| Library / Tipiṭaka / д̇ибидага • Tipiṭaka / маж̇жхиманигааяа (адтагат̇аа) • Majjhimanikāya (aṭṭhakathā) |
8. махаахад̇т̇ибад̣̇обамасуд̇д̇аван̣н̣анаа
8. Mahāhatthipadopamasuttavaṇṇanā
300. звам̣ мз суд̇анд̇и махаахад̇т̇ибад̣̇обамасуд̇д̇ам̣. д̇ад̇т̇а ж̇ан̇г̇алаананд̇и бат̇авийд̇алажаарийнам̣. баан̣аананд̇и сабаад̣̇агабаан̣аанам̣. бад̣̇аж̇аад̇аанийд̇и бад̣̇аани. самод̇хаанам̣ г̇ажчанд̇ийд̇и од̇хаанам̣ багкзбам̣ г̇ажчанд̇и. аг̇г̇амагкааяад̇ийд̇и сздтам̣ агкааяад̇и. яад̣̇ид̣̇ам̣ маханд̇ад̇д̇знаад̇и маханд̇абхаавзна аг̇г̇ам̣ агкааяад̇и, на г̇ун̣авасзнаад̇и ад̇т̇о. яз гзжи гусалаа д̇хаммаад̇и яз гзжи логияаа ваа логуд̇д̇араа ваа гусалаа д̇хаммаа. сан̇г̇ахам̣ г̇ажчанд̇ийд̇и зд̇т̇а жад̇уб̣б̣ид̇хо сан̇г̇ахо – саж̇аад̇исан̇г̇ахо, сан̃ж̇аад̇исан̇г̇ахо, гирияасан̇г̇ахо, г̇ан̣анасан̇г̇аход̇и. д̇ад̇т̇а ‘‘саб̣б̣з кад̇д̇ияаа ааг̇ажчанд̇у саб̣б̣з б̣раахман̣аа’’д̇и звам̣ самаанаж̇аад̇ивасзна сан̇г̇ахо саж̇аад̇исан̇г̇ахо наама. ‘‘саб̣б̣з госалагаа саб̣б̣з мааг̇ад̇хагаа’’д̇и звам̣ сан̃ж̇аад̇ид̣̇зсавасзна сан̇г̇ахо сан̃ж̇аад̇исан̇г̇ахо наама. ‘‘саб̣б̣з рат̇игаа саб̣б̣з д̇хануг̇г̇ахаа’’д̇и звам̣ гирияавасзна сан̇г̇ахо гирияасан̇г̇ахо наама. ‘‘жагкааяад̇анам̣ гад̇амагканд̇хаг̇ан̣анам̣ г̇ажчад̇ийд̇и? жагкааяад̇анам̣ руубагканд̇хаг̇ан̣анам̣ г̇ажчад̇и. хан̃жи жагкааяад̇анам̣ руубагканд̇хаг̇ан̣анам̣ г̇ажчад̇и, д̇зна вад̇а рз вад̇д̇аб̣б̣з жагкааяад̇анам̣ руубагканд̇хзна сан̇г̇ахид̇а’’нд̇и (гат̇аа. 471), аяам̣ г̇ан̣анасан̇г̇ахо наама. имасмимби таанз аяамзва ад̇хиббзд̇о.
300.Evaṃme sutanti mahāhatthipadopamasuttaṃ. Tattha jaṅgalānanti pathavītalacārīnaṃ. Pāṇānanti sapādakapāṇānaṃ. Padajātānīti padāni. Samodhānaṃ gacchantīti odhānaṃ pakkhepaṃ gacchanti. Aggamakkhāyatīti seṭṭhaṃ akkhāyati. Yadidaṃ mahantattenāti mahantabhāvena aggaṃ akkhāyati, na guṇavasenāti attho. Ye keci kusalā dhammāti ye keci lokiyā vā lokuttarā vā kusalā dhammā. Saṅgahaṃ gacchantīti ettha catubbidho saṅgaho – sajātisaṅgaho, sañjātisaṅgaho, kiriyasaṅgaho, gaṇanasaṅgahoti. Tattha ‘‘sabbe khattiyā āgacchantu sabbe brāhmaṇā’’ti evaṃ samānajātivasena saṅgaho sajātisaṅgaho nāma. ‘‘Sabbe kosalakā sabbe māgadhakā’’ti evaṃ sañjātidesavasena saṅgaho sañjātisaṅgaho nāma. ‘‘Sabbe rathikā sabbe dhanuggahā’’ti evaṃ kiriyavasena saṅgaho kiriyasaṅgaho nāma. ‘‘Cakkhāyatanaṃ katamakkhandhagaṇanaṃ gacchatīti? Cakkhāyatanaṃ rūpakkhandhagaṇanaṃ gacchati. Hañci cakkhāyatanaṃ rūpakkhandhagaṇanaṃ gacchati, tena vata re vattabbe cakkhāyatanaṃ rūpakkhandhena saṅgahita’’nti (kathā. 471), ayaṃ gaṇanasaṅgaho nāma. Imasmimpi ṭhāne ayameva adhippeto.
нану жа ‘‘жад̇уннам̣ арияасажжаанам̣ гад̇и гусалаа гад̇и агусалаа гад̇и аб̣яаагад̇аад̇и бан̃хасса виссаж̇ж̇анз самуд̣̇аяасажжам̣ агусалам̣, маг̇г̇асажжам̣ гусалам̣, нирод̇хасажжам̣ аб̣яаагад̇ам̣, д̣̇угкасажжам̣ сияаа гусалам̣, сияаа агусалам̣, сияаа аб̣яаагад̇а’’нд̇и (вибха. 216-217) ааг̇ад̇ад̇д̇аа жад̇убхуумагамби гусалам̣ д̣̇ияад̣дхамзва сажжам̣ бхаж̇ад̇и. ат̇а гасмаа махаат̇зро жад̇уусу арияасажжзсу г̇ан̣анам̣ г̇ажчад̇ийд̇и аахаад̇и? сажжаанам̣ анд̇ог̇ад̇хад̇д̇аа. яат̇аа хи ‘‘саад̇хигамид̣̇ам̣, бхигкавз, д̣̇ияад̣дхасигкаабад̣̇асад̇ам̣ анвад̣̇д̇хамаасам̣ уд̣̇д̣̇зсам̣ ааг̇ажчад̇и, яад̇т̇а ад̇д̇агаамаа гулабуд̇д̇аа сигканд̇и. д̇иссо имаа, бхигкавз, сигкаа ад̇хисийласигкаа ад̇хижид̇д̇асигкаа ад̇хибан̃н̃аасигкаа’’д̇и (а. ни. 3.88) зд̇т̇а саад̇хигамид̣̇ам̣ д̣̇ияад̣дхасигкаабад̣̇асад̇ам̣ згаа ад̇хисийласигкаава ход̇и, д̇ам̣ сигканд̇оби д̇иссо сигкаа сигкад̇ийд̇и д̣̇ассид̇о, сигкаанам̣ анд̇ог̇ад̇хад̇д̇аа. яат̇аа жа згасса хад̇т̇ибад̣̇асса жад̇уусу годтаасзсу згасмим̣ годтаасз од̇ин̣н̣ааниби д̣̇вийсу д̇ийсу жад̇уусу годтаасзсу од̇ин̣н̣ааниби син̇г̇ааласасамиг̇аад̣̇ийнам̣ баад̣̇аани хад̇т̇ибад̣̇з самод̇хаанам̣ г̇ад̇аанзва хонд̇и. хад̇т̇ибад̣̇ад̇о амужжид̇ваа д̇ассзва анд̇ог̇ад̇хад̇д̇аа. звамзва згасмимби д̣̇вийсуби д̇ийсуби жад̇уусуби сажжзсу г̇ан̣анам̣ г̇ад̇аа д̇хаммаа жад̇уусу сажжзсу г̇ан̣анам̣ г̇ад̇аава хонд̇и; сажжаанам̣ анд̇ог̇ад̇хад̇д̇аад̇и д̣̇ияад̣дхасажжаг̇ан̣анам̣ г̇ад̇зби гусалад̇хаммз ‘‘саб̣б̣з д̇з жад̇уусу арияасажжзсу сан̇г̇ахам̣ г̇ажчанд̇ий’’д̇и ааха. ‘‘д̣̇угкз арияасажжз’’д̇иаад̣̇ийсу уд̣̇д̣̇зсабад̣̇зсу жзва ж̇аад̇иби д̣̇угкаад̇иаад̣̇ийсу нид̣̇д̣̇зсабад̣̇зсу жа яам̣ вад̇д̇аб̣б̣ам̣, д̇ам̣ висуд̣̇д̇химаг̇г̇з вуд̇д̇амзва. гзвалам̣ банзд̇т̇а д̣̇зсанаануггамова взд̣̇ид̇аб̣б̣о.
Nanu ca ‘‘catunnaṃ ariyasaccānaṃ kati kusalā kati akusalā kati abyākatāti pañhassa vissajjane samudayasaccaṃ akusalaṃ, maggasaccaṃ kusalaṃ, nirodhasaccaṃ abyākataṃ, dukkhasaccaṃ siyā kusalaṃ, siyā akusalaṃ, siyā abyākata’’nti (vibha. 216-217) āgatattā catubhūmakampi kusalaṃ diyaḍḍhameva saccaṃ bhajati. Atha kasmā mahāthero catūsu ariyasaccesu gaṇanaṃ gacchatīti āhāti? Saccānaṃ antogadhattā. Yathā hi ‘‘sādhikamidaṃ, bhikkhave, diyaḍḍhasikkhāpadasataṃ anvaddhamāsaṃ uddesaṃ āgacchati, yattha attakāmā kulaputtā sikkhanti. Tisso imā, bhikkhave, sikkhā adhisīlasikkhā adhicittasikkhā adhipaññāsikkhā’’ti (a. ni. 3.88) ettha sādhikamidaṃ diyaḍḍhasikkhāpadasataṃ ekā adhisīlasikkhāva hoti, taṃ sikkhantopi tisso sikkhā sikkhatīti dassito, sikkhānaṃ antogadhattā. Yathā ca ekassa hatthipadassa catūsu koṭṭhāsesu ekasmiṃ koṭṭhāse otiṇṇānipi dvīsu tīsu catūsu koṭṭhāsesu otiṇṇānipi siṅgālasasamigādīnaṃ pādāni hatthipade samodhānaṃ gatāneva honti. Hatthipadato amuccitvā tasseva antogadhattā. Evameva ekasmimpi dvīsupi tīsupi catūsupi saccesu gaṇanaṃ gatā dhammā catūsu saccesu gaṇanaṃ gatāva honti; saccānaṃ antogadhattāti diyaḍḍhasaccagaṇanaṃ gatepi kusaladhamme ‘‘sabbe te catūsu ariyasaccesu saṅgahaṃ gacchantī’’ti āha. ‘‘Dukkhe ariyasacce’’tiādīsu uddesapadesu ceva jātipi dukkhātiādīsu niddesapadesu ca yaṃ vattabbaṃ, taṃ visuddhimagge vuttameva. Kevalaṃ panettha desanānukkamova veditabbo.
301. яат̇аа хи чзго вилийвагааро суж̇аад̇ам̣ взл̣ум̣ лабхид̇ваа жад̇уд̇хаа чзд̇ваа д̇ад̇о д̇аяо годтаасз табзд̇ваа згам̣ г̇ан̣хид̇ваа бан̃жад̇хаа бхинд̣̇зяяа, д̇ад̇оби жад̇д̇ааро табзд̇ваа згам̣ г̇ан̣хид̇ваа паалзнд̇о бан̃жа бзсияо гарзяяа, д̇ад̇о жад̇ассо табзд̇ваа згам̣ г̇ан̣хид̇ваа гужчибхааг̇ам̣ бидтибхааг̇анд̇и д̣̇вид̇хаа паалзд̇ваа бидтибхааг̇ам̣ табзд̇ваа гужчибхааг̇ам̣ аад̣̇ааяа д̇ад̇о самуг̇г̇аб̣ийж̇анид̇аалаван̣даад̣̇инаанаббагаарам̣ взл̣увигад̇им̣ гарзяяа, со бидтибхааг̇ан̃жа ид̇араа жа жад̇ассо бзсияо ид̇арз жа жад̇д̇ааро годтаасз ид̇арз жа д̇аяо годтаасз гаммааяа на убанзссад̇ийд̇и на вад̇д̇аб̣б̣о. згаббахаарзна бана убанзд̇ум̣ на саггаа, анубуб̣б̣зна убанзссад̇и. звамзва аяам̣ махаат̇зроби вилийвагааро суж̇аад̇ам̣ взл̣ум̣ лабхид̇ваа жад̇д̇ааро годтаасз вияа, имам̣ маханд̇ам̣ суд̇д̇анд̇ам̣ аарабхид̇ваа жад̇уарияасажжавасзна маад̇игам̣ табзси. вилийвагаарасса д̇аяо годтаасз табзд̇ваа згам̣ г̇ахзд̇ваа д̇асса бан̃жад̇хаа гаран̣ам̣ вияа т̇зрасса д̇ийн̣и арияасажжаани табзд̇ваа згам̣ д̣̇угкасажжам̣ г̇ахзд̇ваа бхааж̇знд̇асса канд̇хавасзна бан̃жад̇хаа гаран̣ам̣. д̇ад̇о яат̇аа со вилийвагааро жад̇д̇ааро годтаасз табзд̇ваа згам̣ бхааг̇ам̣ г̇ахзд̇ваа бан̃жад̇хаа паалзси, звам̣ т̇зро жад̇д̇ааро аруубагканд̇хз табзд̇ваа руубагканд̇хам̣ вибхаж̇анд̇о жад̇д̇аари жа махаабхууд̇аани жад̇уннан̃жа махаабхууд̇аанам̣ убаад̣̇ааяа руубанд̇и бан̃жад̇хаа агааси. д̇ад̇о яат̇аа со вилийвагааро жад̇ассо бзсияо табзд̇ваа згам̣ г̇ахзд̇ваа гужчибхааг̇ам̣ бидтибхааг̇анд̇и д̣̇вид̇хаа паалзси, звам̣ т̇зро убаад̣̇ааяа руубан̃жа д̇иссо жа д̇хаад̇уяо табзд̇ваа згам̣ бат̇авийд̇хаад̇ум̣ вибхаж̇анд̇о аж̇жхад̇д̇игаб̣аахиравасзна д̣̇вид̇хаа д̣̇ассзси. яат̇аа со вилийвагааро бидтибхааг̇ам̣ табзд̇ваа гужчибхааг̇ам̣ аад̣̇ааяа наанаббагаарам̣ вилийвавигад̇им̣ агааси, звам̣ т̇зро б̣аахирам̣ бат̇авийд̇хаад̇ум̣ табзд̇ваа аж̇жхад̇д̇игам̣ бат̇авийд̇хаад̇ум̣ вийсад̇ияаа аагаарзхи вибхаж̇ид̇ваа д̣̇ассзд̇ум̣ гад̇амаа жаавусо, аж̇жхад̇д̇игаа бат̇авийд̇хаад̇ууд̇иаад̣̇имааха.
301. Yathā hi cheko vilīvakāro sujātaṃ veḷuṃ labhitvā catudhā chetvā tato tayo koṭṭhāse ṭhapetvā ekaṃ gaṇhitvā pañcadhā bhindeyya, tatopi cattāro ṭhapetvā ekaṃ gaṇhitvā phālento pañca pesiyo kareyya, tato catasso ṭhapetvā ekaṃ gaṇhitvā kucchibhāgaṃ piṭṭhibhāganti dvidhā phāletvā piṭṭhibhāgaṃ ṭhapetvā kucchibhāgaṃ ādāya tato samuggabījanitālavaṇṭādinānappakāraṃ veḷuvikatiṃ kareyya, so piṭṭhibhāgañca itarā ca catasso pesiyo itare ca cattāro koṭṭhāse itare ca tayo koṭṭhāse kammāya na upanessatīti na vattabbo. Ekappahārena pana upanetuṃ na sakkā, anupubbena upanessati. Evameva ayaṃ mahātheropi vilīvakāro sujātaṃ veḷuṃ labhitvā cattāro koṭṭhāse viya, imaṃ mahantaṃ suttantaṃ ārabhitvā catuariyasaccavasena mātikaṃ ṭhapesi. Vilīvakārassa tayo koṭṭhāse ṭhapetvā ekaṃ gahetvā tassa pañcadhā karaṇaṃ viya therassa tīṇi ariyasaccāni ṭhapetvā ekaṃ dukkhasaccaṃ gahetvā bhājentassa khandhavasena pañcadhā karaṇaṃ. Tato yathā so vilīvakāro cattāro koṭṭhāse ṭhapetvā ekaṃ bhāgaṃ gahetvā pañcadhā phālesi, evaṃ thero cattāro arūpakkhandhe ṭhapetvā rūpakkhandhaṃ vibhajanto cattāri ca mahābhūtāni catunnañca mahābhūtānaṃ upādāya rūpanti pañcadhā akāsi. Tato yathā so vilīvakāro catasso pesiyo ṭhapetvā ekaṃ gahetvā kucchibhāgaṃ piṭṭhibhāganti dvidhā phālesi, evaṃ thero upādāya rūpañca tisso ca dhātuyo ṭhapetvā ekaṃ pathavīdhātuṃ vibhajanto ajjhattikabāhiravasena dvidhā dassesi. Yathā so vilīvakāro piṭṭhibhāgaṃ ṭhapetvā kucchibhāgaṃ ādāya nānappakāraṃ vilīvavikatiṃ akāsi, evaṃ thero bāhiraṃ pathavīdhātuṃ ṭhapetvā ajjhattikaṃ pathavīdhātuṃ vīsatiyā ākārehi vibhajitvā dassetuṃ katamā cāvuso, ajjhattikā pathavīdhātūtiādimāha.
яат̇аа бана вилийвагааро бидтибхааг̇ан̃жа ид̇араа жа жад̇д̇ассо бзсияо ид̇арз жа жад̇д̇ааро годтаасз ид̇арз жа д̇аяо годтаасз анубуб̣б̣зна гаммааяа убанзссад̇и, на хи саггаа згаббахаарзна убанзд̇ум̣, звам̣ т̇зроби б̣аахиран̃жа бат̇авийд̇хаад̇ум̣ ид̇араа жа д̇иссо д̇хаад̇уяо убаад̣̇ааруубан̃жа ид̇арз жа жад̇д̇ааро аруубино канд̇хз ид̇араани жа д̇ийн̣и арияасажжаани анубуб̣б̣зна вибхаж̇ид̇ваа д̣̇ассзссад̇и, на хи саггаа згаббахаарзна д̣̇ассзд̇ум̣. абижа рааж̇абуд̇д̇уубамааяаби аяам̣ гамо вибхаавзд̇аб̣б̣о –
Yathā pana vilīvakāro piṭṭhibhāgañca itarā ca cattasso pesiyo itare ca cattāro koṭṭhāse itare ca tayo koṭṭhāse anupubbena kammāya upanessati, na hi sakkā ekappahārena upanetuṃ, evaṃ theropi bāhirañca pathavīdhātuṃ itarā ca tisso dhātuyo upādārūpañca itare ca cattāro arūpino khandhe itarāni ca tīṇi ariyasaccāni anupubbena vibhajitvā dassessati, na hi sakkā ekappahārena dassetuṃ. Apica rājaputtūpamāyapi ayaṃ kamo vibhāvetabbo –
зго гира махаарааж̇аа, д̇асса баросахассам̣ буд̇д̇аа. со д̇зсам̣ бил̣анд̇ханабаригкаарам̣ жад̇уусу бзл̣аасу табзд̇ваа ж̇здтабуд̇д̇асса аббзси – ‘‘ид̣̇ам̣ д̇з, д̇аад̇а, бхаад̇игаанам̣ бил̣анд̇ханабхан̣д̣ам̣ д̇ат̇ааруубз чан̣з самбад̇д̇з бил̣анд̇ханам̣ но д̣̇зхийд̇и яаажанд̇аанам̣ д̣̇ад̣̇зяяаасий’’д̇и. со ‘‘саад̇ху д̣̇зваа’’д̇и саараг̇аб̣бхз бадисаамзси, д̇ат̇ааруубз чан̣ад̣̇ивасз рааж̇абуд̇д̇аа ран̃н̃о санд̇игам̣ г̇анд̇ваа ‘‘бил̣анд̇ханам̣ но, д̇аад̇а, д̣̇зт̇а, нагкад̇д̇ам̣ гийл̣иссаамаа’’д̇и аахам̣су. д̇аад̇аа, ж̇здтабхаад̇игасса во хад̇т̇з маяаа бил̣анд̇ханам̣ табид̇ам̣, д̇ам̣ аахараабзд̇ваа бил̣анд̇хат̇аад̇и. д̇з саад̇хууд̇и бадиссун̣ид̇ваа д̇асса санд̇игам̣ г̇анд̇ваа, ‘‘д̇умхаагам̣ гира но хад̇т̇з бил̣анд̇ханабхан̣д̣ам̣, д̇ам̣ д̣̇зт̇аа’’д̇и аахам̣су. со звам̣ гариссаамийд̇и г̇аб̣бхам̣ виварид̇ваа, жад̇ассо бзл̣ааяо нийхарид̇ваа д̇иссо табзд̇ваа згам̣ виварид̇ваа, д̇ад̇о бан̃жа самуг̇г̇з нийхарид̇ваа жад̇д̇ааро табзд̇ваа згам̣ виварид̇ваа, д̇ад̇о бан̃жасу гаран̣д̣зсу нийхарид̇зсу жад̇д̇ааро табзд̇ваа згам̣ виварид̇ваа бид̇хаанам̣ бассз табзд̇ваа д̇ад̇о хад̇т̇уубаг̇абаад̣̇уубаг̇аад̣̇ийни наанаббагаараани бил̣анд̇ханаани нийхарид̇ваа ад̣̇ааси. со гин̃жааби ид̇арзхи жад̇уухи гаран̣д̣зхи ид̇арзхи жад̇уухи самуг̇г̇зхи ид̇араахи д̇ийхи бзл̣аахи на д̇аава бхааж̇зд̇ваа д̣̇зд̇и, анубуб̣б̣зна бана д̣̇ассад̇и, на хи саггаа згаббахаарзна д̣̇аад̇ум̣.
Eko kira mahārājā, tassa parosahassaṃ puttā. So tesaṃ piḷandhanaparikkhāraṃ catūsu peḷāsu ṭhapetvā jeṭṭhaputtassa appesi – ‘‘idaṃ te, tāta, bhātikānaṃ piḷandhanabhaṇḍaṃ tathārūpe chaṇe sampatte piḷandhanaṃ no dehīti yācantānaṃ dadeyyāsī’’ti. So ‘‘sādhu devā’’ti sāragabbhe paṭisāmesi, tathārūpe chaṇadivase rājaputtā rañño santikaṃ gantvā ‘‘piḷandhanaṃ no, tāta, detha, nakkhattaṃ kīḷissāmā’’ti āhaṃsu. Tātā, jeṭṭhabhātikassa vo hatthe mayā piḷandhanaṃ ṭhapitaṃ, taṃ āharāpetvā piḷandhathāti. Te sādhūti paṭissuṇitvā tassa santikaṃ gantvā, ‘‘tumhākaṃ kira no hatthe piḷandhanabhaṇḍaṃ, taṃ dethā’’ti āhaṃsu. So evaṃ karissāmīti gabbhaṃ vivaritvā, catasso peḷāyo nīharitvā tisso ṭhapetvā ekaṃ vivaritvā, tato pañca samugge nīharitvā cattāro ṭhapetvā ekaṃ vivaritvā, tato pañcasu karaṇḍesu nīharitesu cattāro ṭhapetvā ekaṃ vivaritvā pidhānaṃ passe ṭhapetvā tato hatthūpagapādūpagādīni nānappakārāni piḷandhanāni nīharitvā adāsi. So kiñcāpi itarehi catūhi karaṇḍehi itarehi catūhi samuggehi itarāhi tīhi peḷāhi na tāva bhājetvā deti, anupubbena pana dassati, na hi sakkā ekappahārena dātuṃ.
д̇ад̇т̇а махаарааж̇аа вияа бхаг̇аваа д̣̇адтаб̣б̣о. вуд̇д̇амби жзд̇ам̣ – ‘‘рааж̇аахамасми сзлаад̇и бхаг̇аваа, д̇хаммарааж̇аа ануд̇д̇аро’’д̇и (су. ни. 559). ж̇здтабуд̇д̇о вияа саарибуд̇д̇ад̇т̇зро, вуд̇д̇амби жзд̇ам̣ – ‘‘яам̣ ко д̇ам̣, бхигкавз, саммаа вад̣̇амаано вад̣̇зяяа, ‘бхаг̇авад̇о буд̇д̇о орасо мукад̇о ж̇аад̇о д̇хаммаж̇о д̇хамманиммид̇о д̇хаммад̣̇ааяаад̣̇о, но аамисад̣̇ааяаад̣̇о’д̇и саарибуд̇д̇амзва д̇ам̣ саммаа вад̣̇амаано вад̣̇зяяа, бхаг̇авад̇о буд̇д̇о…бз… но аамисад̣̇ааяаад̣̇о’’д̇и (ма. ни. 3.97). баросахассарааж̇абуд̇д̇аа вияа бхигкусан̇гхо д̣̇адтаб̣б̣о. вуд̇д̇амби жзд̇ам̣ –
Tattha mahārājā viya bhagavā daṭṭhabbo. Vuttampi cetaṃ – ‘‘rājāhamasmi selāti bhagavā, dhammarājā anuttaro’’ti (su. ni. 559). Jeṭṭhaputto viya sāriputtatthero, vuttampi cetaṃ – ‘‘yaṃ kho taṃ, bhikkhave, sammā vadamāno vadeyya, ‘bhagavato putto oraso mukhato jāto dhammajo dhammanimmito dhammadāyādo, no āmisadāyādo’ti sāriputtameva taṃ sammā vadamāno vadeyya, bhagavato putto…pe… no āmisadāyādo’’ti (ma. ni. 3.97). Parosahassarājaputtā viya bhikkhusaṅgho daṭṭhabbo. Vuttampi cetaṃ –
‘‘баросахассам̣ бхигкуунам̣, суг̇ад̇ам̣ баяирубаасад̇и;
‘‘Parosahassaṃ bhikkhūnaṃ, sugataṃ payirupāsati;
д̣̇зсзнд̇ам̣ вираж̇ам̣ д̇хаммам̣, ниб̣б̣аанам̣ агуд̇обхаяа’’нд̇и. (сам̣. ни. 1.216);
Desentaṃ virajaṃ dhammaṃ, nibbānaṃ akutobhaya’’nti. (saṃ. ni. 1.216);
ран̃н̃о д̇зсам̣ буд̇д̇аанам̣ бил̣анд̇ханам̣ жад̇уусу бзл̣аасу багкибид̇ваа ж̇здтабуд̇д̇асса хад̇т̇з табид̇агаало вияа бхаг̇авад̇о д̇хаммасзнаабад̇исса хад̇т̇з жад̇усажжаббагаасанааяа табид̇агаало, д̇знзвааха – ‘‘саарибуд̇д̇о, бхигкавз, баход̇и жад̇д̇аари арияасажжаани вид̇т̇аарзна аажигкид̇ум̣ д̣̇зсзд̇ум̣ бан̃н̃аабзд̇ум̣ бадтабзд̇ум̣ виварид̇ум̣ вибхаж̇ид̇ум̣ уд̇д̇аанийгаад̇у’’нд̇и (ма. ни. 3.371). д̇ат̇ааруубз кан̣з д̇зсам̣ рааж̇абуд̇д̇аанам̣ д̇ам̣ рааж̇аанам̣ убасан̇гамид̇ваа бил̣анд̇ханам̣ яаажанагаало вияа бхигкусан̇гхасса вассуубанааяигасамаяз ааг̇анд̇ваа д̇хаммад̣̇зсанааяа яаажид̇агаало. убагадтааяа гира вассуубанааяигааяа ид̣̇ам̣ суд̇д̇ам̣ д̣̇зсид̇ам̣. ран̃н̃о, ‘‘д̇аад̇аа, ж̇здтабхаад̇игасса во хад̇т̇з маяаа бил̣анд̇ханам̣ табид̇ам̣ д̇ам̣ аахараабзд̇ваа бил̣анд̇хат̇аа’’д̇и вуд̇д̇агаало вияа самб̣уд̣̇д̇хзнааби, ‘‘сзвзт̇а, бхигкавз, саарибуд̇д̇амог̇г̇аллаанз, бхаж̇ат̇а, бхигкавз, саарибуд̇д̇амог̇г̇аллаанз. бан̣д̣ид̇аа бхигкуу ануг̇г̇аахагаа саб̣рахмажаарийна’’нд̇и звам̣ д̇хаммасзнаабад̇ино санд̇игз бхигкуунам̣ бзсид̇агаало.
Rañño tesaṃ puttānaṃ piḷandhanaṃ catūsu peḷāsu pakkhipitvā jeṭṭhaputtassa hatthe ṭhapitakālo viya bhagavato dhammasenāpatissa hatthe catusaccappakāsanāya ṭhapitakālo, tenevāha – ‘‘sāriputto, bhikkhave, pahoti cattāri ariyasaccāni vitthārena ācikkhituṃ desetuṃ paññāpetuṃ paṭṭhapetuṃ vivarituṃ vibhajituṃ uttānīkātu’’nti (ma. ni. 3.371). Tathārūpe khaṇe tesaṃ rājaputtānaṃ taṃ rājānaṃ upasaṅkamitvā piḷandhanaṃ yācanakālo viya bhikkhusaṅghassa vassūpanāyikasamaye āgantvā dhammadesanāya yācitakālo. Upakaṭṭhāya kira vassūpanāyikāya idaṃ suttaṃ desitaṃ. Rañño, ‘‘tātā, jeṭṭhabhātikassa vo hatthe mayā piḷandhanaṃ ṭhapitaṃ taṃ āharāpetvā piḷandhathā’’ti vuttakālo viya sambuddhenāpi, ‘‘sevetha, bhikkhave, sāriputtamoggallāne, bhajatha, bhikkhave, sāriputtamoggallāne. Paṇḍitā bhikkhū anuggāhakā sabrahmacārīna’’nti evaṃ dhammasenāpatino santike bhikkhūnaṃ pesitakālo.
рааж̇абуд̇д̇зхи ран̃н̃о гат̇ам̣ суд̇ваа ж̇здтабхаад̇игасса санд̇игам̣ г̇анд̇ваа бил̣анд̇ханам̣ яаажид̇агаало вияа бхигкуухи сад̇т̇угат̇ам̣ суд̇ваа д̇хаммасзнаабад̇им̣ убасан̇гамма д̇хаммад̣̇зсанам̣ ааяаажид̇агаало. ж̇здтабхаад̇игасса г̇аб̣бхам̣ виварид̇ваа жад̇ассо бзл̣ааяо нийхарид̇ваа табанам̣ вияа д̇хаммасзнаабад̇исса имам̣ суд̇д̇анд̇ам̣ аарабхид̇ваа жад̇уннам̣ арияасажжаанам̣ васзна маад̇игааяа табанам̣. д̇иссо бзл̣ааяо табзд̇ваа згам̣ виварид̇ваа д̇ад̇о бан̃жасамуг̇г̇анийхаран̣ам̣ вияа д̇ийн̣и арияасажжаани табзд̇ваа д̣̇угкам̣ арияасажжам̣ вибхаж̇анд̇асса бан̃жагканд̇хад̣̇ассанам̣. жад̇д̇ааро самуг̇г̇з табзд̇ваа згам̣ виварид̇ваа д̇ад̇о бан̃жагаран̣д̣анийхаран̣ам̣ вияа жад̇д̇ааро аруубагканд̇хз табзд̇ваа згам̣ руубагканд̇хам̣ вибхаж̇анд̇асса жад̇умахаабхууд̇аубаад̣̇ааруубавасзна бан̃жагодтаасад̣̇ассанам̣.
Rājaputtehi rañño kathaṃ sutvā jeṭṭhabhātikassa santikaṃ gantvā piḷandhanaṃ yācitakālo viya bhikkhūhi satthukathaṃ sutvā dhammasenāpatiṃ upasaṅkamma dhammadesanaṃ āyācitakālo. Jeṭṭhabhātikassa gabbhaṃ vivaritvā catasso peḷāyo nīharitvā ṭhapanaṃ viya dhammasenāpatissa imaṃ suttantaṃ ārabhitvā catunnaṃ ariyasaccānaṃ vasena mātikāya ṭhapanaṃ. Tisso peḷāyo ṭhapetvā ekaṃ vivaritvā tato pañcasamugganīharaṇaṃ viya tīṇi ariyasaccāni ṭhapetvā dukkhaṃ ariyasaccaṃ vibhajantassa pañcakkhandhadassanaṃ. Cattāro samugge ṭhapetvā ekaṃ vivaritvā tato pañcakaraṇḍanīharaṇaṃ viya cattāro arūpakkhandhe ṭhapetvā ekaṃ rūpakkhandhaṃ vibhajantassa catumahābhūtaupādārūpavasena pañcakoṭṭhāsadassanaṃ.
302. жад̇д̇ааро гаран̣д̣з табзд̇ваа згам̣ виварид̇ваа бид̇хаанам̣ бассз табзд̇ваа хад̇т̇уубаг̇абаад̣̇уубаг̇аад̣̇ибил̣анд̇ханад̣̇аанам̣ вияа д̇ийн̣и махаабхууд̇аани убаад̣̇ааруубан̃жа табзд̇ваа згам̣ бат̇авийд̇хаад̇ум̣ вибхаж̇анд̇асса б̣аахирам̣ д̇аава бид̇хаанам̣ вияа табзд̇ваа аж̇жхад̇д̇игааяа бат̇авийд̇хаад̇уяаа наанаасабхаавад̇о вийсад̇ияаа аагаарзхи д̣̇ассанад̇т̇ам̣ ‘‘гад̇амаа жаавусо аж̇жхад̇д̇игаа бат̇авийд̇хаад̇уу’’д̇иаад̣̇иважанам̣.
302. Cattāro karaṇḍe ṭhapetvā ekaṃ vivaritvā pidhānaṃ passe ṭhapetvā hatthūpagapādūpagādipiḷandhanadānaṃ viya tīṇi mahābhūtāni upādārūpañca ṭhapetvā ekaṃ pathavīdhātuṃ vibhajantassa bāhiraṃ tāva pidhānaṃ viya ṭhapetvā ajjhattikāya pathavīdhātuyā nānāsabhāvato vīsatiyā ākārehi dassanatthaṃ ‘‘katamā cāvuso ajjhattikā pathavīdhātū’’tiādivacanaṃ.
д̇асса бана рааж̇абуд̇д̇асса д̇зхи жад̇уухи гаран̣д̣зхи жад̇уухи самуг̇г̇зхи д̇ийхи жа бзл̣аахи бажчаа анубуб̣б̣зна нийхарид̇ваа бил̣анд̇ханад̣̇аанам̣ вияа т̇зрассааби ид̇арзсан̃жа д̇ин̣н̣ам̣ махаабхууд̇аанам̣ убаад̣̇ааруубаанан̃жа жад̇уннам̣ аруубагканд̇хаанан̃жа д̇ин̣н̣ам̣ арияасажжаанан̃жа бажчаа анубуб̣б̣зна бхааж̇зд̇ваа д̣̇ассанам̣ взд̣̇ид̇аб̣б̣ам̣. яам̣ банзд̇ам̣ ‘‘гад̇амаа жаавусо, аж̇жхад̇д̇игаа бат̇авийд̇хаад̇уу’’д̇иаад̣̇и вуд̇д̇ам̣. д̇ад̇т̇а аж̇жхад̇д̇ам̣ бажжад̇д̇анд̇и убхаяамбзд̇ам̣ нияагаад̇хиважанамзва. гагкал̣анд̇и т̇ад̣̇д̇хам̣. кариг̇ад̇анд̇и парусам̣. убаад̣̇иннанд̇и на гаммасамудтаанамзва, ависзсзна бана сарийрадтагассзд̇ам̣ г̇ахан̣ам̣. сарийрадтаган̃хи убаад̣̇иннам̣ ваа ход̇у, анубаад̣̇иннам̣ ваа, аад̣̇иннаг̇ахид̇абараамадтавасзна саб̣б̣ам̣ убаад̣̇иннамзва наама. сзяяат̇ид̣̇ам̣ – гзсаа ломаа…бз… уд̣̇арияам̣ гарийсанд̇и ид̣̇ам̣ д̇хаад̇угаммадтаанигасса гулабуд̇д̇асса аж̇жхад̇д̇игабат̇авийд̇хаад̇увасзна д̇аава гаммадтаанам̣ вибхад̇д̇ам̣. зд̇т̇а бана манасигаарам̣ аарабхид̇ваа вибассанам̣ вад̣дхзд̇ваа арахад̇д̇ам̣ г̇ахзд̇угаамзна яам̣ гаад̇аб̣б̣ам̣, д̇ам̣ саб̣б̣ам̣ висуд̣̇д̇химаг̇г̇з вид̇т̇аарид̇амзва. мад̇т̇алун̇г̇ам̣ бана на ид̇ха баал̣иаарул̣хам̣. д̇амби аахарид̇ваа, висуд̣̇д̇химаг̇г̇з вуд̇д̇анаязнзва ван̣н̣асан̣таанаад̣̇ивасзна вавад̇т̇абзд̇ваа, ‘‘аяамби ажзд̇анаа аб̣яаагад̇аа сун̃н̃аа т̇ад̣̇д̇хаа бат̇авийд̇хаад̇у зваа’’д̇и манаси гаад̇аб̣б̣ам̣. яам̣ ваа банан̃н̃амбийд̇и ид̣̇ам̣ ид̇арзсу д̇ийсу годтаасзсу ануг̇ад̇ааяа бат̇авийд̇хаад̇уяаа г̇ахан̣ад̇т̇ам̣ вуд̇д̇ам̣. яаа жзва ко бана аж̇жхад̇д̇игаа бат̇авийд̇хаад̇ууд̇и яаа жа аяам̣ вуд̇д̇аббагаараа аж̇жхад̇д̇игаа бат̇авийд̇хаад̇у. яаа жа б̣аахираад̇и яаа жа вибхан̇г̇з, ‘‘аяо лохам̣ д̇ибу сийса’’нд̇иаад̣̇инаа (вибха. 173) наязна ааг̇ад̇аа б̣аахираа бат̇авийд̇хаад̇у.
Tassa pana rājaputtassa tehi catūhi karaṇḍehi catūhi samuggehi tīhi ca peḷāhi pacchā anupubbena nīharitvā piḷandhanadānaṃ viya therassāpi itaresañca tiṇṇaṃ mahābhūtānaṃ upādārūpānañca catunnaṃ arūpakkhandhānañca tiṇṇaṃ ariyasaccānañca pacchā anupubbena bhājetvā dassanaṃ veditabbaṃ. Yaṃ panetaṃ ‘‘katamā cāvuso, ajjhattikā pathavīdhātū’’tiādi vuttaṃ. Tattha ajjhattaṃ paccattanti ubhayampetaṃ niyakādhivacanameva. Kakkhaḷanti thaddhaṃ. Kharigatanti pharusaṃ. Upādinnanti na kammasamuṭṭhānameva, avisesena pana sarīraṭṭhakassetaṃ gahaṇaṃ. Sarīraṭṭhakañhi upādinnaṃ vā hotu, anupādinnaṃ vā, ādinnagahitaparāmaṭṭhavasena sabbaṃ upādinnameva nāma. Seyyathidaṃ – kesā lomā…pe… udariyaṃ karīsanti idaṃ dhātukammaṭṭhānikassa kulaputtassa ajjhattikapathavīdhātuvasena tāva kammaṭṭhānaṃ vibhattaṃ. Ettha pana manasikāraṃ ārabhitvā vipassanaṃ vaḍḍhetvā arahattaṃ gahetukāmena yaṃ kātabbaṃ, taṃ sabbaṃ visuddhimagge vitthāritameva. Matthaluṅgaṃ pana na idha pāḷiāruḷhaṃ. Tampi āharitvā, visuddhimagge vuttanayeneva vaṇṇasaṇṭhānādivasena vavatthapetvā, ‘‘ayampi acetanā abyākatā suññā thaddhā pathavīdhātu evā’’ti manasi kātabbaṃ. Yaṃ vā panaññampīti idaṃ itaresu tīsu koṭṭhāsesu anugatāya pathavīdhātuyā gahaṇatthaṃ vuttaṃ. Yā ceva kho pana ajjhattikā pathavīdhātūti yā ca ayaṃ vuttappakārā ajjhattikā pathavīdhātu. Yā ca bāhirāti yā ca vibhaṅge, ‘‘ayo lohaṃ tipu sīsa’’ntiādinā (vibha. 173) nayena āgatā bāhirā pathavīdhātu.
зд̇д̇аавад̇аа т̇зрзна аж̇жхад̇д̇игаа бат̇авийд̇хаад̇у наанаасабхаавад̇о вийсад̇ияаа аагаарзхи вид̇т̇аарзна д̣̇ассид̇аа, б̣аахираа сан̇кзбзна. гасмаа? яасмин̃хи таанз сад̇д̇аанам̣ аалаяо ниганд̇и бад̇т̇анаа барияудтаанам̣ г̇ахан̣ам̣ бараамаасо б̣алаваа ход̇и, д̇ад̇т̇а д̇зсам̣ аалаяаад̣̇ийнам̣ уд̣̇д̇харан̣ад̇т̇ам̣ б̣уд̣̇д̇хаа ваа б̣уд̣̇д̇хасаавагаа ваа вид̇т̇аарагат̇ам̣ гат̇знд̇и. яад̇т̇а бана на б̣алаваа, д̇ад̇т̇а гад̇д̇аб̣б̣агижжаабхаавад̇о сан̇кзбзна гат̇знд̇и. яат̇аа хи гассаго кзд̇д̇ам̣ гасамаано яад̇т̇а мууласанд̇аанагаанам̣ б̣алавад̇ааяа нан̇г̇алам̣ лаг̇г̇ад̇и, д̇ад̇т̇а г̇он̣з табзд̇ваа бам̣сум̣ вияуухид̇ваа мууласанд̇аанагаани чзд̇ваа чзд̇ваа уд̣̇д̇харанд̇о б̣ахум̣ вааяаамам̣ гарод̇и. яад̇т̇а д̇аани над̇т̇и, д̇ад̇т̇а б̣алавам̣ баяог̇ам̣ гад̇ваа г̇он̣з бидтияам̣ бахарамаано гасад̇иязва, звам̣самбад̣̇амид̣̇ам̣ взд̣̇ид̇аб̣б̣ам̣.
Ettāvatā therena ajjhattikā pathavīdhātu nānāsabhāvato vīsatiyā ākārehi vitthārena dassitā, bāhirā saṅkhepena. Kasmā? Yasmiñhi ṭhāne sattānaṃ ālayo nikanti patthanā pariyuṭṭhānaṃ gahaṇaṃ parāmāso balavā hoti, tattha tesaṃ ālayādīnaṃ uddharaṇatthaṃ buddhā vā buddhasāvakā vā vitthārakathaṃ kathenti. Yattha pana na balavā, tattha kattabbakiccābhāvato saṅkhepena kathenti. Yathā hi kassako khettaṃ kasamāno yattha mūlasantānakānaṃ balavatāya naṅgalaṃ laggati, tattha goṇe ṭhapetvā paṃsuṃ viyūhitvā mūlasantānakāni chetvā chetvā uddharanto bahuṃ vāyāmaṃ karoti. Yattha tāni natthi, tattha balavaṃ payogaṃ katvā goṇe piṭṭhiyaṃ paharamāno kasatiyeva, evaṃsampadamidaṃ veditabbaṃ.
бат̇авийд̇хаад̇урзвзсаад̇и д̣̇увид̇хаабзсаа т̇ад̣̇д̇хадтзна гагкал̣адтзна парусадтзна згалагкан̣аа бат̇авийд̇хаад̇уязва , аавусод̇и аж̇жхад̇д̇игам̣ б̣аахирааяа сад̣̇д̇хим̣ яож̇зд̇ваа д̣̇ассзд̇и. яасмаа б̣аахирааяа бат̇авийд̇хаад̇уяаа ажзд̇анаабхааво баагадо, на аж̇жхад̇д̇игааяа, д̇асмаа саа б̣аахирааяа сад̣̇д̇хим̣ згасад̣̇исаа ажзд̇анааязваад̇и г̇ан̣ханд̇асса сукабариг̇г̇ахо ход̇и. яат̇аа гим̣? яат̇аа д̣̇анд̇зна г̇он̣зна сад̣̇д̇хим̣ яож̇ид̇о ад̣̇анд̇о гад̇ибаахамзва висуугааяад̇и вибпанд̣̇ад̇и, ат̇а на жирассзва д̣̇амат̇ам̣ убзд̇и. звам̣ аж̇жхад̇д̇игааби б̣аахирааяа сад̣̇д̇хим̣ згасад̣̇исаад̇и г̇ан̣ханд̇асса гад̇ибаахамзва ажзд̇анаабхааво на убадтаад̇и, ат̇а на жирзнзвассаа ажзд̇анаабхааво баагадо ход̇и. д̇ам̣ нзд̇ам̣ мамаад̇и д̇ам̣ убхаяамби на зд̇ам̣ мама, на зсохамасми, на зсо мз ад̇д̇аад̇и звам̣ яат̇аабхууд̇ам̣ саммаббан̃н̃ааяа д̣̇адтаб̣б̣ам̣. яат̇аабхууд̇анд̇и яат̇аасабхаавам̣, д̇ан̃хи анижжаад̣̇исабхаавам̣, д̇асмаа анижжам̣ д̣̇угкаманад̇д̇аад̇и звам̣ д̣̇адтаб̣б̣анд̇и ад̇т̇о.
Pathavīdhāturevesāti duvidhāpesā thaddhaṭṭhena kakkhaḷaṭṭhena pharusaṭṭhena ekalakkhaṇā pathavīdhātuyeva , āvusoti ajjhattikaṃ bāhirāya saddhiṃ yojetvā dasseti. Yasmā bāhirāya pathavīdhātuyā acetanābhāvo pākaṭo, na ajjhattikāya, tasmā sā bāhirāya saddhiṃ ekasadisā acetanāyevāti gaṇhantassa sukhapariggaho hoti. Yathā kiṃ? Yathā dantena goṇena saddhiṃ yojito adanto katipāhameva visūkāyati vipphandati, atha na cirasseva damathaṃ upeti. Evaṃ ajjhattikāpi bāhirāya saddhiṃ ekasadisāti gaṇhantassa katipāhameva acetanābhāvo na upaṭṭhāti, atha na cirenevassā acetanābhāvo pākaṭo hoti. Taṃ netaṃ mamāti taṃ ubhayampi na etaṃ mama, na esohamasmi, na eso me attāti evaṃ yathābhūtaṃ sammappaññāya daṭṭhabbaṃ. Yathābhūtanti yathāsabhāvaṃ, tañhi aniccādisabhāvaṃ, tasmā aniccaṃ dukkhamanattāti evaṃ daṭṭhabbanti attho.
ход̇и ко со, аавусод̇и гасмаа аарабхи? б̣аахирааабод̇хаад̇увасзна б̣аахирааяа бат̇авийд̇хаад̇уяаа винаасам̣ д̣̇ассзд̇ваа д̇ад̇о висзсад̇арзна убаад̣̇иннааяа сарийрадтагабат̇авийд̇хаад̇уяаа винаасад̣̇ассанад̇т̇ам̣. багуббад̇ийд̇и аабосам̣ваддавасзна вад̣дхамаанаа губбад̇и. анд̇арахид̇аа д̇асмим̣ самаяз б̣аахираа бат̇авийд̇хаад̇у ход̇ийд̇и д̇асмим̣ самаяз годисад̇асахассажаггаваал̣з каарод̣̇агзна вилийяамаанаа уд̣̇агаануг̇ад̇аа худ̇ваа саб̣б̣аа баб̣б̣ад̇аад̣̇ивасзна сан̣тид̇аа бат̇авийд̇хаад̇у анд̇арахид̇аа ход̇и. вилийяид̇ваа уд̣̇агамзва ход̇и. д̇аава махаллигааяаад̇и д̇аава маханд̇ааяа.
Hoti kho so, āvusoti kasmā ārabhi? Bāhiraāpodhātuvasena bāhirāya pathavīdhātuyā vināsaṃ dassetvā tato visesatarena upādinnāya sarīraṭṭhakapathavīdhātuyā vināsadassanatthaṃ. Pakuppatīti āposaṃvaṭṭavasena vaḍḍhamānā kuppati. Antarahitā tasmiṃ samaye bāhirā pathavīdhātu hotīti tasmiṃ samaye koṭisatasahassacakkavāḷe khārodakena vilīyamānā udakānugatā hutvā sabbā pabbatādivasena saṇṭhitā pathavīdhātu antarahitā hoti. Vilīyitvā udakameva hoti. Tāva mahallikāyāti tāva mahantāya.
д̣̇увз сад̇асахассаани, жад̇д̇аари нахуд̇аани жа;
Duve satasahassāni, cattāri nahutāni ca;
зд̇д̇агам̣ б̣ахалад̇д̇зна, сан̇каад̇ааяам̣ васунд̇хараад̇и. –
Ettakaṃ bahalattena, saṅkhātāyaṃ vasundharāti. –
звам̣ б̣ахалад̇д̇знзва маханд̇ааяа, вид̇т̇аарад̇о бана годисад̇асахассажаггаваал̣аббамаан̣ааяа. анижжад̇аад̇и худ̇ваа абхаавад̇аа. каяад̇хаммад̇аад̇и каяам̣ г̇аманасабхаавад̇аа . ваяад̇хаммад̇аад̇и ваяам̣ г̇аманасабхаавад̇аа. вибарин̣аамад̇хаммад̇аад̇и багад̇ивиж̇аханасабхаавад̇аа, ид̇и саб̣б̣зхиби имзхи бад̣̇зхи анижжалагкан̣амзва вуд̇д̇ам̣. яам̣ бана анижжам̣, д̇ам̣ д̣̇угкам̣. яам̣ д̣̇угкам̣, д̇ам̣ анад̇д̇аад̇и д̇ийн̣иби лагкан̣аани ааг̇ад̇аанзва хонд̇и. мад̇д̇адтагассаад̇и барид̇д̇адтид̇игасса, д̇ад̇т̇а д̣̇вийхаагаарзхи имасса гааяасса барид̇д̇адтид̇ид̇аа взд̣̇ид̇аб̣б̣аа тид̇ибарид̇д̇ад̇ааяа жа сарасабарид̇д̇ад̇ааяа жа. аяан̃хи ад̇ийд̇з жид̇д̇агкан̣з ж̇ийвид̇т̇а, на ж̇ийвад̇и, на ж̇ийвиссад̇и. анааг̇ад̇з жид̇д̇агкан̣з ж̇ийвиссад̇и, на ж̇ийвад̇и, на ж̇ийвид̇т̇а. бажжуббаннз жид̇д̇агкан̣з ж̇ийвад̇и , на ж̇ийвид̇т̇а, на ж̇ийвиссад̇ийд̇и вужжад̇и.
Evaṃ bahalatteneva mahantāya, vitthārato pana koṭisatasahassacakkavāḷappamāṇāya. Aniccatāti hutvā abhāvatā. Khayadhammatāti khayaṃ gamanasabhāvatā . Vayadhammatāti vayaṃ gamanasabhāvatā. Vipariṇāmadhammatāti pakativijahanasabhāvatā, iti sabbehipi imehi padehi aniccalakkhaṇameva vuttaṃ. Yaṃ pana aniccaṃ, taṃ dukkhaṃ. Yaṃ dukkhaṃ, taṃ anattāti tīṇipi lakkhaṇāni āgatāneva honti. Mattaṭṭhakassāti parittaṭṭhitikassa, tattha dvīhākārehi imassa kāyassa parittaṭṭhititā veditabbā ṭhitiparittatāya ca sarasaparittatāya ca. Ayañhi atīte cittakkhaṇe jīvittha, na jīvati, na jīvissati. Anāgate cittakkhaṇe jīvissati, na jīvati, na jīvittha. Paccuppanne cittakkhaṇe jīvati , na jīvittha, na jīvissatīti vuccati.
‘‘ж̇ийвид̇ам̣ ад̇д̇абхааво жа, сукад̣̇угкаа жа гзвалаа;
‘‘Jīvitaṃ attabhāvo ca, sukhadukkhā ca kevalā;
згажид̇д̇асамааяуд̇д̇аа, лаху со вад̇д̇ад̇з кан̣о’’д̇и. –
Ekacittasamāyuttā, lahu so vattate khaṇo’’ti. –
ид̣̇ам̣ зд̇ассзва барид̇д̇адтид̇ид̣̇ассанад̇т̇ам̣ вуд̇д̇ам̣. звам̣ тид̇ибарид̇д̇ад̇ааяа барид̇д̇адтид̇ид̇аа взд̣̇ид̇аб̣б̣аа.
Idaṃ etasseva parittaṭṭhitidassanatthaṃ vuttaṃ. Evaṃ ṭhitiparittatāya parittaṭṭhititā veditabbā.
ассаасабассаасуубаниб̣ад̣̇д̇хаад̣̇ибхаавзна банасса сарасабарид̇д̇ад̇аа взд̣̇ид̇аб̣б̣аа. сад̇д̇аанан̃хи ассаасуубаниб̣ад̣̇д̇хам̣ ж̇ийвид̇ам̣, бассаасуубаниб̣ад̣̇д̇хам̣ ж̇ийвид̇ам̣, ассаасабассаасуубаниб̣ад̣̇д̇хам̣ ж̇ийвид̇ам̣, махаабхууд̇уубаниб̣ад̣̇д̇хам̣ ж̇ийвид̇ам̣, габ̣ал̣ийгаараахааруубаниб̣ад̣̇д̇хам̣ ж̇ийвид̇ам̣, вин̃н̃аан̣уубаниб̣ад̣̇д̇хам̣ ж̇ийвид̇анд̇и висуд̣̇д̇химаг̇г̇з вид̇т̇аарид̇ам̣.
Assāsapassāsūpanibaddhādibhāvena panassa sarasaparittatā veditabbā. Sattānañhi assāsūpanibaddhaṃ jīvitaṃ, passāsūpanibaddhaṃ jīvitaṃ, assāsapassāsūpanibaddhaṃ jīvitaṃ, mahābhūtūpanibaddhaṃ jīvitaṃ, kabaḷīkārāhārūpanibaddhaṃ jīvitaṃ, viññāṇūpanibaddhaṃ jīvitanti visuddhimagge vitthāritaṃ.
д̇ан̣хубаад̣̇иннассаад̇и д̇ан̣хааяа аад̣̇иннаг̇ахид̇абараамадтасса аханд̇и ваа маманд̇и ваа асмийд̇и ваа. ат̇а кваасса нод̇звзд̇т̇а ход̇ийд̇и ат̇а ко асса бхигкуно звам̣ д̇ийн̣и лагкан̣аани ааробзд̇ваа бассанд̇асса зд̇т̇а аж̇жхад̇д̇игааяа бат̇авийд̇хаад̇уяаа аханд̇и ваад̇иаад̣̇и д̇ивид̇хо д̇ан̣хаамаанад̣̇идтиг̇г̇аахо нод̇зва ход̇и, на ход̇иязваад̇и ад̇т̇о. яат̇аа жа аабод̇хаад̇увасзна, звам̣ д̇зж̇од̇хаад̇увааяод̇хаад̇увасзнаби б̣аахирааяа бат̇авийд̇хаад̇уяаа анд̇арад̇хаанам̣ ход̇и. ид̇ха бана згам̣язва ааг̇ад̇ам̣. ид̇арааниби ад̇т̇ад̇о взд̣̇ид̇аб̣б̣аани.
Taṇhupādinnassāti taṇhāya ādinnagahitaparāmaṭṭhassa ahanti vā mamanti vā asmīti vā. Atha khvāssa notevettha hotīti atha kho assa bhikkhuno evaṃ tīṇi lakkhaṇāni āropetvā passantassa ettha ajjhattikāya pathavīdhātuyā ahanti vātiādi tividho taṇhāmānadiṭṭhiggāho noteva hoti, na hotiyevāti attho. Yathā ca āpodhātuvasena, evaṃ tejodhātuvāyodhātuvasenapi bāhirāya pathavīdhātuyā antaradhānaṃ hoti. Idha pana ekaṃyeva āgataṃ. Itarānipi atthato veditabbāni.
д̇ан̃жз, аавусод̇и ид̇ха д̇асса д̇хаад̇угаммадтаанигасса бхигкуно сод̇ад̣̇ваарз бариг̇г̇ахам̣ бадтабзнд̇о б̣алам̣ д̣̇ассзд̇и. аггосанд̇ийд̇и д̣̇асахи аггосавад̇т̇уухи аггосанд̇и. барибхаасанд̇ийд̇и д̇аяаа ид̣̇ан̃жид̣̇ан̃жа гад̇ам̣, зван̃жа зван̃жа д̇ам̣ гариссаамаад̇и ваажааяа барибхаасанд̇и. росзнд̇ийд̇и гхаддзнд̇и. вихзсзнд̇ийд̇и д̣̇угкаабзнд̇и, саб̣б̣ам̣ ваажааяа гхадданамзва вуд̇д̇ам̣. со званд̇и со д̇хаад̇угаммадтааниго звам̣ самбаж̇аанаад̇и. уббаннаа ко мз аяанд̇и самбад̇ивад̇д̇амаануббаннабхаавзна жа самуд̣̇аажааруббаннабхаавзна жа уббаннаа. сод̇асампассаж̇аад̇и убаниссаяавасзна сод̇асампассад̇о ж̇аад̇аа сод̇ад̣̇ваараж̇аванавзд̣̇анаа, пассо анижжод̇и сод̇асампассо худ̇ваа абхаавадтзна анижжод̇и бассад̇и. взд̣̇анаад̣̇аяоби сод̇асампассасамбаяуд̇д̇аава взд̣̇ид̇аб̣б̣аа. д̇хаад̇аарамман̣амзваад̇и д̇хаад̇усан̇каад̇амзва аарамман̣ам̣. багканд̣̇ад̇ийд̇и од̇арад̇и. басийд̣̇ад̇ийд̇и д̇асмим̣ аарамман̣з басийд̣̇ад̇и, бхуммаважанамзва ваа зд̇ам̣. б̣яан̃ж̇анасанд̇хивасзна ‘‘д̇хаад̇аарамман̣амзваа’’д̇и вуд̇д̇ам̣, д̇хаад̇аарамман̣зязваад̇и аяамзд̇т̇а ад̇т̇о. ад̇химужжад̇ийд̇и д̇хаад̇увасзна званд̇и ад̇химогкам̣ лабхад̇и, на раж̇ж̇ад̇и, на д̣̇уссад̇и. аяан̃хи сод̇ад̣̇ваарамхи аарамман̣з аабаат̇аг̇ад̇з муулабарин̃н̃ааааг̇анд̇угад̇аавагаалигавасзна бариг̇г̇ахам̣ гарод̇и, д̇асса вид̇т̇аарагат̇аа сад̇ибадтаанз сад̇исамбаж̇ан̃н̃абаб̣б̣з вуд̇д̇аа. саа бана д̇ад̇т̇а жагкуд̣̇вааравасзна вуд̇д̇аа, ид̇ха сод̇ад̣̇вааравасзна взд̣̇ид̇аб̣б̣аа.
Tañce, āvusoti idha tassa dhātukammaṭṭhānikassa bhikkhuno sotadvāre pariggahaṃ paṭṭhapento balaṃ dasseti. Akkosantīti dasahi akkosavatthūhi akkosanti. Paribhāsantīti tayā idañcidañca kataṃ, evañca evañca taṃ karissāmāti vācāya paribhāsanti. Rosentīti ghaṭṭenti. Vihesentīti dukkhāpenti, sabbaṃ vācāya ghaṭṭanameva vuttaṃ. So evanti so dhātukammaṭṭhāniko evaṃ sampajānāti. Uppannā kho me ayanti sampativattamānuppannabhāvena ca samudācāruppannabhāvena ca uppannā. Sotasamphassajāti upanissayavasena sotasamphassato jātā sotadvārajavanavedanā, phasso aniccoti sotasamphasso hutvā abhāvaṭṭhena aniccoti passati. Vedanādayopi sotasamphassasampayuttāva veditabbā. Dhātārammaṇamevāti dhātusaṅkhātameva ārammaṇaṃ. Pakkhandatīti otarati. Pasīdatīti tasmiṃ ārammaṇe pasīdati, bhummavacanameva vā etaṃ. Byañjanasandhivasena ‘‘dhātārammaṇamevā’’ti vuttaṃ, dhātārammaṇeyevāti ayamettha attho. Adhimuccatīti dhātuvasena evanti adhimokkhaṃ labhati, na rajjati, na dussati. Ayañhi sotadvāramhi ārammaṇe āpāthagate mūlapariññāāgantukatāvakālikavasena pariggahaṃ karoti, tassa vitthārakathā satipaṭṭhāne satisampajaññapabbe vuttā. Sā pana tattha cakkhudvāravasena vuttā, idha sotadvāravasena veditabbā.
звам̣ гад̇абариг̇г̇ахасса хи д̇хаад̇угаммадтаанигасса б̣алававибассагасса сажзби жагкуд̣̇ваараад̣̇ийсу аарамман̣з аабаат̇аг̇ад̇з аяонисо ааваж̇ж̇анам̣ уббаж̇ж̇ад̇и, водтаб̣б̣анам̣ бад̇ваа згам̣ д̣̇вз ваарз аасзванам̣ лабхид̇ваа жид̇д̇ам̣ бхаван̇г̇амзва од̇арад̇и, на рааг̇аад̣̇ивасзна уббаж̇ж̇ад̇и, аяам̣ годиббад̇д̇о д̇игкавибассаго. абарасса рааг̇аад̣̇ивасзна згам̣ ваарам̣ ж̇аванам̣ ж̇авад̇и, ж̇аванабарияосаанз бана рааг̇аад̣̇ивасзна звам̣ мз ж̇аванам̣ ж̇авид̇анд̇и ааваж̇ж̇ад̇о аарамман̣ам̣ бариг̇г̇ахид̇амзва ход̇и, буна ваарам̣ д̇ат̇аа на ж̇авад̇и. абарасса згаваарам̣ звам̣ ааваж̇ж̇ад̇о буна д̣̇уд̇ияаваарам̣ рааг̇аад̣̇ивасзна ж̇аванам̣ ж̇авад̇иязва, д̣̇уд̇ияаваараавасаанз бана звам̣ мз ж̇аванам̣ ж̇авид̇анд̇и ааваж̇ж̇ад̇о аарамман̣ам̣ бариг̇г̇ахид̇амзва ход̇и, д̇ад̇ияаваарз д̇ат̇аа на уббаж̇ж̇ад̇и. зд̇т̇а бана батамо ад̇ид̇игко, д̇ад̇ияо ад̇иманд̣̇о, д̣̇уд̇ияасса бана васзна имасмим̣ суд̇д̇з, ладугигобамз, инд̣̇рияабхааванз жа аяамад̇т̇о взд̣̇ид̇аб̣б̣о.
Evaṃ katapariggahassa hi dhātukammaṭṭhānikassa balavavipassakassa sacepi cakkhudvārādīsu ārammaṇe āpāthagate ayoniso āvajjanaṃ uppajjati, voṭṭhabbanaṃ patvā ekaṃ dve vāre āsevanaṃ labhitvā cittaṃ bhavaṅgameva otarati, na rāgādivasena uppajjati, ayaṃ koṭippatto tikkhavipassako. Aparassa rāgādivasena ekaṃ vāraṃ javanaṃ javati, javanapariyosāne pana rāgādivasena evaṃ me javanaṃ javitanti āvajjato ārammaṇaṃ pariggahitameva hoti, puna vāraṃ tathā na javati. Aparassa ekavāraṃ evaṃ āvajjato puna dutiyavāraṃ rāgādivasena javanaṃ javatiyeva, dutiyavārāvasāne pana evaṃ me javanaṃ javitanti āvajjato ārammaṇaṃ pariggahitameva hoti, tatiyavāre tathā na uppajjati. Ettha pana paṭhamo atitikkho, tatiyo atimando, dutiyassa pana vasena imasmiṃ sutte, laṭukikopame, indriyabhāvane ca ayamattho veditabbo.
звам̣ сод̇ад̣̇ваарз бариг̇г̇ахид̇авасзна д̇хаад̇угаммадтаанигасса б̣алам̣ д̣̇ассзд̇ваа ид̣̇аани гааяад̣̇ваарз д̣̇ийбзнд̇о д̇ан̃жз, аавусод̇иаад̣̇имааха. анидтаарамман̣ан̃хи бад̇ваа д̣̇вийсу ваарзсу гиламад̇и сод̇ад̣̇ваарз жа гааяад̣̇ваарз жа. д̇асмаа яат̇аа наама кзд̇д̇ассаамий бурисо гуд̣̇аалам̣ г̇ахзд̇ваа кзд̇д̇ам̣ анусан̃жаранд̇о яад̇т̇а ваа д̇ад̇т̇а ваа мад̇д̇игабин̣д̣ам̣ ад̣̇ад̇ваа д̣̇уб̣б̣аладтаанзсуязва гуд̣̇аалзна бхуумим̣ бхинд̣̇ид̇ваа сад̇ин̣амад̇д̇игабин̣д̣ам̣ д̣̇зд̇и. звамзва махаат̇зро анааг̇ад̇з сигкаагаамаа бад̇хаанагаммигаа гулабуд̇д̇аа имзсу д̣̇ваарзсу сам̣варам̣ бадтабзд̇ваа киббамзва ж̇аад̇иж̇араамаран̣асса анд̇ам̣ гариссанд̇ийд̇и имзсуязва д̣̇вийсу д̣̇ваарзсу г̇аал̣хам̣ гад̇ваа сам̣варам̣ д̣̇зсзнд̇о имам̣ д̣̇зсанам̣ аарабхи.
Evaṃ sotadvāre pariggahitavasena dhātukammaṭṭhānikassa balaṃ dassetvā idāni kāyadvāre dīpento tañce, āvusotiādimāha. Aniṭṭhārammaṇañhi patvā dvīsu vāresu kilamati sotadvāre ca kāyadvāre ca. Tasmā yathā nāma khettassāmī puriso kudālaṃ gahetvā khettaṃ anusañcaranto yattha vā tattha vā mattikapiṇḍaṃ adatvā dubbalaṭṭhānesuyeva kudālena bhūmiṃ bhinditvā satiṇamattikapiṇḍaṃ deti. Evameva mahāthero anāgate sikkhākāmā padhānakammikā kulaputtā imesu dvāresu saṃvaraṃ paṭṭhapetvā khippameva jātijarāmaraṇassa antaṃ karissantīti imesuyeva dvīsu dvāresu gāḷhaṃ katvā saṃvaraṃ desento imaṃ desanaṃ ārabhi.
д̇ад̇т̇а самуд̣̇аажаранд̇ийд̇и убаггаманд̇и. баан̣исампассзнаад̇и баан̣иббахаарзна, ид̇арзсуби зсзва наяо. д̇ат̇аабхууд̇од̇и д̇ат̇аасабхааво. яат̇аабхууд̇асминд̇и яат̇аасабхаавз. гаманд̇ийд̇и бавад̇д̇анд̇и. звам̣ б̣уд̣̇д̇хам̣ ануссарад̇од̇иаад̣̇ийсу ид̇иби со бхаг̇аваад̇иаад̣̇инаа наязна ануссаранд̇оби б̣уд̣̇д̇хам̣ ануссарад̇и, вуд̇д̇ам̣ ко банзд̇ам̣ бхаг̇авад̇аад̇и ануссаранд̇оби ануссарад̇иязва. сваагкаад̇о бхаг̇авад̇аа д̇хаммод̇иаад̣̇инаа наязна ануссаранд̇оби д̇хаммам̣ ануссарад̇и, гагажуубамоваад̣̇ам̣ ануссаранд̇оби ануссарад̇иязва. суббадибаннод̇иаад̣̇инаа наязна ануссаранд̇оби сан̇гхам̣ ануссарад̇и, гагажоганд̇анам̣ ад̇хиваасаяамаанасса бхигкуно г̇ун̣ам̣ ануссарамааноби ануссарад̇иязва.
Tattha samudācarantīti upakkamanti. Pāṇisamphassenāti pāṇippahārena, itaresupi eseva nayo. Tathābhūtoti tathāsabhāvo. Yathābhūtasminti yathāsabhāve. Kamantīti pavattanti. Evaṃ buddhaṃ anussaratotiādīsu itipi so bhagavātiādinā nayena anussarantopi buddhaṃ anussarati, vuttaṃ kho panetaṃ bhagavatāti anussarantopi anussaratiyeva. Svākkhāto bhagavatā dhammotiādinā nayena anussarantopi dhammaṃ anussarati, kakacūpamovādaṃ anussarantopi anussaratiyeva. Suppaṭipannotiādinā nayena anussarantopi saṅghaṃ anussarati, kakacokantanaṃ adhivāsayamānassa bhikkhuno guṇaṃ anussaramānopi anussaratiyeva.
убзгкаа гусаланиссид̇аа на сан̣таад̇ийд̇и ид̇ха вибассанубзгкаа ад̇хиббзд̇аа. убзгкаа гусаланиссид̇аа сан̣таад̇ийд̇и ид̇ха чал̣ан̇г̇убзгкаа, саа банзсаа гин̃жааби кийн̣аасавасса идтаанидтзсу аарамман̣зсу араж̇ж̇анаад̣̇ивасзна бавад̇д̇ад̇и, аяам̣ бана бхигку вийрияаб̣алзна бхааванаасид̣̇д̇хияаа ад̇д̇ано вибассанам̣ кийн̣аасавасса чал̣ан̇г̇убзгкаатаанз табзд̇ийд̇и вибассанаава чал̣ан̇г̇убзгкаа наама ж̇аад̇аа.
Upekkhā kusalanissitā na saṇṭhātīti idha vipassanupekkhā adhippetā. Upekkhā kusalanissitā saṇṭhātīti idha chaḷaṅgupekkhā, sā panesā kiñcāpi khīṇāsavassa iṭṭhāniṭṭhesu ārammaṇesu arajjanādivasena pavattati, ayaṃ pana bhikkhu vīriyabalena bhāvanāsiddhiyā attano vipassanaṃ khīṇāsavassa chaḷaṅgupekkhāṭhāne ṭhapetīti vipassanāva chaḷaṅgupekkhā nāma jātā.
303. аабод̇хаад̇унид̣̇д̣̇зсз аабог̇ад̇анд̇и саб̣б̣ааабзсу г̇ад̇ам̣ аллаяуусабхаавалагкан̣ам̣. бид̇д̇ам̣ сзмханд̇иаад̣̇ийсу бана яам̣ вад̇д̇аб̣б̣ам̣, д̇ам̣ саб̣б̣ам̣ сад̣̇д̇хим̣ бхааванаанаязна висуд̣̇д̇химаг̇г̇з вуд̇д̇ам̣. багуббад̇ийд̇и огхавасзна вад̣дхад̇и, самуд̣̇д̣̇ад̇о ваа уд̣̇агам̣ уд̇д̇арад̇и, аяамасса баагад̇иго багобо, аабосам̣ваддагаалз бана годисад̇асахассажаггаваал̣ам̣ уд̣̇агабуурамзва ход̇и. ог̇ажчанд̇ийд̇и хздтаа г̇ажчанд̇и, уд̣̇д̇ханз ааробид̇ауд̣̇агам̣ вияа каяам̣ винаасам̣ баабун̣анд̇и. сзсам̣ буриманаязнзва взд̣̇ид̇аб̣б̣ам̣.
303. Āpodhātuniddese āpogatanti sabbaāpesu gataṃ allayūsabhāvalakkhaṇaṃ. Pittaṃ semhantiādīsu pana yaṃ vattabbaṃ, taṃ sabbaṃ saddhiṃ bhāvanānayena visuddhimagge vuttaṃ. Pakuppatīti oghavasena vaḍḍhati, samuddato vā udakaṃ uttarati, ayamassa pākatiko pakopo, āposaṃvaṭṭakāle pana koṭisatasahassacakkavāḷaṃ udakapūrameva hoti. Ogacchantīti heṭṭhā gacchanti, uddhane āropitaudakaṃ viya khayaṃ vināsaṃ pāpuṇanti. Sesaṃ purimanayeneva veditabbaṃ.
304. д̇зж̇од̇хаад̇унид̣̇д̣̇зсз д̇зж̇ог̇ад̇анд̇и саб̣б̣ад̇зж̇зсу г̇ад̇ам̣ ун̣хад̇д̇алагкан̣ам̣. д̇зж̇о зва ваа д̇зж̇обхаавам̣ г̇ад̇анд̇и д̇зж̇ог̇ад̇ам̣. буримз аабог̇ад̇зби бажчимз вааяог̇ад̇зби зсзва наяо. язна жаад̇и язна д̇зж̇ог̇ад̇зна. д̇асмим̣ губбид̇з аяам̣ гааяо санд̇аббад̇и, згаахигаж̇араад̣̇ибхаавзна усумаж̇аад̇о ход̇и. язна жа ж̇ийрийяад̇ийд̇и язна аяам̣ гааяо ж̇ийрад̇и, инд̣̇рияавзгаллад̇д̇ам̣ б̣алабаригкаяам̣ валибалид̇аад̣̇ибхааван̃жа баабун̣аад̇и. язна жа барид̣аяхад̇ийд̇и язна губбид̇зна аяам̣ гааяо д̣̇аяхад̇и, со жа буг̇г̇ало д̣̇аяхаами д̣̇аяхаамийд̇и ганд̣̇анд̇о сад̇ад̇ход̇асаббиг̇осийд̇ажанд̣̇анаад̣̇илзбан̃жа д̇аалаван̣даваад̇ан̃жа бажжаасийсад̇и. язна жа асид̇абийд̇акааяид̇асааяид̇ам̣ саммаа барин̣аамам̣ г̇ажчад̇ийд̇и язна д̇ам̣ асид̇ам̣ ваа од̣̇анаад̣̇и, бийд̇ам̣ ваа баанагаад̣̇и, кааяид̇ам̣ ваа бидтакаж̇ж̇агаад̣̇и, сааяид̇ам̣ ваа амб̣абаггамад̇хупаан̣ид̇аад̣̇и саммаа барибаагам̣ г̇ажчад̇и, расаад̣̇ибхаавзна вивзгам̣ г̇ажчад̇ийд̇и ад̇т̇о. аяамзд̇т̇а сан̇кзбо. вид̇т̇аарад̇о бана яам̣ вад̇д̇аб̣б̣ам̣ сияаа, д̇ам̣ саб̣б̣ам̣ сад̣̇д̇хим̣ бхааванаанаязна висуд̣̇д̇химаг̇г̇з вуд̇д̇ам̣.
304. Tejodhātuniddese tejogatanti sabbatejesu gataṃ uṇhattalakkhaṇaṃ. Tejo eva vā tejobhāvaṃ gatanti tejogataṃ. Purime āpogatepi pacchime vāyogatepi eseva nayo. Yena cāti yena tejogatena. Tasmiṃ kuppite ayaṃ kāyo santappati, ekāhikajarādibhāvena usumajāto hoti. Yena ca jīrīyatīti yena ayaṃ kāyo jīrati, indriyavekallattaṃ balaparikkhayaṃ valipalitādibhāvañca pāpuṇāti. Yena ca pariḍayhatīti yena kuppitena ayaṃ kāyo dayhati, so ca puggalo dayhāmi dayhāmīti kandanto satadhotasappigosītacandanādilepañca tālavaṇṭavātañca paccāsīsati. Yena ca asitapītakhāyitasāyitaṃ sammā pariṇāmaṃ gacchatīti yena taṃ asitaṃ vā odanādi, pītaṃ vā pānakādi, khāyitaṃ vā piṭṭhakhajjakādi, sāyitaṃ vā ambapakkamadhuphāṇitādi sammā paripākaṃ gacchati, rasādibhāvena vivekaṃ gacchatīti attho. Ayamettha saṅkhepo. Vitthārato pana yaṃ vattabbaṃ siyā, taṃ sabbaṃ saddhiṃ bhāvanānayena visuddhimagge vuttaṃ.
харид̇анд̇анд̇и харид̇амзва. аллад̇ин̣аад̣̇им̣ ааг̇амма ниб̣б̣ааяад̇ийд̇и ад̇т̇о. бант̇анд̇анд̇и махаамаг̇г̇амзва. сзланд̇анд̇и баб̣б̣ад̇ам̣. уд̣̇аганд̇анд̇и уд̣̇агам̣. раман̣ийяам̣ ваа бхуумибхааг̇анд̇и д̇ин̣аг̇умб̣аад̣̇ирахид̇ам̣, вивид̇д̇ам̣ аб̣бхогаасам̣ бхуумибхааг̇ам̣. анаахаараад̇и нираахаараа нирубаад̣̇аанаа, аяамби багад̇ияаава д̇зж̇овигааро вуд̇д̇о, д̇зж̇осам̣ваддагаалз бана годисад̇асахассажаггаваал̣ам̣ жхаабзд̇ваа чааригаамад̇д̇амби на д̇идтад̇и. нхааруд̣̇ад̣̇д̣̇улзнаад̇и жамманиллзканзна. аг̇г̇им̣ г̇авзсанд̇ийд̇и зваруубам̣ сукумам̣ убаад̣̇аанам̣ г̇ахзд̇ваа аг̇г̇им̣ бариязсанд̇и, яам̣ аббамад̇д̇агамби усумам̣ лабхид̇ваа баж̇ж̇алад̇и, сзсамид̇хааби буриманаязнзва взд̣̇ид̇аб̣б̣ам̣.
Haritantanti haritameva. Allatiṇādiṃ āgamma nibbāyatīti attho. Panthantanti mahāmaggameva. Selantanti pabbataṃ. Udakantanti udakaṃ. Ramaṇīyaṃ vā bhūmibhāganti tiṇagumbādirahitaṃ, vivittaṃ abbhokāsaṃ bhūmibhāgaṃ. Anāhārāti nirāhārā nirupādānā, ayampi pakatiyāva tejovikāro vutto, tejosaṃvaṭṭakāle pana koṭisatasahassacakkavāḷaṃ jhāpetvā chārikāmattampi na tiṭṭhati. Nhārudaddulenāti cammanillekhanena. Aggiṃ gavesantīti evarūpaṃ sukhumaṃ upādānaṃ gahetvā aggiṃ pariyesanti, yaṃ appamattakampi usumaṃ labhitvā pajjalati, sesamidhāpi purimanayeneva veditabbaṃ.
305. вааяод̇хаад̇унид̣̇д̣̇зсз уд̣̇д̇хан̇г̇амаа ваад̇аад̇и уг̇г̇аарахиггаараад̣̇ибавад̇д̇агаа уд̣̇д̇хам̣ аароханаваад̇аа. ад̇хог̇амаа ваад̇аад̇и ужжаарабассааваад̣̇инийхаран̣агаа ад̇хо ороханаваад̇аа. гужчисаяаа ваад̇аад̇и анд̇аанам̣ б̣ахиваад̇аа. годтаасаяаа ваад̇аад̇и анд̇аанам̣ анд̇оваад̇аа. ан̇г̇аман̇г̇аанусааринод̇и д̇хаманийж̇аалаанусаарзна сагаласарийрз ан̇г̇аман̇г̇аани анусадаа самин̃ж̇анабасааран̣аад̣̇иниб̣б̣ад̇д̇агаваад̇аа. ассаасод̇и анд̇обависананаасигаваад̇о . бассаасод̇и б̣ахинигкамананаасигаваад̇о. аяамзд̇т̇а сан̇кзбо. вид̇т̇аарад̇о бана яам̣ вад̇д̇аб̣б̣ам̣ сияаа, д̇ам̣ саб̣б̣ам̣ сад̣̇д̇хим̣ бхааванаанаязна висуд̣̇д̇химаг̇г̇з вуд̇д̇ам̣.
305. Vāyodhātuniddese uddhaṅgamā vātāti uggārahikkārādipavattakā uddhaṃ ārohanavātā. Adhogamā vātāti uccārapassāvādinīharaṇakā adho orohanavātā. Kucchisayā vātāti antānaṃ bahivātā. Koṭṭhāsayā vātāti antānaṃ antovātā. Aṅgamaṅgānusārinoti dhamanījālānusārena sakalasarīre aṅgamaṅgāni anusaṭā samiñjanapasāraṇādinibbattakavātā. Assāsoti antopavisananāsikavāto . Passāsoti bahinikkhamananāsikavāto. Ayamettha saṅkhepo. Vitthārato pana yaṃ vattabbaṃ siyā, taṃ sabbaṃ saddhiṃ bhāvanānayena visuddhimagge vuttaṃ.
г̇аамамби вахад̇ийд̇и сагалаг̇аамамби жун̣н̣авижун̣н̣ам̣ гурумаанаа аад̣̇ааяа г̇ажчад̇и, ниг̇амаад̣̇ийсуби зсзва наяо. ид̇ха вааяосам̣ваддагаалз годисад̇асахассажаггаваал̣авид̣̇д̇хам̣санавасзна вааяод̇хаад̇увигааро д̣̇ассид̇о. вид̇хуубанзнаад̇и аг̇г̇иб̣ийж̇анагзна. оссаванзд̇и чад̣̇анаг̇г̇з, д̇зна хи уд̣̇агам̣ савад̇и, д̇асмаа д̇ам̣ ‘‘оссавана’’нд̇и вужжад̇и. сзсамид̇хааби буриманаязнзва яож̇зд̇аб̣б̣ам̣.
Gāmampi vahatīti sakalagāmampi cuṇṇavicuṇṇaṃ kurumānā ādāya gacchati, nigamādīsupi eseva nayo. Idha vāyosaṃvaṭṭakāle koṭisatasahassacakkavāḷaviddhaṃsanavasena vāyodhātuvikāro dassito. Vidhūpanenāti aggibījanakena. Ossavaneti chadanagge, tena hi udakaṃ savati, tasmā taṃ ‘‘ossavana’’nti vuccati. Sesamidhāpi purimanayeneva yojetabbaṃ.
306. сзяяат̇ааби , аавусод̇и ид̇ха гим̣ д̣̇ассзд̇и? хздтаа гат̇ид̇аанам̣ махаабхууд̇аанам̣ ниссад̇д̇абхаавам̣. гадтанд̇и д̣̇аб̣б̣асамбхаарам̣. валлинд̇и ааб̣анд̇ханаваллим̣. д̇ин̣анд̇и чад̣̇анад̇ин̣ам̣. мад̇д̇иганд̇и анулзбамад̇д̇игам̣. аагаасо бариваарид̇од̇и зд̇аани гадтаад̣̇ийни анд̇о жа б̣ахи жа бариваарзд̇ваа аагаасо тид̇од̇и ад̇т̇о. аг̇аарам̣д̇взва сан̇кам̣ г̇ажчад̇ийд̇и аг̇ааранд̇и бан̣н̣ад̇д̇имад̇д̇ам̣ ход̇и. гадтаад̣̇ийсу бана висум̣ висум̣ раасигад̇зсу гадтараасиваллираасийд̇взва вужжад̇и. звамзва код̇и звамзва адтиаад̣̇ийни анд̇о жа б̣ахи жа бариваарзд̇ваа тид̇о аагаасо, д̇аанзва адтиаад̣̇ийни бадижжа руубам̣д̇взва сан̇кам̣ г̇ажчад̇и, сарийранд̇и вохаарам̣ г̇ажчад̇и. яат̇аа гадтаад̣̇ийни бадижжа г̇зханд̇и сан̇кам̣ г̇ад̇ам̣ аг̇аарам̣ кад̇д̇ияаг̇зхам̣ б̣раахман̣аг̇зханд̇и вужжад̇и, звамид̣̇амби кад̇д̇ияасарийрам̣ б̣раахман̣асарийранд̇и вужжад̇и, на хзд̇т̇а гожи сад̇д̇о ваа ж̇ийво ваа виж̇ж̇ад̇и.
306.Seyyathāpi, āvusoti idha kiṃ dasseti? Heṭṭhā kathitānaṃ mahābhūtānaṃ nissattabhāvaṃ. Kaṭṭhanti dabbasambhāraṃ. Vallinti ābandhanavalliṃ. Tiṇanti chadanatiṇaṃ. Mattikanti anulepamattikaṃ. Ākāso parivāritoti etāni kaṭṭhādīni anto ca bahi ca parivāretvā ākāso ṭhitoti attho. Agāraṃtveva saṅkhaṃ gacchatīti agāranti paṇṇattimattaṃ hoti. Kaṭṭhādīsu pana visuṃ visuṃ rāsikatesu kaṭṭharāsivallirāsītveva vuccati. Evameva khoti evameva aṭṭhiādīni anto ca bahi ca parivāretvā ṭhito ākāso, tāneva aṭṭhiādīni paṭicca rūpaṃtveva saṅkhaṃ gacchati, sarīranti vohāraṃ gacchati. Yathā kaṭṭhādīni paṭicca gehanti saṅkhaṃ gataṃ agāraṃ khattiyagehaṃ brāhmaṇagehanti vuccati, evamidampi khattiyasarīraṃ brāhmaṇasarīranti vuccati, na hettha koci satto vā jīvo vā vijjati.
аж̇жхад̇д̇иган̃жзва, аавусо, жагкууд̇и ид̣̇ам̣ гасмаа аарад̣̇д̇хам̣? хздтаа убаад̣̇ааруубам̣ жад̇д̇ааро жа аруубино канд̇хаа д̇ийн̣и жа арияасажжаани на гат̇ид̇аани, ид̣̇аани д̇аани гат̇зд̇ум̣ аяам̣ д̣̇зсанаа аарад̣̇д̇хаад̇и. д̇ад̇т̇а жагкум̣ абарибхиннанд̇и жагкубасаад̣̇з нируд̣̇д̇хзби убахад̇зби бид̇д̇асзмхалохид̇зхи балиб̣уд̣̇д̇хзби жагку жагкувин̃н̃аан̣асса бажжаяо бхавид̇ум̣ на саггод̇и, барибхиннамзва ход̇и, жагкувин̃н̃аан̣асса бана бажжаяо бхавид̇ум̣ самад̇т̇ам̣ абарибхиннам̣ наама. б̣аахираа жа руубаад̇и б̣аахираа жад̇усамудтаанигаруубаа. д̇аж̇ж̇о саманнаахаарод̇и д̇ам̣ жагкун̃жа руубз жа бадижжа бхаван̇г̇ам̣ ааваддзд̇ваа уббаж̇ж̇анаманасигааро, бхаван̇г̇аавадданасамад̇т̇ам̣ жагкуд̣̇ваарз гирияаманод̇хаад̇ужид̇д̇анд̇и ад̇т̇о. д̇ам̣ руубаанам̣ анаабаат̇аг̇ад̇ад̇д̇ааби ан̃н̃аавихид̇ассаби на ход̇и, д̇аж̇ж̇ассаад̇и д̇ад̣̇ануруубасса. вин̃н̃аан̣абхааг̇ассаад̇и вин̃н̃аан̣агодтаасасса.
Ajjhattikañceva, āvuso, cakkhūti idaṃ kasmā āraddhaṃ? Heṭṭhā upādārūpaṃ cattāro ca arūpino khandhā tīṇi ca ariyasaccāni na kathitāni, idāni tāni kathetuṃ ayaṃ desanā āraddhāti. Tattha cakkhuṃ aparibhinnanti cakkhupasāde niruddhepi upahatepi pittasemhalohitehi palibuddhepi cakkhu cakkhuviññāṇassa paccayo bhavituṃ na sakkoti, paribhinnameva hoti, cakkhuviññāṇassa pana paccayo bhavituṃ samatthaṃ aparibhinnaṃ nāma. Bāhirā ca rūpāti bāhirā catusamuṭṭhānikarūpā. Tajjo samannāhāroti taṃ cakkhuñca rūpe ca paṭicca bhavaṅgaṃ āvaṭṭetvā uppajjanamanasikāro, bhavaṅgāvaṭṭanasamatthaṃ cakkhudvāre kiriyamanodhātucittanti attho. Taṃ rūpānaṃ anāpāthagatattāpi aññāvihitassapi na hoti, tajjassāti tadanurūpassa. Viññāṇabhāgassāti viññāṇakoṭṭhāsassa.
яам̣ д̇ат̇аабхууд̇ассаад̇иаад̣̇ийсу д̣̇вааравасзна жад̇д̇аари сажжаани д̣̇ассзд̇и. д̇ад̇т̇а д̇ат̇аабхууд̇ассаад̇и жагкувин̃н̃аан̣зна сахабхууд̇асса, жагкувин̃н̃аан̣асаман̇г̇инод̇и ад̇т̇о. руубанд̇и жагкувин̃н̃аан̣асса на руубаж̇анагад̇д̇аа жагкувин̃н̃аан̣агкан̣з д̇исамудтаанаруубам̣, д̇ад̣̇ананд̇аражид̇д̇агкан̣з жад̇усамудтаанамби лаб̣бхад̇и. сан̇г̇ахам̣ г̇ажчад̇ийд̇и г̇ан̣анам̣ г̇ажчад̇и. взд̣̇анаад̣̇аяо жагкувин̃н̃аан̣асамбаяуд̇д̇аава. вин̃н̃аан̣амби жагкувин̃н̃аан̣амзва. зд̇т̇а жа сан̇каараад̇и жзд̇анаава вуд̇д̇аа. сан̇г̇аход̇и згад̇о сан̇г̇ахо. саннибаад̇од̇и самааг̇амо. самавааяод̇и рааси. яо бадижжасамуббаад̣̇ам̣ бассад̇ийд̇и яо бажжаяз бассад̇и. со д̇хаммам̣ бассад̇ийд̇и со бадижжасамуббаннад̇хаммз бассад̇и, чанд̣̇од̇иаад̣̇и саб̣б̣ам̣ д̇ан̣хаавзважанамзва , д̇ан̣хаа хи чанд̣̇агаран̣авасзна чанд̣̇о. аалаяагаран̣авасзна аалаяо. анунаяагаран̣авасзна анунаяо. аж̇жхог̇аахид̇ваа г̇илид̇ваа г̇аханавасзна аж̇жхосаананд̇и вужжад̇и. чанд̣̇арааг̇авинаяо чанд̣̇арааг̇аббахаананд̇и ниб̣б̣аанассзва взважанам̣, ид̇и д̇ийн̣и сажжаани баал̣ияам̣ ааг̇ад̇аанзва маг̇г̇асажжам̣ аахарид̇ваа г̇ахзд̇аб̣б̣ам̣, яаа имзсу д̇ийсу таанзсу д̣̇идти сан̇габбо ваажаа гамманд̇о ааж̇ийво вааяаамо сад̇и самаад̇хи бхааванаабадивзд̇хо, аяам̣ маг̇г̇од̇и. б̣ахугад̇ам̣ ход̇ийд̇и зд̇д̇аавад̇ааби б̣ахум̣ бхаг̇авад̇о саасанам̣ гад̇ам̣ ход̇и, аж̇жхад̇д̇иган̃жзва, аавусо, сод̇анд̇иаад̣̇иваарзсуби зсзва наяо.
Yaṃ tathābhūtassātiādīsu dvāravasena cattāri saccāni dasseti. Tattha tathābhūtassāti cakkhuviññāṇena sahabhūtassa, cakkhuviññāṇasamaṅginoti attho. Rūpanti cakkhuviññāṇassa na rūpajanakattā cakkhuviññāṇakkhaṇe tisamuṭṭhānarūpaṃ, tadanantaracittakkhaṇe catusamuṭṭhānampi labbhati. Saṅgahaṃ gacchatīti gaṇanaṃ gacchati. Vedanādayo cakkhuviññāṇasampayuttāva. Viññāṇampi cakkhuviññāṇameva. Ettha ca saṅkhārāti cetanāva vuttā. Saṅgahoti ekato saṅgaho. Sannipātoti samāgamo. Samavāyoti rāsi. Yo paṭiccasamuppādaṃ passatīti yo paccaye passati. So dhammaṃ passatīti so paṭiccasamuppannadhamme passati, chandotiādi sabbaṃ taṇhāvevacanameva , taṇhā hi chandakaraṇavasena chando. Ālayakaraṇavasena ālayo. Anunayakaraṇavasena anunayo. Ajjhogāhitvā gilitvā gahanavasena ajjhosānanti vuccati. Chandarāgavinayo chandarāgappahānanti nibbānasseva vevacanaṃ, iti tīṇi saccāni pāḷiyaṃ āgatāneva maggasaccaṃ āharitvā gahetabbaṃ, yā imesu tīsu ṭhānesu diṭṭhi saṅkappo vācā kammanto ājīvo vāyāmo sati samādhi bhāvanāpaṭivedho, ayaṃ maggoti. Bahukataṃ hotīti ettāvatāpi bahuṃ bhagavato sāsanaṃ kataṃ hoti, ajjhattikañceva, āvuso, sotantiādivāresupi eseva nayo.
манод̣̇ваарз бана аж̇жхад̇д̇иго мано наама бхаван̇г̇ажид̇д̇ам̣. д̇ам̣ нируд̣̇д̇хамби ааваж̇ж̇анажид̇д̇асса бажжаяо бхавид̇ум̣ асамад̇т̇ам̣ манд̣̇ат̇аамаг̇ад̇амзва бавад̇д̇амаанамби барибхиннам̣ наама ход̇и. ааваж̇ж̇анасса бана бажжаяо бхавид̇ум̣ самад̇т̇ам̣ абарибхиннам̣ наама. б̣аахираа жа д̇хаммаад̇и д̇хаммаарамман̣ам̣. нзва д̇аава д̇аж̇ж̇ассаад̇и ид̣̇ам̣ бхаван̇г̇асамаязнзва гат̇ид̇ам̣. д̣̇уд̇ияавааро баг̇ун̣аж̇жхаанабажжавзгкан̣зна ваа, баг̇ун̣агаммадтаанаманасигаарзна ваа, баг̇ун̣аб̣уд̣̇д̇хаважанасаж̇жхааяагаран̣аад̣̇инаа ваа, ан̃н̃авихид̇агам̣ санд̇хааяа вуд̇д̇о. имасмим̣ ваарз руубанд̇и жад̇усамудтаанамби лаб̣бхад̇и. мановин̃н̃аан̣ан̃хи руубам̣ самудтаабзд̇и, взд̣̇анаад̣̇аяо мановин̃н̃аан̣асамбаяуд̇д̇аа , вин̃н̃аан̣ам̣ мановин̃н̃аан̣амзва. сан̇каараа банзд̇т̇а пассажзд̇анаавасзнзва г̇ахид̇аа. сзсам̣ вуд̇д̇анаязнзва взд̣̇ид̇аб̣б̣ам̣. ид̇и махаат̇зро хздтаа згад̣̇зсамзва саммасанд̇о ааг̇анд̇ваа имасмим̣ таанз тад̇ваа хздтаа барихийнад̣̇зсанам̣ саб̣б̣ам̣ д̇ам̣д̇ам̣д̣̇вааравасзна бхааж̇зд̇ваа д̣̇ассзнд̇о яат̇аанусанд̇хинаава суд̇д̇анд̇ам̣ нидтабзсийд̇и.
Manodvāre pana ajjhattiko mano nāma bhavaṅgacittaṃ. Taṃ niruddhampi āvajjanacittassa paccayo bhavituṃ asamatthaṃ mandathāmagatameva pavattamānampi paribhinnaṃ nāma hoti. Āvajjanassa pana paccayo bhavituṃ samatthaṃ aparibhinnaṃ nāma. Bāhirā ca dhammāti dhammārammaṇaṃ. Neva tāva tajjassāti idaṃ bhavaṅgasamayeneva kathitaṃ. Dutiyavāro paguṇajjhānapaccavekkhaṇena vā, paguṇakammaṭṭhānamanasikārena vā, paguṇabuddhavacanasajjhāyakaraṇādinā vā, aññavihitakaṃ sandhāya vutto. Imasmiṃ vāre rūpanti catusamuṭṭhānampi labbhati. Manoviññāṇañhi rūpaṃ samuṭṭhāpeti, vedanādayo manoviññāṇasampayuttā , viññāṇaṃ manoviññāṇameva. Saṅkhārā panettha phassacetanāvaseneva gahitā. Sesaṃ vuttanayeneva veditabbaṃ. Iti mahāthero heṭṭhā ekadesameva sammasanto āgantvā imasmiṃ ṭhāne ṭhatvā heṭṭhā parihīnadesanaṃ sabbaṃ taṃtaṃdvāravasena bhājetvā dassento yathānusandhināva suttantaṃ niṭṭhapesīti.
бабан̃жасууд̣̇анияаа маж̇жхиманигааяадтагат̇ааяа
Papañcasūdaniyā majjhimanikāyaṭṭhakathāya
махаахад̇т̇ибад̣̇обамасуд̇д̇аван̣н̣анаа нидтид̇аа.
Mahāhatthipadopamasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 8. махаахад̇т̇ибад̣̇обамасуд̇д̇ам̣ • 8. Mahāhatthipadopamasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 8. махаахад̇т̇ибад̣̇обамасуд̇д̇аван̣н̣анаа • 8. Mahāhatthipadopamasuttavaṇṇanā
