| Library / Tipiṭaka / д̇ибидага • Tipiṭaka / маж̇жхиманигааяа (дийгаа) • Majjhimanikāya (ṭīkā) |
8. махаахад̇т̇ибад̣̇обамасуд̇д̇аван̣н̣анаа
8. Mahāhatthipadopamasuttavaṇṇanā
300. ж̇ан̇г̇алаананд̇и зд̇т̇а яо нибижчалзна амуд̣̇уго нируд̣̇агад̇ааяа т̇ад̣̇д̇халуукабхуумиббад̣̇зсо, со ‘‘ж̇ан̇г̇ало’’д̇и вужжад̇и. д̇аб̣б̣ахулад̇ааяа бана ид̇ха саб̣б̣о бхуумиббад̣̇зсо ж̇ан̇г̇ало, д̇асмим̣ ж̇ан̇г̇алз ж̇аад̇аа, бхаваад̇и ваа ж̇ан̇г̇алаа, д̇зсам̣ ж̇ан̇г̇алаанам̣. зван̃хи над̣̇ийжараанамби хад̇т̇ийнам̣ сан̇г̇ахо гад̇о ход̇и. самод̇хаад̇аб̣б̣аанам̣ вияа хи самод̇хааяагаанамби ж̇ан̇г̇алаг̇г̇ахан̣зна г̇ахзд̇аб̣б̣ад̇о. бат̇авийд̇алажаарийнанд̇и иминаа ж̇алажаарино на нивад̇д̇зд̇и ад̣̇иссамаанабаад̣̇ад̇д̇аа. баан̣аананд̇и саад̇хааран̣аважанамби ‘‘бад̣̇аж̇аад̇ааний’’д̇и сад̣̇д̣̇анд̇арасаннид̇хаанзна висзсанивидтамзва ход̇ийд̇и ааха ‘‘сабаад̣̇агабаан̣аана’’нд̇и. ‘‘муд̇д̇аг̇ад̇а’’нд̇иаад̣̇ийсу (ма. ни. 2.119; а. ни. 9.11) г̇ад̇а-сад̣̇д̣̇о анад̇т̇анд̇аро вияа, ж̇аад̇а-сад̣̇д̣̇о анад̇т̇анд̇арод̇и ааха ‘‘бад̣̇аж̇аад̇аанийд̇и бад̣̇ааний’’д̇и. самод̇хаананд̇и самаварод̇хам̣, анд̇ог̇амам̣ ваа. маханд̇ад̇д̇знаад̇и вибулабхаавзна.
300.Jaṅgalānanti ettha yo nipicchalena amuduko nirudakatāya thaddhalūkhabhūmippadeso, so ‘‘jaṅgalo’’ti vuccati. Tabbahulatāya pana idha sabbo bhūmippadeso jaṅgalo, tasmiṃ jaṅgale jātā, bhavāti vā jaṅgalā, tesaṃ jaṅgalānaṃ. Evañhi nadīcarānampi hatthīnaṃ saṅgaho kato hoti. Samodhātabbānaṃ viya hi samodhāyakānampi jaṅgalaggahaṇena gahetabbato. Pathavītalacārīnanti iminā jalacārino na nivatteti adissamānapādattā. Pāṇānanti sādhāraṇavacanampi ‘‘padajātānī’’ti saddantarasannidhānena visesaniviṭṭhameva hotīti āha ‘‘sapādakapāṇāna’’nti. ‘‘Muttagata’’ntiādīsu (ma. ni. 2.119; a. ni. 9.11) gata-saddo anatthantaro viya, jāta-saddo anatthantaroti āha ‘‘padajātānīti padānī’’ti. Samodhānanti samavarodhaṃ, antogamaṃ vā. Mahantattenāti vipulabhāvena.
гусалаа д̇хаммаад̇и анаваж̇ж̇асукавибаагаа д̇хаммаа, на анаваж̇ж̇амад̇д̇ад̇хаммаа. гусалад̇д̇игз ааг̇ад̇анаязна хи ид̇ха гусалаа д̇хаммаа г̇ахзд̇аб̣б̣аа, на б̣аахид̇игасуд̇д̇з ааг̇ад̇анаязна. жад̇уб̣б̣ид̇хо сан̇г̇аход̇и гасмаа вуд̇д̇ам̣, нану згавид̇ховзд̇т̇а сан̇г̇ахо ад̇хиббзд̇од̇и? на, ад̇т̇ам̣ аг̇г̇ахзд̇ваа анид̣̇д̇хаарид̇ад̇т̇асса сад̣̇д̣̇ассзва г̇ахид̇ад̇д̇аа. сан̇г̇аха-сад̣̇д̣̇о д̇аава ад̇д̇ано ад̇т̇авасзна жад̇уб̣б̣ид̇ход̇и аяан̃хзд̇т̇а ад̇т̇о. ад̇т̇оби ваа анид̣̇д̇хаарид̇ависзсо сааман̃н̃зна г̇ахзд̇аб̣б̣ад̇ам̣ бад̇д̇о ‘‘сан̇г̇ахам̣ г̇ажчад̇ий’’д̇и зд̇т̇а сан̇г̇аха-сад̣̇д̣̇зна важанийяад̇ам̣ г̇ад̇од̇и на гожи д̣̇осо, нид̣̇д̇хаарид̇з висзсз д̇асса згавид̇хад̇аа сияаа, на д̇ад̇о буб̣б̣зд̇и. саж̇аад̇исан̇г̇аход̇и самаанаж̇аад̇ияаа, самаанаж̇аад̇игаанам̣ ваа сан̇г̇ахо. д̇хаад̇угат̇ааван̣н̣анааяам̣ бана ‘‘ж̇аад̇исан̇г̇ахо’’ижжзва вуд̇д̇ам̣, д̇ам̣ ж̇аад̇и-сад̣̇д̣̇асса саабзгкасад̣̇д̣̇ад̇д̇аа ж̇аад̇ияаа сан̇г̇аход̇и вуд̇д̇з ад̇д̇ано ж̇аад̇ияаад̇и вин̃н̃ааяад̇и самб̣анд̇хаарахасса ан̃н̃асса авуд̇д̇ад̇д̇аад̇и гад̇ваа вуд̇д̇ам̣. ид̇ха бана руубаган̣д̣аван̣н̣анааяам̣ (д̇ха. са. адта. 594) вияа баагадам̣ гад̇ваа д̣̇ассзд̇ум̣ ‘‘саж̇аад̇исан̇г̇ахо’’ижжзва вуд̇д̇ам̣. сан̃ж̇ааяанд̇и зд̇т̇аад̇и сан̃ж̇аад̇и, сан̃ж̇аад̇ияаа сан̇г̇ахо сан̃ж̇аад̇исан̇г̇ахо, сан̃ж̇аад̇ид̣̇зсавасзна сан̇г̇аход̇и ад̇т̇о. ‘‘саб̣б̣з рат̇игаа’’д̇и вуд̇д̇з саб̣б̣з рат̇аяод̇хаа рат̇зна яуж̇жханагирияааяа згасан̇г̇аход̇и. ‘‘саб̣б̣з д̇хануг̇г̇ахаа’’д̇и вуд̇д̇з саб̣б̣з иссаасаа д̇ханунаа виж̇жханагирияааяа згасан̇г̇аход̇и ааха ‘‘звам̣ гирияавасзна сан̇г̇ахо’’д̇и. руубагканд̇хзна сан̇г̇ахид̇анд̇и руубагканд̇хзна згасан̇г̇ахам̣ руубагканд̇ход̇зва г̇ан̣ид̇ам̣, г̇ахан̣ам̣ г̇ад̇анд̇и ад̇т̇о.
Kusalā dhammāti anavajjasukhavipākā dhammā, na anavajjamattadhammā. Kusalattike āgatanayena hi idha kusalā dhammā gahetabbā, na bāhitikasutte āgatanayena. Catubbidho saṅgahoti kasmā vuttaṃ, nanu ekavidhovettha saṅgaho adhippetoti? Na, atthaṃ aggahetvā aniddhāritatthassa saddasseva gahitattā. Saṅgaha-saddo tāva attano atthavasena catubbidhoti ayañhettha attho. Atthopi vā aniddhāritaviseso sāmaññena gahetabbataṃ patto ‘‘saṅgahaṃ gacchatī’’ti ettha saṅgaha-saddena vacanīyataṃ gatoti na koci doso, niddhārite visese tassa ekavidhatā siyā, na tato pubbeti. Sajātisaṅgahoti samānajātiyā, samānajātikānaṃ vā saṅgaho. Dhātukathāvaṇṇanāyaṃ pana ‘‘jātisaṅgaho’’icceva vuttaṃ, taṃ jāti-saddassa sāpekkhasaddattā jātiyā saṅgahoti vutte attano jātiyāti viññāyati sambandhārahassa aññassa avuttattāti katvā vuttaṃ. Idha pana rūpakaṇḍavaṇṇanāyaṃ (dha. sa. aṭṭha. 594) viya pākaṭaṃ katvā dassetuṃ ‘‘sajātisaṅgaho’’icceva vuttaṃ. Sañjāyanti etthāti sañjāti, sañjātiyā saṅgaho sañjātisaṅgaho, sañjātidesavasena saṅgahoti attho. ‘‘Sabbe rathikā’’ti vutte sabbe rathayodhā rathena yujjhanakiriyāya ekasaṅgahoti. ‘‘Sabbe dhanuggahā’’ti vutte sabbe issāsā dhanunā vijjhanakiriyāya ekasaṅgahoti āha ‘‘evaṃ kiriyavasena saṅgaho’’ti. Rūpakkhandhena saṅgahitanti rūpakkhandhena ekasaṅgahaṃ rūpakkhandhoteva gaṇitaṃ, gahaṇaṃ gatanti attho.
д̣̇ияад̣дхамзва сажжам̣ бхаж̇ад̇и маг̇г̇асажжад̣̇угкасажжзгад̣̇зсабхаавад̇о. сажжзгад̣̇зсанд̇ог̇ад̇хамби сажжанд̇ог̇ад̇хамзва ход̇ийд̇и ааха ‘‘сажжаанам̣ анд̇ог̇ад̇хад̇д̇аа’’д̇и. ид̣̇аани д̇амад̇т̇ам̣ саасанад̇о жа логад̇о жа убамам̣ ааха рид̇ваа д̣̇ийбзд̇ум̣ ‘‘яат̇аа хий’’д̇иаад̣̇и вуд̇д̇ам̣. д̇ад̇т̇а саад̇хигамид̣̇ам̣, бхигкавз, д̣̇ияад̣дхасигкаабад̣̇асад̇анд̇и ид̣̇ам̣ яасмим̣ гаалз д̇ам̣ суд̇д̇ам̣ д̣̇зсид̇ам̣, д̇ад̣̇аа бан̃н̃ад̇д̇асигкаабад̣̇авасзна вуд̇д̇ам̣, д̇ад̇о барам̣ бана саад̇хигаани д̣̇взсад̇аани сигкаабад̣̇аанийд̇и. сигкаанам̣ анд̇ог̇ад̇хад̇д̇аа ад̇хисийласигкааяа. зд̇т̇а жа ‘‘сийлам̣ сигканд̇оби д̇иссо сигкаа сигкад̇ий’’д̇и висамояам̣ убан̃н̃аасо. д̇ад̇т̇а хи яо бахаад̇аб̣б̣ам̣ баж̇ахад̇и, сам̣варид̇аб̣б̣ад̇о сам̣варам̣ аабаж̇ж̇ад̇и, аяамасса ад̇хисийласигкаа. яо д̇ад̇т̇а жзд̇асо авигкзбо, аяамасса ад̇хижид̇д̇асигкаа. яаа д̇ад̇т̇а виймам̣саа, аяамасса ад̇хибан̃н̃аасигкаа. ид̇и со гулабуд̇д̇о саруубад̇о лаб̣бхамаанаа зва д̇иссо сигкаа сигкад̇ийд̇и д̣̇ийбид̇о, на сигкаанам̣ анд̇ог̇ад̇хад̇аамад̇д̇зна. д̇знааха адтагат̇ааяам̣ ‘‘яо д̇ат̇аабхууд̇асса сам̣варо, аяамзд̇т̇а ад̇хисийласигкаа, яо д̇ат̇аабхууд̇асса самаад̇хи, аяамзд̇т̇а ад̇хижид̇д̇асигкаа, яаа д̇ат̇аабхууд̇асса бан̃н̃аа, аяам̣ ад̇хибан̃н̃аасигкаа. имаа д̇иссо сигкаа д̇асмим̣ аарамман̣з д̇ааяа сад̇ияаа д̇зна манасигаарзна сигкад̇и аасзвад̇и бхаавзд̇и б̣ахулийгарод̇ий’’д̇и. ид̇ха бана сажжаанам̣ анд̇ог̇ад̇хад̇д̇аа сажжа-сад̣̇д̣̇аабхид̇хзяяад̇аамад̇д̇зна жад̇уусу сажжзсу г̇ан̣ананд̇ог̇ад̇хаа хонд̇ийд̇и? на, д̇ад̇т̇ааби хи ниббарияааяад̇о ад̇хисийласигкаава лаб̣бхад̇и, ид̇араа барияааяад̇од̇и гад̇ваа ‘‘сигкаанам̣ анд̇ог̇ад̇хад̇д̇аа’’д̇и вуд̇д̇ам̣.
Diyaḍḍhamevasaccaṃ bhajati maggasaccadukkhasaccekadesabhāvato. Saccekadesantogadhampi saccantogadhameva hotīti āha ‘‘saccānaṃ antogadhattā’’ti. Idāni tamatthaṃ sāsanato ca lokato ca upamaṃ āha ritvā dīpetuṃ ‘‘yathā hī’’tiādi vuttaṃ. Tattha sādhikamidaṃ, bhikkhave, diyaḍḍhasikkhāpadasatanti idaṃ yasmiṃ kāle taṃ suttaṃ desitaṃ, tadā paññattasikkhāpadavasena vuttaṃ, tato paraṃ pana sādhikāni dvesatāni sikkhāpadānīti. Sikkhānaṃ antogadhattā adhisīlasikkhāya. Ettha ca ‘‘sīlaṃ sikkhantopi tisso sikkhā sikkhatī’’ti visamoyaṃ upaññāso. Tattha hi yo pahātabbaṃ pajahati, saṃvaritabbato saṃvaraṃ āpajjati, ayamassa adhisīlasikkhā. Yo tattha cetaso avikkhepo, ayamassa adhicittasikkhā. Yā tattha vīmaṃsā, ayamassa adhipaññāsikkhā. Iti so kulaputto sarūpato labbhamānā eva tisso sikkhā sikkhatīti dīpito, na sikkhānaṃ antogadhatāmattena. Tenāha aṭṭhakathāyaṃ ‘‘yo tathābhūtassa saṃvaro, ayamettha adhisīlasikkhā, yo tathābhūtassa samādhi, ayamettha adhicittasikkhā, yā tathābhūtassa paññā, ayaṃ adhipaññāsikkhā. Imā tisso sikkhā tasmiṃ ārammaṇe tāya satiyā tena manasikārena sikkhati āsevati bhāveti bahulīkarotī’’ti. Idha pana saccānaṃ antogadhattā sacca-saddābhidheyyatāmattena catūsu saccesu gaṇanantogadhā hontīti? Na, tatthāpi hi nippariyāyato adhisīlasikkhāva labbhati, itarā pariyāyatoti katvā ‘‘sikkhānaṃ antogadhattā’’ti vuttaṃ.
жад̇уусу арияасажжзсу сан̇г̇ахам̣ г̇ажчанд̇ийд̇и жа д̇ад̇о амужжид̇ваа д̇ассзва анд̇ог̇ад̇хад̇ам̣ санд̇хааяа вуд̇д̇ам̣. зван̃жа гад̇ваа ‘‘яат̇аа жа згасса хад̇т̇ибад̣̇ассаа’’д̇иаад̣̇инаа д̣̇ассид̇аа хад̇т̇ибад̣̇обамаа самад̇т̇ид̇аа д̣̇адтаб̣б̣аа. згасмимби д̣̇вийсуби д̇ийсуби сажжзсу г̇ан̣анам̣ г̇ад̇аа д̇хаммаад̇и ид̣̇ам̣ на гусалад̇д̇игавасзнзва взд̣̇ид̇аб̣б̣ам̣, ат̇а ко д̇игад̣̇угзсу яат̇аарахам̣ лаб̣бхамаанабад̣̇авасзна взд̣̇ид̇аб̣б̣ам̣. д̇ад̇т̇а згасмим̣ сажжз г̇ан̣анам̣ г̇ад̇о д̇хаммо асан̇кад̇ад̇хаммо д̣̇адтаб̣б̣о, д̣̇вийсу сажжзсу г̇ан̣анам̣ г̇ад̇аа гусалаа д̇хаммаа, д̇ат̇аа агусалаа д̇хаммаа, аб̣яаагад̇аа жа д̇хаммаа, д̇ийсу сажжзсу г̇ан̣анам̣ г̇ад̇аа сан̇кад̇аа д̇хаммаа, звам̣ ан̃н̃зсамби д̇игад̣̇угабад̣̇аанам̣ васзна аяамад̇т̇о яат̇аарахам̣ вибхаж̇ид̇ваа вад̇д̇аб̣б̣о. д̇знааха ‘‘згасмимби…бз… г̇ад̇аава хонд̇ий’’д̇и. згад̣̇зсо хи самуд̣̇ааяанд̇ог̇ад̇хад̇д̇аа висзсо вияа сааман̃н̃зна самуухзна сан̇г̇ахам̣ лабхад̇и. д̇знааха ‘‘сажжаанам̣ анд̇ог̇ад̇хад̇д̇аа’’д̇и. д̣̇зсанаануггамод̇и арияасажжаани уд̣̇д̣̇исид̇ваа д̣̇угкасажжанид̣̇д̣̇зсавасзна бан̃жаннам̣ убаад̣̇аанагканд̇хаанам̣ вибхаж̇анам̣. д̇ад̇т̇а жа руубагканд̇ханид̣̇д̣̇зсавасзнааад̣̇ид̇о аж̇жхад̇д̇игааяа бат̇авийд̇хаад̇уяаа вибхаж̇ананд̇и. аяам̣ имиссаа д̣̇зсанааяа ануггамо.
Catūsu ariyasaccesu saṅgahaṃ gacchantīti ca tato amuccitvā tasseva antogadhataṃ sandhāya vuttaṃ. Evañca katvā ‘‘yathā ca ekassa hatthipadassā’’tiādinā dassitā hatthipadopamā samatthitā daṭṭhabbā. Ekasmimpi dvīsupi tīsupi saccesu gaṇanaṃ gatā dhammāti idaṃ na kusalattikavaseneva veditabbaṃ, atha kho tikadukesu yathārahaṃ labbhamānapadavasena veditabbaṃ. Tattha ekasmiṃ sacce gaṇanaṃ gato dhammo asaṅkhatadhammo daṭṭhabbo, dvīsu saccesu gaṇanaṃ gatā kusalā dhammā, tathā akusalā dhammā, abyākatā ca dhammā, tīsu saccesu gaṇanaṃ gatā saṅkhatā dhammā, evaṃ aññesampi tikadukapadānaṃ vasena ayamattho yathārahaṃ vibhajitvā vattabbo. Tenāha ‘‘ekasmimpi…pe… gatāva hontī’’ti. Ekadeso hi samudāyantogadhattā viseso viya sāmaññena samūhena saṅgahaṃ labhati. Tenāha ‘‘saccānaṃ antogadhattā’’ti. Desanānukkamoti ariyasaccāni uddisitvā dukkhasaccaniddesavasena pañcannaṃ upādānakkhandhānaṃ vibhajanaṃ. Tattha ca rūpakkhandhaniddesavasenaādito ajjhattikāya pathavīdhātuyā vibhajananti. Ayaṃ imissā desanāya anukkamo.
301. д̇ам̣ банзд̇ам̣ убамаахи вибхаавзд̇ум̣ ‘‘яат̇аа хий’’д̇иаад̣̇и вуд̇д̇ам̣. д̇ад̇т̇а суж̇аад̇анд̇и сунд̣̇арам̣, сусан̣тид̇ам̣ субарин̣ад̇ан̃жаад̇и ад̇хиббааяо. бзсияод̇и вилийвз. муд̣̇убхаавад̇о гужчибхааг̇ам̣ аад̣̇ааяа. ид̇арз жа жад̇д̇ааро годтаасзд̇и бан̃жад̇хаа бхиннагодтаасзсу ид̇арз жа жад̇д̇ааро годтаасз. ид̇арз жа д̇аяо годтаасзд̇иаад̣̇ид̇о жад̇уд̇хаа бхиннагодтаасзсу ид̇арз жа д̇аяо годтаасз.
301. Taṃ panetaṃ upamāhi vibhāvetuṃ ‘‘yathā hī’’tiādi vuttaṃ. Tattha sujātanti sundaraṃ, susaṇṭhitaṃ supariṇatañcāti adhippāyo. Pesiyoti vilīve. Mudubhāvato kucchibhāgaṃ ādāya. Itare ca cattāro koṭṭhāseti pañcadhā bhinnakoṭṭhāsesu itare ca cattāro koṭṭhāse. Itare ca tayo koṭṭhāsetiādito catudhā bhinnakoṭṭhāsesu itare ca tayo koṭṭhāse.
рааж̇абуд̇д̇уубамааяаад̇и ран̃н̃о ж̇здтабуд̇д̇аубамааяа. нд̇и бил̣анд̇ханам̣. урз вааяаамаж̇анид̇аарияаж̇аад̇ияаа орасо. мукад̇о ж̇аад̇од̇и мукад̇о ниг̇г̇ад̇ад̇хаммад̣̇зсанааяа ж̇аад̇о, б̣уд̣̇д̇хаанам̣ ваа д̇хаммагааяасса мукабхууд̇аарияад̇хаммад̇о ж̇аад̇о. д̇ад̇о зва д̇хаммаж̇о д̇хамманиммид̇о. сад̇т̇у д̇хаммад̣̇ааяаад̣̇ассзва г̇ахид̇ад̇д̇аа д̇хаммад̣̇ааяаад̣̇о. д̇знааха ‘‘но аамисад̣̇ааяаад̣̇о’’д̇и. нд̇и ‘‘бхаг̇авад̇о буд̇д̇о’’д̇иаад̣̇иважанам̣. махаабан̃н̃ад̇аад̣̇иг̇ун̣зхи саад̇исаяам̣ анубуб̣б̣абхаавз тид̇ад̇д̇аа саммаа яат̇аабхууд̇ам̣ вад̣̇амаано вад̇д̇ум̣ саггонд̇о вад̣̇зяяа.
Rājaputtūpamāyāti rañño jeṭṭhaputtaupamāya. Nti piḷandhanaṃ. Ure vāyāmajanitaariyajātiyā oraso. Mukhato jātoti mukhato niggatadhammadesanāya jāto, buddhānaṃ vā dhammakāyassa mukhabhūtaariyadhammato jāto. Tato eva dhammajo dhammanimmito. Satthu dhammadāyādasseva gahitattā dhammadāyādo. Tenāha ‘‘no āmisadāyādo’’ti. Nti ‘‘bhagavato putto’’tiādivacanaṃ. Mahāpaññatādiguṇehi sātisayaṃ anupubbabhāve ṭhitattā sammā yathābhūtaṃ vadamāno vattuṃ sakkonto vadeyya.
агуд̇обхаяам̣ ниб̣б̣аанам̣ ниб̣б̣аанаг̇ааминин̃жа. рааг̇араж̇аад̣̇ийнам̣ виг̇амзна виг̇ад̇араж̇ам̣ д̇хаммам̣ д̣̇зсзнд̇ам̣ суг̇ад̇ам̣ саммаасамб̣уд̣̇д̇хам̣ бхигкуунам̣ баросахассам̣ баяирубаасад̇ийд̇и яож̇анаа.
Akutobhayaṃ nibbānaṃ nibbānagāminiñca. Rāgarajādīnaṃ vigamena vigatarajaṃ dhammaṃ desentaṃ sugataṃ sammāsambuddhaṃ bhikkhūnaṃ parosahassaṃ payirupāsatīti yojanā.
‘‘сзвзт̇а бхаж̇ат̇аа’’д̇и вад̇ваа д̇ад̇т̇а гааран̣амааха ‘‘бан̣д̣ид̇аа бхигкуу ануг̇г̇аахагаа’’д̇и. бан̣д̣ид̇ааби самаанаа на аббассуд̇аа, ат̇а ко оваад̣̇аанусаасанийхи ануг̇г̇аахагаад̇и буримаа убамаа т̇зрассзва васзна уд̣̇аахадаа, д̣̇уд̇ияаа бана бхаг̇авад̇о бхигкусан̇гхассаби васзна уд̣̇аахадаа.
‘‘Sevetha bhajathā’’ti vatvā tattha kāraṇamāha ‘‘paṇḍitā bhikkhū anuggāhakā’’ti. Paṇḍitāpi samānā na appassutā, atha kho ovādānusāsanīhi anuggāhakāti purimā upamā therasseva vasena udāhaṭā, dutiyā pana bhagavato bhikkhusaṅghassapi vasena udāhaṭā.
302. аж̇жхад̇д̇игаад̇и сад̇д̇асанд̇аанабарияаабаннаа. аж̇жхад̇д̇ам̣ бажжад̇д̇анд̇и бад̣̇ад̣̇ваязнаби д̇ам̣д̇ам̣баадибуг̇г̇алигад̇хаммаа вужжанд̇ийд̇и ааха ‘‘убхаяамбзд̇ам̣ нияагаад̇хиважанамзваа’’д̇и. сасанд̇ад̇ибарияаабаннад̇ааяа бана ад̇д̇аад̇и г̇ахзд̇аб̣б̣абхаавуубаг̇аманавасзна ад̇д̇аанам̣ ад̇хигижжа уд̣̇д̣̇исса бавад̇д̇ам̣ аж̇жхад̇д̇ам̣, д̇ам̣д̇ам̣сад̇д̇асанд̇аанабарияаабаннад̇ааяа бажжад̇д̇ам̣. д̇знааха адтагат̇ааяам̣ (висуд̣̇д̇хи. 1.307) ‘‘ад̇д̇ани бавад̇д̇ад̇д̇аа аж̇жхад̇д̇ам̣, ад̇д̇аанам̣ бадижжа бадижжа бавад̇д̇ад̇д̇аа бажжад̇д̇а’’нд̇и. гагкал̣анд̇и гат̇инам̣. яасмаа д̇ам̣ т̇ад̣̇д̇хабхаавзна сахаж̇аад̇аанам̣ бад̇идтаа ход̇и, д̇асмаа ‘‘т̇ад̣̇д̇ха’’нд̇и вуд̇д̇ам̣. кариг̇ад̇анд̇и карасабхаавзсу г̇ад̇ам̣ д̇аббарияаабаннам̣, карасабхаавамзваад̇и ад̇т̇о. яасмаа бана карасабхаавам̣ парусаагаарзна убадтаанад̇о парусаагаарам̣ ход̇и, д̇асмаа вуд̇д̇ам̣ ‘‘паруса’’нд̇и. убаад̣̇иннам̣ наама сарийрадтагам̣. д̇ад̇т̇а яам̣ гаммасамудтаанам̣, д̇ам̣ ниббарияааяад̇о ‘‘убаад̣̇инна’’нд̇и вужжад̇и, ид̇арам̣ анубаад̣̇иннам̣. д̇ад̣̇убхаяамби ид̇ха д̇ан̣хаад̣̇ийхи аад̣̇иннаг̇ахид̇абараамадтавасзна убаад̣̇иннамзваад̇и д̣̇ассзд̇ум̣ ‘‘сарийрадтаган̃хий’’д̇иаад̣̇и вуд̇д̇ам̣. д̇ад̇т̇а аад̣̇иннанд̇и абхинивидтам̣. маманд̇и г̇ахид̇ам̣. аханд̇и бараамадтам̣ . д̇хаад̇угаммадтаанигассаад̇и жад̇уд̇хаад̇увавад̇т̇аанавасзна д̇хаад̇угаммадтаанам̣ барихаранд̇асса. зд̇т̇аад̇и зд̇асмим̣ д̇хаад̇угаммадтаанз. д̇ийсу годтаасзсууд̇и д̇иббагаарзсу годтаасзсу. на хи д̇з д̇аяо жад̇д̇ааро годтаасаа.
302.Ajjhattikāti sattasantānapariyāpannā. Ajjhattaṃ paccattanti padadvayenapi taṃtaṃpāṭipuggalikadhammā vuccantīti āha ‘‘ubhayampetaṃ niyakādhivacanamevā’’ti. Sasantatipariyāpannatāya pana attāti gahetabbabhāvūpagamanavasena attānaṃ adhikicca uddissa pavattaṃ ajjhattaṃ, taṃtaṃsattasantānapariyāpannatāya paccattaṃ. Tenāha aṭṭhakathāyaṃ (visuddhi. 1.307) ‘‘attani pavattattā ajjhattaṃ, attānaṃ paṭicca paṭicca pavattattā paccatta’’nti. Kakkhaḷanti kathinaṃ. Yasmā taṃ thaddhabhāvena sahajātānaṃ patiṭṭhā hoti, tasmā ‘‘thaddha’’nti vuttaṃ. Kharigatanti kharasabhāvesu gataṃ tappariyāpannaṃ, kharasabhāvamevāti attho. Yasmā pana kharasabhāvaṃ pharusākārena upaṭṭhānato pharusākāraṃ hoti, tasmā vuttaṃ ‘‘pharusa’’nti. Upādinnaṃ nāma sarīraṭṭhakaṃ. Tattha yaṃ kammasamuṭṭhānaṃ, taṃ nippariyāyato ‘‘upādinna’’nti vuccati, itaraṃ anupādinnaṃ. Tadubhayampi idha taṇhādīhi ādinnagahitaparāmaṭṭhavasena upādinnamevāti dassetuṃ ‘‘sarīraṭṭhakañhī’’tiādi vuttaṃ. Tattha ādinnanti abhiniviṭṭhaṃ. Mamanti gahitaṃ. Ahanti parāmaṭṭhaṃ. Dhātukammaṭṭhānikassāti catudhātuvavatthānavasena dhātukammaṭṭhānaṃ pariharantassa. Etthāti etasmiṃ dhātukammaṭṭhāne. Tīsu koṭṭhāsesūti tippakāresu koṭṭhāsesu. Na hi te tayo cattāro koṭṭhāsā.
вуд̇д̇аббагаараад̇и ‘‘гзсаа ломаа’’д̇иаад̣̇инаа вуд̇д̇аббагаараа. наанаасабхаавад̇од̇и сад̇иби гагкал̣абхаавасааман̃н̃з сасамбхааравибхад̇д̇ид̇о бана гзсаад̣̇исан̇гхаад̇аг̇ад̇анаанаасабхаавад̇о. аалаяод̇и абзгкаа. ниганд̇ийд̇и нигааманаа. бад̇т̇анаад̇и д̇ан̣хаабад̇т̇анаа. барияудтаананд̇и д̇ан̣хаабарияудтаанам̣. г̇ахан̣анд̇и гаамубаад̣̇аанам̣. бараамаасод̇и барад̇о аамасанаа мижчаабхинивзсо. на б̣алаваа аалаяаад̣̇и. яад̣̇и звам̣ гасмаа вибхан̇г̇з б̣аахирааби бат̇авийд̇хаад̇у вид̇т̇аарзнзва вибхад̇д̇аад̇и? яат̇аад̇хаммад̣̇зсанад̇д̇аа д̇ад̇т̇а вид̇т̇аарзнзва д̣̇зсанаа бавад̇д̇аа, яат̇аануломад̣̇зсанад̇д̇аа банзд̇т̇а вуд̇д̇анаязна д̣̇зсанаа сам̣кид̇д̇аа.
Vuttappakārāti ‘‘kesā lomā’’tiādinā vuttappakārā. Nānāsabhāvatoti satipi kakkhaḷabhāvasāmaññe sasambhāravibhattito pana kesādisaṅghātagatanānāsabhāvato. Ālayoti apekkhā. Nikantīti nikāmanā. Patthanāti taṇhāpatthanā. Pariyuṭṭhānanti taṇhāpariyuṭṭhānaṃ. Gahaṇanti kāmupādānaṃ. Parāmāsoti parato āmasanā micchābhiniveso. Na balavā ālayādi. Yadi evaṃ kasmā vibhaṅge bāhirāpi pathavīdhātu vitthāreneva vibhattāti? Yathādhammadesanattā tattha vitthāreneva desanā pavattā, yathānulomadesanattā panettha vuttanayena desanā saṃkhittā.
яож̇зд̇ваа д̣̇ассзд̇ийд̇и згаж̇жхам̣ гад̇ваа д̣̇ассзд̇и. саад̇и аж̇жхад̇д̇игаа бат̇авийд̇хаад̇у. сукабариг̇г̇ахо ход̇и ‘‘на мз со ад̇д̇аа’’д̇и. сид̣̇д̇хз хи анад̇д̇алагкан̣з д̣̇угкалагкан̣ам̣ анижжалагкан̣ан̃жа сид̣̇д̇хамзва ход̇и сан̇кад̇ад̇хаммзсу д̇ад̣̇авинаабхаавад̇од̇и. висуугааяад̇ийд̇и висуугам̣ вируубагирияам̣ бавад̇д̇зд̇и. саа бана ад̇т̇ад̇о вибпанд̣̇анамзваад̇и ааха ‘‘вибпанд̣̇ад̇ий’’д̇и. ассаад̇и аж̇жхад̇д̇игааяа бат̇авийд̇хаад̇уяаа. ажзд̇анаабхааво баагадо ход̇и д̇хаад̇умад̇д̇ад̇ааяа д̣̇ассанад̇о. д̇ам̣ убхаяамбийд̇и д̇ам̣ бат̇авийд̇хаад̇уд̣̇ваяамби.
Yojetvā dassetīti ekajjhaṃ katvā dasseti. Sāti ajjhattikā pathavīdhātu. Sukhapariggaho hoti ‘‘na me so attā’’ti. Siddhe hi anattalakkhaṇe dukkhalakkhaṇaṃ aniccalakkhaṇañca siddhameva hoti saṅkhatadhammesu tadavinābhāvatoti. Visūkāyatīti visūkaṃ virūpakiriyaṃ pavatteti. Sā pana atthato vipphandanamevāti āha ‘‘vipphandatī’’ti. Assāti ajjhattikāya pathavīdhātuyā. Acetanābhāvo pākaṭo hoti dhātumattatāya dassanato. Taṃ ubhayampīti taṃ pathavīdhātudvayampi.
д̇ад̇о висзсад̇арзнаад̇и д̇ад̇о б̣аахирамахаабат̇авид̇о висзсаванд̇ад̇арзна, лахуд̇арзнаад̇и ад̇т̇о. губбад̇ийд̇и луббад̇и. вилийяамаанаад̇и багад̇иуд̣̇агз лон̣ам̣ вияа вилаяам̣ г̇ажчанд̇ий. уд̣̇агаануг̇ад̇аад̇и уд̣̇агам̣ ануг̇ад̇аа уд̣̇агаг̇ад̇игаа. д̇знааха ‘‘уд̣̇агамзва ход̇ий’’д̇и. абхааво зва абхаавад̇аа, на бхавад̇ийд̇и ваа абхааво, д̇ат̇аасабхааво д̇хаммо. д̇асса бхааво абхаавад̇аа. ваяо винаасо д̇хаммо сабхааво зд̇ассаад̇и ваяад̇хаммо, д̇асса бхааво ваяад̇хаммад̇аа, ад̇т̇ад̇о каяо зва. сзсабад̣̇зсуби зсзва наяо. д̇знааха ‘‘саб̣б̣зхиби имзхи бад̣̇зхи анижжалагкан̣амзва вуд̇д̇а’’нд̇и. вид̣̇д̇хам̣санабхаавасса бана бавзд̣̇ид̇аб̣б̣ад̇д̇аа гаамам̣ анижжалагкан̣амзва вуд̇д̇ам̣ саруубад̇о, ид̇арааниби ад̇т̇ад̇о вуд̇д̇аанзваад̇и д̣̇ассзнд̇о ааха ‘‘яам̣ банаа’’д̇иаад̣̇и.
Tato visesatarenāti tato bāhiramahāpathavito visesavantatarena, lahutarenāti attho. Kuppatīti luppati. Vilīyamānāti pakatiudake loṇaṃ viya vilayaṃ gacchantī. Udakānugatāti udakaṃ anugatā udakagatikā. Tenāha ‘‘udakameva hotī’’ti. Abhāvo eva abhāvatā, na bhavatīti vā abhāvo, tathāsabhāvo dhammo. Tassa bhāvo abhāvatā. Vayo vināso dhammo sabhāvo etassāti vayadhammo, tassa bhāvo vayadhammatā, atthato khayo eva. Sesapadesupi eseva nayo. Tenāha ‘‘sabbehipi imehi padehi aniccalakkhaṇameva vutta’’nti. Viddhaṃsanabhāvassa pana paveditabbattā kāmaṃ aniccalakkhaṇameva vuttaṃ sarūpato, itarānipi atthato vuttānevāti dassento āha ‘‘yaṃ panā’’tiādi.
мад̇д̇ам̣ кан̣амад̇д̇ам̣ д̇идтад̇ийд̇и мад̇д̇адто, аббамад̇д̇адто мад̇д̇адтаго, ад̇иид̇д̇аракан̣игод̇и ад̇т̇о. д̇знааха ‘‘барид̇д̇адтид̇игассаа’’д̇и. тид̇ибарид̇д̇ад̇ааяаад̇и згажид̇д̇абавад̇д̇имад̇д̇ад̇аатааналагкан̣асса ид̇арабхаавзна . згасса жид̇д̇асса бавад̇д̇игкан̣амад̇д̇знзва хи сад̇д̇аанам̣ барамад̇т̇ад̇о ж̇ийванагкан̣о барижчинно. д̇знааха ‘‘аяам̣ хий’’д̇иаад̣̇и.
Mattaṃ khaṇamattaṃ tiṭṭhatīti mattaṭṭho, appamattaṭṭho mattaṭṭhako, atiittarakhaṇikoti attho. Tenāha ‘‘parittaṭṭhitikassā’’ti. Ṭhitiparittatāyāti ekacittapavattimattatāṭhānalakkhaṇassa itarabhāvena . Ekassa cittassa pavattikkhaṇamatteneva hi sattānaṃ paramatthato jīvanakkhaṇo paricchinno. Tenāha ‘‘ayaṃ hī’’tiādi.
ж̇ийвид̇анд̇и ж̇ийвид̇инд̣̇рияам̣. сукад̣̇угкаад̇и сукад̣̇угкаа взд̣̇анаа. убзгкааби хи сукад̣̇угкаасвзва анд̇ог̇ад̇хаа идтаанидтабхаавад̇о. ад̇д̇абхаавод̇и ж̇ийвид̇авзд̣̇анаавин̃н̃аан̣аани табзд̇ваа авасидтад̇хаммаа вуд̇д̇аа. гзвалаад̇и ад̇д̇анижжабхаавзна авомиссаа. згажид̇д̇асамааяуд̇д̇аад̇и згзна жид̇д̇зна сахид̇аа згажид̇д̇агкан̣игаа. лахусо вад̇д̇ад̇з кан̣од̇и д̇ааяа зва згагкан̣игад̇ааяа лахуго ад̇иид̇д̇аро ж̇ийвид̇аад̣̇ийнам̣ кан̣о вад̇д̇ад̇и вийд̇ивад̇д̇ад̇ийд̇и ад̇т̇о. ид̣̇анд̇и г̇аат̇ааважанам̣.
Jīvitanti jīvitindriyaṃ. Sukhadukkhāti sukhadukkhā vedanā. Upekkhāpi hi sukhadukkhāsveva antogadhā iṭṭhāniṭṭhabhāvato. Attabhāvoti jīvitavedanāviññāṇāni ṭhapetvā avasiṭṭhadhammā vuttā. Kevalāti attaniccabhāvena avomissā. Ekacittasamāyuttāti ekena cittena sahitā ekacittakkhaṇikā. Lahuso vattate khaṇoti tāya eva ekakkhaṇikatāya lahuko atiittaro jīvitādīnaṃ khaṇo vattati vītivattatīti attho. Idanti gāthāvacanaṃ.
яасмаа сад̇д̇аанам̣ ж̇ийвид̇ам̣ ассаасабассаасаанам̣ абараабарасан̃жаран̣ам̣ лабхамаанамзва бавад̇д̇ад̇и, на алабхамаанам̣, д̇асмаа ассаасабассаасуубаниб̣ад̣̇д̇хам̣. д̇ат̇аа махаабхууд̇аанам̣ самавуд̇д̇ид̇ам̣ лабхамаанамзва бавад̇д̇ад̇и. бат̇авийд̇хаад̇уяаа хи аабод̇хаад̇уаад̣̇ийнам̣ ваа ан̃н̃ад̇арабагобзна б̣аласамбанноби бурисо бад̇т̇ад̣̇д̇хагааяо ваа, ад̇исаараад̣̇ивасзна гилиннабууд̇игааяо ваа, махаад̣аахабарзд̇о ваа, сан̃чиж̇ж̇амаанасанд̇хиб̣анд̇хано ваа худ̇ваа ж̇ийвид̇агкаяам̣ баабун̣аад̇и. габ̣ал̣ийгаараахаараанам̣ яуд̇д̇агаалз лабханд̇ассзва ж̇ийвид̇ам̣ бавад̇д̇ад̇и, алабханд̇асса баригкаяам̣ г̇ажчад̇и, вин̃н̃аан̣з бавад̇д̇амаанзязва жа ж̇ийвид̇ам̣ бавад̇д̇ад̇и, на д̇асмим̣ аббавад̇д̇амаанз. ж̇ийвид̇анд̇и зд̇т̇а ид̇и-сад̣̇д̣̇зна ирияаабат̇уубаниб̣ад̣̇д̇хад̇аасийд̇ун̣хуубаниб̣ад̣̇д̇хад̇аад̣̇ийнам̣ сан̇г̇ахо. жад̇уннан̃хи ирияаабат̇аанам̣ самавуд̇д̇ид̇ам̣ лабхамаанамзва ж̇ийвид̇ам̣ бавад̇д̇ад̇и, ан̃н̃ад̇арасса бана ад̇химад̇д̇ад̇ааяа ааяусан̇каараа убажчиж̇ж̇анд̇и, сийд̇ун̣хаанамби самавуд̇д̇ид̇ам̣ лабхамаанамзва бавад̇д̇ад̇и, ад̇исийд̇зна бана ад̇иун̣хзна ваа абхибхууд̇асса вибаж̇ж̇ад̇ийд̇и.
Yasmā sattānaṃ jīvitaṃ assāsapassāsānaṃ aparāparasañcaraṇaṃ labhamānameva pavattati, na alabhamānaṃ, tasmā assāsapassāsūpanibaddhaṃ. Tathā mahābhūtānaṃ samavuttitaṃ labhamānameva pavattati. Pathavīdhātuyā hi āpodhātuādīnaṃ vā aññatarapakopena balasampannopi puriso patthaddhakāyo vā, atisārādivasena kilinnapūtikāyo vā, mahāḍāhapareto vā, sañchijjamānasandhibandhano vā hutvā jīvitakkhayaṃ pāpuṇāti. Kabaḷīkārāhārānaṃ yuttakāle labhantasseva jīvitaṃ pavattati, alabhantassa parikkhayaṃ gacchati, viññāṇe pavattamāneyeva ca jīvitaṃ pavattati, na tasmiṃ appavattamāne. Jīvitanti ettha iti-saddena iriyāpathūpanibaddhatāsītuṇhūpanibaddhatādīnaṃ saṅgaho. Catunnañhi iriyāpathānaṃ samavuttitaṃ labhamānameva jīvitaṃ pavattati, aññatarassa pana adhimattatāya āyusaṅkhārā upacchijjanti, sītuṇhānampi samavuttitaṃ labhamānameva pavattati, atisītena pana atiuṇhena vā abhibhūtassa vipajjatīti.
д̇ан̣хубаад̣̇иннассаад̇и иминаа хи бажжаяуббаннад̇аагид̇д̇анзна сарасабабхан̇г̇уд̇ам̣язва вибхаавзд̇и. д̣̇угкаанубассанааяа д̇ан̣хааг̇г̇аахасса анижжаанубассанааяа маанаг̇г̇аахасса анад̇д̇аанубассанааяа д̣̇идтиг̇г̇аахасса уж̇увибажжанийгабхаавад̇о згам̣сзнзва д̇ийхи анубассанаахи г̇аахааби виг̇ажчанд̇ийд̇и ааха ‘‘нод̇зва ход̇ий’’д̇и. згам̣язва ааг̇ад̇ам̣ б̣аахирааяа бат̇авийд̇хаад̇уяаа анд̇арад̇хаанад̣̇ассанабавад̇д̇аж̇од̇анааяа.
Taṇhupādinnassāti iminā hi paccayuppannatākittanena sarasapabhaṅgutaṃyeva vibhāveti. Dukkhānupassanāya taṇhāggāhassa aniccānupassanāya mānaggāhassa anattānupassanāya diṭṭhiggāhassa ujuvipaccanīkabhāvato ekaṃseneva tīhi anupassanāhi gāhāpi vigacchantīti āha ‘‘noteva hotī’’ti. Ekaṃyeva āgataṃ bāhirāya pathavīdhātuyā antaradhānadassanapavattajotanāya.
бариг̇г̇аханд̇и д̇хаад̇убариг̇г̇ахан̣ам̣. бадтабзнд̇од̇и аарабханд̇о д̣̇зсзнд̇о. сод̇ад̣̇ваарз б̣алам̣ д̣̇ассзд̇ийд̇и яож̇анаа. гаммадтаанигасса б̣алад̣̇ассанаабад̣̇зсзна гаммадтаанасса аанубхаавам̣ д̣̇ассзд̇и. ваажааяа гхадданамзва вуд̇д̇ам̣ сод̇ад̣̇ваарз б̣алад̣̇ассанабхаавад̇о. б̣аланд̇и жа б̣аахирааяа вияа аж̇жхад̇д̇игааяаби бат̇авийд̇хаад̇уяаа ажзд̇анаабхаавад̣̇ассанзна ругкасса вияа аггосанд̇зби бахаранд̇зби ниб̣б̣игаарад̇аа. самбад̇ивад̇д̇амаануббаннабхаавзнаад̇и д̇ад̣̇аа бажжуббаннабхаавзна. самуд̣̇аажааруббаннабхаавзнаад̇и аабаат̇аг̇ад̇з д̇асмим̣ анидтз сад̣̇д̣̇аарамман̣з аарамман̣агаран̣асан̇каад̇ауббад̇д̇ивасзна сод̇ад̣̇ваарз ж̇аванавзд̣̇анаа д̣̇угкаад̇и важанад̇о. д̇ат̇аа хи ‘‘убаниссаяавасзнаа’’д̇и вуд̇д̇ам̣. взд̣̇анаад̣̇аяобийд̇и ‘‘взд̣̇анаа анижжаа’’д̇и зд̇т̇а вуд̇д̇авзд̣̇анаа жзва сан̃н̃аад̣̇аяо жа. д̇з хи пассзна самаанабхуумигаа на буб̣б̣з вуд̇д̇авзд̣̇анаа. д̇хаад̇усан̇каад̇амзва аарамман̣анд̇и яат̇аабариг̇г̇ахид̇ам̣ бат̇авийд̇хаад̇усан̇каад̇амзва висаяам̣. багканд̣̇ад̇ийд̇и вибассанаажид̇д̇ам̣ анижжанд̇иби д̣̇угканд̇иби анад̇д̇аад̇иби саммасанавасзна анубависад̇и. зд̇зна б̣ахид̣̇д̇хаавигкзбаабхаавамааха, басийд̣̇ад̇ийд̇и бана иминаа гаммадтаанасса вийт̇ибадибаннад̇ам̣. санд̇идтад̇ийд̇и иминаа убаруубари висзсаавахабхаавзна авад̇т̇аанам̣ бадибагкаабхибхавзна нижжалабхаавад̇о. вимужжад̇ийд̇и иминаа д̇ан̣хаамаанад̣̇идтиг̇г̇аахад̇о висзсзна мужжанам̣. адтагат̇ааяам̣ бана самудтаанавасзна ад̇т̇о вуд̇д̇о ‘‘ад̇химогкам̣ лабхад̇ий’’д̇и. сод̇ад̣̇ваарамхи аарамман̣з аабаат̇аг̇ад̇зд̇и ид̣̇ам̣ муулабарин̃н̃ааяа муулад̣̇ассанам̣. сод̇ад̣̇ваарзхи ааваж̇ж̇анаводтаб̣б̣анаанам̣ аяонисо ааваж̇ж̇аяад̇о водтаб̣б̣анавасзна идтз аарамман̣з лобхо, анидтз жа бадигхо уббаж̇ж̇ад̇и, манод̣̇ваарз бана ‘‘ид̇т̇ий, бурисо’’д̇и раж̇ж̇анаад̣̇и ход̇и, д̇асса бан̃жад̣̇ваараж̇аванам̣ муулам̣, саб̣б̣ам̣ ваа бхаван̇г̇аад̣̇и. звам̣ манод̣̇ваараж̇аванасса муулавасзна барин̃н̃аа. ааг̇анд̇угад̇аавагаалигабарин̃н̃аа бана бан̃жад̣̇ваараж̇аванассзва абуб̣б̣абхаававасзна ид̇арабхаававасзна жа взд̣̇ид̇аб̣б̣аа. аяамзд̇т̇а сан̇кзбо, вид̇т̇ааро бана сад̇ибадтаанасам̣ван̣н̣анааяам̣ вуд̇д̇о зва.
Pariggahanti dhātupariggahaṇaṃ. Paṭṭhapentoti ārabhanto desento. Sotadvāre balaṃ dassetīti yojanā. Kammaṭṭhānikassa baladassanāpadesena kammaṭṭhānassa ānubhāvaṃ dasseti. Vācāya ghaṭṭanameva vuttaṃ sotadvāre baladassanabhāvato. Balanti ca bāhirāya viya ajjhattikāyapi pathavīdhātuyā acetanābhāvadassanena rukkhassa viya akkosantepi paharantepi nibbikāratā. Sampativattamānuppannabhāvenāti tadā paccuppannabhāvena. Samudācāruppannabhāvenāti āpāthagate tasmiṃ aniṭṭhe saddārammaṇe ārammaṇakaraṇasaṅkhātauppattivasena sotadvāre javanavedanā dukkhāti vacanato. Tathā hi ‘‘upanissayavasenā’’ti vuttaṃ. Vedanādayopīti ‘‘vedanā aniccā’’ti ettha vuttavedanā ceva saññādayo ca. Te hi phassena samānabhūmikā na pubbe vuttavedanā. Dhātusaṅkhātameva ārammaṇanti yathāpariggahitaṃ pathavīdhātusaṅkhātameva visayaṃ. Pakkhandatīti vipassanācittaṃ aniccantipi dukkhantipi anattātipi sammasanavasena anupavisati. Etena bahiddhāvikkhepābhāvamāha, pasīdatīti pana iminā kammaṭṭhānassa vīthipaṭipannataṃ. Santiṭṭhatīti iminā uparūpari visesāvahabhāvena avatthānaṃ paṭipakkhābhibhavena niccalabhāvato. Vimuccatīti iminā taṇhāmānadiṭṭhiggāhato visesena muccanaṃ. Aṭṭhakathāyaṃ pana samuṭṭhānavasena attho vutto ‘‘adhimokkhaṃ labhatī’’ti. Sotadvāramhi ārammaṇe āpāthagateti idaṃ mūlapariññāya mūladassanaṃ. Sotadvārehi āvajjanavoṭṭhabbanānaṃ ayoniso āvajjayato voṭṭhabbanavasena iṭṭhe ārammaṇe lobho, aniṭṭhe ca paṭigho uppajjati, manodvāre pana ‘‘itthī, puriso’’ti rajjanādi hoti, tassa pañcadvārajavanaṃ mūlaṃ, sabbaṃ vā bhavaṅgādi. Evaṃ manodvārajavanassa mūlavasena pariññā. Āgantukatāvakālikapariññā pana pañcadvārajavanasseva apubbabhāvavasena itarabhāvavasena ca veditabbā. Ayamettha saṅkhepo, vitthāro pana satipaṭṭhānasaṃvaṇṇanāyaṃ vutto eva.
яаат̇аавад̇о д̇хаад̇уунам̣ бариг̇г̇ан̣ханавасзна гад̇абариг̇г̇ахассаби анаад̣̇игаалабхааванаавасзна аяонисо ааваж̇ж̇анам̣ сажзби уббаж̇ж̇ад̇и. водтаб̣б̣анам̣ бад̇ваад̇и водтаб̣б̣анагижжад̇ам̣ бад̇ваа. згам̣ д̣̇вз ваарз аасзванам̣ лабхид̇ваа, на аасзванабажжаяам̣. на хи убзгкаасахаг̇ад̇аахзд̇угажид̇д̇ам̣ аасзванабажжаяабхууд̇ам̣ ад̇т̇и. яад̣̇и сияаа, бадтаанз гусалад̇д̇игз бадижжаваараад̣̇ийсу ‘‘на маг̇г̇абажжаяаа аасзванз д̣̇вз, аасзванабажжаяаа на маг̇г̇з д̣̇вз’’д̇и жа вад̇д̇аб̣б̣ам̣ сияаа, ‘‘на маг̇г̇абажжаяаа аасзванз згам̣ (бадтаа. 1.1.221), аасзванабажжаяаа на маг̇г̇з зга’’нд̇и (бадтаа. 1.1.152) жа бана вуд̇д̇ам̣. згам̣ д̣̇вз ваарзд̇и зд̇т̇а жа згаг̇г̇ахан̣ам̣ важанасилидтад̇ааяа васзна вуд̇д̇ам̣. на хи д̣̇уд̇ияз могхаваарз згаваарамзва водтаб̣б̣анам̣ бавад̇д̇ад̇и. д̣̇вигкад̇д̇ум̣ ваа д̇асса бавад̇д̇им̣ санд̇хааяа згаваараг̇г̇ахан̣ам̣, д̇игкад̇д̇ум̣ бавад̇д̇им̣ санд̇хааяа д̣̇взваараг̇г̇ахан̣ам̣. д̇ад̇т̇а д̣̇уд̇ияам̣ д̇ад̇ияан̃жа бавад̇д̇амаанам̣ лад̣̇д̇хаасзванам̣ вияа ход̇и. яасмаа бана ‘‘водтаб̣б̣анам̣ бад̇ваа згам̣ д̣̇вз ваарзаасзванам̣ лабхид̇ваа жид̇д̇ам̣ бхаван̇г̇амзва од̇арад̇ий’’д̇и ид̣̇ам̣ д̣̇уд̇ияамогхавааравасзна вуд̇д̇ам̣ бхавзяяа. со жа аарамман̣ад̣̇уб̣б̣алад̇ааяа зва ход̇ийд̇и абхид̇хаммадтагат̇ааяам̣ нияамид̇о. ид̇ха бана д̇игкаанубассанаанубхаавзна агусалуббад̇д̇ияаа асамбхававасзна аяонисова ааваж̇ж̇ад̇о аяонисо вавад̇т̇аанам̣ сияаа, на яонисо, д̇асмин̃жа бавад̇д̇з махад̇и ад̇имахад̇и ваа аарамман̣з ж̇аванам̣ на уббаж̇ж̇зяяаад̇и аяамад̇т̇о вижаарзд̇ваа г̇ахзд̇аб̣б̣о.
Yāthāvato dhātūnaṃ pariggaṇhanavasena katapariggahassapi anādikālabhāvanāvasena ayoniso āvajjanaṃ sacepi uppajjati. Voṭṭhabbanaṃ patvāti voṭṭhabbanakiccataṃ patvā. Ekaṃ dve vāre āsevanaṃ labhitvā, na āsevanapaccayaṃ. Na hi upekkhāsahagatāhetukacittaṃ āsevanapaccayabhūtaṃ atthi. Yadi siyā, paṭṭhāne kusalattike paṭiccavārādīsu ‘‘na maggapaccayā āsevane dve, āsevanapaccayā na magge dve’’ti ca vattabbaṃ siyā, ‘‘na maggapaccayā āsevane ekaṃ (paṭṭhā. 1.1.221), āsevanapaccayā na magge eka’’nti (paṭṭhā. 1.1.152) ca pana vuttaṃ. Ekaṃ dve vāreti ettha ca ekaggahaṇaṃ vacanasiliṭṭhatāya vasena vuttaṃ. Na hi dutiye moghavāre ekavārameva voṭṭhabbanaṃ pavattati. Dvikkhattuṃ vā tassa pavattiṃ sandhāya ekavāraggahaṇaṃ, tikkhattuṃ pavattiṃ sandhāya dvevāraggahaṇaṃ. Tattha dutiyaṃ tatiyañca pavattamānaṃ laddhāsevanaṃ viya hoti. Yasmā pana ‘‘voṭṭhabbanaṃ patvā ekaṃ dve vāreāsevanaṃ labhitvā cittaṃ bhavaṅgameva otaratī’’ti idaṃ dutiyamoghavāravasena vuttaṃ bhaveyya. So ca ārammaṇadubbalatāya eva hotīti abhidhammaṭṭhakathāyaṃ niyamito. Idha pana tikkhānupassanānubhāvena akusaluppattiyā asambhavavasena ayonisova āvajjato ayoniso vavatthānaṃ siyā, na yoniso, tasmiñca pavatte mahati atimahati vā ārammaṇe javanaṃ na uppajjeyyāti ayamattho vicāretvā gahetabbo.
зд̇ассзва ваа сад̇иби д̣̇увид̇хад̇аабаригаббанз со жа яад̣̇и ануломз взд̣̇анаад̇д̇игз бадижжаваараад̣̇ийсу ‘‘аасзванабажжаяаа на маг̇г̇з д̣̇вз, на маг̇г̇абажжаяаа аасзванз д̣̇вз’’д̇и жа вуд̇д̇ам̣ сияаа, (лаб̣бхзяяа), на жа вуд̇д̇ам̣. яад̣̇и бана водтаб̣б̣анамби аасзванабажжаяо сияаа, гусалаагусалаанамби сияаа. на хи аасзванабажжаяам̣ лад̣̇д̇хум̣ яуд̇д̇асса аасзванабажжаяад̇ааби д̇хаммо аасзванабажжаяо ход̇ийд̇и авуд̇д̇о ад̇т̇и, водтаб̣б̣анасса бана гусалаагусалаанам̣ аасзванабажжаяабхааво авуд̇д̇о – ‘‘гусалам̣ д̇хаммам̣ бадижжа гусало д̇хаммо уббаж̇ж̇ад̇и наасзванабажжаяаа. агусалам̣…бз… наасзванабажжаяаа’’д̇и (бадтаа. 1.1.93-94) важанад̇о бадигкид̇д̇о жа. ат̇ааби сияаа асамаанавзд̣̇анаанам̣ васзнзва вуд̇д̇анд̇и жа, звамаби яат̇аа – ‘‘ааваж̇ж̇анаа гусалаанам̣ канд̇хаанам̣ агусалаанам̣ канд̇хаанам̣ ананд̇арабажжаязна бажжаяо’’д̇и (бадтаа. 1.1.417) вуд̇д̇ам̣, звам̣ ‘‘аасзванабажжаязна бажжаяо’’д̇иби вад̇д̇аб̣б̣ам̣ сияаа. д̇ам̣ ж̇аад̇ибхзд̣̇аа на вуд̇д̇анд̇и жз? бхуумибхиннасса гаамааважарасса руубааважараад̣̇ийнам̣ аасзванабажжаяабхааво вияа ж̇аад̇ибхиннассаби бхавзяяаад̇и вад̇д̇аб̣б̣о зва сияаа, абхиннаж̇аад̇игасса жа васзна яат̇аа – ‘‘ааваж̇ж̇анаа сахзд̇угаанам̣ канд̇хаанам̣ ананд̇арабажжаязна бажжаяо’’д̇и вуд̇д̇ам̣, звам̣ ‘‘аасзванабажжаязна бажжаяо’’д̇иби вад̇д̇аб̣б̣ам̣ сияаа, на жа вуд̇д̇ам̣. д̇асмаа взд̣̇анаад̇д̇игзби ‘‘аасзванабажжаяаа на маг̇г̇з згам̣, на маг̇г̇абажжаяаа аасзванз зга’’нд̇и звам̣ г̇ан̣анааяа нид̣̇д̇хаарияамаанааяа водтаб̣б̣анасса аасзванабажжаяад̇д̇асса абхааваа аяам̣ могхавааро убабаригкид̇ваа г̇ахзд̇аб̣б̣о.
Etasseva vā satipi duvidhatāparikappane so ca yadi anulome vedanāttike paṭiccavārādīsu ‘‘āsevanapaccayā na magge dve, na maggapaccayā āsevane dve’’ti ca vuttaṃ siyā, (labbheyya), na ca vuttaṃ. Yadi pana voṭṭhabbanampi āsevanapaccayo siyā, kusalākusalānampi siyā. Na hi āsevanapaccayaṃ laddhuṃ yuttassa āsevanapaccayatāpi dhammo āsevanapaccayo hotīti avutto atthi, voṭṭhabbanassa pana kusalākusalānaṃ āsevanapaccayabhāvo avutto – ‘‘kusalaṃ dhammaṃ paṭicca kusalo dhammo uppajjati nāsevanapaccayā. Akusalaṃ…pe… nāsevanapaccayā’’ti (paṭṭhā. 1.1.93-94) vacanato paṭikkhitto ca. Athāpi siyā asamānavedanānaṃ vaseneva vuttanti ca, evamapi yathā – ‘‘āvajjanā kusalānaṃ khandhānaṃ akusalānaṃ khandhānaṃ anantarapaccayena paccayo’’ti (paṭṭhā. 1.1.417) vuttaṃ, evaṃ ‘‘āsevanapaccayena paccayo’’tipi vattabbaṃ siyā. Taṃ jātibhedā na vuttanti ce? Bhūmibhinnassa kāmāvacarassa rūpāvacarādīnaṃ āsevanapaccayabhāvo viya jātibhinnassapi bhaveyyāti vattabbo eva siyā, abhinnajātikassa ca vasena yathā – ‘‘āvajjanā sahetukānaṃ khandhānaṃ anantarapaccayena paccayo’’ti vuttaṃ, evaṃ ‘‘āsevanapaccayena paccayo’’tipi vattabbaṃ siyā, na ca vuttaṃ. Tasmā vedanāttikepi ‘‘āsevanapaccayā na magge ekaṃ, na maggapaccayā āsevane eka’’nti evaṃ gaṇanāya niddhāriyamānāya voṭṭhabbanassa āsevanapaccayattassa abhāvā ayaṃ moghavāro upaparikkhitvā gahetabbo.
водтаб̣б̣анам̣ бана вийт̇ивибаагасанд̇ад̇ияаа аавадданад̇о ааваж̇ж̇анаа, д̇ад̇о висад̣̇исасса ж̇аванасса гаран̣ад̇о манасигаарод̇и жа вад̇д̇аб̣б̣ад̇ам̣ лабхзяяа, зван̃жа гад̇ваа бадтаанз ‘‘водтаб̣б̣анам̣ гусалаанам̣ канд̇хаанам̣ ананд̇арабажжаязна бажжаяо’’д̇иаад̣̇и на вуд̇д̇ам̣, ‘‘ааваж̇ж̇анаа’’ижжзва (бадтаа. 1.1.417) вуд̇д̇ам̣, д̇амби водтаб̣б̣анад̇о барам̣ жад̇уннам̣ бан̃жаннам̣ ваа ж̇аванаанам̣ аарамман̣абурзж̇аад̇ам̣ бхавид̇ум̣ асаггонд̇ам̣ руубаад̣̇им̣ аараб̣бха бавад̇д̇амаанам̣ водтаб̣б̣анам̣ ж̇аванадтаанз тад̇ваа бхаван̇г̇ам̣ од̇арад̇и. ж̇аванадтаанз тад̇ваад̇и жа ж̇аванасса уббаж̇ж̇анадтаанз д̣̇вигкад̇д̇ум̣ бавад̇д̇ид̇ваад̇и ад̇т̇о, на ж̇аванабхаавзнаад̇и. аасзванам̣ лабхид̇ваад̇и жзд̇т̇а аасзванам̣ вияа аасзвананд̇и вуд̇д̇овааяамад̇т̇о. вибпааригад̇д̇аа жасса д̣̇вигкад̇д̇ум̣ ваа д̇игкад̇д̇ум̣ ваа бавад̇д̇иязва жзд̇т̇а аасзванасад̣̇исад̇аа. вибпааригад̇ааяа хи вин̃н̃ад̇д̇исамудтаабагад̇аа жасса вужжад̇и. вибпааригамби ж̇аванам̣ вияа анзгагкад̇д̇ум̣ аббавад̇д̇ияаа асуббад̇идтид̇ад̇ааяа жа на ниббарияааяад̇о аасзванабхаавзна вад̇д̇ад̇ийд̇и на имасса аасзванад̇т̇ам̣ вуд̇д̇ам̣. адтагат̇ааяам̣ бана палажид̇д̇зсу маг̇г̇абарияааяо вияа барияааяавасзна вуд̇д̇ам̣.
Voṭṭhabbanaṃ pana vīthivipākasantatiyā āvaṭṭanato āvajjanā, tato visadisassa javanassa karaṇato manasikāroti ca vattabbataṃ labheyya, evañca katvā paṭṭhāne ‘‘voṭṭhabbanaṃ kusalānaṃ khandhānaṃ anantarapaccayena paccayo’’tiādi na vuttaṃ, ‘‘āvajjanā’’icceva (paṭṭhā. 1.1.417) vuttaṃ, tampi voṭṭhabbanato paraṃ catunnaṃ pañcannaṃ vā javanānaṃ ārammaṇapurejātaṃ bhavituṃ asakkontaṃ rūpādiṃ ārabbha pavattamānaṃ voṭṭhabbanaṃ javanaṭṭhāne ṭhatvā bhavaṅgaṃ otarati. Javanaṭṭhāne ṭhatvāti ca javanassa uppajjanaṭṭhāne dvikkhattuṃ pavattitvāti attho, na javanabhāvenāti. Āsevanaṃ labhitvāti cettha āsevanaṃ viya āsevananti vuttovāyamattho. Vipphārikattā cassa dvikkhattuṃ vā tikkhattuṃ vā pavattiyeva cettha āsevanasadisatā. Vipphārikatāya hi viññattisamuṭṭhāpakatā cassa vuccati. Vipphārikampi javanaṃ viya anekakkhattuṃ appavattiyā asuppatiṭṭhitatāya ca na nippariyāyato āsevanabhāvena vattatīti na imassa āsevanatthaṃ vuttaṃ. Aṭṭhakathāyaṃ pana phalacittesu maggapariyāyo viya pariyāyavasena vuttaṃ.
аяанд̇и ‘‘сажзбий’’д̇иаад̣̇инаа вуд̇д̇о згаваарамби рааг̇аад̣̇ийнам̣ ануббаад̣̇анавасзна вибассанааяа гаммам̣ гаронд̇о яог̇ааважаро. годиббад̇д̇од̇и мад̇т̇агам̣ бад̇д̇о. бадибагкзхи анабхибхууд̇ад̇д̇аа висад̣̇авибассанаан̃аан̣ад̇ааяа д̇игкавибассаго. аарамман̣ам̣ бариг̇г̇ахид̇амзва ход̇и ‘‘звам̣ мз ж̇аванам̣ ж̇авид̇а’’нд̇и саарамман̣асса ж̇аванасса худ̇ваа абхаавававад̇т̇аабанасса гаммадтаанабхаавад̇о, д̇ат̇аа ааваж̇ж̇анавасзна ваа д̇ам̣ аарамман̣ам̣ виссаж̇ж̇зд̇ваа д̇аавад̣̇зва муулагаммадтаанабхууд̇ам̣ аарамман̣ам̣ бариг̇г̇ахид̇амзва ход̇и. д̣̇уд̇ияасса бана васзнаад̇и ‘‘абарасса рааг̇аад̣̇ивасзна згаваарам̣ ж̇аванам̣ ж̇авад̇ий’’д̇иаад̣̇инаа вуд̇д̇асса наад̇ид̇игкавибассагасса васзна ‘‘д̇асса д̇хаад̇аарамман̣амзва жид̇д̇ам̣ багканд̣̇ад̇ий’’д̇иаад̣̇инаа имасмим̣ суд̇д̇з ааг̇ад̇ад̇д̇аа. ‘‘д̇амзнам̣ убад̇хибахаанааяа бадибаннам̣ убад̇хибадиниссаг̇г̇ааяа гад̣̇аажи гарахажи сад̇исаммосаа убад̇хибадисам̣яуд̇д̇аа сарасан̇габбаа самуд̣̇аажаранд̇и. д̣̇анд̇хо уд̣̇ааяи сад̇уббаад̣̇о, ат̇а ко нам̣ киббамзва баж̇ахад̇и винод̣̇зд̇и б̣яанд̇ийгарод̇и анабхаавам̣ г̇амзд̇ий’’д̇и ладугигобамз. д̇асса хи адтагат̇ааяам̣ ‘‘сод̇аабаннаад̣̇аяо д̇аава баж̇аханд̇у, бут̇уж̇ж̇ано гат̇ам̣ баж̇ахад̇ий’’д̇и жод̣̇анам̣ бадтабзд̇ваа ‘‘аарад̣̇д̇хавибассаго хи сад̇исаммосзна сахасаа гилзсз уббаннз ‘маад̣̇исасса наама бхигкуно гилзсо уббанно’д̇и сам̣взг̇ам̣ гад̇ваа вийрияам̣ баг̇г̇аяха вибассанам̣ вад̣дхзд̇ваа маг̇г̇зна гилзсз самуг̇гхаад̇зд̇и, ид̇и со баж̇ахад̇и наамаа’’д̇и ад̇т̇о вуд̇д̇о. д̇зна вуд̇д̇ам̣ – ‘‘д̇асса д̇хаад̇аарамман̣амзва жид̇д̇ам̣ багканд̣̇ад̇ийд̇иаад̣̇инаа имасмим̣ суд̇д̇з ааг̇ад̇ад̇д̇аа’’д̇иаад̣̇и. инд̣̇рияабхааванз жа маж̇жхимасса васзна аяамад̇т̇о взд̣̇ид̇аб̣б̣о.
Ayanti ‘‘sacepī’’tiādinā vutto ekavārampi rāgādīnaṃ anuppādanavasena vipassanāya kammaṃ karonto yogāvacaro. Koṭippattoti matthakaṃ patto. Paṭipakkhehi anabhibhūtattā visadavipassanāñāṇatāya tikkhavipassako. Ārammaṇaṃ pariggahitameva hoti ‘‘evaṃ me javanaṃ javita’’nti sārammaṇassa javanassa hutvā abhāvavavatthāpanassa kammaṭṭhānabhāvato, tathā āvajjanavasena vā taṃ ārammaṇaṃ vissajjetvā tāvadeva mūlakammaṭṭhānabhūtaṃ ārammaṇaṃ pariggahitameva hoti. Dutiyassa pana vasenāti ‘‘aparassa rāgādivasena ekavāraṃ javanaṃ javatī’’tiādinā vuttassa nātitikkhavipassakassa vasena ‘‘tassa dhātārammaṇameva cittaṃ pakkhandatī’’tiādinā imasmiṃ sutte āgatattā. ‘‘Tamenaṃ upadhipahānāya paṭipannaṃ upadhipaṭinissaggāya kadāci karahaci satisammosā upadhipaṭisaṃyuttā sarasaṅkappā samudācaranti. Dandho udāyi satuppādo, atha kho naṃ khippameva pajahati vinodeti byantīkaroti anabhāvaṃ gametī’’ti laṭukikopame. Tassa hi aṭṭhakathāyaṃ ‘‘sotāpannādayo tāva pajahantu, puthujjano kathaṃ pajahatī’’ti codanaṃ paṭṭhapetvā ‘‘āraddhavipassako hi satisammosena sahasā kilese uppanne ‘mādisassa nāma bhikkhuno kileso uppanno’ti saṃvegaṃ katvā vīriyaṃ paggayha vipassanaṃ vaḍḍhetvā maggena kilese samugghāteti, iti so pajahati nāmā’’ti attho vutto. Tena vuttaṃ – ‘‘tassa dhātārammaṇameva cittaṃ pakkhandatītiādinā imasmiṃ sutte āgatattā’’tiādi. Indriyabhāvane ca majjhimassa vasena ayamattho veditabbo.
бариг̇г̇ахавасзнаад̇и д̇хаад̇убариг̇г̇ахавасзна. маммажчзд̣̇анаад̣̇ивасзна бавад̇д̇ааггосанаад̣̇им̣ анидтам̣ аарамман̣ам̣ бад̇ваа сод̇ад̣̇ваарз гиламад̇и буг̇г̇ало, д̇ат̇аа бот̇анабахаран̣аад̣̇игам̣ анидтам̣ аарамман̣ам̣ бад̇ваа гааяад̣̇ваарз гиламад̇и.
Pariggahavasenāti dhātupariggahavasena. Mammacchedanādivasena pavattaakkosanādiṃ aniṭṭhaṃ ārammaṇaṃ patvā sotadvāre kilamati puggalo, tathā pothanapaharaṇādikaṃ aniṭṭhaṃ ārammaṇaṃ patvā kāyadvāre kilamati.
самуд̣̇аажаранд̇ийд̇и саб̣б̣асо уд̣̇д̇хам̣ аажаранд̇и. д̇аяид̣̇ам̣ аманаабзхи самуд̣̇аажаран̣ам̣ наама бот̇анабахаран̣аад̣̇ивасзна убаггаманамзваад̇и ааха ‘‘убаггаманд̇ий’’д̇и, б̣аад̇ханд̇ийд̇и ад̇т̇о. д̇ат̇аасабхаавод̇и яат̇аа баан̣иббахаараад̣̇ийхи гхаддид̇амад̇д̇о вигаарам̣ аабаж̇ж̇ад̇и, д̇ат̇аасабхааво. ‘‘убхад̇од̣̇ан̣д̣агзна жзби, бхигкавз, гагажзнаа’’д̇иаад̣̇инаа (ма. ни. 1.232) оваад̣̇ад̣̇аанам̣ наама анан̃н̃асаад̇хааран̣ам̣ б̣уд̣̇д̇хаанам̣язва аавзн̣иганд̇и ааха ‘‘вуд̇д̇ам̣ ко банзд̇ам̣ бхаг̇авад̇аад̇и ануссаранд̇оби…бз… гагажуубамоваад̣̇ам̣ ануссаранд̇обий’’д̇и вуд̇д̇ам̣. д̇ассаби барияад̇д̇ид̇хаммабхаавад̇од̇и гзжи . яам̣ бана гагажоганд̇агзсуби мануссзсу аббад̣̇уссанам̣ ниб̣б̣игаарам̣, д̇ам̣ сад̇т̇усаасанам̣ ануссаранд̇оби саммаабадибад̇д̇илагкан̣ам̣ д̇хаммам̣ ануссарад̇иязваад̇и звам̣ ваа зд̇т̇а ад̇т̇о взд̣̇ид̇аб̣б̣о. бхигкуно г̇ун̣анд̇и арияад̇хаммаад̇хиг̇аманасид̣̇д̇хам̣ г̇ун̣амааха. со жа саб̣б̣зсамби арияаанам̣ г̇ун̣од̇и д̇ам̣ ануссаранд̇оби сан̇гхам̣ ануссарад̇и зваад̇и вуд̇д̇ам̣.
Samudācarantīti sabbaso uddhaṃ ācaranti. Tayidaṃ amanāpehi samudācaraṇaṃ nāma pothanapaharaṇādivasena upakkamanamevāti āha ‘‘upakkamantī’’ti, bādhantīti attho. Tathāsabhāvoti yathā pāṇippahārādīhi ghaṭṭitamatto vikāraṃ āpajjati, tathāsabhāvo. ‘‘Ubhatodaṇḍakena cepi, bhikkhave, kakacenā’’tiādinā (ma. ni. 1.232) ovādadānaṃ nāma anaññasādhāraṇaṃ buddhānaṃyeva āveṇikanti āha ‘‘vuttaṃ kho panetaṃ bhagavatāti anussarantopi…pe… kakacūpamovādaṃ anussarantopī’’ti vuttaṃ. Tassapi pariyattidhammabhāvatoti keci . Yaṃ pana kakacokantakesupi manussesu appadussanaṃ nibbikāraṃ, taṃ satthusāsanaṃ anussarantopi sammāpaṭipattilakkhaṇaṃ dhammaṃ anussaratiyevāti evaṃ vā ettha attho veditabbo. Bhikkhuno guṇanti ariyadhammādhigamanasiddhaṃ guṇamāha. So ca sabbesampi ariyānaṃ guṇoti taṃ anussarantopi saṅghaṃ anussarati evāti vuttaṃ.
вибассанубзгкаа ад̇хиббзд̇аа, д̇асмаа убзгкаа гусаланиссид̇аа на сан̣таад̇ийд̇и вибассанаавасзна саб̣б̣асмимби сан̇каараг̇ад̇з аж̇жхубзгканам̣ на лабхад̇ийд̇и ад̇т̇о. чал̣ан̇г̇убзгкаад̇и чал̣ан̇г̇убзгкаа вияа чал̣ан̇г̇убзгкаа идтаанидтзсу ниб̣б̣игаарад̇аасааман̃н̃зна . д̇знааха ‘‘саа банзсаа’’д̇иаад̣̇и. чал̣ан̇г̇убзгкаатаанз табзд̇и ‘‘лаабхаа вад̇а мз, сулад̣̇д̇хам̣ вад̇а мз’’д̇иаад̣̇инаа ад̇д̇аманад̇ам̣ аабаж̇ж̇анд̇о.
Vipassanupekkhā adhippetā, tasmā upekkhā kusalanissitā na saṇṭhātīti vipassanāvasena sabbasmimpi saṅkhāragate ajjhupekkhanaṃ na labhatīti attho. Chaḷaṅgupekkhāti chaḷaṅgupekkhā viya chaḷaṅgupekkhā iṭṭhāniṭṭhesu nibbikāratāsāmaññena . Tenāha ‘‘sā panesā’’tiādi. Chaḷaṅgupekkhāṭhāne ṭhapeti ‘‘lābhā vata me, suladdhaṃ vata me’’tiādinā attamanataṃ āpajjanto.
303. аабог̇ад̇анд̇и ааб̣анд̇ханавасзна аабо, д̇ад̣̇зва аабосабхаавам̣ г̇ад̇ад̇д̇аа аабог̇ад̇ам̣, сабхаавзнзва аабобхаавам̣ ваа бад̇д̇анд̇и ад̇т̇о. яасмаа бана со аабобхаавасан̇каад̇о аллаяуусабхааво сасамбхаарабат̇авийсасамбхаарауд̣̇агаад̣̇иг̇ад̇з саб̣б̣асмимби аабасмим̣ виж̇ж̇ад̇и, д̇асмаа вуд̇д̇ам̣ ‘‘саб̣б̣ааабзсу г̇ад̇ам̣ аллаяуусабхаавалагкан̣а’’нд̇и, д̣̇равабхаавалагкан̣анд̇и ад̇т̇о. ‘‘багуббад̇ий’’д̇и баагад̇игабагобам̣ санд̇хааяааха ‘‘огхавасзна вад̣дхад̇ий’’д̇и. д̇знааха ‘‘аяамасса баагад̇иго багобо’’д̇и. ид̇арам̣ бана д̣̇ассзд̇ум̣ ‘‘аабосам̣ваддагаалз банаа’’д̇иаад̣̇и вуд̇д̇ам̣. ог̇ажчанд̇ийд̇и зд̇т̇а ог̇амананд̇и барияаад̣̇аанам̣ ад̇хиббзд̇ам̣, на ад̇хог̇аманамад̇д̇анд̇и ааха ‘‘уд̣̇д̇ханз…бз… баабун̣анд̇ий’’д̇и.
303.Āpogatanti ābandhanavasena āpo, tadeva āposabhāvaṃ gatattā āpogataṃ, sabhāveneva āpobhāvaṃ vā pattanti attho. Yasmā pana so āpobhāvasaṅkhāto allayūsabhāvo sasambhārapathavīsasambhāraudakādigate sabbasmimpi āpasmiṃ vijjati, tasmā vuttaṃ ‘‘sabbaāpesu gataṃ allayūsabhāvalakkhaṇa’’nti, dravabhāvalakkhaṇanti attho. ‘‘Pakuppatī’’ti pākatikapakopaṃ sandhāyāha ‘‘oghavasena vaḍḍhatī’’ti. Tenāha ‘‘ayamassa pākatiko pakopo’’ti. Itaraṃ pana dassetuṃ ‘‘āposaṃvaṭṭakāle panā’’tiādi vuttaṃ. Ogacchantīti ettha ogamananti pariyādānaṃ adhippetaṃ, na adhogamanamattanti āha ‘‘uddhane…pe… pāpuṇantī’’ti.
304. саб̣б̣ад̇зж̇зсу г̇ад̇анд̇и инд̇ханаад̣̇ивасзна анзгабхзд̣̇зсу саб̣б̣зсу д̇зж̇огодтаасзсу г̇ад̇ам̣ бавад̇д̇ам̣. яат̇аа бийд̇и зва бийд̇иг̇ад̇ам̣, звам̣ д̇зж̇о зва д̇зж̇ог̇ад̇ам̣, д̇зж̇анавасзна бавад̇д̇имад̇д̇анд̇и ад̇т̇о. звам̣ аабог̇ад̇ам̣, вааяог̇ад̇ан̃жа взд̣̇ид̇аб̣б̣анд̇и ааха ‘‘буримз’’д̇иаад̣̇и. згаахигаж̇араад̣̇ибхаавзнаад̇и згаахигаад̣̇иж̇араабхзд̣̇зна. усумаж̇аад̇од̇и усмаабхибхууд̇о. ж̇ийрад̇ийд̇и ж̇ин̣н̣о ход̇и. д̇зж̇од̇хаад̇увасзна лаб̣бхамаанаа имасмим̣ гааяз ж̇араабавад̇д̇и баагадаж̇араавасзна взд̣̇ид̇аб̣б̣аад̇и д̣̇ассзд̇ум̣ ‘‘инд̣̇рияавзгаллад̇д̇а’’нд̇иаад̣̇и вуд̇д̇ам̣. валибалид̇аад̣̇ибхааванд̇и валид̇абалид̇абхаавам̣, ан̇г̇абажжан̇г̇аанам̣ сит̇илабхааван̃жа. губбид̇знаад̇и кубхид̇зна. сад̇агкад̇д̇ум̣ д̇аабзд̇ваа д̇аабзд̇ваа сийд̇ууд̣̇агз багкибид̇ваа уд̣̇д̇хадасабби сад̇ад̇ход̇асаббийд̇и вад̣̇анд̇и. сарийрз багад̇иусумам̣ ад̇иггамид̇ваа ун̣хабхааво санд̇аабо, сарийрасса д̣̇аханавасзна бавад̇д̇о махаад̣̇аахо барид̣̇ааход̇и аяамзва д̇зсам̣ висзсо. асид̇анд̇и суд̇д̇ам̣. кааяид̇анд̇и каад̣̇ид̇ам̣. сааяид̇анд̇и ассаад̣̇ид̇ам̣. саммаа барибаагам̣ г̇ажчад̇ийд̇и самавзбаагинияаа г̇ахан̣ияаа васзна вуд̇д̇ам̣. асаммаабарибаагоби висамабаагинияаа г̇ахан̣ияаа васзна взд̣̇ид̇аб̣б̣о. расаад̣̇ибхаавзнаад̇и расаруд̇хирамам̣самзд̣̇анхааруадтиадтимин̃ж̇асуггабхаавзна. вивзганд̇и бут̇убхаавам̣ ан̃н̃аман̃н̃ам̣ висад̣̇исабхаавам̣. асид̇аад̣̇ибхзд̣̇асса аахаарасса барин̣аамз расо ход̇и, д̇ам̣ бадижжа расад̇хаад̇у уббаж̇ж̇ад̇ийд̇и ад̇т̇о. звам̣ расасса барин̣аамз ‘‘руд̇хира’’нд̇иаад̣̇инаа саб̣б̣ам̣ нзд̇аб̣б̣ам̣.
304.Sabbatejesu gatanti indhanādivasena anekabhedesu sabbesu tejokoṭṭhāsesu gataṃ pavattaṃ. Yathā pīti eva pītigataṃ, evaṃ tejo eva tejogataṃ, tejanavasena pavattimattanti attho. Evaṃ āpogataṃ, vāyogatañca veditabbanti āha ‘‘purime’’tiādi. Ekāhikajarādibhāvenāti ekāhikādijarābhedena. Usumajātoti usmābhibhūto. Jīratīti jiṇṇo hoti. Tejodhātuvasena labbhamānā imasmiṃ kāye jarāpavatti pākaṭajarāvasena veditabbāti dassetuṃ ‘‘indriyavekallatta’’ntiādi vuttaṃ. Valipalitādibhāvanti valitapalitabhāvaṃ, aṅgapaccaṅgānaṃ sithilabhāvañca. Kuppitenāti khubhitena. Satakkhattuṃ tāpetvā tāpetvā sītūdake pakkhipitvā uddhaṭasappi satadhotasappīti vadanti. Sarīre pakatiusumaṃ atikkamitvā uṇhabhāvo santāpo, sarīrassa dahanavasena pavatto mahādāho paridāhoti ayameva tesaṃ viseso. Asitanti suttaṃ. Khāyitanti khāditaṃ. Sāyitanti assāditaṃ. Sammā paripākaṃ gacchatīti samavepākiniyā gahaṇiyā vasena vuttaṃ. Asammāparipākopi visamapākiniyā gahaṇiyā vasena veditabbo. Rasādibhāvenāti rasarudhiramaṃsamedanhāruaṭṭhiaṭṭhimiñjasukkabhāvena. Vivekanti puthubhāvaṃ aññamaññaṃ visadisabhāvaṃ. Asitādibhedassa āhārassa pariṇāme raso hoti, taṃ paṭicca rasadhātu uppajjatīti attho. Evaṃ rasassa pariṇāme ‘‘rudhira’’ntiādinā sabbaṃ netabbaṃ.
харид̇анд̇анд̇и харид̇амзва, анд̇а-сад̣̇д̣̇зна бад̣̇авад̣дханам̣ гад̇ам̣ яат̇аа ‘‘вананд̇ам̣ суд̇д̇анд̇а’’нд̇и. жамманиллзканам̣ жаммам̣ ликид̇ваа чад̣д̣ид̇агасадам̣.
Haritantanti haritameva, anta-saddena padavaḍḍhanaṃ kataṃ yathā ‘‘vanantaṃ suttanta’’nti. Cammanillekhanaṃ cammaṃ likhitvā chaḍḍitakasaṭaṃ.
305. уг̇г̇аарахиггаараад̣̇ийд̇и зд̇т̇а аад̣̇и-сад̣̇д̣̇зна уд̣̇д̣̇згакийбанаад̣̇ибавад̇д̇агаваад̇аанам̣ сан̇г̇ахо д̣̇адтаб̣б̣о. ужжаарабассааваад̣̇ийд̇и аад̣̇и-сад̣̇д̣̇зна бид̇д̇асзмхаласигаад̣̇инийхаран̣аваад̇асса жзва усумаваад̇асса жа сан̇г̇ахо взд̣̇ид̇аб̣б̣о. яад̣̇иби гужчи-сад̣̇д̣̇о уд̣̇арабарияааяо, годта-сад̣̇д̣̇зна бана аб̣бханд̇арасса вужжамаанад̇д̇аа д̇ад̣̇авасидто уд̣̇арабад̣̇зсо ид̇ха гужчи-сад̣̇д̣̇зна вужжад̇ийд̇и ааха ‘‘гужчисаяаа ваад̇аад̇и анд̇аанам̣ б̣ахиваад̇аа’’д̇и. самин̃ж̇анабасааран̣аад̣̇ийнийд̇и аад̣̇и-сад̣̇д̣̇зна аалоганавилоганауд̣̇д̇харан̣аад̣̇игаа саб̣б̣аа гааяигагирияаа сан̇г̇ахид̇аа. авасавад̇и уд̣̇агам̣ зд̇асмаад̇и оссаванам̣, чад̣̇ананд̇о. ид̇хаад̇и имасмим̣ таанз.
305.Uggārahikkārādīti ettha ādi-saddena uddekakhīpanādipavattakavātānaṃ saṅgaho daṭṭhabbo. Uccārapassāvādīti ādi-saddena pittasemhalasikādinīharaṇavātassa ceva usumavātassa ca saṅgaho veditabbo. Yadipi kucchi-saddo udarapariyāyo, koṭṭha-saddena pana abbhantarassa vuccamānattā tadavasiṭṭho udarapadeso idha kucchi-saddena vuccatīti āha ‘‘kucchisayā vātāti antānaṃ bahivātā’’ti. Samiñjanapasāraṇādīnīti ādi-saddena ālokanavilokanauddharaṇādikā sabbā kāyikakiriyā saṅgahitā. Avasavati udakaṃ etasmāti ossavanaṃ, chadananto. Idhāti imasmiṃ ṭhāne.
306. ниссад̇д̇абхааванд̇и анад̇д̇агад̇ам̣. яат̇аад̣̇ассид̇аа хи жад̇ассо д̇хаад̇уяо анад̇д̇анияам̣ гзвалам̣ д̇хаад̇умад̇д̇аа ниссад̇д̇аниж̇ж̇ийваад̇и имамад̇т̇ам̣ д̣̇ассзд̇и. бариваарид̇од̇и бариваарид̇абхаавзна тид̇о баривуд̇о. д̇знааха ‘‘зд̇ааний’’д̇иаад̣̇и, гадтаад̣̇ийни саннивзсависзсавасзна табид̇аанийд̇и ад̇хиббааяо. ан̃н̃ат̇аа аг̇аарасаман̃н̃ааяа бхаавад̇о. д̇знааха ‘‘гадтаад̣̇ийсу банаа’’д̇иаад̣̇и. яад̣̇ад̇т̇ам̣ баал̣ияам̣ ‘‘сзяяат̇ааби, аавусо’’д̇иаад̣̇и аарад̣̇д̇хам̣, д̇амад̇т̇ам̣ баагадам̣ гад̇ваа д̣̇ассзд̇ум̣ ‘‘яат̇аа гадтаад̣̇ийний’’д̇иаад̣̇и вуд̇д̇ам̣.
306.Nissattabhāvanti anattakataṃ. Yathādassitā hi catasso dhātuyo anattaniyaṃ kevalaṃ dhātumattā nissattanijjīvāti imamatthaṃ dasseti. Parivāritoti parivāritabhāvena ṭhito parivuto. Tenāha ‘‘etānī’’tiādi, kaṭṭhādīni sannivesavisesavasena ṭhapitānīti adhippāyo. Aññathā agārasamaññāya bhāvato. Tenāha ‘‘kaṭṭhādīsu panā’’tiādi. Yadatthaṃ pāḷiyaṃ ‘‘seyyathāpi, āvuso’’tiādi āraddhaṃ, tamatthaṃ pākaṭaṃ katvā dassetuṃ ‘‘yathā kaṭṭhādīnī’’tiādi vuttaṃ.
гаамам̣ хздтаа ‘‘мад̇д̇адтагасса гааяассаа’’д̇иаад̣̇инаа (ма. ни. 1.302) авибхааг̇зна згад̣̇зсзна жа убаад̣̇ааруубамби гат̇ид̇ам̣, д̇ат̇аа взд̣̇анаад̣̇аяо канд̇хабхаавзна бариг̇г̇ахзд̇ваа на гат̇ид̇аа, д̇ат̇аа д̇ан̣хааби самуд̣̇аяасажжабхаавзна. ид̇араани бана сажжаани саб̣б̣зна саб̣б̣ам̣ на гат̇ид̇аани. д̇знзвааха ‘‘хздтаа…бз… на гат̇ид̇ааний’’д̇и. жагкубасаад̣̇з нируд̣̇д̇хзд̇и жагкубасаад̣̇з винадтз. убахад̇зд̇и буб̣б̣агимиаад̣̇ийхи убад̣̇д̣̇уд̇з. балиб̣уд̣̇д̇хзд̇и буб̣б̣аад̣̇иуббад̇д̇ияаа винаа бадижчаад̣̇ид̇з. д̇аж̇ж̇од̇и д̇ассаануруубо, жагкувин̃н̃аан̣уббад̇д̇ияаа ануруубод̇и ад̇т̇о. жагкусса руубаарамман̣з аабаат̇аг̇ад̇з уббаж̇ж̇анаманасигааро хад̣̇аяасанниссаяоби жагкумхи сад̇и ход̇и, асад̇и на ход̇ийд̇и гад̇ваа ‘‘жагкум̣ бадижжа уббаж̇ж̇анаманасигааро’’д̇и вуд̇д̇о. бхаван̇г̇аавадданам̣ д̇асса яат̇аа аарамман̣абажжаяз, звам̣ басаад̣̇абажжаязби ход̇ийд̇и вуд̇д̇ам̣ ‘‘жагкун̃жа руубз жа бадижжаа’’д̇и. нд̇и жагкуд̣̇ваарз гирияаманод̇хаад̇ужид̇д̇ам̣. ан̃н̃авихид̇ассаад̇и ан̃н̃аарамман̣абасуд̇асса. д̇ад̣̇ануруубассаад̇и д̇зсам̣ жагкуруубад̇ад̣̇аабхог̇аанам̣ ануруубасса.
Kāmaṃ heṭṭhā ‘‘mattaṭṭhakassa kāyassā’’tiādinā (ma. ni. 1.302) avibhāgena ekadesena ca upādārūpampi kathitaṃ, tathā vedanādayo khandhabhāvena pariggahetvā na kathitā, tathā taṇhāpi samudayasaccabhāvena. Itarāni pana saccāni sabbena sabbaṃ na kathitāni. Tenevāha ‘‘heṭṭhā…pe… na kathitānī’’ti. Cakkhupasāde niruddheti cakkhupasāde vinaṭṭhe. Upahateti pubbakimiādīhi upaddute. Palibuddheti pubbādiuppattiyā vinā paṭicchādite. Tajjoti tassānurūpo, cakkhuviññāṇuppattiyā anurūpoti attho. Cakkhussa rūpārammaṇe āpāthagate uppajjanamanasikāro hadayasannissayopi cakkhumhi sati hoti, asati na hotīti katvā ‘‘cakkhuṃ paṭicca uppajjanamanasikāro’’ti vutto. Bhavaṅgāvaṭṭanaṃ tassa yathā ārammaṇapaccaye, evaṃ pasādapaccayepi hotīti vuttaṃ ‘‘cakkhuñca rūpe ca paṭiccā’’ti. Nti cakkhudvāre kiriyamanodhātucittaṃ. Aññavihitassāti aññārammaṇapasutassa. Tadanurūpassāti tesaṃ cakkhurūpatadābhogānaṃ anurūpassa.
жад̇д̇аари сажжаани д̣̇ассзд̇и саруубад̇о ад̇т̇аабад̇д̇ид̇о жаад̇и ад̇хиббааяо. д̇аббагааро бхууд̇о, д̇аббагаарам̣ ваа бад̇д̇о д̇ат̇аабхууд̇о, д̇асса, яат̇аа жагкувин̃н̃аан̣ам̣ уббаж̇ж̇ад̇и, д̇аад̣̇исасса бажжаяаагаарасамавзд̇ассаад̇и ад̇т̇о. д̇исамудтаанаруубанд̇и уд̇угаммаахаарасамудтаанаруубам̣. ид̣̇ан̃жа сад̇иби д̇ад̣̇аа бхаван̇г̇аавадданажид̇д̇асамудтаанаруубз гзвалам̣ жагкувин̃н̃аан̣асамудтид̇аруубасса абхаавамад̇д̇ам̣ г̇ахзд̇ваа вуд̇д̇ам̣. сан̇г̇ахам̣ г̇ажчад̇ийд̇и наг̇арам̣ вияа раж̇ж̇з руубагканд̇хз сан̇г̇ахзд̇аб̣б̣ад̇ам̣ г̇ахзд̇аб̣б̣ад̇ам̣ г̇ажчад̇и. ‘‘д̇ат̇аабхууд̇ассаа’’д̇и вуд̇д̇ад̇д̇аа взд̣̇анаад̣̇аяо жагкувин̃н̃аан̣асамбаяуд̇д̇аава, вин̃н̃аан̣амби жагкувин̃н̃аан̣амзва. сан̇каараад̇и жзд̇анаава вуд̇д̇аа жзд̇анаабад̇хаанад̇д̇аа сан̇каарагканд̇хассаад̇и ад̇хиббааяо. д̇ад̇т̇а бана пассаж̇ийвид̇инд̣̇рияаманасигааражид̇д̇адтид̇ияоби сан̇каарагканд̇хад̇хаммаава. згад̇о сан̇г̇ахо ‘‘бан̃жагканд̇хаа’’д̇и згад̇о г̇ан̣анаа. самааг̇амод̇и яат̇аасагам̣ бажжаяавасзна самод̇хаанам̣. самавааяод̇и ан̃н̃аман̃н̃асса бажжаяабхаавзна самавзд̇ад̇ааяа самуд̣̇ид̇абхааво.
Cattāri saccāni dasseti sarūpato atthāpattito cāti adhippāyo. Tappakāro bhūto, tappakāraṃ vā patto tathābhūto, tassa, yathā cakkhuviññāṇaṃ uppajjati, tādisassa paccayākārasamavetassāti attho. Tisamuṭṭhānarūpanti utukammāhārasamuṭṭhānarūpaṃ. Idañca satipi tadā bhavaṅgāvaṭṭanacittasamuṭṭhānarūpe kevalaṃ cakkhuviññāṇasamuṭṭhitarūpassa abhāvamattaṃ gahetvā vuttaṃ. Saṅgahaṃ gacchatīti nagaraṃ viya rajje rūpakkhandhe saṅgahetabbataṃ gahetabbataṃ gacchati. ‘‘Tathābhūtassā’’ti vuttattā vedanādayo cakkhuviññāṇasampayuttāva, viññāṇampi cakkhuviññāṇameva. Saṅkhārāti cetanāva vuttā cetanāpadhānattā saṅkhārakkhandhassāti adhippāyo. Tattha pana phassajīvitindriyamanasikāracittaṭṭhitiyopi saṅkhārakkhandhadhammāva. Ekato saṅgaho ‘‘pañcakkhandhā’’ti ekato gaṇanā. Samāgamoti yathāsakaṃ paccayavasena samodhānaṃ. Samavāyoti aññamaññassa paccayabhāvena samavetatāya samuditabhāvo.
бажжаяуббаннад̇хаммо бадижжа самуббаж̇ж̇ад̇и зд̇асмаад̇и бадижжасамуббаад̣̇о, бажжаяаагааро. бажжаяад̇хаммз бассанд̇оби бажжаяуббаннад̇хаммз бассад̇и, д̇з бассанд̇оби бажжаяад̇хаммз бассад̇ийд̇и вуд̇д̇ам̣ ‘‘яо бадижжасамуббаад̣̇а’’нд̇иаад̣̇и. чанд̣̇агаран̣авасзнаад̇и д̇ан̣хааяанавасзна. аалаяагаран̣авасзнаад̇и абзгкаагаран̣авасзна. анунаяагаран̣авасзнаад̇и анураж̇ж̇анавасзна. аж̇жхог̇аахид̇ваад̇и аарамман̣ам̣ анубависид̇ваа вияа г̇илид̇ваа вияа нидтабзд̇ваа вияа д̣̇ал̣хаг̇г̇ахан̣авасзна. чанд̣̇арааг̇о винаяад̇и бахийяад̇и зд̇т̇аад̇и чанд̣̇арааг̇авинаяо чанд̣̇арааг̇абахаанан̃жаад̇и вужжад̇и ниб̣б̣аанам̣. аахарид̇ваад̇и баал̣ияам̣ саруубад̇о анааг̇ад̇амби ад̇т̇ад̇о аанзд̇ваа сан̇г̇ан̣ханавасзна г̇ахзд̇аб̣б̣ам̣. аахаран̣авид̇хим̣ бана д̣̇ассзнд̇о ‘‘яаа имзсуу’’д̇иаад̣̇имааха. имзсу д̇ийсу таанзсууд̇и яат̇аавуд̇д̇зсу сукад̣̇угкаад̣̇ийсу д̇ийсу абхисамаяадтаанзсу. д̣̇идтийд̇и барин̃н̃аабхисамаяаад̣̇ивасзна бавад̇д̇аа саммаад̣̇идти яаат̇аавад̣̇ассанам̣. звам̣ сан̇габбаад̣̇аяоби яат̇аарахам̣ взд̣̇ид̇аб̣б̣аа. бхааванаабадивзд̇ход̇и бхааванаавасзна бадивзд̇хо, на аарамман̣агаран̣амад̇д̇зна. аяам̣ маг̇г̇од̇и аяам̣ жад̇уннам̣ арияасажжаанам̣ бадивиж̇жханавасзна бавад̇д̇о адтан̇г̇иго маг̇г̇о. зд̇д̇аавад̇аабийд̇и звам̣ згасмим̣ жагкуд̣̇ваарз вад̇т̇у бариг̇г̇ахамукзнаби жад̇усажжагаммадтаанасса мад̇т̇агам̣ баабанзна б̣ахум̣ вибулам̣ барибун̣н̣амзва бхаг̇авад̇о саасанам̣ гад̇ам̣ анудтид̇ам̣ ход̇и.
Paccayuppannadhammo paṭicca samuppajjati etasmāti paṭiccasamuppādo, paccayākāro. Paccayadhamme passantopi paccayuppannadhamme passati, te passantopi paccayadhamme passatīti vuttaṃ ‘‘yo paṭiccasamuppāda’’ntiādi. Chandakaraṇavasenāti taṇhāyanavasena. Ālayakaraṇavasenāti apekkhākaraṇavasena. Anunayakaraṇavasenāti anurajjanavasena. Ajjhogāhitvāti ārammaṇaṃ anupavisitvā viya gilitvā viya niṭṭhapetvā viya daḷhaggahaṇavasena. Chandarāgo vinayati pahīyati etthāti chandarāgavinayo chandarāgapahānañcāti vuccati nibbānaṃ. Āharitvāti pāḷiyaṃ sarūpato anāgatampi atthato ānetvā saṅgaṇhanavasena gahetabbaṃ. Āharaṇavidhiṃ pana dassento ‘‘yā imesū’’tiādimāha. Imesu tīsu ṭhānesūti yathāvuttesu sukhadukkhādīsu tīsu abhisamayaṭṭhānesu. Diṭṭhīti pariññābhisamayādivasena pavattā sammādiṭṭhi yāthāvadassanaṃ. Evaṃ saṅkappādayopi yathārahaṃ veditabbā. Bhāvanāpaṭivedhoti bhāvanāvasena paṭivedho, na ārammaṇakaraṇamattena. Ayaṃ maggoti ayaṃ catunnaṃ ariyasaccānaṃ paṭivijjhanavasena pavatto aṭṭhaṅgiko maggo. Ettāvatāpīti evaṃ ekasmiṃ cakkhudvāre vatthu pariggahamukhenapi catusaccakammaṭṭhānassa matthakaṃ pāpanena bahuṃ vipulaṃ paripuṇṇameva bhagavato sāsanaṃ kataṃ anuṭṭhitaṃ hoti.
уббаж̇ж̇ид̇ваа нируд̣̇д̇хамзва бхаван̇г̇ажид̇д̇ам̣ ааваж̇ж̇анажид̇д̇асса бажжаяо бхавад̇ийд̇и вуд̇д̇ам̣ ‘‘д̇ам̣ нируд̣̇д̇хамбий’’д̇и. манд̣̇ат̇аамаг̇ад̇амзваад̇и махад̇ияаа нид̣̇д̣̇ааяа абхибхууд̇асса васзна вуд̇д̇ам̣, габимид̣̇д̇хабарзд̇асса бана бхаван̇г̇ажид̇д̇ам̣ гад̣̇аажи ааваж̇ж̇анасса бажжаяо бхавзяяаад̇и. бхаван̇г̇асамаязнзваад̇и бхаван̇г̇ассзва бавад̇д̇анасамаязна баг̇ун̣аж̇жхаанабаг̇ун̣агаммадтаанабаг̇ун̣аг̇ант̇зсу д̇зсам̣ баг̇ун̣абхаавзнзва аабхог̇зна винааби манасигааро бавад̇д̇ад̇и. д̇ат̇аа хи баг̇ун̣ам̣ г̇ант̇ам̣ баг̇ун̣абхаавзнзва ниранд̇арам̣ вияа аж̇жхаяамаанз ан̃н̃авихид̇ад̇ааяа ‘‘зд̇д̇аго г̇ант̇о г̇ад̇о, зд̇д̇аго авасидто’’д̇и саллагкан̣аа на ход̇и. жад̇усамудтаанамбийд̇и саб̣б̣ам̣ жад̇усамудтаанаруубам̣, на буб̣б̣з вияа д̇исамудтаанамзваад̇и ад̇хиббааяо. буб̣б̣ан̇г̇амад̇д̇аа ол̣ааригад̇д̇аа жа пассажзд̇анаава сан̇каарагканд̇ход̇и г̇ахид̇аа, на ан̃н̃зсам̣ абхааваа. згад̣̇зсамзва саммасанд̇од̇и яат̇аауд̣̇д̣̇идтам̣ ад̇т̇ам̣ хздтаа анавасзсад̇о анид̣̇д̣̇исид̇ваа згад̣̇зсамзва нид̣̇д̣̇исанавасзна д̣̇зсанааяа аамасанд̇о. имасмим̣ таанзд̇и яат̇аауд̣̇д̣̇идтасса ад̇т̇асса ‘‘аж̇жхад̇д̇иган̃жзва, аавусо, жагку’’нд̇иаад̣̇инаа (ма. ни. 1.306) чад̣̇вааравасзна нид̣̇д̣̇исанадтаанз. хздтаа барихийнад̣̇зсананд̇и – ‘‘яам̣ убаад̣̇ааруубам̣ жад̇д̇ааро аруубино канд̇хаа убари д̇ийн̣и арияасажжааний’’д̇и нид̣̇д̣̇зсавасзна барихийнам̣ ад̇т̇аж̇аад̇ам̣ саб̣б̣ам̣. д̇ам̣д̇ам̣д̣̇вааравасзнаад̇и жагкуд̣̇ваараад̣̇игам̣ д̇ам̣д̇ам̣д̣̇вааравасзна. жад̇усажжавасзна аарад̣̇д̇хаа д̣̇зсанаа жад̇усажжзнзва барияосаабид̇аад̇и ааха ‘‘яат̇аанусанд̇хинаава суд̇д̇анд̇ам̣ нидтабзсий’’д̇и.
Uppajjitvā niruddhameva bhavaṅgacittaṃ āvajjanacittassa paccayo bhavatīti vuttaṃ ‘‘taṃ niruddhampī’’ti. Mandathāmagatamevāti mahatiyā niddāya abhibhūtassa vasena vuttaṃ, kapimiddhaparetassa pana bhavaṅgacittaṃ kadāci āvajjanassa paccayo bhaveyyāti. Bhavaṅgasamayenevāti bhavaṅgasseva pavattanasamayena paguṇajjhānapaguṇakammaṭṭhānapaguṇaganthesu tesaṃ paguṇabhāveneva ābhogena vināpi manasikāro pavattati. Tathā hi paguṇaṃ ganthaṃ paguṇabhāveneva nirantaraṃ viya ajjhayamāne aññavihitatāya ‘‘ettako gantho gato, ettako avasiṭṭho’’ti sallakkhaṇā na hoti. Catusamuṭṭhānampīti sabbaṃ catusamuṭṭhānarūpaṃ, na pubbe viya tisamuṭṭhānamevāti adhippāyo. Pubbaṅgamattā oḷārikattā ca phassacetanāva saṅkhārakkhandhoti gahitā, na aññesaṃ abhāvā. Ekadesameva sammasantoti yathāuddiṭṭhaṃ atthaṃ heṭṭhā anavasesato aniddisitvā ekadesameva niddisanavasena desanāya āmasanto. Imasmiṃ ṭhāneti yathāuddiṭṭhassa atthassa ‘‘ajjhattikañceva, āvuso, cakkhu’’ntiādinā (ma. ni. 1.306) chadvāravasena niddisanaṭṭhāne. Heṭṭhā parihīnadesananti – ‘‘yaṃ upādārūpaṃ cattāro arūpino khandhā upari tīṇi ariyasaccānī’’ti niddesavasena parihīnaṃ atthajātaṃ sabbaṃ. Taṃtaṃdvāravasenāti cakkhudvārādikaṃ taṃtaṃdvāravasena. Catusaccavasena āraddhā desanā catusacceneva pariyosāpitāti āha ‘‘yathānusandhināva suttantaṃ niṭṭhapesī’’ti.
махаахад̇т̇ибад̣̇обамасуд̇д̇аван̣н̣анааяа лийнад̇т̇аббагаасанаа самад̇д̇аа.
Mahāhatthipadopamasuttavaṇṇanāya līnatthappakāsanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 8. махаахад̇т̇ибад̣̇обамасуд̇д̇ам̣ • 8. Mahāhatthipadopamasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / маж̇жхиманигааяа (адтагат̇аа) • Majjhimanikāya (aṭṭhakathā) / 8. махаахад̇т̇ибад̣̇обамасуд̇д̇аван̣н̣анаа • 8. Mahāhatthipadopamasuttavaṇṇanā
