| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ • Majjhimanikāya |
༨. མཧཱཧཏྠིཔདོཔམསུཏྟཾ
8. Mahāhatthipadopamasuttaṃ
༣༠༠. ཨེཝཾ མེ སུཏཾ – ཨེཀཾ སམཡཾ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏཏྲ ཁོ ཨཱཡསྨཱ སཱརིཔུཏྟོ བྷིཀྑཱུ ཨཱམནྟེསི – ‘‘ཨཱཝུསོ བྷིཀྑཝེ’’ཏི། ‘‘ཨཱཝུསོ’’ཏི ཁོ ཏེ བྷིཀྑཱུ ཨཱཡསྨཏོ སཱརིཔུཏྟསྶ པཙྩསྶོསུཾ། ཨཱཡསྨཱ སཱརིཔུཏྟོ ཨེཏདཝོཙ – ‘‘སེཡྻཐཱཔི, ཨཱཝུསོ, ཡཱནི ཀཱནིཙི ཛངྒལཱནཾ པཱཎཱནཾ པདཛཱཏཱནི སབྦཱནི ཏཱནི ཧཏྠིཔདེ སམོདྷཱནཾ གཙྪནྟི, ཧཏྠིཔདཾ ཏེསཾ ཨགྒམཀྑཱཡཏི ཡདིདཾ མཧནྟཏྟེན; ཨེཝམེཝ ཁོ, ཨཱཝུསོ, ཡེ ཀེཙི ཀུསལཱ དྷམྨཱ སབྦེཏེ ཙཏཱུསུ ཨརིཡསཙྩེསུ སངྒཧཾ གཙྪནྟི། ཀཏམེསུ ཙཏཱུསུ? དུཀྑེ ཨརིཡསཙྩེ , དུཀྑསམུདཡེ ཨརིཡསཙྩེ, དུཀྑནིརོདྷེ ཨརིཡསཙྩེ, དུཀྑནིརོདྷགཱམིནིཡཱ པཊིཔདཱཡ ཨརིཡསཙྩེ’’།
300. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho āyasmā sāriputto bhikkhū āmantesi – ‘‘āvuso bhikkhave’’ti. ‘‘Āvuso’’ti kho te bhikkhū āyasmato sāriputtassa paccassosuṃ. Āyasmā sāriputto etadavoca – ‘‘seyyathāpi, āvuso, yāni kānici jaṅgalānaṃ pāṇānaṃ padajātāni sabbāni tāni hatthipade samodhānaṃ gacchanti, hatthipadaṃ tesaṃ aggamakkhāyati yadidaṃ mahantattena; evameva kho, āvuso, ye keci kusalā dhammā sabbete catūsu ariyasaccesu saṅgahaṃ gacchanti. Katamesu catūsu? Dukkhe ariyasacce , dukkhasamudaye ariyasacce, dukkhanirodhe ariyasacce, dukkhanirodhagāminiyā paṭipadāya ariyasacce’’.
༣༠༡. ‘‘ཀཏམཉྩཱཝུསོ, དུཀྑཾ ཨརིཡསཙྩཾ? ཛཱཏིཔི དུཀྑཱ, ཛརཱཔི དུཀྑཱ, མརཎམྤི དུཀྑཾ, སོཀཔརིདེཝདུཀྑདོམནསྶུཔཱཡཱསཱཔི དུཀྑཱ, ཡམྤིཙྪཾ ན ལབྷཏི ཏམྤི དུཀྑཾ; སཾཁིཏྟེན, པཉྩུཔཱདཱནཀྑནྡྷཱ དུཀྑཱ། ཀཏམེ ཙཱཝུསོ, པཉྩུཔཱདཱནཀྑནྡྷཱ? སེཡྻཐིདཾ – རཱུཔུཔཱདཱནཀྑནྡྷོ, ཝེདནུཔཱདཱནཀྑནྡྷོ, སཉྙུཔཱདཱནཀྑནྡྷོ, སངྑཱརུཔཱདཱནཀྑནྡྷོ, ཝིཉྙཱཎུཔཱདཱནཀྑནྡྷོ།
301. ‘‘Katamañcāvuso, dukkhaṃ ariyasaccaṃ? Jātipi dukkhā, jarāpi dukkhā, maraṇampi dukkhaṃ, sokaparidevadukkhadomanassupāyāsāpi dukkhā, yampicchaṃ na labhati tampi dukkhaṃ; saṃkhittena, pañcupādānakkhandhā dukkhā. Katame cāvuso, pañcupādānakkhandhā? Seyyathidaṃ – rūpupādānakkhandho, vedanupādānakkhandho, saññupādānakkhandho, saṅkhārupādānakkhandho, viññāṇupādānakkhandho.
‘‘ཀཏམོ ཙཱཝུསོ, རཱུཔུཔཱདཱནཀྑནྡྷོ? ཙཏྟཱརི ཙ མཧཱབྷཱུཏཱནི, ཙཏུནྣཉྩ མཧཱབྷཱུཏཱནཾ ཨུཔཱདཱཡ རཱུཔཾ།
‘‘Katamo cāvuso, rūpupādānakkhandho? Cattāri ca mahābhūtāni, catunnañca mahābhūtānaṃ upādāya rūpaṃ.
‘‘ཀཏམཱ ཙཱཝུསོ, ཙཏྟཱརོ མཧཱབྷཱུཏཱ? པཐཝཱིདྷཱཏུ, ཨཱཔོདྷཱཏུ , ཏེཛོདྷཱཏུ, ཝཱཡོདྷཱཏུ།
‘‘Katamā cāvuso, cattāro mahābhūtā? Pathavīdhātu, āpodhātu , tejodhātu, vāyodhātu.
༣༠༢. ‘‘ཀཏམཱ ཙཱཝུསོ, པཐཝཱིདྷཱཏུ? པཐཝཱིདྷཱཏུ སིཡཱ ཨཛ྄ཛྷཏྟིཀཱ, སིཡཱ བཱཧིརཱ། ཀཏམཱ ཙཱཝུསོ, ཨཛ྄ཛྷཏྟིཀཱ པཐཝཱིདྷཱཏུ? ཡཾ ཨཛ྄ཛྷཏྟཾ པཙྩཏྟཾ ཀཀྑལ༹ཾ ཁརིགཏཾ ཨུཔཱདིནྣཾ, སེཡྻཐིདཾ – ཀེསཱ ལོམཱ ནཁཱ དནྟཱ ཏཙོ མཾསཾ ནྷཱརུ ཨཊྛི ཨཊྛིམིཉྫཾ ཝཀྐཾ ཧདཡཾ ཡཀནཾ ཀིལོམཀཾ པིཧཀཾ པཔྥཱསཾ ཨནྟཾ ཨནྟགུཎཾ ཨུདརིཡཾ ཀརཱིསཾ, ཡཾ ཝཱ པནཉྙམྤི ཀིཉྩི ཨཛ྄ཛྷཏྟཾ པཙྩཏྟཾ ཀཀྑལ༹ཾ ཁརིགཏཾ ཨུཔཱདིནྣཾ། ཨཡཾ ཝུཙྩཏཱཝུསོ, ཨཛ྄ཛྷཏྟིཀཱ པཐཝཱིདྷཱཏུ། ཡཱ ཙེཝ ཁོ པན ཨཛ྄ཛྷཏྟིཀཱ པཐཝཱིདྷཱཏུ, ཡཱ ཙ བཱཧིརཱ པཐཝཱིདྷཱཏུ, པཐཝཱིདྷཱཏུརེཝེསཱ། ‘ཏཾ ནེཏཾ མམ, ནེསོཧམསྨི, ན མེསོ ཨཏྟཱ’ཏི – ཨེཝམེཏཾ ཡཐཱབྷཱུཏཾ སམྨཔྤཉྙཱཡ དཊྛབྦཾ། ཨེཝམེཏཾ ཡཐཱབྷཱུཏཾ སམྨཔྤཉྙཱཡ དིསྭཱ པཐཝཱིདྷཱཏུཡཱ ནིབྦིནྡཏི, པཐཝཱིདྷཱཏུཡཱ ཙིཏྟཾ ཝིརཱཛེཏི།
302. ‘‘Katamā cāvuso, pathavīdhātu? Pathavīdhātu siyā ajjhattikā, siyā bāhirā. Katamā cāvuso, ajjhattikā pathavīdhātu? Yaṃ ajjhattaṃ paccattaṃ kakkhaḷaṃ kharigataṃ upādinnaṃ, seyyathidaṃ – kesā lomā nakhā dantā taco maṃsaṃ nhāru aṭṭhi aṭṭhimiñjaṃ vakkaṃ hadayaṃ yakanaṃ kilomakaṃ pihakaṃ papphāsaṃ antaṃ antaguṇaṃ udariyaṃ karīsaṃ, yaṃ vā panaññampi kiñci ajjhattaṃ paccattaṃ kakkhaḷaṃ kharigataṃ upādinnaṃ. Ayaṃ vuccatāvuso, ajjhattikā pathavīdhātu. Yā ceva kho pana ajjhattikā pathavīdhātu, yā ca bāhirā pathavīdhātu, pathavīdhāturevesā. ‘Taṃ netaṃ mama, nesohamasmi, na meso attā’ti – evametaṃ yathābhūtaṃ sammappaññāya daṭṭhabbaṃ. Evametaṃ yathābhūtaṃ sammappaññāya disvā pathavīdhātuyā nibbindati, pathavīdhātuyā cittaṃ virājeti.
‘‘ཧོཏི ཁོ སོ, ཨཱཝུསོ, སམཡོ ཡཾ བཱཧིརཱ ཨཱཔོདྷཱཏུ པཀུཔྤཏི 1། ཨནྟརཧིཏཱ ཏསྨིཾ སམཡེ བཱཧིརཱ པཐཝཱིདྷཱཏུ ཧོཏི། ཏསྶཱ ཧི ནཱམ, ཨཱཝུསོ, བཱཧིརཱཡ པཐཝཱིདྷཱཏུཡཱ ཏཱཝ མཧལླིཀཱཡ ཨནིཙྩཏཱ པཉྙཱཡིསྶཏི, ཁཡདྷམྨཏཱ པཉྙཱཡིསྶཏི, ཝཡདྷམྨཏཱ པཉྙཱཡིསྶཏི, ཝིཔརིཎཱམདྷམྨཏཱ པཉྙཱཡིསྶཏི། ཀིཾ པནིམསྶ མཏྟཊྛཀསྶ ཀཱཡསྶ ཏཎྷུཔཱདིནྣསྶ ‘ཨཧནྟི ཝཱ མམནྟི ཝཱ ཨསྨཱི’ཏི ཝཱ? ཨཐ ཁྭཱསྶ ནོཏེཝེཏྠ ཧོཏི།
‘‘Hoti kho so, āvuso, samayo yaṃ bāhirā āpodhātu pakuppati 2. Antarahitā tasmiṃ samaye bāhirā pathavīdhātu hoti. Tassā hi nāma, āvuso, bāhirāya pathavīdhātuyā tāva mahallikāya aniccatā paññāyissati, khayadhammatā paññāyissati, vayadhammatā paññāyissati, vipariṇāmadhammatā paññāyissati. Kiṃ panimassa mattaṭṭhakassa kāyassa taṇhupādinnassa ‘ahanti vā mamanti vā asmī’ti vā? Atha khvāssa notevettha hoti.
‘‘ཏཉྩེ, ཨཱཝུསོ, བྷིཀྑུཾ པརེ ཨཀྐོསནྟི པརིབྷཱསནྟི རོསེནྟི ཝིཧེསེནྟི, སོ ཨེཝཾ པཛཱནཱཏི – ‘ཨུཔྤནྣཱ ཁོ མེ ཨཡཾ སོཏསམྥསྶཛཱ དུཀྑཝེདནཱ ། སཱ ཙ ཁོ པཊིཙྩ, ནོ ཨཔཊིཙྩ། ཀིཾ པཊིཙྩ? ཕསྶཾ པཊིཙྩ’། སོ 3 ཕསྶོ ཨནིཙྩོཏི པསྶཏི, ཝེདནཱ ཨནིཙྩཱཏི པསྶཏི, སཉྙཱ ཨནིཙྩཱཏི པསྶཏི, སངྑཱརཱ ཨནིཙྩཱཏི པསྶཏི, ཝིཉྙཱཎཾ ཨནིཙྩནྟི པསྶཏི། ཏསྶ དྷཱཏཱརམྨཎམེཝ ཙིཏྟཾ པཀྑནྡཏི པསཱིདཏི སནྟིཊྛཏི ཨདྷིམུཙྩཏི།
‘‘Tañce, āvuso, bhikkhuṃ pare akkosanti paribhāsanti rosenti vihesenti, so evaṃ pajānāti – ‘uppannā kho me ayaṃ sotasamphassajā dukkhavedanā . Sā ca kho paṭicca, no apaṭicca. Kiṃ paṭicca? Phassaṃ paṭicca’. So 4 phasso aniccoti passati, vedanā aniccāti passati, saññā aniccāti passati, saṅkhārā aniccāti passati, viññāṇaṃ aniccanti passati. Tassa dhātārammaṇameva cittaṃ pakkhandati pasīdati santiṭṭhati adhimuccati.
‘‘ཏཉྩེ, ཨཱཝུསོ, བྷིཀྑུཾ པརེ ཨནིཊྛེཧི ཨཀནྟེཧི ཨམནཱཔེཧི སམུདཱཙརནྟི – པཱཎིསམྥསྶེནཔི ལེཌྜུསམྥསྶེནཔི དཎྜསམྥསྶེནཔི སཏྠསམྥསྶེནཔི། སོ ཨེཝཾ པཛཱནཱཏི – ‘ཏཐཱབྷཱུཏོ ཁོ ཨཡཾ ཀཱཡོ ཡཐཱབྷཱུཏསྨིཾ ཀཱཡེ པཱཎིསམྥསྶཱཔི ཀམནྟི, ལེཌྜུསམྥསྶཱཔི ཀམནྟི, དཎྜསམྥསྶཱཔི ཀམནྟི, སཏྠསམྥསྶཱཔི ཀམནྟི། ཝུཏྟཾ ཁོ པནེཏཾ བྷགཝཏཱ ཀཀཙཱུཔམོཝཱདེ – ‘‘ཨུབྷཏོདཎྜཀེན ཙེཔི, བྷིཀྑཝེ, ཀཀཙེན ཙོརཱ ཨོཙརཀཱ ཨངྒམངྒཱནི ཨོཀནྟེཡྻུཾ, ཏཏྲཱཔི ཡོ མནོ པདཱུསེཡྻ ན མེ སོ ཏེན སཱསནཀརོ’’ཏི། ཨཱརདྡྷཾ ཁོ པན མེ ཝཱིརིཡཾ བྷཝིསྶཏི ཨསལླཱིནཾ, ཨུཔཊྛིཏཱ སཏི ཨསམྨུཊྛཱ, པསྶདྡྷོ ཀཱཡོ ཨསཱརདྡྷོ, སམཱཧིཏཾ ཙིཏྟཾ ཨེཀགྒཾ། ཀཱམཾ དཱནི ཨིམསྨིཾ ཀཱཡེ པཱཎིསམྥསྶཱཔི ཀམནྟུ, ལེཌྜུསམྥསྶཱཔི ཀམནྟུ, དཎྜསམྥསྶཱཔི ཀམནྟུ, སཏྠསམྥསྶཱཔི ཀམནྟུ, ཀརཱིཡཏི ཧིདཾ བུདྡྷཱནཾ སཱསན’ནྟི།
‘‘Tañce, āvuso, bhikkhuṃ pare aniṭṭhehi akantehi amanāpehi samudācaranti – pāṇisamphassenapi leḍḍusamphassenapi daṇḍasamphassenapi satthasamphassenapi. So evaṃ pajānāti – ‘tathābhūto kho ayaṃ kāyo yathābhūtasmiṃ kāye pāṇisamphassāpi kamanti, leḍḍusamphassāpi kamanti, daṇḍasamphassāpi kamanti, satthasamphassāpi kamanti. Vuttaṃ kho panetaṃ bhagavatā kakacūpamovāde – ‘‘ubhatodaṇḍakena cepi, bhikkhave, kakacena corā ocarakā aṅgamaṅgāni okanteyyuṃ, tatrāpi yo mano padūseyya na me so tena sāsanakaro’’ti. Āraddhaṃ kho pana me vīriyaṃ bhavissati asallīnaṃ, upaṭṭhitā sati asammuṭṭhā, passaddho kāyo asāraddho, samāhitaṃ cittaṃ ekaggaṃ. Kāmaṃ dāni imasmiṃ kāye pāṇisamphassāpi kamantu, leḍḍusamphassāpi kamantu, daṇḍasamphassāpi kamantu, satthasamphassāpi kamantu, karīyati hidaṃ buddhānaṃ sāsana’nti.
‘‘ཏསྶ ཙེ, ཨཱཝུསོ, བྷིཀྑུནོ ཨེཝཾ བུདྡྷཾ ཨནུསྶརཏོ ཨེཝཾ དྷམྨཾ ཨནུསྶརཏོ ཨེཝཾ སངྒྷཾ ཨནུསྶརཏོ ཨུཔེཀྑཱ ཀུསལནིསྶིཏཱ ན སཎྛཱཏི། སོ ཏེན སཾཝིཛྫཏི སཾཝེགཾ ཨཱཔཛྫཏི – ‘ཨལཱབྷཱ ཝཏ མེ, ན ཝཏ མེ ལཱབྷཱ, དུལླདྡྷཾ ཝཏ མེ, ན ཝཏ མེ སུལདྡྷཾ, ཡསྶ མེ ཨེཝཾ བུདྡྷཾ ཨནུསྶརཏོ, ཨེཝཾ དྷམྨཾ ཨནུསྶརཏོ, ཨེཝཾ སངྒྷཾ ཨནུསྶརཏོ, ཨུཔེཀྑཱ ཀུསལནིསྶིཏཱ ན སཎྛཱཏཱི’ཏི། སེཡྻཐཱཔི, ཨཱཝུསོ, སུཎིསཱ སསུརཾ དིསྭཱ སཾཝིཛྫཏི སཾཝེགཾ ཨཱཔཛྫཏི; ཨེཝམེཝ ཁོ, ཨཱཝུསོ, ཏསྶ ཙེ བྷིཀྑུནོ ཨེཝཾ བུདྡྷཾ ཨནུསྶརཏོ, ཨེཝཾ དྷམྨཾ ཨནུསྶརཏོ, ཨེཝཾ སངྒྷཾ ཨནུསྶརཏོ, ཨུཔེཀྑཱ ཀུསལནིསྶིཏཱ ན སཎྛཱཏི, སོ ཏེན སཾཝིཛྫཏི སཾཝེགཾ ཨཱཔཛྫཏི – ‘ཨལཱབྷཱ ཝཏ མེ ན ཝཏ མེ ལཱབྷཱ, དུལླདྡྷཾ ཝཏ མེ, ན ཝཏ མེ སུལདྡྷཾ, ཡསྶ མེ ཨེཝཾ བུདྡྷཾ ཨནུསྶརཏོ ཨེཝཾ དྷམྨཾ ཨནུསྶརཏོ, ཨེཝཾ སངྒྷཾ ཨནུསྶརཏོ, ཨུཔེཀྑཱ ཀུསལནིསྶིཏཱ ན སཎྛཱཏཱི’ཏི། ཏསྶ ཙེ, ཨཱཝུསོ, བྷིཀྑུནོ ཨེཝཾ བུདྡྷཾ ཨནུསྶརཏོ, ཨེཝཾ དྷམྨཾ ཨནུསྶརཏོ, ཨེཝཾ སངྒྷཾ ཨནུསྶརཏོ ཨུཔེཀྑཱ ཀུསལནིསྶིཏཱ སཎྛཱཏི, སོ ཏེན ཨཏྟམནོ ཧོཏི། ཨེཏྟཱཝཏཱཔི ཁོ, ཨཱཝུསོ, བྷིཀྑུནོ བཧུཀཏཾ ཧོཏི།
‘‘Tassa ce, āvuso, bhikkhuno evaṃ buddhaṃ anussarato evaṃ dhammaṃ anussarato evaṃ saṅghaṃ anussarato upekkhā kusalanissitā na saṇṭhāti. So tena saṃvijjati saṃvegaṃ āpajjati – ‘alābhā vata me, na vata me lābhā, dulladdhaṃ vata me, na vata me suladdhaṃ, yassa me evaṃ buddhaṃ anussarato, evaṃ dhammaṃ anussarato, evaṃ saṅghaṃ anussarato, upekkhā kusalanissitā na saṇṭhātī’ti. Seyyathāpi, āvuso, suṇisā sasuraṃ disvā saṃvijjati saṃvegaṃ āpajjati; evameva kho, āvuso, tassa ce bhikkhuno evaṃ buddhaṃ anussarato, evaṃ dhammaṃ anussarato, evaṃ saṅghaṃ anussarato, upekkhā kusalanissitā na saṇṭhāti, so tena saṃvijjati saṃvegaṃ āpajjati – ‘alābhā vata me na vata me lābhā, dulladdhaṃ vata me, na vata me suladdhaṃ, yassa me evaṃ buddhaṃ anussarato evaṃ dhammaṃ anussarato, evaṃ saṅghaṃ anussarato, upekkhā kusalanissitā na saṇṭhātī’ti. Tassa ce, āvuso, bhikkhuno evaṃ buddhaṃ anussarato, evaṃ dhammaṃ anussarato, evaṃ saṅghaṃ anussarato upekkhā kusalanissitā saṇṭhāti, so tena attamano hoti. Ettāvatāpi kho, āvuso, bhikkhuno bahukataṃ hoti.
༣༠༣. ‘‘ཀཏམཱ ཙཱཝུསོ, ཨཱཔོདྷཱཏུ? ཨཱཔོདྷཱཏུ སིཡཱ ཨཛ྄ཛྷཏྟིཀཱ, སིཡཱ བཱཧིརཱ། ཀཏམཱ ཙཱཝུསོ ཨཛ྄ཛྷཏྟིཀཱ ཨཱཔོདྷཱཏུ? ཡཾ ཨཛ྄ཛྷཏྟཾ པཙྩཏྟཾ ཨཱཔོ ཨཱཔོགཏཾ ཨུཔཱདིནྣཾ, སེཡྻཐིདཾ – པིཏྟཾ སེམྷཾ པུབྦོ ལོཧིཏཾ སེདོ མེདོ ཨསྶུ ཝསཱ ཁེལོ༹ སིངྒྷཱཎིཀཱ ལསིཀཱ མུཏྟཾ, ཡཾ ཝཱ པནཉྙམྤི ཀིཉྩི ཨཛ྄ཛྷཏྟཾ པཙྩཏྟཾ ཨཱཔོ ཨཱཔོགཏཾ ཨུཔཱདིནྣཾ – ཨཡཾ ཝུཙྩཏཱཝུསོ, ཨཛ྄ཛྷཏྟིཀཱ ཨཱཔོདྷཱཏུ། ཡཱ ཙེཝ ཁོ པན ཨཛ྄ཛྷཏྟིཀཱ ཨཱཔོདྷཱཏུ ཡཱ ཙ བཱཧིརཱ ཨཱཔོདྷཱཏུ, ཨཱཔོདྷཱཏུརེཝེསཱ། ‘ཏཾ ནེཏཾ མམ, ནེསོཧམསྨི, ན མེསོ ཨཏྟཱ’ཏི ཨེཝམེཏཾ ཡཐཱབྷཱུཏཾ སམྨཔྤཉྙཱཡ དཊྛབྦཾ། ཨེཝམེཏཾ ཡཐཱབྷཱུཏཾ སམྨཔྤཉྙཱཡ དིསྭཱ ཨཱཔོདྷཱཏུཡཱ ནིབྦིནྡཏི, ཨཱཔོདྷཱཏུཡཱ ཙིཏྟཾ ཝིརཱཛེཏི།
303. ‘‘Katamā cāvuso, āpodhātu? Āpodhātu siyā ajjhattikā, siyā bāhirā. Katamā cāvuso ajjhattikā āpodhātu? Yaṃ ajjhattaṃ paccattaṃ āpo āpogataṃ upādinnaṃ, seyyathidaṃ – pittaṃ semhaṃ pubbo lohitaṃ sedo medo assu vasā kheḷo siṅghāṇikā lasikā muttaṃ, yaṃ vā panaññampi kiñci ajjhattaṃ paccattaṃ āpo āpogataṃ upādinnaṃ – ayaṃ vuccatāvuso, ajjhattikā āpodhātu. Yā ceva kho pana ajjhattikā āpodhātu yā ca bāhirā āpodhātu, āpodhāturevesā. ‘Taṃ netaṃ mama, nesohamasmi, na meso attā’ti evametaṃ yathābhūtaṃ sammappaññāya daṭṭhabbaṃ. Evametaṃ yathābhūtaṃ sammappaññāya disvā āpodhātuyā nibbindati, āpodhātuyā cittaṃ virājeti.
‘‘ཧོཏི ཁོ སོ, ཨཱཝུསོ, སམཡོ ཡཾ བཱཧིརཱ ཨཱཔོདྷཱཏུ པཀུཔྤཏི། སཱ གཱམམྤི ཝཧཏི, ནིགམམྤི ཝཧཏི, ནགརམྤི ཝཧཏི, ཛནཔདམྤི ཝཧཏི, ཛནཔདཔདེསམྤི ཝཧཏི། ཧོཏི ཁོ སོ, ཨཱཝུསོ, སམཡོ ཡཾ མཧཱསམུདྡེ ཡོཛནསཏིཀཱནིཔི ཨུདཀཱནི ཨོགཙྪནྟི, དྭིཡོཛནསཏིཀཱནིཔི ཨུདཀཱནི ཨོགཙྪནྟི, ཏིཡོཛནསཏིཀཱནིཔི ཨུདཀཱནི ཨོགཙྪནྟི, ཙཏུཡོཛནསཏིཀཱནིཔི ཨུདཀཱནི ཨོགཙྪནྟི, པཉྩཡོཛནསཏིཀཱནིཔི ཨུདཀཱནི ཨོགཙྪནྟི, ཚཡོཛནསཏིཀཱནིཔི ཨུདཀཱནི ཨོགཙྪནྟི, སཏྟཡོཛནསཏིཀཱནིཔི ཨུདཀཱནི ཨོགཙྪནྟི། ཧོཏི ཁོ སོ, ཨཱཝུསོ, སམཡོ ཡཾ མཧཱསམུདྡེ སཏྟཏཱལམྤི ཨུདཀཾ སཎྛཱཏི, ཚཏྟཱལམྤི ཨུདཀཾ སཎྛཱཏི, པཉྩཏཱལམྤི ཨུདཀཾ སཎྛཱཏི, ཙཏུཏྟཱལམྤི ཨུདཀཾ སཎྛཱཏི, ཏིཏཱལམྤི ཨུདཀཾ སཎྛཱཏི, དྭིཏཱལམྤི ཨུདཀཾ སཎྛཱཏི, ཏཱལམཏྟམྤི 5 ཨུདཀཾ སཎྛཱཏི། ཧོཏི ཁོ སོ, ཨཱཝུསོ, སམཡོ ཡཾ མཧཱསམུདྡེ སཏྟཔོརིསམྤི ཨུདཀཾ སཎྛཱཏི, ཚཔྤོརིསམྤི ཨུདཀཾ སཎྛཱཏི, པཉྩཔོརིསམྤི ཨུདཀཾ སཎྛཱཏི, ཙཏུཔྤོརིསམྤི ཨུདཀཾ སཎྛཱཏི, ཏིཔོརིསམྤི ཨུདཀཾ སཎྛཱཏི, དྭིཔོརིསམྤི ཨུདཀཾ སཎྛཱཏི, པོརིསམཏྟམྤི 6 ཨུདཀཾ སཎྛཱཏི། ཧོཏི ཁོ སོ, ཨཱཝུསོ, སམཡོ ཡཾ མཧཱསམུདྡེ ཨཌྜྷཔོརིསམྤི ཨུདཀཾ སཎྛཱཏི, ཀཊིམཏྟམྤི ཨུདཀཾ སཎྛཱཏི, ཛཱཎུཀམཏྟམྤི ཨུདཀཾ སཎྛཱཏི, གོཔྥཀམཏྟམྤི ཨུདཀཾ སཎྛཱཏི། ཧོཏི ཁོ སོ, ཨཱཝུསོ, སམཡོ, ཡཾ མཧཱསམུདྡེ ཨངྒུལིཔབྦཏེམནམཏྟམྤི ཨུདཀཾ ན ཧོཏི། ཏསྶཱ ཧི ནཱམ, ཨཱཝུསོ, བཱཧིརཱཡ ཨཱཔོདྷཱཏུཡཱ ཏཱཝ མཧལླིཀཱཡ ཨནིཙྩཏཱ པཉྙཱཡིསྶཏི, ཁཡདྷམྨཏཱ པཉྙཱཡིསྶཏི, ཝཡདྷམྨཏཱ པཉྙཱཡིསྶཏི, ཝིཔརིཎཱམདྷམྨཏཱ པཉྙཱཡིསྶཏི། ཀིཾ པནིམསྶ མཏྟཊྛཀསྶ ཀཱཡསྶ ཏཎྷུཔཱདིནྣསྶ ‘ཨཧནྟི ཝཱ མམནྟི ཝཱ ཨསྨཱིཏི’ ཝཱ? ཨཐ ཁྭཱསྶ ནོཏེཝེཏྠ ཧོཏི…པེ॰… ཏསྶ ཙེ, ཨཱཝུསོ, བྷིཀྑུནོ ཨེཝཾ བུདྡྷཾ ཨནུསྶརཏོ, ཨེཝཾ དྷམྨཾ ཨནུསྶརཏོ, ཨེཝཾ སངྒྷཾ ཨནུསྶརཏོ ཨུཔེཀྑཱ ཀུསལནིསྶིཏཱ སཎྛཱཏི། སོ ཏེན ཨཏྟམནོ ཧོཏི། ཨེཏྟཱཝཏཱཔི ཁོ, ཨཱཝུསོ, བྷིཀྑུནོ བཧུཀཏཾ ཧོཏི།
‘‘Hoti kho so, āvuso, samayo yaṃ bāhirā āpodhātu pakuppati. Sā gāmampi vahati, nigamampi vahati, nagarampi vahati, janapadampi vahati, janapadapadesampi vahati. Hoti kho so, āvuso, samayo yaṃ mahāsamudde yojanasatikānipi udakāni ogacchanti, dviyojanasatikānipi udakāni ogacchanti, tiyojanasatikānipi udakāni ogacchanti, catuyojanasatikānipi udakāni ogacchanti, pañcayojanasatikānipi udakāni ogacchanti, chayojanasatikānipi udakāni ogacchanti, sattayojanasatikānipi udakāni ogacchanti. Hoti kho so, āvuso, samayo yaṃ mahāsamudde sattatālampi udakaṃ saṇṭhāti, chattālampi udakaṃ saṇṭhāti, pañcatālampi udakaṃ saṇṭhāti, catuttālampi udakaṃ saṇṭhāti, titālampi udakaṃ saṇṭhāti, dvitālampi udakaṃ saṇṭhāti, tālamattampi 7 udakaṃ saṇṭhāti. Hoti kho so, āvuso, samayo yaṃ mahāsamudde sattaporisampi udakaṃ saṇṭhāti, chapporisampi udakaṃ saṇṭhāti, pañcaporisampi udakaṃ saṇṭhāti, catupporisampi udakaṃ saṇṭhāti, tiporisampi udakaṃ saṇṭhāti, dviporisampi udakaṃ saṇṭhāti, porisamattampi 8 udakaṃ saṇṭhāti. Hoti kho so, āvuso, samayo yaṃ mahāsamudde aḍḍhaporisampi udakaṃ saṇṭhāti, kaṭimattampi udakaṃ saṇṭhāti, jāṇukamattampi udakaṃ saṇṭhāti, gopphakamattampi udakaṃ saṇṭhāti. Hoti kho so, āvuso, samayo, yaṃ mahāsamudde aṅgulipabbatemanamattampi udakaṃ na hoti. Tassā hi nāma, āvuso, bāhirāya āpodhātuyā tāva mahallikāya aniccatā paññāyissati, khayadhammatā paññāyissati, vayadhammatā paññāyissati, vipariṇāmadhammatā paññāyissati. Kiṃ panimassa mattaṭṭhakassa kāyassa taṇhupādinnassa ‘ahanti vā mamanti vā asmīti’ vā? Atha khvāssa notevettha hoti…pe… tassa ce, āvuso, bhikkhuno evaṃ buddhaṃ anussarato, evaṃ dhammaṃ anussarato, evaṃ saṅghaṃ anussarato upekkhā kusalanissitā saṇṭhāti. So tena attamano hoti. Ettāvatāpi kho, āvuso, bhikkhuno bahukataṃ hoti.
༣༠༤. ‘‘ཀཏམཱ ཙཱཝུསོ, ཏེཛོདྷཱཏུ? ཏེཛོདྷཱཏུ སིཡཱ ཨཛ྄ཛྷཏྟིཀཱ, སིཡཱ བཱཧིརཱ། ཀཏམཱ ཙཱཝུསོ, ཨཛ྄ཛྷཏྟིཀཱ ཏེཛོདྷཱཏུ? ཡཾ ཨཛ྄ཛྷཏྟཾ པཙྩཏྟཾ ཏེཛོ ཏེཛོགཏཾ ཨུཔཱདིནྣཾ, སེཡྻཐིདཾ – ཡེན ཙ སནྟཔྤཏི, ཡེན ཙ ཛཱིརཱིཡཏི, ཡེན ཙ པརིཌཡ྄ཧཏི, ཡེན ཙ ཨསིཏཔཱིཏཁཱཡིཏསཱཡིཏཾ སམྨཱ པརིཎཱམཾ གཙྪཏི, ཡཾ ཝཱ པནཉྙམྤི ཀིཉྩི ཨཛ྄ཛྷཏྟཾ པཙྩཏྟཾ ཏེཛོ ཏེཛོགཏཾ ཨུཔཱདིནྣཾ – ཨཡཾ ཝུཙྩཏཱཝུསོ, ཨཛ྄ཛྷཏྟིཀཱ ཏེཛོདྷཱཏུ། ཡཱ ཙེཝ ཁོ པན ཨཛ྄ཛྷཏྟིཀཱ ཏེཛོདྷཱཏུ ཡཱ ཙ བཱཧིརཱ ཏེཛོདྷཱཏུ, ཏེཛོདྷཱཏུརེཝེསཱ། ‘ཏཾ ནེཏཾ མམ , ནེསོཧམསྨི, ན མེསོ ཨཏྟཱ’ཏི ཨེཝམེཏཾ ཡཐཱབྷཱུཏཾ སམྨཔྤཉྙཱཡ དཊྛབྦཾ། ཨེཝམེཏཾ ཡཐཱབྷཱུཏཾ སམྨཔྤཉྙཱཡ དིསྭཱ ཏེཛོདྷཱཏུཡཱ ནིབྦིནྡཏི, ཏེཛོདྷཱཏུཡཱ ཙིཏྟཾ ཝིརཱཛེཏི།
304. ‘‘Katamā cāvuso, tejodhātu? Tejodhātu siyā ajjhattikā, siyā bāhirā. Katamā cāvuso, ajjhattikā tejodhātu? Yaṃ ajjhattaṃ paccattaṃ tejo tejogataṃ upādinnaṃ, seyyathidaṃ – yena ca santappati, yena ca jīrīyati, yena ca pariḍayhati, yena ca asitapītakhāyitasāyitaṃ sammā pariṇāmaṃ gacchati, yaṃ vā panaññampi kiñci ajjhattaṃ paccattaṃ tejo tejogataṃ upādinnaṃ – ayaṃ vuccatāvuso, ajjhattikā tejodhātu. Yā ceva kho pana ajjhattikā tejodhātu yā ca bāhirā tejodhātu, tejodhāturevesā. ‘Taṃ netaṃ mama , nesohamasmi, na meso attā’ti evametaṃ yathābhūtaṃ sammappaññāya daṭṭhabbaṃ. Evametaṃ yathābhūtaṃ sammappaññāya disvā tejodhātuyā nibbindati, tejodhātuyā cittaṃ virājeti.
‘‘ཧོཏི ཁོ སོ, ཨཱཝུསོ, སམཡོ ཡཾ བཱཧིརཱ ཏེཛོདྷཱཏུ པཀུཔྤཏི། སཱ གཱམམྤི དཧཏི, ནིགམམྤི དཧཏི, ནགརམྤི དཧཏི, ཛནཔདམྤི དཧཏི, ཛནཔདཔདེསམྤི དཧཏི། སཱ ཧརིཏནྟཾ ཝཱ པནྠནྟཾ ཝཱ སེལནྟཾ ཝཱ ཨུདཀནྟཾ ཝཱ རམཎཱིཡཾ ཝཱ བྷཱུམིབྷཱགཾ ཨཱགམྨ ཨནཱཧཱརཱ ནིབྦཱཡཏི། ཧོཏི ཁོ སོ, ཨཱཝུསོ, སམཡོ ཡཾ ཀུཀྐུཊཔཏྟེནཔི ནྷཱརུདདྡུལེནཔི ཨགྒིཾ གཝེསནྟི ། ཏསྶཱ ཧི ནཱམ, ཨཱཝུསོ, བཱཧིརཱཡ ཏེཛོདྷཱཏུཡཱ ཏཱཝ མཧལླིཀཱཡ ཨནིཙྩཏཱ པཉྙཱཡིསྶཏི, ཁཡདྷམྨཏཱ པཉྙཱཡིསྶཏི, ཝཡདྷམྨཏཱ པཉྙཱཡིསྶཏི, ཝིཔརིཎཱམདྷམྨཏཱ པཉྙཱཡིསྶཏི། ཀིཾ པནིམསྶ མཏྟཊྛཀསྶ ཀཱཡསྶ ཏཎྷུཔཱདིནྣསྶ ‘ཨཧནྟི ཝཱ མམནྟི ཝཱ ཨསྨཱི’ཏི ཝཱ? ཨཐ ཁྭཱསྶ ནོཏེཝེཏྠ ཧོཏི…པེ॰… ཏསྶ ཙེ, ཨཱཝུསོ, བྷིཀྑུནོ ཨེཝཾ བུདྡྷཾ ཨནུསྶརཏོ ཨེཝཾ དྷམྨཾ ཨནུསྶརཏོ ཨེཝཾ སངྒྷཾ ཨནུསྶརཏོ ཨུཔེཀྑཱ ཀུསལནིསྶིཏཱ སཎྛཱཏི, སོ ཏེན ཨཏྟམནོ ཧོཏི། ཨེཏྟཱཝཏཱཔི ཁོ, ཨཱཝུསོ, བྷིཀྑུནོ བཧུཀཏཾ ཧོཏི།
‘‘Hoti kho so, āvuso, samayo yaṃ bāhirā tejodhātu pakuppati. Sā gāmampi dahati, nigamampi dahati, nagarampi dahati, janapadampi dahati, janapadapadesampi dahati. Sā haritantaṃ vā panthantaṃ vā selantaṃ vā udakantaṃ vā ramaṇīyaṃ vā bhūmibhāgaṃ āgamma anāhārā nibbāyati. Hoti kho so, āvuso, samayo yaṃ kukkuṭapattenapi nhārudaddulenapi aggiṃ gavesanti . Tassā hi nāma, āvuso, bāhirāya tejodhātuyā tāva mahallikāya aniccatā paññāyissati, khayadhammatā paññāyissati, vayadhammatā paññāyissati, vipariṇāmadhammatā paññāyissati. Kiṃ panimassa mattaṭṭhakassa kāyassa taṇhupādinnassa ‘ahanti vā mamanti vā asmī’ti vā? Atha khvāssa notevettha hoti…pe… tassa ce, āvuso, bhikkhuno evaṃ buddhaṃ anussarato evaṃ dhammaṃ anussarato evaṃ saṅghaṃ anussarato upekkhā kusalanissitā saṇṭhāti, so tena attamano hoti. Ettāvatāpi kho, āvuso, bhikkhuno bahukataṃ hoti.
༣༠༥. ‘‘ཀཏམཱ ཙཱཝུསོ, ཝཱཡོདྷཱཏུ? ཝཱཡོདྷཱཏུ སིཡཱ ཨཛ྄ཛྷཏྟིཀཱ, སིཡཱ བཱཧིརཱ། ཀཏམཱ ཙཱཝུསོ, ཨཛ྄ཛྷཏྟིཀཱ ཝཱཡོདྷཱཏུ? ཡཾ ཨཛ྄ཛྷཏྟཾ པཙྩཏྟཾ ཝཱཡོ ཝཱཡོགཏཾ ཨུཔཱདིནྣཾ, སེཡྻཐིདཾ – ཨུདྡྷངྒམཱ ཝཱཏཱ, ཨདྷོགམཱ ཝཱཏཱ, ཀུཙྪིསཡཱ ཝཱཏཱ, ཀོཊྛཱསཡཱ 9 ཝཱཏཱ, ཨངྒམངྒཱནུསཱརིནོ ཝཱཏཱ, ཨསྶཱསོ པསྶཱསོ ཨིཏི, ཡཾ ཝཱ པནཉྙམྤི ཀིཉྩི ཨཛ྄ཛྷཏྟཾ པཙྩཏྟཾ ཝཱཡོ ཝཱཡོགཏཾ ཨུཔཱདིནྣཾ – ཨཡཾ ཝུཙྩཏཱཝུསོ, ཨཛ྄ཛྷཏྟིཀཱ ཝཱཡོདྷཱཏུ། ཡཱ ཙེཝ ཁོ པན ཨཛ྄ཛྷཏྟིཀཱ ཝཱཡོདྷཱཏུ, ཡཱ ཙ བཱཧིརཱ ཝཱཡོདྷཱཏུ, ཝཱཡོདྷཱཏུརེཝེསཱ། ‘ཏཾ ནེཏཾ མམ ནེསོཧམསྨི ན མེསོ ཨཏྟཱ’ཏི ཨེཝམེཏཾ ཡཐཱབྷཱུཏཾ སམྨཔྤཉྙཱཡ དཊྛབྦཾ། ཨེཝམེཏཾ ཡཐཱབྷཱུཏཾ སམྨཔྤཉྙཱཡ དིསྭཱ ཝཱཡོདྷཱཏུཡཱ ནིབྦིནྡཏི ཝཱཡོདྷཱཏུཡཱ ཙིཏྟཾ ཝིརཱཛེཏི།
305. ‘‘Katamā cāvuso, vāyodhātu? Vāyodhātu siyā ajjhattikā, siyā bāhirā. Katamā cāvuso, ajjhattikā vāyodhātu? Yaṃ ajjhattaṃ paccattaṃ vāyo vāyogataṃ upādinnaṃ, seyyathidaṃ – uddhaṅgamā vātā, adhogamā vātā, kucchisayā vātā, koṭṭhāsayā 10 vātā, aṅgamaṅgānusārino vātā, assāso passāso iti, yaṃ vā panaññampi kiñci ajjhattaṃ paccattaṃ vāyo vāyogataṃ upādinnaṃ – ayaṃ vuccatāvuso, ajjhattikā vāyodhātu. Yā ceva kho pana ajjhattikā vāyodhātu, yā ca bāhirā vāyodhātu, vāyodhāturevesā. ‘Taṃ netaṃ mama nesohamasmi na meso attā’ti evametaṃ yathābhūtaṃ sammappaññāya daṭṭhabbaṃ. Evametaṃ yathābhūtaṃ sammappaññāya disvā vāyodhātuyā nibbindati vāyodhātuyā cittaṃ virājeti.
‘‘ཧོཏི ཁོ སོ, ཨཱཝུསོ, སམཡོ ཡཾ བཱཧིརཱ ཝཱཡོདྷཱཏུ པཀུཔྤཏི། སཱ གཱམམྤི ཝཧཏི, ནིགམམྤི ཝཧཏི, ནགརམྤི ཝཧཏི, ཛནཔདམྤི ཝཧཏི, ཛནཔདཔདེསམྤི ཝཧཏི། ཧོཏི ཁོ སོ, ཨཱཝུསོ, སམཡོ ཡཾ གིམྷཱནཾ པཙྪིམེ མཱསེ ཏཱལཝཎྚེནཔི ཝིདྷཱུཔནེནཔི ཝཱཏཾ པརིཡེསནྟི, ཨོསྶཝནེཔི ཏིཎཱནི ན ཨིཙྪནྟི། ཏསྶཱ ཧི ནཱམ, ཨཱཝུསོ, བཱཧིརཱཡ ཝཱཡོདྷཱཏུཡཱ ཏཱཝ མཧལླིཀཱཡ ཨནིཙྩཏཱ པཉྙཱཡིསྶཏི, ཁཡདྷམྨཏཱ པཉྙཱཡིསྶཏི, ཝཡདྷམྨཏཱ པཉྙཱཡིསྶཏི, ཝིཔརིཎཱམདྷམྨཏཱ པཉྙཱཡིསྶཏི། ཀིཾ པནིམསྶ མཏྟཊྛཀསྶ ཀཱཡསྶ ཏཎྷུཔཱདིནྣསྶ ‘ཨཧནྟི ཝཱ མམནྟི ཝཱ ཨསྨཱི’ཏི ཝཱ? ཨཐ ཁྭཱསྶ ནོཏེཝེཏྠ ཧོཏི།
‘‘Hoti kho so, āvuso, samayo yaṃ bāhirā vāyodhātu pakuppati. Sā gāmampi vahati, nigamampi vahati, nagarampi vahati, janapadampi vahati, janapadapadesampi vahati. Hoti kho so, āvuso, samayo yaṃ gimhānaṃ pacchime māse tālavaṇṭenapi vidhūpanenapi vātaṃ pariyesanti, ossavanepi tiṇāni na icchanti. Tassā hi nāma, āvuso, bāhirāya vāyodhātuyā tāva mahallikāya aniccatā paññāyissati, khayadhammatā paññāyissati, vayadhammatā paññāyissati, vipariṇāmadhammatā paññāyissati. Kiṃ panimassa mattaṭṭhakassa kāyassa taṇhupādinnassa ‘ahanti vā mamanti vā asmī’ti vā? Atha khvāssa notevettha hoti.
‘‘ཏཉྩེ, ཨཱཝུསོ, བྷིཀྑུཾ པརེ ཨཀྐོསནྟི པརིབྷཱསནྟི རོསེནྟི ཝིཧེསེནྟི། སོ ཨེཝཾ པཛཱནཱཏི, ཨུཔྤནྣཱ ཁོ མེ ཨཡཾ སོཏསམྥསྶཛཱ དུཀྑཱ ཝེདནཱ། སཱ ཙ ཁོ པཊིཙྩ, ནོ ཨཔཊིཙྩ། ཀིཾ པཊིཙྩ? ཕསྶཾ པཊིཙྩ། སོཔི ཕསྶོ ཨནིཙྩོཏི པསྶཏི, ཝེདནཱ ཨནིཙྩཱཏི པསྶཏི , སཉྙཱ ཨནིཙྩཱཏི པསྶཏི, སངྑཱརཱ ཨནིཙྩཱཏི པསྶཏི, ཝིཉྙཱཎཾ ཨནིཙྩནྟི པསྶཏི། ཏསྶ དྷཱཏཱརམྨཎམེཝ ཙིཏྟཾ པཀྑནྡཏི པསཱིདཏི སནྟིཊྛཏི ཨདྷིམུཙྩཏི།
‘‘Tañce, āvuso, bhikkhuṃ pare akkosanti paribhāsanti rosenti vihesenti. So evaṃ pajānāti, uppannā kho me ayaṃ sotasamphassajā dukkhā vedanā. Sā ca kho paṭicca, no apaṭicca. Kiṃ paṭicca? Phassaṃ paṭicca. Sopi phasso aniccoti passati, vedanā aniccāti passati , saññā aniccāti passati, saṅkhārā aniccāti passati, viññāṇaṃ aniccanti passati. Tassa dhātārammaṇameva cittaṃ pakkhandati pasīdati santiṭṭhati adhimuccati.
‘‘ཏཉྩེ, ཨཱཝུསོ, བྷིཀྑུཾ པརེ ཨནིཊྛེཧི ཨཀནྟེཧི ཨམནཱཔེཧི སམུདཱཙརནྟི, པཱཎིསམྥསྶེནཔི ལེཌྜུསམྥསྶེནཔི དཎྜསམྥསྶེནཔི སཏྠསམྥསྶེནཔི། སོ ཨེཝཾ པཛཱནཱཏི ‘ཏཐཱབྷཱུཏོ ཁོ ཨཡཾ ཀཱཡོ ཡཐཱབྷཱུཏསྨིཾ ཀཱཡེ པཱཎིསམྥསྶཱཔི ཀམནྟི, ལེཌྜུསམྥསྶཱཔི ཀམནྟི, དཎྜསམྥསྶཱཔི ཀམནྟི, སཏྠསམྥསྶཱཔི ཀམནྟི། ཝུཏྟཾ ཁོ པནེཏཾ བྷགཝཏཱ ཀཀཙཱུཔམོཝཱདེ ‘‘ཨུབྷཏོདཎྜཀེན ཙེཔི, བྷིཀྑཝེ, ཀཀཙེན ཙོརཱ ཨོཙརཀཱ ཨངྒམངྒཱནི ཨོཀནྟེཡྻུཾ། ཏཏྲཱཔི ཡོ མནོ པདཱུསེཡྻ, ན མེ སོ ཏེན སཱསནཀརོ’’ཏི། ཨཱརདྡྷཾ ཁོ པན མེ ཝཱིརིཡཾ བྷཝིསྶཏི ཨསལླཱིནཾ, ཨུཔཊྛིཏཱ སཏི ཨསམྨུཊྛཱ, པསྶདྡྷོ ཀཱཡོ ཨསཱརདྡྷོ, སམཱཧིཏཾ ཙིཏྟཾ ཨེཀགྒཾ། ཀཱམཾ དཱནི ཨིམསྨིཾ ཀཱཡེ པཱཎིསམྥསྶཱཔི ཀམནྟུ, ལེཌྜུསམྥསྶཱཔི ཀམནྟུ, དཎྜསམྥསྶཱཔི ཀམནྟུ, སཏྠསམྥསྶཱཔི ཀམནྟུ། ཀརཱིཡཏི ཧིདཾ བུདྡྷཱནཾ སཱསན’ནྟི།
‘‘Tañce, āvuso, bhikkhuṃ pare aniṭṭhehi akantehi amanāpehi samudācaranti, pāṇisamphassenapi leḍḍusamphassenapi daṇḍasamphassenapi satthasamphassenapi. So evaṃ pajānāti ‘tathābhūto kho ayaṃ kāyo yathābhūtasmiṃ kāye pāṇisamphassāpi kamanti, leḍḍusamphassāpi kamanti, daṇḍasamphassāpi kamanti, satthasamphassāpi kamanti. Vuttaṃ kho panetaṃ bhagavatā kakacūpamovāde ‘‘ubhatodaṇḍakena cepi, bhikkhave, kakacena corā ocarakā aṅgamaṅgāni okanteyyuṃ. Tatrāpi yo mano padūseyya, na me so tena sāsanakaro’’ti. Āraddhaṃ kho pana me vīriyaṃ bhavissati asallīnaṃ, upaṭṭhitā sati asammuṭṭhā, passaddho kāyo asāraddho, samāhitaṃ cittaṃ ekaggaṃ. Kāmaṃ dāni imasmiṃ kāye pāṇisamphassāpi kamantu, leḍḍusamphassāpi kamantu, daṇḍasamphassāpi kamantu, satthasamphassāpi kamantu. Karīyati hidaṃ buddhānaṃ sāsana’nti.
‘‘ཏསྶ ཙེ, ཨཱཝུསོ, བྷིཀྑུནོ ཨེཝཾ བུདྡྷཾ ཨནུསྶརཏོ, ཨེཝཾ དྷམྨཾ ཨནུསྶརཏོ, ཨེཝཾ སངྒྷཾ ཨནུསྶརཏོ ཨུཔེཀྑཱ ཀུསལནིསྶིཏཱ ན སཎྛཱཏི། སོ ཏེན སཾཝིཛྫཏི སཾཝེགཾ ཨཱཔཛྫཏི – ‘ཨལཱབྷཱ ཝཏ མེ, ན ཝཏ མེ ལཱབྷཱ, དུལླདྡྷཾ ཝཏ མེ, ན ཝཏ མེ སུལདྡྷཾ། ཡསྶ མེ ཨེཝཾ བུདྡྷཾ ཨནུསྶརཏོ, ཨེཝཾ དྷམྨཾ ཨནུསྶརཏོ, ཨེཝཾ སངྒྷཾ ཨནུསྶརཏོ ཨུཔེཀྑཱ ཀུསལནིསྶིཏཱ ན སཎྛཱཏཱི’ཏི། སེཡྻཐཱཔི, ཨཱཝུསོ, སུཎིསཱ སསུརཾ དིསྭཱ སཾཝིཛྫཏི སཾཝེགཾ ཨཱཔཛྫཏི; ཨེཝམེཝ ཁོ, ཨཱཝུསོ, ཏསྶ ཙེ བྷིཀྑུནོ ཨེཝཾ བུདྡྷཾ ཨནུསྶརཏོ, ཨེཝཾ དྷམྨཾ ཨནུསྶརཏོ, ཨེཝཾ སངྒྷཾ ཨནུསྶརཏོ, ཨུཔེཀྑཱ ཀུསལནིསྶིཏཱ ན སཎྛཱཏི། སོ ཏེན སཾཝིཛྫཏི སཾཝེགཾ ཨཱཔཛྫཏི – ‘ཨལཱབྷཱ ཝཏ མེ, ན ཝཏ མེ ལཱབྷཱ, དུལླདྡྷཾ ཝཏ མེ, ན ཝཏ མེ སུལདྡྷཾ། ཡསྶ མེ ཨེཝཾ བུདྡྷཾ ཨནུསྶརཏོ, ཨེཝཾ དྷམྨཾ ཨནུསྶརཏོ, ཨེཝཾ སངྒྷཾ ཨནུསྶརཏོ, ཨུཔེཀྑཱ ཀུསལནིསྶིཏཱ ན སཎྛཱཏཱི’ཏི། ཏསྶ ཙེ, ཨཱཝུསོ, བྷིཀྑུནོ ཨེཝཾ བུདྡྷཾ ཨནུསྶརཏོ, ཨེཝཾ དྷམྨཾ ཨནུསྶརཏོ, ཨེཝཾ སངྒྷཾ ཨནུསྶརཏོ, ཨུཔེཀྑཱ ཀུསལནིསྶིཏཱ སཎྛཱཏི, སོ ཏེན ཨཏྟམནོ ཧོཏི། ཨེཏྟཱཝཏཱཔི ཁོ, ཨཱཝུསོ, བྷིཀྑུནོ བཧུཀཏཾ ཧོཏི།
‘‘Tassa ce, āvuso, bhikkhuno evaṃ buddhaṃ anussarato, evaṃ dhammaṃ anussarato, evaṃ saṅghaṃ anussarato upekkhā kusalanissitā na saṇṭhāti. So tena saṃvijjati saṃvegaṃ āpajjati – ‘alābhā vata me, na vata me lābhā, dulladdhaṃ vata me, na vata me suladdhaṃ. Yassa me evaṃ buddhaṃ anussarato, evaṃ dhammaṃ anussarato, evaṃ saṅghaṃ anussarato upekkhā kusalanissitā na saṇṭhātī’ti. Seyyathāpi, āvuso, suṇisā sasuraṃ disvā saṃvijjati saṃvegaṃ āpajjati; evameva kho, āvuso, tassa ce bhikkhuno evaṃ buddhaṃ anussarato, evaṃ dhammaṃ anussarato, evaṃ saṅghaṃ anussarato, upekkhā kusalanissitā na saṇṭhāti. So tena saṃvijjati saṃvegaṃ āpajjati – ‘alābhā vata me, na vata me lābhā, dulladdhaṃ vata me, na vata me suladdhaṃ. Yassa me evaṃ buddhaṃ anussarato, evaṃ dhammaṃ anussarato, evaṃ saṅghaṃ anussarato, upekkhā kusalanissitā na saṇṭhātī’ti. Tassa ce, āvuso, bhikkhuno evaṃ buddhaṃ anussarato, evaṃ dhammaṃ anussarato, evaṃ saṅghaṃ anussarato, upekkhā kusalanissitā saṇṭhāti, so tena attamano hoti. Ettāvatāpi kho, āvuso, bhikkhuno bahukataṃ hoti.
༣༠༦. ‘‘སེཡྻཐཱཔི, ཨཱཝུསོ, ཀཊྛཉྩ པཊིཙྩ ཝལླིཉྩ པཊིཙྩ ཏིཎཉྩ པཊིཙྩ མཏྟིཀཉྩ པཊིཙྩ ཨཱཀཱསོ པརིཝཱརིཏོ ཨགཱརཾ ཏྭེཝ སངྑཾ གཙྪཏི; ཨེཝམེཝ ཁོ, ཨཱཝུསོ, ཨཊྛིཉྩ པཊིཙྩ ནྷཱརུཉྩ པཊིཙྩ མཾསཉྩ པཊིཙྩ ཙམྨཉྩ པཊིཙྩ ཨཱཀཱསོ པརིཝཱརིཏོ རཱུཔཾ ཏྭེཝ སངྑཾ གཙྪཏི། ཨཛ྄ཛྷཏྟིཀཉྩེཝ, ཨཱཝུསོ, ཙཀྑུཾ ཨཔརིབྷིནྣཾ ཧོཏི, བཱཧིརཱ ཙ རཱུཔཱ ན ཨཱཔཱཐཾ ཨཱགཙྪནྟི, ནོ ཙ ཏཛྫོ སམནྣཱཧཱརོ ཧོཏི, ནེཝ ཏཱཝ ཏཛྫསྶ ཝིཉྙཱཎབྷཱགསྶ པཱཏུབྷཱཝོ ཧོཏི། ཨཛ྄ཛྷཏྟིཀཉྩེཝ 11, ཨཱཝུསོ, ཙཀྑུཾ ཨཔརིབྷིནྣཾ ཧོཏི བཱཧིརཱ ཙ རཱུཔཱ ཨཱཔཱཐཾ ཨཱགཙྪནྟི, ནོ ཙ ཏཛྫོ སམནྣཱཧཱརོ ཧོཏི, ནེཝ ཏཱཝ ཏཛྫསྶ ཝིཉྙཱཎབྷཱགསྶ པཱཏུབྷཱཝོ ཧོཏི། ཡཏོ ཙ ཁོ, ཨཱཝུསོ, ཨཛ྄ཛྷཏྟིཀཉྩེཝ ཙཀྑུཾ ཨཔརིབྷིནྣཾ ཧོཏི, བཱཧིརཱ ཙ རཱུཔཱ ཨཱཔཱཐཾ ཨཱགཙྪནྟི, ཏཛྫོ ཙ སམནྣཱཧཱརོ ཧོཏི། ཨེཝཾ ཏཛྫསྶ ཝིཉྙཱཎབྷཱགསྶ པཱཏུབྷཱཝོ ཧོཏི། ཡཾ ཏཐཱབྷཱུཏསྶ རཱུཔཾ ཏཾ རཱུཔུཔཱདཱནཀྑནྡྷེ སངྒཧཾ གཙྪཏི, ཡཱ ཏཐཱབྷཱུཏསྶ ཝེདནཱ སཱ ཝེདནུཔཱདཱནཀྑནྡྷེ སངྒཧཾ གཙྪཏི, ཡཱ ཏཐཱབྷཱུཏསྶ སཉྙཱ སཱ སཉྙུཔཱདཱནཀྑནྡྷེ སངྒཧཾ གཙྪཏི, ཡེ ཏཐཱབྷཱུཏསྶ སངྑཱརཱ ཏེ སངྑཱརུཔཱདཱནཀྑནྡྷེ སངྒཧཾ གཙྪནྟི, ཡཾ ཏཐཱབྷཱུཏསྶ ཝིཉྙཱཎཾ ཏཾ ཝིཉྙཱཎུཔཱདཱནཀྑནྡྷེ སངྒཧཾ གཙྪཏི།
306. ‘‘Seyyathāpi, āvuso, kaṭṭhañca paṭicca valliñca paṭicca tiṇañca paṭicca mattikañca paṭicca ākāso parivārito agāraṃ tveva saṅkhaṃ gacchati; evameva kho, āvuso, aṭṭhiñca paṭicca nhāruñca paṭicca maṃsañca paṭicca cammañca paṭicca ākāso parivārito rūpaṃ tveva saṅkhaṃ gacchati. Ajjhattikañceva, āvuso, cakkhuṃ aparibhinnaṃ hoti, bāhirā ca rūpā na āpāthaṃ āgacchanti, no ca tajjo samannāhāro hoti, neva tāva tajjassa viññāṇabhāgassa pātubhāvo hoti. Ajjhattikañceva 12, āvuso, cakkhuṃ aparibhinnaṃ hoti bāhirā ca rūpā āpāthaṃ āgacchanti, no ca tajjo samannāhāro hoti, neva tāva tajjassa viññāṇabhāgassa pātubhāvo hoti. Yato ca kho, āvuso, ajjhattikañceva cakkhuṃ aparibhinnaṃ hoti, bāhirā ca rūpā āpāthaṃ āgacchanti, tajjo ca samannāhāro hoti. Evaṃ tajjassa viññāṇabhāgassa pātubhāvo hoti. Yaṃ tathābhūtassa rūpaṃ taṃ rūpupādānakkhandhe saṅgahaṃ gacchati, yā tathābhūtassa vedanā sā vedanupādānakkhandhe saṅgahaṃ gacchati, yā tathābhūtassa saññā sā saññupādānakkhandhe saṅgahaṃ gacchati, ye tathābhūtassa saṅkhārā te saṅkhārupādānakkhandhe saṅgahaṃ gacchanti, yaṃ tathābhūtassa viññāṇaṃ taṃ viññāṇupādānakkhandhe saṅgahaṃ gacchati.
‘‘སོ ཨེཝཾ པཛཱནཱཏི – ‘ཨེཝཉྷི ཀིར ཨིམེསཾ པཉྩནྣཾ ཨུཔཱདཱནཀྑནྡྷཱནཾ སངྒཧོ སནྣིཔཱཏོ སམཝཱཡོ ཧོཏི། ཝུཏྟཾ ཁོ པནེཏཾ བྷགཝཏཱ – ‘ཡོ པཊིཙྩསམུཔྤཱདཾ པསྶཏི སོ དྷམྨཾ པསྶཏི; ཡོ དྷམྨཾ པསྶཏི སོ པཊིཙྩསམུཔྤཱདཾ པསྶཏཱིཏི། པཊིཙྩསམུཔྤནྣཱ ཁོ པནིམེ ཡདིདཾ པཉྩུཔཱདཱནཀྑནྡྷཱ། ཡོ ཨིམེསུ པཉྩསུ ཨུཔཱདཱནཀྑནྡྷེསུ ཚནྡོ ཨཱལཡོ ཨནུནཡོ ཨཛ྄ཛྷོསཱནཾ སོ དུཀྑསམུདཡོ། ཡོ ཨིམེསུ པཉྩསུ ཨུཔཱདཱནཀྑནྡྷེསུ ཚནྡརཱགཝིནཡོ ཚནྡརཱགཔྤཧཱནཾ, སོ དུཀྑནིརོདྷོ’ཏི། ཨེཏྟཱཝཏཱཔི ཁོ, ཨཱཝུསོ, བྷིཀྑུནོ བཧུཀཏཾ ཧོཏི།
‘‘So evaṃ pajānāti – ‘evañhi kira imesaṃ pañcannaṃ upādānakkhandhānaṃ saṅgaho sannipāto samavāyo hoti. Vuttaṃ kho panetaṃ bhagavatā – ‘yo paṭiccasamuppādaṃ passati so dhammaṃ passati; yo dhammaṃ passati so paṭiccasamuppādaṃ passatīti. Paṭiccasamuppannā kho panime yadidaṃ pañcupādānakkhandhā. Yo imesu pañcasu upādānakkhandhesu chando ālayo anunayo ajjhosānaṃ so dukkhasamudayo. Yo imesu pañcasu upādānakkhandhesu chandarāgavinayo chandarāgappahānaṃ, so dukkhanirodho’ti. Ettāvatāpi kho, āvuso, bhikkhuno bahukataṃ hoti.
‘‘ཨཛ྄ཛྷཏྟིཀཉྩེཝ, ཨཱཝུསོ, སོཏཾ ཨཔརིབྷིནྣཾ ཧོཏི…པེ॰… གྷཱནཾ ཨཔརིབྷིནྣཾ ཧོཏི… ཛིཝ྄ཧཱ ཨཔརིབྷིནྣཱ ཧོཏི… ཀཱཡོ ཨཔརིབྷིནྣོ ཧོཏི… མནོ ཨཔརིབྷིནྣོ ཧོཏི, བཱཧིརཱ ཙ དྷམྨཱ ན ཨཱཔཱཐཾ ཨཱགཙྪནྟི ནོ ཙ ཏཛྫོ སམནྣཱཧཱརོ ཧོཏི, ནེཝ ཏཱཝ ཏཛྫསྶ ཝིཉྙཱཎབྷཱགསྶ པཱཏུབྷཱཝོ ཧོཏི། ཨཛ྄ཛྷཏྟིཀོ ཙེཝ, ཨཱཝུསོ, མནོ ཨཔརིབྷིནྣོ ཧོཏི, བཱཧིརཱ ཙ དྷམྨཱ ཨཱཔཱཐཾ ཨཱགཙྪནྟི, ནོ ཙ ཏཛྫོ སམནྣཱཧཱརོ ཧོཏི, ནེཝ ཏཱཝ ཏཛྫསྶ ཝིཉྙཱཎབྷཱགསྶ པཱཏུབྷཱཝོ ཧོཏི། ཡཏོ ཙ ཁོ, ཨཱཝུསོ, ཨཛ྄ཛྷཏྟིཀོ ཙེཝ མནོ ཨཔརིབྷིནྣོ ཧོཏི, བཱཧིརཱ ཙ དྷམྨཱ ཨཱཔཱཐཾ ཨཱགཙྪནྟི, ཏཛྫོ ཙ སམནྣཱཧཱརོ ཧོཏི, ཨེཝཾ ཏཛྫསྶ ཝིཉྙཱཎབྷཱགསྶ པཱཏུབྷཱཝོ ཧོཏི། ཡཾ ཏཐཱབྷཱུཏསྶ རཱུཔཾ ཏཾ རཱུཔུཔཱདཱནཀྑནྡྷེ སངྒཧཾ གཙྪཏི, ཡཱ ཏཐཱབྷཱུཏསྶ ཝེདནཱ སཱ ཝེདནུཔཱདཱནཀྑནྡྷེ སངྒཧཾ གཙྪཏི, ཡཱ ཏཐཱབྷཱུཏསྶ སཉྙཱ སཱ སཉྙུཔཱདཱནཀྑནྡྷེ སངྒཧཾ གཙྪཏི, ཡེ ཏཐཱབྷཱུཏསྶ སངྑཱརཱ ཏེ སངྑཱརུཔཱདཱནཀྑནྡྷེ སངྒཧཾ གཙྪནྟི, ཡཾ ཏཐཱབྷཱུཏསྶ ཝིཉྙཱཎཾ ཏཾ ཝིཉྙཱཎུཔཱདཱནཀྑནྡྷེ སངྒཧཾ གཙྪཏི། སོ ཨེཝཾ པཛཱནཱཏི – ‘ཨེཝཉྷི ཀིར ཨིམེསཾ པཉྩནྣཾ ཨུཔཱདཱནཀྑནྡྷཱནཾ སངྒཧོ སནྣིཔཱཏོ སམཝཱཡོ ཧོཏི། ཝུཏྟཾ ཁོ པནེཏཾ བྷགཝཏཱ – ‘‘ཡོ པཊིཙྩསམུཔྤཱདཾ པསྶཏི སོ དྷམྨཾ པསྶཏི; ཡོ དྷམྨཾ པསྶཏི སོ པཊིཙྩསམུཔྤཱདཾ པསྶཏཱི’’ཏི། པཊིཙྩསམུཔྤནྣཱ ཁོ པནིམེ ཡདིདཾ པཉྩུཔཱདཱནཀྑནྡྷཱ། ཡོ ཨིམེསུ པཉྩསུ ཨུཔཱདཱནཀྑནྡྷེསུ ཚནྡོ ཨཱལཡོ ཨནུནཡོ ཨཛ྄ཛྷོསཱནཾ སོ དུཀྑསམུདཡོ། ཡོ ཨིམེསུ པཉྩསུ ཨུཔཱདཱནཀྑནྡྷེསུ ཚནྡརཱགཝིནཡོ ཚནྡརཱགཔྤཧཱནཾ སོ དུཀྑནིརོདྷོ’ཏི། ཨེཏྟཱཝཏཱཔི ཁོ, ཨཱཝུསོ, བྷིཀྑུནོ བཧུཀཏཾ ཧོཏཱི’’ཏི།
‘‘Ajjhattikañceva, āvuso, sotaṃ aparibhinnaṃ hoti…pe… ghānaṃ aparibhinnaṃ hoti… jivhā aparibhinnā hoti… kāyo aparibhinno hoti… mano aparibhinno hoti, bāhirā ca dhammā na āpāthaṃ āgacchanti no ca tajjo samannāhāro hoti, neva tāva tajjassa viññāṇabhāgassa pātubhāvo hoti. Ajjhattiko ceva, āvuso, mano aparibhinno hoti, bāhirā ca dhammā āpāthaṃ āgacchanti, no ca tajjo samannāhāro hoti, neva tāva tajjassa viññāṇabhāgassa pātubhāvo hoti. Yato ca kho, āvuso, ajjhattiko ceva mano aparibhinno hoti, bāhirā ca dhammā āpāthaṃ āgacchanti, tajjo ca samannāhāro hoti, evaṃ tajjassa viññāṇabhāgassa pātubhāvo hoti. Yaṃ tathābhūtassa rūpaṃ taṃ rūpupādānakkhandhe saṅgahaṃ gacchati, yā tathābhūtassa vedanā sā vedanupādānakkhandhe saṅgahaṃ gacchati, yā tathābhūtassa saññā sā saññupādānakkhandhe saṅgahaṃ gacchati, ye tathābhūtassa saṅkhārā te saṅkhārupādānakkhandhe saṅgahaṃ gacchanti, yaṃ tathābhūtassa viññāṇaṃ taṃ viññāṇupādānakkhandhe saṅgahaṃ gacchati. So evaṃ pajānāti – ‘evañhi kira imesaṃ pañcannaṃ upādānakkhandhānaṃ saṅgaho sannipāto samavāyo hoti. Vuttaṃ kho panetaṃ bhagavatā – ‘‘yo paṭiccasamuppādaṃ passati so dhammaṃ passati; yo dhammaṃ passati so paṭiccasamuppādaṃ passatī’’ti. Paṭiccasamuppannā kho panime yadidaṃ pañcupādānakkhandhā. Yo imesu pañcasu upādānakkhandhesu chando ālayo anunayo ajjhosānaṃ so dukkhasamudayo. Yo imesu pañcasu upādānakkhandhesu chandarāgavinayo chandarāgappahānaṃ so dukkhanirodho’ti. Ettāvatāpi kho, āvuso, bhikkhuno bahukataṃ hotī’’ti.
ཨིདམཝོཙ ཨཱཡསྨཱ སཱརིཔུཏྟོ། ཨཏྟམནཱ ཏེ བྷིཀྑཱུ ཨཱཡསྨཏོ སཱརིཔུཏྟསྶ བྷཱསིཏཾ ཨབྷིནནྡུནྟི།
Idamavoca āyasmā sāriputto. Attamanā te bhikkhū āyasmato sāriputtassa bhāsitaṃ abhinandunti.
མཧཱཧཏྠིཔདོཔམསུཏྟཾ ནིཊྛིཏཾ ཨཊྛམཾ།
Mahāhatthipadopamasuttaṃ niṭṭhitaṃ aṭṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༨. མཧཱཧཏྠིཔདོཔམསུཏྟཝཎྞནཱ • 8. Mahāhatthipadopamasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༨. མཧཱཧཏྠིཔདོཔམསུཏྟཝཎྞནཱ • 8. Mahāhatthipadopamasuttavaṇṇanā
