| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
৩. মহাকচ্চানভদ্দেকরত্তসুত্তৰণ্ণনা
3. Mahākaccānabhaddekarattasuttavaṇṇanā
২৭৯. উণ্হভাৰেন তপনতো তপং উদকং এতস্সাতি তপোদা, রহদো। তেনাহ ‘‘তত্তোদকস্স রহদস্সা’’তি। সঙ্খেপেন ৰুত্তমত্থং ৰিত্থারতো দস্সেতুং, ‘‘ৰেভারপব্বতস্সা’’তিআদি ৰুত্তং। ততো উদকরহদতো, তং রহদং উপনিস্সাযাতি অত্থো। নাগভৰনাগতোপি হি সো রহদো ততো উপরি মনুস্সলোকে জলাসযেন সম্বদ্ধো হোতি। তেন ৰুত্তং – ‘‘তপোদা নাম নদী সন্দতী’’তি। এদিসাতি কুথিতা উণ্হা, অন্ৰত্থনামৰসেন তপোদাতি চ ৰুচ্চতীতি অত্থো। পেতলোকোতি পেতানং ৰসনট্ঠানং পচ্চেকনিরযং সন্ধাযাহ। ইমস্স পন আরামস্সাতি তপোদারামস্স। ততোতি তপোদাসঙ্খাতনদিতো। মহাউদকরহদোতি মহাউদকভরিতং পল্ললং।
279. Uṇhabhāvena tapanato tapaṃ udakaṃ etassāti tapodā, rahado. Tenāha ‘‘tattodakassa rahadassā’’ti. Saṅkhepena vuttamatthaṃ vitthārato dassetuṃ, ‘‘vebhārapabbatassā’’tiādi vuttaṃ. Tato udakarahadato, taṃ rahadaṃ upanissāyāti attho. Nāgabhavanāgatopi hi so rahado tato upari manussaloke jalāsayena sambaddho hoti. Tena vuttaṃ – ‘‘tapodā nāma nadī sandatī’’ti. Edisāti kuthitā uṇhā, anvatthanāmavasena tapodāti ca vuccatīti attho. Petalokoti petānaṃ vasanaṭṭhānaṃ paccekanirayaṃ sandhāyāha. Imassa pana ārāmassāti tapodārāmassa. Tatoti tapodāsaṅkhātanadito. Mahāudakarahadoti mahāudakabharitaṃ pallalaṃ.
২৮০. সমিদ্ধোতি উল়ারো, পরিপুণ্ণোযেৰাতি অত্থো। আদিম্হি ব্রহ্মচরিযমস্সাতি আদিব্রহ্মচরিযো, সো এৰ আদিব্রহ্মচরিযকো। তেনাহ ‘‘পুব্বভাগপ্পটিপত্তিভূতো’’তি। ‘‘অতীতং অনাগতং পচ্চুপ্পন্ন’’ন্তি অদ্ধভেদমুখেন সঙ্খতধম্মবোধৰচনং।
280.Samiddhoti uḷāro, paripuṇṇoyevāti attho. Ādimhi brahmacariyamassāti ādibrahmacariyo, so eva ādibrahmacariyako. Tenāha ‘‘pubbabhāgappaṭipattibhūto’’ti. ‘‘Atītaṃ anāgataṃ paccuppanna’’nti addhabhedamukhena saṅkhatadhammabodhavacanaṃ.
২৮২. কামং খন্ধাদিৰসেন ৰিভজনং সাধারণং, পঠমদুতিযচতুত্থসুত্তেসু পন খন্ধৰসেন ৰিভজনং কত্ৰা ইধ তথা অকত্ৰা এৰং দেসনায ঠপনং ততো অঞ্ঞথা আযতনৰসেন ৰিভজনত্থং। এৰং ৰিভিন্না হি সঙ্খেপৰিত্থারতো অনৰসেসা সম্মসনুপগা ধম্মা ৰিভজিত্ৰা দস্সিতা হোন্তি; অযং কিরেত্থ ভগৰতো অজ্ঝাসযো থেরেন নযতো গহিতোতি দস্সেতুং, ‘‘ইমস্মিং কিরা’’তিআদি ৰুত্তং। তত্থ দ্ৰাদসাযতনৰসেনেৰ মাতিকং ঠপেসীতি লোকিযানি দ্ৰাদসাযতনানি এৰ সন্ধায মাতিকং ঠপেসি, যথা তীসু সুত্তেসু খন্ধৰসেন ৰিভত্তং, এৰং যদি ভগৰতা ইধাপি ৰিভজনং ইচ্ছিতং সিযা, তথা ৰিভজেয্য, যস্মা পন তথা অৰিভজিত্ৰাৰ গন্ধকুটিং পৰিট্ঠো, তস্মা দ্ৰাদসাযতনৰসেনেৰেত্থ ৰিভজনং ভগৰতা চ অধিপ্পেতন্তি নযগ্গাহে ঠত্ৰা থেরো ৰিভজি। তেনাহ – ‘‘নযং পটিলভিত্ৰা এৰমাহা’’তি। ভারিযং কতন্তি দুক্করং কতং। অপদে পদং দস্সিতং আকাসে পদং কতং সাধারণস্স অত্থস্স ৰিসিট্ঠৰিসযতায দস্সিতত্তা। নিকন্তিৰিঞ্ঞাণন্তি নিকন্তিতণ্হায সম্পযুত্তং ৰিঞ্ঞাণং, ‘‘ছন্দরাগপ্পটিবদ্ধং হোতী’’তি ৰচনতো। মনোতি ভৰঙ্গচিত্তং মনোদ্ৰারিকজৰনানং দ্ৰারভূতং।
282. Kāmaṃ khandhādivasena vibhajanaṃ sādhāraṇaṃ, paṭhamadutiyacatutthasuttesu pana khandhavasena vibhajanaṃ katvā idha tathā akatvā evaṃ desanāya ṭhapanaṃ tato aññathā āyatanavasena vibhajanatthaṃ. Evaṃ vibhinnā hi saṅkhepavitthārato anavasesā sammasanupagā dhammā vibhajitvā dassitā honti; ayaṃ kirettha bhagavato ajjhāsayo therena nayato gahitoti dassetuṃ, ‘‘imasmiṃ kirā’’tiādi vuttaṃ. Tattha dvādasāyatanavaseneva mātikaṃ ṭhapesīti lokiyāni dvādasāyatanāni eva sandhāya mātikaṃ ṭhapesi, yathā tīsu suttesu khandhavasena vibhattaṃ, evaṃ yadi bhagavatā idhāpi vibhajanaṃ icchitaṃ siyā, tathā vibhajeyya, yasmā pana tathā avibhajitvāva gandhakuṭiṃ paviṭṭho, tasmā dvādasāyatanavasenevettha vibhajanaṃ bhagavatā ca adhippetanti nayaggāhe ṭhatvā thero vibhaji. Tenāha – ‘‘nayaṃ paṭilabhitvā evamāhā’’ti. Bhāriyaṃ katanti dukkaraṃ kataṃ. Apade padaṃ dassitaṃ ākāse padaṃ kataṃ sādhāraṇassa atthassa visiṭṭhavisayatāya dassitattā. Nikantiviññāṇanti nikantitaṇhāya sampayuttaṃ viññāṇaṃ, ‘‘chandarāgappaṭibaddhaṃ hotī’’ti vacanato. Manoti bhavaṅgacittaṃ manodvārikajavanānaṃ dvārabhūtaṃ.
২৮৩. পত্থনাৰসেন ঠপেসীতি পত্থনাৰসেন চিত্তং পৰত্তেসি।
283.Patthanāvasena ṭhapesīti patthanāvasena cittaṃ pavattesi.
মহাকচ্চানভদ্দেকরত্তসুত্তৰণ্ণনায লীনত্থপ্পকাসনা
Mahākaccānabhaddekarattasuttavaṇṇanāya līnatthappakāsanā
সমত্তা।
Samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৩. মহাকচ্চানভদ্দেকরত্তসুত্তং • 3. Mahākaccānabhaddekarattasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৩. মহাকচ্চানভদ্দেকরত্তসুত্তৰণ্ণনা • 3. Mahākaccānabhaddekarattasuttavaṇṇanā
