| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) |
༣. མཧཱཀཙྩཱནབྷདྡེཀརཏྟསུཏྟཝཎྞནཱ
3. Mahākaccānabhaddekarattasuttavaṇṇanā
༢༧༩. ཨེཝཾ མེ སུཏནྟི མཧཱཀཙྩཱནབྷདྡེཀརཏྟསུཏྟཾ། ཏཏྠ ཏཔོདཱརཱམེཏི ཏཏྟོདཀསྶ རཧདསྶ ཝསེན ཨེཝཾལདྡྷནཱམེ ཨཱརཱམེ། ཝེབྷཱརཔབྦཏསྶ ཀིར ཧེཊྛཱ བྷཱུམཊྛཀནཱགཱནཾ པཉྩཡོཛནསཏིཀཾ ནཱགབྷཝནཾ དེཝལོཀསདིསཾ མཎིམཡེན ཏལེན ཨཱརཱམཨུཡྻཱནེཧི ཙ སམནྣཱགཏཾ, ཏཏྠ ནཱགཱནཾ ཀཱིལ༹ནཊྛཱནེ མཧཱཨུདཀརཧདོ, ཏཏོ ཏཔོདཱ ནཱམ ནདཱི སནྡཏི ཀུཐིཏཱ ཨུཎྷོདཀཱ། ཀསྨཱ པནེསཱ ཨེདིསཱ ཛཱཏཱ? རཱཛགཧཾ ཀིར པརིཝཱརེཏྭཱ མཧཱ པེཏལོཀོ, ཏཏྠ དྭིནྣཾ མཧཱལོཧཀུམྦྷིནིརཡཱནཾ ཨནྟརེན ཨཡཾ ཏཔོདཱ ཨཱགཙྪཏི, ཏསྨཱ སཱ ཀུཐིཏཱ སནྡཏི། ཝུཏྟམྤི ཙེཏཾ – ‘‘ཡཏཱཡཾ, བྷིཀྑཝེ, ཏཔོདཱ སནྡཏི, སོ དཧོ ཨཙྪོདཀོ སཱིཏོདཀོ སཱཏོདཀོ སེཏོདཀོ སུཔྤཏིཏྠོ རམཎཱིཡོ པཧཱུཏམཙྪཀཙྪཔོ, ཙཀྐམཏྟཱནི ཙ པདུམཱནི པུཔྥནྟི ། ཨཔིཙཱཡཾ, བྷིཀྑཝེ, ཏཔོདཱ དྭིནྣཾ མཧཱནིརཡཱནཾ ཨནྟརིཀཱཡ ཨཱགཙྪཏི, ཏེནཱཡཾ ཏཔོདཱ ཀུཐིཏཱ སནྡཏཱི’’ཏི (པཱརཱ॰ ༢༣༡)། ཨིམསྶ པན ཨཱརཱམསྶ ཨབྷིསམྨུཁཊྛཱནེ ཏཏོ མཧཱཨུདཀརཧདོ ཛཱཏོ, ཏསྶ ནཱམཝསེནཱཡཾ ཝིཧཱརོ ཏཔོདཱརཱམོཏི ཝུཙྩཏི།
279.Evaṃme sutanti mahākaccānabhaddekarattasuttaṃ. Tattha tapodārāmeti tattodakassa rahadassa vasena evaṃladdhanāme ārāme. Vebhārapabbatassa kira heṭṭhā bhūmaṭṭhakanāgānaṃ pañcayojanasatikaṃ nāgabhavanaṃ devalokasadisaṃ maṇimayena talena ārāmauyyānehi ca samannāgataṃ, tattha nāgānaṃ kīḷanaṭṭhāne mahāudakarahado, tato tapodā nāma nadī sandati kuthitā uṇhodakā. Kasmā panesā edisā jātā? Rājagahaṃ kira parivāretvā mahā petaloko, tattha dvinnaṃ mahālohakumbhinirayānaṃ antarena ayaṃ tapodā āgacchati, tasmā sā kuthitā sandati. Vuttampi cetaṃ – ‘‘yatāyaṃ, bhikkhave, tapodā sandati, so daho acchodako sītodako sātodako setodako suppatittho ramaṇīyo pahūtamacchakacchapo, cakkamattāni ca padumāni pupphanti . Apicāyaṃ, bhikkhave, tapodā dvinnaṃ mahānirayānaṃ antarikāya āgacchati, tenāyaṃ tapodā kuthitā sandatī’’ti (pārā. 231). Imassa pana ārāmassa abhisammukhaṭṭhāne tato mahāudakarahado jāto, tassa nāmavasenāyaṃ vihāro tapodārāmoti vuccati.
༢༨༠. སམིདྡྷཱིཏི ཏསྶ ཀིར ཐེརསྶ ཨཏྟབྷཱཝོ སམིདྡྷོ ཨབྷིརཱུཔོ པཱསཱདིཀོ, ཏསྨཱ སམིདྡྷིཏྭེཝ སངྑཾ གཏོ། ཨཱདིབྲཧྨཙརིཡཀོཏི མགྒབྲཧྨཙརིཡསྶ ཨཱདི པུབྦབྷཱགཔྤཊིཔཏྟིབྷཱུཏོ། ཨིདཾ ཝཏྭཱན སུགཏོ ཨུཊྛཱཡཱསནཱཏི མདྷུཔིཎྜིཀསུཏྟེ (མ॰ ནི॰ ༡.༡༩༩ ཨཱདཡོ) ཝུཏྟནཡེནེཝ ཝིཏྠཱརེཏབྦཾ།
280.Samiddhīti tassa kira therassa attabhāvo samiddho abhirūpo pāsādiko, tasmā samiddhitveva saṅkhaṃ gato. Ādibrahmacariyakoti maggabrahmacariyassa ādi pubbabhāgappaṭipattibhūto. Idaṃ vatvāna sugato uṭṭhāyāsanāti madhupiṇḍikasutte (ma. ni. 1.199 ādayo) vuttanayeneva vitthāretabbaṃ.
༢༨༢. ཨིཏི མེ ཙཀྑུནྟི ཨིམསྨིཾ ཀིར སུཏྟེ བྷགཝཱ དྭཱདསཱཡཏནཝསེནེཝ མཱཏིཀཾ ཋཔེསི། ཐེརོཔི ‘‘བྷགཝཏཱ ཧེཊྛཱ དྭཱིསུ, ཨུཔརི ཙཏུཏྠེ ཙཱཏི ཨིམེསུ ཏཱིསུ སུཏྟེསུ པཉྩཀྑནྡྷཝསེན མཱཏིཀཱ ཙ ཝིབྷངྒོ ཙ ཀཏོ, ཨིདྷ པན དྭཱདསཱཡཏནཝསེནེཝ ཝིབྷཛནཏྠཾ མཱཏིཀཱ ཋཔིཏཱ’’ཏི ནཡཾ པཊིལབྷིཏྭཱ ཨེཝམཱཧ། ཨིམཾ པན ནཡཾ ལབྷནྟེན ཐེརེན བྷཱརིཡཾ ཀཏཾ, ཨཔདེ པདཾ དསྶིཏཾ, ཨཱཀཱསེ པདཾ ཀཏཾ, ཏེན ནཾ བྷགཝཱ ཨིམམེཝ སུཏྟཾ སནྡྷཱཡ – ‘‘ཨེཏདགྒཾ , བྷིཀྑཝེ, མམ སཱཝཀཱནཾ བྷིཀྑཱུནཾ སཾཁིཏྟེན བྷཱསིཏསྶ ཝིཏྠཱརེན ཨཏྠཾ ཝིབྷཛནྟཱནཾ ཡདིདཾ མཧཱཀཙྩཱནོ’’ཏི (ཨ॰ ནི॰ ༡.༡༩༧) ཨེཏདགྒེ ཋཔེསི། ཨེཏྠ པན ཙཀྑཱུཏི ཙཀྑུཔསཱདོ། རཱུཔཱཏི ཙཏུསམུཊྛཱནིཀརཱུཔཱ། ཨིམིནཱ ནཡེན སེསཱཡཏནཱནིཔི ཝེདིཏབྦཱནི། ཝིཉྙཱཎནྟི ནིཀནྟིཝིཉྙཱཎཾ། ཏདབྷིནནྡཏཱིཏི ཏཾ ཙཀྑུཉྩེཝ རཱུཔཉྩ ཏཎྷཱདིཊྛིཝསེན ཨབྷིནནྡཏི། ཨནྭཱགམེཏཱིཏི ཏཎྷཱདིཊྛཱིཧི ཨནུགཙྪཏི།
282.Iti me cakkhunti imasmiṃ kira sutte bhagavā dvādasāyatanavaseneva mātikaṃ ṭhapesi. Theropi ‘‘bhagavatā heṭṭhā dvīsu, upari catutthe cāti imesu tīsu suttesu pañcakkhandhavasena mātikā ca vibhaṅgo ca kato, idha pana dvādasāyatanavaseneva vibhajanatthaṃ mātikā ṭhapitā’’ti nayaṃ paṭilabhitvā evamāha. Imaṃ pana nayaṃ labhantena therena bhāriyaṃ kataṃ, apade padaṃ dassitaṃ, ākāse padaṃ kataṃ, tena naṃ bhagavā imameva suttaṃ sandhāya – ‘‘etadaggaṃ , bhikkhave, mama sāvakānaṃ bhikkhūnaṃ saṃkhittena bhāsitassa vitthārena atthaṃ vibhajantānaṃ yadidaṃ mahākaccāno’’ti (a. ni. 1.197) etadagge ṭhapesi. Ettha pana cakkhūti cakkhupasādo. Rūpāti catusamuṭṭhānikarūpā. Iminā nayena sesāyatanānipi veditabbāni. Viññāṇanti nikantiviññāṇaṃ. Tadabhinandatīti taṃ cakkhuñceva rūpañca taṇhādiṭṭhivasena abhinandati. Anvāgametīti taṇhādiṭṭhīhi anugacchati.
ཨིཏི མེ མནོ ཨཧོསི ཨཏཱིཏམདྡྷཱནཾ ཨིཏི དྷམྨཱཏི ཨེཏྠ པན མནོཏི བྷཝངྒཙིཏྟཾ། དྷམྨཱཏི ཏེབྷཱུམཀདྷམྨཱརམྨཎཾ།
Iti me mano ahosi atītamaddhānaṃ iti dhammāti ettha pana manoti bhavaṅgacittaṃ. Dhammāti tebhūmakadhammārammaṇaṃ.
༢༨༣. པཎིདཧཏཱིཏི པཏྠནཱཝསེན ཋཔེསི། པཎིདྷཱནཔཙྩཡཱཏི པཏྠནཱཊྛཔནཀཱརཎཱ། སེསཾ སབྦཏྠ ཨུཏྟཱནམེཝཱཏི།
283.Paṇidahatīti patthanāvasena ṭhapesi. Paṇidhānapaccayāti patthanāṭṭhapanakāraṇā. Sesaṃ sabbattha uttānamevāti.
པཔཉྩསཱུདནིཡཱ མཛ྄ཛྷིམནིཀཱཡཊྛཀཐཱཡ
Papañcasūdaniyā majjhimanikāyaṭṭhakathāya
མཧཱཀཙྩཱནབྷདྡེཀརཏྟསུཏྟཝཎྞནཱ ནིཊྛིཏཱ།
Mahākaccānabhaddekarattasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༣. མཧཱཀཙྩཱནབྷདྡེཀརཏྟསུཏྟཾ • 3. Mahākaccānabhaddekarattasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༣. མཧཱཀཙྩཱནབྷདྡེཀརཏྟསུཏྟཝཎྞནཱ • 3. Mahākaccānabhaddekarattasuttavaṇṇanā
