| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
6. மஹாகச்சானஸுத்தவண்ணனா
6. Mahākaccānasuttavaṇṇanā
26. ச²ட்டே² ஸம்பா³தே⁴தி வா தண்ஹாஸங்கிலேஸாதீ³னங் ஸம்பீளே ஸங்கரே க⁴ராவாஸே. ஓகாஸா வுச்சந்தீதி மக்³க³ப²லஸுகா²தி⁴க³மாய ஓகாஸபா⁴வதோ ஓகாஸாதி வுச்சந்தி. ஓகாஸாதி⁴க³மோதி லோகுத்தரத⁴ம்மஸ்ஸ அதி⁴க³மாய அதி⁴க³ந்தப்³ப³ஓகாஸோ. விஸுஜ்ஜ²னத்தா²யாதி ராகா³தீ³ஹி மலேஹி அபி⁴ஜ்ஜா²விஸமலோபா⁴தீ³ஹி ச உபக்கிலிட்ட²சித்தானங் விஸுத்³த⁴த்தா²ய. ஸா பனாயங் சித்தஸ்ஸ விஸுத்³தி⁴ ஸிஜ்ஜ²மானா யஸ்மா ஸோகாதீ³னங் அனுபாதா³ய ஸங்வத்ததி, தஸ்மா வுத்தங் ‘‘ஸோகபரிதே³வானங் ஸமதிக்கமாயா’’திஆதி³. தத்த² ஸோசனங் ஞாதிப்³யஸனாதி³னிமித்தங் சேதஸோ ஸந்தாபோ அந்தோதாபோ அந்தோனிஜ்ஜா²னங் ஸோகோ, ஞாதிப்³யஸனாதி³னிமித்தமேவ ஸோசிகதா. ‘‘கஹங் ஏகபுத்தகா’’திஆதி³னா (ம॰ நி॰ 2.353-354; ஸங்॰ நி॰ 2.63) பரிதே³வனவஸேன லபனங் பரிதே³வோ. ஸமதிக்கமனத்தா²யாதி பஹானாய. ஆயதிங் அனுப்பஜ்ஜனஞ்ஹி இத⁴ ஸமதிக்கமோ. து³க்க²தோ³மனஸ்ஸானங் அத்த²ங்க³மாயாதி காயிகது³க்க²ஸ்ஸ ச சேதஸிகதோ³மனஸ்ஸஸ்ஸ சாதி இமேஸங் த்³வின்னங் அத்த²ங்க³மாய, நிரோதா⁴யாதி அத்தோ². ஞாயதி நிச்ச²யேன கமதி நிப்³பா³னங், தங் வா ஞாயதி படிவிஜ்ஜ²தி ஏதேனாதி ஞாயோ, அரியமக்³கோ³. இத⁴ பன ஸஹ புப்³ப³பா⁴கே³ன அரியமக்³கோ³ க³ஹிதோதி ஆஹ ‘‘ஸஹவிபஸ்ஸனகஸ்ஸ மக்³க³ஸ்ஸ அதி⁴க³மனத்தா²யா’’தி. அபச்சயபரினிப்³பா³னஸ்ஸாதி அனுபாதி³ஸேஸனிப்³பா³னங் ஸந்தா⁴ய வத³தி. பச்சயவஸேன அனுப்பன்னங் அஸங்க²தங் அமததா⁴துமேவ. ஸேஸமெத்த² உத்தானமேவ.
26. Chaṭṭhe sambādheti vā taṇhāsaṃkilesādīnaṃ sampīḷe saṅkare gharāvāse. Okāsā vuccantīti maggaphalasukhādhigamāya okāsabhāvato okāsāti vuccanti. Okāsādhigamoti lokuttaradhammassa adhigamāya adhigantabbaokāso. Visujjhanatthāyāti rāgādīhi malehi abhijjhāvisamalobhādīhi ca upakkiliṭṭhacittānaṃ visuddhatthāya. Sā panāyaṃ cittassa visuddhi sijjhamānā yasmā sokādīnaṃ anupādāya saṃvattati, tasmā vuttaṃ ‘‘sokaparidevānaṃ samatikkamāyā’’tiādi. Tattha socanaṃ ñātibyasanādinimittaṃ cetaso santāpo antotāpo antonijjhānaṃ soko, ñātibyasanādinimittameva socikatā. ‘‘Kahaṃ ekaputtakā’’tiādinā (ma. ni. 2.353-354; saṃ. ni. 2.63) paridevanavasena lapanaṃ paridevo. Samatikkamanatthāyāti pahānāya. Āyatiṃ anuppajjanañhi idha samatikkamo. Dukkhadomanassānaṃ atthaṅgamāyāti kāyikadukkhassa ca cetasikadomanassassa cāti imesaṃ dvinnaṃ atthaṅgamāya, nirodhāyāti attho. Ñāyati nicchayena kamati nibbānaṃ, taṃ vā ñāyati paṭivijjhati etenāti ñāyo, ariyamaggo. Idha pana saha pubbabhāgena ariyamaggo gahitoti āha ‘‘sahavipassanakassa maggassa adhigamanatthāyā’’ti. Apaccayaparinibbānassāti anupādisesanibbānaṃ sandhāya vadati. Paccayavasena anuppannaṃ asaṅkhataṃ amatadhātumeva. Sesamettha uttānameva.
மஹாகச்சானஸுத்தவண்ணனா நிட்டி²தா.
Mahākaccānasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. மஹாகச்சானஸுத்தங் • 6. Mahākaccānasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. மஹாகச்சானஸுத்தவண்ணனா • 6. Mahākaccānasuttavaṇṇanā
