| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၁၅၈. မဟာကစ္စာနသ္သ ပဉ္စဝရပရိဒသ္သနာ
158. Mahākaccānassa pañcavaraparidassanā
အထ ခော အာယသ္မတော သောဏသ္သ ဝသ္သံဝုဋ္ဌသ္သ ရဟောဂတသ္သ ပဋိသလ္လီနသ္သ ဧဝံ စေတသော ပရိဝိတက္ကော ဥဒပာဒိ – ‘‘သုတောယေဝ ခော မေ သော ဘဂဝာ ဧဒိသော စ ဧဒိသော စာတိ, န စ မယာ သမ္မုခာ ဒိဋ္ဌော, ဂစ္ဆေယ္ယာဟံ တံ ဘဂဝန္တံ ဒသ္သနာယ အရဟန္တံ သမ္မာသမ္ဗုဒ္ဓံ, သစေ မံ ဥပဇ္ဈာယော အနုဇာနေယ္ယာ’’တိ။ အထ ခော အာယသ္မာ သောဏော သာယန္ဟသမယံ ပဋိသလ္လာနာ ဝုဋ္ဌိတော ယေနာယသ္မာ မဟာကစ္စာနော တေနုပသင္ကမိ, ဥပသင္ကမိတ္ဝာ အာယသ္မန္တံ မဟာကစ္စာနံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နော ခော အာယသ္မာ သောဏော အာယသ္မန္တံ မဟာကစ္စာနံ ဧတဒဝောစ – ‘‘ဣဓ မယ္ဟံ, ဘန္တေ, ရဟောဂတသ္သ ပဋိသလ္လီနသ္သ ဧဝံ စေတသော ပရိဝိတက္ကော ဥဒပာဒိ – ‘သုတော ယေဝ ခော မေ သော ဘဂဝာ ဧဒိသော စ ဧဒိသော စာတိ, န စ မယာ သမ္မုခာ ဒိဋ္ဌော, ဂစ္ဆေယ္ယာဟံ တံ ဘဂဝန္တံ ဒသ္သနာယ အရဟန္တံ သမ္မာသမ္ဗုဒ္ဓံ, သစေ မံ ဥပဇ္ဈာယော အနုဇာနေယ္ယာ’တိ; ဂစ္ဆေယ္ယာဟံ, ဘန္တေ, တံ ဘဂဝန္တံ ဒသ္သနာယ အရဟန္တံ သမ္မာသမ္ဗုဒ္ဓံ, သစေ မံ ဥပဇ္ဈာယော အနုဇာနာတီ’’တိ။ ‘‘သာဓု သာဓု, သောဏ။ ဂစ္ဆ တ္ဝံ, သောဏ, တံ ဘဂဝန္တံ ဒသ္သနာယ အရဟန္တံ သမ္မာသမ္ဗုဒ္ဓံ။ ဒက္ခိသ္သသိ တ္ဝံ, သောဏ, တံ ဘဂဝန္တံ ပာသာဒိကံ ပသာဒနီယံ သန္တိန္ဒ္ရိယံ သန္တမာနသံ ဥတ္တမဒမထသမထံ အမနုပ္ပတ္တံ ဒန္တံ ဂုတ္တံ ယတိန္ဒ္ရိယံ နာဂံ။ တေန ဟိ တ္ဝံ, သောဏ, မမ ဝစနေန ဘဂဝတော ပာဒေ သိရသာ ဝန္ဒ – ‘ဥပဇ္ဈာယော မေ, ဘန္တေ, အာယသ္မာ မဟာကစ္စာနော ဘဂဝတော ပာဒေ သိရသာ ဝန္ဒတီ’’’တိ။ ဧဝဉ္စ ဝဒေဟိ – ‘‘အဝန္တိဒက္ခိဏာပထော, ဘန္တေ, အပ္ပဘိက္ခုကော, တိဏ္ဏံ မေ ဝသ္သာနံ အစ္စယေန ကိစ္ဆေန ကသိရေန တတော တတော ဒသဝဂ္ဂံ ဘိက္ခုသင္ဃံ သန္နိပာတာပေတ္ဝာ ဥပသမ္ပဒံ အလတ္ထံ; အပ္ပေဝ နာမ ဘဂဝာ အဝန္တိဒက္ခိဏာပထေ အပ္ပတရေန ဂဏေန ဥပသမ္ပဒံ အနုဇာနေယ္ယ။ အဝန္တိဒက္ခိဏာပထေ, ဘန္တေ, ကဏ္ဟုတ္တရာ ဘူမိ ခရာ ဂောကဏ္ဋကဟတာ; အပ္ပေဝ နာမ ဘဂဝာ အဝန္တိဒက္ခိဏာပထေ ဂုဏင္ဂုဏူပာဟနံ အနုဇာနေယ္ယ။ အဝန္တိဒက္ခိဏာပထေ, ဘန္တေ, နဟာနဂရုကာ မနုသ္သာ ဥဒကသုဒ္ဓိကာ; အပ္ပေဝ နာမ ဘဂဝာ အဝန္တိဒက္ခိဏာပထေ ဓုဝနဟာနံ အနုဇာနေယ္ယ။ အဝန္တိဒက္ခိဏာပထေ, ဘန္တေ, စမ္မာနိ အတ္ထရဏာနိ, ဧဠကစမ္မံ အဇစမ္မံ မိဂစမ္မံ။ သေယ္ယထာပိ, ဘန္တေ, မဇ္ဈိမေသု ဇနပဒေသု ဧရဂူ မောရဂူ မဇ္ဇာရူ 1 ဇန္တူ, ဧဝမေဝ ခော, ဘန္တေ, အဝန္တိဒက္ခိဏာပထေ စမ္မာနိ အတ္ထရဏာနိ, ဧဠကစမ္မံ အဇစမ္မံ မိဂစမ္မံ; အပ္ပေဝ နာမ ဘဂဝာ အဝန္တိဒက္ခိဏာပထေ စမ္မာနိ အတ္ထရဏာနိ အနုဇာနေယ္ယ, ဧဠကစမ္မံ အဇစမ္မံ မိဂစမ္မံ။ ဧတရဟိ, ဘန္တေ, မနုသ္သာ နိသ္သီမဂတာနံ ဘိက္ခူနံ စီဝရံ ဒေန္တိ – ‘ဣမံ စီဝရံ ဣတ္ထန္နာမသ္သ ဒေမာ’’’တိ။ တေ အာဂန္တ္ဝာ အာရောစေန္တိ – ‘ဣတ္ထန္နာမေဟိ တေ, အာဝုသော, မနုသ္သေဟိ စီဝရံ ဒိန္န’န္တိ တေ ကုက္ကုစ္စာယန္တာ န သာဒိယန္တိ – ‘မာ နော နိသ္သဂ္ဂိယံ အဟောသီ’တိ; အပ္ပေဝ နာမ ဘဂဝာ စီဝရေ ပရိယာယံ အာစိက္ခေယ္ယာ’’တိ။ ‘‘ဧဝံ, ဘန္တေ’’တိ ခော အာယသ္မာ သောဏော အာယသ္မတော မဟာကစ္စာနသ္သ ပဋိသ္သုတ္ဝာ ဥဋ္ဌာယာသနာ အာယသ္မန္တံ မဟာကစ္စာနံ အဘိဝာဒေတ္ဝာ ပဒက္ခိဏံ ကတ္ဝာ သေနာသနံ သံသာမေတ္ဝာ ပတ္တစီဝရမာဒာယ ယေန သာဝတ္ထိ တေန ပက္ကာမိ။ အနုပုဗ္ဗေန ယေန သာဝတ္ထိ ဇေတဝနံ အနာထပိဏ္ဍိကသ္သ အာရာမော ယေန ဘဂဝာ တေနုပသင္ကမိ, ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ အထ ခော ဘဂဝာ အာယသ္မန္တံ အာနန္ဒံ အာမန္တေသိ – ‘‘ဣမသ္သ, အာနန္ဒ, အာဂန္တုကသ္သ ဘိက္ခုနော သေနာသနံ ပညာပေဟီ’’တိ။ အထ ခော အာယသ္မာ အာနန္ဒော – ‘‘ယသ္သ ခော မံ ဘဂဝာ အာဏာပေတိ, ‘ဣမသ္သ, အာနန္ဒ, အာဂန္တုကသ္သ ဘိက္ခုနော သေနာသနံ ပညာပေဟီ’တိ, ဣစ္ဆတိ ဘဂဝာ တေန ဘိက္ခုနာ သဒ္ဓိံ ဧကဝိဟာရေ ဝတ္ထုံ, ဣစ္ဆတိ ဘဂဝာ အာယသ္မတာ သောဏေန သဒ္ဓိံ ဧကဝိဟာရေ ဝတ္ထု’’န္တိ – ယသ္မိံ ဝိဟာရေ ဘဂဝာ ဝိဟရတိ တသ္မိံ ဝိဟာရေ အာယသ္မတော သောဏသ္သ သေနာသနံ ပညာပေသိ။
Atha kho āyasmato soṇassa vassaṃvuṭṭhassa rahogatassa paṭisallīnassa evaṃ cetaso parivitakko udapādi – ‘‘sutoyeva kho me so bhagavā ediso ca ediso cāti, na ca mayā sammukhā diṭṭho, gaccheyyāhaṃ taṃ bhagavantaṃ dassanāya arahantaṃ sammāsambuddhaṃ, sace maṃ upajjhāyo anujāneyyā’’ti. Atha kho āyasmā soṇo sāyanhasamayaṃ paṭisallānā vuṭṭhito yenāyasmā mahākaccāno tenupasaṅkami, upasaṅkamitvā āyasmantaṃ mahākaccānaṃ abhivādetvā ekamantaṃ nisīdi. Ekamantaṃ nisinno kho āyasmā soṇo āyasmantaṃ mahākaccānaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi – ‘suto yeva kho me so bhagavā ediso ca ediso cāti, na ca mayā sammukhā diṭṭho, gaccheyyāhaṃ taṃ bhagavantaṃ dassanāya arahantaṃ sammāsambuddhaṃ, sace maṃ upajjhāyo anujāneyyā’ti; gaccheyyāhaṃ, bhante, taṃ bhagavantaṃ dassanāya arahantaṃ sammāsambuddhaṃ, sace maṃ upajjhāyo anujānātī’’ti. ‘‘Sādhu sādhu, soṇa. Gaccha tvaṃ, soṇa, taṃ bhagavantaṃ dassanāya arahantaṃ sammāsambuddhaṃ. Dakkhissasi tvaṃ, soṇa, taṃ bhagavantaṃ pāsādikaṃ pasādanīyaṃ santindriyaṃ santamānasaṃ uttamadamathasamathaṃ amanuppattaṃ dantaṃ guttaṃ yatindriyaṃ nāgaṃ. Tena hi tvaṃ, soṇa, mama vacanena bhagavato pāde sirasā vanda – ‘upajjhāyo me, bhante, āyasmā mahākaccāno bhagavato pāde sirasā vandatī’’’ti. Evañca vadehi – ‘‘avantidakkhiṇāpatho, bhante, appabhikkhuko, tiṇṇaṃ me vassānaṃ accayena kicchena kasirena tato tato dasavaggaṃ bhikkhusaṅghaṃ sannipātāpetvā upasampadaṃ alatthaṃ; appeva nāma bhagavā avantidakkhiṇāpathe appatarena gaṇena upasampadaṃ anujāneyya. Avantidakkhiṇāpathe, bhante, kaṇhuttarā bhūmi kharā gokaṇṭakahatā; appeva nāma bhagavā avantidakkhiṇāpathe guṇaṅguṇūpāhanaṃ anujāneyya. Avantidakkhiṇāpathe, bhante, nahānagarukā manussā udakasuddhikā; appeva nāma bhagavā avantidakkhiṇāpathe dhuvanahānaṃ anujāneyya. Avantidakkhiṇāpathe, bhante, cammāni attharaṇāni, eḷakacammaṃ ajacammaṃ migacammaṃ. Seyyathāpi, bhante, majjhimesu janapadesu eragū moragū majjārū 2 jantū, evameva kho, bhante, avantidakkhiṇāpathe cammāni attharaṇāni, eḷakacammaṃ ajacammaṃ migacammaṃ; appeva nāma bhagavā avantidakkhiṇāpathe cammāni attharaṇāni anujāneyya, eḷakacammaṃ ajacammaṃ migacammaṃ. Etarahi, bhante, manussā nissīmagatānaṃ bhikkhūnaṃ cīvaraṃ denti – ‘imaṃ cīvaraṃ itthannāmassa demā’’’ti. Te āgantvā ārocenti – ‘itthannāmehi te, āvuso, manussehi cīvaraṃ dinna’nti te kukkuccāyantā na sādiyanti – ‘mā no nissaggiyaṃ ahosī’ti; appeva nāma bhagavā cīvare pariyāyaṃ ācikkheyyā’’ti. ‘‘Evaṃ, bhante’’ti kho āyasmā soṇo āyasmato mahākaccānassa paṭissutvā uṭṭhāyāsanā āyasmantaṃ mahākaccānaṃ abhivādetvā padakkhiṇaṃ katvā senāsanaṃ saṃsāmetvā pattacīvaramādāya yena sāvatthi tena pakkāmi. Anupubbena yena sāvatthi jetavanaṃ anāthapiṇḍikassa ārāmo yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Atha kho bhagavā āyasmantaṃ ānandaṃ āmantesi – ‘‘imassa, ānanda, āgantukassa bhikkhuno senāsanaṃ paññāpehī’’ti. Atha kho āyasmā ānando – ‘‘yassa kho maṃ bhagavā āṇāpeti, ‘imassa, ānanda, āgantukassa bhikkhuno senāsanaṃ paññāpehī’ti, icchati bhagavā tena bhikkhunā saddhiṃ ekavihāre vatthuṃ, icchati bhagavā āyasmatā soṇena saddhiṃ ekavihāre vatthu’’nti – yasmiṃ vihāre bhagavā viharati tasmiṃ vihāre āyasmato soṇassa senāsanaṃ paññāpesi.
၂၅၈. အထ ခော ဘဂဝာ ဗဟုဒေဝ ရတ္တိံ အဇ္ဈောကာသေ ဝီတိနာမေတ္ဝာ ဝိဟာရံ ပာဝိသိ။ အာယသ္မာပိ ခော သောဏော ဗဟုဒေဝ ရတ္တိံ အဇ္ဈောကာသေ ဝီတိနာမေတ္ဝာ ဝိဟာရံ ပာဝိသိ။ အထ ခော ဘဂဝာ ရတ္တိယာ ပစ္စူသသမယံ ပစ္စုဋ္ဌာယ အာယသ္မန္တံ သောဏံ အဇ္ဈေသိ – ‘‘ပဋိဘာတု တံ, ဘိက္ခု, ဓမ္မော ဘာသိတု’’န္တိ။ ‘‘ဧဝံ, ဘန္တေ’’တိ ခော အာယသ္မာ သောဏော ဘဂဝတော ပဋိသ္သုဏိတ္ဝာ သဗ္ဗာနေဝ အဋ္ဌကဝဂ္ဂိကာနိ သရေန အဘာသိ။ အထ ခော ဘဂဝာ အာယသ္မတော သောဏသ္သ သရဘညပရိယောသာနေ အဗ္ဘာနုမောဒိ – ‘‘သာဓု, သာဓု, ဘိက္ခု။ သုဂ္ဂဟိတာနိ ခော တေ, ဘိက္ခု, အဋ္ဌကဝဂ္ဂိကာနိ , သုမနသိကတာနိ သူပဓာရိတာနိ။ ကလ္ယာဏိယာပိ ဝာစာယ သမန္နာဂတော, ဝိသ္သဋ္ဌာယ, အနေလဂလာယ 3, အတ္ထသ္သ ဝိညာပနိယာ။ ကတိဝသ္သောသိ တ္ဝံ, ဘိက္ခူ’’တိ? ‘‘ဧကဝသ္သောဟံ, ဘဂဝာ’’တိ။ ‘‘ကိသ္သ ပန တ္ဝံ, ဘိက္ခု, ဧဝံ စိရံ အကာသီ’’တိ? ‘‘စိရံ ဒိဋ္ဌော မေ, ဘန္တေ, ကာမေသု အာဒီနဝော, အပိ စ သမ္ဗာဓာ ဃရာဝာသာ ဗဟုကိစ္စာ ဗဟုကရဏီယာ’’တိ။ အထ ခော ဘဂဝာ ဧတမတ္ထံ ဝိဒိတ္ဝာ တာယံ ဝေလာယံ ဣမံ ဥဒာနံ ဥဒာနေသိ –
258. Atha kho bhagavā bahudeva rattiṃ ajjhokāse vītināmetvā vihāraṃ pāvisi. Āyasmāpi kho soṇo bahudeva rattiṃ ajjhokāse vītināmetvā vihāraṃ pāvisi. Atha kho bhagavā rattiyā paccūsasamayaṃ paccuṭṭhāya āyasmantaṃ soṇaṃ ajjhesi – ‘‘paṭibhātu taṃ, bhikkhu, dhammo bhāsitu’’nti. ‘‘Evaṃ, bhante’’ti kho āyasmā soṇo bhagavato paṭissuṇitvā sabbāneva aṭṭhakavaggikāni sarena abhāsi. Atha kho bhagavā āyasmato soṇassa sarabhaññapariyosāne abbhānumodi – ‘‘sādhu, sādhu, bhikkhu. Suggahitāni kho te, bhikkhu, aṭṭhakavaggikāni , sumanasikatāni sūpadhāritāni. Kalyāṇiyāpi vācāya samannāgato, vissaṭṭhāya, anelagalāya 4, atthassa viññāpaniyā. Kativassosi tvaṃ, bhikkhū’’ti? ‘‘Ekavassohaṃ, bhagavā’’ti. ‘‘Kissa pana tvaṃ, bhikkhu, evaṃ ciraṃ akāsī’’ti? ‘‘Ciraṃ diṭṭho me, bhante, kāmesu ādīnavo, api ca sambādhā gharāvāsā bahukiccā bahukaraṇīyā’’ti. Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
အရိယော န ရမတီ ပာပေ၊ ပာပေ န ရမတီ သုစီ’’တိ။
Ariyo na ramatī pāpe, pāpe na ramatī sucī’’ti.
အထ ခော အာယသ္မာ သောဏော – ပဋိသမ္မောဒတိ ခော မံ ဘဂဝာ, အယံ ခ္ဝသ္သ ကာလော ယံ မေ ဥပဇ္ဈာယော ပရိဒသ္သီတိ – ဥဋ္ဌာယာသနာ ဧကံသံ ဥတ္တရာသင္ဂံ ကရိတ္ဝာ ဘဂဝတော ပာဒေသု သိရသာ နိပတိတ္ဝာ ဘဂဝန္တံ ဧတဒဝောစ – ‘‘ဥပဇ္ဈာယော မေ, ဘန္တေ, အာယသ္မာ မဟာကစ္စာနော ဘဂဝတော ပာဒေ သိရသာ ဝန္ဒတိ, ဧဝဉ္စ ဝဒေတိ အဝန္တိဒက္ခိဏာပထော, ဘန္တေ, အပ္ပဘိက္ခုကော။ တိဏ္ဏံ မေ ဝသ္သာနံ အစ္စယေန ကိစ္ဆေန ကသိရေန တတော တတော ဒသဝဂ္ဂံ ဘိက္ခုသင္ဃံ သန္နိပာတာပေတ္ဝာ ဥပသမ္ပဒံ အလတ္ထံ, အပ္ပေဝ နာမ ဘဂဝာ အဝန္တိဒက္ခိဏာပထေ အပ္ပတရေန ဂဏေန ဥပသမ္ပဒံ အနုဇာနေယ္ယ။ အဝန္တိဒက္ခိဏာပထေ, ဘန္တေ, ကဏ္ဟုတ္တရာ ဘူမိ ခရာ ဂောကဏ္ဋကဟတာ; အပ္ပေဝ နာမ ဘဂဝာ အဝန္တိဒက္ခိဏာပထေ ဂုဏင္ဂုဏူပာဟနံ အနုဇာနေယ္ယ။ အဝန္တိဒက္ခိဏာပထေ, ဘန္တေ, နဟာနဂရုကာ မနုသ္သာ ဥဒကသုဒ္ဓိကာ, အပ္ပေဝ နာမ ဘဂဝာ အဝန္တိဒက္ခိဏာပထေ ဓုဝနဟာနံ အနုဇာနေယ္ယ။ အဝန္တိဒက္ခိဏာပထေ, ဘန္တေ, စမ္မာနိ အတ္ထရဏာနိ, ဧဠကစမ္မံ အဇစမ္မံ မိဂစမ္မံ။ သေယ္ယထာပိ, ဘန္တေ, မဇ္ဈိမေသု ဇနပဒေသု ဧရဂူ မောရဂူ မဇ္ဇာရူ ဇန္တူ , ဧဝမေဝ ခော, ဘန္တေ, အဝန္တိဒက္ခိဏာပထေ စမ္မာနိ အတ္ထရဏာနိ, ဧဠကစမ္မံ အဇစမ္မံ မိဂစမ္မံ; အပ္ပေဝ နာမ ဘဂဝာ အဝန္တိဒက္ခိဏာပထေ စမ္မာနိ အတ္ထရဏာနိ အနုဇာနေယ္ယ, ဧဠကစမ္မံ အဇစမ္မံ မိဂစမ္မံ။ ဧတရဟိ, ဘန္တေ, မနုသ္သာ နိသ္သီမဂတာနံ ဘိက္ခူနံ စီဝရံ ဒေန္တိ – ‘ဣမံ စီဝရံ ဣတ္ထန္နာမသ္သ ဒေမာ’တိ။ တေ အာဂန္တ္ဝာ အာရောစေန္တိ – ‘ဣတ္ထန္နာမေဟိ တေ, အာဝုသော, မနုသ္သေဟိ စီဝရံ ဒိန္န’န္တိ။ တေ ကုက္ကုစ္စာယန္တာ န သာဒိယန္တိ – ‘မာ နော နိသ္သဂ္ဂိယံ အဟောသီ’တိ; အပ္ပေဝ နာမ ဘဂဝာ စီဝရေ ပရိယာယံ အာစိက္ခေယ္ယာ’’တိ။
Atha kho āyasmā soṇo – paṭisammodati kho maṃ bhagavā, ayaṃ khvassa kālo yaṃ me upajjhāyo paridassīti – uṭṭhāyāsanā ekaṃsaṃ uttarāsaṅgaṃ karitvā bhagavato pādesu sirasā nipatitvā bhagavantaṃ etadavoca – ‘‘upajjhāyo me, bhante, āyasmā mahākaccāno bhagavato pāde sirasā vandati, evañca vadeti avantidakkhiṇāpatho, bhante, appabhikkhuko. Tiṇṇaṃ me vassānaṃ accayena kicchena kasirena tato tato dasavaggaṃ bhikkhusaṅghaṃ sannipātāpetvā upasampadaṃ alatthaṃ, appeva nāma bhagavā avantidakkhiṇāpathe appatarena gaṇena upasampadaṃ anujāneyya. Avantidakkhiṇāpathe, bhante, kaṇhuttarā bhūmi kharā gokaṇṭakahatā; appeva nāma bhagavā avantidakkhiṇāpathe guṇaṅguṇūpāhanaṃ anujāneyya. Avantidakkhiṇāpathe, bhante, nahānagarukā manussā udakasuddhikā, appeva nāma bhagavā avantidakkhiṇāpathe dhuvanahānaṃ anujāneyya. Avantidakkhiṇāpathe, bhante, cammāni attharaṇāni, eḷakacammaṃ ajacammaṃ migacammaṃ. Seyyathāpi, bhante, majjhimesu janapadesu eragū moragū majjārū jantū , evameva kho, bhante, avantidakkhiṇāpathe cammāni attharaṇāni, eḷakacammaṃ ajacammaṃ migacammaṃ; appeva nāma bhagavā avantidakkhiṇāpathe cammāni attharaṇāni anujāneyya, eḷakacammaṃ ajacammaṃ migacammaṃ. Etarahi, bhante, manussā nissīmagatānaṃ bhikkhūnaṃ cīvaraṃ denti – ‘imaṃ cīvaraṃ itthannāmassa demā’ti. Te āgantvā ārocenti – ‘itthannāmehi te, āvuso, manussehi cīvaraṃ dinna’nti. Te kukkuccāyantā na sādiyanti – ‘mā no nissaggiyaṃ ahosī’ti; appeva nāma bhagavā cīvare pariyāyaṃ ācikkheyyā’’ti.
၂၅၉. အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘အဝန္တိဒက္ခိဏာပထော, ဘိက္ခဝေ, အပ္ပဘိက္ခုကော။ အနုဇာနာမိ, ဘိက္ခဝေ, သဗ္ဗပစ္စန္တိမေသု ဇနပဒေသု ဝိနယဓရပဉ္စမေန ဂဏေန ဥပသမ္ပဒံ။ တတ္ရိမေ ပစ္စန္တိမာ ဇနပဒာ – ပုရတ္ထိမာယ ဒိသာယ ဂဇင္ဂလံ 7 နာမ နိဂမော, တသ္သ ပရေန မဟာသာလာ, တတော ပရာ ပစ္စန္တိမာ ဇနပဒာ, ဩရတော မဇ္ဈေ; ပုရတ္ထိမဒက္ခိဏာယ ဒိသာယ သလ္လဝတီ 8 နာမ နဒီ, တတော ပရာ ပစ္စန္တိမာ ဇနပဒာ, ဩရတော မဇ္ဈေ; ဒက္ခိဏာယ ဒိသာယ သေတကဏ္ဏိကံ နာမ နိဂမော, တတော ပရာ ပစ္စန္တိမာ ဇနပဒာ, ဩရတော မဇ္ဈေ; ပစ္ဆိမာယ ဒိသာယ ထူဏံ နာမ ဗ္ရာဟ္မဏဂာမော, တတော ပရာ ပစ္စန္တိမာ ဇနပဒာ, ဩရတော မဇ္ဈေ; ဥတ္တရာယ ဒိသာယ ဥသီရဒ္ဓဇော နာမ ပဗ္ဗတော, တတော ပရာ ပစ္စန္တိမာ ဇနပဒာ, ဩရတော မဇ္ဈေ ။ အနုဇာနာမိ, ဘိက္ခဝေ, ဧဝရူပေသု ပစ္စန္တိမေသု ဇနပဒေသု ဝိနယဓရပဉ္စမေန ဂဏေန ဥပသမ္ပဒံ။ အဝန္တိဒက္ခိဏာပထေ, ဘိက္ခဝေ, ကဏ္ဟုတ္တရာ ဘူမိ ခရာ ဂောကဏ္ဋကဟတာ။ အနုဇာနာမိ, ဘိက္ခဝေ, သဗ္ဗပစ္စန္တိမေသု ဇနပဒေသု ဂုဏင္ဂုဏူပာဟနံ။ အဝန္တိဒက္ခိဏာပထေ, ဘိက္ခဝေ, နဟာနဂရုကာ မနုသ္သာ ဥဒကသုဒ္ဓိကာ။ အနုဇာနာမိ, ဘိက္ခဝေ, သဗ္ဗပစ္စန္တိမေသု ဇနပဒေသု ဓုဝနဟာနံ။ အဝန္တိဒက္ခိဏာပထေ, ဘိက္ခဝေ, စမ္မာနိ အတ္ထရဏာနိ, ဧဠကစမ္မံ အဇစမ္မံ မိဂစမ္မံ။ သေယ္ယထာပိ, ဘိက္ခဝေ, မဇ္ဈိမေသု ဇနပဒေသု ဧရဂူ မောရဂူ မဇ္ဇာရူ ဇန္တူ, ဧဝမေဝ ခော, ဘိက္ခဝေ, အဝန္တိဒက္ခိဏာပထေ စမ္မာနိ အတ္ထရဏာနိ, ဧဠကစမ္မံ အဇစမ္မံ မိဂစမ္မံ။ အနုဇာနာမိ, ဘိက္ခဝေ, သဗ္ဗပစ္စန္တိမေသု ဇနပဒေသု စမ္မာနိ အတ္ထရဏာနိ, ဧဠကစမ္မံ အဇစမ္မံ မိဂစမ္မံ။ ဣဓ ပန, ဘိက္ခဝေ, မနုသ္သာ နိသ္သီမဂတာနံ ဘိက္ခူနံ စီဝရံ ဒေန္တိ – ‘ဣမံ စီဝရံ ဣတ္ထန္နာမသ္သ ဒေမာ’တိ။ အနုဇာနာမိ, ဘိက္ခဝေ, သာဒိတုံ, န တာဝ တံ ဂဏနူပဂံ ယာဝ န ဟတ္ထံ ဂစ္ဆတီ’’တိ။
259. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘avantidakkhiṇāpatho, bhikkhave, appabhikkhuko. Anujānāmi, bhikkhave, sabbapaccantimesu janapadesu vinayadharapañcamena gaṇena upasampadaṃ. Tatrime paccantimā janapadā – puratthimāya disāya gajaṅgalaṃ 9 nāma nigamo, tassa parena mahāsālā, tato parā paccantimā janapadā, orato majjhe; puratthimadakkhiṇāya disāya sallavatī 10 nāma nadī, tato parā paccantimā janapadā, orato majjhe; dakkhiṇāya disāya setakaṇṇikaṃ nāma nigamo, tato parā paccantimā janapadā, orato majjhe; pacchimāya disāya thūṇaṃ nāma brāhmaṇagāmo, tato parā paccantimā janapadā, orato majjhe; uttarāya disāya usīraddhajo nāma pabbato, tato parā paccantimā janapadā, orato majjhe . Anujānāmi, bhikkhave, evarūpesu paccantimesu janapadesu vinayadharapañcamena gaṇena upasampadaṃ. Avantidakkhiṇāpathe, bhikkhave, kaṇhuttarā bhūmi kharā gokaṇṭakahatā. Anujānāmi, bhikkhave, sabbapaccantimesu janapadesu guṇaṅguṇūpāhanaṃ. Avantidakkhiṇāpathe, bhikkhave, nahānagarukā manussā udakasuddhikā. Anujānāmi, bhikkhave, sabbapaccantimesu janapadesu dhuvanahānaṃ. Avantidakkhiṇāpathe, bhikkhave, cammāni attharaṇāni, eḷakacammaṃ ajacammaṃ migacammaṃ. Seyyathāpi, bhikkhave, majjhimesu janapadesu eragū moragū majjārū jantū, evameva kho, bhikkhave, avantidakkhiṇāpathe cammāni attharaṇāni, eḷakacammaṃ ajacammaṃ migacammaṃ. Anujānāmi, bhikkhave, sabbapaccantimesu janapadesu cammāni attharaṇāni, eḷakacammaṃ ajacammaṃ migacammaṃ. Idha pana, bhikkhave, manussā nissīmagatānaṃ bhikkhūnaṃ cīvaraṃ denti – ‘imaṃ cīvaraṃ itthannāmassa demā’ti. Anujānāmi, bhikkhave, sādituṃ, na tāva taṃ gaṇanūpagaṃ yāva na hatthaṃ gacchatī’’ti.
မဟာကစ္စာနသ္သ ပဉ္စဝရပရိဒသ္သနာ နိဋ္ဌိတာ။
Mahākaccānassa pañcavaraparidassanā niṭṭhitā.
စမ္မက္ခန္ဓကော ပဉ္စမော။
Cammakkhandhako pañcamo.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / သဗ္ဗစမ္မပဋိက္ခေပာဒိကထာ • Sabbacammapaṭikkhepādikathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / သောဏကုဋိကဏ္ဏဝတ္ထုကထာဝဏ္ဏနာ • Soṇakuṭikaṇṇavatthukathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / သဗ္ဗစမ္မပဋိက္ခေပာဒိကထာဝဏ္ဏနာ • Sabbacammapaṭikkhepādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ဂိဟိဝိကတာနုညာတာဒိကထာဝဏ္ဏနာ • Gihivikatānuññātādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၅၇. သောဏကုဋိကဏ္ဏဝတ္ထုကထာ • 157. Soṇakuṭikaṇṇavatthukathā
