉྙོ པཝཱསིཏ’’ནྟི༎

    Haṃsānaṃ abhihāresu, aggarañño pavāsita’’nti.

    ཏཏྠ མཊྛནྟི ཀརཎཔརིནིཊྛིཏཾ། ཀཱསིཀམཏྠནྣནྟི ཀཱསིཀཝཏྠེན ཨཏྠཏཾ། ཀོཙྪནྟི མཛ྄ཛྷེ སཾཁིཏྟཾ། ཝེཡྻགྒྷཔརིསིབྦིཏནྟི བྱགྒྷཙམྨཔརིསིབྦིཏཾ མངྒལདིཝསེ ཨགྒམཧེསིཡཱ ནིསིནྣཔཱིཋཾ། ཀཉྩནཔཏྟེཧཱིཏི སུཝཎྞབྷཱཛནེཧི། པུཐཱུཏི བཧཱུ ཛནཱ། ཀཱསིཡོཏི ཀཱསིརཊྛཝཱསིནོ། ཨབྷིཧཱརེསུནྟི ཨུཔནཱམེསུཾ། ཨགྒརཉྙོ པཝཱསིཏནྟི ཨཊྛསཏཔལསུཝཎྞཔཱཏིཔརིཀྑིཏྟཾ ཧཾསརཉྙོ པཎྞཱཀཱརཏྠཱཡ ཀཱསིརཉྙཱ པེསིཏཾ ནཱནགྒརསབྷོཛནཾ།

    Tattha maṭṭhanti karaṇapariniṭṭhitaṃ. Kāsikamatthannanti kāsikavatthena atthataṃ. Kocchanti majjhe saṃkhittaṃ. Veyyagghaparisibbitanti byagghacammaparisibbitaṃ maṅgaladivase aggamahesiyā nisinnapīṭhaṃ. Kañcanapattehīti suvaṇṇabhājanehi. Puthūti bahū janā. Kāsiyoti kāsiraṭṭhavāsino. Abhihāresunti upanāmesuṃ. Aggarañño pavāsitanti aṭṭhasatapalasuvaṇṇapātiparikkhittaṃ haṃsarañño paṇṇākāratthāya kāsiraññā pesitaṃ nānaggarasabhojanaṃ.

    ཨེཝཾ ཨུཔནཱིཏེ པན ཏསྨིཾ ཀཱསིརཱཛཱ ཏེསཾ སམྤགྒཧཏྠཾ སཡཾ སུཝཎྞཔཱཏིཾ གཧེཏྭཱ ཨུཔནཱམེསི། ཏེ ཏཏོ མདྷུལཱཛེ ཁཱདིཏྭཱ མདྷུརོདཀཉྩ པིཝིཾསུ། ཨཐ མཧཱསཏྟོ རཉྙོ ཨབྷིཧཱརཉྩ པསཱདཉྩ དིསྭཱ པཊིསནྠཱརམཀཱསི། ཏམཏྠཾ པཀཱསེནྟོ སཏྠཱ ཨཱཧ –

    Evaṃ upanīte pana tasmiṃ kāsirājā tesaṃ sampaggahatthaṃ sayaṃ suvaṇṇapātiṃ gahetvā upanāmesi. Te tato madhulāje khāditvā madhurodakañca piviṃsu. Atha mahāsatto rañño abhihārañca pasādañca disvā paṭisanthāramakāsi. Tamatthaṃ pakāsento satthā āha –

    ༡༦༣.

    163.

    ‘‘དིསྭཱ ཨབྷིཧཊཾ ཨགྒཾ, ཀཱསིརཱཛེན པེསིཏཾ།

    ‘‘Disvā abhihaṭaṃ aggaṃ, kāsirājena pesitaṃ;

    ཀུསལོ ཁཏྟདྷམྨཱནཾ, ཏཏོ པུཙྪི ཨནནྟརཱ༎

    Kusalo khattadhammānaṃ, tato pucchi anantarā.

    ༡༦༤.

    164.

    ‘‘ཀཙྩིནྣུ བྷོཏོ ཀུསལཾ, ཀཙྩི བྷོཏོ ཨནཱམཡཾ།

    ‘‘Kaccinnu bhoto kusalaṃ, kacci bhoto anāmayaṃ;

    ཀཙྩི རཊྛམིདཾ ཕཱིཏཾ, དྷམྨེན མནུསཱསསི༎

    Kacci raṭṭhamidaṃ phītaṃ, dhammena manusāsasi.

    ༡༦༥.

    165.

    ‘‘ཀུསལཉྩེཝ མེ ཧཾས, ཨཐོ ཧཾས ཨནཱམཡཾ།

    ‘‘Kusalañceva me haṃsa, atho haṃsa anāmayaṃ;

    ཨཐོ རཊྛམིདཾ ཕཱིཏཾ, དྷམྨེན མནུསཱསཧཾ༎

    Atho raṭṭhamidaṃ phītaṃ, dhammena manusāsahaṃ.

    ༡༦༦.

    166.

    ‘‘ཀཙྩི བྷོཏོ ཨམཙྩེསུ, དོསོ ཀོཙི ན ཝིཛྫཏི།

    ‘‘Kacci bhoto amaccesu, doso koci na vijjati;

    ཀཙྩི ཙ ཏེ ཏཝཏྠེསུ, ནཱཝཀངྑནྟི ཛཱིཝིཏཾ༎

    Kacci ca te tavatthesu, nāvakaṅkhanti jīvitaṃ.

    ༡༦༧.

    167.

    ‘‘ཨཐོཔི མེ ཨམཙྩེསུ, དོསོ ཀོཙི ན ཝིཛྫཏི།

    ‘‘Athopi me amaccesu, doso koci na vijjati;

    ཨཐོཔི ཏེ མམཏྠེསུ, ནཱཝཀངྑནྟི ཛཱིཝིཏཾ༎

    Athopi te mamatthesu, nāvakaṅkhanti jīvitaṃ.

    ༡༦༨.

    168.

    ‘‘ཀཙྩི ཏེ སཱདིསཱི བྷརིཡཱ, ཨསྶཝཱ པིཡབྷཱཎིནཱི།

    ‘‘Kacci te sādisī bhariyā, assavā piyabhāṇinī;

    པུཏྟརཱུཔཡསཱུཔེཏཱ, ཏཝ ཚནྡཝསཱནུགཱ༎

    Puttarūpayasūpetā, tava chandavasānugā.

    ༡༦༩.

    169.

    ‘‘ཨཐོ མེ སཱདིསཱི བྷརིཡཱ, ཨསྶཝཱ པིཡབྷཱཎིནཱི།

    ‘‘Atho me sādisī bhariyā, assavā piyabhāṇinī;

    པུཏྟརཱུཔཡསཱུཔེཏཱ, མམ ཚནྡཝསཱནུགཱ༎

    Puttarūpayasūpetā, mama chandavasānugā.

    ༡༧༠.

    170.

    ‘‘ཀཙྩི རཊྛཾ ཨནུཔྤཱིལ༹ཾ, ཨཀུཏོཙིཨུཔདྡཝཾ།

    ‘‘Kacci raṭṭhaṃ anuppīḷaṃ, akutociupaddavaṃ;

    ཨསཱཧསེན དྷམྨེན, སམེན མནུསཱསསི༎

    Asāhasena dhammena, samena manusāsasi.

    ༡༧༡.

    171.

    ‘‘ཨཐོ རཊྛཾ ཨནུཔྤཱིལ༹ཾ, ཨཀུཏོཙིཨུཔདྡཝཾ།

    ‘‘Atho raṭṭhaṃ anuppīḷaṃ, akutociupaddavaṃ;

    ཨསཱཧསེན དྷམྨེན, སམེན མནུསཱསཧཾ༎

    Asāhasena dhammena, samena manusāsahaṃ.

    ༡༧༢.

    172.

    ‘‘ཀཙྩི སནྟོ ཨཔཙིཏཱ, ཨསནྟོ པརིཝཛྫིཏཱ།

    ‘‘Kacci santo apacitā, asanto parivajjitā;

    ནོ ཙེ དྷམྨཾ ནིརཾཀཏྭཱ, ཨདྷམྨམནུཝཏྟསི༎

    No ce dhammaṃ niraṃkatvā, adhammamanuvattasi.

    ༡༧༣.

    173.

    ‘‘སནྟོ ཙ མེ ཨཔཙིཏཱ, ཨསནྟོ པརིཝཛྫིཏཱ།

    ‘‘Santo ca me apacitā, asanto parivajjitā;

    དྷམྨམེཝཱནུཝཏྟཱམི, ཨདྷམྨོ མེ ནིརཾཀཏོ༎

    Dhammamevānuvattāmi, adhammo me niraṃkato.

    ༡༧༤.

    174.

    ‘‘ཀཙྩི ནཱནཱགཏཾ དཱིགྷཾ, སམཝེཀྑསི ཁཏྟིཡ།

    ‘‘Kacci nānāgataṃ dīghaṃ, samavekkhasi khattiya;

    ཀཙྩིམཏྟོ མདནཱིཡེ, པརལོཀཾ ན སནྟསི༎

    Kaccimatto madanīye, paralokaṃ na santasi.

    ༡༧༥.

    175.

    ‘‘ནཱཧཾ ཨནཱགཏཾ དཱིགྷཾ, སམཝེཀྑཱམི པཀྑིམ།

    ‘‘Nāhaṃ anāgataṃ dīghaṃ, samavekkhāmi pakkhima;

    ཋིཏོ དསསུ དྷམྨེསུ, པརལོཀཾ ན སནྟསེ༎

    Ṭhito dasasu dhammesu, paralokaṃ na santase.

    ༡༧༦.

    176.

    ‘‘དཱནཾ སཱིལཾ པརིཙྩཱགཾ, ཨཛྫཝཾ མདྡཝཾ ཏཔཾ།

    ‘‘Dānaṃ sīlaṃ pariccāgaṃ, ajjavaṃ maddavaṃ tapaṃ;

    ཨཀྐོདྷཾ ཨཝིཧིཾསཉྩ, ཁནྟིཉྩ ཨཝིརོདྷནཾ༎

    Akkodhaṃ avihiṃsañca, khantiñca avirodhanaṃ.

    ༡༧༧.

    177.

    ‘‘ཨིཙྩེཏེ ཀུསལེ དྷམྨེ, ཋིཏེ པསྶཱམི ཨཏྟནི།

    ‘‘Iccete kusale dhamme, ṭhite passāmi attani;

    ཏཏོ མེ ཛཱཡཏེ པཱིཏི, སཱམནསྶཉྩནཔྤཀཾ༎

    Tato me jāyate pīti, sāmanassañcanappakaṃ.

    ༡༧༨.

    178.

    ‘‘སུམུཁོ ཙ ཨཙིནྟེཏྭཱ, ཝིསཛྫི ཕརུསཾ གིརཾ།

    ‘‘Sumukho ca acintetvā, visajji pharusaṃ giraṃ;

    བྷཱཝདོསམནཉྙཱཡ, ཨསྨཱཀཱཡཾ ཝིཧངྒམོ༎

    Bhāvadosamanaññāya, asmākāyaṃ vihaṅgamo.

    ༡༧༩.

    179.

    ‘‘སོ ཀུདྡྷོ ཕརུསཾ ཝཱཙཾ, ནིཙྪཱརེསི ཨཡོནིསོ།

    ‘‘So kuddho pharusaṃ vācaṃ, nicchāresi ayoniso;

    ཡཱནསྨེསུ ན ཝིཛྫནྟི, ནཡིདཾ པཉྙཝཏཱམིཝཱ’’ཏི༎

    Yānasmesu na vijjanti, nayidaṃ paññavatāmivā’’ti.

    ཏཏྠ དིསྭཱཏི ཏཾ བཧུཾ ཨགྒཔཱནབྷོཛནཾ དིསྭཱ། པེསིཏནྟི ཨཱཧརཱཔེཏྭཱ ཨུཔནཱིཏཾ། ཁཏྟདྷམྨཱནནྟི པཋམཀཱརཎེསུ པཊིསནྠཱརདྷམྨཱནཾ། ཏཏོ པུཙྪི ཨནནྟརཱཏི ཏསྨིཾ ཀཱལེ ‘‘ཀཙྩི ནུ, བྷོཏོ’’ཏི ཨནུཔཊིཔཱཊིཡཱ པུཙྪི། ཏཱ པནེཏཱ ཚ གཱཐཱ ཧེཊྛཱ ཝུཏྟཏྠཱཡེཝ། ཨནུཔྤཱིལ༹ནྟི ཀཙྩི རཊྛཝཱསིནོ ཡནྟེ ཨུཙྪུཾ ཝིཡ ན པཱིལེ༹སཱིཏི པུཙྪཏི། ཨཀུཏོཙིཨུཔདྡཝནྟི ཀུཏོཙི ཨནུཔདྡཝཾ། དྷམྨེན སམེན མནུསཱསསཱིཏི ཀཙྩི ཏཝ རཊྛཾ དྷམྨེན སམེན ཨནུསཱསསི། སནྟོཏི སཱིལཱདིགུཎསཾཡུཏྟཱ སཔྤུརིསཱ། ནིརཾཀཏྭཱཏི ཚཌྜེཏྭཱ། ནཱནཱགཏཾ དཱིགྷནྟི ཨནཱགཏཾ ཨཏྟནོ ཛཱིཝིཏཔཝཏྟིཾ ‘‘ཀཙྩི དཱིགྷ’’ནྟི ན སམཝེཀྑསི, ཨཱཡུསངྑཱརཱནཾ པརིཏྟབྷཱཝཾ ཛཱནཱསཱིཏི པུཙྪཏི། མདནཱིཡེཏི མདཱརཧེ རཱུཔཱདིཨཱརམྨཎེ། ན སནྟསཱིཏི ན བྷཱཡསི། ཨིདཾ ཝུཏྟཾ ཧོཏི – ཀཙྩི རཱུཔཱདཱིསུ ཀཱམགུཎེསུ ཨམཏྟོ ཨཔྤམཏྟོ ཧུཏྭཱ དཱནཱདཱིནཾ ཀུསལཱནཾ ཀཏཏྟཱ པརལོཀཾ ན བྷཱཡསཱིཏི།

    Tattha disvāti taṃ bahuṃ aggapānabhojanaṃ disvā. Pesitanti āharāpetvā upanītaṃ. Khattadhammānanti paṭhamakāraṇesu paṭisanthāradhammānaṃ. Tato pucchi anantarāti tasmiṃ kāle ‘‘kacci nu, bhoto’’ti anupaṭipāṭiyā pucchi. Tā panetā cha gāthā heṭṭhā vuttatthāyeva. Anuppīḷanti kacci raṭṭhavāsino yante ucchuṃ viya na pīḷesīti pucchati. Akutociupaddavanti kutoci anupaddavaṃ. Dhammena samena manusāsasīti kacci tava raṭṭhaṃ dhammena samena anusāsasi. Santoti sīlādiguṇasaṃyuttā sappurisā. Niraṃkatvāti chaḍḍetvā. Nānāgataṃ dīghanti anāgataṃ attano jīvitapavattiṃ ‘‘kacci dīgha’’nti na samavekkhasi, āyusaṅkhārānaṃ parittabhāvaṃ jānāsīti pucchati. Madanīyeti madārahe rūpādiārammaṇe. Na santasīti na bhāyasi. Idaṃ vuttaṃ hoti – kacci rūpādīsu kāmaguṇesu amatto appamatto hutvā dānādīnaṃ kusalānaṃ katattā paralokaṃ na bhāyasīti.

    དསསཱུཏི དསསུ རཱཛདྷམྨེསུ། དཱནཱདཱིསུ དསཝཏྠུཀཱ ཙེཏནཱ དཱནཾ, པཉྩསཱིལདསསཱིལཱནི སཱིལཾ , དེཡྻདྷམྨཙཱགོ པརིཙྩཱགོ, ཨུཛུབྷཱཝོ ཨཛྫཝཾ, མུདུབྷཱཝོ མདྡཝཾ, ཨུཔོསཐཀམྨཾ ཏཔོ, མེཏྟཱཔུབྦབྷཱགོ ཨཀྐོདྷོ, ཀརུཎཱཔུབྦབྷཱགོ ཨཝིཧིཾསཱ, ཨདྷིཝཱསནཱ ཁནྟི, ཨཝིརོདྷོ ཨཝིརོདྷནཾ། ཨཙིནྟེཏྭཱཏི མམ ཨིམཾ གུཎསམྤཏྟིཾ ཨཙིནྟེཏྭཱ། བྷཱཝདོསནྟི ཙིཏྟདོསཾ། ཨནཉྙཱཡཱཏི ཨཛཱནིཏྭཱ། ཨསྨཱཀཉྷི ཙིཏྟདོསོ ནཱམ ནཏྠི, ཡམེས ཛཱནེཡྻ, ཏཾ ཨཛཱནིཏྭཱཝ ཕརུསཾ ཀཀྑལ༹ཾ གིརཾ ཝིསྶཛྫེསི། ཨཡོནིསོཏི ཨནུཔཱཡེན། ཡཱནསྨེསཱུཏི ཡཱནི ཝཛྫཱནི ཨམྷེསུ ན ཝིཛྫནྟི, ཏཱནི ཝདཏི། ནཡིདནྟི ཏསྨཱསྶ ཨིདཾ ཝཙནཾ པཉྙཝཏཾ ཨིཝ ན ཧོཏི, ཏེནེས མམ ན པཎྜིཏོ ཝིཡ ཨུཔཊྛཱཏི།

    Dasasūti dasasu rājadhammesu. Dānādīsu dasavatthukā cetanā dānaṃ, pañcasīladasasīlāni sīlaṃ, deyyadhammacāgo pariccāgo, ujubhāvo ajjavaṃ, mudubhāvo maddavaṃ, uposathakammaṃ tapo, mettāpubbabhāgo akkodho, karuṇāpubbabhāgo avihiṃsā, adhivāsanā khanti, avirodho avirodhanaṃ. Acintetvāti mama imaṃ guṇasampattiṃ acintetvā. Bhāvadosanti cittadosaṃ. Anaññāyāti ajānitvā. Asmākañhi cittadoso nāma natthi, yamesa jāneyya, taṃ ajānitvāva pharusaṃ kakkhaḷaṃ giraṃ vissajjesi. Ayonisoti anupāyena. Yānasmesūti yāni vajjāni amhesu na vijjanti, tāni vadati. Nayidanti tasmāssa idaṃ vacanaṃ paññavataṃ iva na hoti, tenesa mama na paṇḍito viya upaṭṭhāti.

    ཏཾ སུཏྭཱ སུམུཁོ ‘‘མཡཱ གུཎསམྤནྣོཝ རཱཛཱ ཨཔསཱདིཏོ, སོ མེ ཀུདྡྷོ, ཁམཱཔེསྶཱམི ན’’ནྟི ཙིནྟེཏྭཱ ཨཱཧ –

    Taṃ sutvā sumukho ‘‘mayā guṇasampannova rājā apasādito, so me kuddho, khamāpessāmi na’’nti cintetvā āha –

    ༡༨༠.

    180.

    ‘‘ཨཏྠི མེ ཏཾ ཨཏིསཱརཾ, ཝེགེན མནུཛཱདྷིཔ།

    ‘‘Atthi me taṃ atisāraṃ, vegena manujādhipa;

    དྷཏརཊྛེ ཙ བདྡྷསྨིཾ, དུཀྑཾ མེ ཝིཔུལཾ ཨཧུ༎

    Dhataraṭṭhe ca baddhasmiṃ, dukkhaṃ me vipulaṃ ahu.

    ༡༨༡.

    181.

    ‘‘ཏྭཾ ནོ པིཏཱཝ པུཏྟཱནཾ, བྷཱུཏཱནཾ དྷརཎཱིརིཝ།

    ‘‘Tvaṃ no pitāva puttānaṃ, bhūtānaṃ dharaṇīriva;

    ཨསྨཱཀཾ ཨདྷིཔནྣཱནཾ, ཁམསྶུ རཱཛཀུཉྫརཱ’’ཏི༎

    Asmākaṃ adhipannānaṃ, khamassu rājakuñjarā’’ti.

    ཏཏྠ ཨཏིསཱརནྟི པཀྑལིཏཾ། ཝེགེནཱཏི ཨཧཾ ཨེཏཾ ཀཐཾ ཀཐེནྟོ ཝེགེན སཧསཱ ཀཐེསིཾ། དུཀྑནྟི ཙེཏསིཀཾ དུཀྑཾ མམ ཝིཔུལཾ ཨཧོསི, ཏསྨཱ ཀོདྷཝསེན ཡཾ མཡཱ ཝུཏྟཾ, ཏཾ མེ ཁམཐ, མཧཱརཱཛཱཏི། པུཏྟཱནནྟི ཏྭཾ ཨམྷཱཀཾ པུཏྟཱནཾ པིཏཱ ཝིཡ། དྷརཎཱིརིཝཱཏི པཱཎབྷཱུཏཱནཾ པཏིཊྛཱ པཐཝཱི ཝིཡ ཏྭཾ ཨམྷཱཀཾ ཨཝསྶཡོ། ཨདྷིཔནྣཱནནྟི དོསེན ཨཔརཱདྷེན ཨཛ྄ཛྷོཏྠཊཱནཾ ཁམསྶཱུཏི ཨིདཾ སོ ཨཱསནཱ ཨོརུཡ྄ཧ པཀྑེཧི ཨཉྫལིཾ ཀཏྭཱ ཨཱཧ།

    Tattha atisāranti pakkhalitaṃ. Vegenāti ahaṃ etaṃ kathaṃ kathento vegena sahasā kathesiṃ. Dukkhanti cetasikaṃ dukkhaṃ mama vipulaṃ ahosi, tasmā kodhavasena yaṃ mayā vuttaṃ, taṃ me khamatha, mahārājāti. Puttānanti tvaṃ amhākaṃ puttānaṃ pitā viya. Dharaṇīrivāti pāṇabhūtānaṃ patiṭṭhā pathavī viya tvaṃ amhākaṃ avassayo. Adhipannānanti dosena aparādhena ajjhotthaṭānaṃ khamassūti idaṃ so āsanā oruyha pakkhehi añjaliṃ katvā āha.

    ཨཐ ནཾ རཱཛཱ ཨཱལིངྒིཏྭཱ ཨཱདཱཡ སུཝཎྞཔཱིཋེ ནིསཱིདཱཔེཏྭཱ ཨཙྩཡདེསནཾ པཊིགྒཎྷནྟོ ཨཱཧ –

    Atha naṃ rājā āliṅgitvā ādāya suvaṇṇapīṭhe nisīdāpetvā accayadesanaṃ paṭiggaṇhanto āha –

    ༡༨༢.

    182.

    ‘‘ཨེཏཾ ཏེ ཨནུམོདཱམ, ཡཾ བྷཱཝཾ ན ནིགཱུཧསི།

    ‘‘Etaṃ te anumodāma, yaṃ bhāvaṃ na nigūhasi;

    ཁིལཾ པབྷིནྡསི པཀྑི, ཨུཛུཀོསི ཝིཧངྒམཱ’’ཏི༎

    Khilaṃ pabhindasi pakkhi, ujukosi vihaṅgamā’’ti.

    ཏཏྠ ཨནུམོདཱམཱཏི ཨེཏཾ ཏེ དོསཾ ཁམཱམ། ཡནྟི ཡསྨཱ ཏྭཾ ཨཏྟནོ ཙིཏྟཔཊིཙྪནྣབྷཱཝཾ ན ནིགཱུཧསི། ཁིལནྟི ཙིཏྟཁིལཾ ཙིཏྟཁཱཎུཀཾ།

    Tattha anumodāmāti etaṃ te dosaṃ khamāma. Yanti yasmā tvaṃ attano cittapaṭicchannabhāvaṃ na nigūhasi. Khilanti cittakhilaṃ cittakhāṇukaṃ.

    ཨིདཉྩ པན ཝཏྭཱ རཱཛཱ མཧཱསཏྟསྶ དྷམྨཀཐཱཡ སུམུཁསྶ ཙ ཨུཛུབྷཱཝེ པསཱིདིཏྭཱ ‘‘པསནྣེན ནཱམ པསནྣཱཀཱརོ ཀཱཏབྦོ’’ཏི ཨུབྷིནྣམྤི ཏེསཾ ཨཏྟནོ རཛྫསིརིཾ ནིཡྻཱདེནྟོ ཨཱཧ –

    Idañca pana vatvā rājā mahāsattassa dhammakathāya sumukhassa ca ujubhāve pasīditvā ‘‘pasannena nāma pasannākāro kātabbo’’ti ubhinnampi tesaṃ attano rajjasiriṃ niyyādento āha –

    ༡༨༣.

    183.

    ‘‘ཡཾ ཀིཉྩི རཏནཾ ཨཏྠི, ཀཱསིརཱཛནིཝེསནེ།

    ‘‘Yaṃ kiñci ratanaṃ atthi, kāsirājanivesane;

    རཛཏཾ ཛཱཏརཱུཔཉྩ, མུཏྟཱ ཝེལུ༹རིཡཱ བཧཱུ༎

    Rajataṃ jātarūpañca, muttā veḷuriyā bahū.

    ༡༨༤.

    184.

    ‘‘མཎཡོ སངྑམུཏྟཱ ཙ, ཝཏྠཀཾ ཧརིཙནྡནཾ།

    ‘‘Maṇayo saṅkhamuttā ca, vatthakaṃ haricandanaṃ;

    ཨཛིནཾ དནྟབྷཎྜཉྩ, ལོཧཾ ཀཱལཱ༹ཡསཾ བཧུཾ།

    Ajinaṃ dantabhaṇḍañca, lohaṃ kāḷāyasaṃ bahuṃ;

    ཨེཏཾ དདཱམི ཝོ ཝིཏྟཾ, ཨིསྶརཾ ཝིསྶཛཱམི ཝོ’’ཏི༎

    Etaṃ dadāmi vo vittaṃ, issaraṃ vissajāmi vo’’ti.

    ཏཏྠ མུཏྟཱཏི ཝིདྡྷཱཝིདྡྷམུཏྟཱ། མཎཡོཏི མཎིབྷཎྜཀཱནི། སངྑམུཏྟཱ ཙཱཏི དཀྑིཎཱཝཊྚསངྑརཏནཉྩ ཨཱམལཀཝཊྚམུཏྟརཏནཉྩ། ཝཏྠཀནྟི སུཁུམཀཱསིཀཝཏྠཱནི། ཨཛིནནྟི ཨཛིནམིགཙམྨཾ། ལོཧཾ ཀཱལཱ༹ཡསནྟི ཏམྦལོཧཉྩ ཀཱལ༹ལོཧཉྩ། ཨིསྶརནྟི ཀཉྩནམཱལེན སེཏཙྪཏྟེན སདྡྷིཾ དྭཱདསཡོཛནིཀེ བཱརཱཎསིནགརེ རཛྫཾ།

    Tattha muttāti viddhāviddhamuttā. Maṇayoti maṇibhaṇḍakāni. Saṅkhamuttā cāti dakkhiṇāvaṭṭasaṅkharatanañca āmalakavaṭṭamuttaratanañca. Vatthakanti sukhumakāsikavatthāni. Ajinanti ajinamigacammaṃ. Lohaṃ kāḷāyasanti tambalohañca kāḷalohañca. Issaranti kañcanamālena setacchattena saddhiṃ dvādasayojanike bārāṇasinagare rajjaṃ.

    ཨེཝཉྩ པན ཝཏྭཱ ཨུབྷོཔི ཏེ སེཏཙྪཏྟེན པཱུཛེཏྭཱ རཛྫཾ པཊིཙྪཱཔེསི། ཨཐ མཧཱསཏྟོ རཉྙཱ སདྡྷིཾ སལླཔནྟོ ཨཱཧ –

    Evañca pana vatvā ubhopi te setacchattena pūjetvā rajjaṃ paṭicchāpesi. Atha mahāsatto raññā saddhiṃ sallapanto āha –

    ༡༨༥.

    185.

    ‘‘ཨདྡྷཱ ཨཔཙིཏཱ ཏྱམྷཱ, སཀྐཏཱ ཙ རཐེསབྷ།

    ‘‘Addhā apacitā tyamhā, sakkatā ca rathesabha;

    དྷམྨེསུ ཝཏྟམཱནཱནཾ, ཏྭཾ ནོ ཨཱཙརིཡོ བྷཝ༎

    Dhammesu vattamānānaṃ, tvaṃ no ācariyo bhava.

    ༡༨༦.

    186.

    ‘‘ཨཱཙརིཡ མནུཉྙཱཏཱ, ཏཡཱ ཨནུམཏཱ མཡཾ།

    ‘‘Ācariya manuññātā, tayā anumatā mayaṃ;

    ཏཾ པདཀྑིཎཏོ ཀཏྭཱ, ཉཱཏིཾ པསྶེམུརིནྡམཱ’’ཏི༎

    Taṃ padakkhiṇato katvā, ñātiṃ passemurindamā’’ti.

    ཏཏྠ དྷམྨེསཱུཏི ཀུསལཀམྨཔཐདྷམྨེསུ། ཨཱཙརིཡོཏི ཏྭཾ ཨམྷེཧི བྱཏྟཏརོ, ཏསྨཱ ནོ ཨཱཙརིཡོ ཧོཏི, ཨཔིཙ དསནྣཾ རཱཛདྷམྨཱནཾ ཀཐིཏཏྟཱ སུམུཁསྶ དོསཾ དསྶེཏྭཱ ཨཙྩཡཔཊིགྒཧཎསྶ ཀཏཏྟཱཔི ཏྭཾ ཨམྷཱཀཾ ཨཱཙརིཡོཝ, ཏསྨཱ ཨིདཱནིཔི ནོ ཨཱཙཱརསིཀྑཱཔནེན ཨཱཙརིཡོ བྷཝཱཏི ཨཱཧ། པསྶེམུརིནྡམཱཏི པསྶེམུ ཨརིནྡམ།

    Tattha dhammesūti kusalakammapathadhammesu. Ācariyoti tvaṃ amhehi byattataro, tasmā no ācariyo hoti, apica dasannaṃ rājadhammānaṃ kathitattā sumukhassa dosaṃ dassetvā accayapaṭiggahaṇassa katattāpi tvaṃ amhākaṃ ācariyova, tasmā idānipi no ācārasikkhāpanena ācariyo bhavāti āha. Passemurindamāti passemu arindama.

    སོ ཏེསཾ གམནཾ ཨནུཛཱནི, བོདྷིསཏྟསྶཔི དྷམྨཾ ཀཐེནྟསྶེཝ ཨརུཎཾ ཨུཊྛཧི། ཏམཏྠཾ པཀཱསེནྟོ སཏྠཱ ཨཱཧ –

    So tesaṃ gamanaṃ anujāni, bodhisattassapi dhammaṃ kathentasseva aruṇaṃ uṭṭhahi. Tamatthaṃ pakāsento satthā āha –

    ༡༨༧.

    187.

    ‘‘སབྦརཏྟིཾ ཙིནྟཡིཏྭཱ, མནྟཡིཏྭཱ ཡཐཱཀཐཾ།

    ‘‘Sabbarattiṃ cintayitvā, mantayitvā yathākathaṃ;

    ཀཱསིརཱཛཱ ཨནུཉྙཱསི, ཧཾསཱནཾ པཝརུཏྟམ’’ནྟི༎

    Kāsirājā anuññāsi, haṃsānaṃ pavaruttama’’nti.

    ཏཏྠ ཡཐཱཀཐནྟི ཡཾཀིཉྩི ཨཏྠཾ ཏེཧི སདྡྷིཾ ཙིནྟེཏབྦཾ མནྟེཏབྦཉྩ, སབྦཾ ཏཾ ཙིནྟེཏྭཱ ཙ མནྟེཏྭཱ ཙཱཏི ཨཏྠོ། ཨནུཉྙཱསཱིཏི གཙྪཐཱཏི ཨནུཉྙཱསི།

    Tattha yathākathanti yaṃkiñci atthaṃ tehi saddhiṃ cintetabbaṃ mantetabbañca, sabbaṃ taṃ cintetvā ca mantetvā cāti attho. Anuññāsīti gacchathāti anuññāsi.

    ཨེཝཾ ཏེན ཨནུཉྙཱཏོ བོདྷིསཏྟོ རཱཛཱནཾ ‘‘ཨཔྤམཏྟོ དྷམྨེན རཛྫཾ ཀཱརེཧཱི’’ཏི ཨོཝདིཏྭཱ པཉྩསུ སཱིལེསུ པཏིཊྛཱཔེསི། རཱཛཱ ཏེསཾ ཀཉྩནབྷཱཛནེཧི མདྷུལཱཛཉྩ མདྷུརོདཀཉྩ ཨུཔནཱམེཏྭཱ ནིཊྛིཏཱཧཱརཀིཙྩེ གནྡྷམཱལཱདཱིཧི པཱུཛེཏྭཱ བོདྷིསཏྟཾ སུཝཎྞཙངྐོཊཀེན སཡཾ ཨུཀྑིཔི, ཁེམཱ དེཝཱི སུམུཁཾ ཨུཀྑིཔི། ཨཐ ནེ སཱིཧཔཉྫརཾ ཨུགྒྷཱཊེཏྭཱ སཱུརིཡུགྒམནཝེལཱཡ ‘‘གཙྪཐ སཱམིནོ’’ཏི ཝིསྶཛྫེསུཾ། ཏམཏྠཾ པཀཱསེནྟོ སཏྠཱ ཨཱཧ –

    Evaṃ tena anuññāto bodhisatto rājānaṃ ‘‘appamatto dhammena rajjaṃ kārehī’’ti ovaditvā pañcasu sīlesu patiṭṭhāpesi. Rājā tesaṃ kañcanabhājanehi madhulājañca madhurodakañca upanāmetvā niṭṭhitāhārakicce gandhamālādīhi pūjetvā bodhisattaṃ suvaṇṇacaṅkoṭakena sayaṃ ukkhipi, khemā devī sumukhaṃ ukkhipi. Atha ne sīhapañjaraṃ ugghāṭetvā sūriyuggamanavelāya ‘‘gacchatha sāmino’’ti vissajjesuṃ. Tamatthaṃ pakāsento satthā āha –

    ༡༨༨.

    188.

    ‘‘ཏཏོ རཏྱཱ ཝིཝསཱནེ, སཱུརིཡུགྒམནཾ པཏི།

    ‘‘Tato ratyā vivasāne, sūriyuggamanaṃ pati;

    པེཀྑཏོ ཀཱསིརཱཛསྶ, བྷཝནཱ ཏེ ཝིགཱཧིསུ’’ནྟི༎

    Pekkhato kāsirājassa, bhavanā te vigāhisu’’nti.

    ཏཏྠ ཝིགཱཧིསུནྟི ཨཱཀཱསཾ པཀྑནྡིཾསུ།

    Tattha vigāhisunti ākāsaṃ pakkhandiṃsu.

    ཏེསུ མཧཱསཏྟོ སུཝཎྞཙངྐོཊཀཏོ ཨུཔྤཏིཏྭཱ ཨཱཀཱསེ ཋཏྭཱ ‘‘མཱ ཙིནྡཡི, མཧཱརཱཛ, ཨཔྤམཏྟོ ཨམྷཱཀཾ ཨོཝཱདེ ཝཏྟེཡྻཱསཱི’’ཏི རཱཛཱནཾ སམསྶཱསེཏྭཱ སུམུཁཾ ཨཱདཱཡ ཙིཏྟཀཱུཊམེཝ གཏོ། ཏཱནིཔི ཁོ ནཝུཏི ཧཾསསཧསྶཱནི ཀཉྩནགུཧཏོ ནིཀྑམིཏྭཱ པབྦཏཏལེ ནིསིནྣཱནི ཏེ ཨཱགཙྪནྟེ དིསྭཱ པཙྩུགྒནྟྭཱ པརིཝཱརེསུཾ། ཏེ ཉཱཏིགཎཔརིཝུཏཱ ཙིཏྟཀཱུཊཏལཾ པཝིསིཾསུ། ཏམཏྠཾ པཀཱསེནྟོ སཏྠཱ ཨཱཧ –

    Tesu mahāsatto suvaṇṇacaṅkoṭakato uppatitvā ākāse ṭhatvā ‘‘mā cindayi, mahārāja, appamatto amhākaṃ ovāde vatteyyāsī’’ti rājānaṃ samassāsetvā sumukhaṃ ādāya cittakūṭameva gato. Tānipi kho navuti haṃsasahassāni kañcanaguhato nikkhamitvā pabbatatale nisinnāni te āgacchante disvā paccuggantvā parivāresuṃ. Te ñātigaṇaparivutā cittakūṭatalaṃ pavisiṃsu. Tamatthaṃ pakāsento satthā āha –

    ༡༨༩.

    189.

    ‘‘ཏེ ཨརོགེ ཨནུཔྤཏྟེ, དིསྭཱན པརམེ དིཛེ།

    ‘‘Te aroge anuppatte, disvāna parame dije;

    ཀེཀཱཏི མཀརུཾ ཧཾསཱ, པུཐུསདྡོ ཨཛཱཡཐ༎

    Kekāti makaruṃ haṃsā, puthusaddo ajāyatha.

    ༡༩༠.

    190.

    ‘‘ཏེ པཏཱིཏཱ པམུཏྟེན, བྷཏྟུནཱ བྷཏྟུགཱརཝཱ།

    ‘‘Te patītā pamuttena, bhattunā bhattugāravā;

    སམནྟཱ པརིཀིརིཾསུ, ཨཎྜཛཱ ལདྡྷཔཙྩཡཱ’’ཏི༎

    Samantā parikiriṃsu, aṇḍajā laddhapaccayā’’ti.

    ཨེཝཾ པརིཝཱརེཏྭཱ ཙ པན ཏེ ཧཾསཱ ‘‘ཀཐཾ མུཏྟོསི, མཧཱརཱཛཱ’’ཏི པུཙྪིཾསུ། མཧཱསཏྟོ སུམུཁཾ ནིསྶཱཡ མུཏྟབྷཱཝཾ སཾཡམརཱཛལུདྡཔུཏྟེཧི ཀཏཀམྨཉྩ ཀཐེསི། ཏཾ སུཏྭཱ ཏུཊྛཱ ཧཾསགཎཱ ‘‘སུམུཁོ སེནཱཔཏི ཙ རཱཛཱ ཙ ལུདྡཔུཏྟོ ཙ སུཁིཏཱ ནིདྡུཀྑཱ ཙིརཾ ཛཱིཝནྟཱུ’’ཏི ཨཱཧཾསུ། ཏམཏྠཾ པཀཱསེནྟོ སཏྠཱ ཨཱཧ –

    Evaṃ parivāretvā ca pana te haṃsā ‘‘kathaṃ muttosi, mahārājā’’ti pucchiṃsu. Mahāsatto sumukhaṃ nissāya muttabhāvaṃ saṃyamarājaluddaputtehi katakammañca kathesi. Taṃ sutvā tuṭṭhā haṃsagaṇā ‘‘sumukho senāpati ca rājā ca luddaputto ca sukhitā niddukkhā ciraṃ jīvantū’’ti āhaṃsu. Tamatthaṃ pakāsento satthā āha –

    ༡༩༡.

    191.

    ‘‘ཨེཝཾ མིཏྟཝཏཾ ཨཏྠཱ, སབྦེ ཧོནྟི པདཀྑིཎཱ།

    ‘‘Evaṃ mittavataṃ atthā, sabbe honti padakkhiṇā;

    ཧཾསཱ ཡཐཱ དྷཏརཊྛཱ, ཉཱཏིསངྒྷམུཔཱགམུ’’ནྟི༎

    Haṃsā yathā dhataraṭṭhā, ñātisaṅghamupāgamu’’nti.

    ཏཾ ཙཱུལ༹ཧཾསཛཱཏཀེ ཝུཏྟཏྠམེཝ།

    Taṃ cūḷahaṃsajātake vuttatthameva.

    སཏྠཱ ཨིམཾ དྷམྨདེསནཾ ཨཱཧརིཏྭཱ ‘‘ན, བྷིཀྑཝེ, ཨིདཱནེཝ, པུབྦེཔི ཨཱནནྡོ མམཏྠཱཡ ཨཏྟནོ ཛཱིཝིཏཾ པརིཙྩཛཱི’’ཏི ཝཏྭཱ ཛཱཏཀཾ སམོདྷཱནེསི ‘‘ཏདཱ ལུདྡཔུཏྟོ ཚནྣོ ཨཧོསི, ཁེམཱ དེཝཱི, ཁེམཱ བྷིཀྑུནཱི, རཱཛཱ སཱརིཔུཏྟོ, སུམུཁོ ཨཱནནྡོ, སེསཔརིསཱ བུདྡྷཔརིསཱ, དྷཏརཊྛཧཾསརཱཛཱ པན ཨཧམེཝ ཨཧོསི’’ནྟི།

    Satthā imaṃ dhammadesanaṃ āharitvā ‘‘na, bhikkhave, idāneva, pubbepi ānando mamatthāya attano jīvitaṃ pariccajī’’ti vatvā jātakaṃ samodhānesi ‘‘tadā luddaputto channo ahosi, khemā devī, khemā bhikkhunī, rājā sāriputto, sumukho ānando, sesaparisā buddhaparisā, dhataraṭṭhahaṃsarājā pana ahameva ahosi’’nti.

    མཧཱཧཾསཛཱཏཀཝཎྞནཱ དུཏིཡཱ།

    Mahāhaṃsajātakavaṇṇanā dutiyā.




    Next: [༥༣༥] ༣. སུདྷཱབྷོཛནཛཱཏཀཝཎྞནཱ • [535] 3. Sudhābhojanajātakavaṇṇanā




    Related texts:



    ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ཛཱཏཀཔཱལི༹ • Jātakapāḷi / ༥༣༤. མཧཱཧཾསཛཱཏཀཾ • 534. Mahāhaṃsajātakaṃ


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact