| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
3. மஹாகச்சானப⁴த்³தே³கரத்தஸுத்தவண்ணனா
3. Mahākaccānabhaddekarattasuttavaṇṇanā
279. உண்ஹபா⁴வேன தபனதோ தபங் உத³கங் ஏதஸ்ஸாதி தபோதா³, ரஹதோ³. தேனாஹ ‘‘தத்தோத³கஸ்ஸ ரஹத³ஸ்ஸா’’தி. ஸங்கே²பேன வுத்தமத்த²ங் வித்தா²ரதோ த³ஸ்ஸேதுங், ‘‘வேபா⁴ரபப்³ப³தஸ்ஸா’’திஆதி³ வுத்தங். ததோ உத³கரஹத³தோ, தங் ரஹத³ங் உபனிஸ்ஸாயாதி அத்தோ². நாக³ப⁴வனாக³தோபி ஹி ஸோ ரஹதோ³ ததோ உபரி மனுஸ்ஸலோகே ஜலாஸயேன ஸம்ப³த்³தோ⁴ ஹோதி. தேன வுத்தங் – ‘‘தபோதா³ நாம நதீ³ ஸந்த³தீ’’தி. ஏதி³ஸாதி குதி²தா உண்ஹா, அன்வத்த²னாமவஸேன தபோதா³தி ச வுச்சதீதி அத்தோ². பேதலோகோதி பேதானங் வஸனட்டா²னங் பச்சேகனிரயங் ஸந்தா⁴யாஹ. இமஸ்ஸ பன ஆராமஸ்ஸாதி தபோதா³ராமஸ்ஸ. ததோதி தபோதா³ஸங்கா²தனதி³தோ. மஹாஉத³கரஹதோ³தி மஹாஉத³கப⁴ரிதங் பல்லலங்.
279. Uṇhabhāvena tapanato tapaṃ udakaṃ etassāti tapodā, rahado. Tenāha ‘‘tattodakassa rahadassā’’ti. Saṅkhepena vuttamatthaṃ vitthārato dassetuṃ, ‘‘vebhārapabbatassā’’tiādi vuttaṃ. Tato udakarahadato, taṃ rahadaṃ upanissāyāti attho. Nāgabhavanāgatopi hi so rahado tato upari manussaloke jalāsayena sambaddho hoti. Tena vuttaṃ – ‘‘tapodā nāma nadī sandatī’’ti. Edisāti kuthitā uṇhā, anvatthanāmavasena tapodāti ca vuccatīti attho. Petalokoti petānaṃ vasanaṭṭhānaṃ paccekanirayaṃ sandhāyāha. Imassa pana ārāmassāti tapodārāmassa. Tatoti tapodāsaṅkhātanadito. Mahāudakarahadoti mahāudakabharitaṃ pallalaṃ.
280. ஸமித்³தோ⁴தி உளாரோ, பரிபுண்ணோயேவாதி அத்தோ². ஆதி³ம்ஹி ப்³ரஹ்மசரியமஸ்ஸாதி ஆதி³ப்³ரஹ்மசரியோ, ஸோ ஏவ ஆதி³ப்³ரஹ்மசரியகோ. தேனாஹ ‘‘புப்³ப³பா⁴க³ப்படிபத்திபூ⁴தோ’’தி. ‘‘அதீதங் அனாக³தங் பச்சுப்பன்ன’’ந்தி அத்³த⁴பே⁴த³முகே²ன ஸங்க²தத⁴ம்மபோ³த⁴வசனங்.
280.Samiddhoti uḷāro, paripuṇṇoyevāti attho. Ādimhi brahmacariyamassāti ādibrahmacariyo, so eva ādibrahmacariyako. Tenāha ‘‘pubbabhāgappaṭipattibhūto’’ti. ‘‘Atītaṃ anāgataṃ paccuppanna’’nti addhabhedamukhena saṅkhatadhammabodhavacanaṃ.
282. காமங் க²ந்தா⁴தி³வஸேன விப⁴ஜனங் ஸாதா⁴ரணங், பட²மது³தியசதுத்த²ஸுத்தேஸு பன க²ந்த⁴வஸேன விப⁴ஜனங் கத்வா இத⁴ ததா² அகத்வா ஏவங் தே³ஸனாய ட²பனங் ததோ அஞ்ஞதா² ஆயதனவஸேன விப⁴ஜனத்த²ங். ஏவங் விபி⁴ன்னா ஹி ஸங்கே²பவித்தா²ரதோ அனவஸேஸா ஸம்மஸனுபகா³ த⁴ம்மா விப⁴ஜித்வா த³ஸ்ஸிதா ஹொந்தி; அயங் கிரெத்த² ப⁴க³வதோ அஜ்ஜா²ஸயோ தே²ரேன நயதோ க³ஹிதோதி த³ஸ்ஸேதுங், ‘‘இமஸ்மிங் கிரா’’திஆதி³ வுத்தங். தத்த² த்³வாத³ஸாயதனவஸேனேவ மாதிகங் ட²பேஸீதி லோகியானி த்³வாத³ஸாயதனானி ஏவ ஸந்தா⁴ய மாதிகங் ட²பேஸி, யதா² தீஸு ஸுத்தேஸு க²ந்த⁴வஸேன விப⁴த்தங், ஏவங் யதி³ ப⁴க³வதா இதா⁴பி விப⁴ஜனங் இச்சி²தங் ஸியா, ததா² விப⁴ஜெய்ய, யஸ்மா பன ததா² அவிப⁴ஜித்வாவ க³ந்த⁴குடிங் பவிட்டோ², தஸ்மா த்³வாத³ஸாயதனவஸேனேவெத்த² விப⁴ஜனங் ப⁴க³வதா ச அதி⁴ப்பேதந்தி நயக்³கா³ஹே ட²த்வா தே²ரோ விப⁴ஜி. தேனாஹ – ‘‘நயங் படிலபி⁴த்வா ஏவமாஹா’’தி. பா⁴ரியங் கதந்தி து³க்கரங் கதங். அபதே³ பத³ங் த³ஸ்ஸிதங் ஆகாஸே பத³ங் கதங் ஸாதா⁴ரணஸ்ஸ அத்த²ஸ்ஸ விஸிட்ட²விஸயதாய த³ஸ்ஸிதத்தா. நிகந்திவிஞ்ஞாணந்தி நிகந்திதண்ஹாய ஸம்பயுத்தங் விஞ்ஞாணங், ‘‘ச²ந்த³ராக³ப்படிப³த்³த⁴ங் ஹோதீ’’தி வசனதோ. மனோதி ப⁴வங்க³சித்தங் மனொத்³வாரிகஜவனானங் த்³வாரபூ⁴தங்.
282. Kāmaṃ khandhādivasena vibhajanaṃ sādhāraṇaṃ, paṭhamadutiyacatutthasuttesu pana khandhavasena vibhajanaṃ katvā idha tathā akatvā evaṃ desanāya ṭhapanaṃ tato aññathā āyatanavasena vibhajanatthaṃ. Evaṃ vibhinnā hi saṅkhepavitthārato anavasesā sammasanupagā dhammā vibhajitvā dassitā honti; ayaṃ kirettha bhagavato ajjhāsayo therena nayato gahitoti dassetuṃ, ‘‘imasmiṃ kirā’’tiādi vuttaṃ. Tattha dvādasāyatanavaseneva mātikaṃ ṭhapesīti lokiyāni dvādasāyatanāni eva sandhāya mātikaṃ ṭhapesi, yathā tīsu suttesu khandhavasena vibhattaṃ, evaṃ yadi bhagavatā idhāpi vibhajanaṃ icchitaṃ siyā, tathā vibhajeyya, yasmā pana tathā avibhajitvāva gandhakuṭiṃ paviṭṭho, tasmā dvādasāyatanavasenevettha vibhajanaṃ bhagavatā ca adhippetanti nayaggāhe ṭhatvā thero vibhaji. Tenāha – ‘‘nayaṃ paṭilabhitvā evamāhā’’ti. Bhāriyaṃ katanti dukkaraṃ kataṃ. Apade padaṃ dassitaṃ ākāse padaṃ kataṃ sādhāraṇassa atthassa visiṭṭhavisayatāya dassitattā. Nikantiviññāṇanti nikantitaṇhāya sampayuttaṃ viññāṇaṃ, ‘‘chandarāgappaṭibaddhaṃ hotī’’ti vacanato. Manoti bhavaṅgacittaṃ manodvārikajavanānaṃ dvārabhūtaṃ.
283. பத்த²னாவஸேன ட²பேஸீதி பத்த²னாவஸேன சித்தங் பவத்தேஸி.
283.Patthanāvasena ṭhapesīti patthanāvasena cittaṃ pavattesi.
மஹாகச்சானப⁴த்³தே³கரத்தஸுத்தவண்ணனாய லீனத்த²ப்பகாஸனா
Mahākaccānabhaddekarattasuttavaṇṇanāya līnatthappakāsanā
ஸமத்தா.
Samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 3. மஹாகச்சானப⁴த்³தே³கரத்தஸுத்தங் • 3. Mahākaccānabhaddekarattasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 3. மஹாகச்சானப⁴த்³தே³கரத்தஸுத்தவண்ணனா • 3. Mahākaccānabhaddekarattasuttavaṇṇanā
